တၢ်မၤလိ ၁၄
တၢ်အိၣ်ဖှိၣ်သးပှၢ်သ့ၣ်ဧၢ ဆဲးကွၢ်လိမၤဒိး တၢ်မၢဖိပီလူး
“ကွၢ်လိယၤ.”—၁ ကရံၣ်သူး ၁၁:၁.
တၢ်သးဝံၣ် ၉၉ ဒီပုၢ်ဝဲၢ်ဂီၢ်မုၢ်ဂီၢ်ပၤ
တၢ်မၤလိအံၤ အတၢ်တိာ်ပာ်a
၁-၂. တၢ်မၢဖိပီလူး အဒိအတဲာ်န့ၣ် မၤစၢၤဝဲ တၢ်အိၣ်ဖှိၣ်သးပှၢ်တဖၣ်လၢ ပစိၤခဲအံၤဒ်လဲၣ်.
တၢ်မၢဖိပီလူး အဲၣ်ဒီပုၢ်ဝဲၢ်မုၣ်ခွါတဖၣ်ဒိၣ်မး ဒီးကွၢ်ထွဲ အဝဲသ့ၣ်ဂ့ၤမး. (မၤတၢ် ၂၀:၃၁) အဃိ ဒီပုၢ်ဝဲၢ်မုၣ်ခွါတဖၣ်န့ၣ် အဲၣ်ဘၣ်အီၤဒိၣ်မး. ဘၣ်တဘျီဖဲ အ့းဖ့းစူး တၢ်အိၣ်ဖှိၣ်သးပှၢ်တဖၣ် သ့ၣ်ညါဝဲလၢ အတထံၣ်ဘၣ် စီၤပီလူး နီတဘျီလၢၤဘၣ်အခါ အဝဲသ့ၣ် “ဟီၣ်ဝဲသပှၢ်တၢၢ်.” (မၤတၢ် ၂၀:၃၇) ဒ်န့ၣ်အသိး တၢ်အိၣ်ဖှိၣ်သးပှၢ်လၢ အမၤတၢ်ဆူၣ်ဆူၣ်တဖၣ်န့ၣ် အဲၣ်ဒီပုၢ်ဝဲၢ်မုၣ်ခွါတဖၣ်ဒိၣ်မး ဒီးဖဲဒီပုၢ်ဝဲၢ်မုၣ်ခွါတဖၣ် လိၣ်ဘၣ် တၢ်မၤစၢၤအခါ တသ့ဖဲအသ့ အဝဲသ့ၣ် မၤစၢၤဝဲလၢအဂ့ၤကတၢၢ်. (ဖံလံးပံၤ ၂:၁၆, ၁၇) ဘၣ်ဆၣ် တၢ်အိၣ်ဖှိၣ်သးပှၢ်တဖၣ်န့ၣ် အိၣ်ဒီး တၢ်ကီတၢ်ခဲတဖၣ်စ့ၢ်ကီး. ဒ်သိးအဝဲသ့ၣ် လဲၤခီဖျိ အတၢ်ကီတၢ်ခဲကန့ၢ်အဂီၢ် တၢ်မနုၤကမၤစၢၤအဝဲသ့ၣ်လဲၣ်.
၂ တၢ်အိၣ်ဖှိၣ်သးပှၢ်လၢ အဂုာ်ကျဲးစၢးမၤတၢ်ဆူၣ်ဆူၣ်န့ၣ် ကွၢ်လိမၤဒိး စီၤပီလူးသ့ဝဲ. (၁ ကရံၣ်သူး ၁၁:၁) စီၤပီလူး တအိၣ်ဒီး တၢ်သ့တၢ်ဘၣ်ဒ် မူခိၣ်ကလူးအသိးဘၣ်. အဝဲမ့ၢ် ပှၤတလၢတပှဲၤအဃိ တဘျီတခီၣ် တညီလၢ ကမၤတၢ်အဘၣ်ဘၣ်. (ရိမ့ၤ ၇:၁၈-၂၀) ဒီးစီၤပီလူးထံၣ်ဘၣ် တၢ်ကီတၢ်ခဲဖးဒိၣ်အါမး ဘၣ်ဆၣ် အတဟ့ၣ်အၡူဘၣ် ဒီးအဆဲးအိၣ်ဒီး တၢ်သးခု. တၢ်အိၣ်ဖှိၣ်သးပှၢ်တဖၣ် လဲၤခီဖျိဝဲ အတၢ်ကီတၢ်ခဲတဖၣ် ဒီးဆဲးအိၣ်ဒီး တၢ်သးခုကသ့ခီဖျိ ကွၢ်လိမၤဒိးဝဲစီၤပီလူး. အဝဲသ့ၣ် ကွၢ်လိမၤဒိးဝဲ ကသ့ဒ်လဲၣ်န့ၣ် ပကဆဲးမၤလိအီၤခဲအံၤ.
၃. လၢတၢ်မၤလိအံၤအပူၤ ပကတဲသကိး တၢ်ဂ့ၢ်မနုၤလဲၣ် ဒီးပကမၤလိဘၣ် တၢ်ဂ့ၢ်အဂၤမနုၤဒံးလဲၣ်.
၃ လၢတၢ်မၤလိအံၤအပူၤ ပကတဲသကိး တၢ်အိၣ်သးကီခဲ လွံၢ်ခါလၢ ညီနုၢ်တၢ်အိၣ်ဖှိၣ်သးပှၢ်တဖၣ် ထံၣ်ဘၣ်ဝဲ. (၁) မူဒါအိၣ်အါမးအဃိ တညီလၢ အတၢ်ဆၢကတီၢ် ကအိၣ်လၢ ကစံၣ်တဲၤတဲလီၤတၢ်အဂီၢ်, (၂) ကကဲပှၤကွၢ်သိလၢအဂ့ၤ, (၃) ကမၤနၢၤကွံာ် နီၢ်ကစၢ် အတၢ်ဂံၢ်စၢ်ဘါစၢ် ဒီး (၄) ထံၣ်ဘၣ်ဒီး ပှၤဂၤအတၢ်တလၢတပှဲၤတဖၣ်. ဒီးပကတဲသကိး တၢ်မၢဖိပီလူး လဲၤခီဖျိဝဲ တၢ်ကီတၢ်ခဲတဖၣ်အံၤ တခါဘၣ်တခါဒ်လဲၣ် ဒီးတၢ်အိၣ်ဖှိၣ်သးပှၢ်တဖၣ် ကွၢ်လိမၤဒိးစီၤပီလူး အဒိအတဲာ် ကသ့ဒ်လဲၣ်.
မူဒါအိၣ်အါမးအဃိ တညီလၢ အတၢ်ဆၢကတီၢ် ကအိၣ်လၢ ကစံၣ်တဲၤတဲလီၤတၢ်အဂီၢ်
၄. တဘျီတခီၣ် ဘၣ်မနုၤအဃိ ကကီလၢ တၢ်အိၣ်ဖှိၣ်သးပှၢ်တဖၣ် ကတီခိၣ်ရိၤမဲတၢ်လၢ တၢ်စံၣ်တဲၤတဲလီၤတၢ်မၤအပူၤလဲၣ်.
၄ ဘၣ်မနုၤအဃိ ကီလၢတၢ်အိၣ်ဖှိၣ်သးပှၢ်တဖၣ် အတၢ်ဆၢကတီၢ် ကအိၣ်လၢ ကစံၣ်တဲၤတဲလီၤတၢ်အဂီၢ်လဲၣ်. တၢ်အိၣ်ဖှိၣ်သးပှၢ်တဖၣ် အိၣ်ဒီးမူဒါအါမးအဃိ တဘျီတခီၣ် အဝဲသ့ၣ် ကစံၣ်တဲၤတဲလီၤတၢ်အဂီၢ် အတၢ်ဆၢကတီၢ် တအိၣ်ဘၣ်. အဒိ, တၢ်အိၣ်ဖှိၣ်သးပှၢ်အါဂၤန့ၣ် လီၤဘၣ်မူဒါခဲအံၤခဲအံၤလၢ ကကဲပှၤပၢၤလီၢ်ဆ့ၣ်နီၤလၢ နွံဖးဖီတၢ်အိၣ်ဖှိၣ် မ့တမ့ၢ် ကဖီၣ်ဝဲ တၢ်အိၣ်ဖှိၣ်တၢ်မၤလိလံာ်စီဆှံ. ဒီးဘၣ်သ့ၣ်သ့ၣ် အဝဲသ့ၣ် ကဒိးန့ၢ်ဘၣ်မူဒါလၢ ကဟ့ၣ်တၢ်စံၣ်တဲၤတဲလီၤတၢ်လၢအဂၤစ့ၢ်ကီး. အဝဲသ့ၣ် ဘၣ်သိၣ်လိဝဲ တၢ်အိၣ်ဖှိၣ်အပှၤမၤစၢၤတၢ်တဖၣ် ဒီးဘၣ်ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ်စ့ၢ်ကီး. (၁ ပ့းတရူး ၅:၂) မ့မ့ၢ် တၢ်အိၣ်ဖှိၣ်သးပှၢ်အဂၤတနီၤန့ၣ် ပၣ်ဃုာ်လၢ တၢ်သူၣ်ထီၣ်ဘှီထီၣ် ဒီးတၢ်ကွၢ်ထွဲ ကတဲာ်ကတီၤ ဘီမုၢ်ဘျီၣ်ဒိၣ် ဒီးတၢ်သူၣ်ထီၣ်ဘှီထီၣ် အဂၤတဖၣ်လၢ တၢ်ဘူၣ်ထီၣ်ဘါထီၣ်အဂီၢ်စ့ၢ်ကီး. ဒီးဒ်ဒီပုၢ်ဝဲၢ်မုၣ်ခွါ လၢအဂၤတဖၣ်အသိး တၢ်အိၣ်ဖှိၣ်သးပှၢ်တဖၣ် ဘၣ်မၤဝဲ မူဒါအရ့ဒိၣ်ကတၢၢ်တခါ လၢအမ့ၢ်ဝဲ တၢ်စံၣ်တဲၤတဲလီၤတၢ်မၤလီၤ.—မးသဲ ၂၈:၁၉, ၂၀.
၅. ဘၣ်ဃးဒီး တၢ်စံၣ်တဲၤတဲလီၤန့ၣ် စီၤပီလူး ပာ်လီၤအဒိအတဲာ်ဒ်လဲၣ်.
၅ စီၤပီလူး အဒိအတဲာ်. ဖဲ ဖံလံးပံၤ ၁:၁၀ န့ၣ်စီၤပီလူးတဲဝဲလၢ “သ့ၣ်ညါနီၤဖး တၢ်လၢအရ့ဒိၣ်ကတၢၢ်တဖၣ်.” စီၤပီလူး မၤထွဲဝဲဒ် အတၢ်ဟ့ၣ်ကူၣ်တခါအံၤအသိးအဃိ အဝဲကဲထီၣ် ပှၤစံၣ်တဲၤတဲလီၤတၢ်ဖိ လၢအဂ့ၤလီၤ. အဝဲဒိးန့ၢ်ဘၣ် မူဒါလၢ ကစံၣ်တဲၤတဲလီၤတၢ် ဒီးအထံၣ်ဝဲ တၢ်မၤအံၤ ဒ်တၢ်လၢအရ့ဒိၣ်ကတၢၢ်အဃိ အစံၣ်တဲၤတဲလီၤတၢ်လၢ အနံၣ်အါမး. အဝဲလဲၤစံၣ်တဲၤတဲလီၤတၢ် “လၢကမျၢၢ်အမဲာ်ညါ ဒီးလၢတဟံၣ်ဘၣ် တဟံၣ်.” (မၤတၢ် ၂၀:၂၀) ပထံၣ်ဘၣ်လၢ စီၤပီလူး တစံၣ်တဲၤတဲလီၤတၢ် ထဲဒၣ်ဖဲ တၢ်ဆၢကတီၢ်တတီၤလၢ အပာ်ပနီၣ်ဃာ်ဝဲ လၢတနံၤတီၢ်ပူၤ မ့တမ့ၢ် တနွံတသီဘၣ်. ဖဲအဝဲဒိးန့ၢ်ဘၣ် တၢ်ခွဲးတၢ်ယာ် တဘျီဂ့ၤတဘျီဂ့ၤအခါ အစံၣ်တဲၤတဲလီၤတၢ်. အဒိ, ဖဲစီၤပီလူး အိၣ်ခိးအသကိးလၢ ဝ့ၢ်အၤသ့ၣ်အခါ အဝဲစံၣ်တဲၤတဲလီၤဝဲ ပှၤလၢအမံၤဟူသၣ်ဖျါတဖၣ် ဒီးပှၤတနီၤ တူၢ်လိာ်အီၤ. (မၤတၢ် ၁၇:၁၆, ၁၇, ၃၄) ဖဲစီၤပီလူးဘၣ် “တၢ်စၢဃာ်” အီၤအခါသနာ်က့ အစံၣ်တဲၤတဲလီၤပှၤလၢ အထံၣ်ဘၣ်ဝဲတဖၣ်.—ဖံလံးပံၤ ၁:၁၃, ၁၄; မၤတၢ် ၂၈:၁၆-၂၄.
၆. စီၤပီလူး မၤဝဲတၢ်မနုၤလဲၣ်.
၆ စီၤပီလူး သူဝဲအတၢ်ဆၢကတီၢ် လၢအဂ့ၤကတၢၢ်. ညီနုၢ်န့ၣ် ဖဲအလဲၤစံၣ်တဲၤတဲလီၤတၢ်အခါ အလဲၤကိးဃုာ်ဒီးပှၤဂၤ. အဒိ, ဖဲအဝဲလဲၤ မံၤၡၢၤနရံၤအတၢ်လဲၤ အဆိကတၢၢ်တဘျီအခါ အလဲၤကိးဃုာ်ဝဲ စီၤယိၤဟၣ်လၢ အမ့ၢ် စီၤမၢ်ကူး ဒီးဖဲအလဲၤဝဲ မံၤၡၢၤနရံၤအတၢ်လဲၤ ခံဘျီတဘျီန့ၣ် လဲၤကိးဝဲ စီၤတံၤမသ့း. (မၤတၢ် ၁၂:၂၅; ၁၆:၁-၄) အဃိ အဝဲသ့ၣ် ကဘၣ်ရဲၣ်ကျဲၤဝဲ တၢ်အိၣ်ဖှိၣ်ဒ်လဲၣ်, ကဘၣ်ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ်ဒ်လဲၣ် ဒီးကကဲထီၣ် ပှၤသိၣ်လိတၢ်လၢ အဂ့ၤအဂီၢ် ကဘၣ်မၤဝဲဒ်လဲၣ်န့ၣ် ပနာ်သ့သပှၢ်ကတၢၢ်လၢ စီၤပီလူး ကသိၣ်လိအဝဲသ့ၣ် မူာ်မူာ်နီၢ်နီၢ်.—၁ ကရံၣ်သူး ၄:၁၇.
ကွၢ်လိမၤဒိး စီၤပီလူး ခီဖျိ အိၣ်ကတဲာ်ကတီၤနသးလၢ နကစံၣ်တဲၤတဲလီၤတၢ်အဂီၢ်ထီဘိ (ကွၢ်လံာ်အဆၢ ၇)b
၇. တၢ်အိၣ်ဖှိၣ်သးပှၢ်တဖၣ် မၤထွဲစီၤပီလူး အတၢ်ကတိၤဖဲ အ့းဖ့းစူး ၆:၁၄, ၁၅ အပူၤကသ့ဒ်လဲၣ်.
၇ တၢ်မၤလိ. တၢ်အိၣ်ဖှိၣ်သးပှၢ်တဖၣ် ကွၢ်လိမၤဒိး စီၤပီလူးသ့ခီဖျိ စံၣ်တဲၤတဲလီၤတၢ် တဟံၣ်ဘၣ်တဟံၣ် မ့တမ့ၢ် ကအိၣ်ကတဲာ်ကတီၤအသးလၢ ကစံၣ်တဲၤတဲလီၤတၢ်အဂီၢ် ဒီးသးအိၣ်စံၣ်တဲၤတဲလီၤတၢ်ထီဘိ. (ဖး အ့းဖ့းစူး ၆:၁၄, ၁၅.) အဒိ, အဝဲသ့ၣ် စံၣ်တဲၤတဲလီၤတၢ် ဖဲအလဲၤပှ့ၤတၢ်အခါ မ့တမ့ၢ် လၢအတၢ်မၤလီၢ်သ့. မ့တမ့ၢ် ဖဲအဒိးန့ၢ်ဘၣ် မူဒါလၢ ကကွၢ်ထွဲတၢ်သူၣ်ထီၣ်ဘှီထီၣ်အခါ စံၣ်တဲၤတဲလီၤဝဲ ပှၤလၢအဃၢၤတဖၣ်သ့. ဒ်စီၤပီလူးအသိး တၢ်အိၣ်ဖှိၣ်သးပှၢ်တဖၣ်န့ၣ် ဖဲအဝဲသ့ၣ် စံၣ်တဲၤတဲလီၤတၢ်အခါ ကၠီးလိဒီပုၢ်ဝဲၢ်မုၣ်ခွါဒီး တၢ်အိၣ်ဖှိၣ်အပှၤမၤစၢၤတၢ်တဖၣ်သ့.
၈. တဘျီတခီၣ် တၢ်အိၣ်ဖှိၣ်သးပှၢ်တဖၣ် ကဘၣ်မၤဝဲ တၢ်မနုၤလဲၣ်.
၈ တၢ်အိၣ်ဖှိၣ်သးပှၢ်တဖၣ် တကြၢးမၤ တၢ်အိၣ်ဖှိၣ်အတၢ်မၤတဖၣ် အါတလၢ တုၤပၢၢ်လၢ ဟးစံၣ်တဲၤတဲလီၤတၢ် တချုးလၢၤဘၣ်န့ၣ်ဘၣ်. နမ့မ့ၢ် တၢ်အိၣ်ဖှိၣ်သးပှၢ်န့ၣ် နမၤလၢပှဲၤနမူဒါတဖၣ်ကန့ၢ်အဂီၢ် တဘျီတခီၣ် နတဘၣ်တူၢ်လိာ်မူဒါ လၢပှၤဟ့ၣ်လီၤအါထီၣ်နၤတဖၣ်ဘၣ်. အဃိ ဖဲပှၤဟ့ၣ်လီၤအါထီၣ်နၤမူဒါအခါ ဆိကမိၣ်ထံ ဒီးဃ့ဘါထုကဖၣ်. ဖဲနဃ့ဘါထုကဖၣ် ဝံၤအလီၢ်ခံ နမ့ၢ်သ့ၣ်ညါလၢ နမ့ၢ်တူၢ်လိာ်အါထီၣ်မူဒါန့ၣ် နမၤတၢ်လၢ အရ့ဒိၣ်တဖၣ်တချုးလၢၤဘၣ်န့ၣ် တလိၣ်တူၢ်လိာ်အီၤဘၣ်. တၢ်လၢအရ့ဒိၣ်တဖၣ်န့ၣ် မ့ၢ်ဝဲ ဟံၣ်ဖိဃီဖိ တၢ်မၤလိလံာ်စီဆှံ ကိးနွံဒဲး, ဟးစံၣ်တဲၤတဲလီၤတၢ် လၢတၢ်သးဆူၣ်အပူၤ ဒီးသိၣ်လိနဖိလၢ ကစံၣ်တဲၤတဲလီၤတၢ်အဂီၢ်. နကဂ့ၢ်လိာ်မူဒါအဂီၢ် မ့ၢ်ကီလၢနဂီၢ်န့ၣ် သ့ၣ်နီၣ်ထီၣ်လၢ ယဟိဝၤယွၤ နၢ်ပၢၢ်နၤ ဒီးအသ့ၣ်ညါဝဲလၢ နအဲၣ်ဒိးမၤ နမူဒါလၢ အအိၣ်ပာ်စၢၤဒီးနၤတဖၣ် ဂ့ၤဂ့ၤဘၣ်ဘၣ်လီၤ.
ကဲပှၤကွၢ်သိလၢအဂ့ၤ
၉. တၢ်အိၣ်ဖှိၣ်သးပှၢ်တဖၣ် အတၢ်မၤအါအဃိ ကကီလၢ အဝဲသ့ၣ် ကမၤတၢ်မနုၤလဲၣ်.
၉ ဘၣ်မနုၤအဃိ ကကီလၢတၢ်အိၣ်ဖှိၣ်သးပှၢ်တဖၣ် ကကဲပှၤကွၢ်သိလၢအဂ့ၤလဲၣ်. ယဟိဝၤယွၤ အခ့အပှၤတဖၣ်န့ၣ် ထံၣ်ဘၣ်ဒီး တၢ်ကီတၢ်ခဲအါမး. လၢမုၢ်နံၤခံကတၢၢ် အတီၢ်ပူၤန့ၣ် ပဝဲကိးဂၤဒဲး ပလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါ, တၢ်ဆီၣ်ထွဲမၤစၢၤ ဒီးတၢ်မၤမုာ်ထီၣ်. ဒီးမ့မ့ၢ် ပဒီပုၢ်ဝဲၢ်တနီၤန့ၣ် လိၣ်ဘၣ်တၢ်မၤစၢၤ ဒ်သိး အသုတမၤကမၣ်ဘၣ်တၢ် တဂ့ၤအဂီၢ်. (၁ သ့းစၤလနံ ၅:၁၄) တၢ်အိၣ်ဖှိၣ်သးပှၢ်တဖၣ် မၤလီၤမၢ်န့ၢ်ဝဲ တၢ်မၤကွၢ်လၢ ယဟိဝၤယွၤ အခ့အပှၤတဖၣ်ထံၣ်ဘၣ်ဝဲ တသ့ခဲလၢာ်ဘၣ်. ဘၣ်ဆၣ် ယဟိဝၤယွၤ အဲၣ်ဒိးလၢ အဝဲသ့ၣ် ကဟ့ၣ်ဂံၢ်ဟ့ၣ်ဘါ ဒီးဒီသဒၢ အသိတဖၣ်. အဝဲသ့ၣ် အတၢ်မၤအိၣ်အါမးအဃိ ဒ်သိး အတၢ်ဆၢကတီၢ် ကအိၣ်လၢ ကမၤစၢၤ ပှၤလၢအလိၣ်ဘၣ် တၢ်မၤစၢၤအဂီၢ် အဝဲသ့ၣ် ကဘၣ်မၤဝဲဒ်လဲၣ်.
စံးပတြၢၤပှၤဂၤ ဒီးဟ့ၣ်ဂံၢ်ဟ့ၣ်ဘါ အဝဲသ့ၣ် (ကွၢ်လံာ်အဆၢ ၁၀, ၁၂)c
၁၀. ဒ် ၁ သ့းစၤလနံ ၂:၇ ပာ်ဖျါထီၣ်ဝဲအသိး စီၤပီလူး သးအိၣ် ဒီပုၢ်ဝဲၢ်မုၣ်ခွါတဖၣ်န့ၣ် အပာ်ဖျါထီၣ်ဝဲဒ်လဲၣ်.
၁၀ စီၤပီလူး အဒိအတဲာ်. စီၤပီလူး ဃုကျဲလၢ ကပတြၢၤ ဒီးဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ်. တၢ်အိၣ်ဖှိၣ်သးပှၢ်တဖၣ် ကွၢ်လိ စီၤပီလူး သ့ခီဖျိ အရ့ဒီး ယဟိဝၤယွၤ အခ့အပှၤတဖၣ် လၢတၢ်အဲၣ်တၢ်ကွံအပူၤ. (ဖး ၁ သ့းစၤလနံ ၂:၇.) စီၤပီလူး တဲဘၣ်ဒီပုၢ်ဝဲၢ်မုၣ်ခွါတဖၣ် လၢအအဲၣ်အဝဲသ့ၣ် ဒီးယဟိဝၤယွၤ အဲၣ်အဝဲသ့ၣ်လီၤ. (၂ ကရံၣ်သူး ၂:၄; အ့းဖ့းစူး ၂:၄, ၅) စီၤပီလူး ရ့ဒီးပှၤလၢ တၢ်အိၣ်ဖှိၣ်ပူၤတဖၣ် ဒ်သိးဒီးအသကိး ဒီးဟ့ၣ်အဝဲသ့ၣ် တၢ်ဆၢကတီၢ် ဒီးအပာ်ဖျါထီၣ်လၢ အနာ်န့ၢ် ဒီပုၢ်ဝဲၢ်မုၣ်ခွါတဖၣ်ခီဖျိ အတဲဘၣ် အဝဲသ့ၣ် လၢအတၢ်ဘၣ်ယိၣ်ဘၣ်ဘှီ ဒီးအတၢ်ဂံၢ်စၢ်ဘါစၢ်. (၂ ကရံၣ်သူး ၇:၅; ၁ တံၤမသ့း ၁:၁၅) ဘၣ်ဆၣ် စီၤပီလူး တသးစၢၢ်ဆၢထဲ အနီၢ်ကစၢ် တၢ်ကီတၢ်ခဲတဖၣ်ဘၣ်. လၢတၢ်န့ၣ်အလီၢ် အဝဲသးအိၣ်မၤစၢၤ ဒီပုၢ်ဝဲၢ်မုၣ်ခွါတဖၣ်.
၁၁. ဘၣ်မနုၤအဃိ စီၤပီလူးဟ့ၣ်ကူၣ် ဒီပုၢ်ဝဲၢ်မုၣ်ခွါတဖၣ်လဲၣ်.
၁၁ တဘျီတခီၣ် စီၤပီလူး ဘၣ်ဟ့ၣ်ကူၣ်ဝဲ ဒီပုၢ်ဝဲၢ်မုၣ်ခွါတဖၣ်. ဘၣ်ဆၣ် အဟ့ၣ်ကူၣ်တၢ်န့ၣ် တမ့ၢ်လၢ အသးထီၣ် အဝဲသ့ၣ်အဃိဘၣ်. မ့ၢ်လၢအအဲၣ်အဝဲသ့ၣ် ဒီးအဲၣ်ဒိးဒီသဒၢ အဝဲသ့ၣ်လၢ တၢ်လီၤဘၣ်ယိၣ်တဖၣ်အဃိ. အဝဲဂုာ်ကျဲးစၢး ဟ့ၣ်ကူၣ်ပှၤဂၤ ဒ်သိး ပှၤကနၢ်ပၢၢ် တၢ်ဟ့ၣ်ကူၣ် ဒီးမၤထွဲအီၤအဂီၢ်. အဒိ, ဖဲအကွဲး လံာ်ပရၢလၢ ကရံၣ်သူးအခါ အဟ့ၣ်ကူၣ် အဝဲသ့ၣ်ဆူၣ်ဆူၣ်. ဒီးဖဲအကွဲးဝဲ လံာ်ပရၢဝံၤအလီၢ်ခံ အဆှၢလီၤဝဲ စီၤတံတူး ဒ်သိး ကသ့ၣ်ညါဝဲလၢ ဒီပုၢ်ဝဲၢ်မုၣ်ခွါဖဲန့ၣ်တဖၣ် မၤထွဲ အတၢ်ဟ့ၣ်ကူၣ် ဒ်လဲၣ်. ဖဲစီၤပီလူး သ့ၣ်ညါဝဲလၢ ဒီပုၢ်ဝဲၢ်မုၣ်ခွါတဖၣ် တူၢ်လိာ် အတၢ်ဟ့ၣ်ကူၣ် ဒီးမၤထွဲဝဲအခါ စီၤပီလူး ကသးခုဒိၣ်မး.—၂ ကရံၣ်သူး ၇:၆, ၇.
၁၂. တၢ်အိၣ်ဖှိၣ်သးပှၢ်တဖၣ် ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ် ကသ့ဒ်လဲၣ်.
၁၂ တၢ်မၤလိ. တၢ်အိၣ်ဖှိၣ်သးပှၢ်တဖၣ် ကွၢ်လိမၤဒိး စီၤပီလူး အဒိအတဲာ်သ့ခီဖျိ ရ့ဒီးဒီပုၢ်ဝဲၢ်မုၣ်ခွါတဖၣ်. ကျဲတဘိလၢ အဝဲသ့ၣ်မၤဝဲသ့န့ၣ် အဝဲသ့ၣ် ဟဲတုၤလၢ တၢ်အိၣ်ဖှိၣ်ဆိဆိ ဒ်သိး ကတဲသကိးတၢ် ဒီးဟ့ၣ်ဂံၢ်ဟ့ၣ်ဘါပှၤဂၤအဂီၢ်. ညီနုၢ်န့ၣ် ပမ့ၢ်ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ်ထဲ စှၤကိာ်မံးနံးဘၣ်ဆၣ် ကဲဘျုးဝဲ. (ရိမ့ၤ ၁:၁၂; အ့းဖ့းစူး ၅:၁၆) တၢ်အိၣ်ဖှိၣ်သးပှၢ်လၢ အကွၢ်လိ စီၤပီလူး အဒိအတဲာ်န့ၣ် ကသူဝဲလံာ်စီဆှံ ဒ်သိးကမၤဂၢၢ်ကျၢၤထီၣ် ဒီပုၢ်ဝဲၢ်မုၣ်ခွါတဖၣ် အတၢ်နာ်. ဒီးကမၤစၢၤ အဝဲသ့ၣ် ဒ်သိး ကနာ်ဝဲလၢ ကစၢ်ယွၤအဲၣ်အဝဲသ့ၣ်. တကးဒံးဘၣ် ပပာ်ဖျါထီၣ် တၢ်အဲၣ်တၢ်ကဟုကယာ် လၢဒီပုၢ်ဝဲၢ်မုၣ်ခွါတဖၣ် အဖီခိၣ်. ကတဲသကိးတၢ်ဒီး အဝဲသ့ၣ်ထီဘိ ဒီးကဃုတၢ်ခွဲးတၢ်ယာ် လၢကပတြၢၤ အဝဲသ့ၣ်. ဖဲတၢ်အိၣ်ဖှိၣ်သးပှၢ်တဂၤ ကဘၣ်ဟ့ၣ်ကူၣ်တၢ်အခါ အကဒိးသန့ၤထီၣ် အတၢ်ဟ့ၣ်ကူၣ်လၢလံာ်စီဆှံပူၤ. တၢ်တဲအလီၢ်မ့ၢ်အိၣ်န့ၣ် တၢ်အိၣ်ဖှိၣ်သးပှၢ်တဖၣ် ကတဲဝဲ ဘၣ်ဆၣ် ကတဲဝဲလၢ တၢ်အဲၣ်တၢ်ကွံအပူၤ, မ့ၢ်လၢအအဲၣ်ဒိးလၢ ပှၤကတူၢ်လိာ်ဒီး မၤထွဲအတၢ်ဟ့ၣ်ကူၣ်အဃိလီၤ.—ကလၤတံ ၆:၁.
တၢ်အိၣ်ဖှိၣ်သးပှၢ်တဖၣ် အိၣ်ဒီးအနီၢ်ကစၢ် တၢ်ဂံၢ်စၢ်ဘါစၢ်
၁၃. ဘၣ်ဃးဒီး နီၢ်ကစၢ်တၢ်ဂံၢ်စၢ်ဘါစၢ်န့ၣ် တၢ်အိၣ်ဖှိၣ်သးပှၢ်တနီၤ အိၣ်ဒီးတၢ်ထံၣ်ဒ်လဲၣ်.
၁၃ ဘၣ်မနုၤအဃိ ကကီလၢတၢ်အိၣ်ဖှိၣ်သးပှၢ်တဖၣ် ကမၤနၢၤကွံာ် အတၢ်ဂံၢ်စၢ်ဘါစၢ်လဲၣ်. ဒ်ပှၤဂၤတဖၣ်အသိး တၢ်အိၣ်ဖှိၣ်သးပှၢ်တဖၣ် တလၢတပှဲၤဘၣ်အဃိ အမၤကမၣ်ဘၣ်တၢ်သ့. (ရိမ့ၤ ၃:၂၃) အဃိ တဘျီတခီၣ်န့ၣ် ကကီလၢ အဝဲသ့ၣ် ကအိၣ်ဒီး တၢ်ထံၣ်လၢအကြၢးအဘၣ်လၢ အနီၢ်ကစၢ် တၢ်ဂံၢ်စၢ်ဘါစၢ်အဖီခိၣ်. အဝဲသ့ၣ်တနီၤန့ၣ် ကသးစၢၢ်ဆၢထဲ အတၢ်ဂံၢ်စၢ်ဘါစၢ် အဃိ အသးကဟးဂီၤ. ဘၣ်ဆၣ် မ့မ့ၢ်အဂၤတနီၤန့ၣ် အပာ်ဝဲလၢ အတၢ်ဂံၢ်စၢ်ဘါစၢ်တဖၣ်အံၤ တမ့ၢ်တၢ်လၢ အရ့ဒိၣ်အါအါဘၣ် အဃိ တဆီတလဲအသးဘၣ်.
၁၄. ဒ် ဖံလံးပံၤ ၄:၁၃ ပာ်ဖျါထီၣ်ဝဲအသိး တၢ်ဆီၣ်လီၤသး မၤစၢၤစီၤပီလူးဒ်သိး ကမၤနၢၤကွံာ် အတၢ်ဂံၢ်စၢ်ဘါစၢ်ဒ်လဲၣ်.
၁၄ စီၤပီလူး အဒိအတဲာ်. စီၤပီလူးအိၣ်ဒီး တၢ်ဆီၣ်လီၤသးအဃိ အသ့ၣ်ညါဝဲလၢ အလဲၤခီဖျိ အတၢ်ဂံၢ်စၢ်ဘါစၢ်လၢ အနီၢ်ကစၢ် အဂံၢ်အဘါတသ့ဘၣ်. ဒ်သိး အလဲၤခီဖျိ ကန့ၢ်အဂီၢ် အလိၣ်ဘၣ် ယဟိဝၤယွၤ အတၢ်မၤစၢၤ. လၢညါန့ၣ် စီၤပီလူး မ့ၢ်ပှၤလၢအခိၣ်ကိၤ ဒီးမၤအၢမၤနး ခရံာ်ဖိတဖၣ် နးနးကလဲာ် ဘၣ်ဆၣ် လၢခံန့ၣ် အသ့ၣ်ညါလီၤ အတၢ်ကမၣ် ဒီးအသးအိၣ်ဆီတလဲ အတၢ်ပာ်သူၣ်ပာ်သး ဒီးအတၢ်သကဲာ်ပဝး. (၁ တံၤမသ့း ၁:၁၂-၁၆) မ့ၢ်လၢ ယဟိဝၤယွၤ အတၢ်မၤစၢၤအဃိ စီၤပီလူး ကဲထီၣ်ပှၤကွၢ်သိလၢ အအိၣ်ဒီး တၢ်အဲၣ်တၢ်ကွံ, တၢ်သးကညီၤ ဒီးတၢ်ဆီၣ်လီၤသးလီၤ. စီၤပီလူး သ့ၣ်ညါဝဲလၢ အတၢ်ဂံၢ်စၢ်ဘါစၢ် အိၣ်ဝဲအါမး ဘၣ်ဆၣ် အတဆဲးဆိကမိၣ်ဝဲ တၢ်သ့ၣ်တဖၣ်အံၤဘၣ်. လၢတၢ်န့ၣ်အလီၢ် အနာ်ဝဲလၢ ယဟိဝၤယွၤ ကပျၢ်ကွံာ် အတၢ်ကမၣ်. (ရိမ့ၤ ၇:၂၁-၂၅) အဝဲ တမုၢ်လၢ်လၢ ကကဲထီၣ် ပှၤလၢပှၤပှဲၤဘၣ်. လၢတၢ်န့ၣ်အလီၢ် အဂုာ်ကျဲးစၢး မၤအါထီၣ် ခရံာ်ဖိ အတၢ်ဂ့ၤတၢ်ဝါတဖၣ် ဒီးဒ်သိး အမၤတၢ်ကကဲထီၣ်လိၣ်ထီၣ်အဂီၢ် အသန့ၤအသးလၢ ယဟိဝၤယွၤ အတၢ်မၤစၢၤ လၢတၢ်ဆီၣ်လီၤသးအပူၤလီၤ.—၁ ကရံၣ်သူး ၉:၂၇; ဖး ဖံလံးပံၤ ၄:၁၃.
ဂုာ်ကျဲးစၢးမၤနၢၤကွံာ် နနီၢ်ကစၢ်တၢ်ဂံၢ်စၢ်ဘါစၢ်တဖၣ် (ကွၢ်လံာ်အဆၢ ၁၄-၁၅)d
၁၅. ဘၣ်ဃးဒီး နီၢ်ကစၢ် တၢ်ဂံၢ်စၢ်ဘါစၢ်န့ၣ် တၢ်အိၣ်ဖှိၣ်သးပှၢ်တဖၣ် ကြၢးအိၣ်ဒီး တၢ်ထံၣ်ဒ်လဲၣ်.
၁၅ တၢ်မၤလိ. ပဒီပုၢ်ဝဲၢ်ခွါတဖၣ် ဘၣ်တၢ်ဃုထၢထီၣ်အီၤဒ် တၢ်အိၣ်ဖှိၣ်သးပှၢ်အသိးန့ၣ် တမ့ၢ်လၢ အဝဲသ့ၣ်မ့ၢ် ပှၤလၢပှၤပှဲၤအဃိဘၣ်. ဘၣ်ဆၣ် ဖဲအဝဲသ့ၣ် မၤကမၣ်ဘၣ်တၢ်အခါ ယဟိဝၤယွၤ အဲၣ်ဒိးလၢ အဝဲသ့ၣ်ကအၢၣ်လီၤ အတၢ်ကမၣ် ဒီးမၤအါထီၣ် ခရံာ်ဖိအတၢ်ဂ့ၤတၢ်ဝါတဖၣ်လီၤ. (အ့းဖ့းစူး ၄:၂၃, ၂၄) အဝဲသ့ၣ်ကဖးလံာ်စီဆှံ ဒီးသမံသမိးလီၤက့ၤအသး ဒီးအလီၢ်မ့ၢ်အိၣ်လၢ ကဘၣ်ဆီတလဲအသးန့ၣ် ကဆီတလဲဝဲ. အဝဲသ့ၣ်မ့ၢ်မၤဝဲဒ်န့ၣ်န့ၣ် ယဟိဝၤယွၤ ကမၤစၢၤအီၤဒ်သိး အကသးခု ဒီးအက ကဲထီၣ် တၢ်အိၣ်ဖှိၣ်သးပှၢ် လၢအဂ့ၤအဂီၢ်လီၤ.—ယၤကိာ် ၁:၂၅.
တၢ်အိၣ်ဖှိၣ်သးပှၢ်တဖၣ် ထံၣ်ဘၣ်ဒီး ပှၤဂၤအတၢ်တလၢတပှဲၤတဖၣ်
၁၆. တၢ်အိၣ်ဖှိၣ်သးပှၢ်တဖၣ် မ့ၢ်သးစၢၢ်ဆၢဘၣ်လၢ ပှၤဂၤအတၢ်ဂံၢ်စၢ်ဘါစၢ်န့ၣ် တၢ်မနုၤ ကဲထီၣ်အသးသ့လဲၣ်.
၁၆ ဖဲတၢ်အိၣ်ဖှိၣ်သးပှၢ်တဖၣ် ထံၣ်ဘၣ်ဒီး ပှၤဂၤအတၢ်တလၢတပှဲၤတဖၣ်အခါ ဘၣ်မနုၤအဃိ ကကီလၢ အဝဲသ့ၣ်အဂီၢ်လဲၣ်. တၢ်အိၣ်ဖှိၣ်သးပှၢ်တဖၣ် မၤဘၣ်တၢ်ဒီး ဒီပုၢ်ဝဲၢ်မုၣ်ခွါ လၢတၢ်အိၣ်ဖှိၣ်ပူၤတဖၣ် ဘူးဘူးအဃိ ကသ့ၣ်ညါထီၣ်ဝဲ ဒီပုၢ်ဝဲၢ်မုၢ်ခွါတဖၣ် အတၢ်ဂံၢ်စၢ်ဘါစၢ်. အဃိ အဝဲသ့ၣ် မ့ၢ်တပလီၢ်အသးဘၣ်န့ၣ် အသးကဘၣ်တံာ်တာ်, အတရ့ဒီး ဒီပုၢ်ဝဲၢ်မုၣ်ခွါတဖၣ် ဂ့ၤဂ့ၤလၢၤဘၣ် ဒီးအကပာ်ဒ့ၣ်ပာ်ကမၣ်ဘၣ် ဒီပုၢ်ဝဲၢ်မုၣ်ခွါတဖၣ်လီၤ. စီၤပီလူး ဟ့ၣ်ပလီၢ် ခရံာ်ဖိတဖၣ်လၢ မုၣ်ကီၤလံၢ်အဲၣ်ဒိးလၢ အဝဲသ့ၣ် ကမၤဝဲဒ်န့ၣ်.—၂ ကရံၣ်သူး ၂:၁၀, ၁၁.
၁၇. စီၤပီလူး အိၣ်ဒီးတၢ်ထံၣ်လၢ ဒီပုၢ်ဝဲၢ်မုၣ်ခွါတဖၣ် အဖီခိၣ်ဒ်လဲၣ်.
၁၇ စီၤပီလူး အဒိအတဲာ်. စီၤပီလူး အိၣ်ဒီးတၢ်ထံၣ်အဂ့ၤ လၢဒီပုၢ်ဝဲၢ်မုၣ်ခွါတဖၣ်အဖီခိၣ်. တဘျီတခီၣ်န့ၣ် ဒီပုၢ်ဝဲၢ်တဖၣ်အံၤ မၤကမၣ်ဘၣ်အီၤအဃိ အသ့ၣ်ညါဝဲ အဝဲသ့ၣ်အတၢ်ကမၣ်. ဘၣ်ဆၣ် စီၤပီလူး နၢ်ပၢၢ်ဝဲလၢ မ့ၢ်လၢဒီပုၢ်ဝဲၢ်မုၣ်ခွါတဖၣ်အံၤ တလၢတပှဲၤဘၣ်အဃိ တဘျီတခီၣ်န့ၣ် အဝဲသ့ၣ်မၤကမၣ်ဘၣ်တၢ်သ့ အဃိ ဖဲအဝဲသ့ၣ် မၤကမၣ်တၢ်အခါ အခီပညီတမ့ၢ်လၢ အကဲပှၤအၢပှၤသီဘၣ်. အအဲၣ်ဝဲဒီပုၢ်ဝဲၢ်မုၣ်ခွါတဖၣ် ဒီးသးစၢၢ်ဆၢလၢ အဝဲသ့ၣ် အတၢ်ဂ့ၤတၢ်ဝါဟီ. ဒီးဒီပုၢ်ဝဲၢ်မုၣ်ခွါတဖၣ် မ့ၢ်မၤကမၣ်ဘၣ်တၢ်နာ်က့ အထံၣ်ဝဲလၢ ဒီပုၢ်ဝဲၢ်မုၣ်ခွါတဖၣ်အံၤ အအဲၣ်ဒိးမၤ တၢ်လၢအဘၣ် ဘၣ်ဆၣ် အိၣ်ဒၣ် အလိၣ်ဘၣ်တၢ်မၤစၢၤလၢ ကမၤတၢ်အဘၣ်အဂီၢ်လီၤ.
၁၈. ဖဲနီၢ်အူၤအိဒံၤ ဒီးနီၢ်စူၣ်တူဃ့ၤ တဖီးလိာ်အသးလၢၤဘၣ်အခါ စီၤပီလူး မၤစၢၤအဝဲသ့ၣ်ဒ်လဲၣ်. (ဖံလံးပံၤ ၄:၁-၃)
၁၈ ပကဆိကမိၣ်ကွၢ် တၢ်အဒိတခါ. ဘၣ်တဘျီ ဖဲဒီပုၢ်ဝဲၢ်မုၣ်ခံဂၤ လၢဖံလံးပံၤ တၢ်အိၣ်ဖှိၣ်န့ၣ် တဖီးလိာ်သးလၢၤဘၣ်အဃိ စီၤပီလူးမၤစၢၤအဝဲသ့ၣ်လီၤ. (ဖး ဖံလံးပံၤ ၄:၁-၃.) ဖဲနီၢ်အူၤအိဒံၤ ဒီးနီၢ်စူၣ်တူဃ့ၤ တဖီးလိာ်အသးလၢၤဘၣ်အခါ စီၤပီလူး တသးထီၣ်တၢ်ဘၣ် ဒီးတပာ်ဒ့ၣ်ပာ်ကမၣ် အဝဲသ့ၣ်ဘၣ်. အသးစၢၢ်ဆၢလၢ ဒီပုၢ်ဝဲၢ်မုၣ်တဖၣ်အံၤ အတၢ်ဂ့ၤတၢ်ဝါတဖၣ်. စီၤပီလူး နီၣ်ထီၣ်ဝဲလၢ ဒီပုၢ်ဝဲၢ်မုၣ်တဖၣ်အံၤ မၤယဟိဝၤယွၤ အတၢ်မၤလၢ အနံၣ်အါမး ဒီးယဟိဝၤယွၤ အဲၣ်အဝဲသ့ၣ်. မ့ၢ်လၢစီၤပီလူး အိၣ်ဒီးတၢ်ထံၣ်လၢအဂ့ၤ ဒ်အံၤအဃိ ထိၣ်ဟူးထိၣ်ဂဲၤထီၣ်အီၤလၢ ကဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်တဖၣ်အံၤလၢ ကက့ၤဖီးလိာ်အသးအဂီၢ်လီၤ. စီၤပီလူး အိၣ်ဒီးတၢ်ထံၣ်လၢအဂ့ၤအဃိ အဝဲဆဲးအိၣ်ဒီးတၢ်သးခု ဒီးဆဲးအိၣ်ဘၣ် ဃူဃူဖိးဖိးဒီး ပှၤလၢတၢ်အိၣ်ဖှိၣ်ပူၤလီၤ.
ပလီၢ်နသး ဒ်သိးနတပာ်ဒ့ၣ်ပာ်ကမၣ်ဘၣ် ပှၤဂၤတဂ့ၤအဂီၢ် (ကွၢ်လံာ်အဆၢ ၁၉)e
၁၉. (က) တၢ်အိၣ်ဖှိၣ်သးပှၢ်တဖၣ် အိၣ်ဒီးတၢ်ထံၣ်အဂ့ၤလၢ ဒီပုၢ်ဝဲၢ်မုၣ်ခွါတဖၣ်အဖီခိၣ်ကသ့ဒ်လဲၣ်. (ခ) လၢတၢ်ဂီၤအပူၤ တၢ်အိၣ်ဖှိၣ်သးပှၢ်လၢ အမၤကဆှဲကဆှီတၢ်လၢ ဘီမုၢ်ဘျီၣ်ဒိၣ်လီၢ်န့ၣ် နမၤလိန့ၢ်တၢ်လၢ အအိၣ်ကသ့ဒ်လဲၣ်.
၁၉ တၢ်မၤလိ. နမ့မ့ၢ် တၢ်အိၣ်ဖှိၣ်သးပှၢ်န့ၣ် ဃုထံၣ်န့ၢ် ဒီပုၢ်ဝဲၢ်မုၣ်ခွါတဖၣ် အတၢ်ဂ့ၤတၢ်ဝါ. ဒီပုၢ်ဝဲၢ်မုၣ်ခွါတဖၣ်န့ၣ် တလၢတပှဲၤဘၣ်ဆၣ် အဝဲသ့ၣ်ကိးဂၤဒဲးန့ၣ် အိၣ်ဒီး တၢ်ဂ့ၤတၢ်ဝါလၢ အလီၤကွၢ်လိစ့ၢ်ကီး. (ဖံလံးပံၤ ၂:၃) တဘျီတခီၣ်န့ၣ် တၢ်အိၣ်ဖှိၣ်သးပှၢ်တဖၣ် ကဘၣ်ဘှီဘၣ်ထီၣ်က့ၤ ဒီပုၢ်ဝဲၢ်မုၣ်ခွါတဖၣ်အတၢ်ထံၣ် ဘၣ်ဆၣ် ဒ်စီၤပီလူးအသိး အဝဲသ့ၣ်ကဘၣ်ဂုာ်ကျဲးစၢး ကွၢ်ကပာ်ကွံာ် ဒီပုၢ်ဝဲၢ်မုၣ်ခွါတဖၣ် အတၢ်ကတိၤဒီးအတၢ်ဖံးတၢ်မၤလၢ အမၤတံာ်တာ်အီၤတဖၣ်. လၢတၢ်န့ၣ်အလီၢ် အဝဲသ့ၣ်ကဘၣ်သးစၢၢ်ဆၢ ဒီပုၢ်ဝဲၢ်တဖၣ်အတၢ်အဲၣ် ယဟိဝၤယွၤ, အမၤကစၢ်ယွၤအတၢ်မၤလၢ တၢ်တူၢ်န့ၢ်ခီၣ်ကဲအပူၤ ဒီးအတၢ်သးအိၣ်မၤတၢ်လၢ အဘၣ်လီၤ. တၢ်အိၣ်ဖှိၣ်သးပှၢ်တဖၣ် မ့ၢ်အိၣ်ဒီးတၢ်ထံၣ်လၢ အဂ့ၤန့ၣ် ဒီပုၢ်ဝဲၢ်တဖၣ်ကတူၢ်ဘၣ်လၢ အဒိးန့ၢ်ဘၣ် တၢ်အဲၣ်တၢ်ကွံလၢ တၢ်အိၣ်ဖှိၣ်အပူၤ.
ဆဲးကွၢ်လိမၤဒိး စီၤပီလူး
၂၀. တၢ်အိၣ်ဖှိၣ်သးပှၢ်တဖၣ် မၤလိန့ၢ်တၢ်လၢ စီၤပီလူးအဒိအတဲာ် ကသ့ဒ်လဲၣ်.
၂၀ တၢ်အိၣ်ဖှိၣ်သးပှၢ်တဖၣ် မ့ၢ်ဆဲးဃုသ့ၣ်ညါအါထီၣ် စီၤပီလူးအဂ့ၢ်န့ၣ် ကကဲဘျုးဝဲဒိၣ်မး. ဖဲနဖးစီၤပီလူး အဂ့ၢ်အခါ သံကွၢ်လီၤနသးလၢ ‘စီၤပီလူးအဒိအတဲာ်န့ၣ် မၤစၢၤယၤလၢ ယကဆဲးအိၣ်ဒီးတၢ်သးခု ဖဲယမၤလၢပှဲၤ တၢ်အိၣ်ဖှိၣ်သးပှၢ်အမူဒါအခါ ကသ့ဒ်လဲၣ်.’ (အဒိ, နကွၢ်လၢ တၢးထီခိးတၢ် ၂၀၂၀, လါယူၤလံ, တၢ်မၤလိ ၂၉ အပူၤသ့.)
၂၁. တၢ်အိၣ်ဖှိၣ်သးပှၢ်တဖၣ် နာ်န့ၢ်တၢ်မနုၤသ့လဲၣ်.
၂၁ တၢ်အိၣ်ဖှိၣ်သးပှၢ်သ့ၣ်ဧၢ သ့ၣ်နီၣ်ထီၣ်လၢ ယဟိဝၤယွၤတမုၢ်လၢ် တၢ်လၢတၢ်ပှဲၤလၢ သုအိၣ်ဘၣ်, အမုၢ်လၢ်လၢ သုကအိၣ်ဒီးတၢ်သးတီဟီ. (၁ ကရံၣ်သူး ၄:၂) စီၤပီလူးမၤတၢ်ဆူၣ်ဆူၣ် ဒီးအိၣ်ဒီးတၢ်သးတီ အဃိ ယဟိဝၤယွၤ ပာ်လုၢ်ပာ်ပှ့ၤအီၤဒိၣ်မး. အဃိ နၤစ့ၢ်ကီး နနာ်သ့သပှၢ်ကတၢၢ်လၢ ယဟိဝၤယွၤ ပာ်လုၢ်ပာ်ပှ့ၤဝဲ တၢ်လၢနမၤန့ၢ်အီၤတဖၣ်. ယဟိဝၤယွၤ “တသးပ့ၤနီၣ် သုတၢ်မၤဒီးတၢ်အဲၣ်လၢ သုပာ်ဖျါထီၣ်လၢ အမံၤအဖီခိၣ် ခီဖျိလၢ သုမၤစၢၤတ့ၢ် ပှၤစီဆှံတဖၣ် ဒီးသုဆဲးမၤစၢၤ အဝဲသ့ၣ်အဃိဘၣ်.”—ဧ့ၤဘြံၤ ၆:၁၀.
တၢ်သးဝံၣ် ၈၇ ဟဲဒီးမၤဆူၣ်ထီၣ်က့ၤနဂံၢ်ဘါ
a တၢ်အိၣ်ဖှိၣ်သးပှၢ် လၢအအိၣ်ဒီး တၢ်အဲၣ်တၢ်ကွံတဖၣ် မၤတၢ်ဆူၣ်ဆူၣ်ဒီး မၤစၢၤပှၤအါမးအဃိ ပစံးဘျုးဘၣ်အဝဲသ့ၣ်ဒိၣ်မး. လၢတၢ်မၤလိအံၤအပူၤ ပကတဲသကိး တၢ်အိၣ်သးကီခဲ လွံၢ်ခါလၢ ညီနုၢ်တၢ်အိၣ်ဖှိၣ်သးပှၢ်တဖၣ် ထံၣ်ဘၣ်ဝဲ. ဒီးတၢ်အိၣ်ဖှိၣ်သးပှၢ်တဖၣ် လဲၤခီဖျိ တၢ်ကီတၢ်ခဲတဖၣ်အံၤ ကသ့အဂီၢ် တၢ်မၢဖိပီလူးအဒိအတဲာ် မၤစၢၤအဝဲသ့ၣ် ကသ့ဒ်လဲၣ်. ဒီးတၢ်မၤလိတခါအံၤ ကမၤစၢၤပှၤဒ်သိး ပကနၢ်ပၢၢ်စၢၤ တၢ်အိၣ်ဖှိၣ်သးပှၢ်တဖၣ်, ပကပာ်ဖျါထီၣ်တၢ်အဲၣ် ဒီးဆီၣ်ထွဲမၤစၢၤအဝဲသ့ၣ်အဂီၢ်လီၤ.
b တၢ်တဲဖျါထီၣ်တၢ်ဂီၤ အခီပညီ– ဖဲတၢ်မၤပျၢ်အခါ တၢ်အိၣ်ဖှိၣ်သးပှၢ်တဂၤ စံၣ်တဲၤတဲလီၤဝဲ အသကိးလၢတၢ်မၤလီၢ်.
c တၢ်တဲဖျါထီၣ်တၢ်ဂီၤ အခီပညီ– တၢ်အိၣ်ဖှိၣ်သးပှၢ်တဂၤ ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်ခွါလၢ အဲၣ်ဒိးအိၣ်ဒၣ်အတၢ်တဂၤ.
d တၢ်တဲဖျါထီၣ်တၢ်ဂီၤ အခီပညီ– ဒီပုၢ်ဝဲၢ်ခွါတဂၤ ဟ့ၣ်ကူၣ်ဝဲ ဒီပုၢ်ဝဲၢ်အဂၤတဂၤ လၢအသးဘၣ်ဒိ ခီဖျိလၢတၢ်ဂ့ၢ်တမံၤမံၤအဃိ.
e တၢ်တဲဖျါထီၣ်တၢ်ဂီၤ အခီပညီ– တၢ်အိၣ်ဖှိၣ်သးပှၢ်တဂၤ တပာ်ဒ့ၣ်ပာ်ကမၣ် ဒီပုၢ်ဝဲၢ်ခွါလၢ အတသးစၢၢ်ဆၢအတၢ်မၤ တဂၤန့ၣ်ဘၣ်.