တၢ်မၤလိ ၁၆
ဆဲးပာ်ဖျါထီၣ် တၢ်စံးဘျုးစံးဖှိၣ်လၢ တၢ်ပှ့ၤက့ၤအဂီၢ်
“ပှၤကညီဖိခွါဒၣ်လဲာ်ဟဲ . . . ဟ့ၣ်လီၤအသးသမူလၢ ပှၤအါဂၤအဂီၢ် ဒ်တၢ်ပှ့ၤက့ၤ အသိးလီၤ.”—မၢ်ကူး ၁၀:၄၅.
တၢ်သးဝံၣ် ၁၈ တၢ်စံးဘျုးစံးဖှိၣ်လၢ တၢ်ပှ့ၤက့ၤအဂီၢ်
တၢ်မၤလိအံၤ အတၢ်တိာ်ပာ်a
၁-၂. တၢ်ပှ့ၤက့ၤန့ၣ် မ့ၢ်တၢ်မနုၤလဲၣ် ဒီးဘၣ်မနုၤအဃိ ပလိၣ်ဘၣ်အီၤလဲၣ်.
ဖဲစီၤအၤဒၣ် မၤတၢ်ဒဲးဘးအခါ အဝဲတအိၣ်မူဘၣ် လီၤထူလီၤယိာ်လၢၤဘၣ်. ဒီးအဖိအလံၤလၢ ကအိၣ်ဖျဲၣ်ထီၣ်တဖၣ်စ့ၢ်ကီး တအိၣ်မူဘၣ်လီၤထူလီၤယိာ်လၢၤဘၣ်. ခီဖျိလၢ စီၤအၤဒၣ်မၤတၢ်ဒဲးဘးအဃိ အထံၣ်ဘၣ်ဒီးတၢ်ဆိၣ်ဃီၣ်ဒ်အံၤလီၤ. ဘၣ်ဆၣ် မ့မ့ၢ်လၢ စီၤအၤဒၣ်အဖိအလံၤတဖၣ်ဟီမီၤ. အဝဲသ့ၣ်တမၤဘၣ် တၢ်ကမၣ်နီတမံၤဘၣ် အဃိ အဝဲသ့ၣ်တကြၢးဒိးန့ၢ်ဘၣ် တၢ်စံၣ်ညီၣ်ဒ်သိးဒီးစီၤအၤဒၣ်ဘၣ်. (ရိမ့ၤ ၅:၁၂, ၁၄) စီၤအၤဒၣ်မၤတၢ်ဒဲးဘးအဃိ အကြၢးသံဝဲလီၤ. ဘၣ်ဆၣ် မ့မ့ၢ်လၢ စီၤအၤဒၣ်အဖိအလံၤတဖၣ်ဟီန့ၣ် ဒ်သိးအဝဲသ့ၣ်ကအိၣ်မူဘၣ် လီၤထူလီၤယိာ်အဂီၢ် ယဟိဝၤယွၤကဘၣ်ရဲၣ်ကျဲၤဝဲ တၢ်တမံၤမံၤလီၤ. အဃိ ယဟိဝၤယွၤစးထီၣ်ရဲၣ်ကျဲၤဝဲလၢ စီၤအၤဒၣ်အဖိအလံၤ လၢအကကွဲၢ်တဖၣ် ကထူၣ်ဖျဲးထီၣ်က့ၤ လၢတၢ်ဒဲးဘးဒီးတၢ်သံအဂီၢ်န့ၣ်လီၤ. (၁ မိၤၡ့ ၃:၁၅) ယဟိဝၤယွၤပာ်ပနီၣ်ဃာ် တၢ်ဆၢကတီၢ်လၢ ကဆှၢလီၤဝဲအဖိခွါ လၢဟီၣ်ခိၣ်ချၢလၢက “ဟ့ၣ်လီၤအသးသမူလၢ ပှၤအါဂၤအဂီၢ် ဒ်တၢ်ပှ့ၤက့ၤ အသိးလီၤ.”—မၢ်ကူး ၁၀:၄၅; ယိၤဟၣ် ၆:၅၁.
၂ တၢ်ပှ့ၤက့ၤန့ၣ် မ့ၢ်တၢ်မနုၤလဲၣ်. လံာ်စီဆှံလၢ ကြံးကျိာ်တကတြူၢ်အပူၤ တၢ်ကတိၤလၢအမ့ၢ်တၢ်ပှ့ၤက့ၤန့ၣ် အဲၣ်ဒိးတဲဝဲ ယ့ၣ်ၡူးပှ့ၤက့ၤဝဲ တၢ်လၢစီၤအၤဒၣ်မၤလီၤမၢ်ဝဲန့ၣ်လီၤ. (၁ ကရံၣ်သူး ၁၅:၂၂) ဘၣ်မနုၤအဃိ ပလိၣ်ဘၣ်တၢ်ပှ့ၤက့ၤလဲၣ်. ယဟိဝၤယွၤအတၢ်သိၣ်တၢ်သီ အိၣ်ဝဲလၢ ပှၤကဘၣ်ဟ့ၣ်က့ၤဝဲ သးသမူလၢသးသမူအဂီၢ်လီၤ. (၂ မိၤၡ့ ၂၁:၂၃, ၂၄) စီၤအၤဒၣ်ဒုးလီၤမၢ်ကွံာ်ဝဲ အတၢ်အိၣ်မူလၢ အလၢအပှဲၤတခါအံၤလီၤ. အဃိ ဒ်ကစၢ်ယွၤအတၢ်သိၣ်တၢ်သီ အိၣ်ဝဲအသိး ယ့ၣ်ၡူးကဘၣ်ဟ့ၣ်လီၤက့ၤဝဲ အသးသမူလၢ အလၢအပှဲၤတခါအံၤလီၤ. (ရိမ့ၤ ၅:၁၇) အဃိ ယ့ၣ်ၡူးကဲထီၣ်ဝဲ ပှၤ “အစိၤစိၤအဃၣ်ဃၣ်အပၢ်” လၢပှၤလၢအစူၢ်က့ၤနာ်က့ၤ တၢ်ပှ့ၤက့ၤတဖၣ်အဂီၢ်လီၤ.—ယၡါယၤ ၉:၆; ရိမ့ၤ ၃:၂၃, ၂၄.
၃. ဒ် ယိၤဟၣ် ၁၄:၃၁ ဒီး ၁၅:၁၃ ပာ်ဖျါထီၣ်ဝဲအသိး ဘၣ်မနုၤအဃိ ယ့ၣ်ၡူးသးအိၣ် ဟ့ၣ်လုၢ်ထီၣ်အသးသမူ လၢအလၢအပှဲၤတခါအံၤလဲၣ်.
၃ ယ့ၣ်ၡူးသးအိၣ် ဟ့ၣ်လုၢ်ထီၣ်အသးသမူ ခီဖျိလၢအအဲၣ်အပၢ်ဒီး အအဲၣ်ပှၤအဃိလီၤ. (ဖး ယိၤဟၣ် ၁၄:၃၁; ၁၅:၁၃ တက့ၢ်.) ခီဖျိလၢ ယ့ၣ်ၡူးအဲၣ်ယဟိဝၤယွၤဒီး အဲၣ်ပှၤအဃိ အဝဲဆၢတဲာ်လီၤအသးလၢ အကတီဒီးယဟိဝၤယွၤတုၤအသံတစု ဒီးကမၤလၢပှဲၤ အပၢ်အတၢ်ဘၣ်သးလီၤ. လၢတၢ်န့ၣ်အဃိ ယဟိဝၤယွၤအတၢ်တိာ်ပာ် ဘၣ်ဃးဒီးဟီၣ်ခိၣ်န့ၣ် ကလၢထီၣ်ပှဲၤထီၣ်ဝဲလီၤ. လၢတၢ်မၤလိအံၤအပူၤ ပကတဲသကိး ဘၣ်မနုၤအဃိ ယဟိဝၤယွၤပျဲဝဲလၢ ယ့ၣ်ၡူးကထံၣ်ဘၣ်တၢ်နးတၢ်ဖှီၣ် တချုးလၢအသံဒံးဘၣ်န့ၣ်လဲၣ်. တကးဒံးဘၣ် ပကကွၢ်သကိးစ့ၢ်ကီး ပှၤကွဲးလံာ်စီဆှံဖိတဂၤလၢ အပာ်လုၢ်ပာ်ပှ့ၤဝဲ တၢ်ပှ့ၤက့ၤအဂ့ၢ်န့ၣ်လီၤ. လၢအလီၢ်ခံကတၢၢ်တခါန့ၣ် ပကတဲသကိး ပစံးဘျုးစံးဖှိၣ်တၢ်ပှ့ၤက့ၤန့ၣ် ပပာ်ဖျါထီၣ်အီၤ ကသ့လၢကျဲဒ်လဲၣ် ဒီးတၢ်ပှ့ၤက့ၤလၢ ယဟိဝၤယွၤဒီးယ့ၣ်ၡူးဟ့ၣ်လီၤပှၤန့ၣ် ပပာ်လုၢ်ပာ်ပှ့ၤအါထီၣ်အီၤ ကသ့လၢကျဲဒ်လဲၣ်.
ဘၣ်မနုၤအဃိ ယ့ၣ်ၡူးထံၣ်ဘၣ် တၢ်နးတၢ်ဖှီၣ်လဲၣ်
ဆိကမိၣ်ထီၣ် ကယဲၢ်တၢ်လၢယ့ၣ်ၡူး ဘၣ်လဲၤခီဖျိဝဲ တၢ်မၤအၢမၤနး လၢအကပှ့ၤက့ၤပှၤအဂီၢ်န့ၣ်တက့ၢ် (ကွၢ်လံာ်အဆၢ ၄)
၄. ယ့ၣ်ၡူးသံဝဲဒ်လဲၣ်န့ၣ် တဲဖျါထီၣ်တက့ၢ်.
၄ ထံၣ်တမှံကွၢ် တၢ်ကဲထီၣ်အသးဒီးယ့ၣ်ၡူး ဖဲအတချုးသံဒံးဘၣ် အနၤန့ၣ်တက့ၢ်. ယ့ၣ်ၡူမ့ၢ်မၢဝဲ မူခိၣ်ကလူးအသုးမုၢ်တဖု ဟဲမၤစၢၤအီၤန့ၣ် သ့ဝဲလီၤ. ဘၣ်ဆၣ် အဝဲတမၤဝဲဒ်န့ၣ်ဘၣ်. လၢတၢ်န့ၣ်အလီၢ် အဝဲပျဲဝဲလၢ ရိမ့ၤအသုးဖိတဖၣ်ကဖီၣ်အီၤ ဒီးထိအီၤတီၢ်အီၤလီၤ. (မးသဲ ၂၆:၅၂-၅၄; ယိၤဟၣ် ၁၈:၃; ၁၉:၁) တကးဒံးဘၣ် အဝဲသ့ၣ်ဖျ့ဝဲ ယ့ၣ်ၡူးဒီးပျံၤလီၤ. လၢခံ အဝဲသ့ၣ်မၢယ့ၣ်ၡူးယိး သ့ၣ်တၢၣ်လၢအဃၢ ဒီးအချၢဃံန့ၣ် အသွံၣ်ဟဲလီၤယွၤဝဲလီၤ. ယ့ၣ်ၡူးဂုာ်ကျဲးစၢး လဲၤယိးဝဲသ့ၣ်တၢၣ်အံၤလၢ ပှၤကမၤသံအီၤအလီၢ်လီၤ. လၢခံ ပှၤရိမ့ၤသုးဖိမၢဝဲ ပှၤအဂၤတဂၤလၢ ကယိးစၢၤန့ၢ်ဝဲအသ့ၣ်တၢၣ်အံၤလီၤ. (မးသဲ ၂၇:၃၂) ဖဲယ့ၣ်ၡူးလဲၤတုၤလၢ တၢ်လီၢ်လၢပှၤကမၤသံအီၤအခါ ပှၤသုးဖိတဖၣ် ပျၤထီၣ်ယ့ၣ်ၡူး အစုဒီးအခီၣ် လၢသ့ၣ်တၢၣ်အလိၤလီၤ. ယ့ၣ်ၡူးအမိၢ်ပှၢ်ဃၢဝဲအဃိ အတၢ်ပူၤလီၢ်န့ၣ် ကအိးတလဲးထီၣ်အသးလီၤ. ယ့ၣ်ၡူးအမိၢ်ဒီးအသကိးတဖၣ် ဟီၣ်ဝဲယၢၤဝဲလၢအဃိလီၤ. ဘၣ်ဆၣ် မ့မ့ၢ်လၢ ပှၤယူဒၤဖိခိၣ်နၢ်တဖၣ်န့ၣ် မၤဆဲးအဲးဝဲယ့ၣ်ၡူးလီၤ. (လူၤကၣ် ၂၃:၃၂-၃၈; ယိၤဟၣ် ၁၉:၂၅) ယ့ၣ်ၡူးကဘၣ်ကီၤဝဲတၢ်ဆါအံၤ တဘျုးနၣ်ရံၣ်ညါလီၤ. ခီဖျိလၢ ယ့ၣ်ၡူးအမိၢ်ပှၢ်လီၤကစဲၤဝဲအဃိ အသးဒီးအပသိၣ်တဖၣ် တမၤတၢ်ဂ့ၤဂ့ၤလၢၤဘၣ် အဃိ ယ့ၣ်ၡူးကသါဝဲတဘျဲဝဲဘၣ်. ယ့ၣ်ၡူးသ့ၣ်ညါဝဲလၢ အသးတီဒီးယဟိဝၤယွၤ ဒီးတချုးဖဲအကသံန့ၣ် အဃ့ဘါထုကဖၣ်လၢ ယဟိဝၤယွၤအအိၣ် လၢအလီၢ်ခံကတၢၢ်တဘျီလီၤ. ဝံၤဘျီ အဖျးလီၤအခိၣ်ဒီးသံဝဲလီၤ. (မၢ်ကူး ၁၅:၃၇; လူၤကၣ် ၂၃:၄၆; ယိၤဟၣ် ၁၀:၁၇, ၁၈; ၁၉:၃၀) တချုးလၢ ယ့ၣ်ၡူးအကသံန့ၣ် အဘၣ်ကီၤတၢ်ဆါယံာ်ယံာ်ထၢထၢ တကးဒံးဘၣ် အထံၣ်ဘၣ်ဒီးတၢ်ဒုၣ်ဒွဲၣ်စံးအၢတဖၣ်လီၤ.
၅. တၢ်လၢယ့ၣ်ၡူးဘၣ်ယိၣ်ဝဲ ဒိၣ်န့ၢ်ဒံးအကဘၣ်သံန့ၣ် မ့ၢ်မနုၤလဲၣ်.
၅ ဖဲပှၤမၤသံယ့ၣ်ၡူးအဆၢကတီၢ်န့ၣ် ယ့ၣ်ၡူးတတူၢ်ဘၣ်ဝဲလၢ အနးကတၢၢ်လၢအဂီၢ်ဒံးဘၣ်. ဘၣ်ဆၣ် တၢ်လၢအမၤဘၣ်ဒိ ယ့ၣ်ၡူးအသးဒိၣ်ကတၢၢ်န့ၣ် မ့ၢ်ဝဲပှၤပာ်ဒ့ၣ်ပာ်ကမၣ်အီၤလၢ အထီဒါကစၢ်ယွၤ ဒီးအကတိၤထီဒါ ကစၢ်ယွၤအမံၤလီၤ. (မးသဲ ၂၆:၆၄-၆၆) ပှၤပာ်ဒ့ၣ်ပာ်ကမၣ်ယ့ၣ်ၡူးလၢ အထီဒါကစၢ်ယွၤန့ၣ် အဘၣ်ယိၣ်ဝဲဒိၣ်မး ဒီးအမုၢ်လၢ်ဝဲလၢ အပၢ်တပျဲလၢ အကထံၣ်ဘၣ်တၢ်မၤမဲာ်ဆှးအီၤ လၢကျဲဒ်အံၤဘၣ်. (မးသဲ ၂၆:၃၈, ၃၉, ၄၂) ဘၣ်မနုၤအဃိ ယဟိဝၤယွၤပျဲလၢ အဖိခွါကထံၣ်ဘၣ်ဝဲ တၢ်မၤအၢမၤနးဒီးတၢ်သံလဲၣ်. ပကတဲသကိး တၢ်ဂ့ၢ်သၢထံၣ်လီၤ.
၆. ဘၣ်မနုၤအဃိ ယ့ၣ်ၡူးဘၣ်တၢ်ပျၤထီၣ်အီၤလၢ တၢ်မၤအၢမၤနးအသ့ၣ်တၢၣ်လိၤလဲၣ်.
၆ တၢ, ယ့ၣ်ၡူးကဘၣ်တၢ်ပျၤထီၣ်အီၤ လၢသ့ၣ်တၢၣ်လိၤန့ၣ် ဒ်သိးကမၤထူၣ်ဖျဲးထီၣ် ပှၤယူဒၤဖိတဖၣ်လၢ တၢ်ဆိၣ်ဃီၣ်အပူၤလီၤ. (ကလၤတံ ၃:၁၀, ၁၃) ပှၤယူဒၤဖိတဖၣ် ဘၣ်တၢ်ဆိၣ်ဃီၣ် မ့ၢ်လၢအဝဲသ့ၣ်အၢၣ်လီၤဝဲလၢ ကမၤထွဲဝဲ ကစၢ်ယွၤအတၢ်သိၣ်တၢ်သီတဖၣ် ဘၣ်ဆၣ် အဝဲသ့ၣ်တတီဒီး အတၢ်အၢၣ်လီၤလၢၤဘၣ်. အဃိ အဝဲသ့ၣ်ကဘၣ်သံဝဲလီၤ. မ့ၢ်လၢအဝဲသ့ၣ်မ့ၢ်ဝဲ စီၤအၤဒၣ်အဖိအလံၤအဃိ ဘၣ်ဝဲတၢ်ဆိၣ်ဃီၣ်အံၤလီၤ. (ရိမ့ၤ ၅:၁၂) ကစၢ်ယွၤအတၢ်သိၣ်တၢ်သီအိၣ်ဝဲလၢ ပှၤအံၣ်စရ့လးဖိတဂၤ မ့ၢ်မၤတၢ်ကမၣ်လၢအကြၢးသံန့ၣ် ပှၤကဘၣ်မၤသံအီၤလီၤ. ဖဲန့ၣ်ဝံၤအလီၢ်ခံ အစိၣ်န့ၣ် ကဘၣ်တၢ်ပျၤထီၣ်အီၤ လၢသ့ၣ်တၢၣ်အလိၤလီၤ.b (၅ မိၤၡ့ ၂၁:၂၂, ၂၃; ၂၇:၂၆) ခီဖျိလၢ ယ့ၣ်ၡူးဘၣ်တၢ်ပျၤထီၣ်အီၤလၢ သ့ၣ်တၢၣ်လိၤအဃိ ပှၤယူဒၤဖိတဖၣ် ထူၣ်ဖျဲးထီၣ်က့ၤလၢ တၢ်ဆိၣ်ဃီၣ်အံၤအပူၤလီၤ. ဒီးအဝဲသ့ၣ်မ့ၢ်ညိကွံာ်ဝဲ ယ့ၣ်ၡူးဒၣ်လဲာ် ယ့ၣ်ၡူးအတၢ်ဟ့ၣ်လုၢ်ထီၣ်သးအံၤ ကဲဘျုးလၢအဝဲသ့ၣ်အဂီၢ်ဒံးလီၤ.
၇. တၢ်ဂ့ၢ်ခံထံၣ်တထံၣ်လၢ ယဟိဝၤယွၤပျဲဝဲလၢ အဖိခွါကထံၣ်ဘၣ် တၢ်နးတၢ်ဖှီၣ်န့ၣ် မ့ၢ်မနုၤလဲၣ်.
၇ ဘၣ်မနုၤအဃိ ကစၢ်ယွၤပျဲဝဲလၢ အဖိခွါကထံၣ်ဘၣ် တၢ်နးတၢ်ဖှီၣ်လဲၣ်. ခံ, ယဟိဝၤယွၤသိၣ်လိယ့ၣ်ၡူး ဒ်သိးကကဲထီၣ်ဝဲ ပှၤလုၢ်တၢ်ခိၣ်အဒိၣ်ကတၢၢ် လၢပဂီၢ်လီၤ. ယ့ၣ်ၡူးသ့ၣ်ညါဝဲလၢ ဖဲအထံၣ်ဘၣ်ဒီး တၢ်မၤကွၢ်နးနးကလဲာ်အခါ ကီဒိၣ်မးလၢ အကဒိကနၣ်ကစၢ်ယွၤအကလုၢ်လီၤ. ဒီးယ့ၣ်ၡူးထံၣ်ဘၣ် တၢ်ဆီၣ်သနံးအါတလၢ တုၤဒၣ်လဲာ် အဝဲဃ့ဘါထုကဖၣ်လၢ “အကလုၢ်ဖးဒိၣ် အိၣ်ဒီးမဲာ်ထံမဲာ်နိ” လီၤ. ခီဖျိလၢ ယ့ၣ်ၡူးထံၣ်ဘၣ် တၢ်ဆီၣ်သနံး နးနးကလဲာ်အဃိ အဝဲနၢ်ပၢၢ်စၢၤ ပတၢ်လိၣ်ဘၣ် ဒီး “အဝဲမၤစၢၤဝဲပှၤ” ဖဲပထံၣ်ဘၣ် “တၢ်မၤကွၢ်” အခါန့ၣ်လီၤ. ပစံးဘျုးဘၣ် ယဟိဝၤယွၤဒိၣ်မး လၢအဟ့ၣ်လီၤပှၤ ပှၤလုၢ်တၢ်ခိၣ်အဒိၣ်ကတၢၢ်လၢ အအိၣ်ဒီးတၢ်သးကညီၤလၢ “အဒိသူၣ်ဒိသး ပတၢ်ဂံၢ်စၢ်ဘါစၢ်တဖၣ်” သ့တဂၤန့ၣ်လီၤ.—ဧ့ၤဘြံၤ ၂:၁၇, ၁၈; ၄:၁၄-၁၆; ၅:၇-၁၀.
၈. တၢ်ဂ့ၢ်သၢထံၣ်တထံၣ်လၢ ယဟိဝၤယွၤပျဲဝဲလၢ ယ့ၣ်ၡူးကထံၣ်ဘၣ် တၢ်မၤအၢမၤနးအီၤ နးနးကလဲာ်န့ၣ် မ့ၢ်မနုၤလဲၣ်.
၈ သၢ, ယဟိဝၤယွၤဟ့ၣ်အခွဲးလၢ ယ့ၣ်ၡူးကထံၣ်ဘၣ် တၢ်နးတၢ်ဖှီၣ်နးနးကလဲာ် ဒ်သိးကစံးဆၢဝဲ တၢ်သံကွၢ်လၢအရ့ဒိၣ်အံၤလီၤ. ဖဲပှၤဟီၣ်ခိၣ်ဖိတဖၣ် ထံၣ်ဘၣ်တၢ်မၤကွၢ် နးနးကလဲာ်အခါ မ့ၢ်အဝဲသ့ၣ်ကဆဲးသးတီ ဒီးယဟိဝၤယွၤဧါ. မုၣ်ကီၤလံၢ်တဲဝဲလၢ တဆဲးသးတီဘၣ်. အဝဲတဲဝဲလၢ ပှၤဟီၣ်ခိၣ်ဖိန့ၣ် မၤယဟိဝၤယွၤအတၢ်မၤ ခီဖျိလၢယဟိဝၤယွၤဆိၣ်ဂ့ၤ အဝဲသ့ၣ်အဃိလီၤ. ဒီးမုၣ်ကီၤလံၢ်ဆိကမိၣ်ဝဲလၢ ပှၤဟီၣ်ခိၣ်ဖိတအဲၣ်ယဟိဝၤယွၤနီၢ်နီၢ် ဒ်သိးဒီးအပၢ်စီၤအၤဒၣ်လီၤ. (ယိၤဘး ၁:၉-၁၁; ၂:၄, ၅) ခီဖျိလၢ ယဟိဝၤယွၤနာ်န့ၢ်အဖိခွါ လၢလၢပှဲၤပှဲၤအဃိ ယဟိဝၤယွၤပျဲဝဲလၢ ယ့ၣ်ၡူးကထံၣ်ဘၣ် တၢ်မၤအၢမၤနးအီၤ နးနးကလဲာ်န့ၣ်လီၤ. ယ့ၣ်ၡူးသးတီဒီး ယဟိဝၤယွၤအဃိ အဝဲပာ်ဖျါထီၣ်လၢ မုၣ်ကီၤလံၢ်မ့ၢ် ပှၤလီတၢ်လီၤ.
ပှၤကွဲးလံာ်စီဆှံဖိတဂၤ လၢအပာ်လုၢ်ပာ်ပှ့ၤဝဲ တၢ်ပှ့ၤက့ၤ
၉. တၢ်မၢဖိယိၤဟၣ် ပာ်လီၤန့ၢ်ပှၤ ဒိဂ့ၤတဲာ်ဘၣ်ဒ်လဲၣ်.
၉ တၢ်သိၣ်လိဘၣ်ဃးဒီး တၢ်ပှ့ၤက့ၤန့ၣ် မၤဂၢၢ်ကျၢၤထီၣ်ဝဲ ခရံာ်ဖိအါဂၤ အတၢ်နာ်လီၤ. အဝဲသ့ၣ်ထံၣ်ဘၣ်ဒီး တၢ်မၤအၢမၤနးသနာ်က့ အဝဲသ့ၣ်ဆဲးစံၣ်တဲၤတဲလီၤတၢ်ဒံးလီၤ. ဒီးအဝဲသ့ၣ်ဘၣ်လဲၤခီဖျိဝဲ တၢ်မၤအၢမၤနးလၢအတၢ်အိၣ်မူအပူၤ ဒီတစိၤညါလီၤ. ပကကွၢ်သကိး တၢ်မၢဖိယိၤဟၣ် အတၢ်လဲၤခီဖျိလီၤ. စီၤယိၤဟၣ်စံၣ်တဲၤတဲလီၤ တၢ်မ့ၢ်တၢ်တီ ဘၣ်ဃးဒီးခရံာ် ဒီးတၢ်ပှ့ၤက့ၤန့ၣ် ဘၣ်သ့ၣ်သ့ၣ် ကယံာ်ဝဲလၢအနံၣ် ၆၀ ဘျဲၣ်လီၤ. ဖဲစီၤယိၤဟၣ်အသးနံၣ် ကအိၣ်လၢ ၁၀၀ ဃၣ်ဃၣ်အခါ ပှၤရိမ့ၤဖိအပဒိၣ်ပပှၢ်တဖၣ် ဆိကမိၣ်ဝဲလၢ စီၤယိၤဟၣ်မၤတၢထီၣ်တၢလီၤတၢ် အဃိ အဝဲသ့ၣ်ဖၢနုာ်လီၤ စီၤယိၤဟၣ်လၢဃိာ်ပူၤ လၢကီးပးမူးအပူၤလီၤ. စီၤယိၤဟၣ်န့ၣ် မ့ၢ်အမၤကမၣ်ဘၣ် တၢ်မနုၤလဲၣ်. အဝဲ “တဲတၢ် ဘၣ်ဃးဒီး ကစၢ်ယွၤအဂ့ၢ် ဒီးအုၣ်ယသးလၢ ယ့ၣ်ၡူးအဂ့ၢ်အဃိ” လီၤ. (လီၣ်ဖျါ ၁:၉) စီၤယိၤဟၣ် ပာ်လီၤဝဲဒိဂ့ၤတဲာ်ဘၣ် လၢအအိၣ်ဒီးတၢ်နာ် ဒီးတၢ်တူၢ်န့ၢ်ခီၣ်ကဲန့ၣ်လီၤ.
၁၀. စီၤယိၤဟၣ်အတၢ်ကွဲးတဖၣ်န့ၣ် ပာ်ဖျါထီၣ်ဝဲလၢ အပာ်လုၢ်ပာ်ပှ့ၤတၢ်ပှ့ၤက့ၤအံၤဒ်လဲၣ်.
၁၀ လံာ်စီဆှံအကတြူၢ်တဖၣ် လၢစီၤယိၤဟၣ်ကွဲးဝဲန့ၣ် ပာ်ဖျါထီၣ်လၢ အအဲၣ်ယ့ၣ်ၡူး ဒီးအပာ်လုၢ်ပာ်ပှ့ၤဝဲ ယ့ၣ်ၡူးအတၢ်ပှ့ၤက့ၤအံၤဒိၣ်မးလီၤ. ဘၣ်ဃးဒီးတၢ်ပှ့ၤက့ၤ ဒီးတၢ်ပှ့ၤက့ၤကဲဘျုးကဲဖှိၣ် လၢပဂီၢ်ဒ်လဲၣ်အဂ့ၢ်န့ၣ် စီၤယိၤဟၣ်ကွဲးဖျါထီၣ်ဝဲ အဘျီ ၁၀၀ ဘျဲၣ်ညါလီၤ. အဒိ, စီၤယိၤဟၣ်ကွဲးဝဲလၢ “ပှၤတဂၤဂၤ မ့ၢ်မၤဘၣ် တၢ်ဒဲးဘးတခါန့ၣ် ပအိၣ်ဒီး ပှၤမၤစၢၤတၢ်တဂၤ လၢအမ့ၢ် ပှၤတီပှၤလိၤ ယ့ၣ်ၡူးခရံာ်လၢ အအိၣ်ဒီးပၢ်န့ၣ်လီၤ.” (၁ ယိၤဟၣ် ၂:၁, ၂) စီၤယိၤဟၣ်အတၢ်ကွဲးန့ၣ် ပာ်ဖျါထီၣ်ဝဲ “တၢ်မၤလၢ ကအုၣ်အသးဘၣ်ဃးဒီး ယ့ၣ်ၡူး” မ့ၢ်ပှၤလၢအရ့ဒိၣ်တဂၤလီၤ. (လီၣ်ဖျါ ၁၉:၁၀) အဃိ ပသ့ၣ်ညါဘၣ်လၢ စီၤယိၤဟၣ်ပာ်လုၢ်ပာ်ပှ့ၤဝဲ တၢ်ပှ့ၤက့ၤအံၤဒိၣ်မးလီၤ. ပပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်ပှ့ၤက့ၤဒ်သိးအီၤ ကသ့လၢကျဲဒ်လဲၣ်.
ပစံးဘျုးစံးဖှိၣ်တၢ်ပှ့ၤက့ၤန့ၣ် ပပာ်ဖျါထီၣ်အီၤ ကသ့လၢကျဲဒ်လဲၣ်
ပမ့ၢ်ပာ်လုၢ်ပာ်ပှ့ၤ တၢ်ပှ့ၤက့ၤနီၢ်နီၢ်န့ၣ် ပကတြီဆၢကွံာ်တၢ်ဒဲးဘးလီၤ (ကွၢ်လံာ်အဆၢ ၁၁)c
၁၁. တၢ်မနုၤကမၤစၢၤပှၤလၢ ပကတြီဆၢကွံာ်တၢ်ဒဲးဘးလဲၣ်.
၁၁ တြီဆၢကွံာ် တၢ်ဒဲးဘးတက့ၢ်. ပမ့ၢ်ပာ်လုၢ်ပာ်ပှ့ၤ တၢ်ပှ့ၤက့ၤသပှၢ်ကတၢၢ်န့ၣ် ပတတဲလၢ ‘ဖဲယထံၣ်ဘၣ် တၢ်လ့ပစီအခါ ယတလိၣ် တြီဆၢကွံာ် တၢ်ဒဲးဘးဘၣ်. ယမၤကမၣ်တၢ်သ့ ဒီးလၢခံ ယဃ့ပျၢ်ကွံာ် အတၢ်ကမၣ်သ့ဝဲလီၤ.’ လၢတၢ်န့ၣ်အလီၢ် ဖဲပဘၣ်တၢ်လ့ပစီလၢ ပကမၤဘၣ်တၢ်ကမၣ်အခါ ပကတဲလၢ ‘ယတမၤဘၣ်. တၢ်လၢယဟိဝၤယွၤ ဒီးယ့ၣ်ၡူးမၤဝဲလၢယဂီၢ်န့ၣ် ယဟ့ၣ်ဆၢက့ၤအဝဲသ့ၣ်ဒ်အံၤ ကသ့ဒ်လဲၣ်.’ ဘၣ်ဃးဒီးတၢ်ဂ့ၢ်အံၤန့ၣ် ဃ့ယဟိဝၤယွၤအတၢ်မၤစၢၤ ဒီးဃ့ကညးအီၤလၢ ‘တဘၣ်ပျဲယလဲၤနုာ်လီၤဆူ တၢ်လ့ပစီအပူၤတဂ့ၤ.’—မးသဲ ၆:၁၃.
၁၂. ပကမၤထွဲ တၢ်ဟ့ၣ်ကူၣ်ဖဲ ၁ ယိၤဟၣ် ၃:၁၆-၁၈ ကသ့ဒ်လဲၣ်.
၁၂ အဲၣ်နဒီပုၢ်ဝဲၢ်မုၣ်ခွါတဖၣ်တက့ၢ်. ဖဲပအဲၣ်ပဒီပုၢ်ဝဲၢ်မုၣ်ခွါတဖၣ်အခါ ပပာ်ဖျါထီၣ်လၢ ပပာ်လုၢ်ပာ်ပှ့ၤတၢ်ပှ့ၤက့ၤန့ၣ်လီၤ. ဘၣ်မနုၤအဃိလဲၣ်. ယ့ၣ်ၡူးဟ့ၣ်လီၤအသးသမူန့ၣ် တမ့ၢ်ထဲလၢပဂီၢ်ဘၣ် ပၣ်ဃုာ်ဒီး ပဒီပုၢ်ဝဲၢ်မုၣ်ခွါတဖၣ်အဂီၢ်လီၤ. ယ့ၣ်ၡူးသးအိၣ်တူၢ်သံအသးလၢ အဝဲသ့ၣ်အဂီၢ်အဃိ ယ့ၣ်ၡူးအဲၣ်အဝဲသ့ၣ်ဒိၣ်မးလီၤ. (ဖး ၁ ယိၤဟၣ် ၃:၁၆-၁၈ တက့ၢ်.) ပအဲၣ်ပဒီပုၢ်ဝဲၢ်မုၣ်ခွါတဖၣ် ခီဖျိပရ့ဒီးအဝဲသ့ၣ်လၢ တၢ်အဲၣ်တၢ်ကွံအပူၤလီၤ. (အ့းဖ့းစူး ၄:၂၉, ၃၁–၅:၂) အဒိ, ဖဲအဝဲသ့ၣ်ဆိက့မ့ၢ်ဂ့ၤ, ထံၣ်ဘၣ်တၢ်ကီတၢ်ခဲ ဒီးန့ဆၢၣ်တၢ်ဘၣ်ဒိဘၣ်ထံးအခါမ့ၢ်ဂ့ၤ ပမၤစၢၤအဝဲသ့ၣ်လီၤ. ဘၣ်ဆၣ် ဖဲပဒီပုၢ်ဝဲၢ်မုၣ်ခွါတဂၤဂၤ မ့ၢ်တဲဒီးမၤဘၣ်ဒိးပသးန့ၣ် ပကြၢးမၤဒ်လဲၣ်.
၁၃. ဘၣ်မနုၤအဃိ ပကဘၣ်ပျၢ်ပှၤဂၤ အတၢ်ကမၣ်လဲၣ်.
၁၃ တဘျီတခီၣ် နကပျၢ်ကွံာ် ဒီပုၢ်ဝဲၢ်မုၣ်ခွါတဖၣ်အတၢ်ကမၣ်န့ၣ် မ့ၢ်အကီလၢနဂီၢ်ဧါ. (၃ မိၤၡ့ ၁၉:၁၈) မ့ၢ်ကီလၢနကပျၢ်ကွံာ် အဝဲသ့ၣ်တၢ်ကမၣ်န့ၣ် မၤထွဲတၢ်ဟ့ၣ်ကူၣ် လၢအမ့ၢ် “တၢ်ပာ်ဒ့ၣ်ပာ်ကမၣ် အလီၢ်မ့ၢ်အိၣ်ဒၣ်လဲာ် ဆဲးဝံသးစူၤလိာ်သုသး ဒီးပျၢ်လိာ်သုတၢ်ကမၣ် တဂၤဒီးတဂၤ လၢာ်လၢာ်ဆ့ဆ့တက့ၢ်. ဒ်ယဟိဝၤယွၤ ပျၢ်သုတၢ်ကမၣ် လၢာ်လၢာ်ဆ့ဆ့အသိးန့ၣ် သုကဘၣ်မၤ ဒ်န့ၣ်အသိး စ့ၢ်ကီးလီၤ.” (ကလီးစဲ ၃:၁၃) ဖဲပပျၢ်ကွံာ် ပဒီပုၢ်ဝဲၢ်မုၣ်ခွါတဖၣ် အတၢ်ကမၣ် တဘျီလၢ်လၢ်အခါ ပပာ်ဖျါထီၣ်လၢ ပပာ်လုၢ်ပာ်ပှ့ၤတၢ်ပှ့ၤက့ၤန့ၣ်လီၤ. ပဆဲးပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်ပှ့ၤက့ၤ လၢကစၢ်ယွၤဟ့ၣ်လီၤပှၤအံၤ ကသ့ဒ်လဲၣ်.
နပာ်လုာ်ပာ်ပှ့ၤအါထီၣ် တၢ်ပှ့ၤက့ၤကသ့ဒ်လဲၣ်
၁၄. ကျဲတဘိလၢ ပပာ်ဖျါထီၣ်လၢ ပပာ်လုၢ်ပာ်ပှ့ၤအါထီၣ် တၢ်ပှ့ၤက့ၤန့ၣ် မ့ၢ်မနုၤလဲၣ်.
၁၄ စံးဘျုးစံးဖှိၣ်က့ၤ ယဟိဝၤယွၤလၢအဟ့ၣ်လီၤပှၤ တၢ်ပှ့ၤက့ၤတက့ၢ်. ဒီပုၢ်ဝဲၢ်မုၣ်ကၠိၤအဲနၤ လၢအသးအိၣ် ၈၃ နံၣ် လၢအအိၣ်လၢ ကီၢ်အ့ဒံယါန့ၣ် အတဲဝဲလၢ “ယသ့ၣ်ညါလၢ ကိးနံၤဒဲးအရ့ဒိၣ်ဒိၣ်မးလၢ ယကစံးဘျုးစံးဖှိၣ်က့ၤ ယဟိဝၤယွၤလၢအဟ့ၣ်လီၤယၤ တၢ်ပှ့ၤက့ၤန့ၣ်လီၤ.” ကိးနံၤဒဲး ဖဲနဃ့ဘါထုကဖၣ်အခါ နတဲဘၣ်ယဟိဝၤယွၤ တၢ်လၢနမၤကမၣ်ဘၣ်အီၤတဖၣ် ဒီးဃ့ပျၢ်နတၢ်ကမၣ်တက့ၢ်. ဘၣ်ဆၣ် နမ့ၢ်မၤဘၣ်တၢ်ကမၣ်ဖးဒိၣ်န့ၣ် နကဘၣ်ဃ့ တၢ်အိၣ်ဖှိၣ်သးပှၢ်တဖၣ် အတၢ်မၤစၢၤလီၤ. အဝဲသ့ၣ်ကဒိကနၣ်န့ၢ်နၤ ဒီးကဟ့ၣ်ကူၣ်ဟ့ၣ်ဖးနၤ လၢကစၢ်ယွၤအကလုၢ်ကထါလီၤ. တၢ်အိၣ်ဖှိၣ်သးပှၢ်တဖၣ် ကဃ့န့ၢ်တၢ်လၢနဂီၢ် ဒီးဃ့ကညးယဟိဝၤယွၤလၢ ကပျၢ်ကွံာ်နတၢ်ကမၣ်အဂီၢ်လီၤ. ခီဖျိလၢ အဝဲသ့ၣ်တၢ်မၤစၢၤအဃိ နတၢ်ရ့လိာ်သးဒီးယဟိဝၤယွၤ ဟဲဂ့ၤထီၣ်က့ၤဝဲသ့လီၤ.—ယၤကိာ် ၅:၁၄-၁၆.
၁၅. ဘၣ်မနုၤအဃိ ပကဘၣ်ဖးဒီးဆိကမိၣ်ထံ တၢ်ပှ့ၤက့ၤအဂ့ၢ်လဲၣ်.
၁၅ ဆိကမိၣ်ထံက့ၤ တၢ်ပှ့ၤက့ၤတက့ၢ်. ဒီပုၢ်ဝဲၢ်မုၣ်ရၤကၠၤမၤနံၤ အသးအိၣ် ၇၃ နံၣ် ဒီးတဲဝဲလၢ “ဖဲယဖးဘၣ် ယ့ၣ်ၡူးထံၣ်ဘၣ်တၢ်နးတၢ်ဖှီၣ်အဂ့ၢ် တဘျီလၢ်လၢ်အခါ ယမဲာ်ထံထီၣ်တအၢၣ်ဝဲလီၤ.” ဖဲနဆိကမိၣ်ထံဝဲ ကစၢ်ယွၤအဖိခွါထံၣ်ဘၣ် တၢ်နးတၢ်ဖှီၣ်ဒ်လဲၣ်အခါန့ၣ် နၤစ့ၢ်ကီး နသးကဘၣ်ဒိဒိၣ်မးလီၤ. ဘၣ်ဆၣ် နမ့ၢ်ဆိကမိၣ်ထံအါထီၣ် ယ့ၣ်ၡူးအတၢ်ဟ့ၣ်လုၢ်ထီၣ်သးန့ၣ် နတၢ်အဲၣ်အီၤ ဒီးနတၢ်အဲၣ်ယဟိဝၤယွၤ ကအါထီၣ်ဝဲလီၤ. ဘၣ်မနုၤအဃိ နကြၢးမၤနီၢ်ကစၢ် တၢ်မၤလိလံာ်စီဆှံ ဘၣ်ဃးဒီးတၢ်ပှ့ၤက့ၤအဂ့ၢ် ဒ်သိးနကပာ်လုၢ်ပာ်ပှ့ၤအီၤအဂီၢ်လဲၣ်.
ခီဖျိလၢ ယ့ၣ်ၡူးမၤဝဲ ဟါတၢ်အီၣ်ယိယိဖိအဃိ ယ့ၣ်ၡူးပာ်ဖျါထီၣ်ဝဲလၢ အပျဲၢ်အဘီၣ်တဖၣ် ကဘၣ်မၤတၢ်သ့ၣ်နီၣ်ထီၣ်က့ၤ ကိးနံၣ်ဒဲးဒ်လဲၣ်န့ၣ်လီၤ (ကွၢ်တၢ်မၤလိ ၁၆ လံာ်အဆၢ ၁၆)
၁၆. ပသိၣ်လိပှၤဂၤ ဘၣ်ဃးဒီးတၢ်ပှ့ၤက့ၤအဂ့ၢ်န့ၣ် ကဲဘျုးလၢပဂီၢ်ဒ်လဲၣ်. (ကွၢ်တၢ်ဂီၤလၢ လံာ်ကုခိၣ်တက့ၢ်.)
၁၆ သိၣ်လိပှၤဂၤဘၣ်ဃးဒီး တၢ်ပှ့ၤက့ၤအဂ့ၢ်တက့ၢ်. ဖဲပတဲပၠးဘၣ်ပှၤဂၤ ဘၣ်ဃးဒီးတၢ်ပှ့ၤက့ၤအဂ့ၢ် တဘျီလၢ်လၢ်အခါ ပပာ်လုၢ်ပာ်ပှ့ၤအါထီၣ် တၢ်ပှ့ၤက့ၤလီၤ. ပအိၣ်ဒီးတၢ်ပီးတၢ်လီတဖၣ်လၢ ကမၤစၢၤပှၤဂၤဒ်သိး ပကသ့ၣ်ညါထီၣ်လၢ ဘၣ်မနုၤအဃိ ယ့ၣ်ၡူးတူၢ်သံသးလၢပဂီၢ်လဲၣ်. အဒိ, တၢ်သးခုကစီၣ် လၢယွၤအအိၣ် တၢ်မၤလိ ၄ လၢအခိၣ်တီမ့ၢ်ဝဲ “ယ့ၣ်ၡူးခရံာ်မ့ၢ်မတၤလဲၣ်” ဒီး လံာ်စီဆှံ ကသိၣ်လိပှၤ တၢ်ဂ့ၢ်မနုၤလဲၣ် တၢ်မၤလိ ၅ လၢအခိၣ်တီမ့ၢ်ဝဲ “တၢ်ပှ့ၤက့ၤ မ့ၢ်ယွၤအတၢ်ဟ့ၣ်လၢ အလုၢ်ဒိၣ်ပှ့ၤဒိၣ်ကတၢၢ်” န့ၣ် ပသူအီၤလၢ ပကမၤစၢၤပှၤဂၤသ့ဝဲလီၤ. တနံၣ်ဘၣ်တနံၣ် ပပာ်ဖျါထီၣ်လၢ ပပာ်လုၢ်ပာ်ပှ့ၤတၢ်ပှ့ၤက့ၤ ခီဖျိပလဲၤထီၣ်ဝဲ တၢ်သ့ၣ်နီၣ်ထီၣ်က့ၤ ယ့ၣ်ၡူးအတၢ်သံအမူး ဒီးပကွဲမုာ်ပှၤဂၤလၢ ကဟဲထီၣ်ဝဲမူးအံၤ ဃုာ်ဒီးပှၤလီၤ. ယဟိဝၤယွၤဟ့ၣ်ပှၤ တၢ်ခွဲးတၢ်ယာ်လၢ ပကသိၣ်လိပှၤဂၤ ဘၣ်ဃးဒီးအဖိခွါအဂ့ၢ်န့ၣ်လီၤ.
၁၇. ဘၣ်မနုၤအဃိ တၢ်ပှ့ၤက့ၤန့ၣ် မ့ၢ်ကစၢ်ယွၤအတၢ်ဟ့ၣ် အဂ့ၤကတၢၢ်လၢ ပှၤဟီၣ်ခိၣ်ဖိအဂီၢ်လဲၣ်.
၁၇ တၢ်ဂ့ၢ်အိၣ်ဝဲအါမး ဒ်သိးကမၤစၢၤပှၤလၢ ပကဆဲးပာ်လုၢ်ပာ်ပှ့ၤအါထီၣ် တၢ်ပှ့ၤက့ၤအဂီၢ်လီၤ. ပမ့ၢ်ပှၤတလၢတပှဲၤဘၣ် သနာ်က့ ခီဖျိလၢတၢ်ပှ့ၤက့ၤအံၤအဃိ ပအိၣ်ဒီးတၢ်ရ့လိာ်သးဒီး ယဟိဝၤယွၤ ဘူးဘူးတံၢ်တံၢ်သ့ဝဲလီၤ. ခီဖျိလၢ တၢ်ပှ့ၤက့ၤအံၤအဃိ မုၣ်ကီၤလံၢ်အတၢ်ရဲၣ်တၢ်ကျဲၤတဖၣ် ကဘၣ်တၢ်မၤဟးဂီၤကွံာ်အီၤ လၢာ်လၢာ်ဆ့ဆ့လီၤ. (၁ ယိၤဟၣ် ၃:၈) တကးဒံးဘၣ် ယဟိဝၤယွၤအတၢ်တိာ်ပာ်လၢ ပှၤဟီၣ်ခိၣ်ဖိအဂီၢ်န့ၣ် ကဟဲလၢထီၣ်ပှဲၤထီၣ်ဝဲ သပှၢ်ကတၢၢ်လီၤ. ဒီးဟီၣ်ခိၣ်ဒီတဘ့ၣ်ညါန့ၣ် ကကဲထီၣ်က့ၤဝဲပၤရဒံစူးလီၤ. ဒီးဖဲန့ၣ် ပှၤကိးဂၤဒဲး ကအဲၣ်ယဟိဝၤယွၤ ဒီးကမၤယဟိဝၤယွၤအတၢ်မၤလီၤ. အဃိ ကိးနံၤဒဲးန့ၣ် မ်ပကဃုကျဲဒ်သိး ပကပာ်ဖျါထီၣ်လၢ ပပာ်လုၢ်ပာ်ပှ့ၤတၢ်ပှ့ၤက့ၤ လၢအမ့ၢ်ကစၢ်ယွၤအတၢ်ဟ့ၣ်လၢ အဂ့ၤကတၢၢ်လၢ ပှၤဟီၣ်ခိၣ်ဖိအဂီၢ်န့ၣ်တက့ၢ်.
တၢ်သးဝံၣ် ၂၀ နဟ့ၣ်လီၤပှၤ နဖိခွါလၢ လုၢ်ပှ့ၤဒိၣ်
a ဘၣ်မနုၤအဃိ ယ့ၣ်ၡူးဘၣ်တၢ်မၤအၢမၤနးအီၤ ဒီးဘၣ်တၢ်မၤသံအီၤလဲၣ်. တၢ်မၤလိအံၤ ကစံးဆၢဝဲတၢ်သံကွၢ်အံၤလီၤ. တၢ်ဂ့ၢ်အံၤကမၤစၢၤစ့ၢ်ကီးပှၤလၢ ပကပာ်လုၢ်ပာ်ပှ့ၤ တၢ်ပှ့ၤက့ၤအဂီၢ်န့ၣ်လီၤ.
b ပှၤရိမ့ၤဖိအလုၢ်အလၢ်အိၣ်ဝဲလၢ ပှၤကဘၣ်မၤသံ ပှၤလၢအအိၣ်ဒီးတၢ်ကမၣ်လၢ သ့ၣ်တၢၣ်အလိၤ ဖဲအဝဲသ့ၣ်သးသမူ အိၣ်ဒံးဝဲအခါလီၤ. ဒီးယဟိဝၤယွၤဟ့ၣ်ဝဲအခွဲးလၢ ပှၤကမၤသံ အဖိခွါဒ်န့ၣ်အသိးလီၤ.
c တၢ်တဲဖျါထီၣ်တၢ်ဂီၤ အခီပညီ– ဒီပုၢ်ဝဲၢ်ခွါတဂၤစုာ်စုာ် တြီဆၢဝဲ တၢ်လ့ပစီလၢအမ့ၢ်ဝဲ တၢ်ကွၢ်တၢ်ဂီၤဘ့ၣ်ဆ့, တၢ်အိမိာ်, ဒီးတၢ်ထိးကျိၣ်ထိးစ့လီၤ.