တၢ်မၤလိ ၇၄
ယ့ၣ်ၡူးကဲထီၣ် မ့းၡံအၤ
စီၤယိၤဟၣ် စံၣ်တဲၤတဲလီၤဝဲလၢ ‘ပှၤလၢအကဟဲတဂၤန့ၣ် အဒိၣ်န့ၢ်ယၤ.’ ဖဲယ့ၣ်ၡူး အိၣ်အနံၣ် ၃၀ ဃၣ်ဃၣ်အခါ အဝဲအိၣ်လၢ ကီၢ်ကၤလံၤလါ ဒီးလဲၤဝဲလၢ ယၢ်ဒ့ၣ်အထံကျိ. ဖဲန့ၣ်န့ၣ် စီၤယိၤဟၣ်ဒိးဘျၢ ပှၤဂၤလၢထံ. ယ့ၣ်ၡူးအဲၣ်ဒိးဝဲလၢ စီၤယိၤဟၣ် ကဒိးဘျၢအီၤလၢထံ. ဘၣ်ဆၣ် စီၤယိၤဟၣ်တဲအီၤလၢ ‘ယတကြၢး ဒိးဘျၢနၤလၢထံဘၣ်. နကဘၣ် ဒိးဘျၢယၤလၢထံဟီ.’ ယ့ၣ်ၡူး တဲဆၢက့ၤအီၤလၢ ‘ယဟိဝၤယွၤ အဲၣ်ဒိးဝဲလၢ နကဒိးဘျၢယၤလၢထံ.’ အဃိ အဝဲသ့ၣ်လဲၤလီၤလၢ ယၢ်ဒ့ၣ်ထံကျိပူၤ ဒီးစီၤယိၤဟၣ် ဘျၢလီၤယ့ၣ်ၡူး လၢထံကျါဒီတဂၤညါ.
ယ့ၣ်ၡူးဟဲက့ၤထီၣ်လၢ ထံကျါဝံၤဒီး အဝဲဃ့ဘါထုကဖၣ်တၢ်. ဖဲန့ၣ်အဆၢကတီၢ် မူခိၣ်အိးထီၣ်အသး ဒီးယွၤအသးစီဆှံ ဟဲလီၤလၢ ယ့ၣ်ၡူးအလိၤ ဒ်ထိၣ်လွံၢ်အသိး. ဒီးယဟိဝၤယွၤ အကလုၢ်သီၣ်ထီၣ်လၢ မူခိၣ် ဒီးတဲဝဲလၢ “နမ့ၢ် ယဖိခွါလၢယအဲၣ် ဒီးယဘၣ်သူၣ်ဘၣ်သးနၤ.”
ဖဲယဟိဝၤယွၤ အသးစီဆှံဟဲလီၤလၢ ယ့ၣ်ၡူးလိၤအခါ အဝဲကဲထီၣ်ဝဲခရံာ် မ့တမ့ၢ် မ့းၡံအၤ. ဒီးယ့ၣ်ၡူးစးထီၣ်မၤဝဲ တၢ်မၤလၢ ယဟိဝၤယွၤ မၢအမၤဝဲ.
ယ့ၣ်ၡူးဒိးဘျၢထံ ဝံၤအလီၢ်ခံန့ၣ် အလဲၤဝဲလၢ ပှၢ်မုၢ်ကနၢအပူၤ ဒီးအအိၣ်ဖဲန့ၣ် အသီ ၄၀. ဖဲယ့ၣ်ၡူးဟဲက့ၤအခါ အဝဲလဲၤထံၣ်လိာ်အသးဒီး စီၤယိၤဟၣ်. ဒီးဖဲယ့ၣ်ၡူး လဲၤလၢအအိၣ်အခါ စီၤယိၤဟၣ်တဲဝဲလၢ ‘အဝဲမ့ၢ် ယွၤအသိဖိလၢ အကစိာ်ထီၣ်ကွံာ် ဟီၣ်ခိၣ် အတၢ်ဒဲးဘး.’ ခီဖျိ စီၤယိၤဟၣ် တဲဝဲဒ်အံၤအဃိ ပှၤဂီၢ်မုၢ်တဖၣ် သ့ၣ်ညါဝဲလၢ ယ့ၣ်ၡူးမ့ၢ် မ့းၡံအၤ. ဖဲယ့ၣ်ၡူးအိၣ်လၢ ပှၢ်မုၢ်ကနၢအခါ တၢ်ကဲထီၣ်သးဒီးအီၤဒ်လဲၣ်. တၢ်မၤလိလၢခံတခါ ကပာ်ဖျါထီၣ်ဝဲ.
“တၢ်ကလုၢ်သီၣ်ထီၣ်လၢ မူခိၣ်လၢ ‘နမ့ၢ် ယဖိခွါလၢယအဲၣ် ဒီးယဘၣ်သူၣ်ဘၣ်သးနၤလီၤ.’”—မၢ်ကူး ၁:၁၁