တၢ်မၤလိ ၉၈
ခရံာ်ဖိတၢ်ဘူၣ်တၢ်ဘါ ရၤလီၤအသးလၢ ထံကီၢ်အါဘ့ၣ်
တၢ်မၢဖိတဖၣ် ဒိကနၣ်ဝဲ ယ့ၣ်ၡူးအတၢ်မၤလိာ်လၢ ကဘၣ်စံၣ်တဲၤတဲလီၤဝဲ တၢ်သးခုကစီၣ်လၢ ဟီၣ်ခိၣ်ဒီဘ့ၣ်. ဖဲ ခ.န. ၄၇ နံၣ်န့ၣ် ဒီပုၢ်ဝဲၢ်တဖၣ်လၢ အၣ်တံၤအီာ် ဆှၢလီၤစီၤပီလူး ဒီးစီၤဘၢ်နါဘၤ လၢကလဲၤစံၣ်တဲၤတဲလီၤတၢ်လၢ ထံကီၢ်အဂၤ. ပှၤစံၣ်တဲၤတဲလီၤတၢ်ဖိလၢ အသးဆူၣ် ခံဂၤအံၤ လဲၤစံၣ်တဲၤတဲလီၤတၢ်လၢ တၢ်လီၢ်လၢ အၤစံကီၢ်ရ့ၣ်အပူၤ ဒ်သိးဒီး ဝ့ၢ်ဒ့ၢ်ဘ့ၤ, ဝ့ၢ်လူစတြၤ ဒီးဝ့ၢ်အံၤကနံၤအပူၤ.
ပှၤကဲဒိၣ်မ့ၢ်ဂ့ၤ ပှၤဖှီၣ်ဖိမ့ၢ်ဂ့ၤ ပှၤသးစၢ်မ့ၢ်ဂ့ၤ ပှၤသးပှၢ်တဖၣ်မ့ၢ်ဂ့ၤ စီၤပီလူး ဒီးစီၤဘၢ်နါဘၤ စံၣ်တဲၤတဲလီၤ အဝဲသ့ၣ်ကိးဂၤဒဲး. ပှၤအါဂၤတူၢ်လိာ်ဝဲ တၢ်မ့ၢ်တၢ်တီ ဘၣ်ဃးဒီးခရံာ်. ဖဲစီၤပီလူး ဒီးစီၤဘၢ်နါဘၤ စံၣ်တဲၤတဲလီၤတၢ်လၢ စီၤစ့ၢ်ကံပီလူး လၢအမ့ၢ်ဝဲ ကူပြူးပဒိၣ်အအိၣ်အခါ ပှၤအူတၢ်လိၢ်တၢ်တဂၤ ဂုာ်ကျဲးစၢး မၤပတုာ်အဝဲသ့ၣ်. စီၤပီလူးတဲဘၣ် ပှၤအူတၢ်လိၢ်တၢ်လၢ ‘ယဟိဝၤယွၤ ကစံၣ်ညီၣ်နၤ.’ တဘျီဃီန့ၣ် ပှၤအူတၢ်လိၢ်တၢ်တဂၤအံၤ အမဲာ်ချံ တထံၣ်တၢ်လၢၤဘၣ်. ပဒိၣ်စီၤစ့ၢ်ကံပီလူး ထံၣ်ဝဲတၢ်ကဲထီၣ်သးဒ်အံၤအဃိ အဝဲကဲထီၣ် ပှၤစူၢ်က့ၤနာ်က့ၤတၢ်.
စီၤပီလူး ဒီးစီၤဘၢ်နါဘၤ စံၣ်တဲၤတဲလီၤတၢ်လၢ ဟံၣ်တဖျၢၣ်ဘၣ်တဖျၢၣ်, လၢပှၤဆါတၢ်ပှ့ၤတၢ်အလီၢ်, လၢကျဲမုၢ်ခိၣ်, လၢဘူၣ်ဘျီၣ်အပူၤ ဒီးလၢတၢ်လီၢ်ကိးပူၤဒဲး. ဖဲအဝဲသ့ၣ်အိၣ်လၢ ဝ့ၢ်လူစတြၤအခါ မၤဘျါဝဲပိာ်ခွါလၢ အခီၣ်ဟးဂီၤတဂၤ. ပှၤဂီၢ်မုၢ်လၢအထံၣ်ဘၣ် တၢ်လီၤလးအံၤန့ၣ် ဆိကမိၣ်ဝဲလၢ စီၤပီလူး ဒီးစီၤဘၢ်နါဘၤ မ့ၢ်ဝဲယွၤတဖၣ်. အဃိ ပှၤဂီၢ်မုၢ်တဖၣ်အံၤ ဂုာ်ကျဲးစၢး ဘူၣ်ထီၣ်ဘါထီၣ် အဝဲသ့ၣ်. ဘၣ်ဆၣ် စီၤပီလူး ဒီးစီၤဘၢ်နါဘၤ တဲဘၣ်အဝဲသ့ၣ်လၢ ‘ပမ့ၢ်ပှၤဟီၣ်ခိၣ်ဖိဒ်သိးဒီးသုလီၤ. ဘူၣ်ထီၣ်ဘါထီၣ် ထဲကစၢ်ယွၤ တဂၤဧိၤတက့ၢ်.’ လၢခံ ပှၤယူဒၤဖိတနီၤ ဟဲဒီးတဲအၢတဲသီဝဲ စီၤပီလူးအဂ့ၢ် ဒ်သိး ပှၤဂီၢ်မုၢ်တဖၣ် ကသးဟ့အီၤအဂီၢ်. အဃိ ပှၤဂီၢ်မုၢ်တဖၣ် ကွံာ်စီၤပီလူးလၢလၢၢ်, တွံၢ်ထီၣ်အီၤလၢဝ့ၢ်ချၢ ဒီးပာ်တ့ၢ်အီၤဖဲန့ၣ်. ဘၣ်ဆၣ် စီၤပီလူးမူဒံးအဃိ ဒီပုၢ်ဝဲၢ်တဖၣ် ဟဲမၤစၢၤအီၤ ဒီးက့ၤကိးအီၤလၢ ဝ့ၢ်ပူၤတဘျီဃီ. လၢခံ စီၤပီလူး က့ၤကဒါလၢ ဝ့ၢ်အၣ်တံၤအီာ်.
ဖဲ ခ.န. ၄၉ နံၣ်န့ၣ် စီၤပီလူး လဲၤကဒီးတၢ် လၢအသီတဘျီ. အဆိကတၢၢ် အဝဲက့ၤထံၣ်လိာ်သးဒီး ဒီပုၢ်ဝဲၢ်လၢ အၤစံကီၢ်ရ့ၣ် ဝံၤအလီၢ်ခံ အဝဲလဲၤစံၣ်တဲၤတဲလီၤ တၢ်သးခုကစီၣ် လၢကီၢ်ယူရပၤ. စီၤပီလူး လဲၤဝဲလၢ အၤသ့ၣ်, အ့းဖ့းစူး, ဖံလံးပံၤ, သ့းစၤလနံ ဒီးတၢ်လီၢ်အဂၤတဖၣ်. စီၤစံလၤ, စီၤလူၤကၣ် ဒီးပှၤသးစၢ်လၢအမ့ၢ် စီၤတံၤမသ့းန့ၣ် လဲၤဃုာ်တၢ်ဒီးစီၤပီလူးလၢ အတၢ်လဲၤတၢ်က့ၤတဘျီအံၤ. အဝဲသ့ၣ် မၤသကိးတၢ်ဒ်သိး ကဒုးအိၣ်ထီၣ်ဝဲ တၢ်အိၣ်ဖှိၣ်တဖၣ် ဒီးမၤစၢၤဝဲ ဒီပုၢ်ဝဲၢ်ဖဲန့ၣ်တဖၣ်လၢ အဝဲသ့ၣ် အတၢ်နာ် ကဂၢၢ်ကျၢၤထီၣ်အဂီၢ်. အဒိ ဒ်သိးဒီပုၢ်ဝဲၢ်လၢ ကရံၣ်သူးတၢ်အိၣ်ဖှိၣ်ပူၤ အနီၢ်သးကဆူၣ်ထီၣ်အဂီၢ် စီၤပီလူးအိၣ်တ့ၢ်ဝဲဖဲန့ၣ် တနံၣ်ဒီးဃုလါ. စီၤပီလူး စံၣ်တဲၤတဲလီၤတၢ်, သိၣ်လိသီလိတၢ်, ဒီးကွဲးလံာ်ပရၢဆူ တၢ်အိၣ်ဖှိၣ်အါဖျၢၣ်အအိၣ်. ဒီးအဝဲမၤတၢ်မၤ ဒ်ပှၤဆးဒဲတဂၤအသိး. လၢခံ စီၤပီလူး က့ၤဝဲဆူ ဝ့ၢ်အၣ်တံၤအီာ်.
လၢခံ ဖဲ ခ.န. ၅၂ နံၣ်န့ၣ် စီၤပီလူး လဲၤကဒီးတၢ် သၢဘျီတဘျီ. အဆိကတၢၢ်န့ၣ် အဝဲလဲၤလၢ အၤစံကီၢ်ရ့ၣ် ဝံၤဒီး အဝဲလဲၤလၢ ကလံၤစိးတုၤလီၤလၢ ဖံလံးပံၤ ဒီးက့ၤလီၤဆူ ကရံၣ်သူး. စီၤပီလူးအိၣ်ဝဲလၢ အ့းဖ့းစူးအပူၤ တဘျုးနံၣ်ညါ. ဖဲန့ၣ်န့ၣ် အဝဲသိၣ်လိသီလိတၢ်, မၤဘျါက့ၤ ပှၤဆါဒီးမၤစၢၤတၢ်အိၣ်ဖှိၣ်. တကးဒံးဘၣ် ကိးနံၤဒဲးန့ၣ် စီၤပီလူး ဟ့ၣ်စ့ၢ်ကီး တၢ်စံၣ်တဲၤတဲလီၤတၢ် လၢကမျၢၢ်အဂီၢ် လၢကၠိတဖျၢၣ်အပူၤ. ပှၤအါဂၤဒိကနၣ်ဝဲ စီၤပီလူး အတၢ်စံၣ်တဲၤတဲလီၤ ဒီးအဝဲသ့ၣ် ဆီတလဲက့ၤ အတၢ်အိၣ်မူ. ဒီးဖဲစီၤပီလူး စံၣ်တဲၤတဲလီၤတၢ်သးခုကစီၣ်လၢ တၢ်လီၢ်အါတီၤ ဝံၤအလီၢ်ခံ အဝဲက့ၤကဒါက့ၤလၢ ဝ့ၢ်ယရူၤၡလ့ၣ်.
“လဲၤဒုးကဲထီၣ် ကယဲၢ်ပှၤကလုာ်တဖၣ် လၢယပျဲၢ်ယဘီၣ်တက့ၢ်.”—မးသဲ ၂၈:၁၉