နီၢ်ရံးဘကၤအဲၣ်ဒိးမၤသးခု ယဟိဝၤယွၤအသး

နီၢ်ရံးဘကၤမ့ၢ်ပိာ်မုၣ်လၢ အအဲၣ်ယဟိဝၤယွၤလီၤ. အဝၤအမံၤမ့ၢ် စီၤအံၤစဲးလီၤ. အဝဲစ့ၢ်ကီးမ့ၢ်ပှၤလၢအအဲၣ် ယဟိဝၤယွၤလီၤ. နီၢ်ရံးဘကၤထံၣ်လိာ်အသးဒီး စီၤအံၤစဲးဒ်လဲၣ်. အဝဲအဲၣ်ဒိးမၤသးခု ယဟိဝၤယွၤအသးန့ၣ် ပာ်ဖျါဝဲဒ်လဲၣ်. ပကကွၢ်သကိး အဝဲအဂ့ၢ်မီၣ်.

စီၤအံၤစဲးအမိမိၢ်ဒီးအပါပၢ်န့ၣ်မ့ၢ် စီၤအၤဘြၤဟၣ်ဒီးနီၢ်စၤရါလီၤ. အဝဲသ့ၣ်အိၣ်လၢ ကီၢ်ကနၤဧၣ်လီၤ. ပှၤအိၣ်ဖဲန့ၣ်တဖၣ်န့ၣ် တဘူၣ်ထီၣ်ဘါထီၣ် ယဟိဝၤယွၤဘၣ်. ဘၣ်ဆၣ်စီၤအၤဘြၤဟၣ် အဲၣ်ဒိးလၢအဖိခွါကန့ၢ်အမါလၢ ပိာ်မုၣ်လၢအဘူၣ်ထီၣ်ဘါထီၣ် ယဟိဝၤယွၤလီၤ. အဃိန့ၣ်အဝဲမၢလီၤဝဲအပျဲၢ်, ဘၣ်သ့ၣ်သ့ၣ်ကမ့ၢ် စီၤအလံၤဧ့စ့ၢ်, လၢကဃုန့ၢ်ဝဲ ပိာ်မုၣ်တဂၤလၢစီၤအံၤစဲးအဂီၢ် လၢဝ့ၢ်ဟၤရၣ်လီၤ. ဖဲန့ၣ်န့ၣ်စီၤအၤဘြၤဟၣ် အဘူးအတံၢ်အိၣ်ဝဲတနီၤလီၤ.

စီၤအလံၤဧ့စ့ၢ်လဲၤတၢ်ဒီး စီၤအၤဘြၤဟၣ် အပျဲၢ်အဂၤတဖၣ်လီၤ. အဝဲသ့ၣ်ကဘၣ်လဲၤတၢ် ဖးယံၤလီၤ. အဝဲသ့ၣ်လဲၤဃုာ်ဒီး ကီၤလၤအူးအဒုတဆံ လၢအစိာ်တၢ်အီၣ်တၢ်အီ ဒီးတၢ်ဟ့ၣ်တဖၣ်လီၤ. စီၤအံၤစဲးအဂီၢ် စီၤအလံၤဧ့စ့ၢ် ကဘၣ်ဃုထၢဝဲ ပိာ်မုၣ်ဖဲလဲၣ်တဂၤလဲၣ်န့ၣ် ကသ့ၣ်ညါဝဲအဂီၢ်မၤဝဲဒ်လဲၣ်. ဖဲစီၤအလံၤဧ့စ့ၢ် ဒီးပျဲၢ်အဂၤတဖၣ် လဲၤတုၤဖဲဝ့ၢ်ဟၤရၣ်အခါ, စီၤအလံၤဧ့စ့ၢ်သ့ၣ်ညါဝဲလၢ ပိာ်မုၣ်တဖၣ်ကဟဲဒၢၣ်ထံအဃိ အိၣ်ကတီၢ်ဝဲဖဲ ထံပူၤတပူၤအကပၤလီၤ. အဝဲဃ့ဘါထုကဖၣ်လၢ ယဟိဝၤယွၤအအိၣ် ဒီးစံးဝဲ ‘ယမ့ၢ်တဲပိာ်မုၣ်ဖိတဂၤလၢ ဒုးအီယၤထံဒီး အဝဲမ့ၢ်ဒုးအီယၤ ဒီးယကီၤလၤအူးတဖၣ်အထံန့ၣ်, ယကသ့ၣ်ညါလၢ အဝဲအံၤမ့ၢ်ပိာ်မုၣ်လၢ နဃုထၢအီၤတဂၤန့ၣ်လီၤ.’

ဖဲန့ၣ်အခါနီၢ်ရံးဘကၤ လဲၤဆူထံပူၤလီၤ. လံာ်စီဆှံစံးဝဲလၢ အဝဲန့ၣ်ဒိၣ်တၢ်ဂ့ၤဒိၣ်မးလီၤ. စီၤအလံၤဧ့စ့ၢ် ဃ့အီအီၤထံအခါ, အဝဲတဲဝဲ ‘အီတက့ၢ်. ယကဟ့ၣ်နၤထံ, ဒီးယကလဲၤဒၢၣ်ထံလၢ နကီၤလၤအူးတဖၣ်အဂီၢ်စ့ၢ်ကီးလီၤ.’ ဆိကမိၣ်ကွၢ်တဘီ. ကီၤလၤအူးလၢအဲၣ်ဒိးအီထံတဖၣ်န့ၣ် အီထံကလၢာ်အါမးလီၤ. လၢတၢ်န့ၣ်အဃိနီၢ်ရံးဘကၤ ကဘၣ်ဃ့ၢ်ဒၢၣ်ထံတဘျီဝံၤတဘျီလီၤ. လၢတၢ်ဂီၤပူၤ အဝဲမၤတၢ်ဆူၣ်ထဲလဲၣ်န့ၣ်နထံၣ်ဧါ.— စီၤအလံၤဧ့စ့ၢ်သးခုဒိၣ်မးလၢ ယဟိဝၤယွၤစံးဆၢ အတၢ်ဃ့ဘါထုကဖၣ်အဃိလီၤ.

စီၤအလံၤဧ့စ့ၢ် ဟ့ၣ်ဝဲနီၢ်ရံးဘကၤလၢ တၢ်ဟ့ၣ်ဂ့ၤဂ့ၤဖိအါမးလီၤ. ထဲန့ၣ်ဒီးအဝဲက့ၤကိးဝဲ စီၤအလံၤဧ့စ့ၢ် ဒီးအပျဲၢ်အဂၤတဖၣ်ဆူ အပၢ်အဟံၣ်လီၤ. စီၤအလံၤဧ့စ့ၢ်တဲဘၣ်အဝဲသ့ၣ်လၢ ဘၣ်မနုၤအဃိစီၤအၤဘြၤဟၣ် မၢအဟဲဝဲဖဲန့ၣ် ဒီးယဟိဝၤယွၤစံးဆၢ အတၢ်ဃ့ဘါထုကဖၣ်ဒ်လဲၣ် အဂ့ၢ်န့ၣ်လီၤ. နီၢ်ရံးဘကၤအဟံၣ်ဖိဃီဖိ အသးအိၣ်ပျဲအီၤလၢ ကဖျီအသးဒီးစီၤအံၤစဲးလီၤ.

ဘၣ်ဆၣ်မ့ၢ်နဆိကမိၣ် နီၢ်ရံးဘကၤကအဲၣ်ဒိး ဖျီအသးဒီးစီၤအံၤစဲးဧါ.— နီၢ်ရံးဘကၤသ့ၣ်ညါဝဲလၢ ယဟိဝၤယွၤဆှၢလီၤ စီၤအလံၤဧ့စ့ၢ်ဆူအအိၣ်လီၤ. လၢတၢ်န့ၣ်အဃိ ဖဲနီၢ်ရံးဘကၤအဟံၣ်ဖိဃီဖိ သံကွၢ်အီၤလၢမ့ၢ်နအဲၣ်ဒိးလဲၤဆူ ကီၢ်ကနၤဧၣ်ဒီးဖျီနသးဒီး စီၤအံၤစဲးဧါအခါန့ၣ်, အဝဲစံးဆၢဝဲလၢ ‘မ့ၢ်, ယအဲၣ်ဒိးလဲၤလီၤ.’ တဘျီဃီ, အဝဲလဲၤပိာ်စီၤအလံၤဧ့စ့ၢ်အခံလီၤ. ဖဲအဝဲသ့ၣ်လဲၤတုၤလၢ ကီၢ်ကနၤဧၣ်အခါ, အဝဲဖျီအသးဒီးစီၤအံၤစဲးလီၤ.

နီၢ်ရံးဘကၤမၤတၢ်လၢ ယဟိဝၤယွၤအဲၣ်ဒိးလၢအမၤဝဲအဃိ, ယဟိဝၤယွၤဆိၣ်ဂ့ၤအီၤလီၤ. ပူၤကွံာ်အနံၣ်အါမးဝံၤအလီၢ်ခံ, ယ့ၣ်ၡူးဟဲအိၣ်ဖျဲၣ်ထီၣ်လၢ အဝဲအဒူၣ်ဖိထၢဖိအကျါလီၤ. နမ့ၢ်မၤဒ်သိးနီၢ်ရံးဘကၤ ဒီးမၤသးခုယဟိဝၤယွၤအသးန့ၣ် ကစၢ်ကဆိၣ်ဂ့ၤနၤစ့ၢ်ကီးလီၤ.