ပှၤစံၣ်တဲၤတဲလီၤတၢ်ဖိလၢ အတၢ်လဲၤခီဖျိအိၣ်အါန့ၢ်နၤန့ၣ် မၤလိန့ၢ်တၢ်လၢ အဝဲသ့ၣ်အအိၣ်တက့ၢ်

ပပာ်လုၢ်ပာ်ပှ့ၤ ပှၤစံၣ်တဲၤတဲလီၤတၢ်ဖိလၢ အိၣ်ဒီးတၢ်လဲၤခီဖျိအါလၢ ပတၢ်အိၣ်ဖှိၣ်ပူၤန့ၣ်လီၤ. အဝဲသ့ၣ်တနီၤနီၤန့ၣ် မၤယဟိဝၤယွၤအတၢ်မၤလၢ တၢ်သးတီအပူၤယံာ်တ့ၢ်လံ. ဒီးအဂၤတနီၤနီၤန့ၣ် လၢတယံာ်တမီၢ်အတီၢ်ပူၤ မၤအါထီၣ်ဝဲအတၢ်သ့တၢ်ဘၣ်တဖၣ်လၢ တၢ်သးခုကစီၣ်တၢ်မၤအပူၤန့ၣ်လီၤ. ပှၤစံၣ်တဲၤတဲလီၤတၢ်ဖိတဖၣ်အံၤ ထံၣ်ဘၣ်ဝဲလၢ ယ့ၣ်ၡူးနဲၣ်လိဝဲခရံာ်ဖိတၢ်အိၣ်ဖှိၣ်လၢမုၢ်နံၤခံကတၢၢ်အတီၢ်ပူၤ ဒီးမၤဒိၣ်ထီၣ်ထီထီၣ်ဝဲ တၢ်စံၣ်တဲၤတဲလီၤတၢ်မၤန့ၣ်လီၤ. (မး. ၂၈:၁၉, ၂၀) ခီဖျိလၢအဝဲသ့ၣ် ပၣ်ဃုာ်လၢတၢ်စံၣ်တဲၤတဲလီၤ တၢ်မၤအံၤအဃိဒိးန့ၢ်ဘၣ်ဝဲ ‘တၢ်စိတၢ်ကမီၤဒိၣ်ကဲၣ်ဆိး’ ဖဲအဝဲသ့ၣ်ကွၢ်ဆၢၣ်မဲာ်ဘၣ်တၢ်ကီတၢ်ခဲ ဒီးတၢ်မၤကွၢ်တဖၣ်အဆၢကတီၢ်န့ၣ်လီၤ. (၂ ကရံၣ်. ၄:၇) ပှၤစံၣ်တဲၤတဲလီၤတၢ်ဖိတဖၣ် လၢအိၣ်ဒီးတၢ်လဲၤခီဖျိအါမးအံၤ ပမၤလိန့ၢ်တၢ်လၢအဝဲသ့ၣ်အအိၣ် သ့ဒီဒူၣ်လီၤ. အဝဲသ့ၣ်စ့ၢ်ကီး သးခုဝဲလၢကသိၣ်လိနဲၣ်လိပှၤဂၤ တၢ်လၢအဝဲသ့ၣ်သ့ၣ်ညါဝဲတဖၣ်လီၤ. (စံး. ၇၁:၁၈) လၢတၢ်န့ၣ်အဃိ ပကြၢးဃုတၢ်ခွဲးတၢ်ယာ်လၢ ပကမၤလိန့ၢ်တၢ်လၢ အဝဲသ့ၣ်အအိၣ်လီၤ. ပမၤကသ့ဒ်လဲၣ်.

လၢတၢ်သးခုကစီၣ်တၢ်မၤအပူၤ– ပှၤစံၣ်တဲၤတဲလီၤတၢ်ဖိလၢ အတၢ်လဲၤခီဖျိစှၤ ဒီးပှၤစံၣ်တဲၤတဲလီၤတၢ်ဖိအသီန့ၣ် ဒ်သိးစံၣ်တဲၤတဲလီၤတၢ်ကသ့ဂ့ၤဂ့ၤအဂီၢ် လိၣ်ဘၣ်ဝဲတၢ်သိၣ်လိမၤယုၤန့ၣ်လီၤ. ပမ့ၢ်ကွၢ်ထံ ပှၤစံၣ်တဲၤတဲလီၤတၢ်ဖိလၢ အဒိၣ်တုာ်ခိၣ်ပှဲၤလၢနီၢ်သးတခီ စံၣ်တဲၤတဲလီၤတၢ်ဒ်လဲၣ်န့ၣ် ပကမၤလိန့ၢ်တၢ်လၢအဝဲသ့ၣ်အအိၣ်အါမးလီၤ. (၂၀၁၅၊ ဖေဖော်ဝါရီ ၁၅ ရက်ထုတ် ကင်းမျှော်စင် “အမှုဆောင်လုပ်ငန်းမှာ ဇွဲထက်သန်နေပါ” ဆောင်းပါးထဲက “ကြေညာသူအသစ်တွေကို ကူညီပေးပါ” ခေါင်းစဉ်ငယ်အောက်ၡိ စာပိုဒ် ၃ ကိုကြည့်ပါ။) ခီဖျိလၢနဟးဒီးပှၤသ့ၣ်တဖၣ်အံၤအဃိ နဒိးန့ၢ်ဘၣ်တၢ်ဘျုးတၢ်ဖှိၣ် လၢကျဲဒ်လဲၣ်.

မ့ၢ်နကွဲမုာ်ပှၤစံၣ်တဲၤတဲလီၤတၢ်ဖိလၢ အတုၤထီၣ်ထီၣ်ဘးတဂၤ လၢကဟးစံၣ်တဲၤတဲလီၤတၢ်ဒီးနၤသ့ဧါ. ပှၤစံၣ်တဲၤတဲလီၤတၢ်ဖိတဂၤအံၤ မ့မ့ၢ်ပှၤလၢအဆိးက့မံနီၤန့ၣ် တဘျီတခီၣ်နဟဲကိးပှၤလၢ အမၤလိလံာ်စီဆှံတဂၤဆူအဟံၣ် သ့ဝဲလီၤ. နမၤလိလံာ်စီဆှံမ့ၢ်ဝံၤ ဃ့တၢ်ဟ့ၣ်ကူၣ်လၢ ပှၤစံၣ်တဲၤတဲလီၤတၢ်ဖိတဂၤအံၤ အအိၣ်တက့ၢ်.

သူတၢ်ဆၢကတီၢ်ဒီးအဝဲသ့ၣ်– ဟံးန့ၢ်တၢ်ဆၢကတီၢ်လၢ နကရ့လိာ်သးဒီး ပှၤစံၣ်တဲၤတဲလီၤတၢ်ဖိတဖၣ်လၢ အတၢ်လဲၤခီဖျိအိၣ်အါတက့ၢ်. ကွဲမုာ်အဝဲသ့ၣ်တဂၤဂၤလၢ နဟံၣ်ဖိဃီဖိတၢ်မၤလိလံာ်စီဆှံ ဒီးသံကွၢ်သံဒိးအီၤ ဘၣ်ဃးဒီးအတၢ်လဲၤခီဖျိတက့ၢ်. ပှၤစံၣ်တဲၤတဲလီၤတၢ်ဖိတဂၤအံၤ မ့မ့ၢ်ပှၤလၢအဆိးက့မံနီၤန့ၣ် မ့ၢ်ပရဲၣ်ကျဲၤဒ်သိး ပကမၤပဟံၣ်ဖိဃီဖိ တၢ်မၤလိလံာ်စီဆှံလၢ အဟံၣ်သ့ဧါ. သံကွၢ်အီၤလၢ တၢ်သံကွၢ်တဖၣ်အံၤတက့ၢ်. မ့ၢ်အဝဲထံၣ်န့ၢ် တၢ်မ့ၢ်တၢ်တီလၢကျဲဒ်လဲၣ်. ဒီးဒိးန့ၢ်ဘၣ်တၢ်ဆိၣ်ဂ့ၤမနုၤတဖၣ်လဲၣ်. အဝဲထံၣ်ဘၣ်ဝဲ တၢ်ဒိၣ်ထီၣ်ထီထီၣ်လၢ အလီၢ်ကဝီၤပူၤဒ်လဲၣ်. ခီဖျိအဝဲမၤဝဲ ယဟိဝၤယွၤအတၢ်မၤအဃိ ဒိးန့ၢ်ဘၣ်ဝဲတၢ်သးခုဒ်လဲၣ်.

နၢ်ပၢၢ်စၢၤပှၤစံၣ်တဲၤတဲလီၤတၢ်ဖိတဖၣ်လၢ အတၢ်လဲၤခီဖျိအိၣ်အါ ဒီးတဘၣ်မုၢ်လၢ်တၢ်လၢအဝဲသ့ၣ်အအိၣ်အါတလၢတဂ့ၤ. ဒ်ပဝဲကိးဂၤဒဲးအသိး ပှၤစံၣ်တဲၤတဲလီၤတၢ်ဖိတဖၣ်လၢအတၢ်လဲၤခီဖျိအိၣ်အါန့ၣ် အတၢ်သ့တၢ်ဘၣ်အိၣ်ဝဲတဂၤတမံၤလၢ တၢ်သးခုကစီၣ်တၢ်မၤပူၤန့ၣ်လီၤ. (ရိ. ၁၂:၆-၈) အဝဲသ့ၣ်တနီၤနီၤန့ၣ် အသးပှၢ်ထီၣ်လံအဃိ ဟးစံၣ်တဲၤတဲလီၤတၢ်ဒီးပှၤ တကဲဝဲထီဘိဘၣ်. ဘၣ်ဆၣ်သနာ်က့ မ့ၢ်လၢအဝဲသ့ၣ်မၤ ယဟိဝၤယွၤအတၢ်မၤလၢ တၢ်သးတီအပူၤဖးယံာ်လံအဃိ ပမၤလိန့ၢ်တၢ်လၢ အဝဲသ့ၣ်အအိၣ်အါမးသ့ဝဲလီၤ.