ဒ်သိး ကစၢ်ယွၤ ကဒိကနၣ် ပတၢ်ထုကဖၣ်အဂီၢ် ပကဘၣ် ဃ့ထုကဖၣ်ဒ်လဲၣ်
ယဟိဝၤယွၤန့ၣ် အကဲဝဲ “ပှၤလၢအဒိကနၣ် တၢ်ထုကဖၣ်.” (စံးထီၣ်ပတြၢၤ ၆၅:၂) အဃိ ပမ့ၢ်အိၣ်လၢ တၢ်လီၢ်ဖဲလဲၣ်ဂ့ၤ ဖဲလဲၣ်ဂ့ၤ သနာ်က့ ပဃ့ထုကဖၣ်လၢအအိၣ် သ့ကိးဆၢကတီၢ်ဒဲး. ပဃ့လၢ ပကလုၢ်ဒိၣ်သ့ ဒီးပဃ့လၢ ပသးပူၤသ့. ဒီးယဟိဝၤယွၤန့ၣ် အကဲပၢ်လၢ အဂ့ၤကတၢၢ်တဂၤအဃိ ဖဲပဃ့ထုကဖၣ်အခါ အအဲၣ်ဒိးလၢ ပကိးအီၤလၢ “ပၢ်.” (မးသဲ ၆:၉) တကးဒံးဘၣ် ခီဖျိလၢ ယဟိဝၤယွၤ အဲၣ်ပှၤအဃိ ဒ်သိး အကဒိကနၣ် ပတၢ်ထုကဖၣ်အဂီၢ် ပကဘၣ် ဃ့ထုကဖၣ်ဒ်လဲၣ်န့ၣ် အသိၣ်လိပှၤစ့ၢ်ကီး.
ဃ့ထုကဖၣ်လၢ ယဟိဝၤယွၤအအိၣ် လၢယ့ၣ်ၡူးအမံၤအပူၤ
“သုမ့ၢ်ဃ့တၢ်လၢ ပၢ်အအိၣ် လၢယမံၤအပူၤ တမံၤဂ့ၤ တမံၤဂ့ၤန့ၣ် အကဟ့ၣ်လီၤသုလီၤ.”—ယိၤဟၣ် ၁၆:၂၃.
ယ့ၣ်ၡူးအတၢ်ကတိၤအံၤ ပာ်ဖျါထီၣ်ဝဲ ၡဲၡဲလၢ ပကြၢးဃ့ထုကဖၣ်ထဲလၢ ယဟိဝၤယွၤအအိၣ်. ပကဘၣ်ဃ့လၢ ယ့ၣ်ၡူးအမံၤအပူၤ ဒီးတဘၣ်ဃ့ ခီဖျိ တၢ်ဂီၤတၢ်ဖှီၣ်, ပှၤစီဆှံ, မူခိၣ်ကလူး မ့တမ့ၢ် ပှၤသံတဖၣ်အအိၣ်ဘၣ်. ပမ့ၢ်ဃ့ထုကဖၣ်လၢ ကစၢ်ယွၤအအိၣ် လၢယ့ၣ်ၡူးအမံၤအပူၤန့ၣ် ပပာ်ဖျါထီၣ်လၢ ပနၢ်ပၢၢ် တၢ်လၢယ့ၣ်ၡူး မၤန့ၢ်လၢပဂီၢ်. ယ့ၣ်ၡူး တဲဝဲလၢ “မ့တမ့ၢ် ခီဖျိလၢ ယၤဘၣ်န့ၣ် ပှၤလဲၤလၢ ပၢ်အအိၣ် တသ့နီတဂၤဘၣ်.”—ယိၤဟၣ် ၁၄:၆.
တဲတၢ်လၢ အဟဲထီၣ်လၢ နသးပူၤ
“တဲဖျါထီၣ် သုတၢ်တူၢ်ဘၣ်ခဲလၢာ် လၢအအိၣ်တက့ၢ်.”—စံးထီၣ်ပတြၢၤ ၆၂:၈.
ဖဲပဃ့ထုကဖၣ်လၢ ယဟိဝၤယွၤ အအိၣ်အခါ ပကြၢးတဲတၢ်ဒီးအီၤ ဒ်သိးဒီး ပတဲတၢ်ဒီး ပပၢ်လၢအအဲၣ်ပှၤ. အဃိ ပကြၢးတဲတၢ်ဒီးအီၤ လၢတၢ်ပာ်ကဲ ဒီးတဲတၢ်လၢ အဟဲထီၣ်လၢ ပသးပူၤ. တကးဒံးဘၣ် ပတကြၢးဖး တၢ်ဂ့ၢ်လၢ တၢ်ထုကဖၣ်အလံာ်ပူၤ မ့တမ့ၢ် တဲဝံၤတဲက့ၤ တၢ်ထုကဖၣ်လၢ ပတိၢ်ရူးဃာ်အီၤဘၣ်.
ဃ့ထုကဖၣ် ဒ်ကစၢ်ယွၤ အတၢ်ဘၣ်သးအသိး
“ပမ့ၢ်ဃ့တၢ် တမံၤဂ့ၤတမံၤဂ့ၤ ဒ်အတၢ်ဘၣ်သးအသိးန့ၣ် အဝဲဒိကနၣ်ပှၤလီၤ.”—၁ ယိၤဟၣ် ၅:၁၄.
ဒ်သိး ယဟိဝၤယွၤ ကဒိကနၣ် ပတၢ်ထုကဖၣ်အဂီၢ် ပကဘၣ်ဃ့ထုကဖၣ် “ဒ်အတၢ်ဘၣ်သးအသိး.” အဃိ ပကဘၣ် ဃုသ့ၣ်ညါအါထီၣ် ကစၢ်ယွၤအဂ့ၢ်လၢ လံာ်စီဆှံအပူၤ. ဒီးလၢလံာ်စီဆှံပူၤန့ၣ် ကစၢ်ယွၤ တဲဘၣ်ပှၤတၢ်လၢ အကမၤန့ၢ်လၢပဂီၢ် ဒီးအပာ်ဖျါထီၣ်န့ၢ်ပှၤ တၢ်လၢအအဲၣ်ဒိးလၢ ပကမၤန့ၢ်လၢအဂီၢ်. အဃိ ပတၢ်ထုကဖၣ် မ့ၢ်ဘၣ်လိာ်သးဒီး ကစၢ်ယွၤ အတၢ်ဘၣ်သးမး အကဒိကနၣ်ပှၤ.
ပဃ့လၢ တၢ်ဂ့ၢ်မနုၤအဂီၢ်သ့လဲၣ်
ဃ့လၢတၢ်လိၣ်ဘၣ်တဖၣ်အဂီၢ်. ပဃ့ထုကဖၣ်လၢ ပကဒိးန့ၢ်ဘၣ် တၢ်လိၣ်ဘၣ်လၢ တနံၤအဂီၢ် တနံၤအဂီၢ် ဒ်သိးဒီး တၢ်အီၣ်တၢ်အီ, တၢ်ကူတၢ်ကၤ ဒီးတၢ်အိၣ်တၢ်ဆိးအလီၢ်သ့. ဒီးဒ်သိး ပကဆၢတဲာ်တၢ်လၢ အဘၣ်အဂီၢ် ပဃ့ကစၢ်ယွၤလၢ ကဟ့ၣ်ပှၤ တၢ်ကူၣ်သ့ ဒီးဃ့အီၤလၢ ကဟ့ၣ်ပှၤ တၢ်ဂံၢ်တၢ်ဘါ ဒ်သိး ပလဲၤခီဖျိ တၢ်ကီတၢ်ခဲကန့ၢ်အဂီၢ်သ့. တကးဒံးဘၣ် ပဃ့လၢ ပကအိၣ်ဒီးတၢ်နာ်, ဃ့ပျၢ်ပတၢ်ကမၣ် ဒီးဃ့ကစၢ်ယွၤ အတၢ်မၤစၢၤသ့.—လူၤကၣ် ၁၁:၃, ၄, ၁၃; ယၤကိာ် ၁:၅, ၁၇.
ဃ့န့ၢ်တၢ်လၢ ပှၤဂၤအဂီၢ်. ဖဲမိပါတဖၣ်ထံၣ်လၢ အဖိတဖၣ် အဲၣ်လိာ်သးအခါ အဝဲသ့ၣ် သးမုာ်ဒိၣ်မး. ဒ်န့ၣ်အသိး ယဟိဝၤယွၤ အဲၣ်ဒိးလၢ အဖိအလံၤ လၢဟီၣ်ခိၣ်ချၢန့ၣ် ကအဲၣ်လိာ်သး ဒီးကွၢ်ထွဲလိာ်သး. တကးဒံးဘၣ် စီၤယၤကိာ် တဲဝဲလၢ “ဃ့ထုကဖၣ်န့ၢ်တၢ်လၢ တဂၤဒီးတဂၤအဂီၢ်တက့ၢ်.” (ယၤကိာ် ၅:၁၆) အဃိ ပမ့ၢ်ဃ့ထုကဖၣ်န့ၢ်တၢ်လၢ ပသးသမူတံၤသကိးအဂီၢ်, ပဖိအဂီၢ်, ပဟံၣ်ဖိဃီဖိအဂီၢ် ဒီးပသကိးအဂီၢ်န့ၣ် အတကမၣ်ဘၣ်.
တဲဖျါထီၣ် တၢ်စံးဘျုးစံးဖှိၣ်. ဘၣ်ဃးဒီး ကစၢ်ယွၤလၢအမ့ၢ် ပတၢ်ဘၣ်တ့ကစၢ်န့ၣ် လံာ်စီဆှံ တဲဝဲလၢ “အဝဲမၤဂ့ၤတၢ်အဃိ . . . အဝဲဒုးစူၤလီၤတၢ်လၢ မူခိၣ်လၢသုဂီၢ် ဒီးဒုးသၣ်ထီၣ် တၤသူတၤသၣ် ဘၣ်ဆၢဘၣ်ကတီၢ်, အဝဲဟ့ၣ်သု တၢ်အီၣ်တၢ်အီ အါအါဂီၢ်ဂီၢ် ဒီးမၤပှဲၤသုသးလၢ တၢ်သူၣ်ဖှံသးညီလီၤ.” (မၤတၢ် ၁၄:၁၇) ဖဲပဆိကမိၣ်ထီၣ် တၢ်ခဲလၢာ်လၢ ကစၢ်ယွၤ မၤန့ၢ်လၢပဂီၢ်အခါ ပကအဲၣ်ဒိး စံးဘျုးစံးဖှိၣ်က့ၤအီၤလၢ ပတၢ်ထုကဖၣ်. ထဲန့ၣ်တကးဒံးဘၣ် ပကြၢးပာ်ဖျါထီၣ်လၢ ပစံးဘျုးအီၤခီဖျိ ပဒိကနၣ်အကလုၢ် လၢပတၢ်အိၣ်မူ ကိးသနၢၣ်ဒဲး.—ကလီးစဲ ၃:၁၅.
အိၣ်ဒီးတၢ်ဝံသးစူၤ ဒီးဆဲးဃ့ထုကဖၣ်ထီဘိ
တဘျီတခီၣ် ကစၢ်ယွၤ မ့ၢ်တစံးဆၢ ပတၢ်ထုကဖၣ် တဘျီဃီဘၣ်န့ၣ် ပသးကလီၤစၢ်. တၢ်မ့ၢ်ကဲထီၣ်သး ဒ်န့ၣ်န့ၣ် မ့ၢ်ပကြၢးဆိကမိၣ်လၢ ကစၢ်ယွၤ တသးအိၣ်ပှၤဘၣ်ဧါ. ပတကြၢးဆိကမိၣ် ဒ်န့ၣ်ဘၣ်. တၢ်လဲၤခီဖျိ လၢလာ်အံၤ ကပာ်ဖျါထီၣ်န့ၢ်ပှၤလၢ ပကဘၣ် အိၣ်ဒီးတၢ်ဝံသးစူၤ ဒီးဃ့ထုကဖၣ်ထီဘိ.
စတံၤ လၢပဖးဘၣ်အဂ့ၢ်လၢ အခီၣ်ထံးန့ၣ် အတဲဝဲလၢ “မ့တမ့ၢ်လၢ တၢ်ထုကဖၣ်အဃိဘၣ်န့ၣ် ယကဟ့ၣ်အၡူဖးယံာ်လံ ဒီးယတဒိးန့ၢ်ဘၣ်က့ၤ တၢ်သးခုလၢၤဘၣ်.” တၢ်မနုၤမၤစၢၤအီၤလဲၣ်. စတံၤ မၤလိလံာ်စီဆှံ ဒီးမၤလိဘၣ်ဝဲလၢ အကဘၣ် ဃ့ထုကဖၣ်တၢ် ဒီးဆဲးဃ့ ခဲအံၤခဲအံၤ. စတံၤ တဲဝဲလၢ “ယဃ့ထုကဖၣ်လၢ ကစၢ်ယွၤအအိၣ် ဒီးစံးဘျုးအီၤလၢ တၢ်အဲၣ်ဒီးတၢ်မၤစၢၤလၢ ယဒိးန့ၢ်ဘၣ်လၢ ယသကိးတဖၣ်အအိၣ်. ခဲအံၤ ယသးခုဒိၣ်န့ၢ်ဒံးလၢညါ စၢၢ်တလၢၢ်.”
မ့မ့ၢ် ကၠဲနံၤမီၤ. အတူၢ်ဘၣ်လၢ အဘျုးတအိၣ်ဘၣ်အဃိ အဆိကမိၣ်လၢ ကစၢ်ယွၤ တကြၢးဒိကနၣ် အတၢ်ထုကဖၣ်ဘၣ်. အတဲဝဲလၢ “ဖဲယသးလီၤစၢ် နးဒိၣ်မးအခါ ယဃ့ကစၢ်ယွၤလၢ အကမၤစၢၤယၤ ဒ်သိး ယကနၢ်ပၢၢ်လၢ ဘၣ်မနုၤအဃိ ယတူၢ်ဘၣ်လၢ ယဘျုးတအိၣ်ဘၣ်လဲၣ်.” တၢ်ထုကဖၣ်အံၤ မၤစၢၤ ကၠဲနံၤဒ်လဲၣ်. ကၠဲနံၤ ဆဲးတဲဝဲလၢ “ယသးမ့ၢ်ပာ် တၢ်ကမၣ်လၢယလိၤ သနာ်က့ တၢ်ထုကဖၣ် မၤစၢၤယၤဒ်သိး ယကထံၣ်လီၤယသး ဒ်ကစၢ်ယွၤ ထံၣ်ယၤအသိး. ယနၢ်ပၢၢ်ထီၣ် ကစၢ်ယွၤ အတၢ်ထံၣ်အဃိ မၤစၢၤယၤဒ်သိး ယတဟ့ၣ်အၡူတဂ့ၤ.” ကၠဲနံၤ ဒိးန့ၢ်ဘၣ်အဘျုးဒ်လဲၣ်. အတဲဝဲလၢ “တၢ်ထုကဖၣ် မၤစၢၤယၤဒ်သိး ယကထံၣ် ယဟိဝၤယွၤ ဒ်ပှၤနီၢ်ကီၢ်တဂၤအသိး. ယထံၣ်အီၤဒ် အကဲယကစၢ်ယွၤ, ယပၢ် ဒီးယသကိးလၢ အအဲၣ်ယၤ ဒီးကဟုကယာ်ယၤ. ဒီးဖဲယလိၣ်ဘၣ် အတၢ်မၤစၢၤအခါ ယမ့ၢ်ဂုာ်ကျဲးစၢး မၤတၢ်လၢ အဘၣ်အသး ထီဘိန့ၣ် ယသ့ၣ်ညါလၢ အကမၤစၢၤယၤ နီၢ်ကီၢ်.”
အံၤစဘဲ တဲဝဲလၢ “ယဖိခွါ ကရါ အတၢ်အိၣ်ဆူၣ်အိၣ်ချ့ တဂ့ၤဘၣ် သနာ်က့ အအိၣ်ဒီးတၢ်သးခုဒံး. အဃိ ယသ့ၣ်ညါဘၣ်လၢ ယဟိဝၤယွၤ စံးဆၢယတၢ်ထုကဖၣ် ဒီးယဖိခွါသးဘိန့ၣ် အကဲဝဲ တၢ်ဆိၣ်ဂ့ၤလၢ ယဟိဝၤယွၤ ဟ့ၣ်ယၤ”
ဆိကမိၣ်ကွၢ်စ့ၢ်ကီး အံၤစဘဲ အတၢ်လဲၤခီဖျိ. ဖဲအဒၢထီၣ်အခါ ကသံၣ်သရၣ် တဲအီၤလၢ အဖိမ့ၢ်အိၣ်ဖျဲၣ်လီၤန့ၣ် အကအိၣ်ဖျဲၣ်လီၤဃုာ်ဒီး တၢ်ဆါလၢအနး ဒီးအကလိၣ်ဘၣ် တၢ်မၤစၢၤ ဒီးတၢ်ကဟုကယာ်အါမး. အဃိ အသးဘၣ်ဒိနးမး. ပှၤတနီၤ ဟ့ၣ်ကူၣ်အီၤလၢ အကမၤလီၤတဲာ်အဖိ. အံၤစဘဲ တဲဝဲလၢ “ယသးကိၢ်တၢ် နးမးအဃိ ယတူၢ်ဘၣ်ဒ်သိးဒီး ယကသံလီၤ.” ဘၣ်ဆၣ် အံၤစဘဲ မၤဝဲဒ်လဲၣ်. အတဲဝဲလၢ “ယဃ့ထုကဖၣ် တဘျီဝံၤတဘျီလၢ ကစၢ်ယွၤ ကမၤစၢၤယၤ.” လၢခံန့ၣ် အဖိခွါလၢအမံၤမ့ၢ် ကရါ အိၣ်ဖျဲၣ်လီၤ ဃုာ်ဒီးတၢ်ဆါလၢအနး ဒ်ကသံၣ်သရၣ် တဲအီၤအသိး. အဃိ မ့ၢ်အံၤစဘဲ တူၢ်ဘၣ်လၢ ကစၢ်ယွၤ စံးဆၢအတၢ်ထုကဖၣ်ဧါ. အတူၢ်ဘၣ်ဝဲ ဒ်န့ၣ်. အတဲဝဲလၢ “ခဲအံၤ ယဖိခွါအိၣ် ၁၄ နံၣ်လံ. အတၢ်အိၣ်ဆူၣ်အိၣ်ချ့ တဂ့ၤဘၣ် သနာ်က့ အအိၣ်ဒီးတၢ်သးခုဒံး. အဃိ ယသ့ၣ်ညါဘၣ်လၢ ယဟိဝၤယွၤ စံးဆၢယတၢ်ထုကဖၣ် ဒီးယဖိခွါသးဘိန့ၣ် အကဲဝဲ တၢ်ဆိၣ်ဂ့ၤလၢ ယဟိဝၤယွၤ ဟ့ၣ်ယၤ.”
တၢ်လဲၤခီဖျိတဖၣ်အံၤ ဒုးသ့ၣ်နီၣ်ထီၣ်ပှၤလၢ ပှၤကွဲးထါစံးထီၣ်ပတြၢၤတဂၤ အတၢ်ကတိၤ လၢအတဲဝဲလၢ “အိ ယဟိဝၤယွၤဧၢ, . . . ပှၤလၢအဆီၣ်လီၤသးန့ၣ် နကနၢ်ဟူ အတၢ်ဃ့ကညးလီၤ. နကမၤဆူၣ်ထီၣ် အဝဲသ့ၣ်အသး ဒီးဒိကနၣ်အဝဲသ့ၣ် လီၤတံၢ်လီၤဆဲးလီၤ.” (စံးထီၣ်ပတြၢၤ ၁၀:၁၇) လံာ်စီဆှံတဆၢအံၤ ကဲထီၣ်တၢ်ဟ့ၣ်ဂံၢ်ဟ့ၣ်ဘါလၢ ပကဆဲးဃ့ထုကဖၣ်လၢ ကစၢ်ယွၤအအိၣ် ထီဘိတမ့ၢ်ဧီၤ.
လၢလံာ်စီဆှံအပူၤန့ၣ် ပဖးဘၣ်ဘၣ်ဃးဒီး ယ့ၣ်ၡူးအတၢ်ဃ့ထုကဖၣ် တဘျုးခါညါ. ဘၣ်ဆၣ် အတၢ်ထုကဖၣ်လၢ ပှၤသ့ၣ်ညါဝဲ အါကတၢၢ်န့ၣ် မ့ၢ်ဝဲ တၢ်ထုကဖၣ်တခါလၢ အသိၣ်လိ အပျဲၢ်အဘီၣ်. လၢတၢ်ထုကဖၣ်တခါန့ၣ် ပကမၤလိန့ၢ်ဘၣ် တၢ်ဂ့ၢ်မနုၤလဲၣ်.