ယ့ၣ်ၡူးဒုးအီၣ်ပှၤဂီၢ်မုၢ်တၢ်အီၣ် အဂ့ၢ်

တၢ်လီၤပျံၤတခါ မၤတ့ၢ်အသးန့ၣ်လီၤ. ပှၤဘျၢတၢ်ယိၤဟၣ် ဘၣ်တၢ်မၤသံအီၤအိၣ်ဒၣ်ခဲအံၤဒံးလီၤ. စီၤပၤအနီၢ်ပၤမုၣ်ဧ့ၤရိၤဒံန့ၣ် တဘၣ်အသးလၢယိၤဟၣ်ဘၣ်. လၢတၢ်န့ၣ်အဃိ ကျဲၤန့ၢ်ဝဲလၢ စီၤပၤမၢ ယိၤဟၣ်အခိၣ်ဘၣ်တၢ်ကျီတဲာ်န့ၣ်လီၤ.

ဖဲယ့ၣ်ၡူးနၢ်ဟူဝဲတၢ်ဂ့ၢ်အံၤအခါ သးအုးဝဲဒိၣ်မးန့ၣ်လီၤ. ဟးထီၣ်ဝဲဆူတၢ်ဘှ့ၣ်တၢ်ဘှီၣ်အလီၢ်ကစုဒု ထဲတဂၤဧိၤန့ၣ်လီၤ. ဘၣ်ဆၣ် ပှၤတဖၣ်န့ၣ်လဲၤပိာ်ဝဲအခံန့ၣ်လီၤ. ဖဲယ့ၣ်ၡူးထံၣ်ဝဲပှၤဂီၢ်မုၢ်အခါ သးကညီၤဘၣ်အဝဲသ့ၣ်န့ၣ်လီၤ. လၢတၢ်အံၤအဃိ စံၣ်တဲၤတဲလီၤန့ၢ်ဝဲ ယွၤအဘီအမုၢ်အဂ့ၢ် ဒီးမၤဘျါက့ၤဝဲ ပှၤဆူးပှၤဆါတဖၣ်န့ၣ်လီၤ.

ဖဲဟါအဝဲန့ၣ် အပျဲၢ်တဖၣ်ဟဲဆူအအိၣ်ဒီး တဲဘၣ်အီၤ ‘ကစၢ်ဧၢ, ခဲအံၤ မုၢ်ဃ့ၢ်လီၤလံ. တၢ်လီၢ်အံၤမ့ၢ်တၢ်လီၢ်လၢ တဘူးဒီးပှၤကူပှၤကညီန့ၣ်ဘၣ်လီၤ. ပျၢ်ကွံာ်ပှၤဂီၢ်မုၢ်လၢ ကလဲၤဃုပှ့ၤအီၣ်တၢ်အီၣ်တၢ်အီအကစၢ်ဒၣ်ဝဲ လၢသဝီအဘူးအတံၢ်တဖၣ်န့ၣ်တက့ၢ်’ န့ၣ်လီၤ.

ယ့ၣ်ၡူးစံးဆၢလၢ ‘အဝဲသ့ၣ်လဲၤဝဲအလီၢ်တအိၣ်ဘၣ်. လၢအဝဲသ့ၣ်ကအီၣ်အဂီၢ် ဟ့ၣ်အီၣ်အဝဲသ့ၣ် တၢ်တမံၤမံၤတက့ၢ်.’ ယၣ်ၡူးစံးဝဲဒ်န့ၣ်ဝံၤဒီး တရံးအသးဆူဖံလံးပူးအအိၣ်ဒီး သံကွၢ်ဝဲ, ‘တၢ်အီၣ်လၢ ပှၤခဲလၢာ်အံၤအီၣ်ကလၢဝဲအဂီၢ် လဲၤပှ့ၤအီၤကန့ၢ်ဖဲလဲၣ်.’ န့ၣ်လီၤ.

ဖံလံးပူးစံးဆၢဝဲဒၣ်, ‘ပှၤကိးဂၤဒဲး ကအီၣ်ဘၣ်တဂၤတစဲးဖိအဂီၢ်ဒၣ်လဲာ် စ့ကလၢာ်အါဒိၣ်မးန့ၣ်လီၤ.’ အၣ်ဒရ့းတခီ စံးဝဲဒၣ်, ‘ဖိသၣ်ဝဲအံၤလၢ အစိာ်တၢ်အီၣ်အအိၣ်န့ၣ် အိၣ်ကိၣ်ယဲၢ်ဖျၢၣ် ဒီးညၣ်ခံဘ့ၣ်န့ၣ်လီၤ. ဘၣ်ဆၣ် ပှၤခဲလၢာ် အီၣ်ကလၢအဂီၢ်န့ၣ် ယံၤဒံးခီလီၤ.’

ယ့ၣ်ၡူးစံးဝဲဒၣ် ‘မၢပှၤတဖၣ်ဆ့ၣ်နီၤလၢနီၢ်ဖီခိၣ်တက့ၢ်’ န့ၣ်လီၤ. ဝံၤဒီး စံးထီၣ်ပတြၢၤကစၢ်ယွၤအဘျုးအဖှိၣ် လၢတၢ်အီၣ်အဂီၢ်ဝံၤ စိၢ်ဘျဲးဝဲ ကိၣ်ဒီးညၣ်တဖၣ်န့ၣ်လီၤ. ဝံၤဒီးအပျဲၢ်တဖၣ် နီၤလီၤကိၣ်ဒီးညၣ်လၢပှၤခဲလၢာ်န့ၣ်လီၤ. တၢ်လီၢ်ဖဲန့ၣ် ထဲပိာ်ခွါအိၣ် ၅,၀၀၀ န့ၣ်လီၤ. ပိာ်မုၣ်ဒီးဖိသၣ်တဖၣ်စ့ၢ်ကီး အိၣ်လၢအကထိတဖၣ်န့ၣ်လီၤ. အဝဲသ့ၣ်ခဲလၢာ်အီၣ်ဘၣ်ဝဲ တုၤအဘျဲးအီၣ်န့ၣ်လီၤ. အပျဲၢ်တဖၣ်ထၢဖှိၣ်က့ၤ တၢ်အိၣ်လီၤတဲာ်တ့ၢ်တဖၣ်ဒီး ပှဲၤကု ၁၂ ဖျၢၣ်န့ၣ်လီၤ.

တၢ်န့ၣ်ဝံၤအလီၢ်ခံ ယ့ၣ်ၡူးမၢအပျဲၢ်တဖၣ်ထီၣ်ဆူချံပူၤဝံၤ မၢအတၢ်လဲၤဆူနိၣ်ကၤလံၤလါတခီဝၢ်န့ၣ်လီၤ. တုၤလၢမုၢ်နၤအကတီၢ်အခါ ကလံၤမုၢ်လီၤဝဲဒၣ်န့ၣ်လီၤ. လပီတဖၣ်စံာ်စုာ်ချံဒီး ချံယဲၤယီၤစုစ့ၢ်စုထွဲလီၤ. အပျဲၢ်တဖၣ် ပျံၤတၢ်ဖုးတၢ်ဒိၣ်မးန့ၣ်လီၤ. တုၤလၢဖးဖီမုၢ်ဒီး ထံၣ်ဘၣ်ဝဲသ့ၣ် ပှၤတဂၤဟဲဆူအဝဲသ့ၣ်အအိၣ် လၢထံအဖီခိၣ်န့ၣ်လီၤ. လၢတၢ်ပျံၤတၢ်ဖုးအပူၤ ကိးဝဲသ့ၣ်န့ၣ်လီၤ. တၢ်လၢအထံၣ်ဝဲသ့ၣ်န့ၣ် မ့ၢ်တၢ်မနုၤလဲၣ်န့ၣ် တသ့ၣ်ညါဝဲသ့ၣ်အဃိလီၤ.

ယ့ၣ်ၡူးစံးဝဲဒၣ် ‘ပျံၤတၢ်တဂ့ၤ, မ့ၢ်ဒၣ်ယၤလီၤ.’ ထဲန့ၣ်ဒၣ်လဲာ် တအဲၣ်ဒိးနာ်ဝဲသ့ၣ်ဒံးဘၣ်. လၢတၢ်အံၤအဃိ, ပ့းတရူးစံးဝဲဒၣ်, ‘မ့မ့ၢ်နၤသၢပျၢၤန့ၣ် ကစၢ်ဧၢ, ခါလီၤနကလုၢ် လၢယကဟဲလၢထံဖီခိၣ် ဆူနအိၣ်တက့ၢ်’ န့ၣ်လီၤ. ဒီးယ့ၣ်ၡူးစံးအီၤ ‘ဟဲဧီၤ’ အခါ ပ့းတရူးဟးထီၣ်လၢချံပူၤဒီး ဟးဝဲလၢထံဖီခိၣ်န့ၣ်လီၤ. လၢတၢ်န့ၣ်အလီၢ်ခံ အတၢ်သးပျံၤဟဲနုာ်လီၤဒီး လီၤအုးထံန့ၣ်လီၤ. သနာ်က့ ယ့ၣ်ၡူးအုၣ်က့ၤခီၣ်က့ၤအီၤလီၤ.

လၢခံတကတီၢ်န့ၣ်စ့ၢ်ကီး ယ့ၣ်ၡူးဒုးအီၣ်ကဒီးဝဲ ပှၤလၢအကထိန့ၣ်လီၤ. ဖဲအဘျီအဝဲန့ၣ် ဒုးအီၣ်တ့ၢ်ဝဲ ကိၣ်နွံဖျၢၣ်ဒီးညၣ်ဖိစှၤကိာ်န့ၣ်လီၤ. ခဲအံၤတဘျီစ့ၢ်ကီး ပှၤခဲလၢာ်အီၣ်ဘၣ်ဝဲ လၢအီၣ်လၢအီန့ၣ်လီၤ. ယ့ၣ်ၡူးအံးထွဲကွၢ်ထွဲပှၤဒီး ဒုးအီၣ်ဒုးအီဝဲဒ်အံၤန့ၣ် တမ့ၢ်တၢ်လီၤကမၢကမၢ်ဘၣ်ဧါ. ယ့ၣ်ၡူးမ့ၢ်ကဲထီၣ် ယွၤအစီၤပၤဒီး ပၢတၢ်အခါန့ၣ် ပဝဲသ့ၣ်တဖၣ် တမ့ၢ်ပကဘၣ်ကိၢ်ဘၣ်ဂီၤလၢၤဘၣ်.