မ့ၢ်ပှၤဒိကနၣ် ပတၢ်ထုကဖၣ် အိၣ်ဝဲတဂၤဂၤဧါ

ပှၤတနီၤနီၤထံၣ်ဝဲလၢ တၢ်ဃ့ဘါထုကဖၣ်န့ၣ် မ့ၢ်တၢ်မၤလၢာ်ဂီၤ တၢ်ဆၢကတီၢ် ဒီးပှၤလၢအသးအိၣ် ဒိကနၣ်နၤစ့ၢ်ကီး တအိၣ်ဝဲနီတဂၤဘၣ်. မ့မ့ၢ် ပှၤအဂၤသ့ၣ်တဖၣ် တူၢ်ဘၣ်ဝဲလၢ အဝဲသ့ၣ်ဃ့ဘါထုကဖၣ်တၢ် ဘၣ်ဆၣ် တဒိးန့ၢ်ဘၣ်ဝဲ တၢ်စံးဆၢဘၣ်. ပှၤလၢတနာ်ယွၤတဂၤ ထံၣ်တမှံကွၢ်ဝဲယွၤ ဒီးဃ့ဝဲလၢ– “တဲကသွံတၢ်ဒီးယၤတစဲးဖိတက့ၢ်.” ဘၣ်ဆၣ် အဝဲတဲဝဲလၢ ယွၤန့ၣ်– “အိၣ်ဘှီၣ်ကလာ်လီၤ.”

ဘၣ်ဆၣ်လံာ်စီဆှံ အၢၣ်လီၤပှၤလၢ ကစၢ်ယွၤဒိကနၣ်ဝဲ ပတၢ်ထုကဖၣ်န့ၣ်လီၤ. လံာ်စီဆှံ ပာ်ဖျါထီၣ်န့ၢ်ပှၤလၢ– “ဖဲသုကိးထီၣ်တၢ်ဆူအအိၣ် လၢတၢ်မၤစၢၤအဂီၢ်န့ၣ်, အဝဲဒၣ်ကစံးဆၢသုလီၤ.” (ယၡါယၤ ၃၀:၁၉, ခ့ခါစှီၤကျိာ် ) ဒီးလံာ်စီဆှံ လၢအဂၤတဆၢ စံးဝဲဒ်အံၤ– “ပှၤတီပှၤလိၤအတၢ်ထုကဖၣ်န့ၣ် ဘၣ်အသးလီၤ.”—ကတိၤဒိ ၁၅:၈.

လံာ်စီဆှံ ပာ်ဖျါ တၢ်အဒိအတဲာ်တနီၤလၢ ယွၤဒိကနၣ်ဝဲ ပှၤလၢအဃ့ထီၣ်တၢ်ဆူ အအိၣ်န့ၣ်လီၤ. လံာ်စီဆှံတဆၢစံးဝဲလၢ ယ့ၣ်ၡူးဃ့ဘါထုကဖၣ်တၢ်ဒီး “ဃ့ကညး ပှၤလၢအအုၣ်က့ၤခီၣ်က့ၤအီၤလၢ တၢ်သံသ့တဂၤ” ဒီးယွၤ “ဒိကနၣ်အကလုၢ်လီၤ.” (ဧ့ၤဘြံၤ ၅:၇) တၢ်အဒိအတဲာ် အဂၤတဖၣ် ပထံၣ်ဘၣ်အီၤသ့ဖဲ ဒၤနံးယ့လး ၉:၂၁ ဒီး၂ ကွဲးနီၣ်တၢ် ၇:၁ န့ၣ်လီၤ.

ဘၣ်မနုၤအဃိ ပှၤတနီၤနီၤ တူၢ်ဘၣ်ဝဲလၢ အတၢ်ထုကဖၣ်န့ၣ် တၢ်တစံးဆၢအီၤဘၣ်လဲၣ်. ဒ်သိးပတၢ်ထုကဖၣ် ကဘၣ်တၢ်စံးဆၢအီၤအဂီၢ် ပကဘၣ်ဃ့ဘါထုကဖၣ်တၢ်ဆူ ယဟိဝၤယွၤa အအိၣ်ဒီး တဘၣ်မ့ၢ်ဝဲလၢ ယွၤအဂၤတဖၣ် မ့တမ့ၢ် ဖံဖုလၢ အသံတ့ၢ်ဝဲတဖၣ်အအိၣ်ဘၣ်. ကစၢ်ယွၤ အၢၣ်လီၤဝဲလၢပမ့ၢ် “ဃ့တၢ်တမံၤမံၤ ဖဲတၢ်ဘၣ်အသး” န့ၣ်အဝဲ “ကဒိကနၣ်ပှၤလီၤ.” (၁ ယိၤဟၣ် ၅:၁၄) ဒ်သိး ပတၢ်ထုကဖၣ် ကဘၣ်တၢ်စံးဆၢအီၤအဂီၢ် ပကဘၣ်ဃုသ့ၣ်ညါ ကစၢ်ယွၤ ဒီးအတၢ်ဘၣ်သးအဂ့ၢ်န့ၣ်လီၤ.

ပှၤအါဂၤနာ်ဝဲလၢ တၢ်ထုကဖၣ်န့ၣ် တမ့ၢ်ထဲ တၢ်ဘူၣ်တၢ်ဘါအလုၢ်အလၢ် တခါဘၣ်. ယွၤန့ၣ် ဒိကနၣ်ဝဲ ဒီးစံးဆၢဝဲ တၢ်ထုကဖၣ်န့ၣ်လီၤ. အါစဲး, အိၣ်လၢကီၢ်ခဲၣ်နယၤတဂၤ စံးဝဲလၢ “ယဃ့ဘါထုကဖၣ် တၢ် ဒ်သိးယကနၢ်ပၢၢ်ထီၣ် လံာ်စီဆှံအဂီၢ်လီၤ. တယံာ်တမီၢ်ဘၣ်န့ၣ် ပှၤတဂၤဟဲဆူယအိၣ် ဒီးမၤစၢၤယၤလၢ ယကနၢ်ပၢၢ်ထီၣ် လံာ်စီဆှံအဂီၢ်လီၤ.” ဟ့လဒၣ်, အိၣ်လၢကီၢ်ဖံလံးဖံ(စ်)တဂၤ အဲၣ်ဒိးပတုာ်ကွံာ်ဝဲ တၢ်အီမိာ်န့ၣ်လီၤ. အဝဲဂုာ်ကျဲးစၢးပတုာ်ဝဲ အါဘျီသနာ်က့ မၤဝဲတန့ၢ်ဘၣ်. ဘၣ်ဆၣ် အဝၤတဲအီၤဒ်အံၤ “ဘၣ်မနုၤအဃိ နတဃ့ဘါထုကဖၣ်တၢ်ဆူ ကစၢ်ယွၤအအိၣ် ဒ်သိးကမၤစၢၤနၤ အဂီၢ်ဘၣ်လဲၣ်.” ဟ့လဒၣ် ဒိကနၣ်ဝဲ အဝၤအကလုၢ်ဒီး စံးဝဲဒ်အံၤ “ယကမၢကမၣ် ဒိၣ်မးမ့ၢ်လၢ ကစၢ်ယွၤ မၤစၢၤယၤအဃိန့ၣ်လီၤ. လီၤဂာ်ဒ်သိး ယသးလၢအအဲၣ်ဒိး အီမိာ်န့ၣ် ဟါမၢ်ကွံာ်ဝဲလီၤ. လၢတၢ်န့ၣ်အဃိ ယပတုာ်ကွံာ် တၢ်အီမိာ်န့ၢ်ဝဲလီၤ.”

မ့ၢ်ကစၢ်ယွၤ သးအိၣ်မၤစၢၤနၤလၢ နတၢ်လိၣ်ဘၣ်တဖၣ်လၢ အလီၤပလိာ်လိာ်အသးဒီး အတၢ်ဘၣ်အသးစ့ၢ်ကီးဧါ.