မ့ၢ်န ‘အိၣ်ကတဲာ်ကတီၤနသးလၢ ကဒိကနၣ်တၢ်အဂီၢ်’ လံဧါ

၁. ဘၣ်မနုၤအဃိ ကီလၢ ပကအိၣ်ဒီး တၢ်ဒိကနၣ်လဲၣ်.

တဘျီတခီၣ် နကဒိကနၣ်တၢ်အဂီၢ် အကီဧါ. စီၤပၤဒၤဝံးစ့ၢ်ကီး တူၢ်ဘၣ်ဝဲဒ်န့ၣ်အဃိ အဃ့ထုကဖၣ်လၢ ကစၢ်ယွၤအအိၣ် ဒီးတဲဝဲလၢ “ထိၣ်ဟူးထိၣ်ဂဲၤထီၣ်ယသး ဒ်သိးယကသးအိၣ် ဒိကနၣ်နကလုၢ်တက့ၢ်.” (စံး ၅၁:၁၂) စီၤဒၤဝံးန့ၣ် အအဲၣ်ယဟိဝၤယွၤ ဘၣ်ဆၣ် အကဒိကနၣ် ယဟိဝၤယွၤ အကလုၢ်န့ၣ် တဘျီတခီၣ် တညီလၢအဂီၢ်ဘၣ်. ပဝဲစ့ၢ်ကီး ပလီၤဂာ်ဒ်သိးဒီး စီၤဒၤဝံးလီၤ. ဘၣ်မနုၤအဃိလဲၣ်. တၢ, ခီဖျိလၢ ပတလၢတပှဲၤဘၣ်အဃိ တဘျီတခီၣ် ပတအဲၣ်ဒိး ဒိကနၣ်တၢ်ဘၣ်. ခံ, မုၣ်ကီၤလံၢ် ကျဲးစၢးဝဲထီဘိ ဒ်သိးပကထီဒါက့ၤ ယဟိဝၤယွၤ. (၂ ကရံၣ် ၁၁:၃) သၢ, ပအိၣ်မူဘၣ်လၢ ပှၤလၢအတၢ်ပာ်သူၣ်ပာ်သး လီၤဂာ်ဒ်သိးဒီး ဟီၣ်ခိၣ်အခိၣ်တဂၤ “မၤတၢ်လၢ ဆၢကတီၢ်ခဲအံၤလၢ ပှၤလၢ အတဒိကနၣ်တၢ်တဖၣ် အသးပူၤ.” (အ့း ၂:၂) အဃိ ဒ်သိး ပတမၤတၢ်ဒဲးဘးတဂ့ၤ ဒီးပကမၤနၢၤကွံာ် ပတၢ်ဂံၢ်စၢ်ဘါစၢ်အဂီၢ် ပကဘၣ် ကျဲးစၢးဆူၣ်ဆူၣ်. တကးဒံးဘၣ် မုၣ်ကီၤလံၢ် ဒီးပှၤဟီၣ်ခိၣ်ဖိတဖၣ် ဆီၣ်သနံးပှၤလၢ ပကထီဒါက့ၤတၢ် ဒီးပတဒိကနၣ်တၢ်တဂ့ၤ. အဃိ ပကဘၣ်ကျဲးစၢး တြီဆၢစ့ၢ်ကီး အဝဲသ့ၣ် အတၢ်ဆီၣ်သနံး. ပကဘၣ်ကျဲးစၢး ဆူၣ်ဆူၣ်ဒ်သိး ပကဒိကနၣ် ယဟိဝၤယွၤအကလုၢ် ဒီးပှၤလၢယဟိဝၤယွၤ ဟ့ၣ်အီၤတၢ်စိတၢ်ကမီၤတဖၣ် အကလုၢ်.

၂. ပ ‘အိၣ်ကတဲာ်ကတီၤပသးလၢ ကဒိကနၣ်တၢ်အဂီၢ်’ န့ၣ်အဲၣ်ဒိးတဲဝဲ အခီပညီဒ်လဲၣ်. (ယၤကိာ် ၃:၁၇)

^၂ ဖး ယၤကိာ် ၃:၁၇. ပှၤကွဲးလံာ်စီဆှံ စီၤယၤကိာ်န့ၣ် ခီဖျိလၢ ယဟိဝၤယွၤ အသးစီဆှံ ထိၣ်ဟူးထိၣ်ဂဲၤထီၣ်အီၤ အဃိ အတဲဝဲလၢ ပှၤလၢအကူၣ်တၢ်သ့န့ၣ် “အိၣ်ကတဲာ်ကတီၤအသးလၢ ကဒိကနၣ်တၢ်အဂီၢ်.” ဖဲပဆိကမိၣ်ထံ တၢ်ကတိၤအံၤအခီပညီအခါ ပကအဲၣ်ဒိး ဒိကနၣ်ပှၤလၢ ယဟိဝၤယွၤ ဟ့ၣ်အီၤတၢ်စိတၢ်ကမီၤတဖၣ် အကလုၢ်. ဘၣ်ဆၣ် ပှၤတဂၤဂၤ မ့ၢ်တဲပှၤလၢ ပတဘၣ်ဒိကနၣ် ယဟိဝၤယွၤ အတၢ်မၤလိာ်ဘၣ်န့ၣ် ပတဘၣ်ဒိကနၣ် အဝဲသ့ၣ်အကလုၢ်ဘၣ်.—မၤတၢ် ၄:၁၈-၂၀.

၃. ဘၣ်မနုၤအဃိ အရ့ဒိၣ်ဒိၣ်မးလၢ ပဘၣ်ဒိကနၣ် ပှၤလၢအအိၣ်ဒီး တၢ်စိတၢ်ကမီၤတဖၣ် အကလုၢ်လဲၣ်.

^၃ ယဟိဝၤယွၤ အတၢ်သိၣ်တၢ်သီန့ၣ် လၢပှဲၤဝဲထီဘိ အဃိ ဘၣ်သ့ၣ်သ့ၣ် ပကဆိကမိၣ်လၢ ပမ့ၢ်ဒိကနၣ်အကလုၢ်န့ၣ် ဂ့ၤဒိၣ်န့ၢ်ဒံး ပဒိကနၣ် ပှၤဟီၣ်ခိၣ်ဖိ အကလုၢ်ဒံး. (စံး ၁၉:၇) မ့မ့ၢ်ပှၤဟီၣ်ခိၣ်ဖိန့ၣ် တလၢတပှဲၤဘၣ်အဃိ အဝဲသ့ၣ်အိၣ်ဒီး တၢ်စိတၢ်ကမီၤ သနာ်က့ အဟံးစုနဲၣ်ကျဲပှၤ လၢလၢပှဲၤပှဲၤတသ့ဘၣ်. ဘၣ်ဆၣ် ယဟိဝၤယွၤဟ့ၣ်ဝဲ တၢ်စိတၢ်ကမီၤတနီၤ လၢမိပါ, ပဒိၣ်ပပှၢ် ဒီးတၢ်အိၣ်ဖှိၣ်သးပှၢ်တဖၣ် အအိၣ်. (ကတိၤ ၆:၂၀; ၁ သ့း ၅:၁၂; ၁ ပ့း ၂:၁၃, ၁၄) အဃိ ဖဲပဒိကနၣ် အဝဲသ့ၣ်ကလုၢ်အခါ လီၤဂာ်ဒ်သိးဒီး ပဒိကနၣ် ယဟိဝၤယွၤ အကလုၢ်. ခဲအံၤ ပကတဲသကိး ဘၣ်ဃးဒီး တဘျီတခီၣ် ပှၤလၢအအိၣ်ဒီး တၢ်စိတၢ်ကမီၤတဖၣ် အတၢ်ဟံးစုနဲၣ်ကျဲန့ၣ် ကီလၢပဂီၢ်အဃိ ဘၣ်သ့ၣ်သ့ၣ် ပတဘၣ်သးတူၢ်လိာ် ဒီးမၤထွဲဘၣ်. ဘၣ်ဆၣ် ပဒိကနၣ် ပှၤလၢယဟိဝၤယွၤဟ့ၣ်အီၤ တၢ်စိတၢ်ကမီၤတဖၣ် အကလုၢ် ကသ့ဒ်လဲၣ်.

ဒိကနၣ် နမိနပါ အကလုၢ်

၄. ဘၣ်မနုၤအဃိ ဖိသၣ်အါဂၤ တဒိကနၣ် အမိအပါ အကလုၢ်လၢၤဘၣ်လဲၣ်.

^၄ ပှၤသးစၢ်တဖၣ် အိၣ်ဒီးအသကိးတဖၣ်လၢ “တဒိကနၣ်အမိၢ်အပၢ် အကလုၢ်ဘၣ်.” (၂ တံၤ ၃:၁, ၂) ဘၣ်မနုၤအဃိ အဝဲသ့ၣ်အါဂၤ တဘၣ်သး ဒိကနၣ် အမိအပါ အကလုၢ်ဘၣ်လဲၣ်. မိပါတနီၤန့ၣ် ဖဲအဝဲသ့ၣ် သိၣ်အဖိအခါ ခီဖျိလၢ အဝဲသ့ၣ်တမၤဝဲ ဒ်အတဲအဖိအသိးဘၣ် အဃိ အဖိတဖၣ် တနာ်အီၣ်အဝဲသ့ၣ် ဒီးတကနၣ် အကလုၢ်လၢၤဘၣ်. ဒီးခီဖျိလၢ ဟီၣ်ခိၣ်တၢ်အိၣ်သး ဆီတလဲအဃိ ပှၤသးစၢ်တနီၤ ဆိကမိၣ်ဝဲလၢ မိပါတၢ်ဟ့ၣ်ကူၣ်တဖၣ်န့ၣ် တကဲဘျုးလၢၤဘၣ် ဒီးတချုးစိၤလၢၤဘၣ်. နမ့မ့ၢ် ပှၤသးစၢ်န့ၣ် နဆိကမိၣ်ဒ်န့ၣ် တဘျီဘျီဧါ. ယဟိဝၤယွၤ တဲဘၣ် ပှၤသးစၢ်တဖၣ်လၢ “ဒိကနၣ်သုမိၢ်သုပၢ် ဒ်ကစၢ်အတၢ်ဘၣ်သး အိၣ်ဝဲအသိးတက့ၢ်. သုမ့ၢ်မၤဒ်န့ၣ်န့ၣ် မ့ၢ်တၢ်လၢ ကစၢ်ယွၤထံၣ်ဝဲလၢ အဘၣ်.” (အ့း ၆:၁) သနာ်က့ ပှၤသးစၢ်အါဂၤ ကမၤထွဲဝဲ တၢ်မၤလိာ်အံၤအဂီၢ် တဘျီတခီၣ် တညီလၢအဝဲသ့ၣ်အဂီၢ်ဘၣ်. အဃိ ဒ်သိးနကမၤထွဲတၢ်မၤလိာ်အံၤအဂီၢ် တၢ်မနုၤကမၤစၢၤနၤလဲၣ်.

၅. ယ့ၣ်ၡူးဒိကနၣ် အမိအပါ အကလုၢ်န့ၣ် ကဲထီၣ် တၢ်ဒိတၢ်တဲာ်အဂ့ၤ လၢ ပှၤသးစၢ်အဂီၢ်ဒ်လဲၣ်. (လူၤကၣ် ၂:၄၆-၅၂)

^၅ နမၤလိန့ၢ်တၢ်လၢ ယ့ၣ်ၡူးအဒိအတဲာ်လၢ အအိၣ်ဒီး တၢ်ဒိကနၣ်သ့. (၁ ပ့း ၂:၂၁-၂၄) ယ့ၣ်ၡူးန့ၣ် အကဲပှၤလၢပှၤပှဲၤ ဘၣ်ဆၣ် အမိအပါ တကဲပှၤလၢပှၤပှဲၤဘၣ်. တဘျီတခီၣ် ယ့ၣ်ၡူးအမိအပါ တဲကမၣ်တၢ် ဒီးထံၣ်ကမၣ်အီၤ သနာ်က့ အပာ်ကဲ အမိအပါဒံး. (၂ မိၤ ၂၀:၁၂) ပကကွၢ်သကိး ဖဲယ့ၣ်ၡူးအိၣ် ၁၂ နံၣ် အခါ တၢ်ကဲထီၣ်သးဒီးအီၤဒ်လဲၣ်အဂ့ၢ်. (ဖး လူၤကၣ် ၂:၄၆-၅၂.) ယ့ၣ်ၡူးလဲၤဒီး အမိအပါ လၢဝ့ၢ်ယရူၤၡလ့ၣ်အပူၤ ဒီးဖဲအဝဲသ့ၣ်ဟဲက့ၤကဒါ လၢဟံၣ်အခါ အမိအပါဆိကမိၣ်လၢ ယ့ၣ်ၡူးဟဲက့ၤဒီး အဝဲသ့ၣ် ဘၣ်ဆၣ် ယ့ၣ်ၡူးတဟဲက့ၤ လၢအဝဲသ့ၣ် အကျါဘၣ်. အနီၢ်ကီၢ်န့ၣ် ဖဲဘူၣ်ဝံၤအလီၢ်ခံ နီၢ်မၤရံ ဒီးစီၤယိၤသးန့ၣ် အမူဒါအိၣ်လၢ တချုးအဝဲသ့ၣ် က့ၤလၢအဟံၣ်ဒံးဘၣ်အခါ အဝဲသ့ၣ်ကဘၣ်မၤလီၤတံၢ်လၢ အဖိကဘၣ်ပၣ်ဃုာ် ကိးဂၤဒဲး. လၢခံဖဲနီၢ်မၤရံ ဒီးစီၤယိၤသး ထံၣ်က့ၤဝဲ အဖိခွါယ့ၣ်ၡူးအခါ ခီဖျိလၢ ယ့ၣ်ၡူးအိၣ်တ့ၢ်လၢ ဝ့ၢ်ယရူၤၡလ့ၣ်အဃိ နီၢ်မၤရံ ပာ်တၢ်ကမၣ်လၢ ယ့ၣ်ၡူးအလိၤ. ဖဲန့ၣ်အခါ ယ့ၣ်ၡူးမ့ၢ်ပာ်ဖျါထီၣ်လၢ အမိတဲတၢ်တဘၣ်ဘၣ်န့ၣ်သ့. ဘၣ်ဆၣ် အတမၤဝဲဒ်န့ၣ်ဘၣ် ဒီးလၢတၢ်ပာ်ကဲအပူၤ ယ့ၣ်ၡူး တဲတၢ်ဒီးအမိအပါမုာ်မုာ်. နီၢ်မၤရံဒီးစီၤယိၤသး “တနၢ်ပၢၢ် တၢ်လၢ ယ့ၣ်ၡူးတဲ အဝဲသ့ၣ်ဘၣ်.” ဘၣ်ဆၣ် ယ့ၣ်ၡူး “ဆဲးဒိကနၣ် အဝဲသ့ၣ် အကလုၢ်.”

၆-၇. တၢ်မနုၤကမၤစၢၤ ပှၤသးစၢ်တဖၣ်လၢ ကဒိကနၣ် အမိအပါ အကလုၢ်လဲၣ်.

^၆ သးစၢ်တဖၣ်, ဖဲနမိနပါ တဲကမၣ် ဒီးနၢ်ပၢၢ်ကမၣ်နၤအခါ ကီလၢနကဒိကနၣ် အဝဲသ့ၣ်အကလုၢ်ဧါ. မ့ၢ်ကီန့ၣ် တၢ်မနုၤကမၤစၢၤနၤလဲၣ်. တၢ, ဆိကမိၣ်ကွၢ် ဘၣ်ဃးဒီး တၢ်ဒိကနၣ်န့ၣ် ယဟိဝၤယွၤ ထံၣ်ဝဲဒ်လဲၣ်. လံာ်စီဆှံတဲဝဲလၢ နမ့ၢ်ဒိကနၣ် နမိနပါအကလုၢ်န့ၣ် “မ့ၢ်တၢ်လၢ အဘၣ်ကစၢ်အသး.” (ကလီး ၃:၂၀) ယဟိဝၤယွၤ သ့ၣ်ညါဝဲလၢ တဘျီတခီၣ် နမိနပါတနၢ်ပၢၢ်နၤဘၣ် ဒီးတဘျီတခီၣ်န့ၣ် အဝဲသ့ၣ်ကပာ်လီၤ တၢ်ဘျၢတဖၣ်လၢ ကီလၢ နကမၤထွဲအီၤ. ဘၣ်ဆၣ် ဖဲနဒိကနၣ် နမိနပါအကလုၢ်အခါ မ့ၢ်ဝဲနမၤသးခု ယဟိဝၤယွၤအသး.

^၇ ခံ, ဘၣ်ဃးဒီး တၢ်ဒိကနၣ်န့ၣ် နမိနပါ ထံၣ်ဝဲဒ်လဲၣ်. ဖဲနဒိကနၣ် နမိနပါအကလုၢ်အခါ နမၤသးခုအဝဲသ့ၣ်အသး အဃိ အဝဲသ့ၣ် ကနာ်အီၣ်နၤအါထီၣ်. (ကတိၤ ၂၃:၂၂-၂၅) တကးဒံးဘၣ် နတၢ်ရ့လိာ်သးဒီး နမိနပါစ့ၢ်ကီး ကဂ့ၤဒိၣ်ထီၣ်. ဒီပုၢ်ဝဲၢ်ခွါသးစၢ် အဲးလဲစါဒြဲၤ လၢအအိၣ် ၁၉ နံၣ် ဒီးအအိၣ်လၢ ကီၢ်ဘဲကၠံၤယၢၤန့ၣ် အတဲဝဲလၢ “ဒ်ယမိယပါမၢယၤအသိး ဖဲယစးထီၣ်ဒိကနၣ် ဒီးမၤထွဲအီၤအခါ ယထံၣ်ဘၣ်လၢ ယတၢ်ရ့လိာ်သးဒီးအဝဲသ့ၣ် ဂ့ၤဒိၣ်ထီၣ် ဒီးယသးခုဒိၣ်ထီၣ်.”b သၢ, နမ့ၢ်ဒိကနၣ် နမိနပါအကလုၢ်န့ၣ် ခါဆူညါ တၢ်ဒိကနၣ်အံၤ ကမၤစၢၤနၤ. ဒီပုၢ်ဝဲၢ်ခွါဖီလိၤ လၢအအိၣ် ၂၃ နံၣ် ဒီးအအိၣ်လၢ ကီၢ်ဘြၣ်စ့န့ၣ် အတဲဝဲလၢ “ယဒိကနၣ် ယမိယပါအကလုၢ်န့ၣ် မၤစၢၤယၤလၢ ယကဒိကနၣ် ယဟိဝၤယွၤအကလုၢ် ဒီးပှၤလၢအအိၣ်ဒီး တၢ်စိတၢ်ကမီၤတဖၣ် အကလုၢ်.” တကးဒံးဘၣ် ခီဖျိလၢ လံာ်စီဆှံတဲဝဲလၢ တၢ်ဒိကနၣ်န့ၣ် ကမၤစၢၤနၤ “ဒ်သိး နတၢ်အိၣ်မူ ကလဲၤအသး ဂ့ၤဂ့ၤဘၣ်ဘၣ် ဒီးဒ်သိး နသးသမူကထီလၢ ဟီၣ်ခိၣ်ချၢအဂီၢ်” အဃိ ကစၢ်ယွၤ အကလုၢ်ကထါ ဟ့ၣ်ကူၣ်နၤလၢ နကဒိကနၣ် နမိနပါအကလုၢ်.—အ့း ၆:၂, ၃.

၈. ဘၣ်မနုၤအဃိ ပှၤသးစၢ်အါဂၤ ဃုထၢလၢ ကဒိကနၣ် အမိအပါ အကလုၢ်လဲၣ်.

^၈ ပှၤသးစၢ်အါဂၤ သ့ၣ်ညါထီၣ်ဝဲလၢ အဝဲသ့ၣ်မ့ၢ်အိၣ်ဒီး တၢ်ဒိကနၣ်န့ၣ် အတၢ်အိၣ်မူကဂ့ၤထီၣ်. ဒီပုၢ်ဝဲၢ်မုၣ်လူးဝံစၤ လၢအအိၣ် ၁၆ နံၣ် ဒီးအအိၣ်လၢ ကီၢ်ဘြၣ်စ့စ့ၢ်ကီး တဲဝဲလၢ ခီၣ်ထံးခါ ဘၣ်မနုၤအဃိ အမိအပါ တဒုးသူအီၤ လီတဲစိဘၣ်လဲၣ်န့ၣ် အတနၢ်ပၢၢ်ဝဲဘၣ်. ဖဲအမိအပါ မၤဝဲဒ်န့ၣ်အခါ အတဲဆၢက့ၤ အမိအပါလၢ ပှၤလၢအသးနံၣ်ပှဲၤသိးဒီးအီၤန့ၣ် အါတက့ၢ် အဝဲသ့ၣ်အိၣ်ဒီး အလီတဲစိကိးဂၤဒဲး. ဘၣ်ဆၣ်လၢခံ အသ့ၣ်ညါထီၣ်ဝဲလၢ အမိအပါမၤဝဲဒ်န့ၣ်န့ၣ် ခီဖျိလၢ အဝဲသ့ၣ်အဲၣ်ဒိး ဒီသဒၢအီၤအဃိ. ဒီးအတဲဝဲလၢ “ယနၢ်ပၢၢ်ထီၣ်လၢ ဖဲယဒိကနၣ် ယမိယပါအကလုၢ်အခါ ယတတူၢ်ဘၣ်လၢ အဝဲသ့ၣ်ဖီၣ်ဃံးယၤဘၣ်. အဝဲသ့ၣ် တၢ်ဟ့ၣ်ကူၣ်တဖၣ်န့ၣ် ကဲထီၣ်တၢ်မၤစၢၤလၢအဂီၢ်.” မ့မ့ၢ် ဒီပုၢ်ဝဲၢ်မုၣ်အဲလံစဘဲၤ လၢအအိၣ် ၁၈ နံၣ် ဒီးအအိၣ်လၢ ကီၢ်အမဲရကၤန့ၣ် တဘျီတခီၣ် အကဒိကနၣ် အမိအပါအကလုၢ်န့ၣ် ကီဒိၣ်မး. အတဲဝဲလၢ “ဖဲယမိယပါ ပာ်လီၤတၢ်သိၣ်တၢ်သီအခါ ယတနၢ်ပၢၢ်ခဲလၢာ်ဘၣ်, ဘၣ်ဆၣ် ယဆိကမိၣ်ထံက့ၤ လၢအပူၤကွံာ် အဝဲသ့ၣ်ပာ်လီၤတၢ်သိၣ်တၢ်သီန့ၣ် ဒီသဒၢယၤအဃိ ကဲဘျုးလၢ ယဂီၢ်ဒိၣ်မး.” ဒီပုၢ်ဝဲၢ်မုၣ် မါနံခၤ လၢအအိၣ် ၁၇ နံၣ် ဒီးအအိၣ်လၢ ကီၢ်အမ့နံယါန့ၣ် တဲဝဲလၢ အမ့ၢ်ဒိကနၣ် အမိပါအကလုၢ်န့ၣ် အဒိးန့ၢ်ဘၣ် တၢ်သးခုအါန့ၢ် အတဒိကနၣ် အမိပါအကလုၢ်ဘၣ်ဒံး.

ဒိကနၣ် “ပှၤလၢအအိၣ်ဒီး တၢ်စိတၢ်ကမီၤလၢ အပၢတၢ်လၢ ပဖီခိၣ်” အကလုၢ်

၉. ဘၣ်ဃးဒီး တၢ်ဒိကနၣ် တၢ်သိၣ်တၢ်သီန့ၣ် ပှၤအါဂၤအိၣ်ဒီး တၢ်ထံၣ်ဒ်လဲၣ်.

^၉ လံာ်စီဆှံကိးဝဲ ပဒိၣ်ပပှၢ်တဖၣ်လၢ ပှၤလၢအအိၣ်ဒီး “တၢ်စိတၢ်ကမီၤလၢ အပၢတၢ်လၢ ပဖီခိၣ်.” (ရိ ၁၃:၁) ပှၤအါဂၤန့ၣ် သ့ၣ်ညါဝဲလၢ အဝဲသ့ၣ်ကဘၣ်အိၣ်ဒီး ပဒိၣ်ပပှၢ်တဖၣ် ဒီးတၢ်သိၣ်တၢ်သီတနီၤလၢ ပဒိၣ်ပပှၢ်ပာ်လီၤဝဲန့ၣ် အဝဲသ့ၣ်ကဘၣ် ဒိကနၣ်ဝဲ. ဘၣ်ဆၣ် တၢ်သိၣ်တၢ်သီလၢ အဝဲသ့ၣ် တဘၣ်သးဝဲဘၣ် မ့တမ့ၢ် အဝဲသ့ၣ်ထံၣ်လၢ အတတီတလိၤဘၣ်န့ၣ် အဝဲသ့ၣ် တမၤထွဲဝဲဘၣ်. အဒိ ပကတဲသကိး ဘၣ်ဃးဒီး တၢ်ဟ့ၣ်ပဒိၣ်ပပှၢ် တၢ်ခိတၢ်သွဲ. ထံကီၢ်တဘ့ၣ် လၢအအိၣ်လၢ ကီၢ်ယူရပၤအပူၤန့ၣ် အပှၤထံဖိကီၢ်ဖိတဖၣ် တဲဝဲလၢ “နမ့ၢ်ဆိကမိၣ်လၢ ပဒိၣ်ပပှၢ်မၤတၢ် မ့ၢ်တတီတလိၤဘၣ်န့ၣ် နတလိၣ်ဟ့ၣ် တၢ်ခိတၢ်သွဲဘၣ်.” ခီဖျိလၢ ထံကီၢ်တဘ့ၣ်အံၤ အထံဖိကီၢ်ဖိ အတၢ်ထံၣ် အိၣ်ဝဲဒ်န့ၣ်အဃိ ပဒိၣ်ပပှၢ်မၢ ပှၤဟ့ၣ်တၢ်ခိတၢ်သွဲ သနာ်က့ အထံဖိကီၢ်ဖိ ၆၅ မျးကယၤ ဃၣ်ဃၣ်န့ၣ် တဟ့ၣ်တၢ်ခိတၢ်သွဲဘၣ်.

၁၀. တဘျီတခီၣ် ပတဘၣ်သး ပဒိၣ်တၢ်သိၣ်တၢ်သီဘၣ် သနာ်က့ ဘၣ်မနုၤအဃိ ပကြၢးဒိကနၣ်ဒံးလဲၣ်.

^၁၀ လံာ်စီဆှံပာ်ဖျါန့ၢ်ပှၤလၢ ဟီၣ်ခိၣ်ပဒိၣ်ပပှၢ်တဖၣ်န့ၣ် ဒုးအိၣ်ထီၣ် တၢ်နးတၢ်ဖှီၣ် ဒီးပဒိၣ်ပပှၢ်တဖၣ်အံၤ အိၣ်လၢမုၣ်ကီၤလံၢ် အတၢ်ပၢဖီလာ် အဃိ တယံာ်လၢၤဘၣ်န့ၣ် အဝဲသ့ၣ်ကဘၣ်တၢ်မၤဟးဂီၤအီၤ. (စံး ၁၁၀:၅, ၆; စံၣ် ၈:၉; လူၤ ၄:၅, ၆) ဒီးလံာ်စီဆှံတဲစ့ၢ်ကီးလၢ “ပှၤလၢအထီဒါ တၢ်စိတၢ်ကမီၤလၢ အပၢတၢ်တဖၣ်န့ၣ် မ့ၢ်ဝဲအထီဒါ ကစၢ်ယွၤ အတၢ်ရဲၣ်တၢ်ကျဲၤ.” ဆၢကတီၢ်ခဲအံၤ ယဟိဝၤယွၤ ပျဲဝဲလၢ ပဒိၣ်ပပှၢ်တဖၣ် ကပၢတၢ်ဒ်သိး တၢ်အိၣ်သး ကလဲၤသး ဂ့ၤဂ့ၤဘၣ်ဘၣ်အဂီၢ် ဒီးအဘၣ်သးစ့ၢ်ကီးလၢ ပကဒိကနၣ် ပဒိၣ်ပပှၢ်တဖၣ်အံၤ အကလုၢ်. အဃိ ပကဘၣ် “ဟ့ၣ်ပှၤကိးဂၤဒဲး တၢ်လၢအဝဲသ့ၣ် ကြၢးဒိးန့ၢ်ဘၣ်ဝဲ” ဒ်သိးဒီး တၢ်ခိတၢ်သွဲ, တၢ်ပာ်ကဲ ဒီးတၢ်ဒိကနၣ်. (ရိ ၁၃:၁-၇) ဘၣ်သ့ၣ်သ့ၣ် တဘျီတခီၣ် ပကဆိကမိၣ်လၢ ပဒိၣ်တၢ်သိၣ်တၢ်သီတဖၣ်န့ၣ် အတတီတလိၤဘၣ် ဒီးပကဘၣ်ဟ့ၣ် တၢ်အပှ့ၤအါမးအဃိ ပကမၤထွဲအီၤတညီဘၣ်. ဘၣ်ဆၣ်ခီဖျိလၢ ပဒိကနၣ် ယဟိဝၤယွၤ အကလုၢ်အဃိ ပကဘၣ်ဒိကနၣ်စ့ၢ်ကီး ပှၤလၢအအိၣ်ဒီး တၢ်စိတၢ်ကမီၤတဖၣ် အတၢ်သိၣ်တၢ်သီ. သနာ်က့ အဝဲသ့ၣ်တၢ်သိၣ်တၢ်သီတဖၣ် မ့ၢ်ထီဒါလိာ်သးဒီး ကစၢ်ယွၤအတၢ်သိၣ်တၢ်သီန့ၣ် ပတကြၢးဒိကနၣ်ဘၣ်.—မၤတၢ် ၅:၂၉.

၁၁-၁၂. ဒ် လူၤကၣ် ၂:၁-၆ ပာ်ဖျါထီၣ်ဝဲအသိး နီၢ်မၤရံ ဒီးစီၤယိၤသး ပာ်ဖျါထီၣ်လၢ အဝဲသ့ၣ်ဒိကနၣ် တၢ်သိၣ်တၢ်သီဒ်လဲၣ် ဒီးအဝဲသ့ၣ် ဒိးန့ၢ်ဘၣ်အဘျုးဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၁ ပမၤလိန့ၢ်တၢ်လၢ နီၢ်မၤရံ ဒီးစီၤယိၤသး အဒိအတဲာ်သ့. ဖဲနီၢ်မၤရံ ဒၢန့ၢ်ခွံလါအခါ အီၤဒီးစီၤယိၤသးန့ၣ် ထံၣ်ဘၣ်တၢ်မၤကွၢ်လၢ အကီဒိၣ်မးတခါ လၢကဘၣ်ဒိကနၣ် ပဒိၣ်ပပှၢ် အတၢ်သိၣ်တၢ်သီ. (ဖး လူၤကၣ် ၂:၁-၆.) ဖဲန့ၣ်အဆၢကတီၢ် အီၤကူစတူး ပၢဝဲရိမ့ၤအဘီအမုၢ် ဒီးဟ့ၣ်လီၤ တၢ်ကလုၢ်လၢ ပှၤအိၣ်လၢအဘီမုၢ်အပူၤခဲလၢာ် ကဘၣ်လဲၤဆဲးလီၤအမံၤ တဂၤလၢအနီၢ်ကစၢ်အဝ့ၢ်. အဃိ နီၢ်မၤရံ ဒီးစီၤယိၤသး ဘၣ်လဲၤဝဲလၢ ဝ့ၢ်ဘ့ၤသလ့ဃ့ၣ် လၢအယံၤဝဲ ၁၅၀ ကံလိမံထၢၣ် (၉၃ မံးလာ်) ဒီးဘၣ်ထီၣ်ကစၢၢ် လီၤကစၢၢ် ဒီဒူၣ်ညါ. ဘၣ်သ့ၣ်သ့ၣ် တၢ်လဲၤကျဲတခါအံၤ တညီလၢနီၢ်မၤရံ အဂီၢ်ဘၣ်. ခီဖျိလၢ နီၢ်မၤရံဒၢပှၢ်ထီၣ်အဃိ အဝဲသ့ၣ်ခံဂၤလၢာ် ကဘၣ်ယိၣ်တၢ်လၢ နီၢ်မၤရံအဂီၢ် ဒီးဖိသၣ်အဂီၢ် ဒိၣ်မး. ဘၣ်သ့ၣ်သ့ၣ် အဝဲသ့ၣ် ကဆိကမိၣ်ဝဲလၢ ဖဲအဝဲသ့ၣ်လဲၤတၢ်အခါ အဖိမ့ၢ်အိၣ်ဖျဲၣ်ထီၣ်ဘၣ်ဖုးလၢကျဲန့ၣ် အကဘၣ်မၤဒ်လဲၣ်. ဒီးခီဖျိလၢ ဖိသၣ်လၢ နီၢ်မၤရံကအိၣ်ဖျဲၣ်ထီၣ်ဝဲ တဂၤအံၤ အကကဲထီၣ် မ့းၡံအၤ အဃိ အဝဲသ့ၣ်ကဘၣ်ယိၣ်တၢ်ဒိၣ်မး. နီၢ်မၤရံ ဒီးစီၤယိၤသး မ့ၢ်တဲပူၤဖျဲးအသး ဒီးမ့ၢ်တဒိကနၣ် ပဒိၣ်ပပှၢ်အကလုၢ်ဘၣ်န့ၣ်သ့. ဘၣ်ဆၣ် အဝဲသ့ၣ် တမၤဝဲဒ်န့ၣ်ဘၣ်. ဖဲအဝဲသ့ၣ်ထံၣ်ဘၣ်ဒီး တၢ်အိၣ်သးကီခဲလၢ ကဘၣ်မၤထွဲဝဲ ပဒိၣ်ပပှၢ်အကလုၢ်အခါ အဝဲသ့ၣ်ဒိကနၣ် ဒီးမၤထွဲဝဲ.

^၁၂ နီၢ်မၤရံ ဒီးစီၤယိၤသး ဘၣ်ယိၣ်တၢ်အါမး ဘၣ်ဆၣ် အဝဲသ့ၣ် ဆဲးဒိကနၣ် တၢ်သိၣ်တၢ်သီဒံး. အဝဲသ့ၣ်အိၣ်ဒီး တၢ်ဒိကနၣ် အဃိ အဝဲသ့ၣ်မၤသးခု ယဟိဝၤယွၤအသး ဒီးယဟိဝၤယွၤ ကွၢ်ထွဲအဝဲသ့ၣ်. ပထံၣ်ဘၣ်လၢ နီၢ်မၤရံလဲၤတုၤလၢ ဝ့ၢ်ဘ့ၤသလ့ဃ့ၣ် ဂ့ၤဂ့ၤ, အအိၣ်ဖျဲၣ်ထီၣ်ဝဲအဖိ ဒီးမၤလၢပှဲၤထီၣ်ဝဲ ဝံအတၢ်စံးပာ်.—မံ ၅:၂.

၁၃. ပမ့ၢ်အိၣ်ဒီး တၢ်ဒိကနၣ်န့ၣ် ကကဲဘျုးလၢ ပဒီပုၢ်ဝဲၢ်မုၣ်ခွါ အဂီၢ်ဒ်လဲၣ်.

^၁၃ ဖဲပဒိကနၣ် ပှၤလၢအအိၣ်ဒီး တၢ်စိတၢ်ကမီၤလၢ အပၢတၢ်လၢပဖီခိၣ် အကလုၢ်အခါ ကကဲဘျုးလၢ ပနီၢ်ကစၢ်အဂီၢ် ဒီးပှၤဂၤအဂီၢ်ဒ်လဲၣ်. ပမ့ၢ်ဒိကနၣ် ဒီးမၤထွဲ ပဒိၣ်တၢ်သိၣ်တၢ်သီန့ၣ် ပတဘၣ် တၢ်စံၣ်ညီၣ်ဘၣ်. (ရိ ၁၃:၄) ဖဲပဒိကနၣ် ပှၤလၢအအိၣ်ဒီး တၢ်စိတၢ်ကမီၤလၢ ပဖီခိၣ် အကလုၢ်အခါ အဝဲသ့ၣ် ထံၣ်ဝဲလၢ ယဟိဝၤပှၤအုၣ်အသးတဖၣ်န့ၣ် အမ့ၢ်ထံဖိကီၢ်ဖိလၢအဂ့ၤ ဒီးအိၣ်ဒီးတၢ်ဒိကနၣ်. အဒိ ပူၤကွံာ်အနံၣ်အါမး လၢနဲးကၠံရံယါန့ၣ် ဖဲပှၤထီၣ်တၢ်အိၣ်ဖှိၣ်အခါ ပှၤသုးဖိတဖၣ် ဟဲနုာ်လီၤလၢ တၢ်အိၣ်ဖှိၣ်ပူၤ ဒီးဟးဃုဝဲ ပှၤလၢအထီဒါ ပဒိၣ်ပပှၢ်တဖၣ်လၢ အတဟ့ၣ် တၢ်ခိတၢ်သွဲဘၣ်. ဘၣ်ဆၣ် ပှၤဘၣ်မူဘၣ်ဒါတဂၤ တဲဝဲပှၤသုးဖိတဖၣ်လၢ “ယဟိဝၤပှၤအုၣ်အသးတဖၣ်န့ၣ် အဝဲသ့ၣ်ဟ့ၣ်တၢ်ခိတၢ်သွဲ ထီဘိလီၤ.” အဃိ ပထံၣ်ဘၣ်လၢ ဖဲပဒိကနၣ် ပဒိၣ်တၢ်သိၣ်တၢ်သီအခါ ပှၤဂၤကထံၣ်ဝဲလၢ ယဟိဝၤပှၤအုၣ်အသးန့ၣ် မ့ၢ်ပှၤလၢအဂ့ၤတဖု. ဒီးခီဖျိလၢ ပအိၣ်ဒီးတၢ်ဒိကနၣ် ဒီးအိၣ်ဒီးမံၤဂ့ၤသၣ်ဂ့ၤအဃိ လၢခံန့ၣ် ကကဲထီၣ်တၢ်ဒီသဒၢလၢ ပဒီပုၢ်ဝဲၢ်မုၣ်ခွါတဖၣ်အဂီၢ်.—မး ၅:၁၆.

၁၄. တၢ်မနုၤမၤစၢၤ ဒီပုၢ်ဝဲၢ်မုၣ်ကၠိၤအဲနၤ လၢက “အိၣ်ကတဲာ်ကတီၤအသးလၢ ကဒိကနၣ်” ပဒိၣ်ပပှၢ်အကလုၢ်လဲၣ်.

^၁၄ ဘၣ်သ့ၣ်သ့ၣ် ပကဒိကနၣ် ပှၤလၢအအိၣ်ဒီး တၢ်စိတၢ်ကမီၤ လၢအပၢတၢ်လၢပဖီခိၣ်န့ၣ် တညီထီဘိဘၣ်. ဒီပုၢ်ဝဲၢ်မုၣ်ကၠိၤအဲနၤ လၢအအိၣ်လၢ ကီၢ်အမဲရကၤန့ၣ် တဲဝဲလၢ “ခီဖျိလၢ ပဒိၣ်ပပှၢ်တဖၣ် မၤတၢ်တတီတလိၤဘၣ် အဃိ ယဟံၣ်ဖိဃီဖိ ထံၣ်ဘၣ်တၢ်နးတၢ်ဖှီၣ်. ဒီးခီဖျိတၢ်ဂ့ၢ်အံၤ အဃိ ယကဒိကနၣ် အဝဲသ့ၣ်အကလုၢ်န့ၣ် ဖၣ်ကီညါ.” ဘၣ်ဆၣ် ဒီပုၢ်ဝဲၢ်မုၣ်န့ၣ် အကျဲးစၢးဆီတလဲ အတၢ်ထံၣ်လၢ ပဒိၣ်ပပှၢ်တဖၣ် အဖီခိၣ်ဒ်လဲၣ်. တၢ, အတဖးဝဲ တၢ်ဂ့ၢ်တၢ်ကျိၤလၢ အဒုးအိၣ်ထီၣ် တၢ်ထံၣ်လၢအတဂ့ၤတဖၣ် လၢပဒိၣ်ပပှၢ် အဖီခိၣ်ဘၣ်. (ကတိၤ ၂၀:၃) ခံ, အဃ့ထုကဖၣ်လၢ ယဟိဝၤယွၤအအိၣ် ဒ်သိးကမၤစၢၤအီၤလၢ အကနာ်န့ၢ် ယဟိဝၤယွၤ ဒီးအတမုၢ်လၢ်ဝဲလၢ ပဒိၣ်ပပှၢ်ကဆီတလဲဘၣ်. (စံး ၉:၉, ၁၀) သၢ, အဖးဝဲ လံာ်လဲၢ်လၢ ပတၢ်ကရၢကရိ ထုးထီၣ်ဝဲ ဘၣ်ဃးဒီး တၢ်အိၣ်ဘၢၣ်စၢၤအဂ့ၢ်. (ယိၤ ၁၇:၁၆) ဒီပုၢ်ဝဲၢ်မုၣ်ကၠိၤအဲနၤန့ၣ် ခီဖျိလၢ အပာ်ကဲ ဒီးဒိကနၣ်ဝဲ ပှၤလၢအအိၣ်ဒီး တၢ်စိတၢ်ကမီၤတဖၣ်အဃိ ခဲအံၤန့ၣ် အပာ်သးမုာ်မုာ်ခုၣ်ခုၣ် န့ၢ်လံ.

ဒိကနၣ် ယဟိဝၤယွၤ အတၢ်ကရၢကရိ အတၢ်ဟံးစုနဲၣ်ကျဲ

၁၅. တဘျီတခီၣ်န့ၣ် ဘၣ်မနုၤအဃိ ကီလၢပကဒိကနၣ် တၢ်ဟံးစုနဲၣ်ကျဲလၢ အဟဲလၢ ယဟိဝၤယွၤ အတၢ်ကရၢကရိလဲၣ်.

^၁၅ ယဟိဝၤယွၤ တဲပှၤလၢ လၢတၢ်အိၣ်ဖှိၣ်အပူၤ “ပှၤလၢအတီခိၣ်ရိၤမဲတၢ် လၢသုကျါန့ၣ် ဒိကနၣ်အဝဲသ့ၣ်အကလုၢ်.” (ဧ့ၤ ၁၃:၁၇) ယ့ၣ်ၡူးမ့ၢ်ဝဲ ပှၤလၢပှၤပှဲၤ ဒီးအကဲဝဲပခိၣ်တဂၤ ဘၣ်ဆၣ် အသူဝဲပှၤဟီၣ်ခိၣ်ဖိလၢ အတလၢတပှဲၤတဖၣ် ဒ်သိးကတီခိၣ်ရိၤမဲပှၤ လၢဟီၣ်ခိၣ်ချၢ. အဃိ တဘျီတခီၣ် ပကဒိကနၣ် ပှၤလၢအတီခိၣ်ရိၤမဲပှၤအဂီၢ်ကကီဝဲ လီၤဆီဒၣ်တၢ် ဖဲအဝဲသ့ၣ်မၢ ပမၤတၢ်တမံၤမံၤ လၢပတအဲၣ်ဒိးမၤဘၣ်အခါ. ပမ့ၢ်ကွၢ် တၢ်မၢဖိပ့းတရူးန့ၣ် အကပာ်ဖျါထီၣ် တၢ်ဒိကနၣ်န့ၣ် တညီလၢအဂီၢ်ဘၣ်. ဖဲမူခိၣ်ကလူး မၢအအီၣ်ဆၣ်ဖိကီၢ်ဖိလၢ အတကဆှီဘၣ်အခါ စီၤပ့းတရူး ဂ့ၢ်လိာ်ဝဲ တဘျီတကးဘၣ် အဂ့ၢ်လိာ်ဝဲ သၢဘျီညါ. (မၤတၢ် ၁၀:၉-၁၆) ဘၣ်မနုၤအဃိ အဂ့ၢ်လိာ်ဝဲလဲၣ်. တၢ်ဟံးစုနဲၣ်ကျဲအံၤ ကီလၢအဂီၢ် ဒီးအတနၢ်ပၢၢ်ဝဲဘၣ်. ဒီးလၢအပူၤကွံာ်စ့ၢ်ကီး အတမၤညီနုၢ်ဝဲဒ်အံၤ နီတဘျီဘၣ်အဃိ အဂ့ၢ်လိာ်ဝဲ. အဃိ စီၤပ့းတရူးမၣ် မ့ၢ်ကီလၢ အကဒိကနၣ် မူခိၣ်ကလူးလၢ အလၢအပှဲၤတဂၤ အတၢ်ဟံးစုနဲၣ်ကျဲန့ၣ် ပကဒိကနၣ် ပှၤတီခိၣ်ရိၤမဲတၢ်လၢ အတလၢတပှဲၤဘၣ် အကလုၢ်န့ၣ် ကကီဒိၣ်န့ၢ်အန့ၣ်ဒံး.

၁၆. စီၤပီလူးထံၣ်ဝဲလၢ တၢ်ဟံးစုနဲၣ်ကျဲလၢ အန့ၢ်ဘၣ်ဝဲန့ၣ် ကီလၢအဂီၢ် သနာ်က့ အမၤထွဲဝဲဒ်လဲၣ်. (မၤတၢ် ၂၁:၂၃, ၂၄, ၂၆)

^၁၆ တၢ်မၢဖိပီလူး န့ၢ်ဘၣ်တၢ်ဟံးစုနဲၣ်ကျဲလၢ အဆိကမိၣ်ဝဲလၢ အကီလၢအဂီၢ် ဘၣ်ဆၣ်အဝဲ “အိၣ်ကတဲာ်ကတီၤအသးလၢ ကဒိကနၣ်တၢ်အဂီၢ်.” ပှၤယူဒၤဖိလၢ အကဲခရံာ်ဖိတဖၣ်န့ၣ် နၢ်ဟူဝဲစီၤပီလူးအဂ့ၢ်လၢ တမ့ၢ်တတီဘၣ်. အဝဲသ့ၣ်နၢ်ဟူဝဲလၢ စီၤပီလူး သိၣ်လိပှၤဂၤလၢ “ကပာ်တ့ၢ်ကွံာ် စီၤမိၤၡ့ အတၢ်သိၣ်တၢ်သီ” ဒီးတပာ်ကဲဝဲ စီၤမိၤၡ့တၢ်သိၣ်တၢ်သီဘၣ်. (မၤတၢ် ၂၁:၂၁) အဃိ ခရံာ်ဖိတၢ်အိၣ်ဖှိၣ်သးပှၢ် လၢဝ့ၢ်ယရူၤၡလ့ၣ်အပူၤန့ၣ် ဟံးစုနဲၣ်ကျဲဝဲ စီၤပီလူးလၢ ကလဲၤကိးဃုာ်ဝဲပှၤလွံၢ်ဂၤ လၢတၢ်လုၢ်ဟံၣ်ပူၤ ဒီးလဲၤမၤကဆှီထီၣ်အသးဒ်သိး ကပာ်ဖျါထီၣ်အသးလၢ အဒိကနၣ် စီၤမိၤၡ့တၢ်သိၣ်တၢ်သီဒံး. ဘၣ်ဆၣ် စီၤပီလူးသ့ၣ်ညါဝဲလၢ ခရံာ်ဖိတဖၣ်န့ၣ် အဝဲသ့ၣ်တလိၣ်ဒိကနၣ် စီၤမိၤၡ့တၢ်သိၣ်တၢ်သီလၢၤဘၣ်. နီၢ်ကီၢ်န့ၣ် စီၤပီလူး တမၤကမၣ်တၢ် နီတမံၤဘၣ်. ဘၣ်ဆၣ် စီၤပီလူး တထုးယံာ်ထုးနီၢ်အသးဘၣ် ဒီးအလဲၤ “ကိးန့ၢ် ပှၤပိာ်ခွါတဖၣ်န့ၣ် ဒီးအဝဲသ့ၣ် မၤသကိး တၢ်မၤကဆှီထီၣ်သး အလုၢ်လၢ်တဖၣ်.” (ဖး မၤတၢ် ၂၁:၂၃, ၂၄, ၂၆.) ပထံၣ်ဘၣ်လၢ စီၤပီလူးအိၣ်ဒီး တၢ်ဒိကနၣ်အဃိ တၢ်ဃူတၢ်ဖိးအိၣ်လၢ ဒီပုၢ်ဝဲၢ်မုၣ်ခွါတဖၣ်အကျါ.—ရိ ၁၄:၁၉, ၂၁.

၁၇. လၢဒီပုၢ်ဝဲၢ်မုၣ်စတဲးဖၢၣ်နံၤ အတၢ်လဲၤခီဖျိန့ၣ် ပန့ၢ်ဘၣ်တၢ်မၤလိဒ်လဲၣ်.

^၁၇ အဒိ ဒီပုၢ်ဝဲၢ်မုၣ်စတဲးဖၢၣ်နံၤန့ၣ် အကတူၢ်လိာ်ဝဲ ဒီပုၢ်ဝဲၢ်လၢ အတီခိၣ်ရိၤမဲတၢ် လၢအထံကီၢ်ပူၤ အတၢ်ဆၢတဲာ်အဂီၢ် အကီဒိၣ်မး. ဒီပုၢ်ဝဲၢ်မုၣ် ဒီးအဝၤန့ၣ် အဝဲသ့ၣ်မၤဝဲ ကစၢ်ယွၤတၢ်မၤလၢ ကျိာ်အဂၤ ဖဲအထံကီၢ်ပူၤ. ဘၣ်ဆၣ် ဝဲၤတြၢ် ပာ်ပတုာ်ဝဲ ကျိာ်တခါအံၤအဃိ အဝဲသ့ၣ် ဘၣ်က့ၤကဒါလၢ တၢ်အိၣ်ဖှိၣ်လၢ ပှၤတဲတၢ်လၢ အဝဲသ့ၣ်နီၢ်ကစၢ်ကျိာ်. ဒီပုၢ်ဝဲၢ်မုၣ်စတဲးဖၢၣ်နံၤ တဲဝဲလၢ “ယသးတမုာ် နီတစဲးဘၣ် ဒီးတၢ်အိၣ်ဖှိၣ်လၢ ပှၤတဲတၢ်လၢ ပနီၢ်ကစၢ်ကျိာ်န့ၣ် တလိၣ်ဘၣ် တၢ်မၤစၢၤ ထဲန့ၣ်ဘၣ်.” ဘၣ်ဆၣ် အဆဲးဆီၣ်ထွဲဝဲ တၢ်ဟံးစုနဲၣ်ကျဲ အသီတခါအံၤ. ဒီးအတဲဝဲ “လၢခံယသ့ၣ်ညါလၢ တၢ်ဆၢတဲာ်တခါအံၤ မ့ၢ်တၢ်ဆၢတဲာ်လၢအဘၣ်.” ဒီပုၢ်ဝဲၢ်မုၣ်အံၤ ဆဲးတဲဝဲလၢ “ဒီပုၢ်ဝဲၢ်မုၣ်ခွါလၢ အတၢ်အိၣ်ဖှိၣ်ပူၤတနီၤန့ၣ် အမိအပါ တအိၣ်လၢတၢ်မ့ၢ်တၢ်တီအပူၤဘၣ် အဃိ ပကဲထီၣ် မိပါလၢနီၢ်သးတခီ လၢအဝဲသ့ၣ်အဂီၢ်. တကးဒံးဘၣ် ယမၤလိတၢ်ဒီး ဒီပုၢ်ဝဲၢ်မုၣ်လၢ အဟဲက့ၤနုာ်လီၤလၢ တၢ်အိၣ်ဖှိၣ်ပူၤတဂၤစ့ၢ်ကီး. ခဲအံၤန့ၣ် ယန့ၢ်ဘၣ် တၢ်ဆၢကတီၢ်အါထီၣ်လၢ ယကမၤ နီၢ်ကစၢ် တၢ်မၤလိ လံာ်စီဆှံအဂီၢ်စ့ၢ်ကီး.” ဒီပုၢ်ဝဲၢ်မုၣ်စတဲးဖၢၣ်နံၤ ဆဲးတဲဝဲလၢ “ခီဖျိလၢ ယအိၣ်ဒီးတၢ်ဒိကနၣ် ဒီးယသ့ၣ်ညါလၢ ယကျဲးစၢး မၤလၢအဂ့ၤကတၢၢ်အဃိ ခဲအံၤန့ၣ် ယအိၣ်ဒီး သးလၢအသ့ၣ်ညါဒၣ်တၢ် လၢအကဆှီ.”

၁၈. ပမ့ၢ်အိၣ်ဒီး တၢ်ဒိကနၣ်န့ၣ် အဘျုးအိၣ်ဒ်လဲၣ်.

^၁၈ ပဝဲစ့ၢ်ကီး ပမၤလိန့ၢ် တၢ်ဒိကနၣ်သ့. ယ့ၣ်ၡူးန့ၣ် “မၤလိန့ၢ်တၢ်ဒိကနၣ် ခီဖျိတၢ်လၢ အတူၢ်ဘၣ်ဝဲတဖၣ်အဃိ.” (ဧ့ၤ ၅:၈) ပဝဲစ့ၢ်ကီး ဖဲပထံၣ်ဘၣ် တၢ်ကီတၢ်ခဲအခါ ပမၤလိန့ၢ်တၢ်ဒိကနၣ် ဒ်ယ့ၣ်ၡူးအသိးသ့. အဒိ ဖဲခိၤရိၤနၤတၢ်ဆါ ရၤလီၤသး အဆၢကတီၢ်န့ၣ် ပဒိးန့ၢ်ဘၣ် တၢ်ဟံးစုနဲၣ်ကျဲလၢ ပတဘၣ်လဲၤထီၣ် တၢ်အိၣ်ဖှိၣ်လၢ တၢ်အိၣ်ဖှိၣ်လီၢ်ဘၣ် ဒီးပတဘၣ် ဟးစံၣ်တဲၤတဲလီၤတၢ်လၢ တဟံၣ်ဘၣ်တဟံၣ်ဘၣ်. ခီၣ်ထံးခါ နကဒိကနၣ် တၢ်ဟံးစုနဲၣ်ကျဲအံၤအဂီၢ် မ့ၢ်အညီစ့ၢ်ကီးဧါ. ဘၣ်ဆၣ် ခီဖျိလၢ နဒိကနၣ်တၢ်ဟံးစုနဲၣ်ကျဲအဃိ အကဲထီၣ် တၢ်ဒီသဒၢလၢနဂီၢ် တကးဒံးဘၣ် နအိၣ်ဃူအိၣ်ဖိးဒီး ဒီပုၢ်ဝဲၢ်မုၣ်ခွါတဖၣ် ဒီးယဟိဝၤယွၤ စ့ၢ်ကီးသးခု. အဒိ ခါဆူညါ ဖဲတၢ်နးတၢ်ဖှီၣ်ဖးဒိၣ် စးထီၣ်သးအဆၢကတီၢ်န့ၣ် ပမ့ၢ်ဒိးန့ၢ်ဘၣ် တၢ်ဟံးစုနဲၣ်ကျဲ တမံၤဂ့ၤတမံၤဂ့ၤ သနာ်က့ ကညီဝဲလၢ ပကဒိကနၣ် ဒီးမၤထွဲအီၤ. ပမ့ၢ်ဒိကနၣ် တၢ်ဟံးစုနဲၣ်ကျဲန့ၣ် ပသးသမူကပူၤဖျဲး.—ဘး ၃၆:၁၁.

၁၉. ဘၣ်မနုၤအဃိ ပကဘၣ်အိၣ်ဒီး တၢ်ဒိကနၣ်လဲၣ်.

^၁၉ ပမ့ၢ်အိၣ်ဒီးတၢ်ဒိကနၣ်န့ၣ် ပကဒိးန့ၢ်ဘၣ် တၢ်ဆိၣ်ဂ့ၤဒီဒူၣ်. ပဒိကနၣ် ယဟိဝၤယွၤန့ၣ် ခီဖျိလၢ ပအဲၣ်အီၤ ဒီးပအဲၣ်ဒိးမၤသးခုအသးအဃိ. (၁ ယိၤ ၅:၃) တၢ်လၢယဟိဝၤယွၤ မၤန့ၢ်ပှၤတဖၣ်န့ၣ် ပဟ့ၣ်ဆၢက့ၤအီၤ တလၢာ်နီတဘျီဘၣ်. (စံး ၁၁၆:၁၂) ဘၣ်ဆၣ် ပပာ်ဖျါထီၣ် ပတၢ်စံးဘျုးစံးဖှိၣ် သ့ ခီဖျိ ပဒိကနၣ် ယဟိဝၤယွၤအကလုၢ် ဒီးပှၤလၢအအိၣ်ဒီး တၢ်စိတၢ်ကမီၤတဖၣ် အကလုၢ်. ပမ့ၢ်အိၣ်ဒီး တၢ်ဒိကနၣ်ဒ်န့ၣ်န့ၣ် ပပာ်ဖျါထီၣ်လၢ ပအိၣ်ဒီးတၢ်ကူၣ်သ့ ဒီးထဲန့ၣ်တကးဒံးဘၣ် ပမ့ၢ်အိၣ်ဒီး တၢ်ကူၣ်သ့ ပကမၤသးခု ယဟိဝၤယွၤအသး.—ကတိၤ ၂၇:၁၁.