တၢ်မၤလိ ၅
တၢ်ပှ့ၤက့ၤ မ့ၢ်ယွၤအတၢ်ဟ့ၣ်လၢ အလုၢ်ဒိၣ်ပှ့ၤဒိၣ်ကတၢၢ်
၁, ၂. (က) တၢ်ဟ့ၣ်လၢ အလုၢ်ဒိၣ်ပှ့ၤဒိၣ်လၢနဂီၢ်န့ၣ် ကမ့ၢ်တၢ်ဟ့ၣ်ဒ်လဲၣ်တကလုာ်လဲၣ်. (ခ) ဘၣ်မနုၤအဃိ တၢ်ပှ့ၤက့ၤန့ၣ် မ့ၢ်ယွၤအတၢ်ဟ့ၣ်လၢ အလုၢ်ဒိၣ်ပှ့ၤဒိၣ်ကတၢၢ်လဲၣ်.
တၢ်ဟ့ၣ်လၢ အလုၢ်ဒိၣ်ပှ့ၤဒိၣ်ကတၢၢ်လၢနဂီၢ်န့ၣ် မ့ၢ်တၢ်ဟ့ၣ်ဒ်လဲၣ်တကလုာ်လဲၣ်. တၢ်ဟ့ၣ်တခါန့ၣ် အပှ့ၤမ့ၢ်တဒိၣ်ဘၣ်ဆၣ် ကဲထီၣ်တၢ်လၢအလုၢ်ဒိၣ်ပှ့ၤဒိၣ်လၢ နဂီၢ်သ့ဝဲလီၤ. ဖဲပှၤဟ့ၣ်နၤတၢ်ဟ့ၣ်လၢ အမၤသးခုနသး ဒီးမၤပှဲၤနတၢ်လိၣ်ဘၣ်န့ၣ် နကစံးဘျုးစံးဖှိၣ်က့ၤပှၤလၢ အဟ့ၣ်နၤတၢ်ဟ့ၣ်တဂၤန့ၣ်လီၤ.
၂ ကစၢ်ယွၤဟ့ၣ်ပှၤ တၢ်ဟ့ၣ်အါမးဘၣ်ဆၣ် လၢတၢ်ဟ့ၣ်တဖၣ်အံၤအကျါ တခါန့ၣ် မ့ၢ်တၢ်လၢပလိၣ်ဘၣ်အီၤ အဒိၣ်ကတၢၢ်န့ၣ်လီၤ. တၢ်ဟ့ၣ်တခါအံၤ မ့ၢ်ကစၢ်ယွၤအတၢ်ဟ့ၣ်လၢ အလုၢ်ဒိၣ်ပှ့ၤဒိၣ်ကတၢၢ်လၢ ပှၤဟီၣ်ခိၣ်ဖိအဂီၢ်လီၤ. တၢ်မၤလိတတီၤအံၤအပူၤ ပကမၤလိဘၣ်လၢ ယဟိဝၤယွၤဆှၢလီၤ အဖိခွါယ့ၣ်ၡူးခရံာ် ဒ်သိးပကဒိးန့ၢ်ဘၣ် တၢ်ခွဲးတၢ်ယာ်လၢ ပကအိၣ်မူဘၣ် လီၤထူလီၤယိာ်အဂီၢ်လီၤ. (ဖး မးသဲ ၂၀:၂၈ တက့ၢ်.) ယဟိဝၤယွၤပာ်ဖျါထီၣ် အတၢ်အဲၣ်လၢပှၤဟီၣ်ခိၣ်ဖိအဂီၢ် ခီဖျိလၢအဝဲဆှၢလီၤယ့ၣ်ၡူးဆူ ဟီၣ်ခိၣ်ချၢဒ်တၢ်ပှ့ၤက့ၤအသိးလီၤ.
တၢ်ပှ့ၤက့ၤန့ၣ် မ့ၢ်တၢ်မနုၤလဲၣ်
၃. ဘၣ်မနုၤအဃိ ပှၤဟီၣ်ခိၣ်ဖိတဖၣ်ဘၣ်သံဝဲလဲၣ်.
၃ တၢ်ပှ့ၤက့ၤန့ၣ် မ့ၢ်ကျဲတဘိလၢ ယဟိဝၤယွၤမၤထူၣ်ဖျဲးထီၣ် ပှၤဟီၣ်ခိၣ်ဖိလၢ တၢ်သံဒီးတၢ်ဒဲးဘးအစုပူၤန့ၣ်လီၤ. (အ့းဖ့းစူး ၁:၇) ဒ်သိးပကနၢ်ပၢၢ်ထီၣ်လၢ ဘၣ်မနုၤအဃိ ပလိၣ်ဘၣ်တၢ်ပှ့ၤက့ၤလဲၣ်န့ၣ် ပကဘၣ်သ့ၣ်ညါတၢ်မၤအသးလၢ အပူၤကွံာ်အနံၣ်လၢ အကထိတဖၣ်လၢ ဧ့ၤဒ့ၣ်တၤသၣ်လီၢ်အပူၤန့ၣ်လီၤ. ပမိၢ်ပပၢ်အဆိကတၢၢ်ခံဂၤ လၢအမ့ၢ် နီၢ်အံၣ်အုဒီးစီၤအၤဒၣ်န့ၣ် မၤဝဲတၢ်ဒဲးဘးလီၤ. ခီဖျိလၢ အဝဲသ့ၣ်မၤတၢ်ဒဲးဘးအဃိ ဘၣ်သံဝဲလီၤ. ဒီးပဝဲစ့ၢ်ကီး မ့ၢ်လၢပဒိးန့ၢ်ဘၣ် တၢ်ဒဲးဘးလၢ နီၢ်အံၣ်အုဒီးစီၤအၤဒၣ်အအိၣ်အဃိ ပဘၣ်သံလီၤ.—ကွၢ်တၢ်ဂ့ၢ် ၉ လၢလံာ်အကတၢၢ်တက့ၢ်.
၄. စီၤအၤဒၣ်မ့ၢ်မတၤတဂၤလဲၣ် ဒီးအဝဲမ့ၢ်ပှၤဒ်လဲၣ်တဂၤလဲၣ်.
၄ ဖဲယဟိဝၤယွၤတ့လီၤပိာ်ခွါ အဆိကတၢၢ်တဂၤ လၢအမ့ၢ်စီၤအၤဒၣ်န့ၣ် ကစၢ်ဟ့ၣ်အီၤတၢ်လၢ အလုၢ်ဒိၣ်ပှ့ၤဒိၣ်တမံၤန့ၣ်လီၤ. ကစၢ်ဟ့ၣ်အီၤသးသမူလၢ အလၢအပှဲၤန့ၣ်လီၤ. အဝဲအိၣ်ဒီးသးအတၢ်ဆိကမိၣ်လၢ အလၢအပှဲၤ ဒီးနီၢ်ခိလၢ အလၢအပှဲၤစ့ၢ်ကီးလီၤ. လၢတၢ်န့ၣ်အဃိ အဝဲမ့ၢ်ဒိကနၣ်ကစၢ်ယွၤအကလုၢ်န့ၣ် အဝဲတဆူးတဆါဝဲ, တပှၢ်ထီၣ် ဒီးတသံဝဲနီတဘျီဘၣ်. ခီဖျိလၢယဟိဝၤယွၤတ့လီၤအီၤအဃိ ကစၢ်လီၤဂာ်ဒ် ပၢ်တဂၤလၢစီၤအၤဒၣ်အဂီၢ်န့ၣ်လီၤ. (လူၤကၣ် ၃:၃၈) ယဟိဝၤယွၤတဲတၢ်ဒီးအီၤ ဘၣ်ဆၢဘၣ်ကတီၢ်န့ၣ်လီၤ. ဒီးကစၢ်ယွၤမုၢ်လၢ်တၢ်လၢ စီၤအၤဒၣ်အအိၣ်ဒ်လဲၣ်န့ၣ် ကစၢ်တဲဘၣ်အီၤလီၤတံၢ်လီၤဆဲးဒီး ဟ့ၣ်အီၤတၢ်မၤလၢ အလီၤသူၣ်မံသးမုာ်န့ၣ်လီၤ.—၁ မိၤၡ့ ၁:၂၈-၃၀; ၂:၁၆, ၁၇.
၅. လံာ်စီဆှံစံးဝဲလၢ ကစၢ်ယွၤတ့လီၤ စီၤအၤဒၣ် “ဒ်အဂီၤဒၣ်ဝဲအသိး” န့ၣ်အခီပညီမ့ၢ်ဒ်လဲၣ်.
၅ ယဟိဝၤယွၤတ့လီၤ စီၤအၤဒၣ် “ဒ်အဂီၤဒၣ်ဝဲအသိးလီၤ.” (၁ မိၤၡ့ ၁:၂၇) ကစၢ်တ့လီၤအီၤဃုာ်ဒီး အတၢ်ဂ့ၤတၢ်ဝါတဖၣ်လၢအမ့ၢ်ဝဲ တၢ်အဲၣ်တၢ်ကွံ, တၢ်ကူၣ်သ့, တၢ်တီတၢ်လိၤဒီး တၢ်စိတၢ်ကမီၤန့ၣ်လီၤ. ကစၢ်ယွၤဟ့ၣ်အီၤ တၢ်သဘျ့လၢ အကဃုထၢတၢ်လၢအနီၢ်ကစၢ်ဒၣ်ဝဲန့ၣ်လီၤ. ဖဲကစၢ်ယွၤတ့လီၤအီၤအခါ အဝဲအိၣ်ဒီး တၢ်သဘျ့လၢ အကမၤတၢ်ဂ့ၤ မ့တမ့ၢ် တၢ်အၢန့ၣ်လီၤ. စီၤအၤဒၣ်မ့ၢ်ပာ်လီၤအသးလၢ အကဒိကနၣ်ကစၢ်ယွၤအကလုၢ်န့ၣ် အဝဲကအိၣ်မူဘၣ်လၢ ပၤရဒံစူးအပူၤလီၤထူလီၤယိာ်လီၤ.
၆. ဖဲစီၤအၤဒၣ်တဒိကနၣ် ကစၢ်ယွၤအကလုၢ်အဆၢကတီၢ်န့ၣ် အဝဲဘၣ်ဒုးလီၤမၢ်ကွံာ်တၢ်မနုၤလဲၣ်. ဒီးတၢ်အံၤမၤဘၣ်ဒိပှၤဒ်လဲၣ်.
၆ ဖဲစီၤအၤဒၣ်တဒိကနၣ်ယွၤအကလုၢ် ဒီးတၢ်စံၣ်ညီၣ်အီၤလၢ တၢ်သံအဆၢကတီၢ် အဝဲဘၣ်ဒုးလီၤမၢ်ကွံာ် တၢ်လၢအလုၢ်ဒိၣ်ပှ့ၤဒိၣ်တဖၣ်န့ၣ်လီၤ. အဝဲဘၣ်တူၢ်ၡူကွံာ် အတၢ်ရ့လိာ်သးဒီးကစၢ်ယွၤ, တၢ်အိၣ်မူလၢအလၢအပှဲၤ ဒီးတၢ်အိၣ်တၢ်ဆိးအလီၢ်လၢအမ့ၢ် ပၤရဒံစူးန့ၣ်လီၤ. (၁ မိၤၡ့ ၃:၁၇-၁၉) စီၤအၤဒၣ်ဒီးနီၢ်အံၣ်အု ဃုထၢဝဲလၢ တဒိကနၣ် ကစၢ်ယွၤအကလုၢ်အဃိ တၢ်မုၢ်လၢ်တအိၣ်လၢအဝဲသ့ၣ်အဂီၢ်လၢၤဘၣ်. ခီဖျိလၢစီၤအၤဒၣ်မၤကမၣ်တၢ်အဃိ “တၢ်ဒဲးဘးဟဲနုာ်ဆူဟီၣ်ခိၣ်ချၢ လၢပှၤတဂၤအဃိ, ဒီးတၢ်သံတၢ်ပှၢ်လၢ တၢ်ဒဲးဘးအဃိအသိးန့ၣ်, ဒီးဒ်န့ၣ်အသိးပှၤခဲလၢာ်မၤတ့ၢ်တၢ်ဒဲးဘးသတးဒီး, ပှၤခဲလၢာ်ဘၣ်တၢ်သံတၢ်ပှၢ်” လီၤ. (ရိမ့ၤ ၅:၁၂) ဖဲစီၤအၤဒၣ်မၤတၢ်ဒဲးဘးအခါ အဝဲ “ဆါကွံာ်” အနီၢ်ကစၢ်ဒီး အဖိအလံၤလၢ တၢ်ဒဲးဘးဒီးတၢ်သံအစုပူၤန့ၣ်လီၤ. (ရိမ့ၤ ၇:၁၄) လၢတၢ်န့ၣ်အဃိ မ့ၢ်တၢ်မုၢ်လၢ်ကအိၣ်ဒီးပှၤ တမံၤမံၤဒံးဧါ. အိၣ်ဝဲလီၤ.
၇, ၈. တၢ်ပှ့ၤက့ၤန့ၣ် မ့ၢ်တၢ်မနုၤလဲၣ်.
၇ တၢ်ပှ့ၤက့ၤန့ၣ် မ့ၢ်တၢ်မနုၤလဲၣ်. တၢ်လၢတၢ်ပှ့ၤက့ၤန့ၣ် အခီပညီပၣ်ဃုာ်ဒီးတၢ်ဂ့ၢ်ခံမံၤအံၤလီၤ. တၢတမံၤ, တၢ်ပှ့ၤက့ၤစံးတၢ်န့ၣ် မ့ၢ်တၢ်ဟ့ၣ်ထီၣ်တၢ်အပှ့ၤလၢ ပှၤတဂၤဂၤကထူၣ်ဖျဲးထီၣ်အဂီၢ် မ့တမ့ၢ် ဒ်သိးကပှ့ၤကဒါက့ၤ တၢ်တမံၤမံၤအဂီၢ်န့ၣ်လီၤ. ခံမံၤတမံၤ, တၢ်ဟ့ၣ်ထီၣ်တၢ်အပှ့ၤအကလံၤ လၢအပှ့ၤထဲသိးလိာ်အသးဒီး တၢ်တမံၤမံၤန့ၣ်လီၤ.
၈ ပှၤဟီၣ်ခိၣ်ဖိ ပှ့ၤက့ၤပှၤလၢ တၢ်သံဒီးတၢ်ဒဲးဘး တသ့နီတဂၤဘၣ်. ဘၣ်ဆၣ်ယဟိဝၤယွၤ ကတဲာ်ကတီၤန့ၢ်ပှၤကျဲလၢ အကမၤပူၤဖျဲးပှၤလၢ တၢ်ဒဲးဘးဒီးတၢ်သံအစုပူၤန့ၣ်လီၤ. ပကဆိကမိၣ်ကွၢ်သကိး တၢ်ပှ့ၤက့ၤန့ၣ် ဘၣ်တၢ်ကတဲာ်ကတီၤန့ၢ်ပှၤလၢ ကျဲဒ်လဲၣ် ဒီးပဒိးန့ၢ်ဘၣ်အဘျုးကသ့ဒ်လဲၣ်န့ၣ်လီၤ.
ယဟိဝၤယွၤကတဲာ်ကတီၤဝဲ တၢ်ပှ့ၤက့ၤလၢကျဲဒ်လဲၣ်
၉. ပလိၣ်ဘၣ်တၢ်ပှ့ၤက့ၤဒ်လဲၣ်တကလုာ်လဲၣ်.
၉ စီၤအၤဒၣ်ဒုးလီၤမၢ်ကွံာ် အတၢ်အိၣ်မူလၢ အလၢအပှဲၤ ဒီးပှၤဟီၣ်ခိၣ်ဖိတဖၣ်ဟ့ၣ်ထီၣ် တၢ်ပှ့ၤက့ၤတန့ၢ်နီတဂၤဘၣ်. လၢတၢ်ဂ့ၢ်မနုၤအဃိလဲၣ်. ခီဖျိလၢ ပမ့ၢ်ပှၤတလၢတပှဲၤအဃိလီၤ. (စံးထီၣ်ပတြၢၤ ၄၉:၇, ၈) တၢ်ပှ့ၤက့ၤန့ၣ် ကဘၣ်မ့ၢ်ပှၤအလၢအပှဲၤတဂၤ ဟ့ၣ်လီၤအသးသမူလၢ ပှၤဟီၣ်ခိၣ်ဖိအဂီၢ်န့ၣ်လီၤ. လံာ်စီဆှံစံးဝဲလၢ ယ့ၣ်ၡူးခရံာ် “ဟ့ၣ်လီၤဒၣ်အသးလၢ တၢ်ပှ့ၤက့ၤလၢပှၤခဲလၢာ်အဂီၢ်” န့ၣ်လီၤ. (၁ တံၤမသ့း ၂:၆) လၢတၢ်န့ၣ်အဃိ ယ့ၣ်ၡူးအတၢ်အိၣ်မူလၢအလၢအပှဲၤန့ၣ် ထဲသိးလိာ်အသးဒီး တၢ်အိၣ်မူလၢ စီၤအၤဒၣ်ဒုးလီၤမၢ်ကွံာ်ဝဲန့ၣ်လီၤ.
၁၀. ယဟိဝၤယွၤကတဲာ်ကတီၤဝဲ တၢ်ပှ့ၤက့ၤလၢကျဲဒ်လဲၣ်.
၁၀ ယဟိဝၤယွၤကတဲာ်ကတီၤဝဲ တၢ်ပှ့ၤက့ၤလၢကျဲဒ်လဲၣ်. ယဟိဝၤယွၤဆှၢလီၤဝဲ အဖိခွါလၢအလုၢ်ဒိၣ်ပှ့ၤဒိၣ်ကတၢၢ်တဂၤ ဆူဟီၣ်ခိၣ်ချၢလီၤ. လၢတၢ်န့ၣ်အဃိ ယ့ၣ်ၡူးဘၣ်ပာ်တ့ၢ်ကွံာ်အပၢ်ဒီး အတၢ်အိၣ်တၢ်ဆိးအလီၢ် လၢမူခိၣ် ဘၣ်ဆၣ်အသးအိၣ်မၤဝဲ ဒ်အပၢ်မၢအီၤအသိးလီၤ. (ဖံလံးပံၤ ၂:၇) ဖိခွါအံၤဘၣ်တၢ်ကိးအီၤလၢ ယ့ၣ်ၡူးဒီး အဝဲမ့ၢ်စ့ၢ်ကီးတၢ်ဘၣ်တ့အဆိကတၢၢ်န့ၣ်လီၤ. (၁ ယိၤဟၣ် ၄:၉, ၁၀) ယဟိဝၤယွၤဆှၢလီၤအီၤဆူ ဟီၣ်ခိၣ်ချၢဒီးယ့ၣ်ၡူးဟဲအိၣ်ဖျဲၣ်ထီၣ်ဒ် ပှၤဟီၣ်ခိၣ်ဖိလၢအလၢအပှဲၤတဂၤအသိးလီၤ. ယ့ၣ်ၡူးန့ၣ် အတၢ်ဒဲးဘးတအိၣ်ဘၣ်.—လူၤကၣ် ၁:၃၅.
ယဟိဝၤယွၤဟ့ၣ်လီၤအဖိခွါ လၢအလုၢ်ဒိၣ်ပှ့ၤဒိၣ် လၢကပှ့ၤက့ၤပှၤဟီၣ်ခိၣ်ဖိအဂီၢ်လီၤ
၁၁. ပှၤတဂၤန့ၣ်ဟ့ၣ်တၢ်ပှ့ၤက့ၤလၢ ပှၤအကကွဲၢ်တဖၣ်အဂီၢ်ကသ့ဒ်လဲၣ်.
၁၁ ပိာ်ခွါအဆိကတၢၢ်တဂၤ စီၤအၤဒၣ်န့ၣ် ဖဲအဝဲတဒိကနၣ်ယဟိဝၤယွၤအကလုၢ်အခါ အဝဲမၤလီၤမၢ်ကွံာ်ဝဲ တၢ်အိၣ်မူလၢအလၢအပှဲၤလၢ ပှၤဟီၣ်ခိၣ်ဖိတဖၣ်အဂီၢ်လီၤ. မ့ၢ်ပှၤအဂၤတဂၤ မၤထူၣ်ဖျဲးထီၣ်စီၤအၤဒၣ်အဖိအလံၤလၢ တၢ်သံအစုပူၤကသ့ဧါ. သ့ဝဲလီၤ. (ဖး ရိမ့ၤ ၅:၁၉ တက့ၢ်.) ယ့ၣ်ၡူး တမၤတၢ်ဒဲးဘးနီတဘျီဘၣ်. ဘၣ်ဆၣ် အဝဲဟ့ၣ်လီၤအတၢ်အိၣ်မူအလၢအပှဲၤလၢ တၢ်ပှ့ၤက့ၤအဂီၢ်လီၤ. (၁ ကရံၣ်သူး ၁၅:၄၅) အတၢ်အိၣ်မူလၢအလၢအပှဲၤအံၤန့ၣ် ဘၣ်တၢ်သူအီၤဒ်သိး စီၤအၤဒၣ်အဖိအလံၤခဲလၢာ် ကထူၣ်ဖျဲးထီၣ်က့ၤလၢ တၢ်သံအဂီၢ်န့ၣ်လီၤ.—၁ ကရံၣ်သူး ၁၅:၂၁, ၂၂.
၁၂. ဘၣ်မနုၤအဃိ ယ့ၣ်ၡူးတူၢ်ဘၣ်ဝဲတၢ်နးတၢ်ဖှီၣ် နးနးကလဲာ်လဲၣ်.
၁၂ လံာ်စီဆှံပာ်ဖျါထီၣ်ဝဲလၢ တချုးလၢယ့ၣ်ၡူးသံန့ၣ် အဝဲတူၢ်ဘၣ်ဝဲတၢ်နးတၢ်ဖှီၣ်ထဲလဲၣ်အဂ့ၢ်န့ၣ်လီၤ. အဒိ ပှၤဖျ့အီၤ, ပှၤပျၤထီအီၤလၢသ့ၣ်တၢၣ်အလိၤ ဒီးဘၣ်တူၢ်ဝဲတၢ်မၤဆူးမၤဆါအီၤနးနးကလဲာ် တုၤအသံတစုန့ၣ်လီၤ. (ယိၤဟၣ် ၁၉:၁, ၁၆-၁၈, ၃၀) ဘၣ်မနုၤအဃိ ယ့ၣ်ၡူးဘၣ်တူၢ်ဝဲတၢ်နးတၢ်ဖှီၣ် ထဲအံၤညါလဲၣ်. ခီဖျိလၢ မုၣ်ကီၤလံၢ်စံးဝဲလၢ ဖဲပှၤဟီၣ်ခိၣ်ဖိတဖၣ် ထံၣ်ဘၣ်ဝဲတၢ်မၤကွၢ်လၢအကီအခဲအခါ အဝဲသ့ၣ်တတီဒီးယွၤနီတဂၤလၢၤဘၣ်. ဘၣ်ဆၣ်ယ့ၣ်ၡူးပာ်ဖျါထီၣ်ဝဲလၢ ပှၤအလၢအပှဲၤတဂၤ မ့ၢ်ထံၣ်ဘၣ်တၢ်မၤကွၢ်လၢ အနးကတၢၢ်ဒၣ်လဲာ် တီဒီးယွၤသ့ဝဲန့ၣ်လီၤ. ယဟိဝၤယွၤကပာ်ကဖၢလၢအသး လၢယ့ၣ်ၡူးအဃိထဲလဲၣ်န့ၣ် နဆိကမိၣ်ကွၢ်သ့လီၤ.—ကတိၤဒိ ၂၇:၁၁; ကွၢ်တၢ်ဂ့ၢ် ၁၅ လၢလံာ်အကတၢၢ်တက့ၢ်.
၁၃. တၢ်ပှ့ၤက့ၤန့ၣ် ဘၣ်တၢ်ဟ့ၣ်ထီၣ်အီၤဒ်လဲၣ်.
၁၃ တၢ်ပှ့ၤက့ၤန့ၣ် ဘၣ်တၢ်ဟ့ၣ်ထီၣ်အီၤဒ်လဲၣ်. ယဟိဝၤယွၤဟ့ၣ်အခွဲးလၢ ပှၤကမၤသံယ့ၣ်ၡူးဖဲ ခ.န ၃၃, လါနံစၣ် ၁၄ သီအနံၤန့ၣ်လီၤ. (ဧ့ၤဘြံၤ ၁၀:၁၀) ယ့ၣ်ၡူးသံသၢသီဝံၤအလီၢ်ခံန့ၣ် ယဟိဝၤယွၤမၤသမူထီၣ်က့ၤအီၤလၢ ပှၤနီၢ်သးဖိအတၢ်အိၣ်မူလီၤ. တမ့ၢ်ဒ်ပှၤဟီၣ်ခိၣ်ဖိ အတၢ်အိၣ်မူအသိးဘၣ်. ဖဲယ့ၣ်ၡူးအိၣ်မူလၢ ဟီၣ်ခိၣ်ချၢအခါ အဝဲတမၤတၢ်ဒဲးဘးနီတဘျီဘၣ်. လၢတၢ်န့ၣ်အဃိ အဝဲအိၣ်ဒီးတၢ်ခွဲးတၢ်ယာ်လၢ ကအိၣ်မူဘၣ်ဝဲလၢ ဟီၣ်ခိၣ်ချၢလီၤထူလီၤယိာ်န့ၣ်လီၤ. ဘၣ်ဆၣ် ယ့ၣ်ၡူးတူၢ်သံအသး ဒီးဖဲက့ၤထီၣ်ဝဲဆူမူခိၣ်အခါ အဝဲဟ့ၣ်က့ၤအတၢ်ခွဲးတၢ်ယာ်အံၤလၢကစၢ်ယွၤအအိၣ် ဒ်သိးကစၢ်ယွၤကသူဝဲလၢကပှ့ၤက့ၤစီၤအၤဒၣ်အဖိအလံၤအဂီၢ်န့ၣ်လီၤ. (ဧ့ၤဘြံၤ ၉:၂၄) ခီဖျိလၢ ယဟိဝၤယွၤတူၢ်လိာ်ဝဲတၢ်ပှ့ၤက့ၤအံၤအဃိ ပဒိးန့ၢ်ဘၣ်တၢ်ခွဲးတၢ်ယာ်လၢ ပကထူၣ်ဖျဲးထီၣ်လၢ တၢ်ဒဲးဘးဒီး ပကအိၣ်မူဘၣ်လီၤထူလီၤယိာ်န့ၣ်လီၤ.—ဖး ရိမ့ၤ ၃:၂၃, ၂၄ တက့ၢ်.
ခီဖျိလၢတၢ်ပှ့ၤက့ၤအဃိ နဒိးန့ၢ်ဘၣ်တၢ်အဘျုးဒ်လဲၣ်
၁၄, ၁၅. ဒ်သိးပကဒိးန့ၢ်ဘၣ်တၢ်ပျၢ်တၢ်ကမၣ်အဂီၢ် ပကဘၣ်မၤတၢ်မနုၤလဲၣ်.
၁၄ ခီဖျိလၢ ကစၢ်ယွၤအတၢ်ဟ့ၣ်လၢ အလုၢ်ဒိၣ်ပှ့ၤဒိၣ်ကတၢၢ်အံၤအဃိ ခဲအံၤပဒိးန့ၢ်ဘၣ် တၢ်အဘျုးဒ်လဲၣ်. ဒီးဆူညါပကဒိးန့ၢ်ဘၣ် တၢ်အဘျုးဒ်လဲၣ်န့ၣ် ပကကွၢ်သကိးလီၤ.
၁၅ ပတၢ်ဒဲးဘး ဘၣ်တၢ်ပျၢ်ကွံာ်အီၤ. ပကမၤတၢ်အဘၣ်ထီဘိန့ၣ် တညီဝဲဘၣ်. ပမၤဘၣ်တၢ်ကမၣ်ခီဖျိလၢ ပတၢ်စံးတၢ်ကတိၤဒီး ပတၢ်ဖံးတၢ်မၤသ့ဝဲလီၤ. (ကလီးစဲ ၁:၁၃, ၁၄) ပကဒိးန့ၢ်ဘၣ် တၢ်ပျၢ်ပတၢ်ကမၣ်လၢ ကျဲဒ်လဲၣ်. လၢပမၤဘၣ်တၢ်ကမၣ်အဃိ ပမ့ၢ်ပီၢ်ယၢ်လီၤက့ၤပသးနီၢ်နီၢ် ဒီးလၢတၢ်ဆီၣ်လီၤသးအပူၤ ပမ့ၢ်ဃ့ပျၢ်ပတၢ်ကမၣ်လၢ ယဟိဝၤယွၤအအိၣ်န့ၣ် အဝဲကပျၢ်ပတၢ်ကမၣ်လီၤ. ပမ့ၢ်မၤဒ်န့ၣ်န့ၣ် ပနာ်သ့လၢကစၢ်ယွၤကပျၢ်ကွံာ် ပတၢ်ဒဲးဘးလီၤ.—၁ ယိၤဟၣ် ၁:၈, ၉.
၁၆. ပသးလၢအသ့ၣ်ညါဒၣ်တၢ် ကကဆှီအဂီၢ် ပကဘၣ်မၤတၢ်မနုၤလဲၣ်.
၁၆ ပအိၣ်ဒီးသးလၢအသ့ၣ်ညါဒၣ်တၢ်လၢ အကဆှီသ့ဝဲလီၤ. ပသးလၢအသ့ၣ်ညါဒၣ်တၢ် မ့ၢ်ဒုးသ့ၣ်ညါပှၤလၢ ပမၤဘၣ်တၢ်လၢအကမၣ်တမံၤမံၤန့ၣ် ပကတူၢ်ဘၣ်လၢပအိၣ်ဒီးတၢ်ကမၣ်, ဒီးဘၣ်သ့ၣ်သ့ၣ် ပကတူၢ်ဘၣ်လၢပတၢ်မုၢ်လၢ်တအိၣ်လၢၤဘၣ် ဒီးပလုၢ်ပပှ့ၤတအိၣ်ဘၣ်လီၤ. ဘၣ်ဆၣ်သနာ်က့ ပတလိၣ်ဟ့ၣ်အၡူဘၣ်. ပမ့ၢ်ဃ့ကညးယဟိဝၤယွၤလၢ အကပျၢ်ကွံာ်ပတၢ်ကမၣ်န့ၣ် ပနာ်သ့သပှၢ်ကတၢၢ်လၢ အဝဲကဒိကနၣ်ပတၢ်ဃ့ ဒီးကပျၢ်ကွံာ်ပတၢ်ကမၣ်လီၤ. (ဧ့ၤဘြံၤ ၉:၁၃, ၁၄) ယဟိဝၤယွၤအဲၣ်ဒိးလၢ ပကတဲဘၣ်အီၤပတၢ်ကီတၢ်ခဲ ဒီးပတၢ်ဂံၢ်စၢ်ဘါစၢ်တဖၣ်လီၤ. (ဧ့ၤဘြံၤ ၄:၁၄-၁၆) ပမ့ၢ်မၤဒ်န့ၣ်န့ၣ် ပအိၣ်ဃူအိၣ်ဖိးဒီး ယွၤသ့ဝဲလီၤ.
၁၇. ယ့ၣ်ၡူးတူၢ်သံအသးလၢ ပဂီၢ်အဃိ ပကဒိးန့ၢ်ဘၣ်တၢ်ဆိၣ်ဂ့ၤမနုၤလဲၣ်.
၁၇ ပအိၣ်ဒီးတၢ်မုၢ်လၢ်လၢ ပကအိၣ်မူဘၣ်လီၤထူလီၤယိာ်လီၤ. “တၢ်ဒဲးဘးအဘူးအလဲမ့ၢ် တၢ်သံလီၤ. မ့မ့ၢ်ယွၤအတၢ်ဟ့ၣ်န့ၣ်, မ့ၢ်တၢ်မူအထူအယိာ်လၢ ပကစၢ်ယ့ၣ်ၡူးခရံာ်အဃိန့ၣ်လီၤ.” (ရိမ့ၤ ၆:၂၃) ခီဖျိလၢယ့ၣ်ၡူးတူၢ်သံအသးလၢပဂီၢ်အဃိ ပအိၣ်ဒီးတၢ်ခွဲးတၢ်ယာ်လၢ ပကဒိးန့ၢ်ဘၣ်တၢ်မူလီၤထူလီၤယိာ်ပှဲၤဒီး တၢ်အိၣ်ဆူၣ်အိၣ်ချ့လၢ အလၢအပှဲၤန့ၣ်လီၤ. (လီၣ်ဖျါ ၂၁:၃, ၄) ဒ်သိးပကဒိးန့ၢ်ဘၣ်တၢ်ဆိၣ်ဂ့ၤတဖၣ်အံၤအဂီၢ် ပကဘၣ်မၤတၢ်မနုၤလဲၣ်.
မ့ၢ်နကတူၢ်လိာ်တၢ်ပှ့ၤက့ၤဧါ
၁၈. ယဟိဝၤယွၤအဲၣ်ပှၤန့ၣ် ပသ့ၣ်ညါဘၣ်ဒ်လဲၣ်.
၁၈ ဆိကမိၣ်ကွၢ် ဖဲပှၤဟ့ၣ်နၤတၢ်ဟ့ၣ်လၢ အဃံအလၤတခါန့ၣ် နသးကမၤအသးဒ်လဲၣ်. လၢတၢ်ဟ့ၣ်ခဲလၢာ်အကျါ တၢ်ပှ့ၤက့ၤန့ၣ်မ့ၢ်တၢ်ဟ့ၣ်လၢ အလုၢ်ဒိၣ်ပှ့ၤဒိၣ်ကတၢၢ်န့ၣ်လီၤ. မ့ၢ်လၢယဟိဝၤယွၤ ကတဲာ်ကတီၤဝဲတၢ်ပှ့ၤက့ၤအဃိ ကြၢးလၢပစံးဘျုးစံးဖှိၣ်က့ၤအီၤ ဒိၣ်မးလီၤ. ယိၤဟၣ် ၃:၁၆ ပာ်ဖျါထီၣ်ဝဲလၢ “ယွၤအဲၣ်ဟီၣ်ခိၣ်ဖိတုၤ အဟ့ၣ်လီၤကွံာ်အဖိခွါအိၣ်တဂၤဃီ, ဒ်သိးကယဲၢ်ပှၤလၢ အစူၢ်က့ၤနာ်က့ၤအီၤတဂၤလၢ်လၢ်န့ၣ်, အသုတဟးဂီၤတဂ့ၤဒီး, ကန့ၢ်ဘၣ်တၢ်မူအထူအယိာ်လီၤ.” ယဟိဝၤယွၤအဲၣ်ပှၤဒိၣ်မးအဃိ အဝဲဟ့ၣ်လီၤအဖိခွါယ့ၣ်ၡူး လၢပဂီၢ်န့ၣ်လီၤ. မ့ၢ်လၢယ့ၣ်ၡူးသးအိၣ်တူၢ်သံအသး လၢပဂီၢ်အဃိပသ့ၣ်ညါဘၣ်လၢ အဝဲအဲၣ်ပှၤဒိၣ်မးလီၤ. (ယိၤဟၣ် ၁၅:၁၃) တၢ်ဟ့ၣ်လၢအမ့ၢ်တၢ်ပှ့ၤက့ၤန့ၣ် ဒုးနာ်န့ၢ်နၤလၢ ယဟိဝၤယွၤဒီးယ့ၣ်ၡူးန့ၣ် အဲၣ်နၤနီၢ်ကီၢ်လီၤ.—ကလၤတံ ၂:၂၀.
ဒ်ပမၤလိအါထီၣ် ယဟိဝၤယွၤအဂ့ၢ်အသိး ပကကဲထီၣ်အတံၤသကိး ဒီးပတၢ်အဲၣ်အီၤ ကအါထီၣ်ဝဲလီၤ
၁၉, ၂၀. (က) နကဲထီၣ် ကစၢ်ယွၤအတံၤသကိး ကသ့ဒ်လဲၣ်. (ခ) နတူၢ်လိာ် ယ့ၣ်ၡူးအတၢ်ပှ့ၤက့ၤန့ၣ် နပာ်ဖျါထီၣ်အီၤသ့ဒ်လဲၣ်.
၁၉ ခဲအံၤပမၤလိဘၣ် ကစၢ်ယွၤအတၢ်အဲၣ် လၢအဒိၣ်အမုၢ်ဝံၤဝဲလံ. ဘၣ်ဆၣ် ပကဲထီၣ်အတံၤသကိးကသ့ဒ်လဲၣ်. ပှၤလၢပတသ့ၣ်ညါအီၤတဂၤန့ၣ် တညီလၢပကအဲၣ်အီၤဘၣ်. ယိၤဟၣ် ၁၇:၃ စံးဝဲလၢ ပသ့ၣ်ညါထီၣ်ယဟိဝၤယွၤသ့ဝဲလီၤ. နမ့ၢ်မၤဒ်အံၤန့ၣ် နတၢ်အဲၣ်အီၤကဒိၣ်ထီၣ်, နကအဲၣ်ဒိးမၤအတၢ်ဘၣ်သး ဒီးနကဲထီၣ်အတံၤသကိးကသ့ဝဲလီၤ. လၢတၢ်န့ၣ်အဃိ မၤလိအါထီၣ်ဘၣ်ဃးဒီး ယဟိဝၤယွၤအဂ့ၢ် ခီဖျိလၢတၢ်မၤလိလံာ်စီဆှံတက့ၢ်.—၁ ယိၤဟၣ် ၅:၃.
၂၀ တူၢ်လိာ်ယ့ၣ်ၡူး အတၢ်ပှ့ၤက့ၤတက့ၢ်. လံာ်စီဆှံစံးဝဲလၢ “ပှၤလၢအစူၢ်က့ၤနာ်က့ၤဖိခွါန့ၣ်, အိၣ်ဒီးတၢ်မူအထူအယိာ်လီၤ.” (ယိၤဟၣ် ၃:၃၆) ဒ်သိးပကပာ်ဖျါထီၣ်လၢ ပစူၢ်က့ၤနာ်က့ၤယ့ၣ်ၡူးအဂီၢ်န့ၣ် ပကဘၣ်မၤဒ်လဲၣ်. ပကဘၣ်မၤထွဲတၢ်လၢ ယ့ၣ်ၡူးသိၣ်လိပှၤတဖၣ်န့ၣ်လီၤ. (ယိၤဟၣ် ၁၃:၁၅) ပနာ်ယ့ၣ်ၡူးန့ၣ် ပပာ်ဖျါထီၣ်အီၤ ထဲလၢပတၢ်ကတိၤတသ့ဝဲဘၣ်. ပမ့ၢ်တူၢ်လိာ်တၢ်ပှ့ၤက့ၤန့ၣ် ပကဘၣ်ပာ်ဖျါထီၣ်ပတၢ်နာ် ခီဖျိလၢပတၢ်မၤလီၤ. ဖဲ ယၤကိာ် ၂:၂၆ န့ၣ်ပဖးဘၣ်လၢ– “တၢ်နာ်တအိၣ်ဘၣ်ဒီးတၢ်မၤတဖၣ် မ့ၢ်တၢ်သံစ့ၢ်ကီး” လီၤ.
၂၁, ၂၂. (က) ဘၣ်မနုၤအဃိ ကြၢးပလဲၤထီၣ် တၢ်သ့ၣ်နီၣ်ထီၣ်က့ၤ ယ့ၣ်ၡူးခရံာ်အတၢ်သံအမူး ကိးနံၣ်ဒဲးလဲၣ်. (ခ) လၢတၢ်မၤလိ ၆ ဒီး ၇ အပူၤန့ၣ် ပကတဲသကိးတၢ်ဂ့ၢ်မနုၤလဲၣ်.
၂၁ လဲၤထီၣ် တၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအမူးတက့ၢ်. မုၢ်တနၤဖဲ ယ့ၣ်ၡူးတချုးသံန့ၣ် အဝဲမၤလိာ်ပှၤလၢ ပကဘၣ်မၤတၢ်သ့ၣ်နီၣ်ထီၣ်က့ၤ အတၢ်သံအမူးန့ၣ်လီၤ. မူးအံၤဘၣ်တၢ်ကိးအီၤလၢ တၢ်သ့ၣ်နီၣ်ထီၣ်က့ၤအမူး မ့တမ့ၢ် “ကစၢ်အတၢ်အီၣ်လၢဟါအီၣ်” ဒီးပမၤအီၤကိးနံၣ်ဒဲးန့ၣ်လီၤ. (၁ ကရံၣ်သူး ၁၁:၂၀; မးသဲ ၂၆:၂၆-၂၈) ယ့ၣ်ၡူးအဲၣ်ဒိးလၢ ပကသ့ၣ်နီၣ်ထီၣ်က့ၤလၢ အဝဲဟ့ၣ်လီၤအတၢ်အိၣ်မူလၢအလၢအပှဲၤ လၢတၢ်ပှ့ၤက့ၤအဂီၢ်လီၤ. ဒီးယ့ၣ်ၡူးစံးဝဲလၢ– “မၤတၢ်အံၤလၢသုသ့ၣ်နီၣ်ထီၣ်က့ၤယၤအဂ့ၢ်န့ၣ်တက့ၢ်.” (ဖး လူၤကၣ် ၂၂:၁၉ တက့ၢ်.) ဖဲနလဲၤထီၣ်မူးပွဲအံၤအဆၢကတီၢ် မ့ၢ်နပာ်ဖျါထီၣ်လၢနပာ်လုၢ်ပာ်ပှ့ၤတၢ်ပှ့ၤက့ၤအံၤ ဒီးနသ့ၣ်နီၣ်ထီၣ်က့ၤ ယဟိဝၤယွၤဒီးယ့ၣ်ၡူးအတၢ်အဲၣ်အဒိၣ်အမုၢ်လၢပဂီၢ်န့ၣ်လီၤ.—ကွၢ်တၢ်ဂ့ၢ် ၁၆ လၢလံာ်အကတၢၢ်တက့ၢ်.
၂၂ တၢ်ပှ့ၤက့ၤန့ၣ် မ့ၢ်တၢ်လုၢ်ဒိၣ်ပှ့ၤဒိၣ်ကတၢၢ်လၢ တၢ်ဟ့ၣ်ခဲလၢာ်အကျါလီၤ. (၂ ကရံၣ်သူး ၉:၁၄, ၁၅) တၢ်ဟ့ၣ်လၢ အလုၢ်ဒိၣ်ပှ့ၤဒိၣ်အံၤ ကဲဘျုးလၢပဂီၢ်တကးဒံးဘၣ် ကကဲဘျုးလၢ ပှၤသံတ့ၢ်လၢအကကွဲၢ်တဖၣ်အဂီၢ်စ့ၢ်ကီးလီၤ. ဘၣ်ဃးဒီးတၢ်ဂ့ၢ်အံၤ ကဲထီၣ်အသးသ့ဒ်လဲၣ်န့ၣ် ပကတဲသကိးလၢ တၢ်မၤလိ ၆ ဒီး ၇ အပူၤန့ၣ်လီၤ.