ပိာ်ခွါဖိသၣ်တဂၤလၢ အမံဘၣ်အသး အဂ့ၢ်

အိ, တၢ်ကဲထီၣ်အသးဒ်လဲၣ်. ပိာ်ခွါဖိသၣ်လၢအိၣ်မံနီၤအသးအံၤန့ၣ် ဘၣ်ဒိဘၣ်ထံးဒိၣ်မးလီၤဧါ. ကွၢ်တဘီ. ပှၤတဖၣ်လၢ ဟဲဟးထီၣ်လၢဟံၣ်ပူၤအကျါ တဂၤန့ၣ် မ့ၢ်ဝဲပီလူးလီၤ. သုထံၣ်တံၤမသ့းစ့ၢ်ကီးဧါ. ပိာ်ခွါဖိသၣ်အံၤ မ့ၢ်လီၤတဲာ်လၢ ပဲတြီတခီဧါ.

မ့ၢ်ဝဲလီၤ. အိၣ်ဟဲလီၤတဲာ်လၢ ပဲတြီန့ၣ်လီၤ. ပီလူးန့ၣ် စံၣ်တဲၤတဲလီၤတၢ်လၢ ခရံာ်အပျဲၢ်အဘီၣ်တဖၣ်လၢ အအိၣ်လၢ ဝ့ၢ်တြိၤအါအံၤန့ၣ်လီၤ. လၢခံတနံၤန့ၣ် ကဘၣ်လဲၤတၢ်လၢကဘီအဃိ သ့ၣ်ညါဝဲဒၣ်လၢ တမ့ၢ်ကထံၣ်ဘၣ်က့ၤအီၤတကုၤသ့ၣ် ညီညီဘၣ်န့ၣ်လီၤ. လၢတၢ်န့ၣ်အဃိ အိၣ်ခိးကတိၤတၢ်ဒီးအဝဲသ့ၣ် တုၤလီၤလၢ ဖးဖီမုၢ်န့ၣ်လီၤ.

ပိာ်ခွါဖိသၣ်အံၤ အမံၤမ့ၢ် အူတူၤဃူးလီၤ. ဖဲကတီၢ်အဝဲန့ၣ် ဆ့ၣ်နီၤဝဲဒၣ်လၢ ပဲတြီလိၤဒီး မံသပ့ၤဘၣ်အသးလီၤ. ဒီးအဝဲလီၤတဲာ်လၢ ဟံၣ်သၢကထၢအကစီၤထီ အပဲတြီန့ၣ်လီၤသၢၣ်. လၢတၢ်န့ၣ်အဃိ နကထံၣ်ဘၣ်လၢ ကမျၢၢ်တဖၣ်အမဲာ် ဖျါအိၣ်ဒီးတၢ်ဘၣ်ယိၣ်ဘၣ်ဘီန့ၣ်လီၤ. ဖဲပှၤဝဲအံၤ ဝံၢ်ဆၢထၢၣ်ကွၢ်ပိာ်ခွါဖိသၣ်အခါ ဒ်အဝဲသ့ၣ်ဘၣ်ယိၣ်အသိးန့ၣ် အဝဲသံဘၣ်သးလံ.

ဖဲပီလူးထံၣ်ဘၣ် ပိာ်ခွါဖိသၣ်အံၤသံအခါ မံနီၤကျးလီၤအသးလၢအဖီခိၣ်ဝံၤ ဖိးဟုဃာ်အီၤလီၤ. ဝံၤဒီး စံးဝဲလၢ ‘သုကိၢ်တၢ်တဂ့ၤ. ဂ့ၤထီၣ်က့ၤဝဲလံ’ န့ၣ်လီၤ. ဂ့ၤထီၣ်က့ၤဝဲဒၣ်နီၢ်နီၢ်လီၤ. လီၤဆီလီၤလးသပှၢ်ကတၢၢ်န့ၣ်လီၤ. ပီလူးမၤမူထီၣ်က့ၤဖိသၣ်လီၤ. ဒီးကမျၢၢ်န့ၣ် သူၣ်ခုသးခုထီၣ်ဝဲသ့ၣ်ဒိၣ်မးန့ၣ်လီၤ.

အဝဲသ့ၣ်ခဲလၢာ် က့ၤထီၣ်က့ၤဆူဟံၣ်ဖီခိၣ်ဒီး အီၣ်တၢ်အီတၢ်န့ၣ်လီၤ. ပီလူးစ့ၢ်ကီး ကတိၤတၢ်တုၤလၢမုၢ်ဆ့ၣ်န့ၣ်လီၤ. ဘၣ်ဆၣ် ပသ့ၣ်ညါလီၤတံၢ်သ့လၢ အူတူၤဃူးန့ၣ် တမံခ့ဘၣ်အသးလၢခံတဘျီလၢၤဘၣ်န့ၣ်လီၤ. တၢ်န့ၣ်အလီၢ်ခံ ပီလူး, တံၤမသ့း ဒီးပှၤလဲၤသကိးတၢ်တဖၣ် ထီၣ်ဆူကဘီဖီခိၣ်လီၤ. ကလဲၤဝဲသ့ၣ်ဆူလဲၣ် သုသ့ၣ်ညါဧါ.

လၢပီလူးအဂီၢ် တၢ်စံၣ်တဲၤတဲလီၤတၢ်သးခုကစီၣ်အတၢ်လဲၤ သၢစုတစုကတၢၢ်ဃၣ်လံဒီး က့ၤကဒါက့ၤဆူအဟံၣ်လံလီၤသၢၣ်. ဖဲအတၢ်လဲၤအံၤအတီၢ်ပူၤ ထဲဝ့ၢ်အ့းဖ့းစူးတဝ့ၢ်န့ၣ် အိၣ်တ့ၢ်ဝဲ သၢနံၣ်အဃိ တၢ်လဲၤဝဲအံၤ ယံာ်န့ၢ်ဒံးအတၢ်လဲၤခံဘျီတဘျီန့ၣ်လီၤ.

ဟးထီၣ်ဝဲလၢ ဝ့ၢ်တြိၤအါဝံၤအလီၤခံ အိၣ်ဘှံးပတုာ်ဖဲ ဝ့ၢ်မံလ့ၤတူးန့ၣ် တစိၢ်ဖိလီၤ. ဝ့ၢ်အ့းဖ့းစူးန့ၣ် တယံၤဒိၣ်မးလၢၤဘၣ်အဃိ ပီလူးမၤလိာ် တၢ်အိၣ်ဖှိၣ်သးပှၢ်တဖၣ် လၢအကဟဲဆူ ဝ့ၢ်မံလ့ၤတူး, ဒ်သိအဝဲကကတိၤတၢ် လၢခံကတၢၢ်အဂီၢ်န့ၣ်လီၤ. တၢ်န့ၣ်ဝံၤအလီၢ်ခံ, မ့ၢ်လၢကဘီကဟးထီၣ်အကတီၢ်ဘၣ်လံအဃိ လၢတၢ်သးအုးအပူၤ ဘၣ်ဟးဖးဒီးပီလူးန့ၣ်လီၤ.

အကတၢၢ်န့ၣ် ကဘီဟဲက့ၤတုၤလၢ ဝ့ၢ်ကဲၤစါရံၤန့ၣ်လီၤ. ဖဲပီလူးအိၣ်ပတုာ်လၢ ခရံာ်အပျဲၢ်အဘီၣ်ဖံလံးပူးအဟံၣ်အခါ ဝံအကၤဘူးဟဲဟ့ၣ်ပလီၢ်ပီလူးန့ၣ်လီၤ. စံးဝဲဒၣ်လၢ ပီလူးမ့ၢ်တုၤလၢဝ့ၢ်ယရူၤၡလ့ၣ်န့ၣ် ကဘၣ်တၢ်ဖီၣ်အီၤန့ၣ်လီၤ. ဒီးတၢ်ကဲထီၣ် ဒ်အစံးဝဲအသိးန့ၣ်လီၤ. ဘၣ်အိၣ်ဝဲဒၣ်လၢ ဝ့ၢ်ကဲၤစါရံၤအဃိာ်ပူၤခံနံၣ်ဝံၤ အလီၢ်ခံ ဘၣ်တၢ်ဆှၢအီၤဆူ ဝ့ၢ်ရိမ့ၤ လၢကကတိၤပူၤဖျဲးအသးလၢ ကဲစၢ်အမဲာ်ညါအဂီၢ် န့ၣ်လီၤ. လဲၤဆူရိမ့ၤအခါ တၢ်မၤအသးဒ်လဲၣ်န့ၣ် ပကကွၢ်သကိးတက့ၢ်.