တၢ်မၤလိ ၁၀၀
စီၤပီလူး ဒီးစီၤတံၤမသ့း
စီၤတံၤမသ့း မ့ၢ်ဒီပုၢ်ဝဲၢ်သးစၢ်တဂၤလၢ ဝ့ၢ်လူစတြၤ အတၢ်အိၣ်ဖှိၣ်အပူၤ. စီၤတံၤမသ့းအပၢ်န့ၣ် မ့ၢ်ပှၤကြံးဖိ ဒီးအမိၢ်န့ၣ် မ့ၢ်ပှၤယူဒၤဖိ. စးထီၣ်ဖဲ စီၤတံၤမသ့း အနီၢ်ဆံးဒံးအခါန့ၣ် အမိၢ်နီၢ်အူၤနံက့ၤ ဒီးအဖံနီၢ်လိၤအ့ၣ် သိၣ်လိအီၤ ဘၣ်ဃးဒီး ယဟိဝၤယွၤအဂ့ၢ်.
ဖဲစီၤပီလူး လဲၤစံၣ်တဲၤတဲလီၤတၢ်လၢ ထံကီၢ်အဂၤ ခံဘျီတဘျီအခါ အလဲၤအိၣ်သကိး ဝ့ၢ်လူစတြၤ. ဖဲန့ၣ် အဝဲထံၣ်ဘၣ်ဝဲလၢ စီၤတံၤမသ့း အဲၣ်ဒီပုၢ်ဝဲၢ်တဖၣ်နီၢ်ကီၢ် ဒီးသးဆူၣ်လၢ ကမၤစၢၤအဝဲသ့ၣ်. အဃိ စီၤပီလူး ကွဲမုာ်စီၤတံၤမသ့း လၢအကလဲၤသကိးတၢ်ဒီးအီၤ. စီၤပီလူး သိၣ်လိစီၤတံၤမသ့း ကယီကယီ ဒ်သိးဒီး အကကဲထီၣ် ပှၤစံၣ်တဲၤတဲလီၤတၢ်ဖိ လၢအဂ့ၤတဂၤ.
ဖဲစီၤပီလူး ဒီးစီၤတံၤမသ့း လဲၤတၢ်တတီၤဂ့ၤ တတီၤဂ့ၤအခါ သးစီဆှံ ဟံးစုနဲၣ်ကျဲအဝဲသ့ၣ်. ဘၣ်တနၤ လၢတၢ်ထံၣ်လၢညါခီအပူၤန့ၣ် ပိာ်ခွါတဂၤတဲဘၣ် စီၤပီလူးလၢ ဟဲလၢမၤက့းဒနံ ဒီးမၤစၢၤပှၤ. အဃိ စီၤပီလူး, စီၤတံၤမသ့း, စီၤစံလၤ ဒီးစီၤလူၤကၣ် လဲၤဝဲဖဲန့ၣ် ဒ်သိးကစံၣ်တဲၤတဲလီၤတၢ် ဒီးဒုးအိၣ်ထီၣ်ဝဲ တၢ်အိၣ်ဖှိၣ်တဖၣ်အဂီၢ်.
ဝ့ၢ်သ့းစၤလနံန့ၣ် အိၣ်လၢမၤက့းဒနံအပူၤ. ဖဲန့ၣ်န့ၣ် ပိာ်မုၣ်ဒီးပိာ်ခွါအါဂၤ ကဲထီၣ်ခရံာ်ဖိ. ဘၣ်ဆၣ် ပှၤယူဒၤဖိတနီၤန့ၣ် သးက့ၣ်ဝဲ စီၤပီလူး ဒီးပှၤလၢအမၤသကိးတၢ်ဒီးအီၤတဖၣ်. အဝဲသ့ၣ် တဲအၢတဲသီ စီၤပီလူးဒီးအသကိးတဖၣ် ဒီးလဲၤတွံၢ် အဝဲသ့ၣ်လၢ ပဒိၣ်တဖၣ်အအိၣ် ဒီးကိးပသူထီၣ်လၢ ‘ပိာ်ခွါတဖၣ်အံၤ ထီဒါ ပှၤရိမ့ၤအပဒိၣ်.’ တၢ်လီၤဘၣ်ယိၣ်အိၣ်လၢ စီၤပီလူး ဒီးစီၤတံၤမသ့း အသးသမူ အဂီၢ်အဃိ ဖဲမုၢ်နၤခီန့ၣ် အဝဲသ့ၣ် လဲၤဃ့ၢ်ဝဲလၢ ဝ့ၢ်ဘ့းရံၤ.
ပှၤအိၣ်လၢ ဝ့ၢ်ဘ့းရံၤအပူၤန့ၣ် အသူၣ်ဆူၣ်သးဆူၣ်လၢ ကမၤလိဝဲ ကစၢ်ယွၤ အကလုၢ်ကထါ. ပှၤကြံးဖိ ဒီးပှၤယူဒၤဖိ လၢအအိၣ်ဖဲန့ၣ်တဖၣ်န့ၣ် ကဲထီၣ်ဝဲခရံာ်ဖိ. ဘၣ်ဆၣ် ပှၤယူဒၤဖိတနီၤ လၢအအိၣ်လၢ ဝ့ၢ်သ့းစၤလနံအပူၤန့ၣ် ဟဲဒုးအိၣ်ထီၣ်ဝဲ တၢ်ကီတၢ်ခဲအဃိ စီၤပီလူး လဲၤဝဲလၢ ဝ့ၢ်အၤသ့ၣ်. မ့မ့ၢ်စီၤတံၤမသ့း ဒီးစီၤစံလၤန့ၣ် အိၣ်တ့ၢ်ဝဲလၢ ဝ့ၢ်ဘ့းရံၤ ဒ်သိး ကဒုးဆူၣ်ထီၣ် ဒီပုၢ်ဝဲၢ်တဖၣ် အဂံၢ်အဘါအဂီၢ်. လၢခံ စီၤပီလူးဆှၢက့ၤ စီၤတံၤမသ့း လၢဝ့ၢ်သ့းစၤလနံအပူၤ လၢကမၤစၢၤ ဒီပုၢ်ဝဲၢ်တဖၣ် လၢအထံၣ်ဘၣ် တၢ်မၤအၢမၤနး. ဝံၤဒီး စီၤပီလူးဆှၢလီၤ စီၤတံၤမသ့းလၢ ကလဲၤအိၣ်သကိးဝဲ တၢ်အိၣ်ဖှိၣ်အါဖျၢၣ် ဒ်သိး ကဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်တဖၣ်အဂီၢ်.
စီၤပီလူးတဲဘၣ် စီၤတံၤမသ့းလၢ ‘ပှၤလၢအဲၣ်ဒိးမၤ ယဟိဝၤယွၤ အတၢ်မၤန့ၣ် ကဘၣ်တၢ်မၤနးမၤဖှီၣ် အဝဲသ့ၣ်.’ ခီဖျိလၢ စီၤတံၤမသ့း အတၢ်နာ်အဃိ ပှၤမၤအၢမၤသီအီၤ ဒီးပှၤဖၢနုာ်အီၤ လၢဃိာ်ပူၤ. ဘၣ်ဆၣ် စီၤတံၤမသ့းသးခု ခီဖျိလၢ အဝဲဒိးန့ၢ်ဘၣ် တၢ်ခွဲးတၢ်ယာ်လၢ အပာ်ဖျါထီၣ်ဘၣ် အတၢ်သးတီလၢ ယဟိဝၤယွၤ အဖီခိၣ်.
စီၤပီလူးတဲဘၣ် ပှၤဖံလံးပံၤဖိတဖၣ်လၢ ‘ယကဆှၢလီၤန့ၢ်သု စီၤတံၤမသ့း. အဝဲ ကသိၣ်လိသီလိသု ဒ်သိးသုကမၤထွဲ တၢ်မ့ၢ်တၢ်တီ ဒီးအကသိၣ်လိသုလၢ သုစံၣ်တဲၤတဲလီၤတၢ် ကသ့ဂ့ၤဂ့ၤအဂီၢ်.’ စီၤပီလူး သ့ၣ်ညါဝဲလၢ အနာ်န့ၢ် စီၤတံၤမသ့းသ့ဝဲ. အဝဲသ့ၣ် မၤသကိးတၢ်လၢ အနံၣ်အါမးအတီၢ်ပူၤ ဒီးကဲထီၣ်ဘၣ် တံၤသကိးတံၢ်နီၢ်.
“ပှၤအဂၤ လၢအတၢ်ပာ်သူၣ်ပာ်သး ဒ်သိးဒီးအီၤ လၢအကကွၢ်ထွဲ သုတၢ်လိၣ်ဘၣ်တဖၣ်လၢ တၢ်သူၣ်အိၣ်သးအိၣ်နီၢ်ကီၢ် အပူၤန့ၣ် တအိၣ်ဒီးယၤ နီတဂၤဘၣ်. ပှၤအဂၤခဲလၢာ်န့ၣ် ဃုထဲအနီၢ်ကစၢ် အဘျုးအဂီၢ် ဒီးတဃုတၢ်လၢ ယ့ၣ်ၡူးခရံာ်ဘၣ်သးဘၣ်.”—ဖံလံးပံၤ ၂:၂၀, ၂၁