ပမ့ၢ်မၤဂ့ၤဒိၣ်ထီၣ် ပတၢ်ရ့လိာ်သးဒီး ဒီပုၢ်ဝဲၢ်မုၣ်ခွါန့ၣ် ဂ့ၤဝဲလၢပဂီၢ်

၁-၂. တၢ်အရ့ဒိၣ်တခါလၢ ယဟိဝၤယွၤအဂီၢ်န့ၣ် မ့ၢ်မနုၤလဲၣ် ဒီးယဟိဝၤယွၤ အဲၣ်ဒိးလၢ ပကမၤမနုၤလဲၣ်.

ပရ့ဒီးပှၤဂၤဒ်လဲၣ်န့ၣ် ယဟိဝၤယွၤထံၣ်ဝဲလၢ အရ့ဒိၣ်ဒိၣ်မး. ဒီးယ့ၣ်ၡူး သိၣ်လိဝဲလၢ ပကဘၣ်အဲၣ် ပှၤလၢပဃၢၤ ဒ်ပအဲၣ်လီၤ ပနီၢ်ကစၢ်သးအသိး. (မး ၂၂:၃၇-၃၉) ပအဲၣ် ပှၤလၢပဃၢၤန့ၣ် အပၣ်ဃုာ်ဒီး ပမၤဂ့ၤတၢ်လၢ ပှၤလၢ အတဘူၣ်ထီၣ်ဘါထီၣ် ယဟိဝၤယွၤဘၣ် အဖီခိၣ်စ့ၢ်ကီး. ယဟိဝၤယွၤန့ၣ် အကဲပှၤလၢ အ “ဒုးဟဲထီၣ်မုၢ်လၢ ပှၤအၢပှၤသီ ဒီးပှၤဂ့ၤအဂီၢ် ဒ်သိးသိး ဒီးဒုးစူၤလီၤမူခိၣ်ထံလၢ ပှၤတီပှၤလိၤ ဒီးပှၤတတီတလိၤဘၣ်အဂီၢ် ဒ်သိးသိး.” (မး ၅:၄၅) အဃိ ဖဲပမၤဂ့ၤတၢ်လၢ ပှၤဂၤအဖီခိၣ်အခါ ပပာ်ဖျါထီၣ်လၢ ပကွၢ်လိ ယဟိဝၤယွၤ.

^၂ ယဟိဝၤယွၤ အဲၣ်ပှၤဟီၣ်ခိၣ်ဖိခဲလၢာ် သနာ်က့ ပှၤလၢအဒိကနၣ် အကလုၢ်န့ၣ် အဘၣ်သူၣ်ဘၣ်သးဝဲ သပှၢ်တၢၢ်. (ယိၤ ၁၄:၂၁) ဒီးအဘၣ်သးလၢ ပကကွၢ်လိအီၤ. အဃိ အဟ့ၣ်ကူၣ်ပှၤလၢ ဒ်ဒီပုၢ်ဝဲၢ်တံၢ်နီၢ်အသိး “သုကဘၣ် အဲၣ်လိာ်ကွံလိာ်သုသးဒိၣ်မး” ဒီး “ကဟုကယာ်လိာ်သုသး.” (၁ ပ့း ၄:၈; ရိ ၁၂:၁၀) တၢ်အဲၣ် ဒီးတၢ်ကဟုကယာ် တကလုာ်အံၤ အလီၤဂာ်ဒ် တၢ်အဲၣ် ဒီးတၢ်ကဟုကယာ်လၢ ပပာ်ဖျါထီၣ်လၢ ပဟံၣ်ဖိဃီဖိ မ့တမ့ၢ် ပသကိးလၢ ပအဲၣ်အီၤဒိၣ်မး တဂၤအဖီခိၣ်.

၃. ဘၣ်ဃးဒီးတၢ်အဲၣ်န့ၣ် ပကဘၣ်သ့ၣ်နီၣ်ထီၣ် တၢ်ဂ့ၢ်မနုၤလဲၣ်.

^၃ အဒိ ဒ်သိး တၢ်မုၢ်တၢ်ဘိ ကဒိၣ်ထီၣ်အဂီၢ် ပကဘၣ် ဆဲးကွၢ်ထွဲအီၤထီဘိ. ဒ်န့ၣ်အသိး ပတၢ်ရ့လိာ်သးဒီး ဒီပုၢ်ဝဲၢ်မုၣ်ခွါ ကဂ့ၤဒိၣ်ထီၣ်အဂီၢ် ပကဘၣ် ဆဲးပာ်ဖျါထီၣ် တၢ်အဲၣ်ထီဘိ. တၢ်မၢဖိပီလူး ဟ့ၣ်ကူၣ် ခရံာ်ဖိတဖၣ်လၢ “မ်သုတၢ်အဲၣ်ပုၢ်အဲၣ်ဝဲၢ်န့ၣ် ဆဲးအိၣ်ထီဘိတက့ၢ်.” (ဧ့ၤ ၁၃:၁) ယဟိဝၤယွၤ အဲၣ်ဒိးဝဲလၢ ပကဆဲးမၤဒိၣ်ထီၣ်အါထီၣ် ပတၢ်အဲၣ်လၢ တဂၤဒီးတဂၤအဖီခိၣ်. အဃိ လၢတၢ်မၤလိအံၤ ပကတဲသကိး ဘၣ်ဃးဒီး ဘၣ်မနုၤအဃိ ပကြၢးမၤဂ့ၤဒိၣ်ထီၣ် ပတၢ်ရ့လိာ်သးဒီး ဒီပုၢ်ဝဲၢ်မုၣ်ခွါလဲၣ် ဒီးပဆဲးမၤ ကသ့ဒ်လဲၣ်.

ဘၣ်မနုၤအဃိ ပကြၢးမၤဂ့ၤဒိၣ်ထီၣ် ပတၢ်ရ့လိာ်သးဒီး ဒီပုၢ်ဝဲၢ်မုၣ်ခွါလဲၣ်

၄. ဒ် စံးထီၣ်ပတြၢၤ ၁၃၃:၁ တဲဝဲအသိး ပဆဲးပာ်လုၢ်ပာ်ပှ့ၤ တၢ်ဃူတၢ်ဖိး လၢဒီပုၢ်ဝဲၢ်မုၣ်ခွါ အကျါကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၄ ဖး စံးထီၣ်ပတြၢၤ ၁၃၃:၁. ပှၤကွဲးထါ စံးထီၣ်ပတြၢၤတဂၤ တဲဝဲလၢ ပရ့လိာ်ပသးဒီး ပှၤလၢအအဲၣ် ယဟိဝၤယွၤန့ၣ် “ဂ့ၤဝဲဒိၣ်မး” ဒီး “မုာ်ဝဲဒိၣ်မး.” တၢ်လၢအတဲဝဲန့ၣ် ဖးဘၣ်ညါ. အဒိ ပှၤတဂၤ ကထံၣ်ဘၣ် သ့ၣ်ဖးဒိၣ်တထူၣ် ကိးနံၤဒဲး ဘၣ်ဆၣ် အတပာ်သူၣ်ပာ်သးဝဲ သ့ၣ်အတၢ်ဃံတၢ်လၤဘၣ်. ဒ်န့ၣ်အသိး လၢတနွံ အတီၢ်ပူၤန့ၣ် ပကထံၣ်ဘၣ် ဒီပုၢ်ဝဲၢ်မုၣ်ခွါ တဘျုးဘျီညါ ဘၣ်ဆၣ် ဘၣ်သ့ၣ်သ့ၣ် ပတပာ်သူၣ်ပာ်သးဘၣ် တၢ်ဃံတၢ်လၤ လၢအမ့ၢ် တၢ်ဃူတၢ်ဖိး လၢဒီပုၢ်ဝဲၢ်မုၣ်ခွါ အကျါဘၣ်. အဃိ ဒ်သိး ပကဆဲးပာ်လုၢ်ပာ်ပှ့ၤ ပဒီပုၢ်ဝဲၢ်မုၣ်ခွါအဂီၢ် ပကဘၣ်မၤဒ်လဲၣ်. ပမ့ၢ်ဆိကမိၣ်ထံလၢ ဒီပုၢ်ဝဲၢ်မုၣ်ခွါ တဂၤဘၣ်တဂၤ အလုၢ်ဒိၣ်ပှ့ၤဒိၣ် လၢပဂီၢ် ဒီးတၢ်အိၣ်ဖှိၣ်အဂီၢ် ထဲလဲၣ်န့ၣ် ပတၢ်အဲၣ် အဝဲသ့ၣ် ကဒိၣ်ထီၣ်အါထီၣ်.

၅. ဖဲပှၤဂၤထံၣ်လၢ ပပာ်ဖျါထီၣ်တၢ်အဲၣ် လၢတဂၤဒီးတဂၤ အဖီခိၣ်အခါ ကဲဘျုးလၢ အဝဲသ့ၣ် အဂီၢ်ဒ်လဲၣ်.

^၅ ပှၤတနီၤလၢ အဟဲထီၣ်တၢ်အိၣ်ဖှိၣ် အဆိကတၢၢ်တဘျီန့ၣ် ဖဲအဝဲသ့ၣ်ထံၣ်ဘၣ် ပပာ်ဖျါထီၣ်တၢ်အဲၣ်လၢ တဂၤဒီးတဂၤ အဖီခိၣ်အခါ အဝဲသ့ၣ် ကမၢကမၣ်ဒိၣ်မး. ပှၤတနီၤ ထံၣ်ဘၣ်ဝဲ ဒ်န့ၣ်အဃိ အဝဲသ့ၣ်နာ်ဝဲလၢ အထံၣ်န့ၢ် တၢ်မ့ၢ်တၢ်တီလံ. ယ့ၣ်ၡူး တဲဝဲလၢ “သုမ့ၢ် အဲၣ်လိာ်ကွံလိာ် သုသးကဒဲကဒဲန့ၣ် ပှၤခဲလၢာ် ကသ့ၣ်ညါလၢ သုမ့ၢ် ယပျဲၢ်ယဘီၣ်တဖၣ်လီၤ.” (ယိၤ ၁၃:၃၅) ဆိကမိၣ်ကွၢ် ခၠ့သရၤ အတၢ်လဲၤခီဖျိ. ခၠ့သရၤန့ၣ် အထီၣ်ဝဲဖၠၣ်စိမိၤကၠိ ဒီးအမၤလိလံာ်စီဆှံဒီး ယဟိဝၤပှၤအုၣ်အသး. အတူၢ်လိာ် လံာ်ကွဲမုာ်လၢ အကလဲၤထီၣ် တၢ်အိၣ်ဖှိၣ်ဖးဒိၣ်. အလဲၤထီၣ်တၢ်အိၣ်ဖှိၣ် တၢတသီ ဝံၤအလီၢ်ခံ အတဲဘၣ် ပှၤလၢအသိၣ်လိအီၤ လံာ်စီဆှံတဂၤန့ၣ်လၢ “ယမိယပါန့ၣ် တဖိးဟုယၤ နီတဘျီဘၣ်. ဘၣ်ဆၣ် ဖဲယလဲၤထီၣ် နတၢ်အိၣ်ဖှိၣ်အခါ လၢတသီအတီၢ်ပူၤန့ၣ် ပှၤဟဲဖိးဟုယၤ ၅၂ ဘျီညါ. ယတူၢ်ဘၣ်လၢ ယဟိဝၤယွၤ သူဝဲအပှၤဂီၢ်မုၢ်ဒ်သိး အကပာ်ဖျါထီၣ်လၢ အအဲၣ်ယၤ. ယဘၣ်သးကဲထီၣ် အဝဲသ့ၣ် အဟံၣ်ဖိဃီဖိစ့ၢ်ကီး.” ခၠ့သရၤ ဆဲးမၤလိလံာ်စီဆှံ ဒီးအဆီတလဲအတၢ်အိၣ်မူ ဒီးဖဲ ၂၀၂၄ န့ၣ် အဒိးဘျၢထံ. အါဘျီန့ၣ် ဖဲပှၤအသီတဖၣ် ထံၣ်ဘၣ်ဝဲ ပတၢ်မၤလၢအဂ့ၤ လၢအပၣ်ဃုာ်ဒီး ပပာ်ဖျါထီၣ်တၢ်အဲၣ် လၢတဂၤဒီးတဂၤ အဖီခိၣ်အခါ ထိၣ်ဟူးထိၣ်ဂဲၤထီၣ် အဝဲသ့ၣ်အသးလၢ ကဘူၣ်ထီၣ်ဘါထီၣ် ယဟိဝၤယွၤ.—မး ၅:၁၆.

၆. ပမ့ၢ်မၤဂ့ၤဒိၣ်ထီၣ် ပတၢ်ရ့လိာ်သးဒီး ဒီပုၢ်ဝဲၢ်မုၣ်ခွါန့ၣ် ကကဲထီၣ် တၢ်ဒီသဒၢ လၢပဂီၢ်ဒ်လဲၣ်.

^၆ ပမ့ၢ်မၤဂ့ၤဒိၣ်ထီၣ် ပတၢ်ရ့လိာ်သးဒီး ပဒီပုၢ်ဝဲၢ်မုၣ်ခွါန့ၣ် ကကဲထီၣ် တၢ်ဒီသဒၢလၢပဂီၢ်. စီၤပီလူး တဲဘၣ် ဒီပုၢ်ဝဲၢ်မုၣ်ခွါလၢ “ဒ်သိးသုသု တကဲထီၣ်ပှၤလၢ အခိၣ်ကိၤခီဖျိလၢ တၢ်ဒဲးဘးအစိကမီၤလၢ အလံၣ်န့ၢ်လီန့ၢ်တၢ်သ့ နီတဂၤတဂ့ၤအဂီၢ် ဆဲးဟ့ၣ်ဂံၢ်ဟ့ၣ်ဘါလိာ်သုသး ကိးနံၤဒဲးတက့ၢ်.” (ဧ့ၤ ၃:၁၃) ပသးမ့ၢ်လီၤစၢ် တုၤလၢ ပမၤတၢ်အဘၣ် တညီလၢၤဘၣ်န့ၣ် ဘၣ်သ့ၣ်သ့ၣ် ယဟိဝၤယွၤ ကထိၣ်ဟူးထိၣ်ဂဲၤထီၣ် ဒီပုၢ်ဝဲၢ်မုၣ်ခွါ တဂၤဂၤလၢ ကထံၣ်ဝဲ ပတၢ်အိၣ်သး ဒီးကမၤစၢၤပှၤ. (စံး ၇၃: ၂, ၁၇, ၂၃) တၢ်မၤစၢၤဒ်အံၤန့ၣ် အဂ့ၤလၢပဂီၢ်ဒိၣ်မး.

၇. တၢ်အဲၣ်န့ၣ် အဘၣ်ထွဲလိာ်သးဒီး တၢ်ဃူတၢ်ဖိးဒ်လဲၣ်. (ကလီးစဲ ၃:၁၃, ၁၄)

^၇ ပအိၣ်ဘၣ်လၢ ဒီပုၢ်ဝဲၢ်မုၣ်ခွါလၢ အပာ်ဖျါထီၣ်တၢ်အဲၣ်လၢ တဂၤဒီးတဂၤ အကျါအဃိ ပန့ၢ်ဘၣ် အဘျုးအါမး. (၁ ယိၤ ၄:၁၁) အဒိ တၢ်အဲၣ် မၤစၢၤပှၤဒ်သိး ပက “ဆဲးဝံသးစူၤလိာ် [ပ] သး” ဒီးမၤအါထီၣ် တၢ်ဃူတၢ်ဖိးလၢ ပဒီပုၢ်ဝဲၢ်မုၣ်ခွါအကျါ. (ဖး ကလီးစဲ ၃:၁၃, ၁၄; အ့း ၄:၂-၆) အဃိ တၢ်အဲၣ် ဒီးတၢ်ဃူတၢ်ဖိးလၢ ပထံၣ်ဘၣ်လၢ ပတၢ်အိၣ်ဖှိၣ် အပူၤန့ၣ် ပဃုလၢတၢ်လီၢ်အဂၤ တဘၣ်နီတတီၤဘၣ်.

ပာ်ဖျါထီၣ် တၢ်ယူးယီၣ်ပာ်ကဲ လၢတဂၤဒီးတဂၤ အဖီခိၣ်

၈. ဒ်သိး ပကအိၣ်ဃူအိၣ်ဖိးဒီး ဒီပုၢ်ဝဲၢ်မုၣ်ခွါအဂီၢ် ယဟိဝၤယွၤ မၤစၢၤပှၤဒ်လဲၣ်.

^၈ ပတကဲ ပှၤလၢပှၤပှဲၤဘၣ် သနာ်က့ ခီဖျိလၢ ယဟိဝၤယွၤ အတၢ်မၤစၢၤအဃိ ပဒီပုၢ်ဝဲၢ်မုၣ်ခွါ လၢဟီၣ်ခိၣ်ဒီဘ့ၣ်ညါ အိၣ်ဒီးတၢ်ဃူတၢ်ဖိး. (၁ ကရံၣ် ၁၂:၂၄, ၂၅) လံာ်စီဆှံ တဲဝဲလၢ ‘ကစၢ်ယွၤ သိၣ်လိပှၤလၢ ပကအဲၣ်လိာ်ပသး တဂၤဒီးတဂၤ.’ (၁ သ့း ၄:၉) ပမ့ၢ်တဲလၢ အဂၤတမံၤန့ၣ် ဒ်သိး ပကမၤဂ့ၤဒိၣ်ထီၣ် ပတၢ်ရ့လိာ်သးဒီး ဒီပုၢ်ဝဲၢ်မုၣ်ခွါအဂီၢ် ပကဘၣ်မၤဒ်လဲၣ်န့ၣ် ယဟိဝၤယွၤ တဲဘၣ်ပှၤလၢ လံာ်စီဆှံပူၤ. အဃိ ပမ့ၢ်မၤလိ လံာ်စီဆှံ လီၤတံၢ်လီၤဆဲး ဒီးအိၣ်မူမၤထွဲအီၤန့ၣ် ပပျဲလၢ “ကစၢ်ယွၤ သိၣ်လိ” ပှၤ. (ဧ့ၤ ၄:၁၂; ယၤ ၁:၂၅) ဒီးပဝဲ ယဟိဝၤပှၤအုၣ်အသးတဖၣ်န့ၣ် ပဂုာ်ကျဲးစၢး မၤဒ်န့ၣ်.

၉. ဘၣ်ဃးဒီး ပကဘၣ် ပာ်ဖျါထီၣ်ဆိ တၢ်ယူးယီၣ်ပာ်ကဲ လၢပှၤဂၤအဖီခိၣ်န့ၣ် ရိမ့ၤ ၁၂:၉-၁၃ သိၣ်လိပှၤဒ်လဲၣ်.

^၉ ဒ်သိး ပကမၤဂ့ၤဒိၣ်ထီၣ် ပတၢ်ရ့လိာ်သးဒီး ဒီပုၢ်ဝဲၢ်မုၣ်ခွါအဂီၢ် လံာ်စီဆှံ သိၣ်လိပှၤဒ်လဲၣ်. ဘၣ်ဃးဒီး တၢ်ဂ့ၢ်အံၤ စီၤပီလူး ကွဲးဝဲဖဲ ရိမ့ၤ ၁၂:၉-၁၃. (ဖး.) ပာ်သူၣ်ပာ်သးလၢ စီၤပီလူး တဲဝဲလၢ “ပာ်ဖျါထီၣ်ဆိ တၢ်ယူးယီၣ်ပာ်ကဲ လၢပှၤဂၤအဖီခိၣ်တက့ၢ်.” အအဲၣ်ဒိး တဲဝဲမနုၤလဲၣ်. အအဲၣ်ဒိးတဲဝဲလၢ ပကြၢးဃုတၢ်ခွဲးတၢ်ယာ်လၢ ပကပာ်ဖျါထီၣ်လၢပ ‘ကဟုကယာ်လိာ်ပသး’ ခီဖျိ ပသးအိၣ် ပျၢ်ပှၤဂၤအတၢ်ကမၣ်, တူၢ်လိာ်တမှံၤ ဒီးကဲပှၤလၢ အဟ့ၣ်တၢ်ညီ. (အ့း ၄:၃၂) ဒီးပကမၤဒ်န့ၣ်အဂီၢ် ပတလိၣ် အိၣ်ခိးလၢ ဒီပုၢ်ဝဲၢ်မုၣ်ခွါ ကပာ်ဖျါထီၣ်ဆိဝဲဘၣ်. ပကြၢး “ပာ်ဖျါထီၣ်ဆိ” လၢပအဲၣ်ဒိး မၤဂ့ၤဒိၣ်ထီၣ် ပတၢ်ရ့လိာ်သး. ပမ့ၢ်မၤဒ်န့ၣ်န့ၣ် ပကဒိးန့ၢ်ဘၣ် တၢ်သးခုနီၢ်ကီၢ် ဒ်သိးဒီး ယ့ၣ်ၡူးတဲဝဲလၢ “ဟ့ၣ်တၢ်န့ၣ် ဒုးအိၣ်ထီၣ် တၢ်သးခုအါန့ၢ်ဒံး ဒိးန့ၢ်ဘၣ်တၢ်ဒံး.”—မၤတၢ် ၂၀:၃၅.

၁၀. ပမၤတၢ်ဆူၣ်ဆူၣ် ခီဖျိပ “ပာ်ဖျါထီၣ်ဆိ တၢ်ယူးယီၣ်ပာ်ကဲ လၢပှၤဂၤအဖီခိၣ်” ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၀ စီၤပီလူး တဲဝဲလၢ ပကဘၣ် ပာ်ဖျါထီၣ်ဆိ တၢ်ယူးယီၣ်ပာ်ကဲ လၢပှၤဂၤအဖီခိၣ် ဝံၤဒီး အဟ့ၣ်ကူၣ်ဝဲ တဘျီဃီလၢ ပကဘၣ် “မၤတၢ်ဆူၣ်ဆူၣ် ဒီးတဘၣ်ကၢၣ်တဂ့ၤ.” ပှၤလၢအမၤတၢ်ဆူၣ်ဆူၣ်န့ၣ် ဖဲအဒိးန့ၢ်ဘၣ် မူဒါအခါ အဂုာ်ကျဲးစၢး မၤဝဲလီၤတံၢ်လီၤဆဲး ဒီးအဂုာ်ကျဲးစၢး မၤအတၢ်မၤ တုၤလၢအဝံၤ. တကးဒံးဘၣ် ကတိၤဒိ ၃:၂၇, ၂၈ ဟ့ၣ်ကူၣ်ပှၤလၢ “နမၤစၢၤမ့ၢ်သ့န့ၣ် တဘၣ်တြီနစုလၢ နကမၤဂ့ၤ ပှၤလၢအလိၣ်ဘၣ် တၢ်မၤစၢၤတဖၣ်န့ၣ်တဂ့ၤ.” အဃိ ဖဲပထံၣ်လၢ ပှၤတဂၤဂၤလိၣ်ဘၣ် တၢ်မၤစၢၤအခါ ပဂုာ်ကျဲးစၢး မၤစၢၤအီၤတဘျီဃီ. ပတထုးယံာ် တၢ်ဆၢကတီၢ်ဘၣ် ဒီးပတဆိကမိၣ်လၢ ပှၤတဂၤဂၤ ကဘၣ်မၤစၢၤဆိအီၤဘၣ်.—၁ ယိၤ ၃:၁၇, ၁၈.

၁၁. ဒ်သိး ပကမၤဂ့ၤဒိၣ်ထီၣ် ပတၢ်ရ့လိာ်သးဒီး ဒီပုၢ်ဝဲၢ်မုၣ်ခွါအဂီၢ် တၢ်မနုၤ ကမၤစၢၤပှၤလဲၣ်.

^၁၁ ကျဲအဂၤလၢ ပပာ်ဖျါထီၣ် တၢ်ယူးယီၣ်ပာ်ကဲ လၢပှၤဂၤအဖီခိၣ်န့ၣ် မ့ၢ်ဝဲ ဖဲပှၤဂၤ မၤကမၣ်ပှၤအခါ ပပျၢ်ကွံာ် အတၢ်ကမၣ် တဘျီဃီ. အ့းဖ့းစူး ၄:၂၆ တဲဝဲလၢ “တဘၣ်ပျဲ သုတၢ်သးဒိၣ် အိၣ်ဒံးတုၤလၢ မုၢ်လီၤနုာ်တဂ့ၤ.” ဘၣ်မနုၤအဃိလဲၣ်. အဆၢဖိ ၂၇ တဲဝဲလၢ ပမ့ၢ်မၤ ဒ်န့ၣ်န့ၣ် အကဲဝဲပ “ဟ့ၣ် မုၣ်ကီၤလံၢ် တၢ်ခွဲးတၢ်ယာ်.” ယဟိဝၤယွၤ အကလုၢ်ကထါ တဲဘၣ်ပှၤ တဘျီဝံၤတဘျီလၢ ပကဘၣ်ပျၢ်လိာ်သး တၢ်ကမၣ်. ကလီးစဲ ၃:၁၃ ဟ့ၣ်ကူၣ်ပှၤလၢ “ဆဲး . . . ပျၢ်လိာ်သးတၢ်ကမၣ် တဂၤဒီးတဂၤ လၢာ်လၢာ်ဆ့ဆ့.” ကျဲအဂ့ၤကတၢၢ်လၢ ပကမၤဂ့ၤဒိၣ်ထီၣ် ပတၢ်ရ့လိာ်သးဒီး ပဒီပုၢ်ဝဲၢ်မုၣ်ခွါန့ၣ် မ့ၢ်ဝဲပပျၢ်လိာ်သး တၢ်ကမၣ်. ဒီးဖဲပပျၢ်လိာ်သး တၢ်ကမၣ်အခါ အမၤစၢၤပှၤဒ်သိး ပက “ဆဲးအိၣ်ဒီး တၢ်သးတဖျၢၣ်ဃီ လၢသးစီဆှံ ဒုးအိၣ်ထီၣ်ဝဲ ဒီးတၢ်ဃူတၢ်ဖိးလၢ အစၢဃာ်” ပှၤ. (အ့း ၄:၃) ပထံၣ်ဘၣ်လၢ ဖဲပပျၢ်လိာ်သးတၢ်ကမၣ်အခါ လၢယဟိဝၤယွၤ အပှၤဂီၢ်မုၢ်အကျါန့ၣ် တၢ်မုာ်တၢ်ခုၣ် ဒီးတၢ်ဃူတၢ်ဖိး ကအါထီၣ်ဝဲ.

၁၂. ဒ်သိးပကပျၢ်ကွံာ် ပှၤဂၤတၢ်ကမၣ်အဂီၢ် ယဟိဝၤယွၤ မၤစၢၤပှၤဒ်လဲၣ်.

^၁၂ ပှၤလၢ အမၤဘၣ်ဒိပသးန့ၣ် တဘျီတခီၣ် ပကပျၢ်ကွံာ် အတၢ်ကမၣ်အဂီၢ် တညီဘၣ်. ဘၣ်ဆၣ် ဒ်သိးပကပျၢ်ကွံာ် အတၢ်ကမၣ်အဂီၢ် ယဟိဝၤယွၤ အသးစီဆှံ ကမၤစၢၤပှၤ. လံာ်စီဆှံ ဟ့ၣ်ကူၣ်ဝဲလၢ “ကဟုကယာ်လိာ်သုသး” ဒီး “မၤတၢ်ဆူၣ်ဆူၣ်” ဝံၤအလီၢ်ခံ အဆဲးတဲဝဲလၢ “ပျဲသးစီဆှံ မၤဆူၣ်ထီၣ်သုသးတက့ၢ်.” အဲၣ်ဒိးတဲဝဲလၢ ကစၢ်ယွၤ အသးစီဆှံက “မၤဆူၣ်ထီၣ်” ပသး ဒ်သိးပကသးအိၣ် မၤတၢ်တမံၤမံၤအဂီၢ်. (ရိ ၁၂:၁၁) အဃိ ကစၢ်ယွၤအသးစီဆှံ ကမၤစၢၤပှၤဒ်သိး ပကသးအိၣ် ကဟုကယာ်လိာ်သး ဒီးပျၢ်လိာ်သး တၢ်ကမၣ် လၢာ်လၢာ်ဆ့ဆ့. လၢတၢ်ဂ့ၢ်အံၤအဃိ ပဃ့လၢ ယဟိဝၤယွၤအသးစီဆှံ ကမၤစၢၤပှၤ.—လူၤ ၁၁:၁၃.

“တၢ်လီၤမုၢ်လီၤဖး သုတအိၣ်လၢ သုကျါတဂ့ၤ”

၁၃. တၢ်လီၤမုၢ်လီၤဖး အိၣ်ထီၣ်လၢပကျါ သ့ဒ်လဲၣ်.

^၁၃ လၢတၢ်အိၣ်ဖှိၣ်ပူၤန့ၣ် အိၣ်ဒီး “ပှၤကိးကလုာ်ဒဲး” လၢအတၢ်အိၣ်သး လီၤဆီလိာ်သး. (၁ တံၤ ၂:၃, ၄) ခီဖျိလၢ တၢ်ဂ့ၢ်အံၤအဃိ ပတၢ်ဃုထၢ ဘၣ်ဃးဒီး တၢ်ကူတၢ်ကၤ, တၢ်ခွံခိၣ်ခွံနၢ်, တၢ်ကူစါယါဘျါ ဒီးတၢ်မၤမုာ်မၤဖှံသးန့ၣ် ကလီၤဆီလိာ်သး. အဃိ ပမ့ၢ်တပလီၢ်သးဘၣ်န့ၣ် တၢ်လီၤမုၢ်လီၤဖး ကအိၣ်ထီၣ်လၢပကျါ. (ရိ ၁၄:၄; ၁ ကရံၣ် ၁:၁၀) ခီဖျိလၢ ‘ကစၢ်ယွၤ သိၣ်လိပှၤလၢ ပကအဲၣ်လိာ်ပသး တဂၤဒီးတဂၤ’ အဃိ ပကဘၣ်ပလီၢ်သး ဒီးပတဘၣ်ဆိကမိၣ်လၢ ပတၢ်ဃုထၢန့ၣ် အဂ့ၤဒိၣ်န့ၢ်ဒံးပှၤဂၤဘၣ်.—ဖံလံး ၂:၃.

၁၄. ပကဘၣ် ဂုာ်ကျဲးစၢး မၤမနုၤလဲၣ် ဒီးဘၣ်မနုၤအဃိလဲၣ်.

^၁၄ ဒ်သိးတၢ်လီၤမုၢ်လီၤဖး တအိၣ်ထီၣ်လၢ တၢ်အိၣ်ဖှိၣ်ပူၤတဂ့ၤအဂီၢ် ပဘၣ်ဂုာ်ကျဲးစၢး ဟ့ၣ်ဂံၢ်ဟ့ၣ်ဘါလိာ်သး ဒီးမၤမုာ်ထီၣ်လိာ်သး ထီဘိ. (၁ သ့း ၅:၁၁) ပူၤကွံာ် တယံာ်ဒံးဘၣ် ပှၤလၢအပတုာ် အတၢ်ဟးစံၣ်တဲၤတဲလီၤတၢ် မ့တမ့ၢ် ပှၤလၢ ပှၤထုးထီၣ်ကွံာ်အီၤ လၢတၢ်အိၣ်ဖှိၣ်န့ၣ် ဟဲက့ၤကဒါလၢ တၢ်အိၣ်ဖှိၣ်အပူၤ. ပပာ်ဖျါထီၣ် တၢ်အဲၣ်လၢ အဝဲသ့ၣ်အဖီခိၣ် ဒီးပတူၢ်လိာ်မုာ်အဝဲသ့ၣ်. (၂ ကရံၣ် ၂:၈) အဒိ ဖဲဒီပုၢ်ဝဲၢ်မုၣ်တဂၤလၢ အပတုာ် အတၢ်ဟးစံၣ်တဲၤတဲလီၤတၢ် န့ၢ်ဝဲအနံၣ်တဆံန့ၣ် ဟဲက့ၤကဒါလၢ တၢ်အိၣ်ဖှိၣ်အခါ အတူၢ်ဘၣ်ဝဲဒ်လဲၣ်. အတဲဝဲလၢ “ပှၤကိးဂၤဒဲး ပာ်ဖျါထီၣ် တၢ်နံၤကမှံ ဒီးဆၢဂ့ၤဆၢဝါယၤ.” (မၤတၢ် ၃:၁၉) တၢ်လၢဒီပုၢ်ဝဲၢ်မုၣ်ခွါ မၤဝဲန့ၣ် အကဲတၢ်ယိယိဖိ သနာ်က့ အကဲဘျုး လၢအဂီၢ်ဒ်လဲၣ်. အတဲဝဲလၢ “ယဟိဝၤယွၤ မၤစၢၤယၤဒ်သိး ယကဒိးန့ၢ်ဘၣ်က့ၤ တၢ်သးခု.” ပမ့ၢ်ဂုာ်ကျဲးစၢး ဟ့ၣ်ဂံၢ်ဟ့ၣ်ဘါပှၤဂၤန့ၣ် ယ့ၣ်ၡူးခရံာ် ကသူပှၤလၢ ပကမၤမုာ်ထီၣ်က့ၤ “ပှၤလၢတၢ်ဘှံးအသး ဒီးဝံတၢ်ယိးတၢ်ဃၢ ခဲလၢာ်.”—မး ၁၁:၂၈, ၂၉.

၁၅. ဒ်သိး တၢ်အိၣ်ဖှိၣ် ကအိၣ်ဒီး တၢ်ဃူတၢ်ဖိးအဂီၢ် ပသူပတၢ်ကတိၤ လၢတၢ်ကူၣ်သ့အပူၤ ကသ့လဲၣ်. (ကွၢ်စ့ၢ်ကီးတၢ်ဂီၤ.)

^၁၅ ဒ်သိး တၢ်အိၣ်ဖှိၣ် ကအိၣ်ဒီး တၢ်ဃူတၢ်ဖိးအဂီၢ် ပကဘၣ် သူပတၢ်ကတိၤ လၢတၢ်ကူၣ်သ့အပူၤ. ယိၤဘး ၁၂:၁၁ တဲဝဲလၢ “ဒ်ပျ့ၤလ့ၣ်ကွၢ် တၢ်အီၣ်အသိး နၢ်န့ၣ် ဒိကနၣ်တၢ်လၢ ပှၤတဲဝဲတဖၣ်ထံထံ ဒ်သိး ကနီၤဖးဝဲ တၢ်အဘၣ် ဒီးတၢ်အကမၣ် အဂီၢ်လီၤ.” အဒိ တချုးလၢ ပှၤဖီအီၣ်တၢ်တဂၤ ဒုးအီၣ်ပှၤဂၤ တၢ်အီၣ်လၢ အဖီအီၣ်ဝဲဒံးဘၣ်န့ၣ် အအီၣ်ကွၢ်ဆိဝဲထီဘိ. ဒ်န့ၣ်အသိး တချုးလၢ ပတဲတၢ် တမံၤမံၤဒံးဘၣ်န့ၣ် ပကြၢးဆိကမိၣ်ထံအီၤ လီၤတံၢ်လီၤဆဲး. (စံး ၁၄၁:၃) ပအဲၣ်ဒိးလၢ ပတၢ်ကတိၤန့ၣ် ကကဲထီၣ် တၢ်ဟ့ၣ်ဂံၢ်ဟ့ၣ်ဘါ, မၤဆူၣ်ထီၣ်ပှၤသး ဒီး “အဘျုးကအိၣ်လၢ ပှၤလၢအနၢ်ဟူတၢ်တဖၣ် အဂီၢ်.”—အ့း ၄:၂၉.

၁၆. ဝၤ, မိပါ ဒီးတၢ်အိၣ်ဖှိၣ်သးပှၢ်တဖၣ် ကြၢးတဲတၢ်ကတိၤဒ်လဲၣ်.

^၁၆ လီၤဆီဒၣ်တၢ် ဝၤဒီးမိပါတဖၣ်န့ၣ် ကြၢးပလီၢ်သး ဘၣ်ဃးဒီး အတၢ်ကတိၤ ဒီးတဲတၢ်လၢ အကဲထီၣ် တၢ်ဟ့ၣ်ဂံၢ်ဟ့ၣ်ဘါ. (ကလီး ၃:၁၉, ၂၁; တံ ၂:၄) တကးဒံးဘၣ် တၢ်အိၣ်ဖှိၣ်သးပှၢ်တဖၣ် ကြၢးကဲထီၣ်ပှၤလၢ အမၤဆူၣ်ထီၣ် ဒီးမၤမုာ်ထီၣ် ယဟိဝၤယွၤ အသိဖိတဖၣ် အသး. (ၡါ ၃၂:၁, ၂; ကလၤ ၆:၁) လံာ်ကတိၤဒိ ဒုးသ့ၣ်နီၣ်ထီၣ်ပှၤလၢ “တၢ်ကတိၤလၢ ပှၤတဲဝဲလၢ တၢ်ဆၢကတီၢ်လၢ အကြၢးအဘၣ်န့ၣ် မုာ်ဝဲဒိၣ်မး.”—ကတိၤ ၁၅:၂၃.

ပတၢ်အဲၣ်န့ၣ် “ပကြၢးပာ်ဖျါထီၣ်အီၤ ခီဖျိလၢ ပတၢ်မၤ”

၁၇. ပအဲၣ်ဒီပုၢ်ဝဲၢ်မုၣ်ခွါ နီၢ်ကီၢ်န့ၣ် ပပာ်ဖျါထီၣ် ကသ့ဒ်လဲၣ်.

^၁၇ တၢ်မၢဖိယိၤဟၣ် ဟ့ၣ်ဂံၢ်ဟ့ၣ်ဘါပှၤလၢ “ပတကြၢး အဲၣ်တၢ်ထဲလၢ ပတၢ်ကတိၤဒီး ပထးခိၣ်ဘၣ်. လၢတၢ်သူၣ်ဘျၢသးဘျၢအပူၤ ပကြၢးပာ်ဖျါထီၣ်အီၤ ခီဖျိလၢ ပတၢ်မၤတဖၣ်.” (၁ ယိၤ ၃:၁၈) ပအဲၣ်ဒိးလၢ ပတၢ်အဲၣ်လၢ ဒီပုၢ်ဝဲၢ်မုၣ်ခွါအဂီၢ်န့ၣ် ကဟဲထီၣ်လၢ ပသးပူၤနီၢ်ကီၢ်. ပအဲၣ်အဝဲသ့ၣ် နီၢ်ကီၢ်န့ၣ် ပပာ်ဖျါထီၣ် ကသ့ဒ်လဲၣ်. ပမ့ၢ်ရ့ဒီး ဒီပုၢ်ဝဲၢ်မုၣ်ခွါ အါအါန့ၣ် ကမၤစၢၤပှၤဒ်သိး ပကမၤဂ့ၤဒိၣ်ထီၣ် ပတၢ်ရ့လိာ်သး ဒီးပတၢ်အဲၣ်လၢ တဂၤဒီးတဂၤ အဖီခိၣ် ကဂၢၢ်ကျၢၤထီၣ်. အဃိ ဖဲပလဲၤထီၣ် တၢ်အိၣ်ဖှိၣ် ဒီးလဲၤစံၣ်တဲၤတဲလီၤတၢ်အခါ ပဃုတၢ်ခွဲးတၢ်ယာ်လၢ ပကရ့လိာ်သးဒီး ဒီပုၢ်ဝဲၢ်မုၣ်ခွါ. ဒီးပပာ်လီၤစ့ၢ်ကီး တၢ်ဆၢကတီၢ်လၢ ပကလဲၤအိၣ်သကိး အဝဲသ့ၣ်. ပမ့ၢ်မၤ ဒ်အံၤန့ၣ် ပပာ်ဖျါထီၣ်လၢ “ကစၢ်ယွၤ သိၣ်လိပှၤလၢ ပကအဲၣ်လိာ်ပသး တဂၤဒီးတဂၤ.” (၁ သ့း ၄:၉) ဒီးပကတဲစ့ၢ်ကီးလၢ “ဒီပုၢ်ဝဲၢ်တဖၣ် အိၣ်ဝဲဒ်သိးသိးလၢ တၢ်ဃူတၢ်ဖိးအပူၤန့ၣ် ဂ့ၤဝဲဒိၣ်မး ဒီးမုာ်ဝဲဒိၣ်မး.”—စံး ၁၃၃:၁.