တၢ်ထုကဖၣ်န့ၣ် ကကဲဘျုးလၢ ပဂီၢ်ဒ်လဲၣ်
ပိာ်မုၣ်တဂၤ လၢအမံၤမ့ၢ် ဖဲၤမလၤန့ၣ် အဆိးက့နးမး ဒီးအဃ့တၢ်မၤစၢၤလၢ ကသံၣ်သရၣ်အအိၣ်. တကးဒံးဘၣ် ဒ်သိးအတူၢ်တၢ် ကန့ၢ်အဂီၢ် အဃ့ကစၢ်ယွၤလၢ ကဟ့ၣ်အီၤ တၢ်ဂံၢ်တၢ်ဘါ. တၢ်ထုကဖၣ် မၤစၢၤအီၤဧါ.
ဖဲၤမလၤ တဲဝဲလၢ “ဖဲယဒိးန့ၢ်ဘၣ် တၢ်ကူစါယါဘျါလၢ ခဲစၢၤအဂီၢ်အခါ ယပျံၤတၢ်ဒိၣ်မး. ဘၣ်ဆၣ် ဖဲယဃ့ထုကဖၣ်လၢ ယဟိဝၤယွၤ အအိၣ်အခါ ယဒိးန့ၢ်ဘၣ် တၢ်သူၣ်မံသးမုာ်. အဃိ ယတူၢ်ယတၢ်ကီတၢ်ခဲန့ၢ် ဒီးယတပျံၤတၢ်လၢၤဘၣ်. တုၤလၢခဲအံၤန့ၣ် ယဘၣ်တူၢ်တၢ်ဆါ နးဒိၣ်မးဒံး. ဘၣ်ဆၣ် တၢ်ထုကဖၣ် မၤစၢၤယၤဒ်သိး ယကဆဲးအိၣ်ဒီး တၢ်ထံၣ်လၢအဂ့ၤ. ဖဲပှၤဂၤ သံကွၢ်ယၤလၢ ယတူၢ်ဘၣ် ဒ်လဲၣ်အခါ ယတဲလၢ ‘ယအိၣ်တမုာ်အါအါဘၣ် သနာ်က့ ယသးခုဒံး.’”
ပဝဲစ့ၢ်ကီး ဖဲပထံၣ်ဘၣ် တၢ်ကီတၢ်ခဲ နးဒိၣ်မးအခါ ပဃ့ထုကဖၣ်သ့. ဒီးပတၢ်ကီတၢ်ခဲ မ့ၢ်ဆံးသနာ်က့ ဒ်သိး ပလဲၤခီဖျိအီၤ ကန့ၢ်အဂီၢ် ညီနုၢ်န့ၣ် ပတူၢ်ဘၣ်လၢ ပကဘၣ် ဃ့တၢ်မၤစၢၤ. အဃိ တၢ်ထုကဖၣ် မၤစၢၤပှၤ သ့နီၢ်ကီၢ်ဧါ.
လံာ်စီဆှံ တဲဝဲလၢ “ပာ်ထီၣ် နတၢ်ဝံဃၢလၢ ယဟိဝၤယွၤအအိၣ်တက့ၢ်. အဝဲကမၤဂၢၢ်မၤကျၢၤနၤ ဒီးအဝဲတပျဲလၢ ပှၤတီပှၤလိၤတဂၤ ကလီၤဃံၢ်နီတဘျီဘၣ်.” (စံးထီၣ်ပတြၢၤ ၅၅:၂၂) လံာ်စီဆှံတဆၢအံၤ မၤမုာ်ထီၣ်ပသးဒိၣ်မး တမ့ၢ်ဧီၤ. အဃိ တၢ်ထုကဖၣ် မၤစၢၤနၤ ကသ့ဒ်လဲၣ်. ဒ်သိး နလဲၤခီဖျိ နတၢ်ကီတၢ်ခဲ ကန့ၢ်အဂီၢ် နမ့ၢ်ဃ့ထုကဖၣ် ဒ်ကစၢ်ယွၤ အတၢ်ဘၣ်သးအသိးန့ၣ် အကဟ့ၣ်နၤ တၢ်မၤစၢၤလၢ နလိၣ်ဘၣ်.—ကွၢ်တၢ်လွံၢ်နၢၣ် လၢအခိၣ်တီၢ်မ့ၢ်ဝဲ “နမ့ၢ်ဃ့ထုကဖၣ်န့ၣ် နကဒိးန့ၢ်ဘၣ်မနုၤလဲၣ်.”