ပီလူးအပှၤမၤသကိးတၢ်အသီ တံၤမသ့း အဂ့ၢ်

ပှၤအိၣ်လၢတၢ်မၢဖိပီလူးအကပၤန့ၣ် မ့ၢ်ပှၤသးစၢ်တံၤမသ့းလီၤ. တံၤမသ့းန့ၣ် အိၣ်ဝဲဒၣ်ဒီး အပှၤဟံၣ်ဖိဃီဖိ လၢဝ့ၢ်လူစတြၤန့ၣ်လီၤ. အမိၢ်အမံၤမ့ၢ်ဝဲ အူၤနံ ဒီးအဖံအမံၤမ့ၢ် လိၤအ့ၣ်န့ၣ်လီၤ.

ပီလူးဟဲတုၤဆူဝ့ၢ်လူစတြၤအံၤ မ့ၢ်ကျဲၣ်ဃုာ်ဒီးတၢ်တဘျီအံၤန့ၣ် အိၣ်လံသၢဘျီလံန့ၣ်လီၤ. လၢအပူၤကွံာ်တနံၣ်ဘျဲၣ်ဘျဲၣ်န့ၣ် ပီလူးဒီးဘၢ်နါဘၤခံဂၤ ဟဲတုၤဝဲအဆိကတၢၢ်တဘျီ လၢကစံၣ်တဲၤတဲလီၤတၢ်အဂီၤန့ၣ်လီၤ. ခဲအံၤတဘျီ ပီလူးဟဲဝဲဒီး အသကိးစံလၤန့ၣ်လီၤ.

ပီလူးတဲတံၤမသ့းမနုၤလဲၣ်န့ၣ် သုသ့ၣ်ညါဧါ. တဲဝဲဒၣ်အီၤလၢ ‘နသးအိၣ်လဲၤပိာ် ယၤဒီးစံလၤအခံဧါ. ဖဲပစံၣ်တဲၤတဲလီၤ ပှၤလၢလီၢ်ယံၤတဖၣ်အခါ ပမၤန့ၢ်နတၢ်မၤစၢၤကသ့သၢၣ်’ န့ၣ်လီၤ.

တံၤမသ့းစံးဆၢဝဲ ‘မ့ၢ်, ယအဲၣ်ဒိးလဲၤဃုာ်လီၤ.’ ဒ်န့ၣ်အဃိ တယံာ်ဘၣ်ဒီး တံၤမသ့းန့ၣ် လဲၤဃုာ်တၢ်ဒီး ပီလူးဒီးစံလၤသ့ၣ်တဖၣ်န့ၣ်လီၤ. ဘၣ်ဆၣ် တချုးပစံးကတိၤဒံးဘၣ် အဝဲသ့ၣ်အတၢ်လဲၤန့ၣ် ပကကွၢ် တၢ်မၤတ့ၢ်အသးဒီးပီလူးဒ်လဲၣ် လၢညါန့ၣ်လီၤ. ယ့ၣ်ၡူးလီၣ်ဖျါထီၣ်တ့ၢ်အသးလၢအီၤ ဖဲကျဲလၢအလဲၤဆူဝ့ၢ်ဒၤမ့ၤစ့းန့ၣ် ယံာ်တ့ၢ် ၁၇ နံၣ်လံန့ၣ်လီၤ.

သုသ့ၣ်နီၣ်ဒံးဧါ. ပီလူးန့ၣ် လဲၤတ့ၢ်ဝဲဆူဝ့ၢ်ဒၤမ့ၤစ့း လၢကမၤနးမၤဖှီၣ် ယ့ၣ်ၡူးအပျဲၢ်တဖၣ်အဂီၢ် န့ၣ်ဘီၣ်. ဘၣ်ဆၣ်, မ့မ့ၢ်ခဲအံၤ အကစၢ်ဒၣ်ဝဲ ကဲထီၣ်လံယ့ၣ်ၡူးအပျဲၢ်တဂၤန့ၣ်လီၤ. လၢခံန့ၣ် ဒုၣ်ဒါတနီၤ တဘၣ်အသးလၢ အတၢ်စံၣ်တဲၤတဲလီၤယ့ၣ်ၡူးအဂ့ၢ်န့ၣ်အဃိ ကူၣ်ထီၣ်ဝဲသ့ၣ်လၢ ကမၤသံအီၤလီၤ. ဘၣ်ဆၣ်သနာ်က့ ယ့ၣ်ၡူးအပျဲၢ်တနီၤ မၤစၢၤပီလူးလၢ အသးသမူကပူၤဖျဲးအဂီၢ်န့ၣ်လီၤ. အဝဲသ့ၣ်တ့ၢ်နုာ်အီၤလၢ တီၣ်တဖျၢၣ်အပူၤဝံၤ စဲၤလီၤအီၤဆူ ဝ့ၢ်ခိၣ်ဒူအချၢတခီန့ၣ်လီၤ.

တၢ်န့ၣ်အလီၢ်ခံ, ပီလူးလဲၤစံၣ်တဲၤတဲလီၤတၢ်ဖဲ ဝ့ၢ်အၣ်တံၤအီာ်လီၤ. ဖဲဝ့ၢ်အဝဲန့ၣ်လီၤသၢၣ်, ပှၤပိာ်ယ့ၣ်ၡူးအခံတဖၣ် ဘၣ်တၢ်ကိးအီၤလၢခရံာ်ဖိ အဆိကတၢၢ်န့ၣ်လီၤ. အိၣ်ဖဲန့ၣ်ဝံၤ ပီလူးဒီး ဘၢ်နါဘၤန့ၣ် ဘၣ်တၢ်ဆှၢအီၤဆူ ထံယံၤကီၢ်ယံၤတဖၣ်လၢ ကစံၣ်တဲၤတဲလီၤတၢ်အဂီၢ်န့ၣ်လီၤ. ဝ့ၢ်လၢအဝဲသ့ၣ်လဲၤတုၤဝဲအကျါ ဝ့ၢ်တဝ့ၢ်န့ၣ် မ့ၢ်ဝဲ တံၤမသ့းအိၣ်အဝ့ၢ်, ဝ့ၢ်လူစတြၤန့ၣ်လီၤ.

ယံာ်တနံၣ်ဝံၤဒီး ပီလူးဟဲတုၤကဒီးလၢ ဝ့ၢ်လူစတြၤ လၢတၢ်လဲၤခံဘျီတဘျီအပူၤန့ၣ်လီၤ. ဖဲတံၤမသ့းလဲၤပိာ် ပီလူးဒီးစံလၤအခံအခါ အဝဲသ့ၣ်လဲၤဆူလဲၣ် သုသ့ၣ်ညါဧါ. ကွၢ်, ဟီၣ်ခိၣ်ဂီၤတက့ၢ်. ပကွၢ်သကိးတၢ်လီၢ်တနီၤလၢ အဝဲသ့ၣ်လဲၤတုၤဝဲန့ၣ်တက့ၢ်.

အဆိလဲၤဝဲသ့ၣ်ဆူ ဝ့ၢ်လၢအအိၣ်ဘူး အံၤကနံၤန့ၣ်လီၤ. ဝံၤဒီး လဲၤဝဲသ့ၣ်ဆူ လၢခံတဝ့ၢ် လၢတၢ်ကိးအီၤ အၣ်တံၤအီာ်န့ၣ်လီၤ. လၢတၢ်န့ၣ်အလီၢ်ခံ လဲၤဝဲသ့ၣ်ဆူ ဝ့ၢ်တြိၤအါစ့ၢ်ကီးန့ၣ်လီၤ. ဝံၤဒီး လဲၤတုၤဆူ ဖံလံးပံၤ, သ့းစၤလနံဒီး ဘ့းရံးတဖၣ်န့ၣ်လီၤ. သုထံၣ်ဝ့ၢ်အၤသ့ၣ်လၢဟီၣ်ခိၣ်ဂီၤပူၤန့ၣ်ဧါ. ပီလူးစံၣ်တဲၤတဲလီၤတၢ်ဖဲန့ၣ်လီၤ. လၢတၢ်န့ၣ်အလီၤခံ အဝဲသ့ၣ်စံၣ်တဲၤတဲလီၤတၢ်ဖဲ ဝ့ၢ်ကရံၣ်သူး ယံာ်တနံၢ်ဃုလါလီၤ. လၢခံကတၢၢ်န့ၣ် လဲၤနုာ်ဝဲသ့ၣ်ဆူ ဝ့ၢ်အ့းဖ့းစူးတစိၢ်ဖိန့ၣ်လီၤ. ဝံၤဒီး ဟဲက့ၤဝဲသ့ၣ်ဆူ ဝ့ၢ်ကဲၤစါရံၤ လၢကဘီန့ၣ်လီၤ. လၢတၢ်န့ၣ်အလီၤခံ ဟဲက့ၤကဒါက့ၤဝဲဆူ ဝ့ၢ်လၢပီလူးအိၣ် လၢအမ့ၢ်ဝ့ၢ်အၣ်တံၤအီာ်န့ၣ်လီၤ.

ဒ်န့ၣ်ဒီး တံၤမသ့းန့ၣ် လဲၤတၢ် တၢ်ဒ့ၣ်စၢၤယံၤအါမံးလးဒီး မၤစၢၤပီလူးလၢ တၢ်စံၣ်တဲၤတဲလီၤ “တၢ်သးခုကစီၣ်” ဒီးတၢ်သူၣ်ထီၣ် ခရံာ်ဖိတၢ်အိၣ်ဖှိၣ်တဖၣ်န့ၣ်လီၤ. ဖဲသုဒိၣ်ထိၣ်အခါ သုကမၤ ယွၤအခ့အပှၤလၢအသူၣ်တီသးတီ ဒ်တံၤမသ့းအသိးစ့ၢ်ကီးဧါ.