တၢ်မၤလိ ၇
တၢ်ဟ့ၣ်ပလီၢ်သးတခါ လၢခါပူၤကွံာ်
ယဟိဝၤန့ၣ် တမ့ၢ်ကဟ့ၣ်အခွဲးလၢ ပှၤအၢပှၤသီတဖၣ် ကမၤဟးဂီၤပၤရဒံစူးန့ၣ်ဘၣ်. ဖဲန့ၣ်ကအိၣ်ဝဲဒၣ်ထဲ ကစၢ်အတံၤသကိးတဖၣ်လီၤ. တၢ်ကမၤအသးဒီးပှၤအၢတဖၣ်ဒ်လဲၣ်? ဒ်သိးကန့ၢ်ဘၣ်တၢ်စံးဆၢအဂီၢ် ကွၢ်ဆိကမိၣ် တၢ်မၤအသးဒီးနိအၤ, လၢအမ့ၢ်တၢ်ဂ့ၢ်အမ့ၢ်အတီန့ၣ်တက့ၢ်. လၢအပူၤကွံာ်အနံၣ် လၢအကယၤတဖၣ်အကယၤန့ၣ် နိအၤအိၣ်မူတ့ၢ်ဝဲလီၤ. အဝဲဒၣ်မ့ၢ်ပှၤဂ့ၤတဂၤ လၢအဂုာ်ကျဲးစၢးမၤ တၢ်ဘၣ်ယွၤအသးန့ၣ်လီၤ. ဘၣ်ဆၣ် ပှၤအဂၤတဖၣ် လၢအအိၣ်လၢဟီၣ်ခိၣ်ချၢန့ၣ် မၤဝဲသ့ၣ်တၢ်အၢန့ၣ်လီၤ. လၢတၢ်န့ၣ်အဃိ ယဟိဝၤစံးနိအၤလၢ သါကမၤဟးဂီၤကွံာ် ပှၤအၢပှၤသီခဲလၢာ်လၢ ထံလုၣ်ဘၢတၢ်န့ၣ်လီၤ. ယွၢစံးဘၣ်အီၤလၢ အကဘှီထီၣ်ကဘီတဘ့ၣ် ဒ်သိးအဝဲဒီးအပှၤဟံၣ်ဖိဃီဖိတဖၣ် တသံအဂီၢ်န့ၣ်လီၤ.—၁ မိၤၡ့ ၆:၉-၁၈.
အၤဒီးအပှၤဟံၣ်ဖိဃီဖိတဖၣ် ဘှီထီၣ်ကဘီန့ၣ်လီၤ. နိအၤဟ့ၣ်ပလီၢ်ပှၤလၢ ထံကလုၢ်ဘၢတၢ်ဘၣ်ဆၣ် တဒိကနၣ်ဝဲသ့ၣ်ဘၣ်. အဝဲသ့ၣ် မၤဒံးတၢ်အၢန့ၣ်လီၤ. နိအၤန့ၣ် သူၣ်ထီၣ်ကဘီဝံၤအခါ တ့ၢ်နုာ်ဆၣ်ဖိကီၢ်ဖိတဖၣ်ဆူကဘီပူၤ ဒီးအဝဲဒီးအပှၤဟံၣ်ဖိဃီဖိတဖၣ်စ့ၢ်ကီး နုာ်လီၤဆူကဘီပူၤန့ၣ်လီၤ. ဝံၤဒီး ယဟိဝၤဒုးလီၤဘၣ် ကလံၤမုၣ်ဖးဒိၣ်တခါန့ၣ်လီၤ. တၢ်ဟဲစူၤလီၤ နံၤ ၄၀, နၤ ၄၀ ဒီကတီၢ်ဒီး ထံလုၣ်ဘၢတၢ်လၢဟီၣ်ခိၣ်ဒီဘ့ၣ်ညါန့ၣ်လီၤ—၁ မိၤၡ့ ၇:၇-၁၂.
ပှၤအၢပှၤသီတဖၣ်သံ ဘၣ်ဆၣ် နိအၤဒီးအပှၤဟံၣ်ဖိတဖၣ် ဘၣ်တၢ်အုၣ်က့ၤခီၣ်က့ၤလီၤ. ယဟိဝၤဒုးပူၤဖျဲးအဝဲသ့ၣ်ဂ့ၤဂ့ၤဘၣ်ဘၣ် လၢထံလုၣ်ဘၢတၢ်အခါ ဒီးဆှၢအီၤဆူ ဟီၣ်ခိၣ်လၢအဘၣ်သ့စီကွံၢ် လၢပှၤအၢပှၤသီတဖၣ် အပူၤန့ၣ်လီၤ. (၁ မိၤၡ့ ၇:၂၂, ၂၃) လံာ်စီဆှံစံးဝဲဒၣ် အဆၢကတီၢ်လၢ ယွၤကမၤဟးဂီၤကွံာ်ပှၤလၢ အဂ့ၢ်လိာ်မၤတၢ်ဂ့ၤတဖၣ်, ကဟဲတုၤကဒီးတဘျီန့ၣ်လီၤ. ပှၤဂ့ၤတဖၣ် တဘၣ်တၢ်မၤဟးဂီၤအီၤဘၣ်. အဝဲသ့ၣ် ကအိၣ်ဝဲဆိးဝဲလၢ ဟီၣ်ခိၣ်အပၤရဒံစူးပူၤ လီၤထူလီၤယိာ်လီၤ.—၂ ပ့းတရူး ၂:၅, ၆, ၉.
မုၢ်မဆါတနံၤအံၤ ပှၤအါအါကလဲာ် မၤတၢ်အၢတၢ်သီလီၤ. ဟီၣ်ခိၣ်အံၤ ပှဲမးဒီးတၢ်နးတၢ်ဖှီၣ်န့ၣ်လီၤ. ယဟိဝၤပျၢ်လီၤ အပှၤအုၣ်အသးတဖၣ် ခဲအံၤခဲအံၤ လၢကဟ့ၣ်ပလီၢ်ပှၤအသးအဂီၢ်သနာ်က့ အါတက့ၢ်န့ၣ် ပှၤတသးအိၣ်ဒိကနၣ် ယဟိဝၤအတၢ်ကတိၤဘၣ်. အဝဲသ့ၣ် တအဲၣ်ဒိးဆီတလဲအတၢ်အိၣ်မူဘၣ်. တအဲၣ်ဒိးတူၢ်လိာ်တၢ်လၢ ယွၤစံး ဘၣ်ဃးတၢ်အအၢဒီးတၢ်အဂ့ၤန့ၣ်ဘၣ်. ပှၤတဖၣ်အံၤတၢ်ကမၤအသးဒီးအီၤဒ်လဲၣ်? ဘၣ်တနံၤနံၤကဆီတလဲအသးဧါ? ပှၤအါဂၤအံၤ တမ့ၢ်ကဆီတလဲအသးနီတဘျီဘၣ်. တၢ်မၤဟးဂီၤပှၤအၢပှၤသီဒီး အဝဲသ့ၣ်တအိၣ်မူလၢၤဘၣ်အကတီၢ် ကဟဲတုၤဝဲလီၤ.—စံးထီၣ်ပတြၢၤ ၉၂:၇.
ဟီၣ်ခိၣ်န့ၣ် တမ့ၢ်ကဘၣ်တၢ်မၤဟးဂီၤအီၤဘၣ်, ကဘၣ်တၢ်မၤကဲထီၣ်အီၤ ပၤရဒံစူးလီၤ. ပှၤလၢအကဲထီၣ်ယွၤအတံၤသကိးတဖၣ် ကအိၣ်မူဘၣ်လၢဟီၣ်ခိၣ်ပၤရဒံစူးအပူၤ လီၤထူလီၤယိာ်န့ၣ်လီၤ.—စံးထီၣ်ပတြၢၤ ၃၇:၂၉.