နအိၣ်ဒီးတၢ်အိၣ်မူ လၢအဂ့ၤန့ၢ်ခဲအံၤ ကသ့ဒ်လဲၣ်

မုၢ်မဆါတနံၤအံၤ ပှၤဟီၣ်ခိၣ်ဖိတဖၣ် တအိၣ်မူဝဲ ဒ်ကစၢ်ယွၤ အတၢ်ဘၣ်သးအသိးန့ၣ်ဘၣ်. ကစၢ်ယွၤတိာ်ပာ်ဝဲလၢ ပှၤဟီၣ်ခိၣ်ဖိတဖၣ်​ ကဒိးပၢအသးလၢအတၢ်ပၢဖီလာ် ဒီးကဒိးန့ၢ်အဘျုးလၢ မၤထွဲဝဲ အတၢ်ဟံးစုနဲၣ်ကျဲ ဒီးကွၢ်လိမၤဒိးဝဲ အတၢ်ဂ့ၤတၢ်ဝါတဖၣ်န့ၣ်လီၤ. ကစၢ်ယွၤအဲၣ်ဒိးဝဲလၢ အဝဲသ့ၣ်ကကွၢ်ထွဲမၤစၢၤ အဟံၣ်ဖိဃီဖိ, ဃုထံၣ်န့ၢ်တၢ်လၢအသီတဖၣ်​ ဒီးမၤကဲထီၣ်ဟီၣ်ခိၣ်ဒီဘ့ၣ်လၢ ပၤရဒံစူးဒီးမၤသကိးတၢ်လၢ တၢ်သူၣ်ဖှံသးညီအပူၤန့ၣ်လီၤ.

ကစၢ်ယွၤအၢၣ်လီၤဝဲလၢ ကဆီတလဲန့ၢ် ပှၤဟီၣ်ခိၣ်ဖိအတၢ်အိၣ်မူ ဒ်အတၢ်တိာ်ပာ်အိၣ်ဝဲအသိး

• “ဒုးအိၣ်ကတီၢ် တၢ်ဒုးတၢ်ယၤတဖၣ်​ တုၤလၢဟီၣ်ခိၣ်အကတၢၢ်လီၤ.”—စံးထီၣ်ပတြၢၤ ၄၆:၉.

• “အဆၢအကတီၢ်ဘၣ်​ . . . ဒ်သိးအကမၤဟးဂီၤ ပှၤလၢအမၤဟးဂီၤဟီၣ်ခိၣ်န့ၣ်လီၤ.”—လီၣ်ဖျါ ၁၁:၁၈.

• “ဒီးပှၤအိၣ်ဝဲဆိးဝဲတဖၣ်န့ၣ်တစံး, ယမၤတကဲဘၣ်န့ၣ်ဘၣ်.”—ယၡါယၤ ၃၃:၂၄.

• “ဒီးယပှၤဃုထၢဖိ ကမုာ်လၤတၢ်လၢအမၤဝဲလၢ အစုဃဲးဃဲးလီၤ.”—ယၡါယၤ ၆၅:၂၂.

ဝံအတၢ်စံးပာ်တဖၣ်​ ကဟဲလၢပှဲၤထီၣ်ဒ်လဲၣ်. ကစၢ်ယွၤဃုထၢထီၣ်ဝဲ အဖိခွါယ့ၣ်ၡူး ဒ်စီၤပၤလၢအလၢအပှဲၤတဂၤအသိး လၢကပၢဝဲပှၤဟီၣ်ခိၣ်ဖိန့ၣ်လီၤ. လံာ်စီဆှံပာ်ဖျါထီၣ်ဝဲလၢ ဘီမုၢ်အံၤန့ၣ်​ မ့ၢ်ဝဲကစၢ်ယွၤအတၢ်ပၢတၢ်ပြးန့ၣ်လီၤ. (ဒၤနံးယ့လး ၂:၄၄) လံာ်စီဆှံတဲဝဲလၢ ယ့ၣ်ၡူးန့ၣ်​ “ကစၢ်ယွၤကဟ့ၣ်အီၤလၢ အလီၢ်ပစိာ် . . . ဒီးကပၢဘၣ်” တၢ်ဒ်စီၤပၤတဂၤအသိးလီၤ.—လူၤကၣ်​ ၁:၃၂, ၃၃.

ဖဲယ့ၣ်ၡူးအိၣ်လၢ ဟီၣ်ခိၣ်အဆၢကတီၢ် တၢ်လီၤလးလၢအမၤဝဲတဖၣ်န့ၣ်​ ပာ်ဖျါထီၣ်န့ၢ်ပှၤလၢ အဝဲမ့ၢ်စးထီၣ်ပၢတၢ်န့ၣ်​ ပှၤဟီၣ်ခိၣ်ဖိတဖၣ်အတၢ်အိၣ်မူ ကဂ့ၤဒိၣ်န့ၢ်ဒံးအခဲအံၤန့ၣ်လီၤ.

ယ့ၣ်ၡူးပာ်ဖျါထီၣ်ဝဲ ပှၤဟီၣ်ခီၣ်ဖိလၢအိၣ်ဒီး တၢ်ဒိကနၣ်တဖၣ်န့ၣ်​ အဝဲကမၤန့ၢ်တၢ်လၢအဂီၢ်

• ယ့ၣ်ၡူးမၤဘျါဝဲ တၢ်ဆူးတၢ်ဆါအါမံၤအါမၠိအဃိ ပာ်ဖျါထီၣ်ဝဲလၢ အကမၤဘျါန့ၢ်ဝဲ ပှၤလၢအနီၢ်ခိဂံၢ်စၢ်ဘါစၢ်တဖၣ်​ အတၢ်ဆူးတၢ်ဆါလီၤ.—မးသဲ ၉:၃၅.

• ဖဲယ့ၣ်ၡူးဒုးအိၣ်ဂၢၢ်တပၢၢ်ဝဲ ပီၣ်လဲၣ်အခါန့ၣ်​ ပာ်ဖျါထီၣ်လၢ အဝဲကဒီသဒၢပှၤဟီၣ်ခိၣ်ဖိ ခီဖျိ မၤဂ့ၤထီၣ်က့ၤ ခိၣ်ဃၢၤန့ဆၢၣ်တဖၣ်လီၤ.—မၢ်ကူး ၄:၃၆-၃၉.

• ဖဲယ့ၣ်ၡူးလုၢ်အီၣ်လုၢ်အီဝဲ ပှၤလၢအကထိတဖၣ်အခါန့ၣ်​ ပာ်ဖျါထီၣ်ဝဲလၢ အကဟ့ၣ်ပှၤတၢ်လၢပလိၣ်ဘၣ်တဖၣ်န့ၣ်လီၤ.—မၢ်ကူး ၆:၄၁-၄၄.

• ဖဲတၢ်ဖျီအမူးအခါန့ၣ်​ ယ့ၣ်ၡူးဒုးကဲထီၣ်​ ထံလၢစပံးထံးအဃိ ပာ်ဖျါထီၣ်ဝဲလၢ အကဟ့ၣ်ပှၤတၢ်အိၣ်မူလၢ အပှဲၤဒီးတၢ်သးခုန့ၣ်လီၤ.—ယိၤဟၣ်​ ၂:၇-၁၁.

ပှၤလၢအအဲၣ်ကစၢ်ယွၤတဖၣ်​ ကဒိးန့ၢ်ဘၣ်တၢ်အိၣ်မူလၢ ကစၢ်ယွၤကတဲာ်ကတီၤပာ်န့ၢ်အဂီၢ် ကသ့ဒ်လဲၣ်. ဒီး “ကျဲ”လၢနကဘၣ်လဲၤအီၤန့ၣ်အိၣ်ဝဲလီၤ. လံာ်စီဆှံပာ်ဖျါထီၣ်ဝဲလၢ “မ့မ့ၢ်ကျဲစၢၤမ့ၢ်အအံၣ်, ဒီးကျဲမ့ၢ်အဆံးလၢ အဆှၢဝဲဆူတၢ်မူန့ၣ်, ဒီးပှၤလၢထံၣ်န့ၢ်အီၤတဖၣ်န့ၣ်​ အိၣ်ဝဲစှၤဂၤလီၤ.”—မးသဲ ၇:၁၄.

ဃုထံၣ်န့ၢ်ကျဲလၢ နတၢ်အိၣ်မူကဂ့ၤထီၣ်အဂီၢ်

တၢ်မူအကျဲန့ၣ်​ မ့ၢ်မနုၤလဲၣ်. ယွၤစံးဝဲလၢ “ယဲဒၣ်အံၤ, ယမ့ၢ်ယွၤ, နကစၢ်လၢအသိၣ်လိနၤ ဒ်သိးနကဘၣ်ဘျုးဘၣ်ဖှိၣ်, ဒီးယဒုးလဲၤနၤလၢ ကျဲလၢနဂ့ၤလဲၤန့ၣ်လီၤ.” (ယၡါယၤ ၄၈:၁၇) နမ့ၢ်လူၤပိာ်မၤထွဲတၢ်ဟ့ၣ်ကူၣ်အံၤန့ၣ်​ နကဒိးန့ၢ်ဘၣ်တၢ်အိၣ်မူလၢ အဂ့ၤကတၢၢ်လီၤ.

ယ့ၣ်ၡူးတဲဝဲလၢ “ယဲဒၣ်အံၤယမ့ၢ်ကျဲ, ဒီးတၢ်မ့ၢ်တၢ်တီ, ဒီးတၢ်မူလီၤ.” (ယိၤဟၣ်​ ၁၄:၆) ပမ့ၢ်မၤထွဲဒ်ယ့ၣ်ၡူးတဲဝဲအသိး ဒီးကွၢ်လိမၤဒိးအဒိအတဲာ်န့ၣ်​ ပကဘူးထီၣ်ဒီးကစၢ်ယွၤ ဒီးပကဒိးန့ၢ်ဘၣ်​ တၢ်အိၣ်မူလၢအဂ့ၤကတၢၢ်န့ၣ်လီၤ.

နဃုထံၣ်န့ၢ် တၢ်မူအကျဲကသ့ဒ်လဲၣ်. တၢ်ဘူၣ်တၢ်ဘါအိၣ်ဝဲ အါမးအဃိ ယ့ၣ်ၡူးဟ့ၣ်ပလီၢ်ပှၤလၢ “ပှၤလၢအစံးဘၣ်ယၤ, ကစၢ်ဧၢ, ကစၢ်ဧၢန့ၣ်တမ့ၢ် အကလဲၤနုာ်ဆူမူခိၣ်အဘီအမုၢ်ကိးဂၤဒဲးဘၣ်. မ့ၢ်ထဲပှၤလၢ အမၤဝဲဖဲဒၣ်​ ယပၢ်အိၣ်လၢ မူခိၣ်အသးန့ၣ်ဧိၤလီၤ.” (မးသဲ ၇:၂၁) အဝဲတဲစ့ၢ်ကီးလၢ “သုကသ့ၣ်ညါအီၤလၢ အတၤသၣ်လီၤ.” (မးသဲ ၇:၁၆) လံာ်စီဆှံန့ၣ်​ ကမၤစၢၤနၤလၢ နကသ့ၣ်ညါနီၤဖး တၢ်ဘူၣ်တၢ်ဘါလၢအမ့ၢ်အတီန့ၣ်လီၤ.—ယိၤဟၣ်​ ၁၇:၁၇.

နစးထီၣ်ခါထီၣ်နခီၣ်လၢ တၢ်မူအကျဲအံၤကသ့ဒ်လဲၣ်. နကဘၣ်မၤလိဘၣ်ဃးဒီး ပှၤတဂၤလၢအဟ့ၣ်ပှၤကိးဂၤဒဲး အသးသမူအဂ့ၢ်န့ၣ်လီၤ. ဒီးပှၤတဂၤန့ၣ်​ မ့ၢ်မတၤတဂၤလဲၣ်. အမံၤဒ်လဲၣ်. အဝဲမ့ၢ်ပှၤဒ်လဲၣ်တဂၤလဲၣ်. အဝဲကမၤန့ၢ် တၢ်မနုၤတဖၣ်လၢပဂီၢ်လဲၣ်. ဒီးအဝဲအဲၣ်ဒိးလၢ ပကမၤတၢ်မနုၤလဲၣ်.a

ကစၢ်ယွၤအတၢ်တိာ်ပာ်လၢပှၤဟီၣ်ခိၣ်ဖိအဂီၢ်န့ၣ်​ တမ့ၢ်ထဲ ပဘၣ်ဖံးတၢ်မၤတၢ်, အီၣ်တၢ်အီတၢ်, ဂဲၤလိာ်ကွဲဒီး လုၢ်အီၣ်လုၢ်အီပဟံၣ်ဖိဃီဖိအဂီၢ်ဘၣ်. ပသ့ၣ်ညါထီၣ်​ ပတၢ်ဘၣ်တ့ကစၢ်ဒီး ပကဲထီၣ်အတံၤသကိးသ့ဝဲလီၤ. ပပာ်ဖျါထီၣ်လၢပအဲၣ်အီၤ ခီဖျိပမၤအတၢ်ဘၣ်သးသ့န့ၣ်လီၤ. ယ့ၣ်ၡူးစံးဝဲလၢ “တၢ်မူအထူအယိာ်န့ၣ်​ မ့ၢ်တၢ်သ့ၣ်ညါနၤ, ယွၤနီၢ်နီၢ်တဂၤဃီ” န့ၣ်လီၤ.—ယိၤဟၣ်​ ၁၇:၃.

စးထီၣ်လဲၤတၢ်လၢ တၢ်မူအကျဲ

ပမ့ၢ်အဲၣ်ဒိးမၤကစၢ်ယွၤအတၢ်ဘၣ်သးန့ၣ်​ ပကဘၣ်စးထီၣ်ဆီတလဲပသးန့ၣ်လီၤ. ဒီးပကဆီတလဲသးအဂီၢ်န့ၣ်​ တမ့ၢ်တၢ်လၢအညီဝဲဘၣ်. ဘၣ်ဆၣ်ပမ့ၢ်စးထီၣ်လဲၤတၢ်လၢ တၢ်မူအကျဲန့ၣ်​ ပသ့ၣ်ညါလၢပတၢ်အိၣ်မူန့ၣ်​ ကဂ့ၤထီၣ်ဝဲန့ၣ်လီၤ. ဒ်သိးနကထံၣ်န့ၢ်တၢ်သံကွၢ်တဖၣ်အံၤအတၢ်စံးဆၢအဂီၢ် ယဟိဝၤပှၤအုၣ်သးတဖၣ်​ အိၣ်ဒီးတၢ်ရဲၣ်တၢ်ကျဲၤလၢ ကမၤလိလံာ်စီဆှံဒီးနၤလၢ တၢ်လီၢ်ဒီးတၢ်ဆၢကတီၢ် လၢအဂ့ၤလၢနဂီၢ်န့ၣ်လီၤ. မ့တမ့ၢ် စံၢ်လီၤလၢ ပပှာ်ယဲၤသန့ လၢအမ့ၢ် www.jw.org/ksw ဒ်သိးနဆဲးကျိာ်ဒီးပှၤကသ့အဂီၢ်န့ၣ်တက့ၢ်.