တၢ်မၤလိ ၂၃
တၢ်သးဝံၣ် ၂ ယဟိဝၤမ့ၢ်နမံၤ
ယဟိဝၤယွၤအမံၤန့ၣ် အရ့ဒိၣ်လၢ ပဂီၢ်ထဲလဲၣ်
“ယဟိဝၤယွၤ တဲဝဲလၢ ‘ သုမ့ၢ် ယပှၤအုၣ်အသးတဖၣ်လီၤ.’”—ၡါ ၄၃:၁၀.
တၢ်ဂ့ၢ်မိၢ်ပှၢ်
လၢတၢ်မၤလိအံၤ ပကသ့ၣ်ညါဘၣ်လၢ ပပာ်စီဆှံ ယဟိဝၤယွၤအမံၤ ဒီးပာ်ဖျါထီၣ်လၢ ယဟိဝၤယွၤအမံၤ ပူၤဖျဲးဒီး တၢ်ဒုၣ်ဒွဲၣ်စံးအၢ ကသ့ဒ်လဲၣ်.
၁-၂. ယဟိဝၤယွၤအမံၤ အရ့ဒိၣ်လၢ ယ့ၣ်ၡူးအဂီၢ်န့ၣ် ပသ့ၣ်ညါဘၣ်ဒ်လဲၣ်.
ယဟိဝၤယွၤအမံၤန့ၣ် အရ့ဒိၣ်လၢ ယ့ၣ်ၡူးအဂီၢ်ဒိၣ်မး. ပှၤလၢ အကဒုးသ့ၣ်ညါပှၤဂၤလၢ ယဟိဝၤယွၤအမံၤ ဒ်သိးဒီး ယ့ၣ်ၡူးန့ၣ် တအိၣ်နီတဂၤဘၣ်. တၢ်မၤလိလၢ အပူၤကွံာ်တခါန့ၣ် ပသ့ၣ်ညါဘၣ်လၢ ယ့ၣ်ၡူး အဲၣ်ဒိးပာ်ဖျါထီၣ်ဝဲ နီၢ်ကီၢ်လၢ အပါအမံၤန့ၣ် စီဆှံဝဲအဃိ အမ့ၢ်ဘၣ်သံဒၣ်လဲာ် အသးအိၣ်တူၢ်သံအသး သပှၢ်တၢၢ်. (မၢ် ၁၄:၃၆; ဧ့ၤ ၁၀:၇-၉) ခီဖျိလၢ ယ့ၣ်ၡူးအဲၣ်ဒိး ပာ်စီဆှံ အပါအမံၤအဃိ ဖဲအပၢတၢ်အနံၣ်တကထိ ဝံၤအလီၢ်ခံ အကဟ့ၣ်လီၤက့ၤ တၢ်စိတၢ်ကမီၤခဲလၢာ် လၢအပါအစုပူၤ. (၁ ကရံၣ် ၁၅:၂၆-၂၈) အဃိ တၢ်ခဲလၢာ်လၢ ယ့ၣ်ၡူးမၤဝဲလၢ ယဟိဝၤယွၤအဂီၢ်န့ၣ် ပာ်ဖျါထီၣ်လၢ အအဲၣ်ယဟိဝၤယွၤ ဒိၣ်မး.
၂ ယ့ၣ်ၡူးဟဲလီၤလၢ ဟီၣ်ခိၣ်ချၢ ဒ်အပါအပှၤခၢၣ်စး တဂၤအသိး. (ယိၤ ၅:၄၃; ၁၂:၁၃) အဃိ အဒုးသ့ၣ်ညါ အပျဲၢ်အဘီၣ်တဖၣ်လၢ အပါအမံၤ. (ယိၤ ၁၇:၆, ၂၆) ယ့ၣ်ၡူးသိၣ်လိတၢ်လၢ အပါအမံၤ ဒီးအမၤတၢ်လီၤလးတဖၣ်လၢ အပါအမံၤ. (ယိၤ ၁၀:၂၅) ဒီးဖဲယ့ၣ်ၡူး ဃ့ထုကဖၣ်န့ၢ်တၢ်လၢ အပျဲၢ်အဘီၣ်အဂီၢ်အခါ အဃ့ယဟိဝၤယွၤလၢ “ဒီသဒၢအဝဲသ့ၣ် လၢနမံၤ . . . အဃိန့ၣ်တက့ၢ်.” (ယိၤ ၁၇:၁၁) တၢ်လၢယ့ၣ်ၡူးထံၣ်ဝဲလၢ အရ့ဒိၣ်န့ၢ်ဒံး ယဟိဝၤယွၤ အမံၤန့ၣ် တအိၣ်နီတမံၤဘၣ်. အဃိ ပှၤလၢ အကိးလီၤသးလၢ ခရံာ်ဖိနီၢ်ကီၢ်န့ၣ် အကြၢးသ့ၣ်ညါ ယဟိဝၤယွၤအမံၤ ဒီးသူယဟိဝၤယွၤအမံၤ တမ့ၢ်ဧီၤ.
၃. လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်.
၃ ပဝဲယဟိဝၤပှၤအုၣ်အသးန့ၣ် ပဂုာ်ကျဲးစၢး ကွၢ်လိယ့ၣ်ၡူး ခီဖျိ ပအဲၣ် ယဟိဝၤယွၤအမံၤ ဒီးပာ်ကဲအမံၤ. (၁ ပ့း ၂:၂၁) လၢတၢ်မၤလိအံၤ ပကမၤလိဘၣ် ဘၣ်ဃးဒီး ဆၢကတီၢ်ခဲအံၤ ပှၤလၢအစံၣ်တဲၤတဲလီၤ “ဘီမုၢ်တၢ်သးခုကစီၣ်” န့ၣ် ဘၣ်မနုၤအဃိ ယဟိဝၤယွၤ ကိးအဝဲသ့ၣ်လၢ အမံၤလဲၣ်. (မး ၂၄:၁၄) ဒီးပကသ့ၣ်ညါဘၣ်စ့ၢ်ကီးလၢ ယဟိဝၤယွၤ အမံၤန့ၣ် အရ့ဒိၣ်လၢ ပဝဲတဂၤဘၣ်တဂၤ အဂီၢ်ထဲလဲၣ်.
“ပှၤကလုာ်တဖၣ် . . . လၢ အမံၤအဂီၢ်”
၄. (က) တချုး ယ့ၣ်ၡူးက့ၤထီၣ်လၢ မူခိၣ်ဒံးဘၣ်န့ၣ် အတဲဘၣ် အပျဲၢ်အဘီၣ် မနုၤလဲၣ်. (ခ) ပကတဲသကိး တၢ်သံကွၢ်မနုၤလဲၣ်.
၄ တချုး ယ့ၣ်ၡူးက့ၤထီၣ်လၢ မူခိၣ်ဒံးဘၣ်န့ၣ် အတဲဘၣ် အပျဲၢ်အဘီၣ်တဖၣ်လၢ “ဖဲသးစီဆှံဟဲလီၤလၢ သုလိၤအခါ သုကဒိးန့ၢ်ဘၣ် တၢ်စိတၢ်ကမီၤ ဒီးသုကကဲထီၣ် ယပှၤအုၣ်အသးတဖၣ်လၢ ဝ့ၢ်ယရူၤၡလ့ၣ်အပူၤ, လၢယူဒၤ အဟီၣ်ကဝီၤဒီဘ့ၣ်, လၢၡၤမရံအပူၤ ဒီးပၢၢ်တုၤလၢ ဟီၣ်ခိၣ်ဒီဘ့ၣ်.” (မၤတၢ် ၁:၈) အဃိ ယ့ၣ်ၡူးအပျဲၢ်အဘီၣ်တဖၣ် တစံၣ်တဲၤတဲလီၤတၢ်ထဲလၢ ကီၢ်အံၣ်စရ့လးအပူၤဘၣ်. အဝဲသ့ၣ် ကစံၣ်တဲၤတဲလီၤတၢ်လၢ တၢ်လီၢ်ကိးတီၤဒဲး. လၢခံန့ၣ် ပှၤအိၣ်လၢ ဟီၣ်ခိၣ်ဒီဘ့ၣ်ညါ န့ၢ်ဘၣ်တၢ်ခွဲးတၢ်ယာ်လၢ ကကဲထီၣ်ဘၣ် ယ့ၣ်ၡူးအပျဲၢ်အဘီၣ်. (မး ၂၈:၁၉, ၂၀) သနာ်က့ ဖဲယ့ၣ်ၡူးတဲဝဲလၢ “သုကကဲထီၣ် ယပှၤအုၣ်အသးတဖၣ်” အခါ မ့ၢ်ယ့ၣ်ၡူး အဲၣ်ဒိးတဲဝဲလၢ အပျဲၢ်အဘီၣ် အသီတဖၣ်အံၤ ကအုၣ်အသး ထဲလၢယ့ၣ်ၡူး အဂီၢ်လီၤဧါ. မ့တမ့ၢ် အဝဲသ့ၣ် ကဘၣ်အုၣ်အသးလၢ ယဟိဝၤယွၤအမံၤ အဂီၢ်စ့ၢ်ကီးဧါ. တၢ်ဂ့ၢ်လၢ မၤတၢ် အဆၢဒိၣ် ၁၅ အပူၤန့ၣ် ကပာ်ဖျါထီၣ်န့ၢ်ပှၤ တၢ်စံးဆၢ.
၅. ပှၤကလုာ်တဖၣ် ကဘၣ်သ့ၣ်ညါ ယဟိဝၤယွၤအမံၤန့ၣ် တၢ်မၢဖိ ဒီးတၢ်အိၣ်ဖှိၣ်သးပှၢ်တဖၣ်လၢ ဝ့ၢ်ယရူၤၡလ့ၣ် တဲဖျါထီၣ်ဝဲဒ်လဲၣ်. (ကွၢ်စ့ၢ်ကီးတၢ်ဂီၤ.)
၅ ဒ်သိး ပှၤကလုာ် အဂၤတဖၣ်လၢ အတဒိးတၢ်ကူးတရံးဘၣ် ကကဲထီၣ် ခရံာ်ဖိအဂီၢ် အဝဲသ့ၣ် ကဘၣ်မၤမနုၤလဲၣ်. ဖဲ ခ.န ၄၉ န့ၣ် တၢ်မၢဖိ ဒီးတၢ်အိၣ်ဖှိၣ်သးပှၢ်တဖၣ်လၢ ဝ့ၢ်ယရူၤၡလ့ၣ်န့ၣ် အဝဲသ့ၣ် ထံၣ်ဖှိၣ်လိာ်သး ဒီးတဲသကိးဝဲ တၢ်ဂ့ၢ်အံၤ. ဖဲအဝဲသ့ၣ် တဲသကိးတၢ် ဝံၤအလီၢ်ခံ ယ့ၣ်ၡူး အဒီပုၢ်ဝဲၢ်ခွါ စီၤယၤကိာ် တဲဝဲလၢ “[စီၤပ့းတရူး] ပာ်ဖျါထီၣ်ဝဲ လီၤတံၢ်လီၤဆဲးလၢ ကစၢ်ယွၤတူၢ်လိာ် ပှၤကလုာ်တဖၣ် အဆိကတၢၢ်တဘျီ ဒ်သိး ကဃုထၢထီၣ် ပှၤလၢ အဝဲသ့ၣ်အကျါလၢ အမံၤအဂီၢ်.” စီၤယၤကိာ် အဲၣ်ဒိးတဲဝဲ မတဂၤအမံၤလဲၣ်. စီၤယၤကိာ် တဲဖျါထီၣ်က့ၤ ဝံဧၤမိၣ် အတၢ်ကတိၤ ဒီးဆဲးတဲဝဲလၢ “ဒ်သိးပှၤလၢ အအိၣ်တ့ၢ်တဖၣ် ဒီးပှၤကလုာ်ခဲလၢာ်လၢ အဘၣ် တၢ်ကိးအီၤလၢ ယမံၤန့ၣ် ကဃုယၤ, ယဟိဝၤယွၤ လၢအသးဒီဖျၢၣ်လီၤ. ယၤ, ယဟိဝၤယွၤန့ၣ် ယတဲတၢ်ဂ့ၢ်တဖၣ်အံၤ.” (မၤတၢ် ၁၅:၁၄-၁၈) အဃိ ပထံၣ်ဘၣ်လၢ ယ့ၣ်ၡူးအပျဲၢ်အဘီၣ် အသီတဖၣ်အံၤ ကသ့ၣ်ညါဘၣ် ယဟိဝၤယွၤအမံၤ တကးဒံးဘၣ် ကဘၣ် ‘တၢ်ကိးအီၤလၢအမံၤ.’ အဲၣ်ဒိးတဲဝဲလၢ အဝဲသ့ၣ် ကဘၣ်ဒုးသ့ၣ်ညါ ပှၤဂၤလၢ ကစၢ်ယွၤအမံၤ. ဒီးပှၤဂၤကသ့ၣ်ညါဝဲလၢ အဝဲသ့ၣ် အုၣ်အသးလၢ ကစၢ်ယွၤ အမံၤအဂီၢ်.
ဖဲပှၤပၢဆှၢတၢ်ကမံးတံာ် လၢတၢ်မၢဖိအစိၤ အိၣ်ဖှိၣ်သကိးအခါ အဝဲသ့ၣ် သ့ၣ်ညါထီၣ်ဝဲၡဲၡဲလၢ ခရံာ်ဖိတဖၣ်န့ၣ် ယဟိဝၤယွၤ ဃုထၢထီၣ် အဝဲသ့ၣ်လၢ အမံၤအဂီၢ် (ကွၢ်လံာ်အဆၢ ၅)
၆-၇. (က) ဘၣ်မနုၤအဃိ ယ့ၣ်ၡူး ဟဲလီၤလၢ ဟီၣ်ခိၣ်ချၢလဲၣ်. (ခ) တၢ်ဂ့ၢ်အရ့ဒိၣ်ကတၢၢ်လၢ ယ့ၣ်ၡူး ဟဲလီၤလၢ ဟီၣ်ခိၣ်ချၢန့ၣ် မ့ၢ်မနုၤလဲၣ်.
၆ ယ့ၣ်ၡူးအမံၤန့ၣ် အခီပညီမ့ၢ်ဝဲ “ယဟိဝၤ မ့ၢ်တၢ်အုၣ်က့ၤခီၣ်က့ၤ” ဒီးယဟိဝၤယွၤ သူယ့ၣ်ၡူးလၢ ကအုၣ်က့ၤခီၣ်က့ၤ ပှၤဟီၣ်ခိၣ်ဖိလၢ အစူၢ်က့ၤနာ်က့ၤအီၤ ဒီးအဖိခွါ. အဃိ ယ့ၣ်ၡူး ဟဲလီၤလၢ ဟီၣ်ခိၣ်ချၢ ဒီးတူၢ်သံအသး လၢပှၤဟီၣ်ခိၣ်ဖိအဂီၢ်. (မး ၂၀:၂၈) ခီဖျိလၢ ယ့ၣ်ၡူး အတၢ်ပှ့ၤက့ၤအဃိ ပှၤဟီၣ်ခိၣ်ဖိ ဒိးန့ၢ်ဘၣ် တၢ်အုၣ်က့ၤခီၣ်က့ၤ ဒီးအိၣ်ဒီးတၢ်ခွဲးတၢ်ယာ်လၢ ကအိၣ်မူဘၣ် လီၤထူလီၤယိာ်.—ယိၤ ၃:၁၆.
၇ ခီဖျိလၢ တၢ်ကဲထီၣ်သးလၢ ဧ့ၤဒ့ၣ်တၤသၣ်လီၢ်အဃိ ပှၤဟီၣ်ခိၣ်ဖိ လိၣ်ဘၣ် တၢ်ပှ့ၤက့ၤ. ဒ်တၢ်မၤလိ လၢအပူၤကွံာ်တခါ ပာ်ဖျါထီၣ်ဝဲအသိး ပှၤဟီၣ်ခိၣ်ဖိ အဆိကတၢၢ်ခံဂၤ လၢအမ့ၢ် နီၢ်အံၣ်အု ဒီးစီၤအၤဒၣ်န့ၣ် အဝဲသ့ၣ်ထီဒါက့ၤ ယဟိဝၤယွၤအဃိ အဝဲသ့ၣ် တအိၣ်ဒီး တၢ်ခွဲးတၢ်ယာ်လၢ ကအိၣ်မူဘၣ် လီၤထူလီၤယိာ်လၢၤဘၣ်. (၁ မိၤ ၃:၆, ၂၄) ဘၣ်ဆၣ် ယ့ၣ်ၡူး ဟဲလီၤလၢ ဟီၣ်ခိၣ်ချၢန့ၣ် တမ့ၢ်ထဲ အကမၤပူၤဖျဲး နီၢ်အံၣ်အု ဒီးစီၤအၤဒၣ် အစၢၤအသွဲၣ်ဘၣ်. တၢ်ဂ့ၢ်အရ့ဒိၣ်ကတၢၢ်လၢ အဟဲလီၤလၢ ဟီၣ်ခိၣ်ချၢန့ၣ် အဘၣ်ဃးဒီး ယဟိဝၤယွၤအမံၤ လၢမုၣ်ကီၤလံၢ် တဲအၢတဲသီဝဲ. (၁ မိၤ ၃:၄, ၅) အဃိ ပှၤဟီၣ်ခိၣ်ဖိ ကဘၣ်သ့ၣ်ညါဝဲလၢ ယဟိဝၤယွၤန့ၣ် အတမၤကမၣ်တၢ် နီတမံၤဘၣ် ဒီးအကဲပါလၢ အအိၣ်ဒီးတၢ်အဲၣ်. ခီဖျိလၢ ယ့ၣ်ၡူးကဲဝဲ ယဟိဝၤယွၤ အပှၤခၢၣ်စး ဒီးအမၤတၢ်ခဲလၢာ်လၢ ယဟိဝၤယွၤ အဲၣ်ဒိးလၢ အကမၤဝဲအဃိ အကဲပှၤအဂ့ၤကတၢၢ် တဂၤလၢ အကြၢးပာ်ဖျါထီၣ် တၢ်မ့ၢ်တၢ်တီအံၤ.
ပှၤလၢ အကိးလီၤသးလၢ ခရံာ်ဖိနီၢ်ကီၢ်န့ၣ် အကြၢးသ့ၣ်ညါ ယဟိဝၤယွၤအမံၤ ဒီးသူယဟိဝၤယွၤအမံၤ တမ့ၢ်ဧီၤ
၈. ယ့ၣ်ၡူး အပျဲၢ်အဘီၣ်ခဲလၢာ် ကဘၣ်နၢ်ပၢၢ် တၢ်ဂ့ၢ်မနုၤလဲၣ်.
၈ ယ့ၣ်ၡူး အပျဲၢ်အဘီၣ်ခဲလၢာ် လၢအမ့ၢ် ပှၤယူဒၤဖိမ့ၢ်ဂ့ၤ, ပှၤကလုာ် အဂၤတဖၣ်မ့ၢ်ဂ့ၤ ကဘၣ်နၢ်ပၢၢ်ဝဲလၢ တၢ်အုၣ်က့ၤခီၣ်က့ၤန့ၣ် အဟဲလၢ ယ့ၣ်ၡူးအပၢ် ယဟိဝၤယွၤအအိၣ်. (ယိၤ ၁၇:၃) တကးဒံးဘၣ် ဒ်ယ့ၣ်ၡူးအသိး ပှၤဂၤကသ့ၣ်ညါ အဝဲသ့ၣ်ခီဖျိ ယဟိဝၤယွၤအမံၤ. ဒီးဒ်သိး အဝဲသ့ၣ် ကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် အရ့ဒိၣ်လၢ အဝဲသ့ၣ် ကသ့ၣ်ညါလၢ အကဘၣ်ပာ်စီဆှံ ယဟိဝၤယွၤအမံၤစ့ၢ်ကီး. (မၤတၢ် ၂:၂၁, ၂၂) ပထံၣ်ဘၣ်လၢ ယ့ၣ်ၡူးအပျဲၢ်အဘီၣ် လၢအသးတီခဲလၢာ်န့ၣ် ကဘၣ်သ့ၣ်ညါ ယဟိဝၤယွၤ တကးဒံးဘၣ် သ့ၣ်ညါစ့ၢ်ကီးယ့ၣ်ၡူး. အဃိ ဖဲ ယိၤဟၣ် ၁၇ န့ၣ် ပထံၣ်ဘၣ်လၢ ယ့ၣ်ၡူး မၤကတၢၢ် အတၢ်ထုကဖၣ်လၢ “ယဒုးသ့ၣ်ညါ အဝဲသ့ၣ်လၢနမံၤလံ. ဒီးယကဆဲး ဒုးသ့ၣ်ညါအီၤ ဒ်သိး တၢ်အဲၣ်လၢ နအဲၣ်ယၤန့ၣ် ကအိၣ်လၢ အဝဲသ့ၣ်အပူၤ ဒီးယကအိၣ်ဒီး အဝဲသ့ၣ် အဂီၢ်လီၤ.”—ယိၤ ၁၇:၂၆.
“သုမ့ၢ် ယပှၤအုၣ်အသးတဖၣ်”
၉. ယဟိဝၤယွၤအမံၤ အရ့ဒိၣ်လၢပဂီၢ်န့ၣ် ပပာ်ဖျါထီၣ် ကသ့ဒ်လဲၣ်.
၉ ဒ်တၢ်မၤလိအံၤ ပာ်ဖျါထီၣ်ဝဲအသိး ခရံာ်ဖိအမ့ၢ်အတီ ကိးဂၤဒဲးန့ၣ် ကဘၣ်ပာ်စီဆှံ ယဟိဝၤယွၤအမံၤ. (မး ၆:၉, ၁၀) ပကဘၣ်ထံၣ်လၢ ယဟိဝၤယွၤအမံၤန့ၣ် အရ့ဒိၣ်န့ၢ်ဒံး တၢ်အဂၤခဲလၢာ် ဒီးပကဘၣ် ပာ်ဖျါထီၣ်လၢပတၢ်မၤ. အဃိဒ်သိး ပကပာ်စီဆှံ ယဟိဝၤယွၤအမံၤ ဒီးပာ်ဖျါထီၣ်လၢ မုၣ်ကီၢ်လံၢ် တဲတၢ်လံၣ်တၢ်လီ ဘၣ်ဃးဒီး ယဟိဝၤယွၤအဂီၢ် ပကဘၣ်မၤဒ်လဲၣ်.
၁၀. ဖဲယၡါယၤ အဆၢဒိၣ် ၄၂ တုၤလၢ ၄၄ န့ၣ် ပသ့ၣ်ညါဘၣ် တၢ်ဂ့ၢ်မနုၤလဲၣ်. (ယၡါယၤ ၄၃:၉; ၄၄:၇-၉) (ကွၢ်စ့ၢ်ကီးတၢ်ဂီၤ.)
၁၀ ယၡါယၤ အဆၢဒိၣ် ၄၂ တုၤလၢ ၄၄ ပာ်ဖျါထီၣ်န့ၢ်ပှၤ တၢ်ဂ့ၢ်ဘၣ်ဃးဒီး ပပာ်စီဆှံ ယဟိဝၤယွၤအမံၤ ကသ့ဒ်လဲၣ်အဂ့ၢ်. ဖဲအဆၢဒိၣ်တဖၣ်န့ၣ် ပဖးဘၣ်တၢ်ဂ့ၢ်လၢ အလီၤဂာ်ဒ်သိးဒီး ယွၤတဖၣ် ထီၣ်တၢ်မူး. ဒီးဖဲန့ၣ် ပထံၣ်ဘၣ်လၢ ယဟိဝၤယွၤမၢဝဲ ပှၤလၢအကိးလီၤအသးလၢ ယွၤတဖၣ်လၢ ကပာ်ဖျါထီၣ် တၢ်အုၣ်သးလၢ အဝဲသ့ၣ်ကဲဝဲ ယွၤနီၢ်ကီၢ်. တကးဒံးဘၣ် ယဟိဝၤယွၤ မၢစ့ၢ်ကီးဝဲ ယွၤတဖၣ်အံၤ ကပာ်ဖျါထီၣ် အပှၤအုၣ်သး ဘၣ်ဆၣ် အပှၤအုၣ်သး တအိၣ်နီတဂၤဘၣ်.—ဖး ယၡါယၤ ၄၃:၉; ၄၄:၇-၉.
လၢပတၢ်ကတိၤမ့ၢ်ဂ့ၤ, ပတၢ်မၤမ့ၢ်ဂ့ၤ ပပာ်ဖျါထီၣ် တၢ်အုၣ်သးလၢ ယဟိဝၤယွၤကဲဝဲ ကစၢ်ယွၤ အမ့ၢ်အတီ ထဲတဂၤ (ကွၢ်လံာ်အဆၢ ၁၀-၁၁)
၁၁. ဖဲယၡါယၤ ၄၃:၁၀-၁၂ န့ၣ် ယဟိဝၤယွၤ တဲဘၣ်အပှၤဂီၢ်မုၢ်ဒ်လဲၣ်.
၁၁ ဖး ယၡါယၤ ၄၃:၁၀-၁၂. ယဟိဝၤယွၤ တဲအပှၤဂီၢ်မုၢ်လၢ “သုမ့ၢ် ယပှၤအုၣ်အသးတဖၣ်” ဒီး “ယမ့ၢ် ကစၢ်ယွၤ.” ဒီးယဟိဝၤယွၤ သံကွၢ်အဝဲသ့ၣ်လၢ “မ့တမ့ၢ်ယၤဘၣ်န့ၣ် ကစၢ်ယွၤအဂၤ အိၣ်ဒံးတဂၤဂၤဧါ.” (ၡါ ၄၄:၈) အဃိ ပဒိးန့ၢ်ဘၣ် တၢ်ခွဲးတၢ်ယာ်လၢ ပကပာ်ဖျါထီၣ် တၢ်သံကွၢ်တဖျၢၣ်အံၤ အတၢ်စံးဆၢ. ပပာ်ဖျါထီၣ်လၢ ယဟိဝၤယွၤန့ၣ် အကဲကစၢ်ယွၤ အမ့ၢ်အတီ ထဲတဂၤ ခီဖျိ ပတၢ်ကတိၤဒီးပတၢ်မၤ. ယဟိဝၤယွၤအမံၤန့ၣ် အဒိၣ်အထီန့ၢ်ဒံး မံၤအဂၤခဲလၢာ်. ဒီးမုၣ်ကီၤလံၢ် မၤကီမၤခဲပှၤ သနာ်က့ လၢပတၢ်အိၣ်မူပူၤန့ၣ် ပပာ်ဖျါထီၣ်လၢ ပအဲၣ်ယဟိဝၤယွၤနီၢ်ကီၢ် ဒီးပသးတီဒီးအီၤ. ပမၤဒ်အံၤအဃိ ပပာ်ဖျါထီၣ်လၢ ပပာ်စီဆှံ ယဟိဝၤယွၤအမံၤ.
၁၂. ဝံအတၢ်စံးပာ်ဖဲ ယၡါယၤ ၄၀:၃, ၅ န့ၣ် ဟဲလၢထီၣ်ပှဲၤထီၣ် ဒ်လဲၣ်.
၁၂ ဝံယၡါယၤ တဲဆိပာ်စၢၤဝဲလၢ ပှၤတဂၤ က “ကတဲာ်ကတီၤန့ၢ် ယဟိဝၤယွၤ အကျဲ.” (ၡါ ၄၀:၃) ဝံအတၢ်စံးပာ်အံၤ ဟဲလၢထီၣ်ပှဲၤထီၣ်ဒ်လဲၣ်. ယ့ၣ်ၡူးန့ၣ် အဟဲလၢ ယဟိဝၤယွၤအမံၤ ဒီးအတဲန့ၢ်တၢ်လၢ ယဟိဝၤယွၤ အမံၤအဂီၢ်အဃိ ဖဲပှၤဘျၢတၢ် စီၤယိၤဟၣ် ကတဲာ်ကတီၤန့ၢ် ယ့ၣ်ၡူးအကျဲအခါ အလီၤဂာ်ဒ်သိးဒီး အကတဲာ်ကတီၤန့ၢ် ယဟိဝၤယွၤ အကျဲ. (မး ၃:၃; မၢ် ၁:၂-၄; လူၤ ၃:၃-၆) ဝံအတၢ်စံးပာ်အံၤ တဲစ့ၢ်ကီးဝဲလၢ “ယဟိဝၤယွၤ အလၤကပီၤ ကအိၣ်ဖျါထီၣ်.” (ၡါ ၄၀:၅) ဝံအတၢ်စံးပာ်အံၤ ဟဲလၢထီၣ်ပှဲၤထီၣ်ဒ်လဲၣ်. ဖဲယ့ၣ်ၡူးဟဲလီၤလၢ ဟီၣ်ခိၣ်ချၢအခါ အပာ်ဖျါထီၣ် ယဟိဝၤယွၤ အလၤကပီၤ လၢလၢပှဲၤပှဲၤ အဃိ လီၤဂာ်ဒ်သိးဒီး ယဟိဝၤယွၤ အနီၢ်ကစၢ် ဟဲလီၤ လၢဟီၣ်ခိၣ်ချၢ.—ယိၤ ၁၂:၄၅.
၁၃. ဒ်ယ့ၣ်ၡူးအသိး ပကဘၣ် မၤမနုၤလဲၣ်.
၁၃ ဖဲပပာ်စီဆှံ ယဟိဝၤယွၤ အမံၤအခါ မ့ၢ်ဒၣ်ပကွၢ်လိ ယ့ၣ်ၡူးခရံာ်. ဒ်ယ့ၣ်ၡူးအသိး ပအုၣ်သးလၢ ယဟိဝၤယွၤအဂီၢ်. ပကိးလီၤပသးလၢ ယဟိဝၤယွၤအမံၤ ဒီးတဲပၠးပှၤဂၤ ဘၣ်ဃးဒီး ယဟိဝၤယွၤ အတၢ်မၤလၢ အလီၤလးတဖၣ်အဂ့ၢ်. ဒီးပကအုၣ်ပသး ဂ့ၤဂ့ၤအဂီၢ် ပကဘၣ် ဒုးသ့ၣ်ညါစ့ၢ်ကီး ပှၤဂၤ တၢ်ခဲလၢာ်လၢ ယ့ၣ်ၡူးမၤဝဲဒ်သိး အကမၤလၤကပီၤ ယဟိဝၤယွၤ အမံၤအဂီၢ်. (မၤတၢ် ၁:၈) ယ့ၣ်ၡူးန့ၣ် အကဲပှၤအုၣ်သး အဆိကတၢၢ်တဂၤလၢ ယဟိဝၤယွၤအဂီၢ် ဒီးပကွၢ်လိ အဒိအတဲာ်. (လီၣ် ၁:၅) အဃိ ယဟိဝၤယွၤ အမံၤအရ့ဒိၣ်လၢပဂီၢ်န့ၣ် ပပာ်ဖျါထီၣ် သ့ဒ်လဲၣ်.
ကျဲအဂၤလၢ ပပာ်ဖျါထီၣ်လၢ ယဟိဝၤယွၤအမံၤန့ၣ် အရ့ဒိၣ်လၢပဂီၢ်
၁၄. ဘၣ်မနုၤအဃိ ပပာ်ကဖၢလၢသးလၢ ယဟိဝၤယွၤအမံၤလဲၣ်. (စံးထီၣ်ပတြၢၤ ၁၀၅:၃)
၁၄ ပပာ်ကဖၢလၢသးလၢ ယဟိဝၤယွၤအမံၤ. (ဖး စံးထီၣ်ပတြၢၤ ၁၀၅:၃.) ဖဲပပာ်ကဖၢလၢသးလၢ ယဟိဝၤယွၤ အမံၤအခါ ယဟိဝၤယွၤ သးခုဒိၣ်မး. (ယံး ၉:၂၃, ၂၄; ၁ ကရံၣ် ၁:၃၁; ၂ ကရံၣ် ၁၀:၁၇) ဖဲပတဲဘၣ်ပှၤဂၤလၢ ယဟိဝၤယွၤန့ၣ် အစီဆှံ ဒီးတၢ်လၢအမၤဝဲန့ၣ် အဘၣ်ခဲလၢာ်အခါ ပထံၣ်လၢအကဲ တၢ်ခွဲးတၢ်ယာ်လီၤဆီ. အဃိ ပှၤလၢပတၢ်မၤလီၢ် မ့ၢ်ဂ့ၤ, ပသကိးလၢကၠိ မ့ၢ်ဂ့ၤ, ပှၤလၢပဃၢၤ ဒီးပှၤအဂၤတဖၣ်န့ၣ် ပကတဲပၠးအဝဲသ့ၣ်လၢ ပကဲ ယဟိဝၤပှၤအုၣ်အသးအဂီၢ် ပတလိၣ် မဲာ်ဆှးနီတဘျီဘၣ်. မုၣ်ကီၤလံၢ် တအဲၣ်ဒိးလၢ ပကတဲဘၣ်ပှၤဂၤလၢ ယဟိဝၤယွၤ အမံၤဘၣ်. (ယံး ၁၁:၂၁; လီၣ် ၁၂:၁၇) မုၣ်ကီၤလံၢ် ဒီးအဝံလၢအဘျၣ်တဖၣ်န့ၣ် အဲၣ်ဒိးဝဲလၢ ပှၤကသးပ့ၤနီၣ်ကွံာ် ယဟိဝၤယွၤအမံၤ. (ယံး ၂၃:၂၆, ၂၇) ဘၣ်ဆၣ် ခီဖျိလၢ ပအဲၣ်ယဟိဝၤယွၤ အမံၤအဃိ ပအဲၣ်ဒိး စံးထီၣ်ပတြၢၤအီၤ “ဒီတနံၤကျၢၤ.”—စံး ၅:၁၁; ၈၉:၁၆.
၁၅. ပကိးထီၣ် ယဟိဝၤယွၤအမံၤန့ၣ် အဲၣ်ဒိးတဲဝဲ အခီပညီဒ်လဲၣ်.
၁၅ ပကိးထီၣ် ယဟိဝၤယွၤအမံၤထီဘိ. (အ့ ၂:၃၂; ရိ ၁၀:၁၃, ၁၄) ပကိးထီၣ် ယဟိဝၤယွၤ အမံၤန့ၣ် အခီပညီ တမ့ၢ်ထဲလၢ ပသ့ၣ်ညါအမံၤ ဒီးသူအမံၤဘၣ်. အခီပညီ မ့ၢ်စ့ၢ်ကီးလၢ ပသ့ၣ်ညါလၢ ယဟိဝၤယွၤန့ၣ် အအိၣ်ဒီး တၢ်တူၢ်ဘၣ်, တၢ်ဂ့ၤတၢ်ဝါအါမး ဒီးပကဲထီၣ် အသကိးသ့. တကးဒံးဘၣ် ပသန့ၤသးလၢအီၤ, ပဃ့အတၢ်မၤစၢၤ ဒီးအတၢ်ဟံးစုနဲၣ်ကျဲ. (စံး ၂၀:၇; ၉၉:၆; ၁၁၆:၄; ၁၄၅:၁၈) ပတဲဘၣ်စ့ၢ်ကီး ပှၤဂၤလၢအမံၤ ဒီးအတၢ်ဂ့ၤတၢ်ဝါတဖၣ်လၢ အလီၤကမၢကမၣ်. ဒီးဒ်သိး ပှၤဂၤကမၤ တၢ်ဘၣ်ယဟိဝၤယွၤအသး ဒီးကန့ၢ်ဘၣ် တၢ်အုၣ်က့ၤခီၣ်က့ၤအဂီၢ် ပမၤစၢၤအဝဲသ့ၣ်လၢ ကဆီတလဲ အတၢ်အိၣ်မူ.—ၡါ ၁၂:၄; မၤတၢ် ၂:၂၁, ၃၈.
၁၆. မုၣ်ကီၤလံၢ် ကဲပှၤလၢ အလံၣ်တၢ်န့ၣ် ပပာ်ဖျါထီၣ် ကသ့ဒ်လဲၣ်.
၁၆ ပသးအိၣ်တူၢ်ဆါသးလၢ ယဟိဝၤယွၤ အမံၤအဂီၢ်. (ယၤ ၅:၁၀, ၁၁) ပမ့ၢ်တူၢ်ဘၣ် တၢ်မၤအၢမၤနး ခီဖျိလၢပတီဒီး ယဟိဝၤယွၤအဃိန့ၣ် ပပာ်ဖျါထီၣ်လၢ မုၣ်ကီၤလံၢ် မ့ၢ်ပှၤလၢအလံၣ်တၢ်. ဖဲစီၤယိၤဘး အိၣ်မူဒံးအခါ ဘၣ်ဃးဒီး ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် မုၣ်ကီၤလံၢ် တဲဝဲလၢ “ပှၤကညီတဂၤ ကဟ့ၣ်လီၤကွံာ် တၢ်ခဲလၢာ်လၢ အအိၣ်ဒီးအီၤ ဒ်သိး အသးသမူ သုတလီၤမၢ်တဂ့ၤ အဂီၢ်.” (ဘး ၂:၄) မုၣ်ကီၤလံၢ် အတၢ်ကတိၤအံၤ အဲၣ်ဒိးတဲဝဲလၢ ပှၤဟီၣ်ခိၣ်ဖိ ကဘူၣ်ထီၣ်ဘါထီၣ် ယဟိဝၤယွၤ ဖဲလၢအဝဲသ့ၣ် အိၣ်ဘၣ်မုာ်မုာ်အခါလီၤ. ဒီးအအဲၣ်ဒိးတဲဝဲလၢ အဝဲသ့ၣ် မ့ၢ်ထံၣ်ဘၣ် တၢ်ကီတၢ်ခဲန့ၣ် အဝဲသ့ၣ် တဘူၣ်ထီၣ်ဘါထီၣ် ယဟိဝၤယွၤ လၢၤဘၣ်. စီၤယိၤဘး လၢအအိၣ်ဒီး တၢ်သးတီန့ၣ် ပာ်ဖျါထီၣ်ဝဲလၢ မုၣ်ကီၤလံၢ် အတၢ်ကတိၤအံၤ တဘၣ်နီတစဲးဘၣ်. ပဝဲစ့ၢ်ကီး ပမ့ၢ်ထံၣ်ဘၣ် တၢ်ကီတၢ်ခဲ ဒီးမုၣ်ကီၤလံၢ် မ့ၢ်ဂုာ်ကျဲးစၢး မၤလီၤစၢ်ပသးသနာ်က့ ပကဆဲး ဘူၣ်ထီၣ်ဘါထီၣ် ယဟိဝၤယွၤဒံး. ပမ့ၢ်မၤ ဒ်န့ၣ်န့ၣ် ပနာ်သ့သပှၢ်တၢၢ်လၢ ယဟိဝၤယွၤ ကဒီသဒၢပှၤ လၢအမံၤအဃိ.—ယိၤ ၁၇:၁၁.
၁၇. ပမၤလၤကပီၤ ယဟိဝၤယွၤအမံၤ လၢကျဲအဂၤ ကသ့ဒ်လဲၣ်. (၁ ပ့းတရူး ၂:၁၂)
၁၇ ပဂုာ်ကျဲးစၢး မၤတၢ်ခဲလၢာ်လၢ ကမၤလၤကပီၤ ယဟိဝၤယွၤအမံၤ. (ကတိၤ ၃၀:၉; ယံး ၇:၈-၁၁) ခီဖျိလၢ ပှၤဂၤသ့ၣ်ညါဝဲလၢ ပကဲ ယဟိဝၤပှၤအုၣ်အသးအဃိ တၢ်လၢပမၤန့ၣ် အစံးထီၣ်ပတြၢၤ ယဟိဝၤယွၤအမံၤ မ့တမ့ၢ် အမၤဟးဂီၤ ယဟိဝၤယွၤ အမံၤသ့. (ဖး ၁ ပ့းတရူး ၂:၁၂.) အဃိ လၢပတၢ်ကတိၤ ဒီးပတၢ်မၤ တမံၤဂ့ၤတမံၤဂ့ၤန့ၣ် ပအဲၣ်ဒိး မၤလၤကပီၤ ယဟိဝၤယွၤအမံၤ ထီဘိ. ပတကဲ ပှၤလၢပှၤပှဲၤဘၣ် သနာ်က့ ပမ့ၢ်ဂုာ်ကျဲးစၢးဒ်န့ၣ်န့ၣ် မ့ၢ်ဒၣ် ပမၤလၤကပီၤ ယဟိဝၤယွၤအမံၤ.
၁၈. ယဟိဝၤယွၤအမံၤ အရ့ဒိၣ်လၢပဂီၢ်န့ၣ် ပပာ်ဖျါထီၣ်လၢ ကျဲအဂၤကသ့ဒ်လဲၣ်. (ကွၢ်စ့ၢ်ကီး တၢ်ဂ့ၢ်အဘျဲၣ်.)
၁၈ ပှၤဂၤမ့ၢ်ထံၣ်ပှၤ ဒ်လဲၣ်သနာ်က့ ပထံၣ်လၢ ယဟိဝၤယွၤအမံၤန့ၣ် အရ့ဒိၣ်န့ၢ်ပှၤဒံး. (စံး ၁၃၈:၂) ဘၣ်မနုၤအဃိ အရ့ဒိၣ်လၢ ပကအိၣ်ဒီး တၢ်ထံၣ်ဒ်အံၤလဲၣ်. ဖဲပမၤတၢ်လၢ အဘၣ် ယဟိဝၤယွၤ အသးအခါ ညီနုၢ်န့ၣ် ပှၤဂၤ တဘၣ်သူၣ်ဘၣ်သးပှၤဘၣ် ဒီးတဲအၢတဲသီပှၤ.a ဖဲယ့ၣ်ၡူး သံအခါ ပှၤထံၣ်အီၤလၢ အကဲပှၤမၤကမၣ်တၢ် ဒီးပှၤပာ်ဆံးအီၤ. ဘၣ်ဆၣ် ခီဖျိလၢ ယ့ၣ်ၡူး ဘၣ်သး မၤလၤကပီၤ ယဟိဝၤယွၤအမံၤ အဃိ အသးအိၣ် တူၢ်သံအသးဒ်အံၤ. ယ့ၣ်ၡူး “တပာ်တၢ်မဲာ်ဆှးလၢ တၢ်နီတမံၤဘၣ်” အဃိ ပှၤမ့ၢ်ထံၣ်အီၤဒ်လဲၣ် သနာ်က့ အတဘၣ်ယိၣ်တၢ် အါတလၢဘၣ်. (ဧ့ၤ ၁၂:၂-၄) ဒီးအသးစၢၢ်ဆၢလၢ အကမၤ ယဟိဝၤယွၤ အတၢ်ဘၣ်သး.—မး ၂၆:၃၉.
၁၉. နထံၣ်ယဟိဝၤယွၤ အမံၤဒ်လဲၣ် ဒီးဘၣ်မနုၤအဃိလဲၣ်.
၁၉ ပဘူၣ်ထီၣ်ဘါထီၣ်ဘၣ် ယဟိဝၤယွၤ ဒီးပကိးလီၤဘၣ်ပသးလၢ ယဟိဝၤယွၤအမံၤ အဃိ ပသးခုဒိၣ်မး. ခီဖျိလၢ ယဟိဝၤယွၤ အမံၤန့ၣ် အရ့ဒိၣ်လၢပဂီၢ် ဒိၣ်မးအဃိ ပှၤဂၤမ့ၢ်တဲအၢတဲသီပှၤ ဒီးမ့ၢ်ထံၣ်ဆံးပှၤ သနာ်က့ ပကဆဲး စံးထီၣ်ပတြၢၤ အမံၤဒံး. ဒီးမုၣ်ကီၤလံၢ် မ့ၢ်ဂုာ်ကျဲးစၢး မၤလီၤစၢ်ပသး သနာ်က့ မ်ပပာ်လီၤပသး ဂၢၢ်ဂၢၢ်ကျၢၤကျၢၤလၢ ပကဆဲး စံးထီၣ်ပတြၢၤ ယဟိဝၤယွၤ အမံၤထီဘိ. ပမ့ၢ်မၤဒ်န့ၣ်န့ၣ် ဒ်ယ့ၣ်ၡူးအသိး ပကပာ်ဖျါထီၣ်လၢ ယဟိဝၤယွၤအမံၤန့ၣ် အရ့ဒိၣ်လၢပဂီၢ် ဒိၣ်မး.
တၢ်သးဝံၣ် ၁၀ စံးပတြၢၤ ပၢ်ယဟိဝၤယွၤ
a စီၤယိၤဘး လၢအကဲပှၤသးတီန့ၣ် ဖဲအသကိးသၢဂၤ တဲအီၤလၢ အမၤကမၣ်ဘၣ်တၢ် တမံၤမံၤအခါ အဘၣ်ယိၣ်လၢ အမံၤကဟးဂီၤ. ခီၣ်ထံးခါ ဖဲအဖိတဖၣ် သံသဒၣ်အီၤ ဒီးတၢ်လၢအအိၣ်ဒီးအီၤတဖၣ် ဟးဂီၤကွံာ်ဝဲ ခဲလၢာ်အခါ “စီၤယိၤဘး တမၤတၢ်ဒဲးဘးဘၣ် ဒီးတပာ်ဒ့ၣ်ပာ်ကမၣ် ကစၢ်ယွၤ နီတမံၤဘၣ်.” (ဘး ၁:၂၂; ၂:၁၀) သနာ်က့ ဖဲစီၤယိၤဘး အသကိး တဲအီၤလၢ အမၤကမၣ်ဘၣ်တၢ် တမံၤမံၤအခါ အ “ဟးတဲကြီတၢ်.” ဖဲအံၤပထံၣ်ဘၣ်လၢ စီၤယိၤဘး အဲၣ်ဒိး ဒီသဒၢ အနီၢ်ကစၢ်အမံၤ ဒိၣ်န့ၢ်ဒံး အကပာ်စီဆှံ ကစၢ်ယွၤအမံၤဒံး.—ဘး ၆:၃; ၁၃:၄, ၅; ၃၂:၂; ၃၄:၅.