အဆၢဒိၣ် ၁၂
တၢ်ကူၣ်သ့ဟဲလၢယွၤအိၣ်န့ၣ် ကဲဘျုးလၢ ပတၢ်အိၣ်မူပူၤ
လံာ်တၢ်ကတိၤဒိန့ၣ် ဘၣ်တၢ်ကွဲးအီၤလၢသးစီဆှံ ဒီးမ့ၢ်တၢ်ပာ်ဖှိၣ်တၢ်ဟ့ၣ်ကူၣ်ဟ့ၣ်ဖးတဖၣ်လၢ အနဲၣ်လိပတၢ်အိၣ်မူန့ၣ်လီၤ. အါတက့ၢ်န့ၣ် မ့ၢ်ဒၣ်စီၤၡလိၤမိၤကွဲးဝဲလီၤ
ယဟိဝၤယွၤ မ့ၢ်တၢ်ပၢကစၢ်လၢ အိၣ်ဒီးတၢ်ကူၣ်သ့ဧါ. ဒ်သိးပစံးဆၢတၢ်သံကွၢ်တခါအံၤကသ့အဂီၢ် ပကဘၣ်သမံသမိးကွၢ် ကစၢ်အတၢ်ဟ့ၣ်ကူၣ်ဟ့ၣ်ဖးန့ၣ်လီၤ. ကစၢ်အတၢ်ဟ့ၣ်ကူၣ်ဟ့ၣ်ဖးန့ၣ်အဘျုးအိၣ်လၢ ပဂီၢ်ဧါ. ပမ့ၢ်အိၣ်မူမၤထွဲတၢ်ဟ့ၣ်ကူၣ်အံၤ ပတၢ်အိၣ်မူကဂ့ၤထီၣ်ဧါ. စီၤပၤလၢအပှဲၤဒီးတၢ်ကူၣ်သ့ စီၤၡလိၤမိၤန့ၣ်ကွဲးတ့ၢ်ဝဲ တၢ်ကတိၤဒိလၢအကယၤတဖၣ်န့ၣ်လီၤ. တၢ်ကတိၤဒိတဖၣ်အံၤ ဘၣ်ထွဲလိာ်သးဒီး တၢ်အိၣ်မူကိးသနၢၣ်ဒဲးန့ၣ်လီၤ. ဆိကမိၣ်ကွၢ် တၢ်အဒိတနီၤတက့ၢ်.
တၢ်သန့ၤသးလၢယွၤ. တၢ်သန့ၤသးလၢယဟိဝၤယွၤန့ၣ် မ့ၢ်တၢ်လၢအရ့ဒိၣ်တမံၤဒ်သိး ပကအိၣ်ဒီးတၢ်ရ့လိာ်သးဒီးကစၢ်ယွၤဘူးဘူးတံၢ်တံၢ်န့ၣ်လီၤ. စီၤၡလိၤမိၤကွဲးဝဲဒ်အံၤလီၤ, “သန့ၤနသးလၢ ယွၤလၢ နသးဒီဖျၢၣ်ညါတက့ၢ်. ဒီးသုတသန့ၤနသးလၢ နတၢ်ကူၣ်တၢ်ဆးဒၣ်နဲတဂ့ၤ. သ့ၣ်ညါယွၤလၢ နကျဲခဲလၢာ် အပူၤတက့ၢ်. ဒီးအဝဲဒၣ် ကမၤလိၤနကျဲလီၤ.” (ကတိၤဒိ ၃:၅, ၆) ပမ့ၢ်ပာ်ဖျါထီၣ်တၢ်သန့ၤပသးလၢယွၤခီဖျိလၢ ပဃုအတၢ်နဲၣ်လိဒီး ဒိကနၣ်အကလုၢ်န့ၣ် ပတၢ်အိၣ်မူကပှဲၤဒီးအခီပညီန့ၣ်လီၤ. ပမ့ၢ်မၤဒ်န့ၣ်န့ၣ် မ့ၢ်ပမၤသးခု ယဟိဝၤယွၤအသးတကးဘၣ် ယဟိဝၤယွၤအနီၢ်ကစၢ်ဒၣ်ဝဲ စံးဆၢက့ၤဝဲအဒုၣ်အဒါ မုၣ်ကီၤလံၢ်လၢအဒုးအိၣ်ထီၣ်ဝဲ တၢ်သံကွၢ်တဖၣ်ကသ့စ့ၢ်ကီးန့ၣ်လီၤ.—ကတိၤဒိ ၂၇:၁၁.
ရ့ပှၤဂၤတဖၣ်လၢတၢ်ကူၣ်သ့အပူၤ. ကစၢ်ယွၤအတၢ်ဟ့ၣ်ကူၣ်ဟ့ၣ်ဖး လၢမါ, ဝၤဒီးဖိတဖၣ်အဂီၢ်န့ၣ် ဘၣ်ထွဲလိာ်အသးဒီးဆၢကတီၢ်ခဲအံၤအါန့ၢ်ဒံး ဆၢကတီၢ်လၢညါန့ၣ်လီၤ. ကစၢ်ယွၤဟ့ၣ်ကူၣ် ဝၤတဖၣ်လၢ “ကသးခုဒီး နဖိၣ်သၣ်ခွါထီၣ် အမါလီၤ.” တၢ်အံၤအဲၣ်ဒိးစံးဝဲလၢ ဝၤန့ၣ်ကဘၣ်တီဒီးအမါ ထီဘိန့ၣ်လီၤ. (ကတိၤဒိ ၅:၁၈-၂၀) ပိာ်မုၣ်လၢအဆီဟံၣ်ဆီဃီဝံၤတဖၣ်ကထံၣ်ဘၣ်ဝဲလၢလံာ်တၢ်ကတိၤဒိန့ၣ် ပာ်ဖျါထီၣ်ဝဲမါလၢအအိၣ်ဒီး တၢ်သ့တၢ်ဘၣ်တဂၤလၢအဒိးန့ၢ်ဘၣ်ဝဲ အဖိဒီးအဝၤ အတၢ်စံးပတြၢၤအဂ့ၢ်လီၤ. (ကတိၤဒိ အဆၢဒိၣ် ၃၁) ဖိသ့ၣ်တဖၣ်ကထံၣ်ဘၣ်ဝဲ တၢ်နဲၣ်လိလၢဘၣ်ဃးဒီး တၢ်ဒိကနၣ်မိၢ်ပၢ်အကလုၢ်စ့ၢ်ကီးလီၤ. (ကတိၤဒိ ၆:၂၀) အါန့ၢ်အန့ၣ်, လံာ်တကတြူၢ်အံၤပာ်ဖျါထီၣ်ဝဲလၢ တၢ်ရ့တံၤရ့သကိးန့ၣ် မ့ၢ်တၢ်လၢအရ့ဒိၣ်လီၤ. ဒီးပမ့ၢ်အိၣ်ဒၣ်ပတၢ်န့ၣ် ကဒုးအိၣ်ထီၣ်ဝဲတၢ်အဲၣ်လီၤထဲဒၣ်ပသးန့ၣ်လီၤ. (ကတိၤဒိ ၁၈:၁) တံၤသကိးတဖၣ်န့ၣ် ဆှၢပှၤကျဲလၢအဂ့ၤ မ့တမ့ၢ်ကျဲလၢအတဂ့ၤသ့ဝဲအဃိ အလီၢ်အိၣ်လၢပကဘၣ်ဃုထၢ ပတံၤသကိးလၢ တၢ်ကူၣ်သ့အပူၤန့ၣ်လီၤ.—ကတိၤဒိ ၁၃:၂၀; ၁၇:၁၇.
တၢ်ကွၢ်ထွဲလီၤသးဂ့ၤဂ့ၤ. လံာ်တၢ်ကတိၤဒိန့ၣ်အိၣ်ဒီး တၢ်ဟ့ၣ်ကူၣ်ဟ့ၣ်ဖးလၢ အလုၢ်ဒိၣ်ပှ့ၤဒိၣ်ဘၣ်ဃးဒီး တၢ်ဟးဆှဲးတၢ်အီမူၤသံး, တၢ်မၤဒိၣ်ထီၣ်အါထီၣ်သးအတၢ်တူၢ်ဘၣ်လၢအဂ့ၤ, တၢ်တြီဆၢသးအတၢ်တူၢ်ဘၣ်လၢအတဂ့ၤတဘၣ်, ဒီးမၤစၢၤပှၤဒ်သိး ပကကဲထီၣ်ပှၤလၢအခုဖံးခုမၤတၢ်တဂၤန့ၣ်လီၤ. (ကတိၤဒိ ၆:၆; ၁၄:၃၀; ၂၀:၁) အါန့ၢ်အန့ၣ် ဟ့ၣ်ပလီၢ်ပှၤလၢ ပမ့ၢ်တသန့ၤပသးလၢ ယွၤအတၢ်ကူၣ်တၢ်ဆးဘၣ် ဒီးပမ့ၢ်သန့ၤပသးလၢ ပှၤဟီၣ်ခိၣ်ဖိအတၢ်ကူၣ်တၢ်ဆးန့ၣ် ပကတုၤလၢ တၢ်ဟးဂူာ်ဟးဂီၤလီၤ. (ကတိၤဒိ ၁၄:၁၂) ဒီးဆီၣ်ထွဲပှၤလၢပကဒီသဒၢပသးလၢ တၢ်လၢကမၤဘၣ်ဒိ ပလုၢ်လၢ်သကဲာ်ပဝးလၢအဂ့ၤတကးဒံးဘၣ် ဒုးသ့ၣ်နီၣ်ထီၣ်ပှၤလၢ, ‘သးန့ၣ် တၢ်အမူထီၣ်ပၢၤလၢ အပူၤလီၤ.’—ကတိၤဒိ ၄:၂၃.
ပှၤအကကွဲၢ်လၢဟီၣ်ခိၣ်ဒီဘ့ၣ်အံၤန့ၣ် ဖဲအဝဲသ့ၣ်အိၣ်မူမၤထွဲတၢ်ဟ့ၣ်ကူၣ်ဟ့ၣ်ဖးတဖၣ်အံၤအဆၢကတီၢ်န့ၣ် ထံၣ်ဘၣ်ဝဲလၢအတၢ်အိၣ်မူဂ့ၤထီၣ်ဝဲလီၤ. လၢတၢ်န့ၣ်အဃိ, အဝဲသ့ၣ်အိၣ်ဒီးတၢ်ဂ့ၢ်အဂ့ၤတဖၣ် လၢကတူၢ်လိာ်ဝဲယဟိဝၤယွၤဒ် တၢ်ပၢကစၢ်အသိးန့ၣ်လီၤ.
—ဘၣ်တၢ်ဒိးသန့ၤထီၣ်အီၤလၢ လံာ်တၢ်ကတိၤဒိန့ၣ်လီၤ.