တၢ်မၤလိ ၁၀
တၢ်ဆီဟံၣ်ဆီဃီ—မ့ၢ်ယွၤအတၢ်ဟ့ၣ်
“ပျံၤပိၤအသးလၢပျံၤဖိသၢဘိန့ၣ်, တၢ်မၤတဲာ်အီၤကီလီၤ.”—စံၣ်တဲၤတဲလီၤတၢ် ၄:၁၂, ခ့ခါစှီၤကျိာ်.
၁, ၂. (က) ပှၤလၢအဆီဟံၣ်ဆီဃီ သီသီတဖၣ် မုၢ်လၢ်ဝဲဒ်လဲၣ်. (ခ) လၢတၢ်မၤလိအံၤအပူၤ ပကတဲသကိး တၢ်သံကွၢ်မနုၤတဖၣ်လဲၣ်.
ဖဲတလးမူးပိာ်မုၣ်ဒီး တလးမူးပိာ်ခွါဖျီသးအခါ အဝဲသ့ၣ်ပှဲၤဒီးတၢ်သးခုန့ၣ် ဆိကမိၣ်ကွၢ်တက့ၢ်. ဖဲန့ၣ်အခါ အဝဲသ့ၣ်ကဆိကမိၣ်ထီၣ်ဘၣ်ဃးဒီး အတၢ်အိၣ်မူခါဆူညါ ဒီးကပှဲၤဝဲဒီး တၢ်မုၢ်လၢ်ဒီး တၢ်သူၣ်ဖှံသးညီလီၤ. တကးဒံးဘၣ် အဝဲသ့ၣ်မုၢ်လၢ်ဝဲလၢ အတၢ်ဆီဟံၣ်ဆီဃီ ကအိၣ်ဂၢၢ်ဆိးကျၢၤထီဘိလီၤ.
၂ ဖဲပှၤဆီဟံၣ်ဆီဃီသီသီအခါ အဝဲသ့ၣ်မ့ၢ်ပှဲၤဒီးတၢ်သးခုသနာ်က့ လၢခံန့ၣ် နီၢ်ဒီမါဝၤအါဂၤ အတၢ်ဆီဟံၣ်ဆီဃီ တလဲၤအသးဘျ့ဘျ့ဆှီဆှီလၢၤဘၣ်. ဒ်သိးပတၢ်ဆီဟံၣ်ဆီဃီ ကပှဲၤဒီးတၢ်သးခုဒီး ကအိၣ်ဂၢၢ်ဆိးကျၢၤဝဲထီဘိအဂီၢ် နီၢ်ဒီမါဝၤတဖၣ် လိၣ်ဘၣ်တၢ်ဟ့ၣ်ကူၣ်လၢ ကစၢ်ယွၤအအိၣ်လီၤ. လၢတၢ်န့ၣ်အဃိ ခဲအံၤပကဆိကမိၣ်ကွၢ် တၢ်သံကွၢ်တနီၤ အတၢ်စံးဆၢလီၤ. နမ့ၢ်ဆီဟံၣ်ဆီဃီန့ၣ် အဘျုးအိၣ်ဒ်လဲၣ်. ဒ်သိးနဃုထၢ နသးသမူတံၤသကိးလၢအဂ့ၤတဂၤ ကသ့အဂီၢ် တၢ်မနုၤကမၤစၢၤနၤလဲၣ်. နကဲထီၣ် မါလၢအဂ့ၤတဂၤ မ့တမ့ၢ် ဝၤလၢအဂ့ၤတဂၤ ကသ့ဒ်လဲၣ်. ဒီးဒ်သိးနတၢ်ဆီဟံၣ်ဆီဃီ ကအိၣ်ဂၢၢ်ဆိးကျၢၤထီဘိအဂီၢ် တၢ်မနုၤကမၤစၢၤနၤလဲၣ်.—ဖး ကတိၤဒိ ၃:၅, ၆ တက့ၢ်.
မ့ၢ်ယကြၢးဆီဟံၣ်ဆီဃီဧါ
၃. ဒ်သိးပှၤတဂၤကသးခုအဂီၢ် မ့ၢ်အဝဲကဘၣ်ဆီဟံၣ်ဆီဃီဧါ, နဆိကမိၣ်ဒ်လဲၣ်.
၃ ပှၤတနီၤဆိကမိၣ်ဝဲလၢ ပှၤမ့ၢ်တဆီဟံၣ်ဆီဃီန့ၣ် အဝဲသ့ၣ်တထံၣ်န့ၢ် တၢ်သးခုနီၢ်ကီၢ်ဘၣ်. ဘၣ်ဆၣ် တၢ်ဆိကမိၣ်ဒ်အံၤန့ၣ် တဘၣ်ဝဲဘၣ်. ယ့ၣ်ၡူး တဲဝဲလၢတၢ်အိၣ်သဘျ့န့ၣ် မ့ၢ်တၢ်ဟ့ၣ်လၢအဂ့ၤတမံၤလီၤ. (မးသဲ ၁၉:၁၁, ၁၂) တၢ်မၢဖိပီလူး ပာ်ဖျါထီၣ်စ့ၢ်ကီးဝဲလၢ တၢ်အိၣ်သဘျ့န့ၣ် အဘျုးအိၣ်ဝဲအါမးလီၤ. (၁ ကရံၣ်သူး ၇:၃၂-၃၈) ဘၣ်ဆၣ် တဘၣ်ဆီဟံၣ်ဆီဃီ ခီဖျိလၢနဟံၣ်ဖိဃီဖိ မ့တမ့ၢ် နသကိးတဖၣ် မၢဆူၣ်နၤအဃိတဂ့ၤ. တကးဒံးဘၣ် နတၢ်ဆဲးတၢ်လၤမ့ၢ်အိၣ်ဒ်လဲၣ်ဒ်လဲၣ် သနာ်က့ နကဆီဟံၣ်ဆီဃီဧါ တဆီဟံၣ်ဆီဃီဧါန့ၣ် မ့ၢ်ဒၣ်နနီၢ်ကစၢ်တၢ်ဃုထၢလီၤ.
၄. နီၢ်ဒီမါဝၤ အတၢ်ဆီဟံၣ်ဆီဃီ မ့ၢ်ပှဲၤဒီးတၢ်သးခုန့ၣ် ကဲဘျုးဒ်လဲၣ်.
၄ လံာ်စီဆှံတဲဝဲလၢ တၢ်ဆီဟံၣ်ဆီဃီန့ၣ် မ့ၢ်ယွၤအတၢ်ဟ့ၣ်တခါ ဒီးအဘျုးအိၣ်ဝဲလီၤ. ယဟိဝၤယွၤတဲဘၣ် ပိာ်ခွါအဆိကတၢၢ်တဂၤလၢ အမံၤမ့ၢ် စီၤအၤဒၣ်လၢ “ပှၤကညီအိၣ်တဂၤဃီ တဂ့ၤဘၣ် ယကတ့န့ၢ်အီၤလၢ တၢ်မၤစၢၤလၢအကြၢးဒီးအီၤလီၤ.” (၁ မိၤၡ့ ၂:၁၈) လၢတၢ်န့ၣ်အဃိ ယဟိဝၤယွၤတ့လီၤဝဲ နီၢ်အံၣ်အုဒ်သိးကကဲထီၣ် စီၤအၤဒၣ်အမါ, ဝံၤဒီးအဝဲသ့ၣ်ကဲထီၣ် ဟံၣ်ဖိဃီဖိအဆိကတၢၢ်တဒူၣ်လီၤ. နီၢ်ဒီမါဝၤတဖၣ် အဖိမ့ၢ်အိၣ်န့ၣ် ဖိသၣ်တဖၣ် ကလိၣ်ဘၣ်ဝဲ မိၢ်ပၢ်အတၢ်ကဟုကယာ်လီၤ. ဘၣ်ဆၣ် တၢ်ဆီဟံၣ်ဆီဃီန့ၣ် တမ့ၢ်ထဲလၢ ပကကွၢ်လုၢ်ဒိၣ်ထီၣ်ဖိအဂီၢ်ဘၣ်.—စံးထီၣ်ပတြၢၤ ၁၂၇:၃; အ့းဖ့းစူး ၆:၁-၄.
၅, ၆. ဒ်သိးတၢ်ဆီဟံၣ်ဆီဃီ လီၤဂာ်ဒီး “ပျံၤပိၤအသးလၢပျံၤဖိသၢဘိ” ကသ့အဂီၢ် နီၢ်ဒီမါဝၤကဘၣ်မၤတၢ်မနုၤလဲၣ်.
၅ စီၤပၤၡလိၤမိၤ ကွဲးဝဲလၢ “ပှၤခံဂၤန့ၣ်ဂ့ၤဒိၣ်န့ၢ်ဒံး ပှၤတဂၤတက့ၢ်လီၤ. အဂ့ၢ်ဒ်အံၤ, မၤသကိးတၢ်တုၤလီၤတီၤလီၤသ့ဒိၣ်တက့ၢ်လီၤ. တဂၤမ့ၢ်လီၤဃံၤဒီး, အဂၤတဂၤဝံၣ်ဆၢထၢၣ်က့ၤအီၤသ့လီၤ. ဘၣ်ဆၣ် ပှၤမ့ၢ်အိၣ်ဒၣ်ထဲတဂၤဒီး မ့ၢ်လီၤဃံၤန့ၣ်, ပှၤကမၤစၢၤအီၤတအိၣ်ဘၣ်နီတဂၤအဃိ ဒီးမ့ၢ်တၢ်နးဖးဒိၣ်န့ၣ်လီၤ. . . ပျံၤပိၤအသးလၢပျံၤဖိသၢဘိန့ၣ်, တၢ်မၤတဲာ်အီၤကီလီၤ.”—စံၣ်တဲၤတဲလီၤတၢ် ၄:၉-၁၂, ခ့ခါစှီၤကျိာ်.
၆ တၢ်ဆီဟံၣ်ဆီဃီန့ၣ် ကြၢးလီၤဂာ်ဒ်သိးပှၤဒီတံၤဒီသကိးခံဂၤ ရ့လိာ်အသး ဘူးဘူးတံၢ်တံၢ်လီၤ. ပှၤဒီမါဝၤခံဂၤအံၤ ကဘၣ်မၤစၢၤလိာ်အသး, ဟ့ၣ်ဂံၢ်ဟ့ၣ်ဘါလိာ်အသး ဒီးကဟုကယာ်လိာ်အသး တဂၤဒီးတဂၤလီၤ. နီၢ်ဒီမါဝၤမ့ၢ်အဲၣ်လိာ်အသးန့ၣ် အတၢ်ဆီဟံၣ်ဆီဃီ ဂၢၢ်ကျၢၤသ့ဝဲလီၤ. ဘၣ်ဆၣ် နီၢ်ဒီမါဝၤခံဂၤ မ့ၢ်ဘူၣ်ထီၣ်ဘါထီၣ် ယဟိဝၤယွၤဒ်သိးသိးန့ၣ် အတၢ်ဆီဟံၣ်ဆီဃီ ကဂၢၢ်ကျၢၤဝဲ သပှၢ်ကတၢၢ်လီၤ. ဒီးအဝဲသ့ၣ် အတၢ်ဆီဟံၣ်ဆီဃီ ကလီၤဂာ်ဒ် “ပျံၤပိၤအသးလၢပျံၤဖိသၢဘိ” လီၤ. ပျံၤပိၤအသးခံဘိန့ၣ် ထီၣ်တဲာ်ညီဝဲလီၤ. ဘၣ်ဆၣ် ပျံၤပိၤအသးသၢဘိန့ၣ် ထီၣ်တဲာ်ကီဝဲလီၤ. ခီဖျိလၢ ယဟိဝၤယွၤ ပၣ်ဃုာ်လၢအဝဲသ့ၣ် အတၢ်ဆီဟံၣ်ဆီဃီအပူၤအဃိ အဝဲသ့ၣ်အတၢ်ဆီဟံၣ်ဆီဃီ ကဂၢၢ်ကျၢၤဝဲသပှၢ်ကတၢၢ်လီၤ.
၇, ၈. ဘၣ်ဃးဒီး တၢ်ဆီဟံၣ်ဆီဃီန့ၣ် စီၤပီလူးဟ့ၣ်ကူၣ်ဝဲဒ်လဲၣ်.
၇ တၢ်ဆီဟံၣ်ဆီဃီန့ၣ် မ့ၢ်စ့ၢ်ကီးကျဲတဘိလၢ ပှၤခံဂၤ ကမၤလၢပှဲၤထီၣ်အတၢ်လိၣ်ဘၣ်လၢ တၢ်မံဃုာ်တခီန့ၣ်လီၤ. (ကတိၤဒိ ၅:၁၈) ဘၣ်ဆၣ် ပှၤတဂၤဂၤမ့ၢ်ဆီဟံၣ်ဆီဃီ ထဲဒၣ်လၢကမၤလၢပှဲၤ အတၢ်လိၣ်ဘၣ်တဖၣ်အံၤအဂီၢ်န့ၣ် ဘၣ်သ့ၣ်သ့ၣ် အဝဲကကရီဃုထၢနါစိၤ အသးသမူတံၤသကိးလီၤ. လၢတၢ်န့ၣ်အဃိ လံာ်စီဆှံတဲဝဲလၢ ပှၤသးစၢ်တဂၤ မ့ၢ်လဲၤပူၤကွံာ် ဆၢကတီၢ်ဖဲ “အတၢ်သူၣ်ဂဲၤသးဂဲၤအသဟီၣ်ဆူၣ်တလၢ” အခါမး အဝဲကြၢးဆီဟံၣ်ဆီဃီန့ၣ်လီၤ. (၁ ကရံၣ်သူး ၇:၃၆, ခ့ခါစှီၤကျိာ်) ပမ့ၢ်အိၣ်ခိး တုၤလၢပတၢ်တူၢ်ဘၣ်တဖၣ်အံၤ အသဟီၣ်စှၤလီၤဝဲအဆၢကတီၢ်န့ၣ် ကဂ့ၤဝဲလီၤ. ဖဲန့ၣ်အဆၢကတီၢ် ပကဆိကမိၣ်ထံတၢ်လီၤတံၢ်လီၤဆဲး ဒီးပဃုထၢပသးသမူတံၤသကိး လၢအဂ့ၤကတၢၢ်သ့ဝဲလီၤ.—၁ ကရံၣ်သူး ၇:၉; ယၤကိာ် ၁:၁၅.
၈ ဒ်လဲၣ်ဂ့ၤဒ်လဲၣ်ဂ့ၤ နမ့ၢ်အဲၣ်ဒိးဆီဟံၣ်ဆီဃီန့ၣ် နကဘၣ်နၢ်ပၢၢ် တၢ်ဂ့ၢ်တမံၤအံၤလီၤ. ဘၣ်ဃးဒီးတၢ်ဆီဟံၣ်ဆီဃီန့ၣ် တမ့ၢ်လၢတၢ်ခဲလၢာ်ကလဲၤအသး ဘျ့ဘျ့ဆှီဆှီထီဘိဘၣ်. ဒ်စီၤပီလူးတဲဝဲအသိး ပမ့ၢ်ဆီဟံၣ်ဆီဃီန့ၣ်ပ “ကဘၣ်တၢ်နးတၢ်ဖှီၣ်လၢ ပဖံးပညၣ်အပူၤလီၤ.” (၁ ကရံၣ်သူး ၇:၂၈) နီၢ်ဒီမါဝၤလၢ အအဲၣ်လိာ်သးဒိၣ်ဒိၣ်ဒၣ်လဲာ် အဝဲသ့ၣ်ထံၣ်ဘၣ်ဝဲ တၢ်ကီတၢ်ခဲလီၤ. လၢတၢ်န့ၣ်အဃိ နမ့ၢ်အဲၣ်ဒိးဆီဟံၣ်ဆီဃီန့ၣ် နကဘၣ်ဃုထၢ နသးသမူတံၤသကိးလၢ တၢ်ကူၣ်သ့အပူၤလီၤ.
ယကြၢးဃုထၢ မတၤတဂၤလၢ ယသးသမူတံၤသကိးလဲၣ်
၉, ၁၀. ပမ့ၢ်ဆီဟံၣ်ဆီဃီ ဒီးပှၤလၢအတဘူၣ်ထီၣ်ဘါထီၣ်ယဟိဝၤယွၤန့ၣ် တၢ်ကမၤအသးဒ်လဲၣ်.
၉ ဖဲပဃုထၢ ပသးသမူတံၤသကိးအခါန့ၣ် ပကဘၣ်သ့ၣ်နီၣ်ထီၣ် လံာ်စီဆှံတၢ်ဟံးစုနဲၣ်ကျဲတခါ လၢအတဲဝဲ “သုတယိးနီၣ်ယိးဘိ ဖုၣ်ထံၣ်ဖုၣ်ထီ ဒီးပှၤလၢအတစူၢ်တနာ်ဘၣ်တဖၣ်န့ၣ်တဂ့ၤ.” (၂ ကရံၣ်သူး ၆:၁၄) စီၤပီလူးဟ့ၣ်တၢ်အဒိအံၤ လီၤပလိာ်လိာ်အသးဒီး ပှၤထူစံာ်ဖိအတၢ်အိၣ်မူလီၤ. ဆၣ်ဖိကီၢ်ဖိခံဒုမ့ၢ်တထဲသိးလိာ်အသး မ့တမ့ၢ် အဂံၢ်အဘါမ့ၢ်တထဲသိးလိာ်အသးန့ၣ် တမ့ၢ်လၢပှၤထူစံာ်ဖိတဂၤ ကပာ်ထီၣ်နီၣ်ယိးဘိလၢ ဆၣ်ဖိကီၢ်ဖိခံဒုအံၤ အကိာ်လိၤလၢ ကထူစံာ်ဒ်သိးသိးအဂီၢ်ဘၣ်. ဆၣ်ဖိကီၢ်ဖိခံဒုအံၤ မ့ၢ်ဘၣ်ယိးနီၣ်ယိးဘိလၢ ကထူစံာ်ဒ်သိးသိးအဂီၢ်န့ၣ် ကဘၣ်ဒိခံဒုလၢာ်လီၤ. ဒ်န့ၣ်အသိး ပှၤလၢအဘူၣ်ထီၣ်ဘါထီၣ်ယဟိဝၤယွၤ မ့ၢ်ဆီဟံၣ်ဆီဃီဒီး ပှၤတဂၤဂၤလၢအတဘူၣ်ထီၣ်ဘါထီၣ် ယဟိဝၤယွၤန့ၣ် တၢ်ကီတၢ်ခဲ ကဟဲအိၣ်ထီၣ်ဝဲသပှၢ်ကတၢၢ်လီၤ. လၢတၢ်န့ၣ်အဃိ လံာ်စီဆှံဟ့ၣ်ကူၣ်ပှၤလၢ ပကဘၣ်ဆီဟံၣ်ဆီဃီ “ထဲလၢကစၢ်အပူၤဧိၤလီၤ.”—၁ ကရံၣ်သူး ၇:၃၉.
၁၀ ခရံာ်ဖိတနီၤနီၤလၢအအိၣ်သဘျ့န့ၣ် တဘျီတခီၣ် ကဆိကမိၣ်ဘၣ်ဝဲလၢ အဝဲသ့ၣ်မ့ၢ်ဆီဟံၣ်ဆီဃီ ဒီးပှၤလၢအတဘူၣ်ထီၣ်ဘါထီၣ် ယဟိဝၤယွၤန့ၣ် ဂ့ၤန့ၢ်ဒံးတၢ်တူၢ်ဘၣ် တၢ်အိၣ်သယုၢ်သညိလီၤ. ဘၣ်ဆၣ် အါတက့ၢ်ပှၤလၢအကွၢ်ကပာ်ကွံာ်ဝဲ လံာ်စီဆှံအတၢ်ဟံးစုနဲၣ်ကျဲန့ၣ် အဝဲသ့ၣ်ထံၣ်ဘၣ်ထဲ တၢ်သူၣ်အုးသးအုးဒီး တၢ်ကီတၢ်ခဲတဖၣ်လီၤ. ခီဖျိပမ့ၢ် ယဟိဝၤယွၤအခ့အပှၤအဃိ တၢ်လၢအရ့ဒိၣ်ကတၢၢ်လၢ ပတၢ်အိၣ်မူအပူၤန့ၣ် မ့ၢ်ဝဲယဟိဝၤယွၤအတၢ်မၤလီၤ. မ့မ့ၢ်ဒ်န့ၣ်န့ၣ် နမၤသကိးယဟိဝၤယွၤအတၢ်မၤ ဒီးနသးသမူတံၤသကိးမ့ၢ်တန့ၢ်ဘၣ်န့ၣ် မ့ၢ်နကတူၢ်ဘၣ်ဒ်လဲၣ်. ပှၤအါဂၤဆၢတဲာ်လီၤအသးလၢ အဝဲသ့ၣ်ဃုပှၤလၢ အဘူၣ်ထီၣ်ဘါထီၣ် ဒီးအဲၣ်ယဟိဝၤယွၤ မ့ၢ်တဘၣ်ဘၣ်န့ၣ် အဝဲသ့ၣ်ကအိၣ်သဘျ့ဝဲလီၤ.—ဖး စံးထီၣ်ပတြၢၤ ၃၂:၈ တက့ၢ်.
၁၁. ဒ်သိးနဃုထၢ သးသမူတံၤသကိးလၢအဂ့ၤ ကသ့အဂီၢ် နကဘၣ်မၤဒ်လဲၣ်.
၁၁ ကယဲၢ်ပှၤလၢ အဘူၣ်ထီၣ်ဘါထီၣ်ယဟိဝၤယွၤန့ၣ် တမ့ၢ်အကကဲထီၣ် နသးသမူတံၤသကိး လၢအကြၢးဒီးနၤ ကိးဂၤဒဲးဘၣ်. နမ့ၢ်ဆိကမိၣ်လၢ နကဆီဟံၣ်ဆီဃီန့ၣ် နကြၢးဃုထၢပှၤလၢနအဲၣ် ဒီးရ့အီၤညီတဂၤလီၤ. အိၣ်ခိးတုၤလၢ နထံၣ်န့ၢ်ပှၤတဂၤလၢ အနီၢ်သးဖီတၢၣ်တဖၣ် ဒီးအတၢ်အဲၣ်ကစၢ်ယွၤ အိၣ်ဒ်သိးဒီးနၤတက့ၢ်. ဘၣ်ဃးဒီးတၢ်ဆီဟံၣ်ဆီဃီအဂ့ၢ်န့ၣ် ကုၢ်လၢအကလုၢ်တီဒီးကူၣ်တၢ်သ့ ကတဲာ်ကတီၤန့ၢ်ပှၤ လံာ်လဲၢ်အါမးအဃိ ဟံးန့ၢ်တၢ်ဆၢကတီၢ်လၢ နကဖးတၢ်ဂ့ၢ်တဖၣ်အံၤတက့ၢ်.—ဖး စံးထီၣ်ပတြၢၤ ၁၁၉:၁၀၅ တက့ၢ်.
၁၂. ဘၣ်ဃးဒီး လုၢ်လၢ်လၢ မိၢ်ပၢ်တဖၣ်ဃုထၢန့ၢ် အဖိအသးသမူတံၤသကိးန့ၣ် လံာ်စီဆှံသိၣ်လိပှၤဒ်လဲၣ်.
၁၂ လၢတၢ်လီၢ်တနီၤနီၤန့ၣ် လုၢ်လၢ်အိၣ်ဝဲလၢ မိၢ်ပၢ်တဖၣ်ဃုထၢန့ၢ် အဖိအသးသမူတံၤသကိးလီၤ. ပှၤအါဂၤတူၢ်လိာ်ဝဲလုၢ်လၢ်ဒ်အံၤ မ့ၢ်လၢအဝဲသ့ၣ်ဆိကမိၣ်ဝဲလၢ အမိၢ်ပၢ်န့ၣ် ကဃုထၢတၢ်လၢအဂ့ၤကတၢၢ်လၢ အဝဲသ့ၣ်အဂီၢ်လီၤ. လၢလံာ်စီဆှံအပူၤန့ၣ် ပထံၣ်ဘၣ်လၢ ပှၤလၢညါတဖၣ်စ့ၢ်ကီး မၤထွဲဝဲလုၢ်လၢ်တခါအံၤလီၤ. အဃိ နဟံၣ်ဖိဃီဖိမ့ၢ်အဲၣ်ဒိး မၤထွဲလုၢ်လၢ်အံၤန့ၣ် လံာ်စီဆှံမၤစၢၤမိၢ်ပၢ်တဖၣ် ဒ်သိးအဝဲသ့ၣ် ကဃုထၢန့ၢ်အဖိအသးသမူတံၤသကိးလၢအဂ့ၤတဂၤ ကသ့အဂီၢ်လီၤ. အဒိ ဖဲစီၤအၤဘြၤဟၣ် ဃုန့ၢ်အဖိခွါစီၤအံၤစဲးအမါအခါ ကျိၣ်စ့ဒီးတၢ်အိၣ်မူအပတီၢ်န့ၣ် တမ့ၢ်တၢ်လၢအရ့ဒိၣ်လၢ စီၤအၤဘြၤဟၣ်အဂီၢ်ဘၣ်. လၢတၢ်န့ၣ်အလီၢ် အဝဲဂုာ်ကျဲးစၢးဃုန့ၢ် စီၤအံၤစဲးအမါလၢ ပှၤလၢအအဲၣ် ယဟိဝၤယွၤအကျါန့ၣ်လီၤ—၁ မိၤၡ့ ၂၄:၃, ၆၇; ကွၢ်တၢ်ဂ့ၢ် ၂၅ လၢလံာ်အကတၢၢ်တက့ၢ်.
နမ့ၢ်အဲၣ်ဒိးဆီဟံၣ်ဆီဃီန့ၣ် နအိၣ်ကတဲာ်ကတီၤပာ်စၢၤနသးကသ့ဒ်လဲၣ်
၁၃-၁၅. (က) ပိာ်ခွါတဂၤ အိၣ်ကတဲာ်ကတီၤအသးလၢ ကကဲထီၣ်ဝၤလၢ အဂ့ၤတဂၤကသ့ဒ်လဲၣ်. (ခ) ပိာ်မုၣ်တဂၤ အိၣ်ကတဲာ်ကတီၤအသးလၢ ကကဲထီၣ်မါလၢအဂ့ၤတဂၤ ကသ့ဒ်လဲၣ်.
၁၃ နမ့ၢ်အဲၣ်ဒိး ဆီဟံၣ်ဆီဃီန့ၣ် နကြၢးအိၣ်ကတဲာ်ကတီၤ ဆိပာ်စၢၤနသးလီၤ. ဘၣ်သ့ၣ်သ့ၣ် နကဆိကမိၣ်လၢ နအိၣ်ကတဲာ်ကတီၤဆိပာ်စၢၤ နသးလံ. ဘၣ်ဆၣ် ဒ်သိးနကအိၣ်ကတဲာ်ကတီၤနသးလၢ နကဆီဟံၣ်ဆီဃီအဂီၢ် နကဘၣ်မၤဒ်လဲၣ်န့ၣ် ခဲအံၤပကဃုသ့ၣ်ညါအါထီၣ် ဘၣ်ဃးဒီးတၢ်ဂ့ၢ်အံၤလီၤတံၢ်လီၤဆဲးလီၤ.
ဟံးန့ၢ်တၢ်ဆၢကတီၢ်လၢ နကဖးဒီးဆိကမိၣ်ထံ တၢ်ဟ့ၣ်ကူၣ်ဘၣ်ဃးဒီး တၢ်ဆီဟံၣ်ဆီဃီ လၢကစၢ်ယွၤ အကလုၢ်ကထါအပူၤတက့ၢ်
၁၄ လံာ်စီဆှံ ပာ်ဖျါထီၣ်ဝဲလၢ မါဒီးဝၤခံဂၤ အမူဒါလၢ ဟံၣ်ဖိဃီဖိအပူၤန့ၣ် တဒ်သိးလိာ်အသးဘၣ်. လၢတၢ်န့ၣ်အဃိ ပိာ်မုၣ်ဒီး ပိာ်ခွါတဖၣ် ကဘၣ်အိၣ် ကတဲာ်ကတီၤအသး ဒ်လဲၣ်ဒ်လဲၣ်န့ၣ် တဒ်သိးလိာ်အသးဘၣ်. ပိာ်ခွါတဂၤ မ့ၢ်အဲၣ်ဒိးဆီဟံၣ်ဆီဃီန့ၣ် အဝဲကြၢးသံကွၢ်လီၤအသးလၢ မ့ၢ်ယဟံးထီၣ်ဖီၣ်ထီၣ် ဟံၣ်ခိၣ်အမူဒါ န့ၢ်လံဧါ. ယဟိဝၤယွၤအဲၣ်ဒိးဝဲလၢ ဝၤန့ၣ်ကကဟုကယာ်အဖိအမါ ဒီးလုၢ်အီၣ်အဝဲသ့ၣ်လၢ နီၢ်ခိတခီန့ၣ်လီၤ. တကးဒံးဘၣ် တၢ်လၢအရ့ဒိၣ်ကတၢၢ်န့ၣ် ဝၤကဘၣ်တီခိၣ်ရိၤမဲဝဲလၢ အဟံၣ်ဖိဃီဖိတဖၣ် ကဘူၣ်ထီၣ်ဘါထီၣ် ကစၢ်ယွၤအဂီၢ်စ့ၢ်ကီးလီၤ. လံာ်စီဆှံပာ်ဖျါထီၣ်ဝဲလၢ ပိာ်ခွါတဂၤ မ့ၢ်တအံးထွဲကွၢ်ထွဲ အဟံၣ်ဖိဃီဖိန့ၣ်အဝဲ “အၢန့ၢ်ပှၤတနာ်ဘၣ်တၢ်” တဂၤန့ၣ်လီၤ. (၁ တံၤမသ့း ၅:၈) လၢတၢ်န့ၣ်အဃိ နမ့မ့ၢ်ပိာ်ခွါတဂၤလၢ အအဲၣ်ဒိးဆီဟံၣ်ဆီဃီန့ၣ် ဆိကမိၣ်ထံ လံာ်စီဆှံအတၢ်ဟံးစုနဲၣ်ကျဲ တခါအံၤတက့ၢ်. “ကတဲာ်ကတီၤနတၢ်မၤလၢခိ, ဒီးမၤတၢ်လၢစံာ်ဧိၤပှဲၤဧိၤအပူၤတက့ၢ်. လၢခံက့ၤဒီးသူၣ်ထီၣ်နဟံၣ်တက့ၢ်.” လၢတၢ်န့ၣ်အဃိ တချုးလၢနဆီဟံၣ်ဆီဃီဒံးဘၣ်န့ၣ် နကဘၣ်ဆိကမိၣ်ထံ ဘၣ်ဃးဒီး ယဟိဝၤယွၤအဲၣ်ဒိးလၢ နကကဲထီၣ်ဝၤ ဒ်လဲၣ်တဂၤလဲၣ် ဒီးနကဘၣ်ဂုာ်ကျဲးစၢး ဒ်သိးနကတုၤထီၣ်ထီၣ်ဘးလၢ နကဆီဟံၣ်ဆီဃီအဂီၢ်လီၤ.—ကတိၤဒိ ၂၄:၂၇.
၁၅ မ့မ့ၢ်ပိာ်မုၣ်တဂၤလၢ အအဲၣ်ဒိးဆီဟံၣ်ဆီဃီန့ၣ် အဝဲကဘၣ်သံကွၢ်လီၤအသးလၢ မ့ၢ်ယဟံးထီၣ်ဖီၣ်ထီၣ် မါဒီးမိၢ်အမူဒါန့ၢ်လံဧါ. လံာ်စီဆှံပတြၢၤဝဲ မါလၢအဂ့ၤတဂၤလၢ အကွၢ်ထွဲအဖိဒီးအဝၤ လၢကျဲအါဘိန့ၣ်လီၤ. (ကတိၤဒိ ၃၁:၁၀-၃၁) မုၢ်မဆါတနံၤညါအံၤ ပိာ်မုၣ်ဒီးပိာ်ခွါအါဂၤ ဆိကမိၣ်ဝဲထဲ ယမ့ၢ်ဆီဟံၣ်ဆီဃီန့ၣ် ယသးသမူတံၤသကိး ကကဲထီၣ်တၢ်မၤစၢၤလၢယဂီၢ်ဒ်လဲၣ်. ဘၣ်ဆၣ် ယဟိဝၤယွၤ အဲၣ်ဒိးလၢပကဆိကမိၣ် ဘၣ်ဃးဒီး ပကဲထီၣ်တၢ်မၤစၢၤလၢ ပသးသမူတံၤသကိးအဂီၢ် ကသ့ဒ်လဲၣ်.
၁၆, ၁၇. နမ့ၢ်အဲၣ်ဒိးဆီဟံၣ်ဆီဃီန့ၣ် နကဘၣ်ဆိကမိၣ်ထံ တၢ်ဂ့ၢ်မနုၤလဲၣ်.
၁၆ တချုးလၢ နဆီဟံၣ်ဆီဃီန့ၣ် နကြၢးဆိကမိၣ်ထံ မူဒါလၢ ယဟိဝၤယွၤဟ့ၣ်လီၤဝဲ မါဒီးဝၤန့ၣ်လီၤ. အဒိ ပိာ်ခွါတဂၤကကဲထီၣ်ဟံၣ်ခိၣ်န့ၣ် အခီပညီတမ့ၢ်လၢ အဝဲကြၢးပၢဆူၣ် မ့တမ့ၢ် မၤနၢၤအဟံၣ်ဖိဃီဖိတဖၣ်ဘၣ်. ဟံၣ်ခိၣ်လၢအဂ့ၤတဂၤ ကဘၣ်ကွၢ်လိမၤဒိးဝဲ ယ့ၣ်ၡူးန့ၣ်လီၤ. ဒီးပထံၣ်ဘၣ်လၢ ထီဘိန့ၣ် ယ့ၣ်ၡူးပာ်ဖျါထီၣ်ဝဲ တၢ်အဲၣ်ဒီးတၢ်သးကညီၤ လၢအပျဲၢ်အဘီၣ်တဖၣ်အဖီခိၣ်န့ၣ်လီၤ. (အ့းဖ့းစူး ၅:၂၃) မ့မ့ၢ်ပိာ်မုၣ်တဂၤန့ၣ် ကဘၣ်နၢ်ပၢၢ်လၢ အဝဲကဘၣ်ဆီၣ်ထွဲ အဝၤအတၢ်ဆၢတဲာ်တဖၣ် ဒီးကဘၣ်မၤသကိးတၢ်ဒီးအီၤ လၢတၢ်ဆီၣ်လီၤသးအပူၤလီၤ. (ရိမ့ၤ ၇:၂) ဒီးအဝဲကဘၣ် သံကွၢ်လီၤအသးလၢ မ့ၢ်ယဒိးပၢယသးလၢ ပိာ်ခွါလၢအတလၢတပှဲၤတဂၤအံၤ အဖီလာ်ကကဲဧါ. အဝဲမ့ၢ်ဆိကမိၣ်လၢ အမၤဝဲတကဲဘၣ်န့ၣ် ဘၣ်သ့ၣ်သ့ၣ် အဝဲကဆၢတဲာ်လီၤအသးလၢ ကအိၣ်သဘျ့ဒံးလီၤ.
၁၇ ပှၤနီၢ်ဒီမါဝၤတဖၣ် ကဘၣ်ပာ်ဆိ အသးသမူတံၤသကိး အတၢ်လိၣ်ဘၣ်တဖၣ် လၢညါန့ၣ်လီၤ. (ဖး ဖံလံးပံၤ ၂:၄ တက့ၢ်.) စီၤပီလူးကွဲးဝဲလၢ “သုဝဲဒၣ်အံၤ, ဒ်သုအဲၣ်လီၤသုသးအသိး, တဂၤအဲၣ်အမါ, တဂၤအဲၣ်အမါဒၣ်ဝဲတက့ၢ်. ဒီးပိာ်မုၣ်န့ၣ် မ်အယူးယီၣ်အဝၤတက့ၢ်.” (အ့းဖ့းစူး ၅:၂၁-၃၃) မါဒီးဝၤခံဂၤလၢာ် ကဘၣ်ပာ်ကဲလိာ်အသးဒီး အဲၣ်လိာ်အသးလီၤ. ဘၣ်ဆၣ် ဒ်သိးအဝဲသ့ၣ်အတၢ်ဆီဟံၣ်ဆီဃီ ကလဲၤအသးဘျ့ဘျ့ဆှီဆှီအဂီၢ် ဝၤန့ၣ်ကဘၣ်တူၢ်ဘၣ်ဝဲလၢ အမါပာ်ကဲအီၤ လီၤလီၤဆီဆီ ဒီးမါန့ၣ်ကဘၣ်တူၢ်ဘၣ်ဝဲလၢ အဝၤအဲၣ်အီၤလီၤလီၤဆီဆီန့ၣ်လီၤ.
၁၈. ဖဲပှၤခံဂၤပာ်တၢ်အဲၣ်တီအခါ ဘၣ်မနုၤအဃိ အဝဲသ့ၣ် ကဘၣ်ပလီၢ်အသးလဲၣ်.
၁၈ ဖဲပှၤခံဂၤ ပာ်တၢ်အဲၣ်တီအခါ မ့ၢ်တၢ်ဆၢကတီၢ်လၢ အလီၤသူၣ်ဖှံသးညီ ဒီးအဝဲသ့ၣ်ကဃုသ့ၣ်ညါ အါထီၣ်လိာ်အဂ့ၢ် တဂၤဒီးတဂၤလီၤ. ဘၣ်ဆၣ် မ့ၢ်အဝဲသ့ၣ်ကအဲၣ်ဒိး အိၣ်ဒ်သိးသိး တစိၤသးအနီၢ်ကီၢ်ဧါ. ဒ်သိးအဝဲသ့ၣ် ကသ့ၣ်ညါအဂီၢ် အဝဲသ့ၣ်ကဘၣ်ဆိကမိၣ်ထံတၢ် လီၤတံၢ်လီၤဆဲး ဒီးတဲသကိးတၢ်ပျီပျီလီၤ. ဖဲအဝဲသ့ၣ်ပာ်တၢ်အဲၣ်တီအခါ အဝဲသ့ၣ်ကရ့လိာ်အသး ဒီးကဃုသ့ၣ်ညါ တၢ်အိၣ်လၢအတၢ်အဲၣ်တီ အသးပူၤအနီၢ်ကီၢ်လီၤ. ဒ်အဝဲသ့ၣ် အတၢ်အဲၣ်ဒိၣ်ထီၣ်အသိး အဝဲသ့ၣ် ကအဲၣ်ဒိးပာ်ဖျါထီၣ်တၢ်အဲၣ် ဒီးကအဲၣ်ဒိးအိၣ်ဘူးလိာ်အသးလီၤ. ဘၣ်ဆၣ် တချုးလၢ အဝဲသ့ၣ်ဖျီအသးဒံးဘၣ်န့ၣ် အဝဲသ့ၣ် ကဘၣ်အိၣ်ဒီး တၢ်ကီၤသူၣ်ကီၤသး ဒ်သိးအသုတမၤတၢ်လၢ အတကြၢးတဘၣ်တဂ့ၤအဂီၢ်န့ၣ်လီၤ. အဝဲသ့ၣ် မ့ၢ်အဲၣ်လိာ်အသးနီၢ်ကီၢ်န့ၣ် ကအိၣ်ဒီးတၢ်ကီၤသူၣ်ကီၤသး ဒ်သိးအဝဲသ့ၣ်ခံဂၤ အတၢ်ရ့လိာ်သး သုတဘၣ်ဒိတဂ့ၤအဂီၢ်လီၤ. တကးဒံးဘၣ် ပှၤလၢအအဲၣ်လိာ် အသးနီၢ်ကီၢ်န့ၣ် ကဟးဆှဲးတၢ်လၢ အကမၤဘၣ်ဒိ အတၢ်ရ့လိာ်သးဒီး ယဟိဝၤယွၤလီၤ.—၁ သ့းစၤလနံ ၄:၆.
ဖဲပိာ်မုၣ်ဒီးပိာ်ခွါ ပာ်တၢ်အဲၣ်တီအခါ အဝဲသ့ၣ်ကဃုသ့ၣ်ညါ အါထီၣ်လိာ်အသး တဂၤဒီးတဂၤ
ဒ်သိး ယတၢ်ဆီဟံၣ်ဆီဃီ ကဂၢၢ်ကျၢၤအဂီၢ် ယကဘၣ်မၤဒ်လဲၣ်
၁၉, ၂၀. ခရံာ်ဖိတဖၣ် ထံၣ်ဝဲအတၢ်ဆီဟံၣ်ဆီဃီဒ်လဲၣ်.
၁၉ မုၢ်မဆါတနံၤအံၤ လံာ်လဲၢ်တနီၤဒီး တၢ်ဂီၤမူတနီၤ မၤကတၢၢ်ကွံာ်ဝဲ အပူလၢ ပှၤခံဂၤဖျီအသးပှဲၤဒီး တၢ်သးခုလီၤ. နီၢ်နီၢ်န့ၣ် တၢ်ဒိးတ့ဒိးဖျီသးန့ၣ် မ့ၢ်ဒၣ်တၢ်သူၣ်ထီၣ် တၢ်အိၣ်မူအခီၣ်ထံးခီၣ်ဘိလီၤ. ဒီးယဟိဝၤယွၤ အဲၣ်ဒိးဝဲလၢ နီၢ်ဒီမါဝၤ အတၢ်ဆီဟံၣ်ဆီဃီ ကအိၣ်ဂၢၢ်ကျၢၤဝဲ တစိၤသးလီၤ.—၁ မိၤၡ့ ၂:၂၄.
၂၀ ဘၣ်ဆၣ် မုၢ်မဆါတနံၤအံၤ ပှၤအါဂၤထံၣ်ဝဲလၢ တၢ်ဆီဟံၣ်ဆီဃီန့ၣ် မ့ၢ်တၢ်တစိၢ်တလီၢ်လီၤ. အဝဲသ့ၣ် ဖျီအသးညီညီဒီး မၤလီၤဖးအသးညီညီလီၤ. ပှၤတနီၤဆိကမိၣ်ဝဲလၢ တၢ်ကီတၢ်ခဲ မ့ၢ်ဟဲအိၣ်ထီၣ်န့ၣ် အဝဲသ့ၣ်ကြၢးလီၤဖးဝဲလီၤ. ဘၣ်ဆၣ် ပကဘၣ်သ့ၣ်နီၣ်ထီၣ်က့ၤလၢ လံာ်စီဆှံဒိလီၤဝဲတၢ်ဆီဟံၣ်ဆီဃီ ဒ်ပျံၤပိၤအသးသၢဘိလၢ အထီၣ်တဲာ်တညီဘၣ်. ပမ့ၢ်သန့ၤပသးလၢ ယဟိဝၤယွၤန့ၣ် ပတၢ်ဆီဟံၣ်ဆီဃီ အိၣ်ဂၢၢ်ကျၢၤသ့ဝဲလီၤ. ဒ်ယ့ၣ်ၡူးတဲဝဲအသိး “တၢ်လၢယွၤပာ်ဃုာ်ဝဲန့ၣ်, မ်ပှၤကညီသုတထုးဖှၣ်တဂ့ၤ.”—မးသဲ ၁၉:၆.
၂၁. ဒ်သိးနီၢ်ဒီမါဝၤ ကအဲၣ်လိာ်အသးအဂီၢ် တၢ်မနုၤကမၤစၢၤအဝဲသ့ၣ်လဲၣ်.
၂၁ ပဝဲခဲလၢာ် ဒ်ပတၢ်ဂ့ၤတၢ်ဝါအိၣ်ဝဲအသိးန့ၣ် ပတၢ်ဂံၢ်စၢ်ဘါစၢ် အိၣ်ဝဲစ့ၢ်ကီးလီၤ. ပှၤဂၤ အတၢ်ဂံၢ်စၢ်ဘါစၢ် လီၤဆီဒၣ်တၢ် ပသးသမူတံၤသကိး အတၢ်ဂံၢ်စၢ်ဘါစၢ်န့ၣ် ပထံၣ်အီၤညီဝဲလီၤ. ဘၣ်ဆၣ် ပမ့ၢ်မၤဒ်အံၤန့ၣ် ပသးတခုလၢၤဘၣ်. ပမ့ၢ်ကွၢ်လၢပသးသမူတံၤသကိး အတၢ်ဂ့ၤတခီန့ၣ် ပတၢ်ဆီဟံၣ်ဆီဃီ ကပှဲၤဒီးတၢ်သးခုလီၤ. မ့ၢ်ပမၤဒ်အံၤ ကန့ၢ်စ့ၢ်ကီးဧါ. န့ၢ်ဝဲလီၤ. အဒိ ပတလၢတပှဲၤ ဘၣ်ဆၣ် ပနာ်လၢ ယဟိဝၤယွၤကထံၣ်ပှၤ လၢအဂ့ၤတခီထီဘိလီၤ. အဝဲမ့ၢ်တထံၣ်ပှၤဒ်န့ၣ်ဘၣ်န့ၣ် ပတၢ်မုၢ်လၢ်တအိၣ်နီတဂၤဘၣ်. ပှၤကွဲးထါစံးထီၣ်ပတြၢၤ သံကွၢ်ဝဲလၢ “ယွၤဧၢ, နမ့ၢ်ကွၢ်ဟုၣ် ပလီၤကမၣ်တၢ်ဒီး, ကစၢ်ဧၢ, မ့ၢ်မတၤ ကဆၢထၢၣ်တဂၤလဲၣ်.” (စံးထီၣ်ပတြၢၤ ၁၃၀:၃) မါဒီးဝၤန့ၣ် ကွၢ်လိမၤဒိးဝဲ ယဟိဝၤယွၤသ့ခီဖျိလၢ အဝဲသ့ၣ် ထံၣ်အသးသမူတံၤသကိးလၢအဂ့ၤတခီ ဒီးပျၢ်လိာ်သးအတၢ်ကမၣ် တဂၤဒီးတဂၤလၢအဆိအချ့န့ၣ်လီၤ.—ဖး ကလီးစဲ ၃:၁၃ တက့ၢ်.
၂၂, ၂၃ မုၢ်မဆါတနံၤအံၤ ပှၤနီၢ်ဒီမါဝၤတဖၣ် ဟံးန့ၢ်တၢ်မၤလိလၢ စီၤအၤဘြၤဟၣ်ဒီးနီၢ်စၤရါအအိၣ်သ့ဒ်လဲၣ်.
၂၂ ပဆီဟံၣ်ဆီဃီအနံၣ်မ့ၢ်ယံာ်ထီၣ်န့ၣ် ပတၢ်သူၣ်ဖှံသးညီဒီး တၢ်သူၣ်မံသးမုာ် အါထီၣ်သ့ဝဲလီၤ. အဒိ နီၢ်စၤရါဒီးစီၤအၤဘြၤဟၣ် ဆီဟံၣ်ဆီဃီအနံၣ်ဖးယံာ်ဘၣ်ဆၣ် အဝဲသ့ၣ်ပှဲၤဒီး တၢ်သူၣ်ဖှံသးညီလီၤ. ဘၣ်တဘျီ ယဟိဝၤယွၤတဲဘၣ် စီၤအၤဘြၤဟၣ်လၢ အဝဲသ့ၣ်ကဘၣ်ပာ်တ့ၢ် အဟံၣ်အဃီလၢ ဝ့ၢ်အူၢ်အပူၤလီၤ. ဖဲန့ၣ်အခါ ဖျါလၢနီၢ်စၤရါအိၣ်အနံၣ် ၆၀ ဘျဲၣ်လံ. နီၢ်စၤရါကဘၣ်ပာ်တ့ၢ်ကွံာ် အဟံၣ်လၢအဂ့ၤ ဒီးဘၣ်လဲၤအိၣ်လၢဒဲပူၤန့ၣ် ကကီလၢအဂီၢ်ထဲလဲၣ် ဆိကမိၣ်ကွၢ်တက့ၢ်. ဘၣ်ဆၣ် နီၢ်စၤရါမ့ၢ်ပှၤတဂၤလၢ အမၤစၢၤအဝၤ, လီၤဂာ်ဒ်အဝၤအတံၤသကိးလၢအဂ့ၤတဂၤ ဒီးအဝဲပာ်ကဲအဝၤနီၢ်ကီၢ်လီၤ. လၢတၢ်န့ၣ်အဃိ ဒ်သိးအဝၤအတၢ်ဆၢတဲာ်တဖၣ် ကကဲထီၣ်လိၣ်ထီၣ်အဂီၢ် နီၢ်စၤရါဆီၣ်ထွဲမၤစၢၤအီၤလီၤ.—၁ မိၤၡ့ ၁၈:၁၂; ၁ ပ့းတရူး ၃:၆.
၂၃ ပတၢ်ဆီဟံၣ်ဆီဃီ မ့ၢ်ပှဲၤဒီးတၢ်သးခုသနာ်က့ တမ့ၢ်လၢ မါဒီးဝၤအတၢ်ထံၣ် ကလီၤပလိာ်လိာ်အသးထီဘိဘၣ်. ဘၣ်တဘျီ ဖဲစီၤအၤဘြၤဟၣ် အတၢ်ထံၣ်တလီၤပလိာ်လိာ်အသးဒီး နီၢ်စၤရါအတၢ်ထံၣ်အခါ ယဟိဝၤယွၤတဲဘၣ် စီၤအၤဘြၤဟၣ်လၢ “ကနၣ်အကလုၢ်တက့ၢ်.” စီၤအၤဘြၤဟၣ်မၤထွဲဝဲဒ် ကစၢ်ယွၤတဲဝဲအသိး ဒီးအဘျုးအိၣ်ဝဲလီၤ. (၁ မိၤၡ့ ၂၁:၉-၁၃) တဘျီတခီၣ် နၤဒီးနသးသမူတံၤသကိး အသးမ့ၢ်တလီၤပလိာ်လိာ်အသးသနာ်က့ တဘၣ်သးဟးဂီၤတဂ့ၤ. ဖဲသုသးတလီၤပလိာ်အခါ တၢ်လၢအရ့ဒိၣ်ကတၢၢ်န့ၣ်မ့ၢ်ဝဲ သုကဘၣ်ဆဲးရ့လိာ်သးလၢ တၢ်အဲၣ်တၢ်ကွံဒီး တၢ်ပာ်ကဲအပူၤလီၤ.
စးထီၣ်လၢနီၢ်ဒီမါဝၤ ဆီဟံၣ်ဆီဃီသီသီန့ၣ် ကစၢ်ယွၤအကလုၢ်ကထါ ကဘၣ်မ့ၢ်တၢ်လၢအရ့ဒိၣ် လၢအဝဲသ့ၣ်အဂီၢ်
၂၄. ဒ်သိးပတၢ်ဆီဟံၣ်ဆီဃီ ကမၤလၤကပီၤ ယဟိဝၤယွၤအဂီၢ် ပကဘၣ်မၤဒ်လဲၣ်.
၂၄ လၢခရံာ်ဖိ တၢ်အိၣ်ဖှိၣ်အပူၤ ဟံၣ်ဖိဃီဖိလၢ အကထိတဖၣ် အိၣ်ဒီးဟံၣ်မုာ်ဃီပၢၤလီၤ. အဃိ နမ့ၢ်အဲၣ်ဒိးဆီဟံၣ်ဆီဃီန့ၣ် နကဘၣ်သ့ၣ်နီၣ်ထီၣ်လၢ နကဃုထၢနသးသမူတံၤသကိး လၢပှၤဒ်လဲၣ်တဂၤလဲၣ်န့ၣ် မ့ၢ်တၢ်ဆၢတဲာ်လၢ အရ့ဒိၣ်ကတၢၢ်တခါလီၤ. နတၢ်ဃုထၢအံၤ ကဲဘျုးလၢနဂီၢ် မ့တမ့ၢ် မၤဘၣ်ဒိနၤလၢ နသးသမူဒီတစိၤသ့ဝဲလီၤ. လၢတၢ်န့ၣ်အဃိ ဖဲနကဃုထၢပှၤတဂၤဂၤလၢ နသးသမူတံၤသကိးအခါ နကဘၣ်ဃုထံၣ်န့ၢ် တၢ်ဟ့ၣ်ကူၣ်လၢ ယဟိဝၤယွၤအအိၣ်န့ၣ်လီၤ. နမ့ၢ်မၤဒ်န့ၣ်န့ၣ် နဃုထၢနသးသမူတံၤသကိး လၢတၢ်ကူၣ်သ့အပူၤကသ့ဝဲလီၤ. ဒီးတၢ်ဟ့ၣ်ကူၣ်တဖၣ်အံၤ ကမၤစၢၤနၤလၢ နကအိၣ်ကတဲာ်ကတီၤပာ်စၢၤနသးလၢ တၢ်ဆီဟံၣ်ဆီဃီအဂီၢ်လီၤ. တကးဒံးဘၣ် ခါဆူညါနကဂုာ်ကျဲးစၢး ဒ်သိးနတၢ်ဆီဟံၣ်ဆီဃီ ကပှဲၤဒီးတၢ်အဲၣ်တၢ်ကွံ ဒီးကမၤလၤကပီၤ ယဟိဝၤယွၤအဂီၢ်လီၤ.