တၢ်မၤလိ ၁၇
တၢ်ထုကဖၣ်န့ၣ် မ့ၢ်တၢ်ခွဲးတၢ်ယာ်လီၤဆီတခါလၢပဂီၢ်
“ယွၤလၢအတ့လီၤမူခိၣ်ဒီး ဟီၣ်ခိၣ်” တဂၤအဲၣ်ဒိးနၢ်ဟူဝဲ ပတၢ်ထုကဖၣ်လီၤ.—စံးထီၣ်ပတြၢၤ ၁၁၅:၁၅
၁, ၂. ဘၣ်မနုၤအဃိ နဆိကမိၣ်လၢ တၢ်ဘါထုကဖၣ်န့ၣ် မ့ၢ်တၢ်လၢအလုၢ်ဒိၣ်ပှ့ၤဒိၣ်လဲၣ်, ဒီးဘၣ်မနုၤအဃိ ပကဘၣ်သ့ၣ်ညါတၢ်လၢ လံာ်စီဆှံပာ်ဖျါထီၣ်ဝဲ ဘၣ်ဃးဒီး တၢ်ထုကဖၣ်အဂ့ၢ်လဲၣ်.
ဟီၣ်ခိၣ်အံၤ ပမ့ၢ်ထိၣ်သတြီၤအီၤဒီး မူဟီၣ်ကယၢန့ၣ် အိၣ်ဒၣ်ဆံးဆံးဖိလီၤ. ဖဲယဟိဝၤယွၤကွၢ်လီၤဝဲဆူဟီၣ်ခိၣ်အခါ အဝဲထံၣ်ဝဲ ပှၤဟီၣ်ခိၣ်ဖိလၢ အအိၣ်လၢထံကီၢ်ကိးဘ့ၣ်ဒဲးအပူၤန့ၣ် မၤအသးဒ်ထံတလီၤစီၤ လၢထံစဲၤပူၤအသိးန့ၣ်လီၤ. (စံးထီၣ်ပတြၢၤ ၁၁၅:၁၅; ယၡါယၤ ၄၀:၁၅) ပမ့ၢ်ထိၣ်သတြီၤလီၤက့ၤပသးဒီး မူဟီၣ်ကယၢန့ၣ် ပကလီၤဂာ်ဒ် တၢ်ပြံကဒံဖိတခါလီၤ. ဘၣ်ဆၣ်သနာ်က့ စံးထီၣ်ပတြၢၤ ၁၄၅:၁၈, ၁၉ စံးဝဲလၢ– “ကယဲၢ်ပှၤလၢအကိးထီၣ်ယွၤ, ကယဲၢ်ပှၤလၢအကိးထီၣ်ဝဲလၢ တၢ်မ့ၢ်တၢ်တီခဲလၢာ်န့ၣ် ယွၤအိၣ်ဘူးဒီးအီၤလီၤ. ကမၤဝဲဖဲဒၣ်ပှၤလၢအပျံၤအီၤတဖၣ်အသး, ဒီးကဒိကနၣ်အတၢ်ဃ့ကညး, ဒီးကအုၣ်က့ၤခီၣ်က့ၤအီၤလီၤ.” ပအိၣ်ဒီးတၢ်ခွဲးတၢ်ယာ်ဖးဒိၣ်တခါလီၤ. သ့တၢ်လၢာ်ကစၢ်လၢအမ့ၢ် ယဟိဝၤယွၤန့ၣ် အဲၣ်ဒိးသုးဘူးအသးဆူပအိၣ် ဒီးသးအိၣ်ဒိကနၣ် ပတၢ်ထုကဖၣ်စ့ၢ်ကီးလီၤ. တၢ်ဘါထုကဖၣ်န့ၣ် မ့ၢ်တၢ်ဟ့ၣ်လီၤဆီတခါလၢ ပှၤကိးဂၤဒဲးအဂီၢ်လီၤ.
၂ ပမ့ၢ်အဲၣ်ဒိးလၢ ယဟိဝၤယွၤဒိကနၣ် ပတၢ်ထုကဖၣ်န့ၣ် ပကဘၣ်ဃ့ဒ်အတၢ်ဘၣ်သးအသိးန့ၣ်လီၤ. ပမၤကသ့ဒ်လဲၣ်. ပကသမံသမိးကွၢ် တၢ်လၢလံာ်စီဆှံပာ်ဖျါထီၣ်ဝဲ ဘၣ်ဃးဒီးတၢ်ဘါထုကဖၣ်အဂ့ၢ်န့ၣ်လီၤ.
ဘၣ်မနုၤအဃိ ပကြၢးဃ့ဘါထုကဖၣ်ဆူ ယဟိဝၤယွၤအအိၣ်လဲၣ်
၃. ဘၣ်မနုၤအဃိ ပကြၢးဃ့ဘါထုကဖၣ်တၢ်ဆူ ယဟိဝၤယွၤအအိၣ်လဲၣ်.
၃ ယဟိဝၤယွၤအဲၣ်ဒိးလၢ နကကတိၤတၢ်ဒီး ဃ့ဘါထုကဖၣ်တၢ်ဆူအအိၣ်လီၤ. ပသ့ၣ်ညါဘၣ်ဒ်လဲၣ်. ဝံသးစူၤ ဖး ဖံလံးပံၤ ၄:၆, ၇ တက့ၢ်. ဆိကမိၣ်ကွၢ် ကစၢ်ယွၤအတၢ်ကွဲမုာ်လၢ နကဃ့ဘါထုကဖၣ်တၢ်ဆူအအိၣ်တက့ၢ်. မူဟီၣ်ကယၢတၢ်ပၢကစၢ် သူၣ်အိၣ်သးအိၣ်နၤ သပှၢ်ကတၢၢ်လီၤ. ဒီးအဝဲအဲၣ်ဒိးလၢ နကတဲဘၣ်အီၤနသးအတၢ်တူၢ်ဘၣ် ဒီးနတၢ်ကီတၢ်ခဲတဖၣ်န့ၣ်လီၤ.
၄. နမ့ၢ်ဃ့ဘါထုကဖၣ်တၢ်ဆူ ယဟိဝၤယွၤအအိၣ်ထီဘိန့ၣ် ကမၤဂၢၢ်ကျၢၤထီၣ် နတၢ်ရ့လိာ်သးဒီးအီၤဒ်လဲၣ်.
၄ တၢ်ဃ့ဘါထုကဖၣ်န့ၣ် မၤစၢၤပှၤလၢ ပကအိၣ်ဒီးတၢ်ရ့လိာ်သး ဒီးယဟိဝၤယွၤ ဘူးဘူးတံၢ်တံၢ်လီၤ. ဖဲပှၤဒီတံၤဒီသကိးတဖၣ် ကတိၤသကိးတၢ်ဘၣ်ဃးဒီး အဝဲသ့ၣ်အတၢ်ဆိကမိၣ်, တၢ်ကိၢ်တၢ်ဂီၤ ဒီးအတၢ်တူၢ်ဘၣ်တဖၣ်အခါ အဝဲသ့ၣ်အတၢ်ရ့လိာ်သး ဂၢၢ်ကျၢၤထီၣ်ဝဲလီၤ. ဒ်န့ၣ်အသိး နမ့ၢ်ဃ့ဘါထုကဖၣ်တၢ်ဆူ ယဟိဝၤယွၤအအိၣ်န့ၣ် နတၢ်ရ့လိာ်သးဒီးအီၤ ကဂၢၢ်ကျၢၤထီၣ်ဒိၣ်န့ၢ်အလီၢ်လီၤ. ခီဖျိလၢ လံာ်စီဆှံအဃိ ကစၢ်ယွၤဒုးသ့ၣ်ညါနၤ လၢအတၢ်ဆိကမိၣ်ဒီး အတၢ်တူၢ်ဘၣ်တဖၣ်လီၤ. တကးဒံးဘၣ် အဝဲဒုးသ့ၣ်ညါနၤလၢ တၢ်လၢအကမၤဝဲလၢ ခါဆူညါန့ၣ်လီၤ. ဒီးနၤစ့ၢ်ကီး နတဲဖျါထီၣ် နသးအတၢ်တူၢ်ဘၣ်ဆူအအိၣ်သ့ ခီဖျိနတဲတၢ်ဒီးအီၤလၢ တၢ်ထုကဖၣ်အပူၤ ထီဘိန့ၣ်လီၤ.—ယၤကိာ် ၄:၈.
ပမ့ၢ်အဲၣ်ဒိးလၢ ကစၢ်ယွၤကဒိကနၣ်ပတၢ်ထုကဖၣ်န့ၣ် ပကဘၣ်မၤဒ်လဲၣ်
၅. ယဟိဝၤယွၤ တဒိကနၣ်ပှၤကိးဂၤဒဲး အတၢ်ထုကဖၣ်န့ၣ် ပသ့ၣ်ညါဘၣ်ဒ်လဲၣ်.
၅ မ့ၢ်ယဟိဝၤယွၤဒိကနၣ် ပှၤကိးဂၤဒဲးအတၢ်ထုကဖၣ်ဧါ. တဒိကနၣ်ဘၣ်. လၢဝံယၡါယၤအစိၤန့ၣ် ယဟိဝၤယွၤတဲဘၣ်ဝဲ ပှၤအံၣ်စရ့လးဖိတဖၣ်လၢ– “ဒီးတုၤသုမၤအါထီၣ်သုတၢ်ထုကဖၣ်ဒီး, ယတဒိကနၣ်ဘၣ်တၢ်ဘၣ်. သုစုပှဲၤဝဲဒီး တၢ်သွံၣ်လီၤ.” (ယၡါယၤ ၁:၁၅) လၢတၢ်န့ၣ်အဃိ ပမ့ၢ်အဲၣ်ဒိးလၢ ကစၢ်ယွၤဒိကနၣ် ပတၢ်ထုကဖၣ်န့ၣ် ပကဘၣ်ပလီၢ်ပသးဒ်သိး ပလုၢ်လၢ်သကဲာ်ပဝးဒီး ပတၢ်ဟူးတၢ်ဂဲၤတဖၣ်န့ၣ် အသုတမၤယံၤထီၣ်ပှၤဒီး ယဟိဝၤယွၤတဂ့ၤအဂီၢ်န့ၣ်လီၤ.
၆. ဘၣ်မနုၤအဃိ တၢ်နာ်န့ၣ်မ့ၢ်တၢ်လၢ အရ့ဒိၣ်လဲၣ်. နအိၣ်ဒီးတၢ်စူၢ်တၢ်နာ်န့ၣ် နပာ်ဖျါထီၣ်ကသ့ဒ်လဲၣ်.
၆ ပမ့ၢ်အဲၣ်ဒိးလၢ ယဟိဝၤယွၤကဒိကနၣ် ပတၢ်ထုကဖၣ်န့ၣ် ပကဘၣ်အိၣ်ဒီး တၢ်နာ်လၢအဖီခိၣ်လီၤ. (မၢ်ကူး ၁၁:၂၄) တၢ်မၢဖိပီလူး တဲဖျါထီၣ်ဝဲလၢ– “မ့မ့ၢ်တၢ်နာ်တအိၣ်ဘၣ်ဒီး, တၢ်ဘၣ်အသးတသ့ဘၣ်. အဂ့ၢ်ဒ်အံၤ, ပှၤလၢအဟဲဃီၤဆူယွၤအအိၣ်, ဘၣ်နာ်လၢအအိၣ်, ဒီးလၢအမ့ၢ် ပှၤဟ့ၣ်လီၤတၢ်ဘျုးလၢ ပှၤလၢအဃုအီၤတဖၣ်န့ၣ်လီၤ.” (ဧ့ၤဘြံၤ ၁၁:၆) တကးဒံးဘၣ် ထဲပတဲလၢပအိၣ်ဒီးတၢ်နာ်န့ၣ် တလၢပှဲၤဒံးဘၣ်. ပကဘၣ်ပာ်ဖျါထီၣ်ပတၢ်နာ် ခီဖျိလၢပဒိကနၣ် ယဟိဝၤယွၤအကလုၢ် ကိးနံၤဒဲးန့ၣ်လီၤ.—ဖး ယၤကိာ် ၂:၂၆ တက့ၢ်.
၇. (က) ဖဲပဃ့ဘါထုကဖၣ်ဆူ ယဟိဝၤယွၤအအိၣ်အခါ ဘၣ်မနုၤအဃိ ပကြၢးအိၣ်ဒီး တၢ်ဆီၣ်လီၤသး ဒီးတၢ်ယူးယီၣ်ပာ်ကဲလဲၣ်. (ခ) ဖဲပဃ့ဘါထုကဖၣ်တၢ်အခါ ပပာ်ဖျါထီၣ် တၢ်သူၣ်အိၣ်သးအိၣ်နီၢ်နီၢ် ကသ့ဒ်လဲၣ်.
၇ ဖဲပဃ့ဘါထုကဖၣ်တၢ်ဆူ ယဟိဝၤယွၤအအိၣ် အဆၢကတီၢ်န့ၣ် ပကြၢးအိၣ်ဒီးတၢ်ဆီၣ်လီၤသးဒီး တၢ်ယူးယီၣ်ပာ်ကဲလီၤ. ဘၣ်မနုၤအဃိလဲၣ်. အဒိ ပမ့ၢ်လဲၤတဲတၢ်ဒီးစီၤပၤ မ့တမ့ၢ် ကီၢ်ခိၣ်န့ၣ်ပကတဲတၢ်ဒီးအီၤလၢ တၢ်ပာ်ကဲအပူၤလီၤ. ဒ်န့ၣ်အသိး ယဟိဝၤယွၤမ့ၢ် သ့တၢ်လၢာ်ကစၢ်အဃိ ဖဲပကတိၤတၢ်ဒီးအီၤအဆၢကတီၢ် ပကြၢးပာ်ဖျါထီၣ် တၢ်ပာ်ကဲဒီး တၢ်ဆီၣ်လီၤသးအါန့ၢ်အန့ၣ်လီၤ. (၁ မိၤၡ့ ၁၇:၁; စံးထီၣ်ပတြၢၤ ၁၃၈:၆) ပကြၢးပာ်ဖျါထီၣ်စ့ၢ်ကီး တၢ်သးအိၣ်နီၢ်နီၢ်ဒီး ဃ့ဘါထုကဖၣ်တၢ်ဆူ ယဟိဝၤယွၤအအိၣ် လၢပသးဒီဖျၢၣ်န့ၣ်လီၤ. တၢ်ထုကဖၣ်န့ၣ် တဘၣ်မ့ၢ်ဒ်သိး ပတိၢ်ရူးအီၤ ဒီးပစံးဝံၤစံးက့ၤအီၤ တဘျီဝံၤတဘျီဘၣ်.—မးသဲ ၆:၇, ၈.
၈. ပမ့ၢ်ဃ့ဘါထုကဖၣ်လၢ ပကဒိးန့ၢ်ဘၣ်တၢ်တမံၤမံၤန့ၣ် ပကဘၣ်မၤဒ်လဲၣ်.
၈ ပမ့ၢ်ဃ့ဘါထုကဖၣ်လၢ ပကဒိးန့ၢ်ဘၣ်တၢ်တမံၤမံၤန့ၣ် ပကဘၣ်ဂုာ်ကျဲးစၢးလၢအဂ့ၤကတၢၢ် ဒ်သိးပတၢ်ဘါထုကဖၣ် ကလၢထီၣ်ပှဲၤထီၣ်အဂီၢ်လီၤ. အဒိ ပဃ့ဘါထုကဖၣ်လၢ ယဟိဝၤယွၤကဟ့ၣ်ပှၤ ပတၢ်လိၣ်ဘၣ်လၢတနံၤအဂီၢ် တနံၤအဂီၢ်န့ၣ်လီၤ. ဘၣ်ဆၣ် ပမၤတၢ်မ့ၢ်ကဲန့ၣ် ပတဘၣ်မ့ၢ်ပှၤလၢအကၢၣ်အကျူ ဒီးပတဘၣ်မုၢ်လၢ်ထဲလၢ ယဟိဝၤယွၤကဟ့ၣ်လီၤပှၤ တၢ်ကိးမံၤဒဲးဘၣ်. လၢတၢ်န့ၣ်အလီၢ် ပကဘၣ်မၤတၢ်ဆူၣ်ဆူၣ်ဒီး တူၢ်လိာ်တၢ်မၤတခါဂ့ၤတခါဂ့ၤ လၢပမၤအီၤသ့န့ၣ်လီၤ. (မးသဲ ၆:၁၁; ၂ သ့းစၤလနံ ၃:၁၀) ဒီးပမ့ၢ်ဃ့ဘါထုကဖၣ်လၢ ယဟိဝၤယွၤကမၤစၢၤပှၤဒ်သိး ပကပတုာ်မၤတၢ်လၢ အတဂ့ၤတဘၣ်န့ၣ် ပကဘၣ်ဟးဆှဲး တၢ်အိၣ်သးလၢအကကဲထီၣ်တၢ်လ့ပစီ လၢပဂီၢ်ကိးမံၤဒဲးန့ၣ်လီၤ. (ကလီးစဲ ၃:၅) ခဲအံၤ ပကသမံသမိးကွၢ် တၢ်သံကွၢ်တနီၤလၢ အဘၣ်ဃးဒီး တၢ်ထုကဖၣ်န့ၣ်လီၤ.
တၢ်သံကွၢ်လၢအဘၣ်ဃးဒီး တၢ်ဘါထုကဖၣ်အဂ့ၢ်
၉. ပကြၢးဃ့ဘါထုကဖၣ်လၢ မတၤအအိၣ်လဲၣ်, ဘၣ်ဃးဒီးတၢ်ထုကဖၣ်န့ၣ် ယိၤဟၣ် ၁၄:၆ သိၣ်လိပှၤဒ်လဲၣ်.
၉ ပကြၢးဃ့ဘါထုကဖၣ်လၢ မတၤအအိၣ်လဲၣ်. ယ့ၣ်ၡူး သိၣ်လိအပျဲၢ်အဘီၣ်တဖၣ်လၢ ကဃ့ဘါထုကဖၣ်တၢ်ဆူ ပပၢ် “အိၣ်လၢမူခိၣ်” အအိၣ်န့ၣ်လီၤ. (မးသဲ ၆:၉) အဝဲစံးစ့ၢ်ကီးဝဲလၢ– “ယဲဒၣ်အံၤယမ့ၢ်ကျဲ, ဒီးတၢ်မ့ၢ်တၢ်တီ, ဒီးတၢ်မူလီၤ. မ့တမ့ၢ်ဘၣ်ယၤဒီး, ပှၤတဟဲဘၣ်ဆူပၢ်အအိၣ် နီတဂၤဘၣ်.” (ယိၤဟၣ် ၁၄:၆) လၢတၢ်န့ၣ်အဃိ ပကြၢးဃ့ဘါထုကဖၣ်ထဲလၢ ယဟိဝၤယွၤအအိၣ် ခီဖျိလၢယ့ၣ်ၡူးအမံၤလီၤ. ပဃ့ဘါထုကဖၣ် ခီဖျိလၢယ့ၣ်ၡူးအမံၤန့ၣ် အခီပညီမ့ၢ်ဒ်လဲၣ်. ဒ်သိးယဟိဝၤယွၤကတူၢ်လိာ် ပတၢ်ထုကဖၣ်အဂီၢ် ပကြၢးပာ်ဖျါထီၣ်လၢ ပပာ်လုၢ်ပာ်ပှ့ၤမူဒါလၢ ယဟိဝၤယွၤဟ့ၣ်လီၤယ့ၣ်ၡူးန့ၣ်လီၤ. ဒ်ပမၤလိဘၣ်အသိး ယ့ၣ်ၡူးဟဲလီၤလၢဟီၣ်ခိၣ်ချၢဒီး မၤထူၣ်ဖျဲးထီၣ်ပှၤလၢ တၢ်သံဒီးတၢ်ဒဲးဘးအစုပူၤန့ၣ်လီၤ. (ယိၤဟၣ် ၃:၁၆; ရိမ့ၤ ၅:၁၂) ဒီးယဟိဝၤယွၤဃုထၢထီၣ်စ့ၢ်ကီးယ့ၣ်ၡူး ဒ်ပှၤလုၢ်တၢ်အဒိၣ်ဒီး စံၣ်ညီၣ်ကွီၢ်အသိးန့ၣ်လီၤ.—ယိၤဟၣ် ၅:၂၂; ဧ့ၤဘြံၤ ၆:၂၀.
နဃ့ဘါထုကဖၣ်သ့ ကိးဆၢကတီၢ်ဒဲး
၁၀. ဖဲပဃ့ဘါထုကဖၣ်တၢ်အခါန့ၣ် မ့ၢ်ပကဘၣ်ချံးလီၤပခီၣ်, ဆ့ၣ်နီၤ မ့တမ့ၢ် ပကဘၣ်ဆၢထၢၣ်ဧါ. တဲဖျါထီၣ်တက့ၢ်.
၁၀ ဖဲပဃ့ဘါထုကဖၣ်တၢ်အခါန့ၣ် မ့ၢ်ပကဘၣ်ချံးလီၤပခီၣ်, ဆ့ၣ်နီၤ မ့တမ့ၢ် ပကဘၣ်ဆၢထၢၣ်ဧါ. တမ့ၢ်ဒ်န့ၣ်ဘၣ်. လံာ်စီဆှံသိၣ်လိပှၤလၢ ဖဲပဃ့ထုကဖၣ်တၢ်အဆၢကတီၢ်န့ၣ် ပချံးလီၤပခီၣ်မ့ၢ်ဂ့ၤ ဆ့ၣ်နီၤမ့ၢ်ဂ့ၤ ဆၢထၢၣ်မ့ၢ်ဂ့ၤ သ့ဝဲလီၤ. (၁ ကွဲးနီၣ်တၢ် ၁၇:၁၆; နဃ့မယၤ ၈:၆; ဒၤနံးယ့လး ၆:၁၀; မၢ်ကူး ၁၁:၂၅) တၢ်လၢအရ့ဒိၣ်န့ၣ်မ့ၢ်ဝဲ ပကဘၣ်တဲတၢ်ဒီးယဟိဝၤယွၤလၢ တၢ်ယူးယီၣ်ပာ်ကဲအပူၤလီၤ. ပဃ့ဘါထုကဖၣ်လၢ ပကလုၢ်ဒိၣ်မ့ၢ်ဂ့ၤ ပကလုၢ်ဆံးမ့ၢ်ဂ့ၤ လၢမုၢ်နၤမ့ၢ်ဂ့ၤ လၢမုၢ်ဆါမ့ၢ်ဂ့ၤ ဒီးဖဲပအိၣ်တပူၤလၢ်လၢ်မ့ၢ်ဂ့ၤ ပဃ့ဘါထုကဖၣ်သ့ဝဲ ကိးဆၢကတီၢ်ဒဲးလီၤ. ပှၤဂၤမ့ၢ်တနၢ်ဟူပတၢ်ထုကဖၣ်ဒၣ်လဲာ် ပနာ်သ့လၢယဟိဝၤယွၤ နၢ်ဟူဝဲပတၢ်ထုကဖၣ်လီၤ.—နဃ့မယၤ ၂:၁-၆.
၁၁. ဖဲပဃ့ဘါထုကဖၣ်ဆူယဟိဝၤယွၤအအိၣ်အခါ ပဃ့တၢ်မနုၤသ့ဝဲလဲၣ်.
၁၁ ပဃ့ဘါထုကဖၣ်လၢ တၢ်မနုၤအဂီၢ်သ့ဝဲလဲၣ်. ကယဲၢ်တၢ်လၢ အဘၣ်ယဟိဝၤယွၤအသးန့ၣ် ပဃ့အီၤသ့ခဲလၢာ်လီၤ. လံာ်စီဆှံစံးဝဲလၢ– “ပမ့ၢ်ဃ့တၢ်တမံၤမံၤ ဖဲတၢ်ဘၣ်အသးဒီး, ကဒိကနၣ်ပှၤလီၤ.” (၁ ယိၤဟၣ် ၅:၁၄) ဘၣ်ဃးဒီးပနီၢ်ကစၢ်အတၢ်လိၣ်ဘၣ်တဖၣ်န့ၣ် ပဃ့အီၤသ့ဧါ. သ့ဝဲလီၤ. ပဃ့ဘါထုကဖၣ်ဆူ ယဟိဝၤယွၤအအိၣ်န့ၣ် လီၤဂာ်ဒ်သိးဒီးပတဲတၢ်ဒီး ပတံၤသကိးဘူးဘူးတံၢ်တံၢ်တဂၤလီၤ. တၢ်အိၣ်လၢပသးပူၤဒီး ကယဲၢ်ပတၢ်ဆိကမိၣ်ကိးမံၤဒဲးန့ၣ် ပတဲဘၣ်ယဟိဝၤယွၤသ့ဝဲလီၤ. (စံးထီၣ်ပတြၢၤ ၆၂:၈) ပဃ့ဘါထုကဖၣ်လၢ ကစၢ်ယွၤကဟ့ၣ်ပှၤအသးစီဆှံ ဒ်သိးအကမၤစၢၤပှၤလၢ ပမၤတၢ်လၢအဘၣ်ကသ့အဂီၢ်လီၤ. (လူၤကၣ် ၁၁:၁၃) ပဃ့ဘါထုကဖၣ်လၢ ယဟိဝၤယွၤကဟ့ၣ်ပှၤတၢ်ကူၣ်သ့ ဒ်သိးပဆၢတဲာ်တၢ်လၢအဘၣ်ကသ့ဝဲအဂီၢ်လီၤ. တကးဒံးဘၣ် ပကဘၣ်ဃ့ဘါထုကဖၣ် ဒ်သိးပကအိၣ်ဒီးတၢ်ဂံၢ်တၢ်ဘါလၢ ပလဲၤခီဖျိတၢ်ကီတၢ်ခဲ ကန့ၢ်အဂီၢ်စ့ၢ်ကီးလီၤ. (ယၤကိာ် ၁:၅) ဒီးပကြၢးဃ့ဘါထုကဖၣ်လၢ ယဟိဝၤယွၤကပျၢ်ကွံာ် ပတၢ်ကမၣ်လီၤ. (အ့းဖ့းစူး ၁:၃, ၇) ပကြၢးဃ့ဘါထုကဖၣ်လၢ ပဟံၣ်ဖိဃီဖိ, ပဒီပုၢ်ဝဲၢ်မုၣ်ဒီပုၢ်ဝဲၢ်ခွါလၢ တၢ်အိၣ်ဖှိၣ်အပူၤ, ဒီးပှၤဂုၤပှၤဂၤတဖၣ်အဂီၢ်န့ၣ်လီၤ.—မၤတၢ် ၁၂:၅; ကလီးစဲ ၄:၁၂.
၁၂. ဖဲပဃ့ဘါထုကဖၣ်တၢ်အခါ တၢ်အရ့ဒိၣ်ကတၢၢ်လၢပကြၢးဃ့အီၤန့ၣ် မ့ၢ်တၢ်မနုၤလဲၣ်.
၁၂ ဖဲပဃ့ဘါထုကဖၣ်တၢ်အခါ တၢ်အရ့ဒိၣ်ကတၢၢ်လၢ ပကြၢးဃ့အီၤန့ၣ် မ့ၢ်တၢ်မနုၤလဲၣ်. မ့ၢ်တၢ်လၢအဘၣ်ဃးဒီး ယဟိဝၤယွၤဒီးအတၢ်ဘၣ်သးန့ၣ်လီၤ. မ့ၢ်လၢကစၢ်ယွၤမၤတ့ၢ်တၢ်အဂ့ၤ ခဲလၢာ်လၢပဂီၢ်အဃိ ပကြၢးစံးဘျုးစံးဖှိၣ်က့ၤအီၤလၢ ပသးဒီဖျၢၣ်န့ၣ်လီၤ. (၁ ကွဲးနီၣ်တၢ် ၂၉:၁၀-၁၃) ဖဲယ့ၣ်ၡူးအိၣ်လၢ ဟီၣ်ခိၣ်ချၢအဆၢကတီၢ် အဝဲသိၣ်လိအပျဲၢ်အဘီၣ်လၢ အဝဲသ့ၣ်ကဘၣ်ဃ့ဘါထုကဖၣ်တၢ်ဒ်လဲၣ် အဂ့ၢ်န့ၣ်လီၤ. (ဖး မးသဲ ၆:၉-၁၃ တက့ၢ်.) အဝဲစံးဝဲလၢ အဆိကတၢၢ်န့ၣ် အဝဲသ့ၣ်ကြၢးဃ့ဘါထုကဖၣ်လၢ ကစၢ်ယွၤအမံၤကဘၣ် တၢ်ပာ်စီဆှံအီၤလီၤ. ဝံၤဒီးယ့ၣ်ၡူးတဲဖျါထီၣ်ဝဲလၢ ပကြၢးဃ့ဘါထုကဖၣ်လၢ ကစၢ်ယွၤအဘီအမုၢ်ကဟဲဒီး ယဟိဝၤယွၤအတၢ်ဘၣ်သး ကဟဲလၢထီၣ်ပှဲၤထီၣ်လၢဟီၣ်ခိၣ်ချၢအဂီၢ်န့ၣ်လီၤ. ယ့ၣ်ၡူးစံးဝဲလၢ ပဃ့ဘါထုကဖၣ်တၢ် ဘၣ်ဃးဒီးတၢ်လၢအရ့ဒိၣ်သ့ၣ်တဖၣ်အံၤ မ့ၢ်ဝံၤန့ၣ်ပဃ့တၢ်လၢ ပနီၢ်ကစၢ်အတၢ်လိၣ်ဘၣ်တဖၣ် သ့ဝဲလီၤ. လၢပတၢ်ဘါထုကဖၣ်အပူၤန့ၣ် ပမ့ၢ်ပာ်ဆိတၢ်လၢအဘၣ်ဃးဒီး ယဟိဝၤယွၤအတၢ်ဘၣ်သးလၢ နီၣ်ဂံၢ်တၢန့ၣ် မ့ၢ်ဒၣ်ပပာ်ဖျါထီၣ်လၢ တၢ်ဂ့ၢ်သ့ၣ်တဖၣ်အံၤ မ့ၢ်တၢ်အရ့ဒိၣ်ကတၢၢ်လၢ ပတၢ်အိၣ်မူအပူၤန့ၣ်လီၤ.
၁၃. ပတၢ်ဃ့ဘါထုကဖၣ်န့ၣ် ကြၢးယံာ်ဝဲထဲလဲၣ်.
၁၃ ပတၢ်ထုကဖၣ်န့ၣ် ကြၢးယံာ်ဝဲထဲလဲၣ်. ပတၢ်ဃ့ထုကဖၣ် ကြၢးယံာ်ဝဲထဲလဲၣ်န့ၣ် လံာ်စီဆှံတပာ်ဖျါထီၣ်ဝဲဘၣ်. ပတၢ်ထုကဖၣ်န့ၣ် ကထီဝဲဧါ ကဖုၣ်ဝဲဧါန့ၣ် ဒိးသန့ၤထီၣ်အသးလၢ တၢ်အိၣ်သးအဖီခိၣ်လီၤ. အဒိ တချုးလၢပအီၣ်တၢ်န့ၣ် ပကဃ့ဘါထုကဖၣ်တၢ် ဖုၣ်ကိာ်ဖိလီၤ. ဘၣ်ဆၣ် ဖဲပစံးဘျုးစံးဖှိၣ်က့ၤ ယဟိဝၤယွၤ ဒီးတဲဘၣ်အီၤ ဘၣ်ဃးဒီးပတၢ်ဘၣ်ယိၣ်ဘၣ်ဘှီအခါန့ၣ် ပတၢ်ဘါထုကဖၣ်ကယံာ်ဝဲတစဲးလီၤ. (၁ ၡမူၤအ့လး ၁:၁၂, ၁၅) ပှၤတနီၤလၢ ယ့ၣ်ၡူးအစိၤန့ၣ် ဃ့ဘါထုကဖၣ်တၢ်ဖးယံာ်ဖးထီ ဒ်သိးပှၤဂၤတဖၣ် ကစံးပတြၢၤအဝဲသ့ၣ်အဂီၢ်လီၤ. မ့မ့ၢ်ပှၤန့ၣ် ပတအဲၣ်ဒိးမၤဒ်န့ၣ်ဘၣ်. (လူၤကၣ် ၂၀:၄၆, ၄၇) တၢ်အရ့ဒိၣ်ကတၢၢ်လၢ ယဟိဝၤယွၤအဂီၢ်န့ၣ် မ့ၢ်ဒၣ်ပကဃ့ဘါထုကဖၣ်တၢ်ဆူ အအိၣ်လၢပသးဒီဖျၢၣ်န့ၣ်လီၤ.
၁၄. တနံၤန့ၣ် ပကြၢးဃ့ဘါထုကဖၣ် ပှဲၤဘျီလဲၣ်, ဘၣ်ဃးဒီး ယဟိဝၤယွၤန့ၣ် ပသ့ၣ်ညါဘၣ်တၢ်မနုၤလဲၣ်.
၁၄ တနံၤန့ၣ် ပကြၢးဃ့ထုကဖၣ်ပှဲၤဘျီလဲၣ်. ယဟိဝၤယွၤကွဲမုာ်ပှၤလၢ ပကကတိၤတၢ်ဒီးအီၤ ဘၣ်ဆၢဘၣ်ကတီၢ်လီၤ. လံာ်စီဆှံစံးဝဲလၢပကြၢး “ဆိးသီဒီးဘါထုကဖၣ်တၢ်” “ဃ့ဘါထုကဖၣ်တၢ် ကိးဆၢကတီၢ်ဒဲး” ဒီး “ဘါထုကဖၣ်တၢ် တထံၣ်ဃီ” လီၤ. (မးသဲ ၂၆:၄၁; ရိမ့ၤ ၁၂:၁၂, ခ့ခါစှီၤကျိာ်; ၁ သ့းစၤလနံ ၅:၁၇) ထီဘိန့ၣ်ယဟိဝၤယွၤ အိၣ်ကတဲာ်ကတီၤပာ်စၢၤအသးလၢ အကဒိကနၣ်ပတၢ်ထုကဖၣ်လီၤ. ခီဖျိလၢ အဝဲအဲၣ်ပှၤဒီး သူၣ်အိၣ်သးအိၣ်ပှၤအဃိ ပစံးဘျုးစံးဖှိၣ်က့ၤအီၤသ့ဝဲ ကိးနံၤဒဲးလီၤ. ပဃ့လၢကစၢ်ယွၤ ကသိၣ်လိနဲၣ်လိပှၤ, ဟ့ၣ်ပှၤတၢ်ဂံၢ်တၢ်ဘါ ဒီးတၢ်သူၣ်မံသးမုာ်သ့ဝဲစ့ၢ်ကီးလီၤ. ပမ့ၢ်ပာ်လုၢ်ပာ်ပှ့ၤ တၢ်ခွဲးတၢ်ယာ်လၢ ပကဃ့ဘါထုကဖၣ်တၢ်ဆူ ယဟိဝၤယွၤအအိၣ်န့ၣ် ပကကတိၤတၢ်ဒီးအီၤထီဘိလီၤ.
၁၅. ဖဲတၢ်ဃ့ဘါထုကဖၣ် ကတၢၢ်ဝဲအခါန့ၣ် ဘၣ်မနုၤအဃိပကြၢးစံး “အၤမ့ၣ်” လဲၣ်.
၁၅ ဖဲတၢ်ဃ့ဘါထုကဖၣ် ကတၢၢ်ဝဲအခါန့ၣ် ဘၣ်မနုၤအဃိပကြၢးစံး “အၤမ့ၣ်” လဲၣ်. တၢ်ကတိၤလၢအမ့ၢ် “အၤမ့ၣ်” န့ၣ်အခီပညီမ့ၢ်ဝဲ “သပှၢ်ကတၢၢ်” မ့တမ့ၢ် “မ်အကဲထီၣ်ဒ်န့ၣ်အသိးတက့ၢ်.” တၢ်အံၤမ့ၢ်ကျဲတဘိလၢ ပပာ်ဖျါထီၣ်လၢ တၢ်လၢပဃ့အီၤတဖၣ်န့ၣ် ပဃ့အီၤလၢတၢ်သးအိၣ်နီၢ်နီၢ်အပူၤလီၤ. (စံးထီၣ်ပတြၢၤ ၄၁:၁၃) ဖဲပှၤဃ့ဘါထုကဖၣ်တၢ်လၢ ကမျၢၢ်အဂီၢ်ဝံၤန့ၣ် ဒ်သိးပကပာ်ဖျါထီၣ်လၢ ပအိၣ်ဒီးတၢ်သးလီၤပလိာ်အဂီၢ် လံာ်စီဆှံစံးဝဲလၢပကြၢးစံး “အၤမ့ၣ်” လၢပကလုၢ်ဒိၣ်မ့ၢ်ဂ့ၤဆံးမ့ၢ်ဂ့ၤ လၢပသးဒီဖျၢၣ်လီၤ.—၁ ကွဲးနီၣ်တၢ် ၁၆:၃၆; ၁ ကရံၣ်သူး ၁၄:၁၆.
ကစၢ်ယွၤစံးဆၢက့ၤ ပတၢ်ထုကဖၣ်ဒ်လဲၣ်
၁၆. မ့ၢ်ကစၢ်ယွၤစံးဆၢက့ၤ ပတၢ်ထုကဖၣ်သပှၢ်ကတၢၢ်ဧါ, တဲဖျါထီၣ်တက့ၢ်.
၁၆ မ့ၢ်ယဟိဝၤယွၤစံးဆၢ ပတၢ်ထုကဖၣ်သပှၢ်ကတၢၢ်ဧါ. စံးဆၢဝဲလီၤ. လံာ်စီဆှံကိးအီၤလၢ “ပှၤလၢအနၢ်ဟူ တၢ်ဘါထုကဖၣ်တဂၤ” လီၤ. (စံးထီၣ်ပတြၢၤ ၆၅:၂) ပှၤဟီၣ်ခိၣ်ဖိလၢ အကကွဲၢ်တဖၣ်န့ၣ် ယဟိဝၤယွၤနၢ်ဟူဝဲ အဝဲသ့ၣ်အတၢ်ထုကဖၣ်ဒီး စံးဆၢက့ၤအီၤလီၤ. ဒီးကစၢ်ယွၤစံးဆၢက့ၤတၢ်ထုကဖၣ်လၢ ကျဲအါဘိလီၤ.
၁၇. ဒ်သိးယဟိဝၤယွၤ ကစံးဆၢက့ၤပတၢ်ထုကဖၣ်အဂီၢ် အဝဲသူဝဲမူခိၣ်ကလူးဒီး အခ့အပှၤလၢဟီၣ်ခိၣ်ချၢအံၤဒ်လဲၣ်.
၁၇ ယဟိဝၤယွၤသူဝဲ မူခိၣ်ကလူးဒီးအခ့အပှၤတဖၣ်လၢ ဟီၣ်ခိၣ်ချၢအံၤ ဒ်သိးအကစံးဆၢက့ၤ ပတၢ်ထုကဖၣ်အဂီၢ်လီၤ. (ဧ့ၤဘြံၤ ၁:၁၃, ၁၄) ပထံၣ်ဘၣ်အါဘျီလၢ ဖဲပှၤဃ့ဘါထုကဖၣ်လၢ ကဒိးန့ၢ်ဘၣ်တၢ်မၤစၢၤလၢ ကနၢ်ပၢၢ်ထီၣ်လံာ်စီဆှံအခါ တယံာ်တမီၢ်န့ၣ် အဝဲသ့ၣ်ထံၣ်လိာ်အသးဒီး ယဟိဝၤပှၤအုၣ်အသးတဂၤလီၤ. လံာ်စီဆှံပာ်ဖျါထီၣ်ဝဲလၢ မူခိၣ်ကလူးတဖၣ် ပၣ်ဃုာ်လၢတၢ်ဘိးဘၣ်သ့ၣ်ညါ “တၢ်သးခုအကစီၣ်” လၢဟီၣ်ခိၣ်ဒီဘ့ၣ်န့ၣ်လီၤ. (ဖး လီၣ်ဖျါ ၁၄:၆ တက့ၢ်.) တကးဒံးဘၣ် လၢပဝဲဒၣ်အကျါအါဂၤန့ၣ် ပဃ့ဘါထုကဖၣ်ဆူ ယဟိဝၤယွၤအအိၣ် ဘၣ်ဃးဒီးပတၢ်ကီတၢ်ခဲ မ့တမ့ၢ်ပတၢ်လိၣ်ဘၣ်ဝံၤအလီၢ်ခံ ပဒိးန့ၢ်ဘၣ်တၢ်မၤစၢၤ ခီဖျိလၢခရံာ်ဖိ ဒီပုၢ်ဝဲၢ်မုၣ်ဒီပုၢ်ဝဲၢ်ခွါတဂၤဂၤအအိၣ်လီၤ.—ကတိၤဒိ ၁၂:၂၅; ယၤကိာ် ၂:၁၆.
ယဟိဝၤယွၤစံးဆၢ ပတၢ်ထုကဖၣ်သ့ခီဖျိလၢ ပှၤဂၤအတၢ်မၤစၢၤအဃိလီၤ
၁၈. ဒ်သိးယဟိဝၤယွၤ ကစံးဆၢက့ၤပတၢ်ထုကဖၣ်အဂီၢ် အဝဲသူဝဲအသးစီဆှံဒီး လံာ်စီဆှံလၢ ကျဲဒ်လဲၣ်.
၁၈ ယဟိဝၤယွၤသူဝဲအသးစီဆှံ ဒ်သိးအကစံးဆၢက့ၤ ပတၢ်ထုကဖၣ်အဂီၢ်လီၤ. ဖဲပဃ့ဘါထုကဖၣ်လၢ ကစၢ်ယွၤကမၤစၢၤပှၤ ဒ်သိးပလဲၤခီဖျိတၢ်ကီတၢ်ခဲကန့ၢ်အဂီၢ်န့ၣ် ကစၢ်သူဝဲအသးစီဆှံလၢ အကသိၣ်လိနဲၣ်လိပှၤဒီး ဟ့ၣ်ဂံၢ်ဟ့ၣ်ဘါပှၤန့ၣ်လီၤ. (၂ ကရံၣ်သူး ၄:၇) ယဟိဝၤယွၤသူဝဲ လံာ်စီဆှံဒ်သိး အကစံးဆၢက့ၤပတၢ်ထုကဖၣ်ဒီး မၤစၢၤပှၤလၢပဆၢတဲာ်တၢ်လၢ တၢ်ကူၣ်သ့အပူၤကသ့အဂီၢ်စ့ၢ်ကီးလီၤ. ဖဲပဖးလံာ်စီဆှံအဆၢကတီၢ်န့ၣ် ပကထံၣ်န့ၢ်လံာ်စီဆှံအဆၢတဖၣ်လၢ အကဲထီၣ်တၢ်မၤစၢၤလၢ ပဂီၢ်လီၤ. တကးဒံးဘၣ် ယဟိဝၤယွၤကထိၣ်ဟူးထိၣ်ဂဲၤထီၣ်စ့ၢ်ကီး ပှၤတဂၤဂၤလၢ ကဟ့ၣ်တၢ်စံးဆၢလၢ တၢ်အိၣ်ဖှိၣ်အပူၤ ဒ်သိးကကဲထီၣ်တၢ်ဂံၢ်တၢ်ဘါလၢပဂီၢ် မ့တမ့ၢ်ကသူဝဲတၢ်အိၣ်ဖှိၣ်သးပှၢ်လၢ ကတဲဖျါထီၣ်လံာ်စီဆှံအဆၢလၢ အကဲထီၣ်တၢ်မၤစၢၤလၢပဂီၢ်န့ၣ် သ့ဝဲလီၤ.—ကလၤတံ ၆:၁.
၁၉. ဘၣ်မနုၤအဃိ ပဆိကမိၣ်ကမၣ်ဘၣ်လၢကစၢ်ယွၤ တစံးဆၢပတၢ်ထုကဖၣ်လဲၣ်.
၁၉ တဘျီတခီၣ်န့ၣ် နကဆိကမိၣ်ဘၣ်လၢ ‘ဘၣ်မနုၤအဃိ ယဟိဝၤယွၤတစံးဆၢယတၢ်ထုကဖၣ် ဒံးဘၣ်လဲၣ်.’ သ့ၣ်နီၣ်ထီၣ်က့ၤလၢ ကစၢ်ယွၤသ့ၣ်ညါဝဲလၢ အကဘၣ်စံးဆၢပတၢ်ထုကဖၣ်လၢ ကျဲဒ်လဲၣ်ဒ်လဲၣ်ဒီး လၢတၢ်ဆၢကတီၢ်ဖဲလဲၣ်န့ၣ်တက့ၢ်. အဝဲသ့ၣ်ညါ တၢ်လၢပလိၣ်ဘၣ်တဖၣ်လီၤ. ဘၣ်သ့ၣ်သ့ၣ် ပကဘၣ်ဆဲးဃ့ဘါထုကဖၣ်ဒ်သိး ပကပာ်ဖျါထီၣ်လၢ ပသးအိၣ်တၢ်လၢ ပဃ့အီၤတဖၣ်သပှၢ်ကတၢၢ်ဒီး ပတၢ်နာ် အိၣ်ထဲလဲၣ်န့ၣ်လီၤ. (လူၤကၣ် ၁၁:၅-၁၀) တဘျီတခီၣ်န့ၣ် ယဟိဝၤယွၤတစံးဆၢက့ၤ ပတၢ်ထုကဖၣ်ဒ်ကျဲလၢ ပမုၢ်လၢ်အီၤအသိးဘၣ်. အဒိ ဘၣ်သ့ၣ်သ့ၣ်ပကဃ့ဘါထုကဖၣ်လၢ ကစၢ်ယွၤကမၤလီၤမၢ်ကွံာ် ပတၢ်ကီတၢ်ခဲတမံၤမံၤ ဘၣ်ဆၣ်သနာ်က့ တဘျီတခီၣ်န့ၣ် လၢကစၢ်ယွၤ ကမၤလီၤမၢ်ကွံာ်ပတၢ်ကီတၢ်ခဲအလီၢ် အဝဲဟ့ၣ်ပှၤတၢ်ဂံၢ်တၢ်ဘါဒ်သိး ပတူၢ်တၢ်ခီၣ်တၢ်ကန့ၢ်အဂီၢ်လီၤ.—ဖး ဖံလံးပံၤ ၄:၁၃ တက့ၢ်.
၂၀. ဘၣ်မနုၤအဃိ ပကြၢးဃ့ဘါထုကဖၣ်ဆူ ယဟိဝၤယွၤအအိၣ်ထီဘိလဲၣ်.
၂၀ ပဃ့ဘါထုကဖၣ်တၢ်ဆူ ယဟိဝၤယွၤအအိၣ်န့ၣ် မ့ၢ်တၢ်ခွဲးတၢ်ယာ်လၢ အဒိၣ်ကတၢၢ်တခါလီၤ. (စံးထီၣ်ပတြၢၤ ၁၄၅:၁၈) ပမ့ၢ်ဃ့ဘါထုကဖၣ်ဆူ ယဟိဝၤယွၤအအိၣ် လၢပသးဒီဖျၢၣ်ထီဘိန့ၣ် ပတၢ်ရ့လိာ်သးဒီးအီၤ ကဘူးထီၣ်ဝဲလီၤ.