ကစၢ်ယွၤ မ့ၢ်မတဂၤလဲၣ်

စးထီၣ်လၢ ပှၤဟီၣ်ခိၣ်ဖိ အိၣ်မူလၢဟီၣ်ခိၣ်ချၢန့ၣ် အဝဲသ့ၣ် ဘူၣ်ထီၣ်ဘါထီၣ်ဝဲ ယွၤတဖၣ် ဒီးကစၢ်မုၣ်အါမး. ဘၣ်ဆၣ် လံာ်စီဆှံ တဲဖျါထီၣ် ဘၣ်ဃးဒီး ကစၢ်ယွၤတဂၤလၢအ “ဒိၣ်န့ၢ်ဒံး ယွၤအဂၤခဲလၢာ်.” (၂ ကွဲးနီၣ်တၢ် ၂:၅) ကစၢ်ယွၤတဂၤန့ၣ် အဝဲကဲ မတဂၤလဲၣ်. ဘၣ်မနုၤအဃိ အဒိၣ်န့ၢ်ဒံး ယွၤအဂၤတဖၣ် လၢပှၤဟီၣ်ခိၣ်ဖိ ဘူၣ်ထီၣ်ဘါထီၣ်ဝဲန့ၣ်လဲၣ်. လၢတၢ်မၤလိအံၤအပူၤ နကမၤလိဘၣ်လၢ ကစၢ်ယွၤတဂၤအံၤ အဲၣ်ဒိးလၢ နကသ့ၣ်ညါအီၤ.

၁. ကစၢ်ယွၤအမံၤဒ်လဲၣ်. ဘၣ်မနုၤအဃိ ပနာ်သ့လၢ အဝဲအဲၣ်ဒိးလၢ ပသ့ၣ်ညါအမံၤလဲၣ်.

ကစၢ်ယွၤ ပာ်ဖျါထီၣ်န့ၢ်ပှၤအမံၤ လၢလံာ်စီဆှံအပူၤလီၤ. ကစၢ်ယွၤ တဲဝဲလၢ “ယမ့ၢ် ယဟိဝၤလီၤ. အဝဲန့ၣ် မ့ၢ်ဝဲယမံၤလီၤ.” (ဖး ယၡါယၤ ၄၂:​၅, ၈.) လၢဧ့ၤဘြံၤကျိာ်န့ၣ် မံၤလၢအမ့ၢ် “ယဟိဝၤ” န့ၣ်ဖျါလၢအခီပညီမ့ၢ်ဝဲ “အဝဲဒုးကဲထီၣ်တၢ်.” ယဟိဝၤယွၤန့ၣ် အအဲၣ်ဒိးလၢ ပသ့ၣ်ညါအမံၤလီၤ. (၂ မိၤၡ့ ၃:၁၅) ဘၣ်မနုၤအဃိ ပနာ်သ့လၢ အအဲၣ်ဒိးလၢ ပသ့ၣ်ညါအမံၤလဲၣ်. လၢလံာ်စီဆှံပူၤန့ၣ် ကစၢ်ယွၤအမံၤ အိၣ်ဝဲအဘျီ နွံကထိဘျဲၣ်ညါ.a ဒီးမံၤလၢအမ့ၢ် ယဟိဝၤန့ၣ် အကဲဝဲ “ယွၤလၢ အမ့ၢ်အတီတဂၤ လၢမူခိၣ်ဒီးဟီၣ်ခိၣ် အဖီခိၣ်” န့ၣ်အမံၤလီၤ.​—၅ မိၤၡ့ ၄:၃၉.

၂. ဘၣ်ဃးဒီး ယဟိဝၤယွၤန့ၣ် လံာ်စီဆှံတဲဝဲဒ်လဲၣ်.

လံာ်စီဆှံတဲဝဲလၢ ယွၤတဖၣ် လၢပှၤဟီၣ်ခိၣ်ဖိ ဘူၣ်ထီၣ်ဘါထီၣ်ဝဲ ခဲလၢာ်အကျါန့ၣ် ယဟိဝၤယွၤ မ့ၢ်ကစၢ်ယွၤလၢ အမ့ၢ်အတီ ထဲတဂၤလီၤ. ဘၣ်မနုၤအဃိ လံာ်စီဆှံတဲဝဲ ဒ်န့ၣ်လဲၣ်. ခီဖျိလၢ တၢ်ဂ့ၢ်အါမံၤအဃိလီၤ. အဒိ ယဟိဝၤယွၤ မ့ၢ်ပှၤလၢအစိအကမီၤ ဒိၣ်ကတၢၢ်အဃိ အဝဲမ့ၢ်ပှၤထဲတဂၤလၢ “အထီကတၢၢ်လၢ ဟီၣ်ခိၣ်ဒီဘ့ၣ်ညါ အဖီခိၣ်.” (ဖး စံးထီၣ်ပတြၢၤ ၈၃:၁၈.) ဒီးလံာ်စီဆှံကိးအီၤလၢ “သ့တၢ်လၢာ်ကစၢ်” အဃိ အဝဲအိၣ်ဒီး တၢ်စိတၢ်ကမီၤလၢ အကမၤတၢ်ကိးမံၤဒဲး လၢအအဲၣ်ဒိးမၤဝဲ. အဝဲ “တ့လီၤတၢ်ခဲလၢာ်” လၢအမ့ၢ် မူခိၣ်ဟီၣ်ခိၣ်ဒီး တၢ်အိၣ်လၢအပူၤခဲလၢာ် ဒီးတၢ်သးသမူခဲလၢာ် လၢဟီၣ်ခိၣ်ချၢ. (လီၣ်ဖျါ ၄:​၈, ၁၁) ယဟိဝၤယွၤန့ၣ် အတဒ်သိးဒီး ယွၤအဂၤတဖၣ်ဘၣ်. အဝဲအိၣ်ဝဲထီဘိ ဒီးအဝဲကဆဲးအိၣ်ဒံး လီၤထူလီၤယိာ်လီၤ.​—စံးထီၣ်ပတြၢၤ ၉၀:၂.

၃. ကစၢ်ယွၤန့ၣ် အမံၤလၤသၣ်ကပီၤ အိၣ်ဝဲအါမး ဘၣ်ဆၣ် အမံၤနီၢ်ကီၢ် အိၣ်ထဲတဖျၢၣ်

ပှၤတဂၤ အမံၤလၤသၣ်ကပီၤ ဒီးအနီၢ်ကစၢ်အမံၤ လီၤဆီလိာ်အသးဒ်လဲၣ်န့ၣ် ဒ်သိးနကသ့ၣ်ညါအဂီၢ် ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.

တၢ်ဂီၤမူ– မံၤလၤသၣ်ကပီၤ အိၣ်ဝဲအါမး ဘၣ်ဆၣ် မံၤနီၢ်ကီၢ် အိၣ်ထဲတဖျၢၣ် (၀:၄၁)

• ကစၢ်ယွၤ အမံၤလၤသၣ်ကပီၤ လၢအမ့ၢ် “ကစၢ်” ဒီးအနီၢ်ကစၢ်အမံၤန့ၣ် လီၤဆီလိာ်အသးဒ်လဲၣ်.

လံာ်စီဆှံ ပာ်ဖျါထီၣ်ဝဲလၢ ပှၤဟီၣ်ခိၣ်ဖိ ဘူၣ်ထီၣ်ဘါထီၣ်ဝဲ ယွၤတဖၣ် ဒီးကစၢ်တဖၣ်အါမး. ဖး စံးထီၣ်ပတြၢၤ ၁၃၆:​၁-၃ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• “ယွၤတဖၣ် အကစၢ်ယွၤ” ဒီး “ကစၢ်တဖၣ် အကစၢ်န့ၣ်” မ့ၢ်မတဂၤလဲၣ်.

၄. ယဟိဝၤယွၤ အဲၣ်ဒိးဝဲလၢ နကသ့ၣ်ညါအမံၤ ဒီးသူအမံၤ

တၢ်ဂီၤမူ– ကစၢ်ယွၤန့ၣ် အမံၤအိၣ်ဧါ​—တၢ်ဂီၤမူဖုၣ်ကိာ် (၃:၁၁)

• နဆိကမိၣ် ယဟိဝၤယွၤ အဲၣ်ဒိးလၢ ပှၤကသ့ၣ်ညါအမံၤဧါ. ဘၣ်မနုၤအဃိ နဆိကမိၣ်ဒ်န့ၣ်လဲၣ်.

ယဟိဝၤယွၤ အဲၣ်ဒိးဝဲလၢ ပကသူအမံၤ. ဖး ရိမ့ၤ ၁၀:၁၃ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ဘၣ်မနုၤအဃိ အရ့ဒိၣ်လၢ ပကသူကစၢ်ယွၤအမံၤ လၢအမ့ၢ် ယဟိဝၤလဲၣ်.

• ပှၤတဂၤ တိၢ်နီၣ်နမံၤမ့ၢ်ဘၣ် ဒီးအမ့ၢ်ကိးထီၣ်နမံၤ လၢတၢ်ယူးယီၣ်ပာ်ကဲအပူၤန့ၣ် နကသးခုဧါ.

• နမ့ၢ်ကိးထီၣ် ကစၢ်ယွၤအမံၤန့ၣ် နဆိကမိၣ် အဝဲကသးခုဧါ.

၅. ယဟိဝၤယွၤ အဲၣ်ဒိးဝဲလၢ နကကဲထီၣ်အသကိး

တၢ်ဂီၤမူ– ယဃုကစၢ်ယွၤ လၢအမ့ၢ်အတီ (၈:၁၈)

• ဒ်တၢ်ဂီၤမူ ပာ်ဖျါထီၣ်ဝဲအသိး စိထဲ သ့ၣ်ညါဘၣ် ကစၢ်ယွၤအမံၤအဃိ ကဲဘျုးလၢ အဂီၢ်ဒ်လဲၣ်.

ပသကိး လၢပရ့အီၤဘူးဘူးတဖၣ်န့ၣ် အါတက့ၢ် ပသ့ၣ်ညါ အဝဲသ့ၣ်အမံၤ. ဖး ယၤကိာ် ၄:၈ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ယဟိဝၤယွၤ အဲၣ်ဒိးဝဲလၢ နကမၤမနုၤလဲၣ်.

• နမ့ၢ်သ့ၣ်ညါဘၣ် ကစၢ်ယွၤအမံၤ ဒီးကိးထီၣ်အမံၤ လၢတၢ်ယူးယီၣ်ပာ်ကဲအပူၤန့ၣ် ကမၤစၢၤနၤလၢ နကဘူးဒိၣ်ထီၣ်ဒီး ကစၢ်ယွၤဒ်လဲၣ်.

တၢ်ဂ့ၢ်လၢအရ့ဒိၣ်

ကစၢ်ယွၤ လၢအမ့ၢ်အတီတဂၤန့ၣ် အမံၤမ့ၢ်ဝဲ ယဟိဝၤ. ဒီးဒ်သိး ပကကဲထီၣ် အသကိးအဂီၢ် အဝဲအဲၣ်ဒိးဝဲလၢ ပကသ့ၣ်ညါအမံၤ ဒီးကိးထီၣ်အမံၤ.

တၢ်ကွၢ်ကဒါက့ၤ

• ဘၣ်မနုၤအဃိ ယဟိဝၤယွၤန့ၣ် အလီၤဆီန့ၢ်ဒံး ယွၤအဂၤတဖၣ် လၢပှၤဟီၣ်ခိၣ်ဖိ ဘူၣ်ထီၣ်ဘါထီၣ်ဝဲန့ၣ်လဲၣ်.

• ဘၣ်မနုၤအဃိ ပကဘၣ်ကိးထီၣ် ကစၢ်ယွၤ အမံၤလဲၣ်.

• ယဟိဝၤယွၤ အဲၣ်ဒိးဝဲလၢ နကကဲထီၣ် အသကိးန့ၣ် နသ့ၣ်ညါဒ်လဲၣ်.

ဃုသ့ၣ်ညါ

ဖးကွၢ် တၢ်အုၣ်သးယဲၢ်ခါ လၢအပာ်ဖျါထီၣ်ဝဲ ကစၢ်ယွၤအိၣ်အနီၢ်ကီၢ်.

“မ့ၢ်ကစၢ်ယွၤအိၣ် အနီၢ်ကီၢ်ဧါ”(တၢ်မၤလိလၢ အအိၣ်လၢ online အဖီခိၣ်)

ဖးကွၢ် ဘၣ်ဃးဒီး ဘၣ်မနုၤအဃိ ပနာ်သ့လၢ ကစၢ်ယွၤအိၣ် အနီၢ်ကီၢ်လဲၣ်.

“ကစၢ်ယွၤန့ၣ် ပှၤတ့လီၤအီၤအိၣ်ဧါ” (တၢးထီခိးတၢ်, လါအီကူး ၁, ၂၀၁၄)

လၢပျၢၤန့ၣ် ပှၤကိးထီၣ် ကစၢ်ယွၤ အမံၤ အသီၣ်ဒ်လဲၣ်န့ၣ် ပတသ့ၣ်ညါလီၤတံၢ်ဘၣ်. သနာ်က့ ဘၣ်မနုၤအဃိ ပကြၢးကိးထီၣ် ကစၢ်ယွၤအမံၤလဲၣ်. ဃုသ့ၣ်ညါကွၢ်.

“ယဟိဝၤန့ၣ် အမ့ၢ်မတဂၤလဲၣ်” (တၢ်မၤလိလၢ အအိၣ်လၢ online အဖီခိၣ်)

ပကိးကစၢ်ယွၤဒ်လဲၣ်န့ၣ် အရ့ဒိၣ်စ့ၢ်ကီးဧါ. ဘၣ်မနုၤအဃိ ပတဲသ့လၢ ကစၢ်ယွၤန့ၣ် အနီၢ်ကစၢ်အမံၤ အိၣ်ထဲတဖျၢၣ်လဲၣ်, ဃုသ့ၣ်ညါကွၢ်.

“ကစၢ်ယွၤန့ၣ် အမံၤအိၣ်ပှဲၤဖျၢၣ်လဲၣ်” (တၢ်မၤလိလၢ အအိၣ်လၢ online အဖီခိၣ်)