ပှၤခိးဃိာ်ဖိတဂၤ မၤလိတၢ်မ့ၢ်တၢ်တီ

လၢဝ့ၢ်ဖံလံးပံၤအပူၤန့ၣ်​ ကုၢ်ပိာ်မုၣ်အိၣ်ဝဲတဂၤ ဒီးတၢ်ဝံတၢ်နါအိၣ်လၢ ပိာ်မုၣ်အံၤအလိၤ. တၢ်ဝံတၢ်နါဒုးဖးအီၤတၢ်လၢ အကမၤအသးလၢ ခါဆူညါအဂ့ၢ်. အဃိ ပိာ်မုၣ်အံၤဃုစ့လၢ အကစၢ်တဖၣ်အဂီၢ် န့ၢ်အါမး. ဖဲစီၤပီလူး ဒီးစီၤစံလၤ လဲၤလၢဝ့ၢ်ဖံလံးပံၤအခါ ပိာ်မုၣ်အံၤလဲၤပိာ် အဝဲသ့ၣ်အခံ တဘျုးသီညါ. ဒီးတၢ်ဝံတၢ်နါမၢ ပိာ်မုၣ်ကိးပသူထီၣ်လၢ “ပှၤတဖၣ်အံၤ မ့ၢ်ဝဲကစၢ်ယွၤလၢ အထီကတၢၢ်တဂၤ အကုၢ်တဖၣ်.” လၢခံ စီၤပီလူးတဲဘၣ်​ တၢ်ဝံတၢ်နါလၢ ‘လၢယ့ၣ်ၡူးခရံာ်အမံၤ, ဟးထီၣ်ကွံာ်လၢ ပိာ်မုၣ်အံၤအပူၤတက့ၢ်.’ ဒီးတၢ်ဝံတၢ်နါန့ၣ်​ ဟးထီၣ်ဝဲလၢ ပိာ်မုၣ်အလိၤ.

ဖဲပိာ်မုၣ်အံၤအကစၢ်တဖၣ်​ သ့ၣ်ညါဝဲလၢ အဝဲသ့ၣ်​ ဃုစ့တန့ၢ်လၢၤဘၣ်အခါ အဝဲသ့ၣ်​ သးပှံၢ်ထီၣ်တၢ်ဒိၣ်မး. အဃိ ပိာ်မုၣ်အကစၢ်တဖၣ်အံၤ လဲၤတွံၢ် စီၤပီလူး ဒီးစီၤစံလၤ လၢကမျၢၢ် အပဒိၣ်ဖးဒိၣ်တဖၣ်​ အအိၣ်​ ဒီးတဲဝဲလၢ ‘ပိာ်ခွါတဖၣ်အံၤ မၤကမၣ်​ တၢ်သိၣ်တၢ်သီ ဒီးဒုးအိၣ်ထီၣ်​ တၢ်ကီတၢ်ခဲလၢ ပဝ့ၢ်ပူၤ သပှၢ်တၢၢ်.’ ပဒိၣ်ဖးဒိၣ်တဖၣ်​ မၢပှၤတီၢ် စီၤပီလူးဒီးစီၤစံလၤ ဒီးဖၢနုာ်လီၤအဝဲသ့ၣ်လၢ ဃိာ်ပူၤ. ဝံၤဒီး ပှၤခိးဃိာ်ဖိတဂၤ ဖၢနုာ်လီၤအဝဲသ့ၣ်လၢ ဃိာ်အဒၢးလၢ အအိၣ်လၢဃိာ်အခၢၣ်သး လၢတၢ်ခံးကျါ ဒီးပှၤကျီၤတံၢ်ဃာ် အဝဲသ့ၣ်​ လၢသ့ၣ်ကျီၤ.

ဖဲမုၢ်နၤခီအဆၢကတီၢ်န့ၣ်​ စီၤပီလူး ဒီးစီၤစံလၤ သးဝံၣ်စံးထီၣ်ပတြၢၤ ယဟိဝၤယွၤ ဒီးပှၤဃိာ်ဖိအဂၤတဖၣ်​ ဒိကနၣ်ဝဲ. သတူၢ်ကလာ်န့ၣ်​ ဟီၣ်ခိၣ်ဟူးဆူၣ်ဆူၣ်အဃိ ဃိာ်အတြဲၤခဲလၢာ် အိးထီၣ်အသး ဒီးပှၤဃိာ်ဖိတဖၣ်​ အပျံၤထးလီၤဃဲၣ်ကွံာ်ဝဲ ဒီးအသ့ၣ်ကျီၤလီၤဖျုဝဲ. ဖဲန့ၣ်အခါ ပှၤခိးဃိာ်ဖိတဂၤ လဲၤဃ့ၢ်ကွၢ်ဝဲ ပှၤဃိာ်ဖိဒီးထံၣ်ဝဲလၢ ဃိာ်အတြဲၤတဖၣ်​ အိးထီၣ်အသး. ဒီးအဝဲဆိကမိၣ်ဝဲလၢ ပှၤဃိာ်ဖိတဖၣ်​ ဃ့ၢ်ပူၤဖျဲးကွံာ်အသးလၢာ်လံ. အဃိ အဝဲထုးထီၣ်အနး ဒ်သိးဒီး အကမၤသံလီၤအသး.

ဖဲန့ၣ်အခါ စီၤပီလူး ကိးပသူထီၣ်လၢ ‘တဘၣ်မၤဆါလီၤနသးတဂ့ၤ, ပအိၣ်ဖဲအံၤ ကိးဂၤဒဲးလီၤ.’ ပှၤခိးဃိာ်ဖိတဂၤအံၤ ကရီလဲၤနုာ်လီၤကွၢ်ဝဲ ဒီးထိၣ်လီၤပှီၤအသးလၢ စီၤပီလူး ဒီးစီၤစံလၤ အမဲာ်ညါ. ပှၤခိးဃိာ်ဖိတဂၤအံၤ သံကွၢ်အဝဲသ့ၣ်လၢ “ဒ်သိး ယကဒိးန့ၢ်ဘၣ်​ တၢ်အုၣ်က့ၤခီၣ်က့ၤအဂီၢ် ယကဘၣ်မၤဒ်လဲၣ်.” စီၤပီလူးဒီးစီၤစံလၤ တဲဘၣ်အီၤလၢ ‘နၤဒီးနဟံၣ်ဖိဃီဖိ ကဘၣ်စူၢ်က့ၤနာ်က့ၤယ့ၣ်ၡူး.’ ဝံၤဒီး စီၤပီလူး ဒီးစီၤစံလၤ သိၣ်လိအဝဲသ့ၣ်​ ယဟိဝၤယွၤ အကလုၢ်ကထါ. ဒီးပှၤခိးဃိာ်ဖိ ဒီးအဟံၣ်ဖိဃီဖိခဲလၢာ်န့ၣ်​ ဒိးဘျၢထံ.