တၢ်မၤလိ ၁၁
နဒိးဘျၢထံမ့ၢ်ဝံၤလံ သနာ်က့ ဆဲးကူထီၣ်သိးထီၣ် “လုၢ်လၢ်သကဲာ်ပဝးအသီ”
“ကူထီၣ်သိးထီၣ် လုၢ်လၢ်သကဲာ်ပဝးအသီ.”—ကလီးစဲ ၃:၁၀.
တၢ်သးဝံၣ် ၄၉ မၤသးခု ယဟိဝၤယွၤအသး
တၢ်မၤလိအံၤ အတၢ်တိာ်ပာ်a
၁. တၢ်လၢအမၤဟးဂီၤ မ့တမ့ၢ် အမၤဂ့ၤထီၣ် ပလုၢ်လၢ်သကဲာ်ပဝးသ့န့ၣ် မ့ၢ်မနုၤလဲၣ်.
ပဒိးဘျၢထံ မ့ၢ်အိၣ်ထဲစှၤကိာ်သီမ့ၢ်ဂ့ၤ အနံၣ်အါမးလံမ့ၢ်ဂ့ၤ ပဝဲခဲလၢာ်န့ၣ် ပအဲၣ်ဒိးအိၣ်ဒီး လုၢ်လၢ်သကဲာ်ပဝးလၢ ယဟိဝၤယွၤ ဘၣ်သူၣ်ဘၣ်သးဝဲ. ဒ်သိးပကကဲထီၣ် ပှၤဒ်န့ၣ်အဂီၢ် ပကဘၣ်ပၢၤဃာ် ပတၢ်ဆိကမိၣ်. တၢ်လၢပဆိကမိၣ်အီၤတဖၣ်န့ၣ် အမၤဟးဂီၤ မ့တမ့ၢ် မၤဂ့ၤထီၣ် ပလုၢ်လၢ်သကဲာ်ပဝးသ့. အဒိ, ပမ့ၢ်ဆိကမိၣ် တၢ်သူၣ်လီသးကွံလၢ အတဂ့ၤဘၣ်တဖၣ် တလီၢ်လီၢ်န့ၣ် ပကတဲတၢ်ဒီးမၤတၢ်လၢ အတဂ့ၤဘၣ်တဖၣ်. (အ့းဖ့းစူး ၄:၁၇-၁၉) ဘၣ်ဆၣ် ပမ့ၢ်ဆိကမိၣ်တၢ်လၢအဂ့ၤန့ၣ် ပကအဲၣ်ဒိး တဲတၢ်ဒီးမၤတၢ်လၢ အဘၣ်ပပၢ် ယဟိဝၤယွၤအသးလီၤ.—ကလၤတံ ၅:၁၆.
၂. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ်.
၂ တၢ်မၤလိလၢ အပူၤကွံာ်တခါ ပာ်ဖျါထီၣ်ဝဲလၢ ဒ်သိးပတၢ်ဆိကမိၣ်လၢ အတဂ့ၤတဖၣ် သုတဟဲနုာ်လီၤ လၢပသးပူၤတဂ့ၤအဂီၢ် ပတြီဆၢအီၤ တသ့ထီဘိဘၣ်. ဘၣ်ဆၣ် ပဆၢတဲာ်လီၤပသး လၢပတမၤဒ် တၢ်လၢပဆိကမိၣ်အီၤတဖၣ်အသိးသ့. တချုးလၢ ပဒိးဘျၢထံဒံးဘၣ်န့ၣ် ဒ်သိးပကဘ့ၣ်လီၤကွံာ် လုၢ်လၢ်သကဲာ်ပဝးလၢအတဂ့ၤအဂီၢ် တၢ်အရ့ဒိၣ်လၢ ပကဘၣ်မၤအီၤန့ၣ်မ့ၢ်ဝဲ ပတဘၣ်တဲ ဒီးမၤတၢ်လၢ အတဘၣ် ယဟိဝၤယွၤအသးလၢၤဘၣ်. တကးဒံးဘၣ် ဒ်သိး ပကမၤတၢ်ဘၣ် ယဟိဝၤယွၤအသးအဂီၢ် ပကဘၣ်မၤထွဲ တၢ်မၤလိာ်လၢအမ့ၢ် “ကူထီၣ်သိးထီၣ် လုၢ်လၢ်သကဲာ်ပဝးအသီ” တက့ၢ်. (ကလီးစဲ ၃:၁၀) လၢတၢ်မၤလိအံၤအပူၤ ပကတဲသကိး ဘၣ်ဃးဒီး “လုၢ်လၢ်သကဲာ်ပဝးအသီ” န့ၣ်မ့ၢ်မနုၤလဲၣ်. ဒီးပကဘၣ် ကူထီၣ်သိးထီၣ်အီၤဒ်လဲၣ် ဒီးပသိးထီၣ်ဃာ်အီၤထီဘိ ကသ့ဒ်လဲၣ်.
“လုၢ်လၢ်သကဲာ်ပဝးအသီ” န့ၣ်မ့ၢ်မနုၤလဲၣ်
၃. ဒ် ကလၤတံ ၅:၂၂, ၂၃ ပာ်ဖျါထီၣ်ဝဲအသိး “လုၢ်လၢ်သကဲာ်ပဝးအသီ” န့ၣ်မ့ၢ်မနုၤလဲၣ် ဒီးပကူထီၣ်သိးထီၣ်အီၤ ကသ့ဒ်လဲၣ်.
၃ ပှၤလၢအအိၣ်ဒီး “လုၢ်လၢ်သကဲာ်ပဝးအသီ” န့ၣ် ကွၢ်လိမၤဒိးဝဲ ယဟိဝၤယွၤ. ဒီးအဝဲကပျဲဝဲလၢ သးစီဆှံ ဟံးစုနဲၣ်ကျဲအီၤအဃိ အဝဲပာ်ဖျါထီၣ် နီၢ်သးအတၢ်ဂ့ၤတၢ်ဝါလၢ ကလၤတံ ၅:၂၂, ၂၃ အပူၤကသ့. (ဖး.) အဒိ, အကအဲၣ် ယဟိဝၤယွၤ ဒီးအခ့အပှၤတဖၣ်. (မးသဲ ၂၂:၃၆-၃၉) ဖဲအထံၣ်ဘၣ် တၢ်မၤကွၢ်တဖၣ်အခါ အကဆဲးအိၣ်ဒီး တၢ်သးခု. (ယၤကိာ် ၁:၂-၄) အကမ့ၢ် ပှၤတဂၤလၢ အမၤဃူမၤဖိးတၢ်, (မးသဲ ၅:၉) ဖဲအရ့ဒီးပှၤဂၤတဖၣ်အခါ အဝံသးစူၤတၢ် ဒီးအသးဂ့ၤ. (ကလီးစဲ ၃:၁၃) ဒီးအကအဲၣ်တၢ်ဂ့ၤ ဒီးမၤတၢ်ဂ့ၤ. (လူၤကၣ် ၆:၃၅) ဒီးတၢ်လၢအမၤဝဲတဖၣ်န့ၣ် ပာ်ဖျါထီၣ်ဝဲလၢ အနာ်န့ၢ် အပၢ်အိၣ်လၢမူခိၣ် သပှၢ်ကတၢၢ်. (ယၤကိာ် ၂:၁၈) ဖဲပှၤမၤအ့န့ထီၣ်အသးအခါ ကအိၣ်ဒီးတၢ်သးစူၤ ဒီးဖဲအဘၣ်တၢ်လ့ပစီအခါ ကအိၣ်ဒီး တၢ်ပၢၤသူၣ်ပၢၤသးလီၤ.—၁ ကရံၣ်သူး ၉:၂၅, ၂၇; တံတူး ၃:၂.
၄. ဘၣ်မနုၤအဃိ ပကဘၣ်ပာ်ဖျါထီၣ် တၢ်ဂ့ၤတၢ်ဝါခဲလၢာ်လၢ ကလၤတံ ၅:၂၂, ၂၃ အပူၤလဲၣ်. ဟ့ၣ်တၢ်အဒိတက့ၢ်.
၄ ဒ်သိး ပကကူထီၣ်သိးထီၣ် လုၢ်လၢ်သကဲာ်ပဝးအသီအဂီၢ် ပကဘၣ်အိၣ်ဒီး တၢ်ဂ့ၤတၢ်ဝါခဲလၢာ်လၢ ကလၤတံ ၅:၂၂, ၂၃ ဒီးလၢလံာ်စီဆှံအဆၢအဂၤတဖၣ် ပာ်ဖျါထီၣ်ဝဲအသိး.b ဘၣ်ဆၣ် တၢ်ဂ့ၤတၢ်ဝါတဖၣ်အံၤန့ၣ် တမ့ၢ်ဒ်သိး တၢ်ကူတၢ်သိးလၢ ပကဘၣ်ကူထီၣ်သိးထီၣ်အီၤ တဘျီတဘ့ၣ် တဘျီတဘ့ၣ်ဘၣ်. နီၢ်ကီၢ်န့ၣ် တၢ်ဂ့ၤတၢ်ဝါတဖၣ်အံၤ ဘၣ်ထွဲလိာ်သး တခါဒီးတခါ. အဒိ, နမ့ၢ်အဲၣ်ပှၤလၢနဃၢၤ အနီၢ်ကီၢ်န့ၣ် နကဝံသးစူၤအီၤ ဒီးနကသးဂ့ၤလၢအဖီခိၣ်. ဒ်သိးနကမ့ၢ်ပှၤလၢ အမၤဂ့ၤတၢ်နီၢ်ကီၢ်န့ၣ် နကဘၣ်မ့ၢ်ပှၤလၢ အအိၣ်ဒီး တၢ်သူၣ်စူၤသးစူၤ ဒီးတၢ်ပၢၤသူၣ်ပၢၤသးလီၤ.
ပသိးထီၣ် လုၢ်လၢ်သကဲာ်ပဝးအသီ ကသ့ဒ်လဲၣ်
ပမ့ၢ်ဂုာ်ကျဲးစၢး ဆိကမိၣ်တၢ် ဒ်ယ့ၣ်ၡူးအသိးန့ၣ် ပတၢ်သကဲာ်ပဝး ကလီၤဂာ်ဒိၣ်ထီၣ် ဒ်သိးဒီးအီၤ (ကွၢ်လံာ်အဆၢ ၅, ၈, ၁၀, ၁၂, ၁၄)
၅. “ပအိၣ်ဒီး ခရံာ်အသး” န့ၣ် အခီပညီဒ်လဲၣ်. ဒီးဘၣ်မနုၤအဃိ ပကဘၣ် မၤလိယ့ၣ်ၡူးအဂ့ၢ်လဲၣ်. (၁ ကရံၣ်သူး ၂:၁၆)
၅ ဖး ၁ ကရံၣ်သူး ၂:၁၆. ဒ်သိးပကသိးထီၣ် လုၢ်လၢ်သကဲာ်ပဝးလၢအသီအဂီၢ် ပကဘၣ် “အိၣ်ဒီး ခရံာ်အသး” လီၤ. ပမ့ၢ်တဲလၢကျဲအဂၤန့ၣ် ပကဘၣ်ဆိကမိၣ်တၢ်ဒ် ယ့ၣ်ၡူးအသိး ဒီးကွၢ်လိမၤဒိးအီၤ. ယ့ၣ်ၡူးပာ်ဖျါထီၣ် နီၢ်သးအတၢ်ဂ့ၤတၢ်ဝါတဖၣ် လၢလၢပှဲၤပှဲၤ. ဖဲပကွၢ်လီၤပဂီၤလၢ မဲာ်ထံကလၤပူၤအခါ ပထံၣ်လီၤပဂီၤၡဲၡဲအသိး ယ့ၣ်ၡူးကွၢ်လိ ယဟိဝၤယွၤအတၢ်ဂ့ၤတၢ်ဝါတဖၣ် ပၢၢ်တုၤလၢ အဖျါလီၤဂာ်လိာ်အသး လီၤတံၢ်လီၤဆဲး ဒ်ပှၤထံၣ်လီၤပှၤဂီၤလၢ မဲာ်ထံကလၤအပူၤအသိးလီၤ. (ဧ့ၤဘြံၤ ၁:၃) ပမ့ၢ်ဂုာ်ကျဲးစၢး ဆိကမိၣ်တၢ်ဒ် ယ့ၣ်ၡူးအသိးန့ၣ် ပကမၤတၢ်ဒ် ယ့ၣ်ၡူးအသိး ဒီးပမ့ၢ်ဆဲး ဆိကမိၣ်ဒီးမၤဒ်န့ၣ်န့ၣ် ပကဆဲးအိၣ်အါထီၣ်ဒီး ယ့ၣ်ၡူးအတၢ်ဂ့ၤတၢ်ဝါတဖၣ်.—ဖံလံးပံၤ ၂:၅.
၆. ဖဲပဂုာ်ကျဲးစၢး သိးထီၣ်လုၢ်လၢ်သကဲာ်ပဝးအသီအခါ ပကဘၣ်သ့ၣ်နီၣ်ထီၣ် တၢ်မနုၤတဖၣ်လဲၣ်.
၆ မ့ၢ်ပမၤထွဲယ့ၣ်ၡူးအဒိအတဲာ် လီၤတံၢ်လီၤဆဲး ကန့ၢ်ဧါ. ဘၣ်သ့ၣ်သ့ၣ် ပကဆိကမိၣ်ဘၣ်လၢ ‘ယ့ၣ်ၡူးန့ၣ် မ့ၢ်ပှၤလၢပှၤပှဲၤအဃိ တမ့ၢ်လၢ ယကွၢ်လိမၤဒိးအီၤ လၢလၢပှဲၤပှဲၤကန့ၢ်ဘၣ်.’ နမ့ၢ်တူၢ်ဘၣ်ဒ်န့ၣ်န့ၣ် သ့ၣ်နီၣ်ထီၣ်တၢ်ဂ့ၢ်သၢထံၣ်. တၢ, ယဟိဝၤယွၤ တ့လီၤပှၤဒ်သိး ပကွၢ်လိမၤဒိး အီၤဒီးယ့ၣ်ၡူးကသ့အဂီၢ်. အဃိ ပဃုထၢလၢ ပကကွၢ်လိအဝဲသ့ၣ်သ့ ဒီးပကွၢ်လိမၤဒိး အဝဲသ့ၣ် ဖဲအကြၢးအဘၣ်ဒီးပှၤသ့. (၁ မိၤၡ့ ၁:၂၆) ခံ, ကစၢ်ယွၤ အသးစီဆှံန့ၣ် မ့ၢ်တၢ်လၢ အသဟီၣ်ဆူၣ်ကတၢၢ်. အဃိ သးစီဆှံမၤစၢၤပှၤ ဒ်သိးပကမၤတၢ်လၢ ပဆိကမိၣ်လၢ ပမၤအီၤတန့ၢ်ဘၣ်တဖၣ်သ့. သၢ, ယဟိဝၤယွၤ သ့ၣ်ညါဝဲလၢ ခဲအံၤန့ၣ် ပပာ်ဖျါထီၣ် နီၢ်သးအတၢ်ဂ့ၤတၢ်ဝါ လၢလၢပှဲၤပှဲၤတန့ၢ်ဘၣ်. အဃိ ပှၤလၢအအိၣ်ဒီး တၢ်မုၢ်လၢ်လၢ ကအိၣ်မူဘၣ်လၢ ဟီၣ်ခိၣ်လီၤထူလီၤယိာ်န့ၣ် ကစၢ်ယွၤ ကဟ့ၣ်အဝဲသ့ၣ် တၢ်ဆၢကတီၢ် အနံၣ် ၁,၀၀၀ လၢကကဲထီၣ်ဘၣ် ပှၤလၢပှၤပှဲၤအဂီၢ်. (လီၣ်ဖျါ ၂၀:၁-၃) မ့မ့ၢ်ခဲအံၤန့ၣ် ယဟိဝၤယွၤ အဲၣ်ဒိးလၢ ပကဂုာ်ကျဲးစၢးလၢအဂ့ၤကတၢၢ် ဒီးသန့ၤသးလၢအီၤ ဒ်သိး ပပာ်ဖျါထီၣ် နီၢ်သးအတၢ်ဂ့ၤတၢ်ဝါတဖၣ်အံၤ ကန့ၢ်အဂီၢ်.
၇. ခဲအံၤ ပကတဲသကိး တၢ်ဂ့ၢ်မနုၤလဲၣ်.
၇ ပပာ်ဖျါထီၣ်လၢ ပကွၢ်လိမၤဒိးယ့ၣ်ၡူး ကသ့ဒ်လဲၣ်. ပကတဲသကိး တၢ်ဂ့ၤတၢ်ဝါ လွံၢ်ခါလၢ အဟဲကဲထီၣ်ခီဖျိ ကစၢ်ယွၤအသးစီဆှံ. ဒီးဖဲပမၤလိအခါ ပကထံၣ်ဘၣ်လၢ ယ့ၣ်ၡူးပာ်ဖျါထီၣ် တၢ်ဂ့ၤတၢ်ဝါတဖၣ်အံၤ တခါဘၣ်တခါဒ်လဲၣ် ဒီးပကွၢ်လိအီၤ ကသ့ဒ်လဲၣ်. တကးဒံးဘၣ် ပကတဲသကိး တၢ်သံကွၢ်တနီၤလၢ ကမၤစၢၤပှၤဒ်သိး ပကသ့ၣ်ညါလီၤပသးလၢ ပကဘၣ်မၤဂ့ၤထီၣ် ပလုၢ်လၢ်သကဲာ်ပဝးအသီဒ်လဲၣ်.
၈. ယ့ၣ်ၡူးပာ်ဖျါထီၣ် တၢ်အဲၣ်တၢ်ကွံဒ်လဲၣ်.
၈ ယ့ၣ်ၡူးအဲၣ်ယဟိဝၤယွၤဒိၣ်မးအဃိ အသးအိၣ် တူၢ်ဆါသး လၢအပၢ်အဂီၢ် ဒီးပဂီၢ်. (ယိၤဟၣ် ၁၄:၃၁; ၁၅:၁၃) ဖဲယ့ၣ်ၡူး အိၣ်လၢဟီၣ်ခိၣ်ချၢအခါ အပာ်ဖျါထီၣ်ဝဲလၢ အအဲၣ်ပှၤဂၤ ဒိၣ်မး. တနံၤဘၣ်တနံၤန့ၣ် အဝဲထံၣ်ဘၣ် တၢ်ထီဒုၣ်ထီဒါသနာ်က့ အဝဲပာ်ဖျါထီၣ် တၢ်အဲၣ်တၢ်ကွံ ဒီးတၢ်သးကညီၤ. ဒီးကျဲအဂ့ၤကတၢၢ်တဘိလၢ ယ့ၣ်ၡူးပာ်ဖျါထီၣ်လၢ အအဲၣ်ပှၤဂၤန့ၣ် မ့ၢ်ဝဲ အစံၣ်တဲၤတဲလီၤပှၤဂၤလၢ ယွၤအဘီအမုၢ်. (လူၤကၣ် ၄:၄၃, ၄၄) ယ့ၣ်ၡူးအဲၣ်ကစၢ်ယွၤ ဒီးပှၤဟီၣ်ခိၣ်ဖိန့ၣ် အပာ်ဖျါထီၣ်ဝဲခီဖျိ အဟဲတူၢ်တၢ်နးတၢ်ဖှီၣ် ဒီးတၢ်သံလၢ ပှၤတၢ်ဒဲးဘးဖိတဖၣ် အစုပူၤလီၤ. မ့ၢ်လၢ ယ့ၣ်ၡူးမၤဝဲဒ်အံၤအဃိ ကျဲအိးထီၣ်အသးလၢ ပကဒိးန့ၢ်ဘၣ် တၢ်မူအထူအယိာ်လီၤ.
၉. ပပာ်ဖျါထီၣ်တၢ်အဲၣ် ဒ်ယ့ၣ်ၡူးပာ်ဖျါထီၣ်ဝဲအသိး ကသ့ဒ်လဲၣ်.
၉ ပဟ့ၣ်လုၢ်ထီၣ်ပသးလၢ ယဟိဝၤယွၤအအိၣ်ဒီး ဒိးဘျၢထံန့ၣ် မ့ၢ်လၢပအဲၣ် ပပၢ်အိၣ်လၢမူခိၣ်အဃိ. ဒ်ယ့ၣ်ၡူးအသိး ပပာ်ဖျါထီၣ် လၢပအဲၣ်ယဟိဝၤယွၤသ့ခီဖျိ ပရ့ဒီးပှၤဂၤတဖၣ်ဂ့ၤဂ့ၤ. တၢ်မၢဖိပီလူး ကွဲးဝဲလၢ “ပှၤလၢအတအဲၣ် အဒီပုၢ်ဝဲၢ်လၢ အထံၣ်ဝဲန့ၣ် အအဲၣ်ကစၢ်ယွၤလၢ အထံၣ်ဝဲတသ့ဘၣ်တဂၤန့ၣ် ကသ့ဒ်လဲၣ်.” (၁ ယိၤဟၣ် ၄:၂၀) ပကဘၣ် သံကွၢ်လီၤပသးလၢ ‘မ့ၢ်ယအဲၣ်ပှၤဂၤ ဒိၣ်ထဲလဲၣ်, ပှၤမ့ၢ်တရ့ဒီးယၤ ဂ့ၤဂ့ၤသနာ်က့ မ့ၢ်ယရ့ဒီးအဝဲသ့ၣ်ဂ့ၤဂ့ၤဧါ, မ့ၢ်တၢ်အဲၣ် ထိၣ်ဟူးထိၣ်ဂဲၤထီၣ်ယၤလၢ ယကဟ့ၣ်လီၤ တၢ်ဆၢကတီၢ် ဒီးတၢ်အိၣ်ဒီးယၤ ဒ်သိးယကမၤစၢၤဘၣ် ပှၤဂၤလၢ ကမၤလိဘၣ် ယဟိဝၤယွၤအဂ့ၢ် အဂီၢ်ဧါ, ယမၤဒ်အံၤန့ၣ် ပှၤအါဂၤ မ့ၢ်ထီဒုၣ်ထီဒါယၤ ဒီးမ့ၢ်တပာ်လုၢ်ပာ်ပှ့ၤဝဲနာ်က့ မ့ၢ်ယဆဲးမၤအီၤဒံးဧါ, မ့ၢ်ယပၣ်ဃုာ်အါထီၣ်လၢ တၢ်ဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်တၢ်မၤ ကသ့ဧါ.’—အ့းဖ့းစူး ၅:၁၅, ၁၆.
၁၀. ယ့ၣ်ၡူးမ့ၢ်ပှၤလၢ အမၤဃူမၤဖိးတၢ်ဒ်လဲၣ်.
၁၀ ယ့ၣ်ၡူးမ့ၢ်ပှၤလၢ အမၤဃူမၤဖိးတၢ်လီၤ. ဖဲပှၤရ့အီၤအၢအၢသီသီအခါ အဝဲတမၤဆၢက့ၤ တၢ်အၢလၢတၢ်အၢဘၣ်. လၢတၢ်န့ၣ်အလီၢ် အဝဲမၤဃူမၤဖိးဆိတၢ် ဒီးဟ့ၣ်ဂံၢ်ဟ့ၣ်ဘါ ပှၤဂၤဒ်သိး တတဲအါလိာ်သးတၢ် တဂ့ၤအဂီၢ်. အဒိ, အဝဲသိၣ်လိဝဲလၢ ပှၤလၢအအဲၣ်ဒိး လၢယဟိဝၤယွၤ ကတူၢ်လိာ် အတၢ်ဘူၣ်ထီၣ်ဘါထီၣ်န့ၣ် ကဘၣ်မၤဃူမၤဖိးလိာ်သးဒီး ဒီပုၢ်ဝဲၢ်တဖၣ်လီၤ. (မးသဲ ၅:၉, ၂၃, ၂၄) ဒီးအဝဲ မၤစၢၤအတၢ်မၢဖိတဖၣ် တဘျီဝံၤတဘျီ ဒ်သိးအသုတတဲအါလိာ်သး ဘၣ်ဃးဒီး မတဂၤမ့ၢ် ပှၤအဒိၣ်ကတၢၢ် လၢအဝဲသ့ၣ်အကျါလဲၣ် တဂ့ၤအဂီၢ်လီၤ.—လူၤကၣ် ၉:၄၆-၄၈; ၂၂:၂၄-၂၇.
၁၁. ပကဲထီၣ် ပှၤလၢအမၤဃူမၤဖိးတၢ် ကသ့ဒ်လဲၣ်.
၁၁ ဒ်သိး ပကကဲထီၣ် ပှၤလၢအမၤဃူမၤဖိးတၢ်အဂီၢ် တမ့ၢ်ထဲ ပကဘၣ်ဟးဆှဲး တၢ်အ့ၣ်လိာ်ဆိးက့လိာ်သးဘၣ်. ပကဘၣ် မၤဃူမၤဖိးဆိတၢ်ဒီးပှၤဂၤ ဒီးဟ့ၣ်ဂံၢ်ဟ့ၣ်ဘါ ပဒီပုၢ်ဝဲၢ်မုၣ်ခွါတဖၣ် ဒ်သိး အသုတတဲအါလိာ်သး တဂ့ၤအဂီၢ်လီၤ. (ဖံလံးပံၤ ၄:၂, ၃; ယၤကိာ် ၃:၁၇, ၁၈) ပကဘၣ်သံကွၢ်လီၤပသးလၢ ‘မ့ၢ်ယတူၢ်ဆါယသး ဒ်သိး ယကမၤဃူမၤဖိးတၢ်ဒီးပှၤဂၤ အဂီၢ်ဧါ, ဖဲဒီပုၢ်ဝဲၢ်မုၣ်ခွါတဂၤဂၤ မၤဘၣ်ဒိယသးအခါ မ့ၢ်ယဟံးဃာ် အတၢ်ကမၣ်ဧါ. ယမ့ၢ်တူၢ်ဘၣ်လၢ ပှၤဂၤမၤကမၣ်ဘၣ်ယၤဒၣ်လဲာ် မ့ၢ်ယလဲၤမၤဃူမၤဖိး ဆိတၢ်ဒီးအီၤဧါ မ့တမ့ၢ် မ့ၢ်ယအိၣ်ခိးလၢ ပှၤကဟဲမၤဃူမၤဖိးဆိတၢ်ဒီးယၤဧါ. ဖဲပှၤတဲအါလိာ်သးတၢ်အခါ အလီၢ်မ့ၢ်အိၣ်န့ၣ် မ့ၢ်ယဟ့ၣ်ဂံၢ်ဟ့ၣ်ဘါအဝဲသ့ၣ်လၢ ကမၤဃူမၤဖိးလိာ်အသးဧါ.’
၁၂. ယ့ၣ်ၡူး ပာ်ဖျါထီၣ် တၢ်သူၣ်ဂ့ၤသးဝါဒ်လဲၣ်.
၁၂ ယ့ၣ်ၡူးမ့ၢ်ပှၤလၢ အအိၣ်ဒီးတၢ်သူၣ်ဂ့ၤသးဝါ. (မးသဲ ၁၁:၂၈-၃၀) ဖဲယ့ၣ်ၡူးထံၣ်ဘၣ်ဒီး တၢ်အိၣ်သး အကီခဲအခါ စ့ၢ်ကီး အပာ်ဖျါထီၣ် တၢ်သူၣ်ဂ့ၤသးဝါ ခီဖျိ အအိၣ်ဒီး တၢ်သူၣ်ကပုာ်လုးသးကဖီလီ ဒီးတၢ်နၢ်ပၢၢ်စၢၤပှၤဂၤ. အဒိ, ဖဲပှၤဖံၤနံက့ၤမုၣ်တဂၤ ဃ့ကညးအီၤလၢ ကမၤဘျါန့ၢ်အဖိမုၣ်အခါ ယ့ၣ်ၡူးတမၤဘျါန့ၢ်အီၤ တဘျီဃီဘၣ်, ဘၣ်ဆၣ် ဖဲအဝဲပာ်ဖျါထီၣ် တၢ်နာ်သပှၢ်တၢၢ်အခါ ယ့ၣ်ၡူးမၤဘျါန့ၢ်က့ၤ အဖိမုၣ် လၢတၢ်အဲၣ်တၢ်ကွံပူၤလီၤ. (မးသဲ ၁၅:၂၂-၂၈) ယ့ၣ်ၡူးမ့ၢ် ပှၤလၢအသူၣ်ဂ့ၤသးဝါ သနာ်က့ အမ့ၢ်ဘၣ်ဟ့ၣ်ကူၣ်ပှၤဂၤန့ၣ် ဟ့ၣ်ကူၣ်ဝဲ. တဘျီတခီၣ် ယ့ၣ်ၡူးပာ်ဖျါထီၣ် အတၢ်သူၣ်ဂ့ၤသးဝါ ခီဖျိ အဘှီဘၣ်ထီၣ်က့ၤ ပှၤလၢအအဲၣ်ဝဲတဖၣ်. အဒိ, ဖဲစီၤပ့းတရူး ဂုာ်ကျဲးစၢး မၤဒ်သိးယ့ၣ်ၡူးတမၤယဟိဝၤယွၤ အတၢ်ဘၣ်သးလၢၤတဂ့ၤအခါ ယ့ၣ်ၡူးသိၣ်က့ၤအီၤလၢ အပျဲၢ်အဘီၣ်တဖၣ် အမဲာ်ညါ တဘျီဃီ. (မၢ်ကူး ၈:၃၂, ၃၃) အမၤဝဲ ဒ်အံၤန့ၣ် တမ့ၢ်ဒ်သိး အကမၤမဲာ်ဆှး စီၤပ့းတရူးအဂီၢ်ဘၣ် မ့ၢ်ဒ်သိး အကသိၣ်လိ စီၤပ့းတရူးအဂီၢ်. ဒီးကဟ့ၣ်ပလီၢ် တၢ်မၢဖိအဂၤတဖၣ် ဒ်သိး အဝဲသ့ၣ် တပာ်ထီၣ်ထီအသးတဂ့ၤ အဂီၢ်. စီၤပ့းတရူးန့ၣ် ကမဲာ်ဆှး ဘၣ်ဆၣ် တၢ်သိၣ်လိတခါအံၤန့ၣ် ကဲဘျုးလၢအဂီၢ်လီၤ.
၁၃. ဖဲယဟ့ၣ်ကူၣ်ပှၤဂၤအခါ ယတၢ်ပာ်သူၣ်ပာ်သး အိၣ်ဒ်လဲၣ်.
၁၃ တဘျီတခီၣ် ဒ်သိး ပကပာ်ဖျါထီၣ် တၢ်သူၣ်ဂ့ၤသးဝါနီၢ်နီၢ်လၢ ပှၤလၢပအဲၣ်ဘၣ်အီၤတဖၣ် အဖီခိၣ်န့ၣ် ပကဘၣ်တဲတၢ်ဒီးအဝဲသ့ၣ်ပျီပျီ. ဖဲနမၤဒ်န့ၣ်အခါ နကွၢ်လိယ့ၣ်ၡူးခီဖျိ နတၢ်ဟ့ၣ်ကူၣ်န့ၣ် ကဘၣ်သန့ၤထီၣ်အသးလၢ လံာ်စီဆှံ အတၢ်ဟံးစုနဲၣ်ကျဲ. နကဘၣ်အိၣ်ဒီး တၢ်သးကပုာ် ဒီးတဘၣ်တဲတၢ်ဒီး အဝဲသ့ၣ် ဆူၣ်ဆူၣ်ကိၤကိၤဘၣ်. နမ့ၢ်မၤဒ်န့ၣ်န့ၣ် နနာ်သ့လၢ ပှၤလၢအအဲၣ်ယဟိဝၤယွၤ ဒီးအဲၣ်နၤန့ၣ် ကဒိကနၣ်ဝဲ နတၢ်ဟ့ၣ်ကူၣ်လီၤ. သံကွၢ်လီၤနသးလၢ ‘ဖဲယထံၣ် ပှၤတဂၤ မၤတၢ်ကမၣ်အခါ မ့ၢ်ယတဲဘၣ်အီၤဘူၣ်ဧါ, ယမ့ၢ်ဘၣ်ဟ့ၣ်ကူၣ်ပှၤဂၤန့ၣ် မ့ၢ်ယတဲတၢ်ဒီးအီၤမုာ်မုာ် မ့တမ့ၢ် ယတဲတၢ်ဒီးအီၤ ဆူၣ်ဆူၣ်ကိၤကိၤဧါ, ဖဲယဟ့ၣ်ကူၣ်ပှၤဂၤအခါ ယတၢ်ပာ်သူၣ်ပာ်သးအိၣ်ဒ်လဲၣ်. ယဟ့ၣ်ကူၣ်အီၤန့ၣ် မ့ၢ်လၢယသးထီၣ်အီၤအဃိဧါ, မ့တမ့ၢ် လၢယအဲၣ်ဒိးမၤစၢၤအီၤအဃိဧါ.’
၁၄. ယ့ၣ်ၡူးပာ်ဖျါထီၣ် တၢ်မၤဂ့ၤတၢ်ဒ်လဲၣ်.
၁၄ ယ့ၣ်ၡူးသ့ၣ်ညါ တၢ်လၢအဂ့ၤ တကးဒံးဘၣ် အမၤတၢ်ဂ့ၤ မ့ၢ်လၢယ့ၣ်ၡူး အဲၣ်အပၢ်အဃိ ထီဘိန့ၣ် အမၤတၢ်လၢအဘၣ် ဒီးအမၤဝဲခီဖျိ အအိၣ်ဒီးတၢ်ဂ့ၢ်လၢအဂ့ၤအဃိလီၤ. ပှၤတဂၤ အိၣ်ဒီးတၢ်မၤဂ့ၤတၢ်န့ၣ် ပသ့ၣ်ညါသ့ခီဖျိ အရ့ဒီးပှၤဂၤဒ်လဲၣ်. ပှၤလၢအမၤဂ့ၤတၢ်န့ၣ် အဃုတၢ်ခွဲးတၢ်ယာ်လၢ ကမၤစၢၤပှၤဂၤအဂီၢ် ဒီးအမၤဂ့ၤတၢ်ထီဘိ. ထဲဒၣ်ပသ့ၣ်ညါ တၢ်လၢအဘၣ်န့ၣ် တလၢပှဲၤဒံးဘၣ်, ပကဘၣ်မၤ တၢ်လၢအဘၣ် ဒီးမၤအီၤလၢ တၢ်သူၣ်ဘျၢသးဘျၢအပူၤ. ဘၣ်သ့ၣ်သ့ၣ် ပှၤတနီၤ ကဆိကမိၣ်ဘၣ်ဝဲလၢ ‘ပှၤမၤဂ့ၤတၢ်လၢ တၢ်သးတဘျၢအပူၤသ့ဧါ.’ ပှၤလၢအမၤဒ်န့ၣ်န့ၣ် အိၣ်ဝဲ. အဒိ, ယ့ၣ်ၡူးတဲဝဲဘၣ်ဃးဒီး ပှၤလၢအဟ့ၣ်မၤစၢၤ ပှၤဖှီၣ်ဖိယာ်ဖိ ဒီးအမၤဝဲဒ်သိး ပှၤဂၤကသ့ၣ်ညါလၢ အဟ့ၣ်တၢ်. အဃိ အဝဲသ့ၣ်န့ၣ်ဖျါလၢ အမၤဂ့ၤတၢ်သနာ်က့ ယဟိဝၤယွၤ တဘၣ်သူၣ်ဘၣ်သး အဝဲသ့ၣ်ဘၣ်.—မးသဲ ၆:၁-၄.
၁၅. ပကဲထီၣ်ပှၤလၢ အမၤဂ့ၤတၢ်နီၢ်ကီၢ် ကသ့ဒ်လဲၣ်.
၁၅ ပမ့ၢ်မၤတၢ်လၢအဘၣ် လၢတၢ်သူၣ်ဘျၢသးဘျၢအပူၤမး ပကကဲထီၣ် ပှၤလၢအမၤဂ့ၤတၢ်နီၢ်ကီၢ်. အဃိ သံကွၢ်လီၤနသးလၢ ‘မ့ၢ်ယသ့ၣ်ညါ တၢ်လၢအဘၣ် ဒီးယမၤတၢ်လၢအဘၣ်ဧါ, ဒီးယမၤဂ့ၤတၢ်လၢ တၢ်သူၣ်ဘျၢသးဘျၢအပူၤဧါ.’
ပဆဲးအိၣ်ဒီး လုၢ်လၢ်သကဲာ်ပဝးအသီ ကသ့ဒ်လဲၣ်
၁၆. တနံၤဘၣ်တနံၤန့ၣ် ပကြၢးပာ်ဖျါထီၣ် တၢ်မနုၤလဲၣ် ဒီးဘၣ်မနုၤအဃိလဲၣ်.
၁၆ ပတဘၣ်ဆိကမိၣ်လၢ ဖဲပဒိးဘျၢထံအခါ ပသိးထီၣ်လုၢ်လၢ်သကဲာ်ပဝး လၢအသီဝံၤလံအဃိ ပတလိၣ် ဆဲးသိးထီၣ်အီၤလၢၤဘၣ်န့ၣ်ဘၣ်. လုၢ်လၢ်သကဲာ်ပဝး လၢအသီန့ၣ် လီၤဂာ်ဒ် “တၢ်ကူတၢ်ကၤလၢအသီ” လၢပကဘၣ် ကွၢ်ကတဲာ်ကတီၤအီၤ ဂ့ၤဂ့ၤ. ပမၤအီၤဒ်န့ၣ်သ့ ခီဖျိ တနံၤဘၣ်တနံၤန့ၣ် ပကဘၣ်ဃုကျဲလၢ ပကပာ်ဖျါထီၣ် နီၢ်သးအတၢ်ဂ့ၤတၢ်ဝါတဖၣ်လီၤ. ယဟိဝၤယွၤန့ၣ် အမ့ၢ်ပှၤလၢအမၤတၢ် ဒီးအသးစီဆှံစ့ၢ်ကီး မ့ၢ်တၢ်အသဟီၣ် လၢဟူးဂဲၤဝဲလီၤ. (၁ မိၤၡ့ ၁:၂) အဃိ နီၢ်သးအတၢ်ဂ့ၤတၢ်ဝါ ခဲလၢာ်န့ၣ် ပပာ်ဖျါထီၣ်အီၤသ့ ဒီးပကဘၣ် ပာ်ဖျါထီၣ်အီၤ. အဒိ, တၢ်မၢဖိပီလူး တဲဝဲလၢ “တၢ်နာ်လၢ အတအိၣ်ဒီးတၢ်မၤန့ၣ် သံဝဲစ့ၢ်ကီးလီၤ.” (ယၤကိာ် ၂:၂၆) နီၢ်သးအတၢ်ဂ့ၤတၢ်ဝါလၢ အဂၤတဖၣ်စ့ၢ်ကီး ဒ်န့ၣ်အသိးလီၤ. ဖဲပပာ်ဖျါထီၣ် နီၢ်သးအတၢ်ဂ့ၤတၢ်ဝါ တဘျီဂ့ၤတဘျီဂ့ၤအခါ မ့ၢ်ဒၣ်ပပာ်ဖျါထီၣ်လၢ ကစၢ်ယွၤအသးစီဆှံ အိၣ်ဒီးပှၤလီၤ.
၁၇. ဖဲပတပာ်ဖျါထီၣ်ဘၣ် နီၢ်သးအတၢ်ဂ့ၤတၢ်ဝါတဖၣ်အခါ ပကြၢးမၤဒ်လဲၣ်.
၁၇ ခရံာ်ဖိတနီၤ အဒိးဘျၢထံဝံၤဖးယံာ်လံ သနာ်က့ တဘျီတခီၣ် တပာ်ဖျါထီၣ်ဘၣ် နီၢ်သးအတၢ်ဂ့ၤတၢ်ဝါတဖၣ်ဘၣ်. တၢ်မ့ၢ်ကဲထီၣ်အသးဒီးပှၤ ဒ်န့ၣ်န့ၣ် အရ့ဒိၣ်လၢ ပတဘၣ်ဟ့ၣ်အၡူဘၣ်. ပကကွၢ်သကိး တၢ်အဒိတခါ. နမ့ၢ်မၤညာ်ဘၣ် နကူနသိးလၢ နကၤအီၤမုာ်တဘ့ၣ်န့ၣ် နကတၢၤကွံာ်အီၤ တဘျီဃီဧါ. တမ့ၢ်လၢနကတၢၤကွံာ်အီၤ တဘျီဃီဘၣ်, ဘၣ်သ့ၣ်သ့ၣ် နကဆးထီၣ်က့ၤအီၤ ဒီးနကပလီၢ်နသး ဒ်သိး နသုတမၤညာ်ဘၣ်အီၤလၢၤတဂ့ၤအဂီၢ်. ဒ်န့ၣ်အသိး တဘျီတခီၣ် နမ့ၢ်တရ့ဘၣ်ဒီး ပှၤဂၤလၢ တၢ်အဲၣ်တၢ်ကွံ, တၢ်ဝံသးစူၤ ဒီးတၢ်သူၣ်ဂ့ၤသးဝါအပူၤဘၣ်န့ၣ် တဘၣ်သးဟးဂီၤတဂ့ၤ. လၢတၢ်န့ၣ်အလီၢ် လဲၤဃ့ကညးအဝဲသ့ၣ်, တဲတၢ်ဒီးအဝဲသ့ၣ်မုာ်မုာ် ဒ်သိး နတၢ်ရ့လိာ်သးဒီးပှၤတဂၤန့ၣ် ကဂ့ၤထီၣ်က့ၤအဂီၢ်. ဒီးပာ်လီၤနသးလၢ ခါဆူညါန့ၣ် နကမၤဂ့ၤန့ၢ်ဒံးအလီၢ်.
၁၈. ပနာ်န့ၢ် တၢ်မနုၤသ့လဲၣ်.
၁၈ ယ့ၣ်ၡူးပာ်လီၤန့ၢ်ပှၤ တၢ်အဒိအတဲာ်အဃိ ပစံးဘျုးဘၣ်အီၤဒိၣ်မး. ပမ့ၢ်ကွၢ်လိမၤဒိး ယ့ၣ်ၡူးအတၢ်ဆိကမိၣ် ဒီးအတၢ်ပာ်သူၣ်ပာ်သးန့ၣ် ကညီထီၣ်လၢ ပကမၤဒ် အမၤဝဲအသိး. ပမ့ၢ်ဂုာ်ကျဲးစၢး မၤဒ်ယ့ၣ်ၡူးန့ၣ် ပကသိးထီၣ် လုၢ်လၢ်သကဲာ်ပဝးအသီအဂီၢ် ကညီဒိၣ်ထီၣ်ဝဲ. လၢတၢ်မၤလိအံၤအပူၤ ပတဲသကိးဘၣ်ထဲ နီၢ်သးအတၢ်ဂ့ၤတၢ်ဝါ လွံၢ်ခါဒံးလီၤ. အဃိ ဟံးန့ၢ်တၢ်ဆၢကတီၢ်လၢ နကမၤလိ နီၢ်သးအတၢ်ဂ့ၤတၢ်ဝါ လၢအဂၤတဖၣ် ဒီးဆိကမိၣ်ထံ ဘၣ်ဃးဒီး နကပာ်ဖျါထီၣ် နီၢ်သးအတၢ်ဂ့ၤတၢ်ဝါသ့ၣ်တဖၣ်န့ၣ်အဂီၢ်. ဒ်သိး နကမၤလိအါထီၣ် တၢ်ဂ့ၢ်တဖၣ်အံၤအဂီၢ် ကွၢ်လၢ လံာ်နဲၣ်ကျဲလၢ ယဟိဝၤပှၤအုၣ်အသးတဖၣ်ကဃုသ့ၣ်ညါတၢ်အဂီၢ် အပူၤ ဒီးလဲၤလၢ တၢ်ဂ့ၢ်မိၢ်ပှၢ်တဖၣ် ဝံၤဒီးလဲၤလၢ “ခရံာ်ဖိတၢ်အိၣ်မူ” ဝံၤဒီး “သးအတၤသၣ်” တက့ၢ်. ပမ့ၢ်ဂုာ်ကျဲးစၢးလၢ အဂ့ၤကတၢၢ်န့ၣ် ယဟိဝၤယွၤ ကမၤစၢၤပှၤဒ်သိး ပကကူထီၣ်သိးထီၣ် လုၢ်လၢ်သကဲာ်ပဝးလၢအသီ ဒီးပကဆဲးအိၣ်ဒီး လုၢ်လၢ်သကဲာ်ပဝးလၢအဂ့ၤ အဂီၢ်လီၤ.
တၢ်သးဝံၣ် ၁၂၇ ယကြၢးမ့ၢ်ပှၤဒ်လဲၣ်
a လၢညါ ပမ့မ့ၢ် ပှၤဒ်လဲၣ်ဂ့ၤဒ်လဲၣ်ဂ့ၤ ပကူထီၣ်သိးထီၣ် “လုၢ်လၢ်သကဲာ်ပဝးအသီ” သ့. ဒ်သိးပကမၤဒ်န့ၣ်အဂီၢ် ပကဘၣ် ဆဲးဂုာ်ကျဲးစၢး ဆီတလဲ ပတၢ်ဆိကမိၣ် ဒီးဂုာ်ကျဲးစၢး လီၤဂာ်ဒ်သိးဒီးယ့ၣ်ၡူး. လၢတၢ်မၤလိအံၤအပူၤ ပကတဲသကိး ဘၣ်ဃးဒီး ယ့ၣ်ၡူးအတၢ်ဆိကမိၣ် ဒီးအတၢ်မၤတဖၣ်အဂ့ၢ်. ဒီးပကသ့ၣ်ညါဘၣ်လၢ ပဒိးဘျၢထံမ့ၢ်ဝံၤလံ သနာ်က့ ပဆဲးကွၢ်လိမၤဒိးယ့ၣ်ၡူး ကသ့ဒ်လဲၣ်.
b ကစၢ်ယွၤ အသးစီဆှံ မၤစၢၤပှၤလၢ ပကပာ်ဖျါထီၣ် နီၢ်သးတၢ်ဂ့ၤတၢ်ဝါအါမး. ဘၣ်ဆၣ် ကလၤတံ ၅:၂၂, ၂၃ တပာ်ဖျါထီၣ်ဝဲ တၢ်ဂ့ၤတၢ်ဝါခဲလၢာ်ဘၣ်. ဘၣ်ဃးဒီး တၢ်ဂ့ၢ်အံၤန့ၣ် နဖးကွၢ်အီၤဖဲ “ပှၤဖးလံာ်ဖိတဖၣ် အတၢ်သံကွၢ်” လၢ လါယူၤ ၂၀၂၀ တၢးထီခိးတၢ် အပူၤသ့.