တၢ်ကတိၤအိးထီၣ် အကူာ် ၇
အကူာ်နွံအံၤ ပာ်ဖျါထီၣ်ဝဲ စီၤပၤစီလူး ဒီးစီၤပၤဒၤဝံး အတၢ်ဂ့ၢ်တၢ်ကျိၤလၢ အနံၣ် ၈၀ ဃၣ်ဃၣ်အတီၢ်ပူၤ. လၢအခီၣ်ထံးခါန့ၣ် စီၤစီလူး မ့ၢ်ပှၤလၢအဆီၣ်လီၤသး ဒီးပျံၤယွၤ. ဘၣ်ဆၣ် တယံာ်လၢၤဘၣ်န့ၣ် အတၢ်ပာ်သူၣ်ပာ်သး ဆီတလဲဝဲ ဒီးတဒိကနၣ် ယဟိဝၤယွၤ အကလုၢ်လၢၤဘၣ်. အဃိ ယဟိဝၤယွၤ ပာ်တ့ၢ်ကွံာ်အီၤ ဒီးလၢခံန့ၣ် ကစၢ်ယွၤမၢလီၤဝဲ စီၤၡမူၤအ့လးလၢ ကဖှူဝဲ စီၤဒၤဝံးဒ်သိး အဝဲကကဲထီၣ်စီၤပၤ လၢပှၤအံၣ်စရ့လးဖိတဖၣ် အဂီၢ်. မ့ၢ်လၢစီၤစီလူး သူၣ်က့ၣ်သးကါတၢ် အဃိ အဝဲဃုမၤသံဝဲ စီၤဒၤဝံးအါဘျီ ဘၣ်ဆၣ် စီၤဒၤဝံး တမၤကၣ်က့ၤအီၤဘၣ်. စီၤစီလူးအဖိခွါ စီၤယိနၤသၣ် သ့ၣ်ညါဝဲလၢ ယဟိဝၤယွၤ ဃုထၢထီၣ်ဝဲ စီၤဒၤဝံးလၢ စီၤပၤအဃိ အဝဲတီဒီးစီၤဒၤဝံး. လၢခံ စီၤဒၤဝံး မၤဘၣ်တၢ်ကမၣ်ဖးဒိၣ်တခါ ဘၣ်ဆၣ် အဝဲတူၢ်လိာ် ယဟိဝၤယွၤ အတၢ်သိၣ်ဃီၣ် ထီဘိ. နမ့မ့ၢ်မိၢ်ပၢ်န့ၣ် သိၣ်လိနဖိ ဒ်သိး အဝဲကနၢ်ပၢၢ်ထီၣ်ဝဲလၢ ပကဘၣ်ဆီၣ်ထွဲ ကစၢ်ယွၤ အတၢ်ရဲၣ်တၢ်ကျဲၤ ထီဘိ.