တၢ်သးသမူ အခီၣ်ထံးခီၣ်ဘိ ဟဲအိၣ်ထီၣ်ဒ်လဲၣ်

“တၢ်မူအဂံၢ်ခီၣ်ထံး အိၣ်ဒီး [ကစၢ်ယွၤ] လီၤ.” (စံးထီၣ်ပတြၢၤ ၃၆:၉) တၢ်ကတိၤတထံၣ်အံၤ နနာ်ဧါ. မ့မ့ၢ်ပှၤအဂၤတနီၤန့ၣ် အဝဲသ့ၣ်တဲဝဲလၢ တၢ်သးသမူန့ၣ် ပှၤတတ့လီၤဝဲ နီတဂၤဘၣ် ဒီးတၢ်သးသမူန့ၣ် ဟဲအိၣ်ထီၣ် ခီဖျိလၢ တၢ်ဘၣ်န့ၢ်အတီၤလီၤ. ဘၣ်ဆၣ် ခီဖျိလၢ ယဟိဝၤယွၤ တ့လီၤတၢ်သးသမူအဃိ အတၢ်တိာ်ပာ် လၢတၢ်သးသမူအဂီၢ်န့ၣ် ကဘၣ်အိၣ်ဝဲ တမံၤမံၤ.a အဃိ ခဲအံၤ ပကတဲသကိး ဘၣ်ဃးဒီး တၢ်သးသမူ ဟဲအိၣ်ထီၣ်အဂ့ၢ် လၢလံာ်စီဆှံပာ်ဖျါထီၣ်ဝဲ ဒီးဘၣ်မနုၤအဃိ ပနာ်တၢ်ဂ့ၢ်တဖၣ်အံၤသ့လဲၣ်.

၁. မူခိၣ်ဟီၣ်ခိၣ်ဒီး တၢ်အိၣ်လၢအပူၤခဲလၢာ်န့ၣ် ဟဲအိၣ်ထီၣ်ဒ်လဲၣ်.

လံာ်စီဆှံ တဲဝဲလၢ “လၢအခီၣ်ထံးန့ၣ် ကစၢ်ယွၤတ့လီၤ မူခိၣ်ဒီးဟီၣ်ခိၣ်လီၤ.” (၁ မိၤၡ့ ၁:၁) ပှၤစဲအ့ၣ်ဖိအါတက့ၢ် တူၢ်လိာ်ဝဲလၢ မူခိၣ်ဟီၣ်ခိၣ်ဒီး တၢ်အိၣ်လၢအပူၤခဲလၢာ်န့ၣ် အိၣ်ဒီးအခီၣ်ထံးခီၣ်ဘိ. မ့မ့ၢ်ဒ်န့ၣ်န့ၣ် မူခိၣ်ဟီၣ်ခိၣ်ဒီး တၢ်အိၣ်လၢအပူၤခဲလၢာ်န့ၣ် ကစၢ်ယွၤ တ့လီၤဝဲဒ်လဲၣ်. ကစၢ်ယွၤ သူဝဲအ “သးစီဆှံ” ဒ်သိးကတ့လီၤဝဲ မူခိၣ်ဟီၣ်ခိၣ်ဒီး တၢ်အိၣ်လၢအပူၤခဲလၢာ်လီၤ.​—၁ မိၤၡ့ ၁:၂.

၂. ဘၣ်မနုၤအဃိ ကစၢ်ယွၤတ့လီၤ ဟီၣ်ခိၣ်လဲၣ်.

ယဟိဝၤယွၤ “တတ့လီၤဟီၣ်ခိၣ် ကလီကလီဘၣ်, အဝဲတ့လီၤဝဲ ဒ်သိး ပှၤကအိၣ်ဝဲဆိးဝဲ လၢအပူၤအဂီၢ်လီၤ.” (ယၡါယၤ ၄၅:၁၈) ကစၢ်ယွၤတ့လီၤဟီၣ်ခိၣ် ဃံဃံလၤလၤ ဒီးလၢဟီၣ်ခိၣ်န့ၣ် အိၣ်ဒီးတၢ်ကိးမံၤဒဲး လၢပှၤဟီၣ်ခိၣ်ဖိလိၣ်ဘၣ်ဝဲ ဒ်သိးအဝဲသ့ၣ် ကအိၣ်မူလီၤထူလီၤယိာ်အဂီၢ်. (ဖး ယၡါယၤ ၄၀:၂၈ ဒီး ၄၂:၅.) ပှၤစဲအ့ၣ်ဖိတဲဝဲလၢ ဟီၣ်ခိၣ်ဖျၢၣ်န့ၣ် အလီၤဆီဒိၣ်မး ဒီးအလီၤဆီန့ၢ်ဒံး မူဖျၢၣ်အဂၤတဖၣ်. ဒီးလၢမူဖျၢၣ်ခဲလၢာ်အကျါ ဟီၣ်ခိၣ်ဖျၢၣ်မ့ၢ်ဝဲ မူဖျၢၣ်ထဲတဖျၢၣ်လၢ ပှၤဟီၣ်ခိၣ်ဖိ အိၣ်မူဝဲလၢအပူၤသ့.

၃. ပှၤဟီၣ်ခိၣ်ဖိန့ၣ် လီၤဆီန့ၢ်ဒံး ဆၣ်ဖိကီၢ်ဖိဒ်လဲၣ်.

ယဟိဝၤယွၤ တ့လီၤဟီၣ်ခိၣ်ဖျၢၣ် ဝံၤဒီး အဝဲတ့လီၤ တၢ်သးသမူ လၢဟီၣ်ခိၣ်ချၢ ဒ်သိးဒီး ဆၣ်ဖိကီၢ်ဖိတဖၣ် ဒီးအဒုးမဲထီၣ်ဝဲ တၢ်မုၢ်တၢ်ဘိတဖၣ်. ဝံၤဒီး “ကစၢ်ယွၤတ့လီၤ ပှၤဟီၣ်ခိၣ်ဖိ ဒ်အက့ၢ်အဂီၤအသိးလီၤ.” (ဖး ၁ မိၤၡ့ ၁:၂၇.) ဘၣ်မနုၤအဃိ ပှၤဟီၣ်ခိၣ်ဖိန့ၣ် လီၤဆီန့ၢ်ဒံး တၢ်ဘၣ်တ့အဂၤလဲၣ်. မ့ၢ်လၢ ကစၢ်ယွၤတ့လီၤပှၤ ဒ်အက့ၢ်အဂီၤအသိး ဒီးပပာ်ဖျါထီၣ်တၢ်အဲၣ် ဒီးမၤတၢ်တီတီလိၤလိၤ ဒ်ကစၢ်ယွၤအသိး သ့ဝဲအဃိ ပလီၤဆီန့ၢ်ဒံး တၢ်ဘၣ်တ့အဂၤ. ကစၢ်ယွၤ တ့လီၤစ့ၢ်ကီးပှၤ ဃုာ်ဒီးတၢ်သ့တၢ်ဘၣ် ဒ်သိးပကမၤလိကျိာ်အဂၤတဖၣ်, ပကွၢ်တၢ်ဃံတၢ်လၤကမုာ် ဒီးပကနၣ်တၢ်ဒ့တၢ်အူ ဒီးတၢ်သူၣ်ဝံၣ်သးဆၢ ကမုာ်အဂီၢ်လီၤ. တကးဒံးဘၣ် ပဘူၣ်ထီၣ်ဘါထီၣ် ပတၢ်ဘၣ်တ့ကစၢ်သ့ ဒီးပမၤဘၣ်အတၢ်မၤအဃိ ပတလီၤဂာ်ဒီး ဆၣ်ဖိကီၢ်ဖိဘၣ်.

ဃုသ့ၣ်ညါအါထီၣ်

ပကတဲသကိး ဘၣ်ဃးဒီး တၢ်သးသမူန့ၣ် ကစၢ်ယွၤတ့လီၤဝဲ ဒီးတၢ်ဘၣ်တ့အဂ့ၢ် လၢအအိၣ်လၢ လံာ်စီဆှံပူၤန့ၣ် ပနာ်အီၤသ့. တကးဒံးဘၣ် ပကတဲသကိး ဘၣ်ဃးဒီး ပှၤဟီၣ်ခိၣ်ဖိ အတၢ်ဂ့ၤတၢ်ဝါတဖၣ်န့ၣ် သိၣ်လိပှၤဘၣ်ဃးဒီး ကစၢ်ယွၤအဂ့ၢ်ဒ်လဲၣ်.

၄. ကစၢ်ယွၤတ့လီၤဝဲ တၢ်သးသမူတဖၣ်

ပှၤဟီၣ်ခိၣ်ဖိတဖၣ် တ့ဒိးဝဲ ကစၢ်ယွၤအတၢ်ဘၣ်တ့ ဒီးပှၤပတြၢၤအဝဲသ့ၣ်. မ့မ့ၢ် တၢ်ဘၣ်တ့ကစၢ်မီၤ ပတကြၢး စံးပတြၢၤအီၤဧီၤ. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.

တၢ်ဂီၤမူ– နသကိးသးစၢ်တဖၣ်တဲဝဲ ဘၣ်ဃးဒီး တၢ်နာ်ကစၢ်ယွၤအဂ့ၢ် (၂:၄၃)

• ပှၤကူၣ်ဘၣ်ကူၣ်သ့တဖၣ် တ့ဒိးဝဲ ကစၢ်ယွၤအတၢ်ဘၣ်တ့ဒ်လဲၣ်.

ဟံၣ်န့ၣ် ပှၤတဂၤဂၤ ဘၣ်ရဲၣ်ကျဲၤလီၤဝဲ ဝံၤမၣ် တ့ထီၣ်ဝဲ. မ့မ့ၢ်တၢ်ဘၣ်တ့တဖၣ်မီၤ, မတဂၤရဲၣ်ကျဲၤလီၤဝဲ ဝံၤဒီး တ့လီၤဝဲလဲၣ်. ဖး ဧ့ၤဘြံၤ ၃:၄ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• နဘၣ်သူၣ်ဘၣ်သး ကစၢ်ယွၤ အတၢ်ဘၣ်တ့ ဖဲလဲၣ်တခါလဲၣ်.

• ကစၢ်ယွၤ တ့လီၤဝဲ မူခိၣ်ဟီၣ်ခိၣ်ဒီး တၢ်အိၣ်လၢအပူၤခဲလၢာ်န့ၣ် ပနာ်သ့ဧါ. ဘၣ်မနုၤအဃိ ပနာ်သ့လဲၣ်.

မ့ၢ်နသ့ၣ်ညါဧါ

တၢ်ဂ့ၢ်တၢ်ကျိၤ ဒီးတၢ်ဂီၤမူတဖၣ် လၢအဘၣ်ဃးဒီး ကစၢ်ယွၤတ့လီၤ တၢ်သးသမူအဂ့ၢ်န့ၣ် နကွၢ်ဃုအီၤလၢ တၢ်ဂ့ၢ်ပိာ်ထွဲလိာ်အခံတဖၣ် လၢအခိၣ်တီမ့ၢ်ဝဲ “တၢ်ဘၣ်တ့ကစၢ်အိၣ်ဧါ” ဒီး “တၢ်ထံၣ်ဘၣ်ဃးဒီး သးသမူအဂံၢ်ခီၣ်ထံး” လၢ jw.org အပူၤသ့.

“ဒီးဟံၣ်ကိးဖျၢၣ်ဒဲးန့ၣ် ပှၤလၢအတ့ထီၣ်အီၤ အိၣ်ဝဲလီၤ. ဘၣ်ဆၣ် ပှၤလၢ အတ့တၢ်ခဲလၢာ် တဂၤန့ၣ် မ့ၢ်ဝဲကစၢ်ယွၤလီၤ”

၅. တၢ်ဘၣ်တ့အဂ့ၢ် လၢအအိၣ်လၢ လံာ်စီဆှံပူၤန့ၣ် ပနာ်အီၤသ့

တၢ်ဂီၤမူ– မူခိၣ်ဟီၣ်ခိၣ်ဒီး တၢ်အိၣ်လၢအပူၤခဲလၢာ်န့ၣ် ကစၢ်ယွၤ တ့လီၤဝဲဧါ —တၢ်ဂီၤမူဖုၣ်ကိာ် (၃:၅၁)

• မ့ၢ်လံာ်စီဆှံသိၣ်လိဝဲလၢ ကစၢ်ယွၤတ့လီၤဟီၣ်ခိၣ် ဒီးတၢ်သးသမူလၢဟီၣ်ခိၣ်ချၢ ဝံၤဝဲလၢဃုနံၤ အတီၢ်ပူၤ, ဘၣ်ဆၣ် ဃုနံၤန့ၣ် အဲၣ်ဒိးတဲဝဲတနံၤ ၂၄ နၣ်ရံၣ်ဧါ.

• တၢ်ဘၣ်တ့အဂ့ၢ် လၢအအိၣ်လၢ လံာ်စီဆှံပူၤန့ၣ် အကဲဝဲ တၢ်မ့ၢ်တၢ်တီဧါ ဒီးပနာ်အီၤသ့ဧါ. ဘၣ်မနုၤအဃိ နတဲဒ်န့ၣ်လဲၣ်.

ဖး ၁ မိၤၡ့ ၁:၁ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ပှၤစဲအ့ၣ်ဖိတဖၣ် တဲဝဲလၢ မူခိၣ်ဟီၣ်ခိၣ်ဒီး တၢ်အိၣ်လၢအပူၤခဲလၢာ်န့ၣ် အစးထီၣ်သး အခီၣ်ထံးခီၣ်ဘိအိၣ်ဝဲ. တၢ်လၢပှၤစဲအ့ၣ်ဖိတဖၣ် တဲဝဲန့ၣ် ဘၣ်လိာ်အသးဒီး လံာ်စီဆှံအဆၢ လၢနဖး မၢကၢာ်န့ၣ်ဒ်လဲၣ်.

ပှၤတနီၤ ဆိကမိၣ်ဝဲလၢ ကစၢ်ယွၤ တ့လီၤတၢ်သးသမူ ယိယိဖိတခါ ဝံၤဒီး တၢ်သးသမူ လဲလိာ်က့ၤအသး တဆီဘၣ်တဆီ. ဖး ၁ မိၤၡ့ ၁:​၂၁, ၂၅, ၂၇ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• မ့ၢ်လံာ်စီဆှံ သိၣ်လိဝဲလၢ ကစၢ်ယွၤ တ့လီၤတၢ်သးသမူ ယိယိဖိဝံၤဒီး ပျဲဝဲ လၢအကကဲထီၣ်က့ၤ လၢညၣ်, ဆၣ်ဖိကီၢ်ဖိ ဒီးပှၤဟီၣ်ခိၣ်ဖိဧါ. မ့တမ့ၢ်ဘၣ်န့ၣ် မ့ၢ်ကစၢ်ယွၤ တ့လီၤ တၢ်သးသမူ “ဒ်အကလုာ် အိၣ်ဝဲအသိး” ဧါ.

၆. ပှၤဟီၣ်ခိၣ်ဖိန့ၣ် မ့ၢ်ဝဲ ကစၢ်ယွၤအတၢ်ဘၣ်တ့ လၢအလီၤဆီကတၢၢ်

ပဝဲပှၤဟီၣ်ခိၣ်ဖိန့ၣ် ပလီၤဆီန့ၢ်ဒံး ဆၣ်ဖိကီၢ်ဖိလၢ ယဟိဝၤယွၤ တ့လီၤဝဲ. ဖး ၁ မိၤၡ့ ၁:၂၆ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ကစၢ်ယွၤတ့လီၤပှၤ ဒ်အက့ၢ်အဂီၤအသိးအဃိ ပပာ်ဖျါထီၣ် တၢ်အဲၣ် ဒီးတၢ်ဒိသူၣ်ဒိသး လၢပှၤဂၤအဖီခိၣ်သ့. ပမ့ၢ်ဆိကမိၣ်ထံ တၢ်ဂ့ၢ်တခါအံၤန့ၣ် ပသ့ၣ်ညါဘၣ်လၢ ကစၢ်ယွၤ ကဲပှၤဒ်လဲၣ်တဂၤလဲၣ်.

တၢ်ဂ့ၢ်လၢအရ့ဒိၣ်

ယဟိဝၤယွၤ တ့လီၤမူခိၣ်ဟီၣ်ခိၣ်ဒီး တၢ်အိၣ်လၢအပူၤခဲလၢာ် ဒီးတၢ်သးသမူခဲလၢာ်.

တၢ်ကွၢ်ကဒါက့ၤ

• လံာ်စီဆှံ သိၣ်လိဝဲလၢ မူခိၣ်ဟီၣ်ခိၣ်ဒီး တၢ်အိၣ်လၢအပူၤခဲလၢာ်န့ၣ် ဟဲကဲထီၣ်အသးဒ်လဲၣ်.

• မ့ၢ်ကစၢ်ယွၤ တ့လီၤတၢ်သးသမူ ယိယိဖိ ဒ်အကလုာ်အိၣ်ဝဲအသိး ဒီးပျဲဝဲလၢ အကကဲထီၣ် တၢ်သးသမူလၢအဂၤ တဆီဘၣ်တဆီဧါ. မ့တမ့ၢ်ဘၣ်န့ၣ် အတ့လီၤဝဲ တၢ်သးသမူခဲလၢာ်ဧါ.

• ပှၤဟီၣ်ခိၣ်ဖိန့ၣ် လီၤဆီန့ၢ်ဒံး ဆၣ်ဖိကီၢ်ဖိဒ်လဲၣ်.

ဃုသ့ၣ်ညါ

ဃုသ့ၣ်ညါကွၢ် ကစၢ်ယွၤ တၢ်ဘၣ်တ့အဂ့ၢ်.

“ကစၢ်ယွၤ အတၢ်ဘၣ်တ့န့ၣ် သိၣ်လိပှၤမနုၤလဲၣ်” (ပၢၢ်ထီၣ်! လါစဲးပတ့ဘၢၣ် ၂၀၀၆)

ကွၢ်တၢ်ဂီၤမူ လၢအပာ်ဖျါထီၣ်ဝဲ ပါတဂၤ တဲဘၣ်ဝဲအဖိခွါ တၢ်ဘၣ်တ့အဂ့ၢ် လၢအအိၣ်လၢ လံာ်စီဆှံအပူၤ.

ယဟိဝၤယွၤတ့လီၤဝဲ တၢ်ခဲလၢာ် (၂:၃၇)

တၢ်သးသမူ လဲလိာ်အသး တဆီဘၣ်တဆီန့ၣ် အဘၣ်လိာ်အသးဒီး လံာ်စီဆှံဧါ.

“မ့ၢ်ကစၢ်ယွၤ တ့လီၤတၢ်ဘၣ်တ့ တကလုာ်ဝံၤတကလုာ် ဒီးပျဲဝဲလၢ အကကဲထီၣ်က့ၤလၢ တၢ်သးသမူလၢအဂၤဧါ” (တၢ်မၤလိလၢ အအိၣ်လၢ online အဖီခိၣ်)

တၢ်ဃံတၢ်ကွဲလၢပျၢၤ လၢပှၤစဲအ့ၣ်ဖိတဖၣ် မၤကွၢ်ဝဲန့ၣ် မ့ၢ်အပာ်ဖျါထီၣ်လၢ ကစၢ်ယွၤ တ့လီၤတၢ်သးသမူဧါ မ့တမ့ၢ် တၢ်သးသမူ အိၣ်ထီၣ်ဒၣ်အတၢ်ဧါန့ၣ် ဃုသ့ၣ်ညါကွၢ်.

တၢ်သးသမူ အခီၣ်ထံးခီၣ်ဘိ ​—တၢ်သံကွၢ် ယဲၢ်ဖျၢၣ်လၢ ပကြၢးသံကွၢ် (ဘရိၣ်ခၠၣ်)