ပမၤလီၤမၢ်ကွံာ် တၢ်သးဟ့ ကသ့ဒ်လဲၣ်

၁ တဘၣ် ကွၢ်ဒိၣ်ဆံးအါစှၤတၢ်တဂ့ၤ

လံာ်စီဆှံတဲဝဲလၢ–

“ကစၢ်ယွၤ တကွၢ်ဒိၣ်ဆံး အါစှၤတၢ်ဘၣ်. မ့မ့ၢ် ပှၤကိးကလုာ်ဒဲး [ပှၤကိးဂၤဒဲး] လၢအပျံၤအီၤ ဒီးမၤတၢ်လၢ အဘၣ်န့ၣ် အဝဲတူၢ်လိာ်ဝဲလီၤ.”—မၤတၢ် ၁၀:၃၄, ၃၅.

အဲၣ်ဒိးတဲဝဲ–

ယဟိဝၤယွၤa တကွၢ်မဲာ် ကလုာ်ဒူၣ်, ပှၤဖံးညၣ်အလွဲၢ် မ့တမ့ၢ် တၢ်ဆဲးတၢ်လၤဘၣ်. ဘၣ်ဆၣ် တၢ်လၢအရ့ဒိၣ်လၢ ယဟိဝၤယွၤအဂီၢ်န့ၣ် မ့ၢ်ဝဲ တၢ်လၢအအိၣ်လၢပသးပူၤ. လံာ်စီဆှံတဲဝဲလၢ “ပှၤကညီကွၢ်ပှၤအမဲာ်, မ့မ့ၢ်ယွၤကွၢ်ပှၤအသးလီၤ.”—၁ ၡမူၤအ့လး ၁၆:၇.

လံာ်စီဆှံတဆၢအံၤ မၤစၢၤပှၤ ကသ့ဒ်လဲၣ်–

ပတသ့ၣ်ညါ တၢ်အိၣ်လၢ ပှၤသးပူၤဘၣ် သနာ်က့ ပမ့ၢ်အိၣ်ဒီး တၢ်ထံၣ်ဒ် ကစၢ်ယွၤအသိးန့ၣ် ပှၤတဂၤကဲ ပှၤဒ်လဲၣ်ဂ့ၤဒ်လဲၣ်ဂ့ၤ အရ့တဒိၣ်လၢပဂီၢ်ဘၣ် ဒီးပကကွၢ်လၢ ပှၤတဂၤဒီးတဂၤ အတၢ်ဂ့ၤတခီ. အဃိ ပတကွၢ်ဒိၣ်ဆံးအါစှၤ ပှၤကညီဘၣ်. နမ့ၢ်သ့ၣ်ညါလီၤနသးလၢ နအိၣ်ဒီးတၢ်ထံၣ်လၢ အတဂ့ၤဘၣ် လၢပှၤဂၤအဖီခိၣ် ခီဖျိလၢ အဝဲသ့ၣ် ကလုာ်ဒူၣ်န့ၣ် ဒ်သိးနတၢ်ထံၣ်လၢ အတဂ့ၤဘၣ်အံၤ ကလီၤမၢ်ကွံာ်ဝဲအဂီၢ် ဃ့တၢ်မၤစၢၤလၢ ကစၢ်ယွၤအအိၣ်. (စံးထီၣ်ပတြၢၤ ၁၃၉:၂၃, ၂၄) ဒ်သိးနသုတကွၢ်ဒိၣ်ဆံး အါစှၤတၢ်တဂ့ၤအဂီၢ် နမ့ၢ်ဃ့ယဟိဝၤယွၤလၢ ကမၤစၢၤနၤန့ၣ် နနာ်သ့သပှၢ်ကတၢၢ်လၢ အဝဲကဒိကနၣ် နတၢ်ထုကဖၣ် ဒီးအကမၤစၢၤနၤ.—၁ ပ့းတရူး ၃:၁၂.

a ယဟိဝၤန့ၣ် မ့ၢ်ဝဲ ကစၢ်ယွၤအမံၤ.—စံးထီၣ်ပတြၢၤ ၈၃:၁၈.

တၢ်အိၣ်မူ တၢ်လဲၤခီဖျိအဂ့ၢ် ထဲထၢၤ(စ်)

မၤလီၤမၢ်ကွံာ်ဝဲ တၢ်သးဟ့န့ၢ်လံ

ထဲထၢၤ(စ်)န့ၣ် အတကၠဲးဝဲ တၢ်သိၣ်တၢ်သီလၢ အဘၣ်ဃးဒီး တၢ်ကွၢ်ဒိၣ်ဆံးအါစှၤ ကလုာ်ဒူၣ်ဘၣ်. အဃိ အဝဲသးဒိၣ်ထီၣ်တၢ် ဒီးလဲၤပာ်ဖှိၣ်ထီၣ်အသးဒီး ပှၤမၢးဖိလၢ အအၢအသီလၢ အအိၣ်ဒီး တၢ်ထံၣ်ဒ်သိးဒီးအီၤတဖၣ်အကျါ. ထဲထၢၤ(စ်) တဲဝဲလၢ “ဒ်သိး ပကဒုးအိၣ်ထီၣ် တၢ်အ့ၣ်လိာ်အဂီၢ် ပလဲၤလၢတၢ်လီၢ်လၢ ပှၤသူဖံးဖိတဖၣ်လဲၤတန့ၢ်ဘၣ် ဒ်သိးဒီး ဟိၣ်ထဲ (hotels) ဒီးပှၤအီသံးလီၢ်တဖၣ်.” ဒီးထဲထၢၤ(စ်) တဲဝဲ လၢအသးပူၤန့ၣ် အိၣ်ထဲတၢ်သးဟ့လီၤ. ဒီးတကးဒံးဘၣ် အတဲဝဲလၢ “ယမ့ၢ်အ့ၣ်လိာ်သးဒီးပှၤဂၤန့ၣ် အဝဲသ့ၣ် မ့ၢ်ကဲပိာ်မုၣ်မ့ၢ်ဂ့ၤ ပိာ်ခွါမ့ၢ်ဂ့ၤ ယကဲပှၤလၢ အစးထီၣ်ထိဆိအဝဲသ့ၣ် ထီဘိလီၤ.”

ဘၣ်ဆၣ် ဖဲထဲထၢၤ(စ်) စးထီၣ်မၤလိ လံာ်စီဆှံဒီး ယဟိဝၤပှၤအုၣ်အသးတဖၣ်အခါ အစးထီၣ်ဆီတလဲ အတၢ်အိၣ်မူ. ဒီးဖဲအဖးလံာ်စီဆှံအခါ အတၢ်ထံၣ် ဆီတလဲဝဲ. မ့ၢ်လၢ အသ့ၣ်ညါဘၣ်ဝဲ လံာ်စီဆှံအတၢ်အၢၣ်လီၤလၢ ခါဆူညါ လၢအမ့ၢ် “တၢ်သံတအိၣ်လၢၤဘၣ်. တၢ်သူၣ်အုးသးအုးမ့ၢ်ဂ့ၤ ဒီးတၢ်ဟီၣ်တၢ်ယၢၤမ့ၢ်ဂ့ၤ, တၢ်လၢ အဆါမ့ၢ်ဂ့ၤတအိၣ်လၢၤဘၣ်.” အဃိ အဝဲကၠဲး တၢ်အၢၣ်လီၤအံၤဒိၣ်မး.—လီၣ်ဖျါ ၂၁:၃, ၄.

လၢအခီၣ်ထံးခါန့ၣ် ထဲထၢၤ(စ်) ကမၤလီၤမၢ်ကွံာ် တၢ်သးဟ့အဂီၢ် ကီလၢအဂီၢ်ဒိၣ်မး. အတဲဝဲလၢ “ယကဆီတလဲကွံာ် ယတၢ်ဆိကမိၣ် ဒီးယလုၢ်လၢ်သကဲာ်ပဝးတဖၣ်အဂီၢ် ဖးကီညါ.” ဘၣ်ဆၣ် မၤတၢ် ၁၀:၃၄, ၃၅ န့ၣ်မၤစၢၤအီၤ. ဒီးဖဲန့ၣ် ပာ်ဖျါထီၣ်ဝဲလၢ ကစၢ်ယွၤန့ၣ် တကွၢ်ဒိၣ်ဆံးအါစှၤတၢ်ဘၣ်.

လံာ်စီဆှံတဆၢအံၤ ကဲဘျုးလၢ ထဲထၢၤ(စ်) အဂီၢ်ဒ်လဲၣ်. ထဲထၢၤ(စ်) တဲဝဲလၢ “ယဟိဝၤပှၤအုၣ်အသးတဖၣ်န့ၣ် အကလုာ်ဒူၣ် ဒီးအဖံးညၣ်အလွဲၢ် မ့ၢ်လီၤဆီသနာ်က့ အဝဲသ့ၣ် ပာ်ဖျါထီၣ် တၢ်အဲၣ်လၢ တဂၤဒီးတဂၤအဖီခိၣ်. အဃိ ယနာ်သပှၢ်တၢၢ်လၢ ယဟိဝၤပှၤအုၣ်အသးတဖၣ်န့ၣ် မ့ၢ်ဝဲ တၢ်ဘူၣ်တၢ်ဘါလၢ အမ့ၢ်အတီ. ယၤန့ၣ်လၢညါ ယတဆ့ၣ်နီၤအီၣ်သကိးဘၣ်တၢ်ဒီး ပှၤဝါဖံးဖိနီတဘျီဘၣ်. တချုးလၢ ယဒိးဘျၢထံဒံးဘၣ်န့ၣ် ဒီပုၢ်ဝဲၢ်တဂၤလၢ အညၣ်ဝါ လၢတၢ်အိၣ်ဖှိၣ်ပူၤန့ၣ် ကွဲမုာ်ယၤလၢ ကလဲၤအီၣ်တၢ်လၢ အဝဲသ့ၣ်အဟံၣ်. အဃိ ယဖုးဘၣ်ယသးဒိၣ်မး. အခဲအံၤန့ၣ် ယအိၣ်ဘၣ်လၢ ဒီပုၢ်ဝဲၢ်တံၢ်နီၢ်လၢ အအိၣ်လၢ ဟီၣ်ခိၣ်ဒီဘ့ၣ်လံ.”