ပမ့ၢ်တိၢ်န့ၣ် ကစၢ်ယွၤအတၢ်မၤလိာ်တဖၣ်န့ၣ် ပကဒိးန့ၢ်ဘၣ် တၢ်အိၣ်မူလၢ အပှဲၤဒီးတၢ်သးခုနီၢ်နီၢ်သ့
ပှၤလၢအဒိကနၣ် ကစၢ်ယွၤအကလုၢ်န့ၣ် ကဒိးန့ၢ်ဘၣ်တၢ်ဆိၣ်ဂ့ၤအါအါ
ဝံလၢအမ့ၢ် စီၤမိၤၡ့န့ၣ် တဲဝဲလၢ ပမ့ၢ်ဒိကနၣ်ကစၢ်ယွၤ အတၢ်မၤလိာ်န့ၣ် ပကဒိးန့ၢ်ဘၣ်ကစၢ်ယွၤ အတၢ်ဆိၣ်ဂ့ၤန့ၣ်လီၤ. (၅ မိၤၡ့ ၁၀:၁၃; ၁၁:၂၇) ပဒိကနၣ်ကစၢ်ယွၤအကလုၢ် ခီဖျိလၢ ပပျံၤအတၢ်စံၣ်ညီၣ်အဃိ တမ့ၢ်ဘၣ်. ကစၢ်ယွၤအတၢ်ဂ့ၤတၢ်ဝါတဖၣ်န့ၣ် မၤစၢၤပှၤလၢ ပအဲၣ်ဒိးဒိကနၣ်အကလုၢ်လီၤ. ဒီးခီဖျိလၢ ပအဲၣ်အီၤအဃိ ပအဲၣ်ဒိးဟးဆှဲး တၢ်တမံၤဂ့ၤတမံၤဂ့ၤလၢ ကမၤဘၣ်ဒိအသးန့ၣ်လီၤ. “တၢ်အဲၣ်ယွၤမ့ၢ်အအံၤ, လၢပတိၢ်န့ၢ် အတၢ်မၤလိာ်လီၤ.”—၁ ယိၤဟၣ် ၅:၃.
ပမ့ၢ်ဒိကနၣ် ကစၢ်ယွၤအကလုၢ်န့ၣ် ပကဒိးန့ၢ်ဘၣ် တၢ်ဆိၣ်ဂ့ၤမနုၤလဲၣ်. ပကတဲသကိး တၢ်ဂ့ၢ်ခံခါ.
၁. ပမ့ၢ်ဒိကနၣ် ကစၢ်ယွၤကလုၢ်န့ၣ် ပကကဲထီၣ်ပှၤလၢ အိၣ်ဒီးတၢ်ကူၣ်သ့
“ယဲဒၣ်အံၤ, ယမ့ၢ်ယွၤ, နကစၢ်လၢအသိၣ်လိနၤ ဒ်သိးနကဘၣ်ဘျုးဘၣ်ဖှိၣ်, ဒီး . . . ဒုးလဲၤနၤလၢ ကျဲလၢနဂ့ၤလဲၤန့ၣ်လီၤ.”—ယၡါယၤ ၄၈:၁၇.
ပတၢ်ဘၣ်တ့ကစၢ် ယဟိဝၤယွၤန့ၣ် သ့ၣ်ညါပှၤဒီး ဟ့ၣ်ပှၤတၢ်ဟံးစုနဲၣ်ကျဲလၢ ပလိၣ်ဘၣ်တဖၣ်န့ၣ်လီၤ. ပမ့ၢ်အဲၣ်ဒိးလၢ အတၢ်သိၣ်လိ ကမၤစၢၤပှၤ ဒ်သိးပကကဲထီၣ် ပှၤလၢအိၣ်ဒီးတၢ်ကူၣ်သ့တဂၤန့ၣ် ပကဘၣ်မၤလိ တၢ်လၢအအိၣ်လၢ တၢ်ကွဲအသးစီဆှံအပူၤန့ၣ်လီၤ. ပမ့ၢ်မၤလိန့ၣ် ပကသ့ၣ်ညါထီၣ် ကစၢ်ယွၤအဲၣ်ဒိးလၢ ပကမၤမနုၤလဲၣ် ဝံၤပကဘၣ်မၤထွဲ တၢ်သိၣ်လိတဖၣ်လၢ ပတၢ်အိၣ်မူပူၤန့ၣ်လီၤ.
၂. ပမ့ၢ်ဒိကနၣ် ကစၢ်ယွၤကလုၢ်န့ၣ် ပကဒိးန့ၢ်ဘၣ် တၢ်သးခု
“ပှၤလၢအနၢ်ဟူ ယွၤအကလုၢ်အကထါ, ဒီးတိၢ်န့ၢ်ဝဲတဖၣ်န့ၣ်, ဘၣ်ဆိၣ်ဂ့ၤဝဲလီၤ.”—လူၤကၣ် ၁၁:၂၈.
မုၢ်မဆါတနံၤအံၤ ပှၤအကကွဲၢ်တဖၣ်လၢ ဒိကနၣ်ဝဲ ကစၢ်ယွၤအကလုၢ်န့ၣ် ဒိးန့ၢ်ဘၣ်ဝဲ တၢ်သးခုနီၢ်နီၢ်လီၤ. အဒိ, ပိာ်ခွါတဂၤ အိၣ်လၢ ကီၢ်စပ့ၣ် မ့ၢ်ပှၤတဂၤလၢ အသးဒိၣ်ထီၣ်တၢ်ချ့ အဃိ အရ့အမါဒီး ပှၤဂၤတဖၣ်လၢ တၢ်သူၣ်ဒိၣ်သးဖျိးအပူၤလီၤ. ဘၣ်တနံၤ အဖးဘၣ်ဝဲတၢ်ဂ့ၢ်လၢ ဝံမိၤၡ့ကွဲးဝဲ ဘၣ်ဃးဒီး စီၤယၤကိာ်အဖိခွါလၢ အအိၣ်ဒီးတၢ်သူၣ်စူၤသးစူၤတဂၤလၢ အမ့ၢ် စီၤယိၤသးလီၤ. စီၤယိၤသးန့ၣ် ပှၤဆါလီၤအီၣ်ကွံာ်အီၤဒ် ကုၢ်တဂၤအသိး ဒီးပှၤပာ်ဒ့ၣ်ပာ်ကမၣ်အီၤအဃိ အလီၤဘၣ်လၢ ဃိာ်ပူၤလီၤ. အထံၣ်ဘၣ်ဝဲ တၢ်အိၣ်သးသ့ၣ်တဖၣ်န့ၣ် သနာ်က့ အဆဲးအိၣ်ဒီး တၢ်ဆီၣ်လီၤသး, ပာ်အသးမုာ်မုာ်ခုၣ်ခုၣ်ဒီး ပျၢ်ပှၤဂၤတၢ်ကမၣ်န့ၣ်လီၤ. (၁ မိၤၡ့ အဆၢဒိၣ် ၃၇-၄၅) ဝံၤပိာ်ခွါလၢ ကီၢ်စပ့ၣ်န့ၣ် တဲဝဲလၢ “ယဆိမိၣ်ထံက့ၤ စီၤယိၤသးအဒိအတဲာ်န့ၣ် မၤစၢၤယၤလၢ ယကအိၣ်ဒီး တၢ်ဆီၣ်လီၤသး, တၢ်သူၣ်စူၤသးစူၤ ဒီးတၢ်ကီၤသူၣ်ကီၤသးလီၤ. ခီဖျိလၢ ယမၤဒ်န့ၣ် အဃိ ခဲအံၤယဒိးန့ၢ်ဘၣ် တၢ်အိၣ်မူလၢ အပှဲၤဒီး တၢ်သးခုန့ၣ်လီၤ.”
လံာ်တၢ်ကွဲးအသးစီဆှံန့ၣ် ဟ့ၣ်ပှၤတၢ်ဟံးစုနဲၣ်ကျဲလၢ ပကဘၣ်ရ့ဒီး ပှၤဂၤတဖၣ်ဒ်လဲၣ်န့ၣ်လီၤ. တၢ်ဂ့ၢ်လၢခံတခါန့ၣ် ကတဲပၠးအါထီၣ်ပှၤ ဘၣ်ဃးဒီးတၢ်ဂ့ၢ်အံၤလီၤ.