ကစၢ်ယွၤမၤတ့ၢ် တၢ်မနုၤတဖၣ်လဲၣ်

နမ့ၢ်အဲၣ်ဒိးသ့ၣ်ညါ ပှၤတဂၤအဂ့ၢ်ဂ့ၤဂ့ၤန့ၣ်, နကဘၣ်သ့ၣ်ညါတၢ်လၢအဝဲမၤတ့ၢ်ဝဲ ဒီးတၢ်ကီတၢ်ခဲလၢ အလဲၤခီဖျီဘၣ်ဝဲတဖၣ်လီၤ. ဒ်န့ၣ်အသိး, နမ့ၢ်အဲၣ်ဒိးသ့ၣ်ညါထီၣ်​ ကစၢ်ယွၤအဂ့ၢ်ဂ့ၤဂ့ၤန့ၣ်​ နကဘၣ်မၤလိတၢ်လၢ အမၤတ့ၢ်ဝဲတဖၣ်လီၤ. နမ့ၢ်မၤဒ်န့ၣ်န့ၣ်​ နကသ့ၣ်ညါထီၣ်ဘၣ်​ တၢ်လၢကစၢ်ယွၤမၤတ့ၢ်ဝဲတဖၣ်န့ၣ်​ အကဲဘျုးလၢနဂီၢ်လၢ ဆၢကတီၢ်ခဲအံၤ ဒီးခါဆူညါအဂီၢ်အဃိ နကကမၢကမၣ်ဒိၣ်မးလီၤ.

ကစၢ်ယွၤတ့လီၤ တၢ်ခဲလၢာ် ဂ့ၤဝဲလၢပဂီၢ်

ယဟိဝၤယွၤမ့ၢ်တၢ်ဘၣ်တ့ကစၢ် အဒိၣ်အထီကတၢၢ်တဂၤလီၤ. ဒီး “လၢဟီၣ်ခိၣ် ဘၣ်တၢ်တ့လီၤအီၤလံၤလံၤန့ၣ်, ပှၤထံၣ်ဘၣ် အတၢ်တအိၣ်ဖျါဘၣ်တဖၣ် ထံထံဆးဆး” လီၤ. (ရိမ့ၤ ၁:၂၀) “တ့လီၤဝဲဟီၣ်ခိၣ်လၢ အစိအကမီၤ, မၤကျၢၤလၢာ်ခိၣ်လၢ အတၢ်ကူၣ်သ့, ဒီးသလၣ်ထီၣ်မူခိၣ်လၢ အတၢ်ကူၣ်တၢ်ဆးလီၤ.” (ယံးရမံယၤ ၁၀:၁၂) တၢ်ဘၣ်တ့လၢအလီၤလိၢ်လီၤလးတဖၣ်အံၤ ပာ်ဖျါထီၣ်ဝဲလၢ ကစၢ်ယွၤသူၣ်အိၣ်သးအိၣ်ပှၤလီၤ.

ယဟိဝၤယွၤ တ့လီၤပှၤ “ဒ်အဂီၤဒၣ်ဝဲအသိးလီၤ” အဃိအဘျုးအိၣ်လၢ ပဂီၢ်ဒ်လဲၣ်န့ၣ်ဆိကမိၣ်ကွၢ်တက့ၢ်. (၁ မိၤၡ့ ၁:၂၇) အဲၣ်ဒိးတဲဝဲအခီပညီလၢ အဝဲတ့လီၤပှၤဃုာ်ဒီး အတၢ်ဂ့ၤတၢ်ဝါတဖၣ်​ ဒ်သိးပကပာ်ဖျါထီၣ်က့ၤအီၤ တသ့ဖဲအသ့န့ၣ်လီၤ. အဝဲတ့လီၤပှၤဃုာ်ဒီး သးလၢပကအဲၣ်ဒိးဘူၣ်ထီၣ်ဘါထီၣ်အီၤ ဒီးတၢ်သ့တၢ်ဘၣ်လၢ ပကနၢ်ပၢၢ်အဝဲအတၢ်ထံၣ်​ ဒီးအတၢ်သိၣ်တၢ်သီတဖၣ်လီၤ. ပမ့ၢ်အိၣ်မူဒ် ကစၢ်ယွၤတၢ်သိၣ်တၢ်သီအသိးန့ၣ်​ ပတၢ်အိၣ်မူကပှဲၤဒီးအခီပညီ ဒီးပကအိၣ်ဒီးတၢ်သူၣ်ခုသးခုလီၤ. တကးဒံးဘၣ်​ အဝဲဟ့ၣ်ပှၤတၢ်ခွဲးတၢ်ယာ်လၢ ပကရ့လိာ်သးဒီးအီၤလီၤ.

ဖဲပကွၢ်ကစၢ်ယွၤ အတၢ်ဘၣ်တ့လၢဟီၣ်ခိၣ်ချၢအခါ ပသ့ၣ်ညါဘၣ်လၢ အဝဲအသးအိၣ်ပှၤလီၤ. တၢ်မၢဖိပီလူးတဲဝဲလၢယွၤ “မၤဂ့ၤတၢ်, ဒီးမၢတၢ်ဟဲစူၤလီၤလၢမူခိၣ်, ဒီးဟ့ၣ်လီၤ[ပှၤ]လၢ တၤသူၣ်တၤသၣ်​ အကတီၢ်, ဒီးမၤပှဲၤ[ပ]သးလၢ တၢ်အီၣ်တၢ်အီ, ဒီးတၢ်သူၣ်မုာ်သးမုာ်သတးဒီး, တၢ်အုၣ်အသးတအိၣ်ဘၣ်န့ၣ်, တပာ်လီၤတဲာ်အကစၢ်ဒၣ်ဝဲဘၣ်.” (မၤတၢ် ၁၄:၁၇) ကစၢ်ယွၤတ့လီၤန့ၢ်ပှၤတၢ် အါန့ၢ်ဒံးတၢ်လၢပလိၣ်ဘၣ်​ တဖၣ်လီၤ. ဒ်သိးပကအိၣ်ဒီးတၢ်သူၣ်ခုသးခုအဂီၢ် ကစၢ်ယွၤတ့လီၤန့ၢ်ပှၤတၢ် အကလုာ်ကလုာ် ဒီးအါအါဂီၢ်ဂီၢ်လီၤ. တမ့ၢ်ထဲတၢ်သ့ၣ်တဖၣ်အံၤဘၣ်​ ကစၢ်ယွၤတိာ်ပာ်တၢ်လၢပဂီၢ်အိၣ်ဒံးအါမးလီၤ.

ယဟိဝၤယွၤတ့လီၤဟီၣ်ခိၣ်​ ဒ်သိးပှၤဟီၣ်ခိၣ်ဖိတဖၣ်​ ကအိၣ်မူဘၣ်လီၤထူလီၤယိာ်အဂီၢ်လီၤ. လံာ်စီဆှံပာ်ဖျါဝဲလၢ “ဟီၣ်ခိၣ်အံၤ ဟ့ၣ်လီၤဝဲလၢပှၤကညီလီၤ” ဒီး “တမ့ၢ်ဘၣ်ဒ်သိး အကအိၣ်ကလီဒီးတ့လီၤဝဲဘၣ်. မ့ၢ်ဒ်သိးအကအိၣ်ဒီး ပှၤအိၣ်ဝဲဆိးဝဲလၢအဖီခိၣ်လီၤ.” (စံးထီၣ်ပတြၢၤ ၁၁၅:၁၆; ယၡါယၤ ၄၅:၁၈) မတၤတဖၣ်​ ကအိၣ်မူဘၣ်ဝဲလဲၣ်​ ဒီးကအိၣ်မူဘၣ်ဝဲယံာ်ထဲလဲၣ်. “ပှၤတီပှၤလိၤန့ၢ်ဘၣ်သါထံဧိၤကီၢ်ဧိၤ, ဒီးအိၣ်ဝဲဆိးဝဲ လီၤစိၤလီၤထီလီၤ.”—စံးထီၣ်ပတြၢၤ ၃၇:၂၉.

လၢတၢ်န့ၢ်အဃိ ယဟိဝၤယွၤတ့လီၤပိာ်မုၣ်ဒီးပိာ်ခွါ အဆိကတၢၢ်ခံဂၤ လၢအမ့ၢ်နီၢ်အံၣ်အု ဒီးစီၤအၤဒၣ်​ ဒီးပာ်လီၤဝဲလၢ ဟီၣ်ခိၣ်ပၤရဒံစူးအပူၤ “ဒ်သိးအကမၤအီၤ, ဒီးပၢၤအီၤလီၤ.” (၁ မိၤၡ့ ၂:၈, ၁၅) ကစၢ်ယွၤဟ့ၣ်အဝဲသ့ၣ်​ မူဒါလၢအလီၤသူၣ်ခုသးခုခံခါ လၢအမ့ၢ် “မ်သုသၣ်ထီၣ်, ဒီးအါထီၣ်, ဒီးမၤပှဲၤထီၣ်ဟီၣ်ခိၣ်ဒီးမၤနၢၤအီၤ” တက့ၢ်. (၁ မိၤၡ့ ၁:၂၈) လၢတၢ်န့ၢ်အဃိ နီၢ်အံၣ်အုဒီးစီၤအၤဒၣ်​ အိၣ်ဒီးတၢ်မုၢ်လၢ်လၢ ကအိၣ်မူဘၣ်လၢဟီၣ်ခိၣ်​ လီၤထူလီၤယိာ်လီၤ. ဘၣ်ဆၣ်လီၤသးအုးဒိၣ်မးလၢ နီၢ်အံၣ်အုဒီးစီၤအၤဒၣ်​ ဃုထၢဝဲလၢ တဒိကနၣ်ကစၢ်ယွၤအကလုၢ်အဃိ အတၢ်ခွဲးတၢ်ယာ်လၢ အကကဲဘၣ်​ “ပှၤတီပှၤလိၤ” လၢက “န့ၢ်ဘၣ်သါထံဧိၤကီၢ်ဧိၤ” န့ၣ်လီၤမၢ်ကွံာ်ဝဲလီၤ. ဘၣ်ဆၣ်​ ပကတဲသကိး တၢ်ဂ့ၢ်ဘၣ်ဃးဒီး အဝဲသ့ၣ်မၤတၢ်ကမၣ်သနာ်က့ ယဟိဝၤယွၤတဆီတလဲ အတၢ်တိာ်ပာ်လၢ ပဂီၢ်ဒီးဟီၣ်ခိၣ်အဂီၢ်န့ၣ်ဘၣ်. အဆိကတၢၢ်, ပကတဲသကိး ဘၣ်ဃးဒီးတၢ်လၢ ကစၢ်ယွၤမၤတ့ၢ်ဝဲတခါလီၤ.

ကစၢ်ယွၤကတဲာ်ကတီၤန့ၢ်ပှၤ အကလုၢ်ကထါလံာ်စီဆှံ

လံာ်စီဆှံန့ၣ်ပသ့ၣ်ညါအီၤ လၢအမ့ၢ်ယွၤအကလုၢ်ကထါလီၤ. ဘၣ်မနုၤအဃိ ယဟိဝၤယွၤကတဲာ်ကတီၤန့ၢ်ပှၤ လံာ်စီဆှံလဲၣ်. အတၢ်ဂ့ၢ်ခိၣ်သ့ၣ်န့ၣ်​ မ့ၢ်ဒ်သိး ပကသ့ၣ်ညါအဂ့ၢ်အဂီၢ်လီၤ. (ကတိၤဒိ ၂:၁-၅) လံာ်စီဆှံတစံးဆၢဝဲ ပတၢ်သံကွၢ်ခဲလၢာ် လၢဘၣ်ဃးဒီးကစၢ်ယွၤအဂ့ၢ်န့ၣ်ဘၣ်. လံာ်အဂၤတဖၣ်စ့ၢ်ကီး စံးဆၢဝဲတသ့ဘၣ်. (စံၣ်တဲၤတဲလီၤတၢ် ၃:၁၁) ဘၣ်ဆၣ်တၢ်လၢလံာ်စီဆှံပာ်ဖျါထီၣ်ဝဲ ကိးမံၤဒဲးန့ၣ်​ မၤစၢၤပှၤဒ်သိး ပသ့ၣ်ညါထီၣ်​ ကစၢ်ယွၤအဂ့ၢ်လီၤ. ပမ့ၢ်ကွၢ် ကစၢ်ယွၤရ့ဒီးပှၤဟီၣ်ခိၣ်ဖိတဖၣ်အဂ့ၢ်န့ၣ်​ ပသ့ၣ်ညါဘၣ်လၢ အဝဲမ့ၢ်ပှၤဒ်လဲၣ်တဂၤလဲၣ်. အဝဲအဲၣ်ပှၤဒ်လဲၣ်တဖၣ်လဲၣ်​ ဒီးအဝဲသးဟ့ ပှၤဒ်လဲၣ်တဖၣ်လဲၣ်န့ၣ်လီၤ. (စံးထီၣ်ပတြၢၤ ၁၅:၁-၅) ပသ့ၣ်ညါဘၣ်စ့ၢ်ကီး ကစၢ်ယွၤတၢ်ထံၣ်လၢ တၢ်ဘူၣ်ထီၣ်ဘါထီၣ်, တၢ်သကဲာ်ပဝး ဒီးတၢ်ထူးတၢ်တီၤ အဖီခိၣ်အိၣ်ဒ်လဲၣ်န့ၣ်လီၤ. လံာ်စီဆှံအတၢ်ကွဲးနီၣ်ကွဲးဃါ လၢအဘၣ်ဃးဒီးယ့ၣ်ၡူးခရံာ် အတၢ်စံးတၢ်ကတိၤ ဒီးအတၢ်ဖံးတၢ်မၤတဖၣ်န့ၣ်​ ပာ်ဖျါထီၣ်ဝဲ ယဟိဝၤယွၤအဂ့ၢ်လီၤ.—ယိၤဟၣ်​ ၁၄:၉.

တၢ်ဂ့ၢ်အဂၤတမံၤလၢ ယဟိဝၤယွၤကတဲာ်ကတီၤန့ၢ်ပှၤ အကလုၢ်ကထါလံာ်စီဆှံန့ၣ်​ မ့ၢ်ဒ်သိး ပကသ့ၣ်ညါလၢ ပကအိၣ်ဒီးတၢ်သးခုအဂီၢ် ပကဘၣ်မၤဒ်လဲၣ်န့ၣ်လီၤ. ပကအိၣ်ဒီးဟံၣ်မုာ်ဃီပၢၤ ကသ့ဒ်လဲၣ်, ပသူၣ်မံသးမံလၢ တၢ်လၢအအိၣ်ဒီးပှၤ ကသ့ဒ်လဲၣ်​ ဒီးပကမၤဘၣ်ဂီၢ်က့ၤ ပတၢ်ကီတၢ်ခဲ ကသ့ဒ်လဲၣ်န့ၣ်​ ယဟိဝၤယွၤဒုးသ့ၣ်ညါပှၤ ခီဖျိလၢလံာ်စီဆှံလီၤ. တၢ်ဂ့ၢ်လၢခံတခါန့ၣ်​ ကတဲနၢ်ပၢၢ်ပှၤလၢ လံာ်စီဆှံစံးဆၢဝဲ တၢ်သံကွၢ်အရ့ဒိၣ်​ လၢအဘၣ်ဃးဒီး ဘၣ်မနုၤအဃိ တၢ်နးတၢ်ဖှီၣ်အိၣ်အါ ထဲအံၤညါလဲၣ်​ ဒီးခါဆူညါတၢ်ကမၤအသးဒ်လဲၣ်န့ၣ်လီၤ. တကးဒံးဘၣ်​ တဲနၢ်ပၢၢ်စ့ၢ်ကီးပှၤလၢ တၢ်လၢကစၢ်ယွၤမၤတ့ၢ်ဝဲ ဒ်သိးအတၢ်တိာ်ပာ် ကဟဲလၢထီၣ်ပှဲၤထီၣ်အဂီၢ်န့ၣ်လီၤ.

လံာ်စီဆှံမ့ၢ်လံာ်လၢ အလီၤဆီတဘ့ၣ်​ ဒီးအဟဲလၢ ကစၢ်ယွၤအိၣ်န့ၣ်​ တၢ်အုၣ်သးလၢကျဲအဂၤ အိၣ်ဒံးအါမးလီၤ. လံာ်စီဆှံအံၤဘၣ်တၢ်ကွဲးအီၤယံာ်ဝဲ အနံၣ်​ ၁,၆၀၀ ဘျဲၣ်​ ဒီးပှၤပိာ်ခွါအဂၤ ၄၀ ကွဲးဝဲလီၤ. ဘၣ်ဆၣ်တၢ်ဂ့ၢ်မိၢ်ပှၢ်န့ၣ်​ မ့ၢ်တမံၤဃီလီၤ. (၂ တံၤမသ့း ၃:၁၆) တၢ်ကွဲးကူလံာ်စီဆှံလၢပျၢၤ အဘ့ၣ်လၢအကထိတဖၣ်​ ပာ်ဖျါထီၣ်ဝဲလၢ လံာ်စီဆှံအံၤတလီၤဂာ်ဒီး လံာ်လၢပျၢၤအဂၤတဖၣ်ဘၣ်. ဒီးဘၣ်တၢ်ကွဲးကူအီၤတစိၤဘၣ်တစိၤ လီၤတံၢ်လီၤဆဲးန့ၣ်လီၤ. ဒ်သိးပှၤသုတကွဲးကျိာ်ထံ, ထုးထီၣ်ရၤလီၤ ဒီးဖးအီၤတဂ့ၤအဂီၢ် ပှၤဂုာ်ကျဲးစၢးတြီဝဲဘၣ်ဆၣ်​ ပှၤမၤတန့ၢ်ဘၣ်. တကးဒံးဘၣ်​ မုၢ်မဆါတနံၤအံၤ လံာ်စီဆှံန့ၣ်မ့ၢ်လံာ်တဘ့ၣ်လၢ ဘၣ်တၢ်ကွဲးကျိာ်ထံ ဒီးရၤလီၤအီၤအအါကတၢၢ်လီၤ. လံာ်စီဆှံအိၣ်တုၤလၢ မုၢ်မဆါတနံၤအံၤန့ၣ်​ မ့ၢ်တၢ်အုၣ်သးတခါလၢ “ကစၢ်အကလုၢ်ကထါန့ၣ်​ ကအိၣ်ဝဲကဆိးဝဲလီၤစိၤလီၤထီလီၤ.”—ယၡါယၤ ၄၀:၈.

ကစၢ်ယွၤအၢၣ်လီၤအီလီၤဝဲလၢ အတၢ်တိာ်ပာ် ကဟဲလၢထီၣ်ပှဲၤထီၣ်

တၢ်ဂ့ၢ်အဂၤတခါလၢ ကစၢ်ယွၤမၤန့ၢ်ပှၤန့ၣ်မ့ၢ်ဝဲ အဝဲအၢၣ်လီၤပှၤလၢ ကမၤလၢပှဲၤထီၣ်ဝဲ အတၢ်တိာ်ပာ်လီၤ. ဒ်ပတဲတ့ၢ်လၢအမဲာ်ညါအသိး ကစၢ်ယွၤအတၢ်တိာ်ပာ်န့ၣ်​ မ့ၢ်ဝဲပှၤဟီၣ်ခိၣ်ဖိတဖၣ်​ ကအိၣ်မူဘၣ်လီၤထူလီၤယိာ်လၢ ဟီၣ်ခိၣ်ချၢလီၤ. ဘၣ်ဆၣ်​ ဖဲစီၤအၤဒၣ်ဃုထၢဝဲလၢ တဒိကနၣ်ကစၢ်ယွၤကလုၢ် ဒီးမၤတၢ်ဒဲးဘးအခါ အနီၢ်ကစၢ် ဃုာ်ဒီးအဖိအလံၤလၢ ကဟဲအိၣ်ထီၣ်လၢခံတဖၣ်​ အတၢ်ခွဲးတၢ်ယာ်လၢ ကအိၣ်မူဘၣ်လီၤထူလီၤယိာ် လၢဟီၣ်ခိၣ်ချၢန့ၣ်​ လီၤမၢ်ကွံာ်ဝဲလီၤ. “ဒ်တၢ်ဒဲးဘးဟဲနုာ် ဆူဟီၣ်ခိၣ်ချၢလၢပှၤတဂၤအဃိ, ဒီးတၢ်သံတၢ်ပှၢ်လၢ တၢ်ဒဲးဘးအဃိ အသိးန့ၣ်, ဒီးဒ်န့ၣ်အသိးပှၤခဲလၢာ်မၤတ့ၢ် တၢ်ဒဲးဘးသတးဒီး, ပှၤခဲလၢာ်ဘၣ်တၢ်သံတၢ်ပှၢ်” လီၤ. (ရိမ့ၤ ၅:၁၂) စီၤအၤဒၣ်တဒိကနၣ်​ ကစၢ်ယွၤအကလုၢ်အဃိ ဖျါလၢကစၢ်ယွၤအတၢ်တိာ်ပာ်တဖၣ်​ တဟဲလၢထီၣ်ပှဲၤထီၣ်လၢၤဘၣ်. ကစၢ်ယွၤကမၤဝဲဒ်လဲၣ်.

တၢ်လၢယဟိဝၤယွၤမၤဝဲတဖၣ်န့ၣ်​ ဒိးသန့ၤထီၣ်အသးလၢ အတၢ်ဂ့ၤတၢ်ဝါတဖၣ်လီၤ. ကစၢ်ယွၤစံၣ်ညီၣ်​ စီၤအၤဒၣ်ဒီးနီၢ်အံၤအုၤ ဒ်အတၢ်ကမၣ်အသိးလီၤ. ဘၣ်ဆၣ်​ လၢတၢ်အဲၣ်တၢ်ကွံအပူၤ ကစၢ်ယွၤကတဲာ်ကတီၤန့ၢ် အဝဲသ့ၣ်အစၢၤအသွဲၣ်တဖၣ်​ တၢ်လၢခါဆူညါအဂီၢ်လီၤ. လၢတၢ်ကူၣ်သ့အပူၤ ယဟိဝၤယွၤဆၢတဲာ်ဝဲလၢ ကမၤဘၣ်ဂီၢ်က့ၤတၢ်ကီတၢ်ခဲအံၤ ဒီးဒုးသ့ၣ်ညါဝဲ တဘျီဃီလီၤ. (၁ မိၤၡ့ ၃:၁၅) ကစၢ်ယွၤ ကတဲာ်ကတီၤန့ၢ်ပှၤအဖိခွါ ဒ်သိးပကပူၤဖျဲးလၢ တၢ်ဒဲးဘး ဒီးတၢ်သံအဂီၢ်လီၤ. ဘၣ်ဆၣ်​ ကဲထီၣ်သးကသ့ဒ်လဲၣ်.

ဒ်သိးကထုးထီၣ်ကွံာ် ပှၤဟီၣ်ခိၣ်ဖိတဖၣ်လၢ စီၤအၤဒၣ်အတၢ်ဒဲးဘးအဂီၢ်, ကသိၣ်လိပှၤဟီၣ်ခိၣ်ဖိတဖၣ်​ ဒ်သိးကန့ၢ်ဘၣ်တၢ်မူအဂီၢ် ဒီးက “ဟ့ၣ်လီၤအသးလၢ ပှၤကညီအါဂၤအပှ့ၤ” အဂီၢ် ယဟိဝၤယွၤ ဆှၢလီၤယ့ၣ်ၡူး လၢဟီၣ်ခိၣ်ချၢလီၤ.a (မးသဲ ၂၀:၂၈; ယိၤဟၣ်​ ၁၄:၆) ယ့ၣ်ၡူးမ့ၢ်ပှၤအလၢအပှဲၤ ဒ်စီၤအၤဒၣ်အသိးအဃိ အဝဲပှ့ၤက့ၤပှၤသ့လီၤ. ဘၣ်ဆၣ်​ ယ့ၣ်ၡူးန့ၣ်​ တဒ်သိးဒီးစီၤအၤဒၣ်ဘၣ်​ အဝဲဒိကနၣ်ယဟိဝၤယွၤကလုၢ် တုၤအသံတစုလီၤ. မ့ၢ်လၢယ့ၣ်ၡူး တကြၢးသံဘၣ်အဃိ ယဟိဝၤယွၤ မၤသမူထီၣ်က့ၤအီၤ လၢမူခိၣ်လီၤ. တၢ်လၢစီၤအၤဒၣ်မၤဝဲတန့ၢ်ဘၣ်တဖၣ်န့ၣ်​ ယ့ၣ်ၡူးမၤဝဲန့ၢ် ဒီးဟ့ၣ်လီၤဝဲ ပှၤလၢအအိၣ်ဒီးတၢ်ဒိကနၣ်တဖၣ်​ တၢ်မုၢ်လၢ်လၢ ကအိၣ်မူဘၣ်လီၤထူလီၤယိာ်လီၤ. “ဒ်တၢ်ပာ်ပှၤအါဂၤ လၢတၢ်ဒဲးဘးဖိလၢ ပှၤတဂၤအတၢ်တစူၢ်ဘၣ်​ အဃိအသိးန့ၣ်, တၢ်ကပာ်ပှၤအါဂၤလၢတၢ်တီတၢ်လိၤ လၢပှၤတဂၤအစူၢ်တၢ်အဃိ, ဒ်န့ၣ်အသိးလီၤ.” (ရိမ့ၤ ၅:၁၉) ခီဖျိလၢယ့ၣ်ၡူးအတၢ်ပှ့ၤက့ၤအဃိ ကစၢ်ယွၤကမၤလၢပှဲၤထီၣ် အတၢ်အၢၣ်လီၤအီလီၤလၢ ပှၤဟီၣ်ခိၣ်ဖိတဖၣ်​ ကအိၣ်မူဘၣ်လၢ ဟီၣ်ခိၣ်လီၤထူလီၤယိာ်လီၤ.

ပသ့ၣ်ညါဘၣ်​ ယဟိဝၤယွၤအဂ့ၢ်အါမး ဖဲအဝဲမၤဘၣ်ဂီၢ်က့ၤဝဲ တၢ်ဂ့ၢ်ကီလၢအဟဲကဲထီၣ်အသးလၢ စီၤအၤဒၣ်အတၢ်ကမၣ်အဃိန့ၣ်လီၤ. ပသ့ၣ်ညါဘၣ်လၢ တၢ်လၢယဟိဝၤယွၤစးထီၣ်မၤတ့ၢ်ဝဲတဖၣ်န့ၣ်​ ကမၤဝဲတုၤလၢအကတၢၢ် ဒီးပှၤမၤပတုာ်အီၤ တန့ၢ်နီတဂၤဘၣ်. တၢ်လၢအကလုၢ်ကထါ တဲဝဲတဖၣ်န့ၣ်​ “ကမၤအသး” လီၤ. (ယၡါယၤ ၅၅:၁၁) တကးဒံးဘၣ်​ ပသ့ၣ်ညါဘၣ်လၢ ယဟိဝၤယွၤအဲၣ်ပှၤဒိၣ်မးလီၤ. “ယွၤအတၢ်အဲၣ်တၢ်ကွံ အိၣ်ဖျါဝဲလၢပဂီၢ်လၢတၢ်အံၤ, ယွၤမၢလီၤအဖိခွါတဂၤဃီဆူဟီၣ်ခိၣ်ချၢ, ဒ်သိးပကမူလၢအဃိလီၤ. လၢတၢ်အံၤမ့ၢ်တၢ်အဲၣ်တၢ်ကွံ, လၢပအဲၣ်ယွၤတမ့ၢ်ဘၣ်. မ့ၢ်လၢအဝဲဒၣ်အဲၣ်ပှၤ, ဒီးမၢလီၤအဖိခွါဒီး, မၤပူၤမၤဖျဲး ပတၢ်ဒဲးဘးလီၤ.”—၁ယိၤဟၣ်​ ၄:၉, ၁၀.

“ပှၤလၢအတသးလီဘၣ်​ အဖိခွါဒၣ်ဝဲဘၣ်, ဒီးဟ့ၣ်လီၤကွံာ်အီၤလၢ ပဝဲဒၣ်ခဲလၢာ် အဂီၢ်န့ၣ်, တဟ့ၣ်ကလီ ဃုာ်ဒီးအီၤလၢပတၢ်ခဲလၢာ်စ့ၢ်ကီးဘၣ်ဒီး, ကအိၣ်ဝဲဒ်လဲၣ်.” (ရိမ့ၤ ၈:၃၂) ကစၢ်ယွၤအၢၣ်လီၤအီလီၤပှၤလၢ ကမၤန့ၢ်ပှၤတၢ်မနုၤလဲၣ်. ဆဲးဖးအါထီၣ်တက့ၢ်.