တၢ်မၤလိ ၇၀
မူခိၣ်ကလူးတဖၣ် ဘိးဘၣ်သ့ၣ်ညါဝဲ ဘၣ်ဃးဒီး ယ့ၣ်ၡူးအိၣ်ဖျဲၣ်ထီၣ်အဂ့ၢ်
ကဲစၢ်အီၤကူစတူး မ့ၢ်ပှၤပၢတၢ်တဂၤလၢ ရိမ့ၤအဘီအမုၢ်ပူၤ. အဟ့ၣ်လီၤ တၢ်ကလုၢ်လၢ ပှၤယူဒၤဖိခဲလၢာ် ကဘၣ်က့ၤဆဲးလီၤအမံၤ လၢအဝဲသ့ၣ် အိၣ်ဖျဲၣ်ထီၣ်အလီၢ်. စီၤယိၤသး အိၣ်ဖျဲၣ်ထီၣ်ဝဲ ဖဲဝ့ၢ်ဘ့ၤသလ့ဃ့ၣ်အဃိ အီၤဒီးနီၢ်မၤရံ က့ၤဝဲဖဲန့ၣ်. ဖဲန့ၣ်အဆၢကတီၢ် ဘူးထီၣ်လၢ နီၢ်မၤရံအဖိ ကအိၣ်ဖျဲၣ်ထီၣ်.
ဖဲအဝဲသ့ၣ်လဲၤတုၤလၢ ဝ့ၢ်ဘ့ၤသလ့ဃ့ၣ်အခါ တၢ်လီၢ်လၢအဝဲသ့ၣ် ကအိၣ်ဝဲန့ၣ် တအိၣ်ဘၣ်. နီၢ်မၤရံ အိၣ်ဖျဲၣ်ထီၣ် အဖိခွါ ယ့ၣ်ၡူး, အဘိၣ်ထီၣ်အဖိခွါလၢ တၢ်ကံးညာ် ဒီးဒုးမံနီၤအီၤလၢ ဆၣ်ဖိကီၢ်ဖိ အီၣ်ဆၣ်အကျိးပူၤ.
လၢဝ့ၢ်ဘ့ၤသလ့ဃ့ၣ် အကပၤန့ၣ် ပှၤကွၢ်သိတနီၤ ကွၢ်သိလၢမုၢ်နၤ. သတူၢ်ကလာ်န့ၣ် မူခိၣ်ကလူးတဂၤ ဟဲလီၣ်ဖျါထီၣ်အသးလၢ ပှၤကွၢ်သိတဖၣ်အံၤ အမဲာ်ညါ ဒီးယဟိဝၤယွၤ အလၤကပီၤ အိၣ်ဝးတရံးအဝဲသ့ၣ်. ပှၤကွၢ်သိတဖၣ်အံၤ ပျံၤတၢ်ဒိၣ်မး. ဘၣ်ဆၣ် မူခိၣ်ကလူးတဂၤအံၤ တဲဘၣ်အဝဲသ့ၣ်လၢ ‘ပျံၤတၢ်တဂ့ၤ, ယကတဲဘၣ်သု တၢ်ကစီၣ်လၢ အလီၤသးခုဖးဒိၣ်တခါ. တနံၤညါအံၤ မ့းၡံအၤ ဟဲအိၣ်ဖျဲၣ်ထီၣ်လၢ ဝ့ၢ်ဘ့ၤသလ့ဃ့ၣ်အပူၤလံ.’ ဖဲန့ၣ်အဆၢကတီၢ် မူခိၣ်ကလူးအါဂၤ လီၣ်ဖျါထီၣ်အသး ဒီးတဲဝဲလၢ ‘စံးထီၣ်ပတြၢၤ ကစၢ်ယွၤ လၢမူခိၣ် ဒီးမ်တၢ်မုာ်တၢ်ခုၣ် အိၣ်ထီၣ်လၢ ဟီၣ်ခိၣ်ချၢတက့ၢ်.’ ဝံၤဒီး မူခိၣ်ကလူးတဖၣ် လီၤမၢ်ကွံာ်ဝဲ. ပှၤကွၢ်သိတဖၣ် မၤဝဲဒ်လဲၣ်.
ပှၤကွၢ်သိတဖၣ် တဲလိာ်အသး တဂၤဒီးတဂၤလၢ ‘ခဲအံၤ ပလဲၤလၢ ဝ့ၢ်ဘ့ၤသလ့ဃ့ၣ်ဟီ.’ ဝံၤဒီး ပှၤကွၢ်သိတဖၣ်အံၤ လဲၤဝဲလၢ ဝ့ၢ်ဘ့ၤသလ့ဃ့ၣ် ဒီးအဝဲသ့ၣ်ထံၣ်ဘၣ်ဝဲ စီၤယိၤသး, နီၢ်မၤရံ ဒီးဖိသၣ်လၢ အအိၣ်ဖျဲၣ်ထီၣ် သီသီတဂၤအံၤ မံနီၤဝဲလၢ ဆၣ်ဖိကီၢ်ဖိ အီၣ်ဆၣ်အကျိးပူၤ.
ကယဲၢ်ပှၤလၢ အနၢ်ဟူဘၣ်ဝဲ တၢ်ကစီၣ်လၢ မူခိၣ်ကလူးတဲဘၣ် ပှၤကွၢ်သိတဖၣ်အံၤန့ၣ် အဝဲသ့ၣ်ကမၢကမၣ်ဝဲဒိၣ်မး. ဘၣ်ဃးဒီး မူခိၣ်ကလူး အတၢ်ကတိၤတဖၣ်န့ၣ် နီၢ်မၤရံ ဆိကမိၣ်ထံဝဲ လီၤတံၢ်လီၤဆဲး ဒီးတသးပ့ၤနီၣ်ဝဲ နီတဘျီဘၣ်. ပှၤကွၢ်သိတဖၣ် က့ၤကွၢ်အသိ ဒီးစံးဘျုးစံးဖှိၣ်က့ၤ ယဟိဝၤယွၤ ခီဖျိတၢ်လၢ အဝဲသ့ၣ်ထံၣ်ဒီး နၢ်ဟူဘၣ်ဝဲအဃိ.
“မ့ၢ်လၢ ကစၢ်ယွၤ ဆှၢလီၤယၤ ဒီးယအိၣ်ဖဲအံၤ အဃိလီၤ. ဒီးယတဟဲလၢ ယနီၢ်ကစၢ်အသးဘၣ်, အဝဲ ဆှၢလီၤယၤလီၤ.”—ယိၤဟၣ် ၈:၄၂