တၢ်မၤဂ့ၤထီၣ် ပတၢ်သ့တၢ်ဘၣ်လၢ တၢ်သးခုကစီၣ်တၢ်မၤအပူၤ—သိၣ်လိနဲၣ်လိပှၤမၤလိလံာ်စီဆှံဖိတဖၣ် ဒ်သိးကကတဲာ်ကတီၤအသး ဒီးကမၤလိတၢ်ဂ့ၤဂ့ၤကသ့အဂီၢ်

ဘၣ်မနုၤအဃိအရ့ဒိၣ်လဲၣ်– ဒ်သိးပှၤမၤလိလံာ်စီဆှံဖိ ကလဲၤထီၣ်လဲၤထီလၢ နီၢ်သးတခီကသ့အဂီၢ် အဝဲသ့ၣ်ကဘၣ်ဃုသ့ၣ်ညါတၢ်အါန့ၢ်ဒံး လံာ်စီဆှံအတၢ်သိၣ်လိ အခီၣ်ထံးခီၣ်ဘိသ့ၣ်တဖၣ်လီၤ. (ဧ့ၤ. ၅:၁၂–၆:၁) ဒ်သိးပမၤလိတၢ် ဂ့ၤဂ့ၤကသ့အဂီၢ်ပကဘၣ် ထဲးဂံၢ်ထဲးဘါလီၤ. တၢ်အံၤပၣ်ဃုာ်ဒီး တၢ်ထိၣ်သတြီၤတၢ်လၢပသ့ၣ်ညါပာ်စၢၤ ဒီးတၢ်ဂ့ၢ်လၢပသ့ၣ်ညါအါထီၣ်အသီတဖၣ်န့ၣ်လီၤ. ဒီးပကဘၣ်ဆိကမိၣ်ကွၢ်တၢ်ဂ့ၢ်တဖၣ်အံၤ အဘျုးအိၣ်လၢပဂီၢ်ဒ်လဲၣ်န့ၣ်လီၤ. (ကတိၤ. ၂:၁–၆) ပှၤမၤလိလံာ်စီဆှံဖိ မ့ၢ်မၤလိအသး လၢကဃုသ့ၣ်ညါတၢ်လၢ အနီၢ်ကစၢ်န့ၣ် ကမၤစၢၤအဝဲသ့ၣ်ဒ်သိး ကသူဝဲပလံာ်လဲၢ်တဖၣ်လၢ ကဃုသ့ၣ်ညါ တၢ်သံကွၢ်တဖၣ် အတၢ်စံးဆၢကသ့အဂီၢ်န့ၣ်လီၤ. အဝဲသ့ၣ်မ့ၢ်ဂုာ်ကျဲးစၢးမၤပိာ်ထွဲ တၢ်လၢအမၤလိဘၣ်ဝဲတဖၣ်န့ၣ် ကမၤစၢၤအဝဲသ့ၣ်လၢ ကတြီဆၢဝဲ တၢ်မၤကွၢ်တဖၣ်န့ၣ်လီၤ.—လူၤကၣ် ၆:၄၇, ၄၈.

ပမၤကသ့ဒ်လဲၣ်–

တဲနၢ်ပၢၢ်အီၤလၢ တချုးပစးထီၣ်တၢ်မၤလိ လံာ်စီဆှံတဘျီလၢ်လၢ်န့ၣ် အရ့ဒိၣ်လၢ ပဘၣ်ဃ့ယဟိဝၤယွၤအတၢ်မၤစၢၤလၢ တၢ်ထုကဖၣ်အပူၤန့ၣ်လီၤ.—ယိၤဟၣ် ၁၄:၂၆; ၁ ကရံၣ်. ၂:၁၀.
ဖဲနစးထီၣ်မၤလိလံာ်စီဆှံဒီးပှၤတဂၤသီသီအခါ ဟ့ၣ်ဂံၢ်ဟ့ၣ်ဘါအီၤလၢ အဝဲကကတဲာ်ကတီၤပာ်စၢၤအသး ဘၣ်ဃးဒီးအတၢ်မၤလိလံာ်စီဆှံန့ၣ်တက့ၢ်. ဒုးနဲၣ်အီၤနလံာ်လၢ နကမၤလိဒီးအီၤ ဒီးပၠးအီၤလၢ အဝဲကဘၣ်တိၤဃာ် အတၢ်စံးဆၢဒ်လဲၣ်န့ၣ်တက့ၢ်.
ဖဲနမၤလိလံာ်စီဆှံအဆၢကတီၢ် တဘၣ်ပျဲအခွဲးလၢ နပှၤမၤလိလံာ်စီဆှံဖိ ကစံးဆၢတၢ်ထဲ ဒ်လံာ်ပာ်ဖျါဝဲအသိးတဂ့ၤ. ဒီးမၢနပှၤမၤလိလံာ်စီဆှံဖိ စံးဆၢတၢ်သံကွၢ်တဖၣ်လၢ အနီၢ်ကစၢ်အတၢ်ကတိၤ စ့ၢ်ကီးတက့ၢ်.
ဟ့ၣ်ဂံၢ်ဟ့ၣ်ဘါနပှၤမၤလိလံာ်စီဆှံဖိလၢ ကဖးကစၢ်ယွၤအကလုၢ်ကထါကိးနံၤဒဲးန့ၣ်တက့ၢ်. ဒုးနဲၣ်အီၤတၢ်ဖးလံာ်စီဆှံ အတၢ်ရဲၣ်တၢ်ကျဲၤလၢ jw.org အပူၤန့ၣ်တက့ၢ်. တဲနၢ်ပၢၢ်အီၤ ဒ်သိးဖးဝဲလံာ်စီဆှံကိးနံၤဒဲးကသ့အဂီၢ် အဝဲကဘၣ်ပာ်လီၤအသး ဂၢၢ်ဂၢၢ်ကျၢၤကျၢၤန့ၣ်တက့ၢ်. ဒီးအတၢ်ဂုာ်ကျဲးစၢးန့ၣ် ကဒုးအိၣ်ထီၣ်တၢ်ဘျုးတၢ်ဖှိၣ်ဖးဒိၣ်လီၤ.—စံး. ၁:၂, ၃.
ဒ်သိးနပှၤမၤလိလံာ်စီဆှံဖိ ကဃုထံၣ်န့ၢ်ဝဲ တၢ်သံကွၢ်တဖၣ် အတၢ်စံးဆၢလၢဘၣ်ဃးဒီးလံာ်စီဆှံလၢ ကင်းမျှော်စင် စာကြည့်တိုက်၊ ကင်းမျှော်စင် အွန်လိုင်းစာကြည့်တိုက် ကသ့အဂီၢ်န့ၣ် သိၣ်လိအီၤတက့ၢ်. ဒုးသ့ၣ်ညါနပှၤမၤလိလံာ်စီဆှံဖိလၢ ပလံာ်လဲၢ်လၢပသူညီနုၢ်အီၤလၢ တၢ်အိၣ်ဖှိၣ်အပူၤန့ၣ် အိၣ်ဒီးအမံၤလၢ ဘၣ်တၢ်ကွဲးဖုၣ်အီၤတက့ၢ်. အဒိ fg န့ၣ်အဲၣ်ဒိးစံးဝဲ တၢ်သးခုကစီၣ်လၢ ယွၤအအိၣ်န့ၣ်လီၤ.

မၤကွၢ်တၢ်အံၤ လၢတလါညါအံၤအတီၢ်ပူၤတက့ၢ်–

ဖဲနမၤလိသကိးတၢ်မၤလိ မ့တမ့ၢ် တၢ်မၤလိအခိၣ်တီဖိတခါမ့ၢ်ဝံၤန့ၣ် မၢနပှၤမၤလိလံာ်စီဆှံဖိတဲကဒါက့ၤ တၢ်ဂ့ၢ်တၢ်ကျိၤဖုၣ်ကိာ်ဖိလၢ အမၤလိတ့ၢ်ဝဲန့ၣ်တက့ၢ်. နပှၤမၤလိလံာ်စီဆှံဖိမ့ၢ်တအိၣ်နီတဂၤဘၣ်န့ၣ် ဟံးန့ၢ်တၢ်ဆၢကတီၢ်လၢ နကဖးလံာ်စီဆှံ မ့တမ့ၢ် တၢးထီခိးတၢ်န့ၣ်တက့ၢ်. နဖးမ့ၢ်ဝံၤန့ၣ် တဲကဒါက့ၤ တၢ်ဂ့ၢ်လၢနဖးအီၤဖုၣ်ကိာ်န့ၣ်တက့ၢ်. နမ့ၢ်မၤဒ်န့ၣ်န့ၣ် လၢခံနတိၢ်နီၣ်တၢ်ဂ့ၢ်တၢ်ကျိၤလၢ နဖးအီၤသ့ၣ်တဖၣ် ကန့ၢ်အါန့ၢ်ဒံးအလီၢ်လီၤ.