တၢ်မၤလိ ၃၆
တၢ်သးဝံၣ် ၁၀၃ ပှၤကွၢ်သိ—ပှၤပိာ်ခွါလၢအမ့ၢ်တၢ်ဟ့ၣ်တဖၣ်
ဃ့တၢ်အိၣ်ဖှိၣ်သးပှၢ်တဖၣ် အတၢ်မၤစၢၤ
“လၢသုကျါန့ၣ် ပှၤလၢ အဘၣ်ဆူးဘၣ်ဆါ အိၣ်တဂၤဂၤဧါ. မ်အကိး တၢ်အိၣ်ဖှိၣ်သးပှၢ်တဖၣ်တက့ၢ်.”—ယၤ ၅:၁၄.
တၢ်ဂ့ၢ်မိၢ်ပှၢ်
ဖဲပနီၢ်သးလီၤစၢ်အခါ ဘၣ်မနုၤအဃိ အရ့ဒိၣ်လၢ ပဃ့တၢ်မၤစၢၤလၢ တၢ်အိၣ်ဖှိၣ်သးပှၢ်တဖၣ် အအိၣ်လဲၣ်.
၁. ယဟိဝၤယွၤ အဲၣ်ဒီးကဟုကယာ်ဝဲ အခ့အပှၤခဲလၢာ်န့ၣ် အပာ်ဖျါထီၣ်ဝဲဒ်လဲၣ်.
ယဟိဝၤယွၤန့ၣ် အလီၤဂာ်ဒီး ပှၤကွၢ်သိလၢ အကဟုကယာ် အသိဖိဂ့ၤမး. အအဲၣ် ဒီးအကဟုကယာ် အခ့အပှၤခဲလၢာ်. အပှ့ၤက့ၤ အဝဲသ့ၣ်လၢ ယ့ၣ်ၡူးအသွံၣ် ဒီးအဃုထၢထီၣ် တၢ်အိၣ်ဖှိၣ်သးပှၢ်တဖၣ် လၢကကွၢ်ထွဲ အသိဖိ. (မၤတၢ် ၂၀:၂၈) အဃိ ယဟိဝၤယွၤ အဲၣ်ဒိးလၢ တၢ်အိၣ်ဖှိၣ်သးပှၢ်တဖၣ် ကဟုကယာ် သိဖိတဖၣ်အံၤဂ့ၤဂ့ၤ. တကးဒံးဘၣ် တၢ်အိၣ်ဖှိၣ်သးပှၢ်တဖၣ် မၤထွဲယ့ၣ်ၡူး အတၢ်ဟံးစုနဲၣ်ကျဲခီဖျိ အဝဲသ့ၣ် ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါ ဒီးမၤစၢၤအီၤ ဒ်သိးအကဆဲးတီဒီး ယဟိဝၤယွၤ.—ၡါ ၃၂:၁, ၂.
၂. ယဃ့းစက့လး ၃၄:၁၅, ၁၆ ပာ်ဖျါထီၣ်ဝဲလၢ ယဟိဝၤယွၤ အဲၣ်ဒိးမၤစၢၤ မတဂၤတဖၣ်လဲၣ်.
၂ ယဟိဝၤယွၤ သူၣ်အိၣ်သးအိၣ် အခ့အပှၤခဲလၢာ်, လီၤဆီဒၣ်တၢ် အခ့အပှၤလၢ အနီၢ်သးလီၤစၢ်တဖၣ်န့ၣ် အအဲၣ်ဒိး မၤစၢၤအဝဲသ့ၣ်ဒိၣ်မး. အဒိ ဒီပုၢ်ဝဲၢ်မုၣ်ခွါ တနီၤန့ၣ် ခီဖျိလၢ အဝဲသ့ၣ် မၤဘၣ်တၢ်ကမၣ်အဃိ အနီၢ်သးလီၤစၢ် ဒီးယဟိဝၤယွၤသူဝဲ တၢ်အိၣ်ဖှိၣ်သးပှၢ်တဖၣ် လၢကမၤစၢၤအီၤ. (ဖး ယဃ့းစက့လး ၃၄:၁၅, ၁၆.) ဘၣ်ဆၣ် ဖဲပလိၣ်ဘၣ် တၢ်မၤစၢၤ တဘျီဂ့ၤ တဘျီဂ့ၤအခါ ယဟိဝၤယွၤ အဲၣ်ဒိးလၢ ပကဃ့တၢ်မၤစၢၤ. အအဲၣ်ဒိးလၢ ပကဃ့ထုကဖၣ် လၢအအိၣ် ဒီးဃ့တၢ်မၤစၢၤလၢ “ပှၤကွၢ်သိ ဒီးပှၤသိၣ်လိတၢ်တဖၣ်” လၢတၢ်အိၣ်ဖှိၣ်အပူၤ.—အ့း ၄:၁၁, ၁၂.
၃. ပမ့ၢ်ဆိကမိၣ်ထံ တၢ်အိၣ်ဖှိၣ်သးပှၢ်တဖၣ် အတၢ်မၤစၢၤန့ၣ် ပကဒိးန့ၢ်ဘၣ် အဘျုးဒ်လဲၣ်.
၃ လၢတၢ်မၤလိအံၤ ပကတဲသကိး ဘၣ်ဃးဒီး ယဟိဝၤယွၤသူဝဲ တၢ်အိၣ်ဖှိၣ်သးပှၢ်တဖၣ် လၢကမၤစၢၤ ပှၤလၢအနီၢ်သး လီၤစၢ်တဖၣ်အဂ့ၢ်. ဒီးပကသ့ၣ်ညါဘၣ်စ့ၢ်ကီး တၢ်သံကွၢ်တဖၣ်အံၤ အတၢ်စံးဆၢ. ပကြၢးဃ့ တၢ်အိၣ်ဖှိၣ်သးပှၢ်တဖၣ် အတၢ်မၤစၢၤ လၢအခါဖဲလဲၣ်. ဘၣ်မနုၤအဃိ ပကြၢးဃ့ တၢ်အိၣ်ဖှိၣ်သးပှၢ်တဖၣ် အတၢ်မၤစၢၤလဲၣ်. ဒီးတၢ်အိၣ်ဖှိၣ်သးပှၢ်တဖၣ် မၤစၢၤပှၤဒ်လဲၣ်. ဘၣ်သ့ၣ်သ့ၣ် ခဲအံၤန့ၣ် ပတၢ်ရ့လိာ်သးဒီး ယဟိဝၤယွၤ ဂ့ၤဝဲဒိၣ်မး ဒီးပတလိၣ်ဘၣ် တၢ်အိၣ်ဖှိၣ်သးပှၢ်တဖၣ် အတၢ်မၤစၢၤဘၣ်. သနာ်က့ တၢ်မၤလိအံၤ ကမၤစၢၤပှၤဒ်သိး ပကပာ်လုၢ်ပာ်ပှ့ၤအါထီၣ် ယဟိဝၤယွၤ အတၢ်ရဲၣ်တၢ်ကျဲၤလၢ အသူဝဲ တၢ်အိၣ်ဖှိၣ်သးပှၢ်တဖၣ်လၢ ကမၤစၢၤပှၤ. ဒီးဖဲပလိၣ်ဘၣ် အဝဲသ့ၣ် တၢ်မၤစၢၤအခါ ပကဘၣ်မၤဒ်လဲၣ်န့ၣ် ပကသ့ၣ်ညါဘၣ်စ့ၢ်ကီး.
ပကြၢးဃ့ တၢ်အိၣ်ဖှိၣ်သးပှၢ်တဖၣ် အတၢ်မၤစၢၤ လၢအခါဖဲလဲၣ်
၄. ယၤကိာ် ၅:၁၄-၁၆, ၁၉, ၂၀ အဲၣ်ဒိးတဲဘၣ်ဃးဒီး ပှၤတဂၤလၢ အနီၢ်သးလီၤစၢ်န့ၣ် ပသ့ၣ်ညါဘၣ်ဒ်လဲၣ်. (ကွၢ်စ့ၢ်ကီးတၢ်ဂီၤ.)
၄ ယဟိဝၤယွၤသူဝဲ တၢ်အိၣ်ဖှိၣ်သးပှၢ်တဖၣ် လၢကမၤစၢၤပှၤဒ်လဲၣ်. ယ့ၣ်ၡူး အပျဲၢ်အဘီၣ် စီၤယၤကိာ် တဲဝဲ “လၢသုကျါန့ၣ် ပှၤလၢ အဘၣ်ဆူးဘၣ်ဆါ အိၣ်တဂၤဂၤဧါ. မ်အကိး တၢ်အိၣ်ဖှိၣ်သးပှၢ် တဖၣ်တက့ၢ်.” (ဖး ယၤကိာ် ၅:၁၄-၁၆, ၁၉, ၂၀.) စီၤယၤကိာ် အဲၣ်ဒိးတဲဝဲ ဘၣ်ဃးဒီး ပှၤတဂၤလၢ အနီၢ်သးလီၤစၢ် ဒီးကဘၣ် မၤဂ့ၤထီၣ်က့ၤ အတၢ်ရ့လိာ်သးဒီး ယဟိဝၤယွၤ. စီၤယၤကိာ် တဲဝဲလၢ ပှၤလၢ အဘၣ်ဆူးဘၣ်ဆါန့ၣ် အကဘၣ်ကိး တၢ်အိၣ်ဖှိၣ်သးပှၢ် ဒီးတဘၣ်ကိး ကသံၣ်သရၣ်ဘၣ်. ဒီးအၡဲပၠးဝဲလၢ ပှၤလၢ အဘၣ်ဆူးဘၣ်ဆါ တဂၤအံၤ ခီဖျိလၢ ကစၢ်ယွၤ ပျၢ်ကွံာ်အတၢ်ဒဲးဘးအဃိ အအိၣ်ဆူၣ်ထီၣ်က့ၤ. အဒိ ဖဲပဆိးက့အခါ ပလဲၤလၢ ကသံၣ်သရၣ်အအိၣ်, တဲပၠး ပတၢ်ဆါအဂ့ၢ် ဒီးပကဘၣ် ဒိကနၣ် ဒီးမၤထွဲ အတၢ်ဟံးစုနဲၣ်ကျဲ. ဒ်န့ၣ်အသိး ဖဲပနီၢ်သးလီၤစၢ်အခါ ပကဘၣ် လဲၤလၢ တၢ်အိၣ်ဖှိၣ်သးပှၢ်တဖၣ်အအိၣ်, တဲပၠးပတၢ်အိၣ်သး ဒီးမၤထွဲ အဝဲသ့ၣ် တၢ်ဟ့ၣ်ကူၣ်လၢ အဒိးသန့ၤထီၣ်သးလၢ လံာ်စီဆှံ.
ဖဲပဆိးက့အခါ ပလဲၤလၢ ကသံၣ်သရၣ်အအိၣ်. ဒ်န့ၣ်အသိး ဖဲပနီၢ်သးလီၤစၢ်အခါ ပကဘၣ်လဲၤလၢ တၢ်အိၣ်ဖှိၣ်သးပှၢ်အအိၣ် (ကွၢ်လံာ်အဆၢ ၄)
၅. ပတၢ်ရ့လိာ်သးဒီး ယဟိဝၤယွၤ ဂ့ၤဧါတဂ့ၤဧါန့ၣ် ပကသ့ၣ်ညါဒ်လဲၣ်.
၅ လၢယၤကိာ် အဆၢဒိၣ် ၅ န့ၣ် စီၤယၤကိာ် ဟ့ၣ်ဂံၢ်ဟ့ၣ်ဘါပှၤလၢ ဖဲပနီၢ်သးလီၤစၢ် ဒီးပဘၣ်မၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤအခါ ပကြၢးဃ့တၢ်မၤစၢၤလၢ တၢ်အိၣ်ဖှိၣ်သးပှၢ်တဖၣ်အအိၣ်. လီၤဆီဒၣ်တၢ် တချုးလၢ ပတၢ်ရ့လိာ်သးဒီး ယဟိဝၤယွၤ ဟးဂီၤဒံးဘၣ်န့ၣ် ပကြၢးဃ့ တၢ်မၤစၢၤ တဘျီဃီ. လံာ်စီဆှံ တဲဝဲလၢ ပမ့ၢ်တပလီၢ်သးဘၣ်န့ၣ် ပကဆိကမိၣ်လၢ ပတၢ်ရ့လိာ်သးဒီး ယဟိဝၤယွၤဂ့ၤဒံး ဒီးဆိကမိၣ်လၢ ပဒိးန့ၢ်ဘၣ် အတၢ်ဘၣ်သး. (ယၤ ၁:၂၂) လၢညါ ခရံာ်ဖိတနီၤလၢ ဝ့ၢ်စၢ်ဒံ အတၢ်အိၣ်ဖှိၣ်န့ၣ် အဝဲသ့ၣ် ဆိကမိၣ်ဝဲဒ်န့ၣ်. ဘၣ်ဆၣ် ယ့ၣ်ၡူး တဲအဝဲသ့ၣ်လၢ ယဟိဝၤယွၤ တဘၣ်သူၣ်ဘၣ်သး အဝဲသ့ၣ်လၢၤဘၣ်. (လီၣ် ၃:၁, ၂) အဃိ ပတၢ်ရ့လိာ်သးဒီး ယဟိဝၤယွၤ ဂ့ၤဧါတဂ့ၤဧါန့ၣ် ပကသ့ၣ်ညါဒ်လဲၣ်. ပကသ့ၣ်ညါအဂီၢ် ပကြၢးဆိကမိၣ်ထံ ဒီးထိၣ်သတြီၤ ပတၢ်အဲၣ်ယဟိဝၤယွၤ လၢအခီၣ်ထံး ဒီးပတၢ်အဲၣ်အီၤ လၢဆၢကတီၢ်ခဲအံၤ. (လီၣ် ၂:၄, ၅) ပသံကွၢ်လီၤသး ဒ်အံၤသ့. ‘ယဖးလံာ်စီဆှံ ဒီးဆိကမိၣ်ထံ တၢ်ဂ့ၢ်လၢယဖးတဖၣ် မုာ်ဒ်သိး လၢညါဧါ. ယထီၣ်တၢ်အိၣ်ဖှိၣ်ထီဘိ ဒီးကတဲာ်ကတီၤပာ် တၢ်ဂ့ၢ်ဂ့ၤဂ့ၤ ဒ်သိးလၢညါဧါ. ယစံၣ်တဲၤတဲလီၤတၢ် မုာ်ဒ်သိး လၢညါဧါ. ခဲအံၤ မ့ၢ်ယဆိကမိၣ် ကျိၣ်စ့အဂ့ၢ် အါန့ၢ်လၢညါဧါ.’ ပတၢ်အိၣ်သး မ့ၢ်အိၣ်ဒ်သိးဒီး တၢ်သံကွၢ်တဖၣ်အံၤ တဖျၢၣ်ဖျၢၣ်န့ၣ် ဘၣ်သ့ၣ်သ့ၣ် ပတၢ်ရ့လိာ်သးဒီး ယဟိဝၤယွၤ တဂ့ၤဒ်သိး လၢညါလၢၤဘၣ်. ဒီးပမ့ၢ်တမၤဂ့ၤထီၣ် တၢ်အိၣ်သး တဖၣ်အံၤဘၣ်န့ၣ် အကနးဒိၣ်ထီၣ်. ပကမၤဂ့ၤထီၣ် ပတၢ်ရ့လိာ်သးဒီး ယဟိဝၤယွၤအဂီၢ် ပမ့ၢ်လိၣ်ဘၣ် တၢ်မၤစၢၤ မ့တမ့ၢ် ဖဲပမၤဘၣ် တၢ်တမံၤမံၤလၢ ယဟိဝၤယွၤ တဘၣ်သးဝဲဘၣ်အခါ ပကြၢးဃ့ တၢ်အိၣ်ဖှိၣ်သးပှၢ် အတၢ်မၤစၢၤ.
၆. ပှၤတဂၤ မ့ၢ်မၤဘၣ် တၢ်ကမၣ်ဖးဒိၣ်န့ၣ် အကြၢးမၤမနုၤလဲၣ်.
၆ တၢ်ကမၣ်တနီၤန့ၣ် အကဲတၢ်ကမၣ်ဖးဒိၣ် ဒီးပှၤမၤတၢ်ကမၣ်ဖးဒိၣ် တဂၤ မ့ၢ်တပီၢ်ယၢ်လီၤက့ၤသးဘၣ်န့ၣ် ပှၤကထုးထီၣ်ကွံာ်အီၤလၢ တၢ်အိၣ်ဖှိၣ်ပူၤ. အဃိ ပမ့ၢ်မၤဘၣ် တၢ်ကမၣ်ဖးဒိၣ်န့ၣ် ပကဘၣ် လဲၤတဲတၢ်ဒီး တၢ်အိၣ်ဖှိၣ်သးပှၢ်. (၁ ကရံၣ် ၅:၁၁-၁၃) ပှၤလၢ အမၤဘၣ် တၢ်ကမၣ်ဖးဒိၣ်န့ၣ် အမၤဂ့ၤထီၣ်က့ၤ အတၢ်ရ့လိာ်သးဒီး ယဟိဝၤယွၤ လၢအနီၢ်ကစၢ် တသ့ဘၣ်. ဒီးအမ့ၢ် “မၤတၢ်လၢ အပာ်ဖျါထီၣ် တၢ်ပီၢ်ယၢ်လီၤက့ၤသး” နီၢ်ကီၢ်မး ယဟိဝၤယွၤ ကပျၢ်ကွံာ် အတၢ်ကမၣ်. (မၤတၢ် ၂၆:၂၀) ပမၤတၢ်လၢ အပာ်ဖျါထီၣ် တၢ်ပီၢ်ယၢ်လီၤက့ၤသးန့ၣ် ပၣ်ဃုာ်ဒီး ပတဲဘၣ် တၢ်အိၣ်ဖှိၣ်သးပှၢ်လၢ ပမၤဘၣ် တၢ်ကမၣ်ဖးဒိၣ်.
၇. ပှၤလၢအနီၢ်သးလီၤစၢ်န့ၣ် ဘၣ်မနုၤအဃိ အကြၢးဃ့ တၢ်အိၣ်ဖှိၣ်သးပှၢ် အတၢ်မၤစၢၤလဲၣ်.
၇ တၢ်အိၣ်ဖှိၣ်သးပှၢ်တဖၣ် မၤစၢၤ ပှၤလၢအမၤဘၣ် တၢ်ကမၣ်ဖးဒိၣ် တကးဒံးဘၣ် အဝဲသ့ၣ် မၤစၢၤစ့ၢ်ကီး ပှၤလၢအနီၢ်သးလီၤစၢ်. (မၤတၢ် ၂၀:၃၅) အဒိ ဘၣ်သ့ၣ်သ့ၣ် နကဆိကမိၣ်လၢ နတြီဆၢကွံာ် တၢ်သူၣ်လီသးကွံ လၢအတဂ့ၤဘၣ် တန့ၢ်လၢၤဘၣ်. ဘၣ်သ့ၣ်သ့ၣ် တချုးလၢ နသ့ၣ်ညါ တၢ်မ့ၢ်တၢ်တီ ဒံးဘၣ်န့ၣ် နစွဲတၢ်မူၤတၢ်ဘှီး, နကွၢ်တၢ်ဂီၤဘ့ၣ်ဆ့ မ့တမ့ၢ် နမၤကမၣ်မုၣ်ကမၣ်ခွါ. အဃိ နကတြီဆၢကွံာ် တၢ်သူၣ်လီသးကွံ လၢအတဂ့ၤဘၣ်အဂီၢ် ကကီဘၣ်နၤဒိၣ်မး. ဘၣ်ဆၣ် နကဃ့တၢ်မၤစၢၤအဂီၢ် နတလိၣ် ဘၣ်ယိၣ်တၢ်ဘၣ်. နတဲသကိးတၢ်ဒီး တၢ်အိၣ်ဖှိၣ်သးပှၢ် တဂၤဂၤလၢ အကဒိကနၣ်န့ၢ်နၤ ဂ့ၤဂ့ၤသ့. တၢ်အိၣ်ဖှိၣ်သးပှၢ်အံၤ ကဟ့ၣ်ကူၣ်နၤ ဒီးကဒုးသ့ၣ်နီၣ်ထီၣ်နၤလၢ နမ့ၢ်ဆဲးတြီဆၢကွံာ် တၢ်သူၣ်လီသးကွံ လၢအတဂ့ၤဘၣ်န့ၣ် ယဟိဝၤယွၤ ကသးခုဒိၣ်မး. (စံၣ် ၄:၁၂) ခီဖျိလၢ နဘၣ်ဆဲးတြီဆၢကွံာ် နတၢ်သူၣ်လီသးကွံ လၢအတဂ့ၤဘၣ်အဃိ ဘၣ်သ့ၣ်သ့ၣ် နသးကဟးဂီၤ. ဖဲန့ၣ်အခါ တၢ်အိၣ်ဖှိၣ်သးပှၢ် ကဒုးသ့ၣ်နီၣ်ထီၣ်နၤလၢ ခီဖျိလၢ နဃ့တၢ်မၤစၢၤအဃိ ယဟိဝၤယွၤ သးခုဒိၣ်မး ဒီးနပာ်ဖျါထီၣ်လၢ နတနာ်န့ၢ်လီၤသး အါတလၢဘၣ် ဒီးနအဲၣ်ဒိး မၤသးခု ယဟိဝၤယွၤအသး.—၁ ကရံၣ် ၁၀:၁၂.
၈. ဘၣ်မနုၤအဃိ ပတလိၣ်တဲဘၣ် တၢ်အိၣ်ဖှိၣ်သးပှၢ်လၢ တၢ်ကမၣ်ကိးမံၤဒဲး လၢပမၤဘၣ်လဲၣ်.
၈ တၢ်ကမၣ်တနီၤန့ၣ် အတကဲ တၢ်ကမၣ်ဖးဒိၣ်ဘၣ်အဃိ ပတလိၣ်တဲဘၣ် တၢ်အိၣ်ဖှိၣ်သးပှၢ်ဘၣ်. အဒိ နတဲတၢ်လၢ အမၤဘၣ်ဒိ ဒီပုၢ်ဝဲၢ်မုၣ်ခွါ တဂၤဂၤအသး ဒီးဘၣ်သ့ၣ်သ့ၣ် နသးဒိၣ်ထီၣ်အီၤ ဒိၣ်မး. ဖဲန့ၣ်အခါ နတလိၣ်လဲၤဃ့ တၢ်မၤစၢၤလၢ တၢ်အိၣ်ဖှိၣ်သးပှၢ် အအိၣ်ဘၣ်. နမၤထွဲ ယ့ၣ်ၡူး အတၢ်ဟ့ၣ်ကူၣ် ဒီးလဲၤတဲတၢ်ဒီးအီၤ ဒီးဃ့ဝံသးစူၤအီၤသ့. (မး ၅:၂၃, ၂၄) ဒီးဒ်သိး နကမၤအါထီၣ် တၢ်သူၣ်စူၤသးစူၤ, တၢ်ဝံသးစူၤ ဒီးတၢ်ပၢၤသူၣ်ပၢၤသးအဂီၢ် နဃုသ့ၣ်ညါအါထီၣ် တၢ်ဂ့ၤတၢ်ဝါတဖၣ်အံၤလၢ လံာ်လဲၢ်လၢ ပတၢ်ကရၢကရိ ထုးထီၣ်ဝဲ အပူၤသ့. ဘၣ်ဆၣ် နမ့ၢ်လိၣ်ဘၣ်ဒံး တၢ်မၤစၢၤန့ၣ် နဃ့တၢ်အိၣ်ဖှိၣ်သးပှၢ် တဂၤဂၤ အတၢ်မၤစၢၤသ့. အဒိ လၢညါ ဖဲနီၢ်အူၤအိဒံၤ ဒီးနီၢ်စူၣ်တူဃ့ၤ မၤဘၣ်ဂီၢ်က့ၤ အတၢ်ဂ့ၢ်ကီ တန့ၢ်ဘၣ်အခါ စီၤပီလူးမၢဝဲ ဒီပုၢ်ဝဲၢ်ခွါတဂၤ မၤစၢၤအဝဲသ့ၣ်. တၢ်အိၣ်ဖှိၣ်သးပှၢ် တဂၤဂၤ လၢနတၢ်အိၣ်ဖှိၣ်န့ၣ် မၤစၢၤနၤဒ်န့ၣ် သ့စ့ၢ်ကီး.—ဖံလံး ၄:၂, ၃.
ဘၣ်မနုၤအဃိ ပကြၢးဃ့ တၢ်အိၣ်ဖှိၣ်သးပှၢ်တဖၣ် အတၢ်မၤစၢၤလဲၣ်
၉. ပမၤတၢ်ကမၣ်အဃိ ပမ့ၢ်မဲာ်ဆှးသနာ်က့ ဘၣ်မနုၤအဃိ ပကြၢးဃ့ တၢ်အိၣ်ဖှိၣ်သးပှၢ် အတၢ်မၤစၢၤဒံးလဲၣ်. (ကတိၤဒိ ၂၈:၁၃)
၉ ဖဲပမၤဘၣ် တၢ်ကမၣ်ဖးဒိၣ် မ့တမ့ၢ် ဖဲပဆိကမိၣ်လၢ ပတြီဆၢကွံာ် ပတၢ်သူၣ်လီသးကွံ လၢအတဂ့ၤဘၣ် တန့ၢ်လၢၤဘၣ်အခါ ပကဃ့ တၢ်မၤစၢၤအဂီၢ် ပကဘၣ်အိၣ်ဒီး တၢ်နာ်ဒီးတၢ်သးဒူ. ဒီးပကဃ့ တၢ်အိၣ်ဖှိၣ်သးပှၢ် အတၢ်မၤစၢၤအဂီၢ် ပတလိၣ် မဲာ်ဆှးဘၣ်. ဘၣ်မနုၤအဃိ ပကြၢးဃ့ တၢ်မၤစၢၤလဲၣ်. ဒ်သိး ပတၢ်ရ့လိာ်သးဒီး ယဟိဝၤယွၤ ကဂၢၢ်ကျၢၤအဂီၢ် ယဟိဝၤယွၤသူဝဲ တၢ်အိၣ်ဖှိၣ်သးပှၢ် လၢကမၤစၢၤပှၤ. အဃိ ဖဲပဃ့တၢ်မၤစၢၤလၢ တၢ်အိၣ်ဖှိၣ်သးပှၢ် အအိၣ်အခါ ပပာ်ဖျါထီၣ်လၢ ပနာ်န့ၢ်ယဟိဝၤယွၤ ဒီးပဒိကနၣ် အကလုၢ်. တကးဒံးဘၣ် ဒ်သိးပကဆဲးမၤ တၢ်လၢအဘၣ်အဂီၢ် ပသ့ၣ်ညါလၢ ပလိၣ်ဘၣ် ယဟိဝၤယွၤ အတၢ်မၤစၢၤ. (စံး ၉၄:၁၈) ပမ့ၢ်အၢၣ်လီၤ ပတၢ်ကမၣ် ဒီးတမၤကမၣ်တၢ် လၢၤဘၣ်န့ၣ် ပနာ်သ့ သပှၢ်တၢၢ်လၢ ယဟိဝၤယွၤ ကပျၢ်ကွံာ် ပတၢ်ကမၣ်.—ဖး ကတိၤဒိ ၂၈:၁၃.
၁၀. ဖဲပမၤဘၣ် တၢ်ကမၣ်ဖးဒိၣ်အခါ ပမ့ၢ်တတဲဘၣ် တၢ်အိၣ်ဖှိၣ်သးပှၢ်န့ၣ် တၢ်ကကဲထီၣ်သးဒ်လဲၣ်.
၁၀ ဖဲပမၤဘၣ် တၢ်ကမၣ်ဖးဒိၣ်အခါ ပမ့ၢ်တဲဘၣ် တၢ်အိၣ်ဖှိၣ်သးပှၢ်န့ၣ် ယဟိဝၤယွၤ ကပျၢ်ကွံာ် ပတၢ်ကမၣ် ဒီးပတၢ်ရ့လိာ်သးဒီးအီၤ ဂ့ၤထီၣ်က့ၤသ့. ဘၣ်ဆၣ် ပမ့ၢ်တတဲဘၣ် တၢ်အိၣ်ဖှိၣ်သးပှၢ်ဘၣ်န့ၣ် ပကထံၣ်ဘၣ် တၢ်ကီတၢ်ခဲ နးန့ၢ်အလီၢ်ဒံး. အဒိ ဖဲစီၤဒၤဝံး မၤဘၣ် တၢ်ကမၣ်ဖးဒိၣ်အခါ အတတဲဖျါထီၣ် အတၢ်ကမၣ်ဘၣ် အိၣ်တတီၤဖိညါ. အဃိ အသးလီၤစၢ် ဒီးခီဖျိလၢ အသ့ၣ်ညါဝဲလၢ အတၢ်ရ့လိာ်သးဒီး ယဟိဝၤယွၤ တဂ့ၤလၢၤဘၣ်အဃိ အတူၢ်ဘၣ်တမုာ်ဘၣ်. (စံး ၃၂:၃-၅) ဖဲပဆိးက့ မ့တမ့ၢ် ပဘၣ်ဒိအခါ ပမ့ၢ်တကူစါသး တဘျီဃီဘၣ်န့ၣ် ပတၢ်ဆါ ကနးဒိၣ်ထီၣ်. ဒ်န့ၣ်အသိး ဖဲပမၤဘၣ် တၢ်ကမၣ်ဖးဒိၣ်အခါ ပမ့ၢ်တဃ့ တၢ်အိၣ်ဖှိၣ်သးပှၢ်တဖၣ် အတၢ်မၤစၢၤ တဘျီဃီဘၣ်န့ၣ် ပတၢ်ရ့လိာ်သးဒီး ယဟိဝၤယွၤ ကဟးဂီၤ. ယဟိဝၤယွၤ တအဲၣ်ဒိးလၢ တၢ်ကကဲထီၣ်သးဒီးပှၤ ဒ်အံၤဘၣ်. အဃိ အဟ့ၣ်ဂံၢ်ဟ့ၣ်ဘါပှၤလၢ ပကလဲၤတဲတၢ်ဒီး တၢ်အိၣ်ဖှိၣ်သးပှၢ်တဖၣ် လၢအသူဝဲဒ်သိး ကမၤစၢၤပှၤလၢ ပကမၤဂ့ၤထီၣ်က့ၤ ပတၢ်ရ့လိာ်သးဒီးအီၤ.—ၡါ ၁:၅, ၆, ၁၈.
၁၁. ပမ့ၢ်တတဲဖျါထီၣ် တၢ်ကမၣ်ဖးဒိၣ်ဘၣ်န့ၣ် တၢ်ကကဲထီၣ်သးဒ်လဲၣ်.
၁၁ ပမ့ၢ်မၤဘၣ် တၢ်ကမၣ်ဖးဒိၣ် ဒီးတတဲဘၣ် တၢ်အိၣ်ဖှိၣ်သးပှၢ်ဘၣ်န့ၣ် ဘၣ်သ့ၣ်သ့ၣ် ပကမၤဘၣ်ဒိစ့ၢ်ကီး ပှၤအဂၤ. အဒိ ဘၣ်သ့ၣ်သ့ၣ် ပတဒိးန့ၢ်ဘၣ် ယဟိဝၤယွၤ အသးစီဆှံလၢၤဘၣ်အဃိ ပကမၤဘၣ်ဒိဘၣ် တၢ်အိၣ်ဖှိၣ်ဒီတဖု. ဒီးလၢဒီပုၢ်ဝဲၢ်မုၣ်ခွါ အကျါစ့ၢ်ကီး တၢ်ဃူတၢ်ဖိး တအိၣ်လၢၤဘၣ်. (အ့း ၄:၃၀) ဒ်န့ၣ်အသိး ပမ့ၢ်သ့ၣ်ညါလၢ ဒီပုၢ်ဝဲၢ်မုၣ်ခွါတဂၤဂၤ လၢတၢ်အိၣ်ဖှိၣ်အပူၤ မၤဘၣ် တၢ်ကမၣ်ဖးဒိၣ်န့ၣ် ပကြၢး ဟ့ၣ်ဂံၢ်ဟ့ၣ်ဘါအီၤလၢ အကလဲၤတဲတၢ်ဒီး တၢ်အိၣ်ဖှိၣ်သးပှၢ်.a အမ့ၢ်တလဲၤတဲဝဲဘၣ်န့ၣ် ပကြၢးလဲၤတဲဘၣ် တၢ်အိၣ်ဖှိၣ်သးပှၢ်. ပမ့ၢ်တလဲၤတဲဘၣ်န့ၣ် လီၤဂာ်ဒ်သိးဒီး ပမၤကမၣ်စ့ၢ်ကီး ယဟိဝၤယွၤ. (၃ မိၤ ၅:၁) ဘၣ်ဆၣ် ပမ့ၢ်လဲၤတဲဘၣ် တၢ်အိၣ်ဖှိၣ်သးပှၢ်န့ၣ် ပပာ်ဖျါထီၣ်လၢ ပအဲၣ်ယဟိဝၤယွၤ. တကးဒံးဘၣ် ပဒီသဒၢ ဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်အပူၤ ဒီးမၤစၢၤ ပှၤလၢ အမၤကမၣ်ဘၣ်တၢ်တဂၤလၢ အကမၤဂ့ၤထီၣ်က့ၤ အတၢ်ရ့လိာ်သးဒီး ယဟိဝၤယွၤ.
တၢ်အိၣ်ဖှိၣ်သးပှၢ်တဖၣ် မၤစၢၤပှၤဒ်လဲၣ်
၁၂. ပှၤလၢအနီၢ်သးလီၤစၢ်န့ၣ် တၢ်အိၣ်ဖှိၣ်သးပှၢ်တဖၣ် မၤစၢၤအဝဲသ့ၣ်ဒ်လဲၣ်.
၁၂ လံာ်စီဆှံဟ့ၣ်ကူၣ် တၢ်အိၣ်ဖှိၣ်သးပှၢ်တဖၣ်လၢ ကမၤစၢၤ ပှၤလၢအနီၢ်သးလီၤစၢ်. (၁ သ့း ၅:၁၄) နမ့ၢ်မၤဘၣ် တၢ်ကမၣ်န့ၣ် ဒ်သိး တၢ်အိၣ်ဖှိၣ်သးပှၢ်တဖၣ် ကနၢ်ပၢၢ် နတၢ်ထံၣ် ဒီးနတၢ်တူၢ်ဘၣ်အဂီၢ် ဘၣ်သ့ၣ်သ့ၣ် အဝဲသ့ၣ် ကသံကွၢ်နၤ တၢ်သံကွၢ်. (ကတိၤ ၂၀:၅) ဒီးခီဖျိလၢ နတၢ်ဆဲးတၢ်လၤ, နတၢ်ပာ်သူၣ်ပာ်သး မ့တမ့ၢ် ခီဖျိလၢ နမဲာ်ဆှးလၢ နတၢ်ကမၣ်အဃိ ဘၣ်သ့ၣ်သ့ၣ် နတဲဘၣ်အဝဲသ့ၣ် တၢ်ဂ့ၢ်တၢ်ကျိၤပျီပျီ တဘူၣ်ဘၣ်. ဘၣ်ဆၣ် နမ့ၢ်တဲဘၣ် အဝဲသ့ၣ်န့ၣ် အဝဲသ့ၣ် ကနၢ်ပၢၢ်ထီၣ် နတၢ်ထံၣ် ဒီးနတၢ်တူၢ်ဘၣ်. ဒီးနမ့ၢ်ဆိကမိၣ်လၢ နက “ဟးတဲကြီတၢ်” သနာ်က့ နတလိၣ် ဘၣ်ယိၣ်ဘၣ်. (ဘး ၆:၃) ဒ်သိး တၢ်အိၣ်ဖှိၣ်သးပှၢ်တဖၣ် ကသ့ၣ်ညါဘၣ် တၢ်ဂ့ၢ်တၢ်ကျိၤ ခဲလၢာ်အဂီၢ် တချုးလၢ အဝဲသ့ၣ် ဆၢတဲာ်တၢ်ဒံးဘၣ်န့ၣ် အဝဲသ့ၣ် ကဒိကနၣ်န့ၢ်နၤထံထံ. ဝံၤဒီး အဝဲသ့ၣ် ကဟ့ၣ်ကူၣ်နၤ. (ကတိၤ ၁၈:၁၃) တၢ်အိၣ်ဖှိၣ်သးပှၢ်တဖၣ် သ့ၣ်ညါဝဲလၢ အဝဲသ့ၣ် ကမၤစၢၤ တၢ်အိၣ်ဖှိၣ်ဖိလၢ အလိၣ်ဘၣ် တၢ်မၤစၢၤအဂီၢ် အဝဲသ့ၣ် ကဘၣ်ဟ့ၣ် တၢ်ဆၢကတီၢ်အါမး. အဃိ ဒ်သိး အဝဲသ့ၣ်မၤစၢၤ ပှၤမၤကမၣ်တၢ်တဂၤ ကသ့အဂီၢ် အဝဲသ့ၣ်ကဘၣ် တဲသကိးတၢ်ဒီးအီၤ အါန့ၢ်ဒံးတဘျီ.
၁၃. တၢ်အိၣ်ဖှိၣ်သးပှၢ်တဖၣ် အတၢ်ဃ့ထုကဖၣ် ဒီးအတၢ်ဟ့ၣ်ကူၣ်လၢ အဒိးသန့ၤထီၣ်သးလၢ လံာ်စီဆှံန့ၣ် မၤစၢၤပှၤသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၃ ဒ်သိး နသးတဘၣ်ဒိလၢ နတၢ်ကမၣ်အဃိ အါတလၢတဂ့ၤအဂီၢ် ဖဲနလဲၤတဲတၢ်ဒီး တၢ်အိၣ်ဖှိၣ်သးပှၢ်တဖၣ်အခါ အဝဲသ့ၣ် ကမၤစၢၤနၤ ဒီးကဃ့ထုကဖၣ်န့ၢ်တၢ် လၢနဂီၢ်. ယဟိဝၤယွၤ ကဒိကနၣ် အဝဲသ့ၣ် အတၢ်ထုကဖၣ် လၢအအိၣ်ဒီး “အစိအကမီၤလၢ အကမၤစၢၤတၢ်အဂီၢ်.” အဃိ နသးကမုာ်ထီၣ်က့ၤ ဒီးနကဒိးန့ၢ်ဘၣ် တၢ်ဂံၢ်တၢ်ဘါအါမး. အဝဲသ့ၣ် က “ဖှူ [နၤ] လၢသိ လၢယဟိဝၤယွၤ အမံၤအပူၤ.” (ယၤ ၅:၁၄-၁၆) “သိ” အံၤ အဲၣ်ဒိးတဲဝဲ တၢ်မ့ၢ်တၢ်တီ လၢအအိၣ်လၢ လံာ်စီဆှံအပူၤ. အဃိ တၢ်အိၣ်ဖှိၣ်သးပှၢ်တဖၣ် ကတဲသကိး လံာ်စီဆှံအဆၢတဖၣ်လၢ ကမၤမုာ်ထီၣ်နသး ဒီးကမၤစၢၤနၤဒ်သိး နတၢ်ရ့လိာ်သးဒီး ယဟိဝၤယွၤ ကဂ့ၤထီၣ်က့ၤ. (ၡါ ၅၇:၁၈) ဒီးအဝဲသ့ၣ် အတၢ်ဟ့ၣ်ကူၣ်လၢ အဒိးသန့ၤထီၣ်သးလၢ လံာ်စီဆှံန့ၣ် ကမၤစၢၤနၤလၢ နကဆဲးမၤ တၢ်လၢအဘၣ်. တၢ်အိၣ်ဖှိၣ်သးပှၢ်တဖၣ် ကမၤစၢၤနၤဒ်သိး နကနၢ်ဟူ ယဟိဝၤယွၤ အတၢ်ကတိၤ လၢအတဲနၤလၢ “ကျဲအိၣ်လၢအံၤ. ဟးလၢကျဲတဘိအံၤ.”—ၡါ ၃၀:၂၁.
တၢ်အိၣ်ဖှိၣ်သးပှၢ်တဖၣ် သူဝဲလံာ်စီဆှံ ဒ်သိး ကမၤမုာ်ထီၣ်က့ၤပသး ဒီးဟ့ၣ်ဂံၢ်ဟ့ၣ်ဘါပှၤ (ကွၢ်လံာ်အဆၢ ၁၃-၁၄)
၁၄. ခရံာ်ဖိတဂၤ “ခါထီၣ်အခီၣ်ခါ မ့ၢ်ကမၣ်” န့ၣ် တၢ်အိၣ်ဖှိၣ်သးပှၢ်တဖၣ် ကမၤစၢၤအီၤဒ်လဲၣ်. (ကလၤတံ ၆:၁) (ကွၢ်စ့ၢ်ကီးတၢ်ဂီၤ.)
၁၄ ဖး ကလၤတံ ၆:၁. ခရံာ်ဖိတဂၤ “ခါထီၣ်အခီၣ်ခါ မ့ၢ်ကမၣ်” န့ၣ် အတမၤတၢ်လၢ အဘၣ်ယဟိဝၤယွၤ အသးဘၣ်. ဘၣ်သ့ၣ်သ့ၣ် အဆၢတဲာ်ကမၣ်ဘၣ်တၢ် မ့တမ့ၢ် မၤဘၣ် တၢ်ကမၣ်ဖးဒိၣ်. ခီဖျိလၢ တၢ်အိၣ်ဖှိၣ်သးပှၢ်တဖၣ် အဲၣ်ဝဲဒီပုၢ်ဝဲၢ်မုၣ်ခွါအဃိ အဝဲသ့ၣ် “ဂုာ်ကျဲးစၢး ဘှီဘၣ်ထီၣ်က့ၤ ပှၤဒ်န့ၣ်အသိးတဂၤ လၢတၢ်သးစူၤ.” ကြံးအတၢ်ကတိၤလၢ ပှၤကွဲးကျိာ်ထံက့ၤလၢ “ဘှီဘၣ်ထီၣ်က့ၤ” န့ၣ် အဲၣ်ဒိးတဲစ့ၢ်ကီးဝဲ အဒိ ဒ်သိးဒီး ပှၤတဂၤလၢ အဃံတပျာ်န့ၣ် ဒ်သိးအဃံ ကအိၣ်က့ၤလၢ အလီၢ်အဂီၢ် ကသံၣ်သရၣ် မၤဘၣ်ထီၣ်န့ၢ်အီၤ. ဒီးဒ်သိး အဃံတဆါနးထီၣ် တဂ့ၤအဂီၢ် ဖဲကသံၣ်သရၣ် မၤဘၣ်ထီၣ်န့ၢ် အဃံအခါ အကဖီၣ်ဝဲ ကယီကယီ ဒီးကပလီၢ်အသး. ဒ်န့ၣ်အသိး ဖဲတၢ်အိၣ်ဖှိၣ်သးပှၢ်တဖၣ် ဂုာ်ကျဲးစၢးမၤစၢၤ ဒီပုၢ်ဝဲၢ်မုၣ်ခွါလၢ အခါထီၣ်အခီၣ်ခါ လၢအကမၣ်အခါ ဒ်သိး ဒီပုၢ်ဝဲၢ်တဂၤန့ၣ် တတူၢ်ဘၣ်တၢ် နးထီၣ်တဂ့ၤအဂီၢ် တၢ်အိၣ်ဖှိၣ်သးပှၢ်တဖၣ် ပလီၢ်အသးစ့ၢ်ကီး. ဒီးအဝဲသ့ၣ် ဂုာ်ကျဲးစၢး ဘှီဘၣ်ထီၣ်က့ၤ ဒီပုၢ်ဝဲၢ်တဂၤန့ၣ် လၢတၢ်အဲၣ်တၢ်ကွံ. လံာ်စီဆှံ ဟ့ၣ်ပလီၢ်စ့ၢ်ကီး တၢ်အိၣ်ဖှိၣ်သးပှၢ်တဖၣ်လၢ က “ကွၢ်လီၤစ့ၢ်ကီး [အနီၢ်ကစၢ် အသး].” ဖဲတၢ်အိၣ်ဖှိၣ်သးပှၢ်တဖၣ် မၤစၢၤ ပှၤဂၤအခါ အဝဲသ့ၣ် ကြၢးသ့ၣ်နီၣ်ထီၣ်စ့ၢ်ကီးလၢ အဝဲသ့ၣ် တကဲပှၤလၢပှၤပှဲၤဘၣ် ဒီးအကဆၢတဲာ် ကမၣ်ဘၣ်တၢ်စ့ၢ်ကီး. အဃိ အဝဲသ့ၣ် ကပာ်ဖျါထီၣ် တၢ်ဆီၣ်လီၤသး ဒီးတၢ်ဒိသူၣ်ဒိသး. (၁ ပ့း ၃:၈) ဒီးအဝဲသ့ၣ် တထံၣ်လီၤသးလၢ အဂ့ၤဒိၣ်န့ၢ်ဒံး ပှၤတဂၤလၢ အဝဲသ့ၣ် ဂုာ်ကျဲးစၢးမၤစၢၤဝဲန့ၣ်ဘၣ်.
၁၅. ပတၢ်ကီတၢ်ခဲ မ့ၢ်အိၣ်တမံၤမံၤန့ၣ် ပကဘၣ် မၤဒ်လဲၣ်.
၁၅ တၢ်အိၣ်ဖှိၣ်သးပှၢ်တဖၣ် လၢပတၢ်အိၣ်ဖှိၣ်ပူၤန့ၣ် ပနာ်န့ၢ်အီၤသ့. အဝဲသ့ၣ် ဒိးန့ၢ်ဘၣ် တၢ်သိၣ်လိလၢ အတကြၢးတဲဖျါထီၣ် ပှၤဂၤအတၢ်ဂ့ၢ်ခူသူၣ်ဘၣ်, အဝဲသ့ၣ် တကြၢးတဲဘၣ်ပှၤလၢ အနီၢ်ကစၢ် အတၢ်ထံၣ်ဘၣ်, ဘၣ်ဆၣ် အဝဲသ့ၣ် အတၢ်ဟ့ၣ်ကူၣ်န့ၣ် ကြၢးဒိးသန့ၤထီၣ်သးလၢ လံာ်စီဆှံ. ဒီးဒ်သိးပလဲၤခီဖျိ ပတၢ်ကီတၢ်ခဲကန့ၢ်အဂီၢ် တၢ်အိၣ်ဖှိၣ်သးပှၢ်တဖၣ် သ့ၣ်ညါဝဲလၢ အဝဲသ့ၣ် ကဘၣ်ဆဲးမၤစၢၤပှၤ. (ကတိၤ ၁၁:၁၃; ကလၤ ၆:၂) တၢ်အိၣ်ဖှိၣ်သးပှၢ်တဖၣ် အတၢ်ပာ်သူၣ်ပာ်သး ဒီးအတၢ်လဲၤခီဖျိ တဒ်သိးလိာ်သးဘၣ် သနာ်က့ ပတၢ်ကီတၢ်ခဲ မ့ၢ်အိၣ်တမံၤမံၤန့ၣ် ပလဲၤတဲတၢ်ဒီး အဝဲသ့ၣ် တဂၤဂၤသ့. ဘၣ်ဆၣ် ဖဲပဃ့တၢ်ဟ့ၣ်ကူၣ်အခါ ပကဘၣ် ပလီၢ်သး. ပတဘၣ် ဃ့တၢ်ဟ့ၣ်ကူၣ်လၢ တၢ်အိၣ်ဖှိၣ်သးပှၢ် တဂၤဝံၤတဂၤအအိၣ် ဒီးမုၢ်လၢ်လၢ အဝဲသ့ၣ်တဂၤဂၤ ကတဲပှၤတၢ်လၢ အဘၣ်ပသးန့ၣ်ဘၣ်. ပမ့ၢ်မၤဒ်န့ၣ်န့ၣ် ပကလီၤဂာ်ဒီး ပှၤလၢ အအဲၣ်ဒိးနၢ်ဟူ တၢ်လၢ “အဘၣ်အဝဲသ့ၣ် အနၢ်” ဒီးတမၤလိန့ၢ် “တၢ်သိၣ်လိလၢအဂ့ၤအဘၣ်” လၢလံာ်စီဆှံအပူၤဘၣ်. (၂ တံၤ ၄:၃) ဖဲပဃ့ တၢ်ဟ့ၣ်ကူၣ်လၢ တၢ်အိၣ်ဖှိၣ်သးပှၢ် တဂၤဂၤ အအိၣ်အခါ ဘၣ်သ့ၣ်သ့ၣ် အကသံကွၢ်ပှၤလၢ ဘၣ်ဃးဒီး တၢ်ဂ့ၢ်အံၤ မ့ၢ်ပတဲသကိးတၢ်ဒီး တၢ်အိၣ်ဖှိၣ်သးပှၢ် အဂၤတဖၣ် စ့ၢ်ကီးဧါ ဒီးအဝဲသ့ၣ် ဟ့ၣ်ကူၣ်ပှၤဒ်လဲၣ်. တၢ်အိၣ်ဖှိၣ်သးပှၢ်အံၤ ကပာ်ဖျါထီၣ် တၢ်ဆီၣ်လီၤသး ခီဖျိ အဃ့တၢ်ဟ့ၣ်ကူၣ်လၢ တၢ်အိၣ်ဖှိၣ်သးပှၢ် အဂၤတဂၤအအိၣ်.—ကတိၤ ၁၃:၁၀.
ပနီၢ်ကစၢ်မူဒါ
၁၆. ပအိၣ်ဒီး ပနီၢ်ကစၢ်မူဒါဒ်လဲၣ်.
၁၆ ပတၢ်ကီတၢ်ခဲ မ့ၢ်အိၣ်တမံၤမံၤန့ၣ် တၢ်အိၣ်ဖှိၣ်သးပှၢ်တဖၣ် ကဟ့ၣ်ကူၣ်ပှၤ ဒီးမၤစၢၤပှၤ. ဘၣ်ဆၣ် အဝဲသ့ၣ် တတဲပှၤလၢ ပကဘၣ်မၤ ဒ်အံၤဒ်န့ၣ်ဘၣ်. ပဝဲကိးဂၤဒဲးန့ၣ် ပအိၣ်ဒီး ပနီၢ်ကစၢ်မူဒါလၢ ပကပာ်ဖျါထီၣ်လၢ ပအဲၣ်ယဟိဝၤယွၤ ဒီးမၤတၢ်လၢ အဘၣ်အသး ခီဖျိ ပတၢ်ကတိၤ ဒီးပတၢ်မၤ. ဒီးဒ်သိး ပကဆၢတဲာ် တၢ်လၢအဘၣ် ဒီးကဆဲးတီဒီးအီၤအဂီၢ် အကမၤစၢၤပှၤ. (ရိ ၁၄:၁၂) အဃိ တၢ်အိၣ်ဖှိၣ်သးပှၢ်တဖၣ် တတဲပှၤလၢ ပကဘၣ်မၤ ဒ်အံၤဒ်န့ၣ်ဘၣ်. အဝဲသ့ၣ် ကသူလံာ်စီဆှံ ဒ်သိးကမၤစၢၤပှၤလၢ ပကနၢ်ပၢၢ်ထီၣ် ယဟိဝၤယွၤ အတၢ်ထံၣ် ဘၣ်ဃးဒီး တၢ်ဂ့ၢ်တမံၤမံၤ ဒီးအဝဲသ့ၣ် ကပျဲလၢ ပကဆၢတဲာ်တၢ်လၢ ပနီၢ်ကစၢ်. ဖဲပဆိကမိၣ်ထံ ဒီးမၤထွဲ အဝဲသ့ၣ် တၢ်ဟ့ၣ်ကူၣ်လၢ အဒိးသန့ၤထီၣ်သးလၢ လံာ်စီဆှံအခါ မ့ၢ်ဒၣ် ပမၤလိသ့ထီၣ်သးလၢ ပ “ကဆိကမိၣ်ထံတၢ်” ဒီးပကဆၢတဲာ်တၢ် လၢအဘၣ်.—ဧ့ၤ ၅:၁၄.
၁၇. ယဟိဝၤယွၤ အဲၣ်ဒိးလၢ ပကမၤမနုၤလဲၣ်.
၁၇ ယဟိဝၤယွၤ သူၣ်အိၣ်သးအိၣ်ပှၤ ဒီးကဟုကယာ်ပှၤ ဂ့ၤမးအဃိ ပသးခုဒိၣ်မး. ဒ်သိး ပကအိၣ်မူဘၣ် လီၤထူလီၤယိာ် အဂီၢ် ယဟိဝၤယွၤ ဆှၢလီၤ ယ့ၣ်ၡူး လၢအမ့ၢ် “ပှၤကွၢ်သိလၢ အဂ့ၤ” လၢကဟ့ၣ်လုၢ်ထီၣ်အသးသမူ လၢပဂီၢ်. (ယိၤ ၁၀:၁၁) တကးဒံးဘၣ် ယဟိဝၤယွၤ အၢၣ်လီၤပှၤ ဒီးတဲဝဲလၢ “ယကဟ့ၣ်လီၤသု ပှၤကွၢ်သိတဖၣ်လၢ အမၤဒ် ယတၢ်ဘၣ်သးအသိး ဒီးအဝဲသ့ၣ် ကဒုးအီၣ်သုလၢ တၢ်သ့ၣ်ညါ ဒီးတၢ်နၢ်ပၢၢ် လီၤတံၢ်လီၤဆဲး.” (ယံး ၃:၁၅) ယဟိဝၤယွၤ မၤလၢပှဲၤထီၣ် အတၢ်အၢၣ်လီၤအံၤ ခီဖျိအဟ့ၣ်ပှၤ တၢ်အိၣ်ဖှိၣ်သးပှၢ်တဖၣ်လၢ ကကဟုကယာ် တၢ်အိၣ်ဖှိၣ်ဖိ. အဃိ ဖဲပနီၢ်သးလီၤစၢ် ဒီးပဘၣ်မၤဂ့ၤထီၣ်က့ၤ ပတၢ်ရ့လိာ်သးဒီး ယဟိဝၤယွၤအခါ ပကြၢးဃ့ တၢ်မၤစၢၤလၢ တၢ်အိၣ်ဖှိၣ်သးပှၢ်အအိၣ် ဒီးပတလိၣ် ဘၣ်ယိၣ်တၢ်ဘၣ်. ပကထံၣ်ဘၣ်လၢ ယဟိဝၤယွၤသူဝဲ တၢ်အိၣ်ဖှိၣ်သးပှၢ်တဖၣ် လၢကမၤစၢၤပှၤ.
တၢ်သးဝံၣ် ၃၁ လဲၤတၢ်ဒီးယွၤ
a ဒီပုၢ်ဝဲၢ်တဂၤ မ့ၢ်မၤဘၣ် တၢ်ကမၣ်ဖးဒိၣ်န့ၣ် ပကြၢးဟ့ၣ်အီၤ တၢ်ဆၢကတီၢ်လၢ အကလဲၤတဲဘၣ် တၢ်အိၣ်ဖှိၣ်သးပှၢ်. ဘၣ်ဆၣ် တၢ်ဆၢကတီၢ် မ့ၢ်ယံာ်ထီၣ် တစဲးဖိ ဒီးအမ့ၢ်တတဲဘၣ် တၢ်အိၣ်ဖှိၣ်သးပှၢ်ဘၣ်န့ၣ် ပကဘၣ် ပာ်ဖျါထီၣ် ပတၢ်သးတီဒီး ယဟိဝၤယွၤ ဒီးလဲၤတဲဘၣ် တၢ်အိၣ်ဖှိၣ်သးပှၢ်.