ပမၤလီၤမၢ်ကွံာ် တၢ်သးဟ့ ကသ့ဒ်လဲၣ်

၄ ဒ်သိး နတသးဟ့ပှၤဂၤ လၢၤတဂ့ၤအဂီၢ် ကစၢ်ယွၤမၤစၢၤနၤသ့

လံာ်စီဆှံတဲဝဲလၢ–

“သးစီဆှံအတၤသၣ်န့ၣ် မ့ၢ်ဝဲတၢ်အဲၣ်တၢ်ကွံ, တၢ်သူၣ်ခုသးခု, တၢ်သူၣ်မံသးမုာ်, တၢ်ဝံသးစူၤ, တၢ်သူၣ်ဂ့ၤသးဝါ, တၢ်မၤဂ့ၤတၢ်, တၢ်စူၢ်တၢ်နာ်, တၢ်သူၣ်စူၤသးစူၤ ဒီးတၢ်ပၢၤသူၣ်ပၢၤသးန့ၣ်လီၤ.”—ကလၤတံ ၅:၂၂, ၂၃.

အဲၣ်ဒိးတဲဝဲ–

ဒ်သိးပမၤလီၤမၢ်ကွံာ် တၢ်သးဟ့ ကန့ၢ်အဂီၢ် ကစၢ်ယွၤမၤစၢၤပှၤသ့. ကစၢ်ယွၤ အသးစီဆှံ ကမၤစၢၤပှၤလၢ ပကအိၣ်ဒီး သးစီဆှံအတၤသၣ်. ဒီးပမၤလီၤမၢ်ကွံာ် တၢ်သးဟ့လၢ ပနီၢ်ကစၢ်တသ့ဘၣ်. အဃိ ပကဘၣ်သန့ၤပသးလၢ ကစၢ်ယွၤ ဒီးတူၢ်လိာ် အတၢ်မၤစၢၤ. ပမ့ၢ်မၤဒ်န့ၣ်န့ၣ် ပကလီၤဂာ်ဒီး တၢ်မၢဖိပီလူးလၢ အတဲဝဲလၢ “ယအိၣ်ဒီး တၢ်ဂံၢ်တၢ်ဘါလၢ ယကလဲၤခီဖျိတၢ်ခဲလၢာ် ခီဖျိပှၤတဂၤလၢ အဟ့ၣ်ယၤ တၢ်စိကမီၤန့ၣ်အဃိလီၤ.” (ဖံလံးပံၤ ၄:၁၃) ဒီးပတဲသ့လၢ “တၢ်မၤစၢၤယၤန့ၣ် ဟဲဝဲလၢယွၤ” အအိၣ်လီၤ.—စံးထီၣ်ပတြၢၤ ၁၂၁:၂.

လံာ်စီဆှံတဆၢအံၤ မၤစၢၤပှၤ ကသ့ဒ်လဲၣ်–

“လၢညါန့ၣ် ယမ့ၢ်ပှၤလၢ အမၤဆူၣ်မၤစိးတၢ် ဘၣ်ဆၣ် ယဟိဝၤယွၤန့ၣ် ဆီတလဲကွံာ်ယၤဒီး ခဲအံၤန့ၣ် ယကဲထီၣ်ဝဲ ပှၤတဂၤလၢ အမၤဃူမၤဖိးတၢ်.”—ဝီဒိၤ

ဃ့ထုကဖၣ်လၢ ယဟိဝၤယွၤအအိၣ် ဒီးဃ့အသးစီဆှံတၢ်မၤစၢၤ. (လူၤကၣ် ၁၁:၁၃) တကးဒံးဘၣ် ဃ့ကစၢ်ယွၤ အတၢ်မၤစၢၤလၢ နကအိၣ်ဒီး တၢ်သူၣ်ဂ့ၤသးဝါ ဒ်သိးဒီးအီၤ. ဒီးနမ့ၢ်မၤလိ ဘၣ်ဃးဒီး တၢ်အဲၣ်တၢ်ကွံ, တၢ်သူၣ်မံသးမုာ်, တၢ်ဝံသးစူၤ ဒီးတၢ်ပၢၤသူၣ်ပၢၤသးအဂ့ၢ်န့ၣ် နမၤလီၤမၢ်ကွံာ် တၢ်သးဟ့ လၢအအိၣ်လၢနသးပူၤ ကန့ၢ်ဝဲ. ဝံၤတၢ်လၢ နမၤလိဘၣ်အီၤတဖၣ်န့ၣ် ဂုာ်ကျဲးစၢး အိၣ်မူမၤထွဲက့ၤလၢ နတၢ်အိၣ်မူအပူၤ. တကးဒံးဘၣ် ရ့ဒီးပှၤလၢ အအိၣ်ဒီးတၢ်သူၣ်ဂ့ၤသးဝါ ဒ်န့ၣ်အသိးသ့ၣ်တဖၣ်. ဒီးပှၤဒ်န့ၣ်တဖၣ်န့ၣ် ‘ကထိၣ်ဟူးထိၣ်ဂဲၤထီၣ်နၤ လၢနကပာ်ဖျါထီၣ် တၢ်အဲၣ်တၢ်ကွံ ဒီးတၢ်မၤလၢအဂ့ၤတဖၣ်’ သ့ဝဲလီၤ.—ဧ့ၤဘြံၤ ၁၀:၂၄.

တၢ်အိၣ်မူ တၢ်လဲၤခီဖျိအဂ့ၢ် ဝီဒိၤ

မၤလီၤမၢ်ကွံာ် တၢ်သးဟ့ ဒီးအတမၤဆူၣ်မၤစိး ပှၤဂၤလၢၤဘၣ်

ဝီဒိၤန့ၣ် အတၢ်အိၣ်မူကီခဲဒိၣ်မး ဒီးဖဲအဒိၣ်ထီၣ်အခါန့ၣ် အဒိၣ်ထီၣ်ဘၣ်လၢ ပှၤလၢ အသးဟ့တၢ်သ့ၣ်တဖၣ် အကျါ. ဝီဒိၤတဲဝဲလၢ “ယဟးထိလိာ်သးဒီး ပှၤလၢ အသူကသံၣ်မူၤဘှီးသ့ၣ်တဖၣ် ထီဘိလီၤ . . . ဘၣ်တဘျီ ယဒုၣ်ယဒါသ့ၣ်တဖၣ်န့ၣ် ငါန့ၢ်ဝဲပှၤတဂၤလၢ ကဟဲမၤသံယၤအဂီၢ်. ဘၣ်ဆၣ် တၢ်တဘျီန့ၣ် ယဃ့ၢ်ပူၤဖျဲးယသးသ့ သနာ်က့ အဝဲသ့ၣ် ဆဲးဘၣ်ယၤတထံၣ်.”

ဝီဒိၤန့ၣ် ဖဲအမါစးထီၣ် မၤလိၤလံာ်စီဆှံဒီး ယဟိဝၤပှၤအုၣ်အသးအခါ အဝဲတကၠဲးဝဲနီတကၠဲးဘၣ်. အတဲဝဲ “ယသးဟ့ ယဟိဝၤပှၤအုၣ်အသးတဖၣ် အဃိ ယဆိၣ်အဝဲသ့ၣ် မၣ်မၣ်လီၤ. သနာ်က့ အဝဲသ့ၣ်န့ၣ် ရ့က့ၤဒီးယၤ မုာ်မုာ်ထီဘိလီၤ.

လၢခံန့ၣ် ဝီဒိၤစ့ၢ်ကီး စးထီၣ်မၤလိလံာ်စီဆှံ ဒီးအဝဲတဲဝဲလၢ “ယကမၤထွဲ တၢ်လၢ ယမၤလိဘၣ်တဖၣ်အဂီၢ်န့ၣ် တညီဝဲဘၣ်. ဒီးယဆိကမိၣ်လၢ ယမၤလီၤမၢ်ကွံာ် ယတၢ်သူၣ်ဒိၣ်သးဖျိးဒီး တၢ်မၤဆူၣ်မၤစိး တဖၣ်န့ၣ်တန့ၢ်ဘၣ်.” ဘၣ်ဆၣ် တၢ်ဂ့ၢ်တၢ်ခါလၢ အမၤလိဘၣ်ဝဲလၢ လံာ်စီဆှံပူၤန့ၣ် ဆီတလဲကွံာ်ဝဲ အတၢ်အိၣ်မူ.

ဝီဒိၤတဲဝဲလၢ “ဘၣ်တနံၤ အလံၤဟါဒိၤ လၢအကဲပှၤလၢ အသိၣ်လိယၤ လံာ်စီဆှံတဂၤန့ၣ် မၢယဖး ကလၤတံ ၅:၂၂, ၂၃. ဝံၤဒီး အဝဲတဲဘၣ်ယၤလၢ ဒ်သိးယကအိၣ်ဒီး တၢ်သူၣ်ဂ့ၤသးဝါ ဒ်လံာ်စီဆှံတဆၢအံၤ ပာ်ဖျါထီၣ်ဝဲအသိးအဂီၢ် ယမၤလၢယနီၢ်ကစၢ် တၢ်ဂံၢ်တၢ်ဘါ တသ့ဘၣ် ယလိၣ်ဘၣ် ကစၢ်ယွၤသးစီဆှံ အတၢ်မၤစၢၤလီၤ. ဖဲယနၢ်ပၢၢ်ထီၣ် တၢ်ဂ့ၢ်အံၤအခါ ယနာ်သပှၢ်ကတၢၢ်လၢ ကစၢ်ယွၤ မ့ၢ်မၤစၢၤယၤန့ၣ် ယမၤလီၤမၢ်ကွံာ် လုၢ်လၢ်သကဲာ်ပဝးလၢ အတဂ့ၤဘၣ်တဖၣ်န့ၢ်ဝဲ.

ခီဖျိလၢ ဝီဒိၤတူၢ်လိာ်ဝဲ ကစၢ်ယွၤ အတၢ်မၤစၢၤအဃိ အတသးဟ့ပှၤဂၤလၢၤဘၣ်. ဝီဒိၤတဲဝဲလၢ “ဖဲယဆီတလဲကွံာ် ယတၢ်အိၣ်မူအခါ ယဘူးယတံၢ်ဒီး ယသကိးလၢညါတဖၣ်န့ၣ် ကမၢကမၣ်ဝဲဒိၣ်မး.” တကးဒံးဘၣ် အတဲဝဲစ့ၢ်ကီးဝဲလၢ “လၢညါန့ၣ် ယမ့ၢ်ပှၤလၢ အမၤဆူၣ်မၤစိးတၢ် ဘၣ်ဆၣ် ယဟိဝၤယွၤန့ၣ် ဆီတလဲကွံာ်ယၤဒီး ခဲအံၤန့ၣ် ယကဲထီၣ်ဝဲ ပှၤတဂၤလၢ အမၤဃူမၤဖိးတၢ်.”