တၢ်ဂ့ၢ်တဖၣ်လၢ လံာ်စီဆှံသိၣ်လိတၢ်နီၢ်နီၢ် မ့ၢ်မနုၤလဲၣ် အပူၤန့ၣ် သူအီၤဂ့ၤဂ့ၤတက့ၢ်

ပှၤမၤလိလံာ်စီဆှံဖိတဂၤ မ့ၢ်မၤလိဝဲ လံာ်စီဆှံသိၣ်လိတၢ်နီၢ်နီၢ်မ့ၢ်မနုၤလဲၣ်ဒီး မ့ၢ်မၤပိာ်ထွဲဝဲတၢ်လၢအမၤလိဘၣ်ဝဲတဖၣ်န့ၣ် အဝဲကဒိၣ်ထီၣ်ထီထီၣ်လၢ နီၢ်သးတခီန့ၣ်လီၤ. (စံး. ၁:၁-၃) ဒ်သိးပပှၤမၤလိလံာ်စီဆှံဖိ ကဒိၣ်ထီၣ်ထီထီၣ်အဂီၢ် ပမၤစၢၤအီၤသ့ခီဖျိလၢ ပသူလံာ်အံၤ ဂ့ၤဂ့ၤန့ၣ်လီၤ.

တၢ်သံကွၢ်တဖၣ်လၢ တၢ်နီၤဖးအခီၣ်ထံး– တၢ်နီၤဖးတခါစုာ်စုာ်န့ၣ် ဘၣ်တၢ်စးထီၣ်အီၤလၢတၢ်သံကွၢ်တဖၣ် ဒီးတၢ်စံးဆၢအိၣ်လၢ တၢ်မၤလိအပူၤန့ၣ်လီၤ. သံကွၢ်တၢ်သံကွၢ်လၢ ကထိၣ်ဟူးထိၣ်ဂဲၤထီၣ် ပှၤမၤလိတၢ်ဖိအသး ဒ်သိးအသးကအိၣ်တၢ်ဂ့ၢ်လၢ ကမၤလိဝဲန့ၣ်တက့ၢ်. မ့တမ့ၢ် ကွဲမုာ်အီၤလၢ ကဟ့ၣ်ထီၣ်တၢ်စံးဆၢလၢအဖုၣ် လၢတၢ်သံကွၢ်တခါစုာ်စုာ်အဂီၢ်တက့ၢ်. အဝဲအတၢ်စံးဆၢ မ့ၢ်ကမၣ်သနာ်က့ တဘၣ်ဘှီဘၣ်က့ၤအီၤတဘျီဃီတဂ့ၤ. အဝဲအတၢ်စံးဆၢန့ၣ် ကမၤစၢၤနၤလၢ နကသ့ၣ်ညါ အတၢ်လိၣ်ဘၣ်လၢ နကဘၣ်မၤစၢၤအီၤန့ၣ်လီၤ.—ကတိၤ. ၁၆:၂၃; ၁၈:၁၃.

တၢ်ပိာ်ထွဲ– ပှၤမၤလိလံာ်စီဆှံဖိ မ့ၢ်နၢ်ပၢၢ်ဒီး တူၢ်လိာ်တၢ်ဂ့ၢ်လၢ တၢ်နီၤဖးအပူၤန့ၣ် ဟ့ၣ်ဂံၢ်ဟ့ၣ်ဘါအီၤလၢကကွၢ်ဝဲ လံာ်အတၢ်ပိာ်ထွဲလၢ အဘၣ်ထွဲလိာ်သးဒီး တၢ်နီၤဖးန့ၣ်တက့ၢ်. ဖဲသုမၤလိတၢ် လၢခံတဘျီအခါန့ၣ် နကြၢးဟံးန့ၢ်တၢ်ဆၢကတီၢ်စှၤမံးနံး ဒ်သိးနကမၤစၢၤအီၤလၢ အဝဲကနၢ်ပၢၢ်ဝဲတၢ်ဂ့ၢ်လၢအဖးဝဲ လၢတၢ်ပိာ်ထွဲအပူၤအဂီၢ်န့ၣ်လီၤ. ဘၣ်ဆၣ် တၢ်ဂ့ၢ်လၢတၢ်ပိာ်ထွဲအပူၤမ့ၢ် ကကဲဘျုးလၢအဂီၢ်န့ၣ် နကြၢးဟံးန့ၢ်တၢ်ဆၢကတီၢ် လၢသုကမၤလိသကိး မ့တမ့ၢ် ဖးလံာ်အဆၢလၢအရ့ဒိၣ်တဖၣ် ဒီးသံကွၢ်အီၤတၢ်သံကွၢ်လၢ နကတဲာ်ကတီၤပာ်အီၤန့ၣ်တက့ၢ်.

တၢ်ကွၢ်ကဒါက့ၤတၢ်လွံၢ်နၢၣ်– တၢ်နီၤဖးတခါစုာ်စုာ်အကတၢၢ်န့ၣ် အိၣ်ဒီးတၢ်ကွၢ်ကဒါက့ၤတၢ်လွံၢ်နၢၣ်လၢ ပာ်ဖျါထီၣ်ဝဲ တၢ်သံကွၢ်တဖၣ်လၢ တၢ်နီၤဖးအခီၣ်ထံး အတၢ်စံးဆၢန့ၣ်လီၤ. သူတၢ်လွံၢ်နၢၣ်အံၤလၢ နကသ့ၣ်ညါဘၣ် မ့ၢ်နပှၤမၤလိလံာ်စီဆှံဖိတဂၤ နၢ်ပၢၢ်တၢ်ဂ့ၢ် ဒီးတဲပၠးက့ၤဝဲ တၢ်ဂ့ၢ်လၢအရ့ဒိၣ် သ့ဧါတသ့ဧါန့ၣ်လီၤ. လံာ်ကျိၤလၢအိၣ်လၢ တၢ်လွံၢ်နၢၣ်အံၤအပူၤ ဒီးလံာ်စီဆှံအဆၢတဖၣ်န့ၣ် ဖးဒီးအီၤဒ်သိးသိးတက့ၢ်. ဝံၤဒီးမၢနပှၤမၤလိလံာ်စီဆှံဖိ တဲဖျါထီၣ်လၢ လံာ်စီဆှံအဆၢန့ၣ် မ့ၢ်အဘၣ်ထွဲလိာ်သးဒီးလံာ်ကျိၤအံၤဒ်လဲၣ်န့ၣ်တက့ၢ်.—မၤတၢ် ၁၇:၂, ၃.