မၤစၢၤ နပှၤမၤလိလံာ်စီဆှံဖိဒ်သိး အကဆၢတဲာ်လီၤသးလၢ အကဘူၣ်ထီၣ်ဘါထီၣ် ယဟိဝၤယွၤ

၁-၂. (က) ဘၣ်မနုၤအဃိ ပှၤမၤလိလံာ်စီဆှံဖိတနီၤ မၤယံာ်မၤနီၢ်သးလၢ ကကဲထီၣ် ယဟိဝၤပှၤအုၣ်အသးလဲၣ်. (ခ) လၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်.

လၢညါခါ ဒ်သိးနကကဲထီၣ် ယဟိဝၤပှၤအုၣ်အသးအဂီၢ် တၢ်ဂ့ၢ်လၢ နဘၣ်ယိၣ်န့ၣ် အိၣ်တမံၤမံၤဧါ. ဘၣ်သ့ၣ်သ့ၣ် နဘၣ်ယိၣ်လၢ ပှၤလၢနတၢ်မၤလီၢ်, နသကိး မ့တမ့ၢ် နဟံၣ်ဖိဃီဖိ ကထီဒါနၤ. ဒီးဘၣ်သ့ၣ်သ့ၣ် နကတူၢ်ဘၣ်လၢ နအိၣ်မူမၤထွဲ ကစၢ်ယွၤအတၢ်ဘျၢ တန့ၢ်ဘၣ်. နမ့ၢ်တူၢ်ဘၣ် ဒ်န့ၣ်န့ၣ် နကနၢ်ပၢၢ်စၢၤ ပှၤမၤလိလံာ်စီဆှံဖိတနီၤ အတၢ်တူၢ်ဘၣ် ဘၣ်ဃးဒီး ဘၣ်မနုၤအဃိ အမၤယံာ်မၤနီၢ်သးလၢ ကကဲထီၣ် ယဟိဝၤပှၤအုၣ်အသးလဲၣ်.

^၂ ယ့ၣ်ၡူး သ့ၣ်ညါဝဲလၢ ဒ်သိးပှၤတဂၤ ကလဲၤထီၣ်လဲၤထီလၢ နီၢ်သးတခီအဂီၢ် တၢ်ဂ့ၢ်လၢ ကမၤတံာ်တာ်အီၤန့ၣ် အိၣ်ဝဲ. (မး ၁၃:၂၀-၂၂) သနာ်က့ ပှၤလၢ အမၤယံာ်မၤနီၢ်သးလၢ ကပိာ်ယ့ၣ်ၡူးအခံန့ၣ် ယ့ၣ်ၡူး ဆဲးမၤစၢၤ အဝဲသ့ၣ်ဒ်လဲၣ်. ယ့ၣ်ၡူး မၤစၢၤ အဝဲသ့ၣ်လၢ (၁) ကသ့ၣ်ညါထီၣ် တၢ်လၢအမၤတံာ်တာ်အီၤ လၢအကလဲၤထီၣ်လဲၤထီအဂီၢ်, (၂) ကမၤအါထီၣ် အတၢ်အဲၣ် ယဟိဝၤယွၤ, (၃) ကပာ်ဆိ ယဟိဝၤယွၤလၢ နီၣ်ဂံၢ်တၢ လၢအတၢ်အိၣ်မူပူၤ, (၄) ကလဲၤခီဖျိဝဲ တၢ်ထီဒုၣ်ထီဒါ. ဒ်သိး ပကမၤစၢၤ ပှၤမၤလိလံာ်စီဆှံဖိလၢ အကဆၢတဲာ်လီၤသးလၢ ကဘူၣ်ထီၣ်ဘါထီၣ် ယဟိဝၤယွၤအဂီၢ် ဖဲပသူလံာ် အိၣ်မူလီၤထူလီၤယိာ် ပှဲၤဒီးတၢ်သးခု အခါ ပကွၢ်လိ ယ့ၣ်ၡူး အဒိအတဲာ် ကသ့ဒ်လဲၣ်.

မၤစၢၤ နပှၤမၤလိလံာ်စီဆှံဖိလၢ ကသ့ၣ်ညါထီၣ် တၢ်လၢအမၤတံာ်တာ်အီၤ လၢအကလဲၤထီၣ်လဲၤထီအဂီၢ်

၃. ဒ်သိး စီၤနံၤကဒ့မူး ကကဲထီၣ် ယ့ၣ်ၡူးအပျဲၢ်အဘီၣ်တဂၤအဂီၢ် တၢ်မနုၤ မၤတံာ်တာ်အီၤလဲၣ်.

^၃ စီၤနံၤကဒ့မူးန့ၣ် အကဲဝဲ ပှၤယူဒၤဖိအခိၣ်တဂၤ. ဘၣ်ဆၣ် ဒ်သိး အကဆၢတဲာ်လီၤသးလၢ အကပိာ်ယ့ၣ်ၡူးအခံအဂီၢ် တၢ်မၤတံာ်တာ်အီၤ အိၣ်တမံၤ. ယ့ၣ်ၡူး စံၣ်တဲၤတဲလီၤတၢ် န့ၢ်ဝဲဃုလါလံ ဒီးစီၤနံၤကဒ့မူး သ့ၣ်ညါဝဲလၢ ယ့ၣ်ၡူးန့ၣ် အကဲပှၤလၢ ကစၢ်ယွၤဆှၢလီၤဝဲ. (ယိၤ ၃:၁, ၂) ဘၣ်ဆၣ် ခီဖျိလၢ စီၤနံၤကဒ့မူး “ပျံၤ ပှၤယူဒၤဖိတဖၣ်” အဃိ အလဲၤလၢ ယ့ၣ်ၡူးအအိၣ်ပျီပျီ တဘူၣ်ဘၣ်. (ယိၤ ၇:၁၃; ၁၂:၄၂) ဘၣ်သ့ၣ်သ့ၣ် အဆိကမိၣ်ဝဲလၢ အမ့ၢ်ကဲထီၣ် ယ့ၣ်ၡူး အပျဲၢ်အဘီၣ်န့ၣ် အကဘၣ်တူၢ်ၡူကွံာ် အလီၢ်အလၤ ဒီးအတၢ်ထူးတၢ်တီၤ.a

၄. ဒ်သိး စီၤနံၤကဒ့မူး ကသ့ၣ်ညါထီၣ် တၢ်လၢ ယဟိဝၤယွၤ အဲၣ်ဒိးလၢ အကမၤဝဲအဂီၢ် ယ့ၣ်ၡူး မၤစၢၤအီၤဒ်လဲၣ်.

^၄ စီၤနံၤကဒ့မူးန့ၣ် အသ့ၣ်ညါ စီၤမိၤၡ့အတၢ်သိၣ်တၢ်သီ ဂ့ၤဂ့ၤ ဘၣ်ဆၣ် ဒ်သိး အကသ့ၣ်ညါထီၣ် တၢ်လၢ ယဟိဝၤယွၤ အဲၣ်ဒိးလၢ အကမၤဝဲအဂီၢ် အလိၣ်ဘၣ် တၢ်မၤစၢၤ. အဃိ ယ့ၣ်ၡူး မၤစၢၤအီၤဒ်လဲၣ်. ဖဲစီၤနံၤကဒ့မူး လဲၤလၢယ့ၣ်ၡူးအအိၣ် လၢမုၢ်နၤခီအခါဒၣ်လဲာ် ယ့ၣ်ၡူး သးအိၣ်ဟ့ၣ်အီၤ တၢ်ဆၢကတီၢ် ဒီးတဲတၢ်ဒီးအီၤဒံး. ဒီးဒ်သိး စီၤနံၤကဒ့မူး ကကဲထီၣ် ယ့ၣ်ၡူးအပျဲၢ်အဘီၣ် တဂၤအဂီၢ် တၢ်လၢအကဘၣ်မၤဝဲန့ၣ် ယ့ၣ်ၡူး တဲဘၣ်အီၤပျီပျီ. အကဘၣ်မၤ မနုၤလဲၣ်. အကဘၣ် ပီၢ်ယၢ်လီၤက့ၤသး, ဒိးဘျၢထံ ဒီးစူၢ်က့ၤနာ်က့ၤ ကစၢ်ယွၤအဖိခွါ.—ယိၤ ၃:၅, ၁၄-၂၁.

၅. ဒ်သိး ပှၤမၤလိလံာ်စီဆှံဖိတဂၤ ကသ့ၣ်ညါ တၢ်လၢ အမၤတံာ်တာ်အီၤလၢ အကလဲၤထီၣ်လဲၤထီလၢ နီၢ်သးတခီအဂီၢ် ပမၤစၢၤအီၤ ကသ့ဒ်လဲၣ်.

^၅ ပှၤမၤလိလံာ်စီဆှံဖိတဂၤ မ့ၢ်သ့ၣ်ညါ လံာ်စီဆှံအဂ့ၢ် ဂ့ၤဂ့ၤသနာ်က့ ပကဘၣ် မၤစၢၤအီၤဒ်သိး အကသ့ၣ်ညါ တၢ်လၢအမၤတံာ်တာ်အီၤလၢ အကလဲၤထီၣ်လဲၤထီလၢ နီၢ်သးတခီအဂီၢ်. အဒိ ဘၣ်သ့ၣ်သ့ၣ် လၢတၢ်မၤလီၢ်န့ၣ် အဘၣ်မၤတၢ် အနၣ်ရံၣ်အါမး မ့တမ့ၢ် အဟံၣ်ဖိဃီဖိ တဂၤဂၤ တအဲၣ်ဒိးလၢ အကကဲထီၣ် ယဟိဝၤပှၤအုၣ်အသးဘၣ်. အဃိ ဒ်ယ့ၣ်ၡူးအသိး ပာ်လီၤတၢ်ဆၢကတီၢ်လၢ နကမၤစၢၤ နပှၤမၤလိလံာ်စီဆှံဖိ. ဘၣ်သ့ၣ်သ့ၣ် နကွဲမုာ်အီၤလၢ ကလဲၤဒီးနၤလၢ လးဖးထံစဲၢ် မ့တမ့ၢ် လဲၤဟးလိာ်ကွဲဒီးနၤ လၢတၢ်ချၢသ့. နမ့ၢ်မၤစၢၤအီၤ ဒ်အံၤန့ၣ် ဘၣ်သ့ၣ်သ့ၣ် အကတဲဖျါထီၣ် အတၢ်တူၢ်ဘၣ် ဒီးနကသ့ၣ်ညါဘၣ် တၢ်ကီတၢ်ခဲလၢ အထံၣ်ဘၣ်ဝဲ. ဝံၤဒီး အမ့ၢ်ဘၣ်မၤ တၢ်ဆီတလဲ တမံၤမံၤန့ၣ် ဒ်သိး အမၤဝဲကန့ၢ်အဂီၢ် မၤစၢၤအီၤစ့ၢ်ကီး. ဒီးဒုးသ့ၣ်နီၣ်ထီၣ်အီၤလၢ အမၤတၢ်ဆီတလဲန့ၣ် ကဘၣ်မ့ၢ်ဝဲ ခီဖျိလၢ အအဲၣ်ယဟိဝၤယွၤ ဒီးတဘၣ်မ့ၢ်လၢ အအဲၣ်ဒိး မၤသးခုနသး အဃိဘၣ်.

၆. ဒ်သိး ပှၤမၤလိလံာ်စီဆှံဖိတဂၤ ကအိၣ်ဒီး တၢ်သးဒူလၢ အကမၤထွဲ တၢ်လၢအမၤလိဘၣ်ဝဲအဂီၢ် နမၤစၢၤအီၤ ကသ့ဒ်လဲၣ်. (၁ ကရံၣ်သူး ၁၆:၁၃)

^၆ ပှၤမၤလိလံာ်စီဆှံဖိတဂၤ မ့ၢ်နာ်ဝဲ သပှၢ်တၢၢ်လၢ ယဟိဝၤယွၤ ကမၤစၢၤအီၤဒ်သိး အကမၤတၢ်လၢအဘၣ်န့ၣ် အကအိၣ်ဒီး တၢ်သးဒူလၢ အကမၤထွဲ တၢ်လၢအမၤလိဘၣ်ဝဲ. (ဖး ၁ ကရံၣ်သူး ၁၆:၁၃, တၢ်ဂ့ၢ်အဘျဲၣ်.) ပှၤလၢအသိၣ်လိတၢ်န့ၣ် အမူဒါ လီၤဂာ်ဒ်သိးဒီး ကၠိသရၣ်တဂၤ. ဖဲနထီၣ်ကၠိအခါ ကၠိသရၣ်လၢ နဘၣ်သူၣ်ဘၣ်သး ဒိၣ်မးန့ၣ် အကဲကၠိသရၣ် ဒ်လဲၣ်တဂၤလဲၣ်. ဘၣ်သ့ၣ်သ့ၣ် အကဲကၠိသရၣ်လၢ အသးစူၤ ဒီးအမၤစၢၤနၤဒ်သိး နကနာ်သပှၢ်တၢၢ်လၢ တၢ်လၢနဘၣ်မၤန့ၣ် နမၤအီၤန့ၢ်. ဒ်န့ၣ်အသိး ပှၤလၢအသိၣ်လိ လံာ်စီဆှံန့ၣ် အတသိၣ်လိ အပှၤမၤလိလံာ်စီဆှံဖိ ထဲတၢ်ဂ့ၢ်လၢ ကစၢ်ယွၤ အဲၣ်ဒိးလၢ အကဘၣ်မၤဝဲဘၣ်. အမၤစၢၤစ့ၢ်ကီး အပှၤမၤလိလံာ်စီဆှံဖိလၢ ကနာ်ဝဲသပှၢ်တၢၢ်လၢ ခီဖျိလၢ ယဟိဝၤယွၤ အတၢ်မၤစၢၤအဃိ အမၤတၢ်ဆီတလဲလၢ အဘၣ်မၤဝဲန့ၢ်. နၤမီၤ နကဲပှၤသိၣ်လိတၢ် လၢအဂ့ၤတဂၤ ကသ့ဒ်လဲၣ်.

မၤစၢၤ နပှၤမၤလိလံာ်စီဆှံဖိလၢ ကမၤအါထီၣ် အတၢ်အဲၣ် ယဟိဝၤယွၤ

၇. ဒ်သိး ယ့ၣ်ၡူး အပျဲၢ်အဘီၣ်တဖၣ် ကမၤအါထီၣ် အတၢ်အဲၣ် ယဟိဝၤယွၤအဂီၢ် ယ့ၣ်ၡူး မၤစၢၤအဝဲသ့ၣ်ဒ်လဲၣ်.

^၇ ယ့ၣ်ၡူးသ့ၣ်ညါဝဲလၢ ပှၤတဂၤမ့ၢ်အဲၣ် ကစၢ်ယွၤန့ၣ် အကအဲၣ်ဒိးမၤထွဲ တၢ်လၢအမၤလိဘၣ်ဝဲ. အဃိ ယ့ၣ်ၡူး သိၣ်လိအပျဲၢ်အဘီၣ်တဖၣ် တၢ်ဂ့ၢ်လၢ ကမၤစၢၤအဝဲသ့ၣ် ဒ်သိး ကမၤအါထီၣ် အတၢ်အဲၣ်လၢ ပၢ်အိၣ်လၢမူခိၣ် အဖီခိၣ်. အဒိ ယ့ၣ်ၡူး ထိၣ်သတြီၤဝဲ ယဟိဝၤယွၤဒီး ပါတဂၤလၢ အသးအိၣ် ဟ့ၣ်အဖိ တၢ်ဟ့ၣ်လၢအဂ့ၤ. (မး ၇:၉-၁၁) ဘၣ်သ့ၣ်သ့ၣ် ပှၤတနီၤန့ၣ် တအိၣ်ဒီး ပါလၢ အအိၣ်ဒီးတၢ်အဲၣ်ဘၣ်. အဃိ ဖဲယ့ၣ်ၡူး တဲဘၣ်ဃးဒီး ပါလၢအအိၣ်ဒီးတၢ်အဲၣ် လၢအတူၢ်လိာ်က့ၤ အဖိခွါလၢ အမၤကမၣ်တၢ်တဂၤ အဂ့ၢ်အခါ ဆိကမိၣ်ကွၢ် အဝဲသ့ၣ် ကတူၢ်ဘၣ်ဝဲဒ်လဲၣ်. ယ့ၣ်ၡူး မၤစၢၤအဝဲသ့ၣ် ဒ်သိးကနၢ်ပၢၢ်ထီၣ်လၢ ယဟိဝၤယွၤ အဲၣ်အဝဲသ့ၣ်ဒိၣ်မး ဒီးအဲၣ်ဒိးမၤစၢၤအဝဲသ့ၣ်.—လူၤ ၁၅:၂၀-၂၄.

၈. ဒ်သိး ပှၤမၤလိလံာ်စီဆှံဖိတဂၤ ကမၤအါထီၣ် အတၢ်အဲၣ် ယဟိဝၤယွၤအဂီၢ် နမၤစၢၤအီၤ ကသ့ဒ်လဲၣ်.

^၈ ဖဲနမၤလိတၢ်ဒီး နပှၤမၤလိလံာ်စီဆှံဖိအခါ နမၤစၢၤအီၤလၢ ကမၤအါထီၣ် အတၢ်အဲၣ် ယဟိဝၤယွၤ သ့ခီဖျိ နတဲဘၣ်အီၤ ယဟိဝၤယွၤ အတၢ်ဂ့ၤတၢ်ဝါ ခဲအံၤခဲအံၤ. တကးဒံးဘၣ် မၤစၢၤအီၤဒ်သိး အကနၢ်ပၢၢ်ထီၣ်ဝဲလၢ တၢ်ဂ့ၢ်လၢ အမၤလိဘၣ်ဝဲန့ၣ် အဘၣ်ထွဲလိာ်သးဒီး ယဟိဝၤယွၤ အတၢ်အဲၣ်ဒ်လဲၣ်. ဒီးဖဲနမၤလိသကိး တၢ်ပှ့ၤက့ၤအဂ့ၢ်အခါ မၤစၢၤအီၤဒ်သိး အကနၢ်ပၢၢ်လၢ ခီဖျိလၢ ယဟိဝၤယွၤအဲၣ် ပှၤဟီၣ်ခိၣ်ဖိခဲလၢာ် တကးဒံးဘၣ် ယဟိဝၤယွၤ အဲၣ်အီၤအဃိ အသးအိၣ်ဟ့ၣ်လီၤအဖိခွါ ဒ်တၢ်ပှ့ၤက့ၤ. (ရိ ၅:၈; ၁ ယိၤ ၄:၁၀) ပှၤမၤလိလံာ်စီဆှံဖိတဂၤ မ့ၢ်သ့ၣ်ညါထီၣ်လၢ ယဟိဝၤယွၤ အဲၣ်အီၤ ဒိၣ်မးန့ၣ် ကမၤစၢၤအီၤဒ်သိး အကမၤအါထီၣ် အတၢ်အဲၣ် ယဟိဝၤယွၤစ့ၢ်ကီး.—ကလၤ ၂:၂၀.

၉. ဒ်သိး မၤကၢၤ ကဆီကလဲက့ၤ အတၢ်အိၣ်မူအဂီၢ် တၢ်မနုၤ မၤစၢၤအီၤလဲၣ်.

^၉ ပကကွၢ်သကိး မၤကၢၤ လၢအအိၣ်လၢ ကီၢ်အ့ၤဒိၤနံၡါန့ၣ် အတၢ်လဲၤခီဖျိ. ဖဲအဒိၣ်ထီၣ်အခါ အသ့ၣ်ညါဘၣ် တၢ်မ့ၢ်တၢ်တီ ဘၣ်ဆၣ် အတဒိးဘျၢထံဘၣ်. ဒီးဖဲအအိၣ် ၁၈ နံၣ်အခါ အလဲၤမၤတၢ်လၢ ထံကီၢ်အဂၤ ဒီးအကဲ ပှၤလၢအနီကါဖးဒိၣ်. လၢခံ အဆီဟံၣ်ဆီဃီ ဖဲကီၢ်အ့ၤဒိၤနံၡါ ဘၣ်ဆၣ် ခီဖျိလၢ အလဲၤမၤဒံးတၢ်လၢ ထံကီၢ်အဂၤအဃိ အဘၣ်အိၣ်ယံၤဒီး အဟံၣ်ဖိဃီဖိ. ဖဲန့ၣ်အခါ အမါဒီးအဖိမုၣ် စးထီၣ်မၤလိ လံာ်စီဆှံ ဒီးမၤထွဲဝဲ တၢ်ဂ့ၢ်လၢ အဝဲသ့ၣ် မၤလိဘၣ်ဝဲ. မၤကၢၤ အမိသံဝံၤအလီၢ်ခံ အဟဲက့ၤကဒါလၢ ကီၢ်အ့ၤဒိၤနံၡါ ဒ်သိး ကကွၢ်ထွဲက့ၤ အပါ ဒီးအမၤလိ လံာ်စီဆှံစ့ၢ်ကီး. ဖဲမၤကၢၤ မၤလိဝဲ တၢ်မၤလိ ၂၇ လၢလံာ် အိၣ်မူလီၤထူလီၤယိာ် ပှဲၤဒီးတၢ်သးခု အပူၤအခါ တၢ်ဂ့ၢ်လၢ အအိၣ်လၢ “ဃုသ့ၣ်ညါအါထီၣ်” အပူၤန့ၣ် ထိးဘၣ်အသး ဒိၣ်မး. အဆိကမိၣ်ထံဝဲလၢ ဖဲယဟိဝၤယွၤ ဘၣ်ထံၣ်ဝဲ အဖိခွါ တူၢ်တၢ်နးမးအခါ ယဟိဝၤယွၤ သးဘၣ်ဒိနးမး. ဒီးဖဲအဆိကမိၣ်ထံဝဲ ယဟိဝၤယွၤ အတၢ်တူၢ်ဘၣ်အခါ အမဲာ်ထံလီၤ. မၤကၢၤ သ့ၣ်ညါထီၣ်လၢ ယဟိဝၤယွၤ ဒီးယ့ၣ်ၡူး အဲၣ်အီၤဒိၣ်မးအဃိ အပာ်ဖျါထီၣ် အတၢ်စံးဘျုးခီဖျိ အဆီတလဲက့ၤ အတၢ်အိၣ်မူ ဒီးအဒိးဘျၢထံ.

မၤစၢၤ နပှၤမၤလိလံာ်စီဆှံဖိလၢ ကပာ်ဆိ ယဟိဝၤယွၤလၢ နီၣ်ဂံၢ်တၢ လၢအတၢ်အိၣ်မူပူၤ

၁၀. ဒ်သိး ယ့ၣ်ၡူး အပျဲၢ်အဘီၣ်တဖၣ် ကပာ်ဆိ ယဟိဝၤယွၤလၢ နီၣ်ဂံၢ်တၢ လၢအတၢ်အိၣ်မူပူၤအဂီၢ် ယ့ၣ်ၡူးမၤစၢၤ အဝဲသ့ၣ်ဒ်လဲၣ်. (လူၤကၣ် ၅:၅-၁၁) (ကွၢ်စ့ၢ်ကီးတၢ်ဂီၤ.)

^၁၀ ယ့ၣ်ၡူး အပျဲၢ်အဘီၣ်တဖၣ် သ့ၣ်ညါလၢ ယ့ၣ်ၡူးန့ၣ် အကဲမ့းၡံအၤ. ဘၣ်ဆၣ် ဒ်သိး အဝဲသ့ၣ် ကပာ်ဆိ တၢ်စံၣ်တဲၤတဲလီၤတၢ်မၤလၢ နီၣ်ဂံၢ်တၢ လၢအတၢ်အိၣ်မူပူၤအဂီၢ် အဝဲသ့ၣ် လိၣ်ဘၣ် တၢ်မၤစၢၤ. ပမ့ၢ်ကွၢ် ဖဲယ့ၣ်ၡူး မၢစီၤပ့းတရူး ဒီးစီၤအၣ်ဒရ့း ပိာ်အခံဒ်သိး ကစံၣ်တဲၤတဲလီၤတၢ်လၢ ဆၢကတီၢ်လၢပှဲၤအခါ အဝဲသ့ၣ်ခံဂၤန့ၣ် ကဲပာ်စၢၤ ယ့ၣ်ၡူးအပျဲၢ်အဘီၣ် တတီၤဖိလံ. (မး ၄:၁၈, ၁၉) ပှၤခံဂၤအံၤ မၤသကိးတၢ်ဒီး စီၤယၤကိာ် ဒီးစီၤယိၤဟၣ် ဒ်ပှၤမၤညၣ်ဖိအသိး ဒီးအဝဲသ့ၣ် တၢ်ဖံးတၢ်မၤအံၤ လဲၤထီၣ်လဲၤထီဂ့ၤမး. (မၢ် ၁:၁၆-၂၀) ဘၣ်ဆၣ် စီၤပ့းတရူး ဒီးစီၤအၣ်ဒရ့း “ပာ်တ့ၢ်ကွံာ် အစၤ” ဒီးပိာ်ထီၣ်ယ့ၣ်ၡူးအခံ. အဝဲသ့ၣ် ဆၢတဲာ်လီၤသး ဒ်အံၤသနာ်က့ ဒ်သိး အကလုၢ်အီၣ်လုၢ်အီ ဒီးကွၢ်ထွဲ အဟံၣ်ဖိဃီဖိအဂီၢ် ဖျါလၢ အဝဲသ့ၣ် ရဲၣ်ကျဲၤပာ်စၢၤ တၢ်တမံၤမံၤလံ. ဘၣ်မနုၤအဃိ အဝဲသ့ၣ် သးအိၣ်ပာ်တ့ၢ်ကွံာ် အတၢ်ဖံးတၢ်မၤ ဒီးပာ်ဆိ တၢ်စံၣ်တဲၤတဲလီၤတၢ်မၤလဲၣ်. အဝဲသ့ၣ် ထံၣ်ဘၣ် တၢ်လီၤလးလၢ ယ့ၣ်ၡူးမၤဝဲအဃိ အဝဲသ့ၣ် နာ်ဝဲသပှၢ်တၢၢ်လၢ တၢ်မ့ၢ်ကဲထီၣ်သး ဒ်လဲၣ်သနာ်က့ ယဟိဝၤယွၤ ကမၤလၢပှဲၤန့ၢ် အဝဲသ့ၣ်တၢ်လိၣ်ဘၣ်.—ဖး လူၤကၣ် ၅:၅-၁၁.

၁၁. ဒ်သိး ပှၤမၤလိလံာ်စီဆှံဖိတဂၤ ကမၤဂၢၢ်ကျၢၤထီၣ် အတၢ်နာ်အဂီၢ် ပမၤစၢၤအီၤ ကသ့ဒ်လဲၣ်.

^၁၁ ပမၤတၢ်လီၤလး ဒ်သိးဒီး ယ့ၣ်ၡူးမၤဝဲ တသ့ဘၣ်. ဘၣ်ဆၣ် ပတဲပၠးပှၤဂၤ ပတၢ်လဲၤခီဖျိ ဘၣ်ဃးဒီး ယဟိဝၤယွၤ ဆီၣ်ထွဲမၤစၢၤဝဲ ပှၤလၢအပာ်ဆိအီၤလၢ နီၣ်ဂံၢ်တၢ လၢအတၢ်အိၣ်မူပူၤ အဂ့ၢ်သ့. အဒိ ဖဲနလဲၤထီၣ် တၢ်အိၣ်ဖှိၣ် သီသီအခါ ယဟိဝၤယွၤ မၤစၢၤနၤ ဒ်လဲၣ်န့ၣ် နနီၣ်ဘၣ်ဒံးဧါ. ဘၣ်သ့ၣ်သ့ၣ် နဘၣ်ထံၣ်လိာ်သးဒီး နတၢ်မၤခိၣ် ဒီးၡဲပၠးအီၤလၢ နထီၣ်တၢ်အိၣ်ဖှိၣ် မ့ၢ်တချုးဘၣ်န့ၣ် နမၤတၢ်မၤ အါန့ၢ်ဒံး တၢ်ဆၢကတီၢ်လၢ ပှၤပာ်ပနီၣ်ဃာ်ဝဲ တန့ၢ်ဘၣ်. ဒီးတဲပၠးစ့ၢ်ကီး နပှၤမၤလိလံာ်စီဆှံဖိလၢ ဖဲနထံၣ်ဘၣ်လၢ ယဟိဝၤယွၤ မၤစၢၤနၤ ဒ်သိး နကပာ်ဆိအီၤလၢ နီၣ်ဂံၢ်တၢ လၢနတၢ်အိၣ်မူပူၤအခါ နတၢ်နာ် ဟဲဂၢၢ်ကျၢၤထီၣ်ဒိၣ်မး.

၁၂. (က) ဖဲပမၤလိတၢ်ဒီး ပပှၤမၤလိလံာ်စီဆှံဖိအခါ ဘၣ်မနုၤအဃိ ပကြၢးလဲၤကိးဃုာ်ဒီး ဒီပုၢ်ဝဲၢ်မုၣ်ခွါ အဂၤတဖၣ်လဲၣ်. (ခ) နသူတၢ်ဂီၤမူ ဒီးသိၣ်လိ နပှၤမၤလိလံာ်စီဆှံဖိ ဂ့ၤဂ့ၤကသ့ဒ်လဲၣ်. တဲဖျါထီၣ် တၢ်အဒိ.

^၁၂ နပှၤမၤလိလံာ်စီဆှံဖိ မ့ၢ်နၢ်ဟူဘၣ် ဒီပုၢ်ဝဲၢ်မုၣ်ခွါအဂၤ အတၢ်လဲၤခီဖျိ ဘၣ်ဃးဒီး အပာ်ဆိ ယဟိဝၤယွၤလၢ နီၣ်ဂံၢ်တၢ လၢအတၢ်အိၣ်မူပူၤန့ၣ် ကကဲဘျုးလၢ အဝဲသ့ၣ်အဂီၢ်စ့ၢ်ကီး. အဃိ ဖဲနမၤလိတၢ်ဒီး နပှၤမၤလိလံာ်စီဆှံဖိအခါ လဲၤကိးဃုာ်ဒီး ဒီပုၢ်ဝဲၢ်မုၣ်ခွါတဖၣ်လၢ အအိၣ်ဒီး တၢ်လဲၤခီဖျိ အကလုာ်ကလုာ်. အဝဲသ့ၣ် ဒိးန့ၢ်ဘၣ် တၢ်မ့ၢ်တၢ်တီဒ်လဲၣ် ဒီးဒ်သိး အဝဲသ့ၣ် ကပာ်ဆိ ယဟိဝၤယွၤလၢ နီၣ်ဂံၢ်တၢ လၢအတၢ်အိၣ်မူပူၤအဂီၢ် အဝဲသ့ၣ် ဘၣ်မၤဝဲဒ်လဲၣ်န့ၣ် မၢအဝဲသ့ၣ် တဲပၠးအတၢ်လဲၤခီဖျိ. တကးဒံးဘၣ် လၢလံာ် အိၣ်မူလီၤထူလီၤယိာ် ပှဲၤဒီးတၢ်သးခု အပူၤန့ၣ် ကွၢ်သကိး တၢ်ဂီၤမူ လၢအအိၣ်လၢ တၢ်ဂ့ၢ်ခိၣ်တီဖိ လၢအမ့ၢ် “ဃုသ့ၣ်ညါအါထီၣ်” မ့တမ့ၢ် “ဃုသ့ၣ်ညါ” အကျါ. အဒိ ဖဲနမၤလိသကိး တၢ်မၤလိ ၃၇ အခါ ကွၢ်သကိး တၢ်ဂီၤမူ လၢအမ့ၢ် ယဟိဝၤယွၤ ကမၤစၢၤတၢ်လၢပလိၣ်ဘၣ်တဖၣ် ဒီးတဲသကိး လံာ်စီဆှံ အတၢ်ဟံးစုနဲၣ်ကျဲလၢ တၢ်ဂီၤမူတခါန့ၣ် ပာ်ဖျါထီၣ်ဝဲ.

မၤစၢၤ နပှၤမၤလိလံာ်စီဆှံဖိလၢ ကလဲၤခီဖျိဝဲ တၢ်ထီဒုၣ်ထီဒါ

၁၃. ဒ်သိး ယ့ၣ်ၡူးအပျဲၢ်အဘီၣ် ကလဲၤခီဖျိဝဲ တၢ်ထီဒုၣ်ထီဒါအဂီၢ် ယ့ၣ်ၡူး မၤစၢၤအဝဲသ့ၣ်ဒ်လဲၣ်.

^၁၃ ယ့ၣ်ၡူး တဲဘၣ် ပှၤလၢအပိာ်အခံတဖၣ် ခဲအံၤခဲအံၤလၢ ပှၤအဂၤ ဒီးအဘူးအတံၢ်စ့ၢ်ကီး ကထီဒါ အဝဲသ့ၣ်. (မး ၅:၁၁; ၁၀:၂၂, ၃၆) ဒီးဖဲယ့ၣ်ၡူး ဘူးထီၣ်ကသံအခါ အတဲပလီၢ် အပျဲၢ်အဘီၣ်တဖၣ်လၢ ခီဖျိလၢ အဝဲသ့ၣ် ဘူၣ်ထီၣ်ဘါထီၣ် ယဟိဝၤယွၤအဃိ ဘၣ်သ့ၣ်သ့ၣ် ပှၤကမၤသံအဝဲသ့ၣ်စ့ၢ်ကီး. (မး ၂၄:၉; ယိၤ ၁၅:၂၀; ၁၆:၂) အဃိ ယ့ၣ်ၡူး ဟ့ၣ်ပလီၢ် အပျဲၢ်အဘီၣ်လၢ ဖဲအဝဲသ့ၣ် စံၣ်တဲၤတဲလီၤတၢ်အခါ ကဘၣ်အိၣ်ဒီး တၢ်ပလီၢ်သး. အဒိ ပှၤတဂၤဂၤ မ့ၢ်အဲၣ်ဒိး တဲအါတၢ်ဒီးအဝဲသ့ၣ်န့ၣ် ဒ်သိး အဝဲသ့ၣ် ကဆဲးစံၣ်တဲၤတဲလီၤဘၣ်တၢ်အဂီၢ် ယ့ၣ်ၡူး တဲအဝဲသ့ၣ်လၢ ကဘၣ်ပလီၢ်သး ဘၣ်ဃးဒီး တၢ်လၢ အဝဲသ့ၣ် တဲဝဲဒီးမၤဝဲ.

၁၄. ပမၤစၢၤ ပပှၤမၤလိလံာ်စီဆှံဖိလၢ ကကတဲာ်ကတီၤပာ်စၢၤသး လၢတၢ်ထီဒုၣ်ထီဒါအဂီၢ် ကသ့ဒ်လဲၣ်. (၂ တံၤမသ့း ၃:၁၂)

^၁၄ ဒ်ယ့ၣ်ၡူးအသိး ပမၤစၢၤ ပပှၤမၤလိလံာ်စီဆှံဖိ ဒီးတဲပၠးအီၤလၢ ခီဖျိလၢ အမၤလိလံာ်စီဆှံအဃိ ဘၣ်သ့ၣ်သ့ၣ် ပှၤလၢအတၢ်မၤလီၢ်, အသကိး မ့တမ့ၢ် အဘူးအတံၢ် ကထီဒါအီၤ. (ဖး ၂ တံၤမသ့း ၃:၁၂.) ခဲအံၤန့ၣ် ခီဖျိလၢ အဂုာ်ကျဲးစၢး အိၣ်မူမၤထွဲ လံာ်စီဆှံ အတၢ်သိၣ်လိအဃိ ဘၣ်သ့ၣ်သ့ၣ် ပှၤတနီၤလၢ အတၢ်မၤလီၢ်န့ၣ် ကမၤမဲာ်ဆှးအီၤ. ဒီးဘၣ်သ့ၣ်သ့ၣ် ပှၤအဂၤတနီၤ ဒီးအဘူးအတံၢ်စ့ၢ်ကီး တဘၣ်သူၣ်ဘၣ်သး တၢ်လၢအမၤလိဘၣ်ဝဲ လၢလံာ်စီဆှံပူၤဘၣ်အဃိ အဝဲသ့ၣ် ကတဲဆါအီၤ. အဃိ ပမ့ၢ်မၤစၢၤဆိ ပပှၤမၤလိလံာ်စီဆှံဖိလၢ ကကတဲာ်ကတီၤပာ်စၢၤ အသးဂ့ၤဂ့ၤန့ၣ် ဖဲအထံၣ်ဘၣ် တၢ်ထီဒုၣ်ထီဒါအခါ အကဘၣ် တဲတၢ်ဒ်လဲၣ် ဒီးမၤတၢ်ဒ်လဲၣ်န့ၣ် အကသ့ၣ်ညါဝဲ.

၁၅. ဒ်သိး နပှၤမၤလိလံာ်စီဆှံဖိ လဲၤခီဖျိဝဲ အဟံၣ်ဖိဃီဖိ တၢ်ထီဒုၣ်ထီဒါ ကန့ၢ်အဂီၢ် နမၤစၢၤအီၤ ကသ့ဒ်လဲၣ်.

^၁၅ နပှၤမၤလိလံာ်စီဆှံဖိ အဟံၣ်ဖိဃီဖိ မ့တမ့ၢ် အဘူးအတံၢ် မ့ၢ်ထီဒါအီၤန့ၣ် မၤစၢၤအီၤဒ်သိး အကဆိကမိၣ်ထီၣ်လၢ ဘၣ်မနုၤအဃိ အဝဲသ့ၣ် ထီဒါအီၤလဲၣ်. ဘၣ်သ့ၣ်သ့ၣ် အဝဲသ့ၣ် ကဆိကမိၣ်လၢ ပတသိၣ်လိ တၢ်မ့ၢ်တၢ်တီဘၣ် မ့တမ့ၢ် အဝဲသ့ၣ် တဘၣ်သူၣ်ဘၣ်သး ယဟိဝၤပှၤအုၣ်အသးဘၣ်. ပမ့ၢ်ကွၢ် ယ့ၣ်ၡူးစ့ၢ်ကီး အဟံၣ်ဖိဃီဖိ ဒီးအဘူးအတံၢ်တနီၤ တဘၣ်သူၣ်ဘၣ်သး တၢ်လၢအမၤဝဲဘၣ်. (မၢ် ၃:၂၁; ယိၤ ၇:၅) အဃိ မၤစၢၤ နပှၤမၤလိလံာ်စီဆှံဖိ ဒ်သိး အကအိၣ်ဒီး တၢ်ဝံသးစူၤ ဒီးတဲတၢ်ဒီး အဟံၣ်ဖိဃီဖိ ဒီးပှၤဂၤ လၢတၢ်အဲၣ်တၢ်ကွံ.

၁၆. ဒ်သိး နပှၤမၤလိလံာ်စီဆှံဖိ ကတဲပၠးအဘူးအတံၢ်လၢ အတၢ်စူၢ်တၢ်နာ်အဂ့ၢ် သ့သ့ဘၣ်ဘၣ်အဂီၢ် နမၤစၢၤအီၤ ကသ့ဒ်လဲၣ်.

^၁၆ နပှၤမၤလိလံာ်စီဆှံဖိ အဘူးအတံၢ် မ့ၢ်အဲၣ်ဒိးသ့ၣ်ညါ တၢ်ဂ့ၢ်လၢ လံာ်စီဆှံသိၣ်လိဝဲန့ၣ် မၤစၢၤနပှၤမၤလိလံာ်စီဆှံဖိ ဒ်သိး အကၡဲပၠး အဘူးအတံၢ် သ့သ့ဘၣ်ဘၣ် ဒီးမၤစၢၤအီၤဒ်သိး အတတဲတၢ်ဂ့ၢ် အါတလၢ တဘျီဃီတဂ့ၤ. အမ့ၢ်တဲပၠးအီၤ တၢ်ဂ့ၢ်အါတလၢန့ၣ် ဘၣ်သ့ၣ်သ့ၣ် အဘူးအတံၢ် တဘၣ်သး တဲတၢ်ဒီးအီၤ ဘၣ်ဃးဒီး အတၢ်စူၢ်တၢ်နာ် အဂ့ၢ်လၢၤဘၣ်. အဃိ မၤစၢၤအီၤလၢ အကၡဲပၠး အတၢ်စူၢ်တၢ်နာ်အဂ့ၢ် ယိယိဖိ. လၢခံ ဘၣ်သ့ၣ်သ့ၣ် အဘူးအတံၢ် ကအဲၣ်ဒိးတဲ လံာ်စီဆှံအဂ့ၢ်ဒီးအီၤ တဘျီဒံး. (ကလီး ၄:၆) မၢအပၠး အဘူးအတံၢ်လၢ ကနုာ်လီၤကွၢ် တၢ်ဂ့ၢ်လၢ jw.org ဝဲးပဆဲးအပူၤ. အမ့ၢ်မၤဝဲဒ်န့ၣ်န့ၣ် ဖဲအဘူးအတံၢ် အဲၣ်ဒိးသ့ၣ်ညါ ယဟိဝၤပှၤအုၣ်အသးအဂ့ၢ် မ့တမ့ၢ် အဲၣ်ဒိးသ့ၣ်ညါဝဲ တၢ်ဂ့ၢ်ထဲလဲၣ်အခါ အဝဲသ့ၣ် ဃုသ့ၣ်ညါဝဲလၢ အနီၢ်ကစၢ်သ့.

၁၇. ဒ်သိး နပှၤမၤလိလံာ်စီဆှံဖိ စံးဆၢပှၤဂၤ အတၢ်သံကွၢ် ဘၣ်ဃးဒီး ယဟိဝၤပှၤအုၣ်အသးအဂ့ၢ် ကသ့ဂ့ၤဂ့ၤအဂီၢ် နမၤစၢၤအီၤ ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၇ လၢ jw.org ဝဲးပဆဲး အပူၤန့ၣ် အိၣ်ဒီး တၢ်ဂ့ၢ်ပိာ်ထွဲလိာ်အခံ လၢအမ့ၢ် “တၢ်သံကွၢ်လၢ ညီနုၢ်ပှၤသံကွၢ်တဖၣ်.” နသူတၢ်ဂ့ၢ်အံၤ လၢကမၤစၢၤ နပှၤမၤလိလံာ်စီဆှံဖိ ဒ်သိး ကကတဲာ်ကတီၤပာ်စၢၤ တၢ်စံးဆၢယိယိဖိ လၢအဘူးအတံၢ် မ့တမ့ၢ် ပှၤလၢအတၢ်မၤလီၢ် ကသံကွၢ်ဝဲ တဖျၢၣ်ဖျၢၣ်သ့. (၂ တံၤ ၂:၂၄, ၂၅) ဒီးဖဲနမၤလိ တၢ်မၤလိ တခါခါလၢ လံာ် အိၣ်မူလီၤထူလီၤယိာ် ပှဲၤဒီးတၢ်သးခု အပူၤဝံၤအခါ တၢ်ဂ့ၢ်လၢအမ့ၢ် “ပှၤတနီၤတဲဝဲလၢ” န့ၣ် နတဲသကိးဒီးအီၤသ့. ဒီးဒ်သိး အၡဲပၠးပှၤဂၤ အတၢ်စူၢ်တၢ်နာ်အဂ့ၢ် ကသ့အဂီၢ် မၤစၢၤအီၤဒ်သိး အကကၠီးလိသး ဒီးတဲတၢ်လၢ အနီၢ်ကစၢ် တၢ်ကတိၤ. တၢ်လၢ အဘၣ်မၤဂ့ၤထီၣ်ဝဲ မ့ၢ်အိၣ်န့ၣ် ဟ့ၣ်ကူၣ်အီၤ ဒီးမၤစၢၤအီၤ ဒ်သိးအၡဲပၠးပှၤဂၤ အတၢ်စူၢ်တၢ်နာ် ကသ့ဂ့ၤထီၣ်. နမ့ၢ်ကၠီးလိသးဒီးအီၤ ဒ်အံၤန့ၣ် ကမၤစၢၤအီၤဒ်သိး အကတဲသကိးတၢ်ဒီးပှၤဂၤ ဘၣ်ဃးဒီး အတၢ်စူၢ်တၢ်နာ် အဂ့ၢ်ဒူဒူ.

၁၈. ဒ်သိး နပှၤမၤလိလံာ်စီဆှံဖိ ကစးထီၣ် စံၣ်တဲၤတဲလီၤတၢ်အဂီၢ် နမၤစၢၤအီၤ ကသ့ဒ်လဲၣ်. (မးသဲ ၁၀:၂၇)

^၁၈ ယ့ၣ်ၡူးမၤလိာ် အပျဲၢ်အဘီၣ်လၢ ကစံၣ်တဲၤတဲလီၤပှၤဂၤလၢ တၢ်သးခုကစီၣ်. (ဖး မးသဲ ၁၀:၂၇.) အဃိ ပှၤမၤလိလံာ်စီဆှံဖိတဂၤ မ့ၢ်စးထီၣ် စံၣ်တဲၤတဲလီၤတၢ်လၢ တဟံၣ်ဘၣ်တဟံၣ်န့ၣ် အကထံၣ်ဘၣ်လၢ ယဟိဝၤယွၤ မၤစၢၤအီၤ ဒီးအကနာ်န့ၢ်အါထီၣ် ယဟိဝၤယွၤ. ဒ်သိး နပှၤမၤလိလံာ်စီဆှံဖိ ကပာ်လီၤဖီတၢၣ်အံၤအဂီၢ် နမၤစၢၤအီၤ ကသ့ဒ်လဲၣ်. ဖဲပှၤဘိးဘၣ်သ့ၣ်ညါလီၤ ဘၣ်ဃးဒီး တၢ်စံၣ်တဲၤတဲလီၤတၢ်ခဲၣ်ဖ့ အဂ့ၢ်အခါ တဲပၠးအီၤလၢ ဒ်သိးအကကဲထီၣ် ပှၤစံၣ်တဲၤတဲလီၤတၢ်ဖိအဂီၢ် အကဘၣ် မၤမနုၤလဲၣ် ဒီးမၤစၢၤအီၤလၢ အကဆိကမိၣ်ပာ်စၢၤဝဲ. တဲပၠးအီၤစ့ၢ်ကီးလၢ အမ့ၢ်စးထီၣ် စံၣ်တဲၤတဲလီၤတၢ်ဖဲ တၢ်စံၣ်တဲၤတဲလီၤတၢ်ခဲၣ်ဖ့ အဆၢကတီၢ်န့ၣ် ကညီလၢအဂီၢ် ဒိၣ်တစဲး. ဒီးအပာ်လီၤဖီတၢၣ် အဂၤတခါ ဒ်သိးဒီး အမၤကၠိဖိတၢ်ရဲၣ်တၢ်ကျဲၤ လၢနွံဖးဖီတၢ်အိၣ်ဖှိၣ်အဂီၢ် သ့စ့ၢ်ကီး. အမ့ၢ်ဂုာ်ကျဲးစၢး မၤလိအသးလၢ ကစံၣ်တဲၤတဲလီၤတၢ် အဂီၢ်န့ၣ် ကမၤစၢၤအီၤဒ်သိး အတဲပၠးပှၤဂၤ အတၢ်စူၢ်တၢ်နာ်အဂ့ၢ် ကသ့ဂ့ၤထီၣ်.

နာ်လၢ နပှၤမၤလိလံာ်စီဆှံဖိ ကအဲၣ်ဒိးမၤ တၢ်ဘၣ်ယဟိဝၤယွၤအသး

၁၉. ယ့ၣ်ၡူး နာ်န့ၢ် အပျဲၢ်အဘီၣ်န့ၣ် အပာ်ဖျါထီၣ်ဝဲဒ်လဲၣ် ဒီးပကွၢ်လိအီၤ ကသ့ဒ်လဲၣ်.

^၁၉ တချုးလၢ ယ့ၣ်ၡူးသံ ဒီးက့ၤထီၣ်လၢ မူခိၣ်ဒံးဘၣ်န့ၣ် အတဲဘၣ် အပျဲၢ်အဘီၣ်တဖၣ်လၢ မုၢ်ကအိၣ်ဝဲတနံၤန့ၣ် အဝဲသ့ၣ် ကအိၣ်ဘၣ်ကဒီး တပူၤဃီ. ယ့ၣ်ၡူး တဲဝဲဘၣ်ဃးဒီး အဝဲသ့ၣ် ကလဲၤထီၣ်လၢ မူခိၣ်အဂ့ၢ်န့ၣ် အဝဲသ့ၣ် တနၢ်ပၢၢ်ဝဲဘၣ်. အဝဲသ့ၣ် တနၢ်ပၢၢ် တၢ်ဂ့ၢ်ခဲလၢာ်ဘၣ် သနာ်က့ ယ့ၣ်ၡူးသ့ၣ်ညါဝဲလၢ အဝဲသ့ၣ် အဲၣ်ဒိးမၤ တၢ်ဘၣ် ယဟိဝၤယွၤအသး. (ယိၤ ၁၄:၁-၅, ၈) အဒိ ဘၣ်ဃးဒီး အဝဲသ့ၣ် အတၢ်မုၢ်လၢ် လၢမူခိၣ် ဒီးတၢ်ဂ့ၢ်အဂၤ တနီၤန့ၣ် ဒ်သိး အဝဲသ့ၣ် ကနၢ်ပၢၢ်ထီၣ်ဝဲအဂီၢ် ယ့ၣ်ၡူး သ့ၣ်ညါဝဲလၢ အဝဲသ့ၣ် ကလိၣ်ဘၣ် တၢ်ဆၢကတီၢ်. (ယိၤ ၁၆:၁၂) အဃိ ဒ်ယ့ၣ်ၡူးအသိး ပပာ်ဖျါထီၣ်လၢ ပနာ်န့ၢ် ပပှၤမၤလိလံာ်စီဆှံဖိ ဒီးနာ်လၢ အဝဲသ့ၣ်အဲၣ်ဒိးမၤ တၢ်ဘၣ်ယဟိဝၤယွၤအသး.

၂၀. ဒီပုၢ်ဝဲၢ်မုၣ်တဂၤ ပာ်ဖျါထီၣ်လၢ အနာ်န့ၢ် အပှၤမၤလိလံာ်စီဆှံဖိ ဒ်လဲၣ်.

^၂၀ ပကဘၣ် နာ်သပှၢ်တၢၢ်လၢ ပပှၤမၤလိလံာ်စီဆှံဖိ ကအဲၣ်ဒိးမၤ တၢ်လၢအဘၣ်. ဆိကမိၣ်ကွၢ် ဒီပုၢ်ဝဲၢ်မုၣ်ခၠံဖူဒိၤ လၢအအိၣ်လၢ ကီၢ်မလၣ်ဝံၣ် အတၢ်လဲၤခီဖျိ. ဒီပုၢ်ဝဲၢ်မုၣ်ခၠံဖူဒိၤ မၤလိတၢ်ဒီး ခဲးသလ့း ပိာ်မုၣ်သးစၢ်တဂၤ လၢအမံၤမ့ၢ် အလံနၤဖံၤ ဒီးအဝဲသ့ၣ် မၤလိဝဲလံာ် အိၣ်မူလီၤထူလီၤယိာ် ပှဲၤဒီးတၢ်သးခု. ဖဲအဝဲသ့ၣ်မၤလိ တၢ်မၤလိ ၁၄ ဝံၤအခါ ဒီပုၢ်ဝဲၢ်မုၣ်ခၠံဖူဒိၤ သံကွၢ် အပှၤမၤလိလံာ်စီဆှံဖိလၢ အတၢ်ထံၣ် ဘၣ်ဃးဒီး ပှၤသူတၢ်ဂီၤတၢ်ဖှီၣ်အဂ့ၢ်. အလံနၤဖံၤ သးထီၣ်တၢ် ဒီးတဲဝဲလၢ “ယသူတၢ်ဂီၤတၢ်ဖှီၣ်န့ၣ် အကဲယနီၢ်ကစၢ် တၢ်ဆၢတဲာ်လီၤ.” ဒီပုၢ်ဝဲၢ်မုၣ်ခၠံဖူဒိၤ ဆိကမိၣ်ဝဲလၢ အလံနၤဖံၤ တအဲၣ်ဒိး ဆဲးမၤလိ လံာ်စီဆှံလၢၤဘၣ်. သနာ်က့ အအိၣ်ဒီး တၢ်ဝံသးစူၤ ဒီးဆဲးမၤလိတၢ်ဒီးအီၤဒံး. အနာ်ဝဲသပှၢ်တၢၢ်လၢ ဆၢကတီၢ်မ့ၢ်ဘၣ်န့ၣ် အလံနၤဖံၤ ကနၢ်ပၢၢ်ထီၣ်လၢ ပှၤသူတၢ်ဂီၤတၢ်ဖှီၣ်လၢ တၢ်ဘူၣ်ထီၣ်ဘါထီၣ်န့ၣ် အကမၣ်. လၢခံ စှၤကိာ်လါန့ၣ် ဒီပုၢ်ဝဲၢ်မုၣ်ခၠံဖူဒိၤ သံကွၢ် အလံနၤဖံၤ တၢ်သံကွၢ်တဖျၢၣ်လၢ တၢ်မၤလိ ၃၄ အပူၤ. အသံကွၢ်ဝဲလၢ “ခီဖျိလၢ နမၤလိ လံာ်စီဆှံ ဒီးနသ့ၣ်ညါဘၣ် ယဟိဝၤယွၤ လၢအမ့ၢ် ကစၢ်ယွၤလၢ အမ့ၢ်အတီတဂၤ အဂ့ၢ်အဃိ နဒိးန့ၢ်ဘၣ် အဘျုးဒ်လဲၣ်.” ဒီပုၢ်ဝဲၢ်မုၣ်ခၠံဖူဒိၤ တဲဖျါထီၣ် တၢ်လၢ အလံနၤဖံၤ တဲဝဲဒ်အံၤ. “အလံနၤဖံၤ တဲဖျါထီၣ် တၢ်ဂ့ၢ်လၢအလီၤထုးန့ၢ်သး တဘျုးထံၣ်ညါ. အတဲစ့ၢ်ကီးဝဲလၢ တၢ်ဂ့ၢ်လၢ လံာ်စီဆှံတဲဝဲ လၢပတဘၣ်မၤဘၣ်န့ၣ် ယဟိဝၤပှၤအုၣ်အသးတဖၣ် တမၤဝဲဘၣ်.” လၢခံ တယံာ်ဘၣ်ဒီး အလံနၤဖံၤ တသူတၢ်ဂီၤတၢ်ဖှီၣ်လၢၤဘၣ် ဒီးအဒိးဘျၢထံ.

၂၁. ဒ်သိး ပပှၤမၤလိလံာ်စီဆှံဖိ ကဆၢတဲာ်လီၤသးလၢ ကဘူၣ်ထီၣ်ဘါထီၣ် ယဟိဝၤယွၤအဂီၢ် ပမၤစၢၤအီၤ ကသ့ဒ်လဲၣ်.

^၂၁ ယဟိဝၤယွၤန့ၣ် အကဲ “ပှၤလၢ အဒုးဒိၣ်ထီၣ်တၢ်” ဘၣ်ဆၣ် ဒ်သိး ပှၤမၤလိလံာ်စီဆှံဖိတဂၤ ကလဲၤထီၣ်လဲၤထီၣ် လၢနီၢ်သးတခီအဂီၢ် ပမၤစၢၤအီၤ သ့စ့ၢ်ကီး. (၁ ကရံၣ် ၃:၇) ပမၤစၢၤ ဒီးပသိၣ်လိအီၤ တၢ်လၢယဟိဝၤယွၤ အဲၣ်ဒိးလၢအကမၤဝဲ. ဒီးပမၤစၢၤအီၤ ဒ်သိး အကမၤအါထီၣ် အတၢ်အဲၣ် ယဟိဝၤယွၤ. တကးဒံးဘၣ် ပဟ့ၣ်ဂံၢ်ဟ့ၣ်ဘါအီၤလၢ အကပာ်ဖျါထီၣ် အတၢ်အဲၣ်လၢ ယဟိဝၤယွၤအဂီၢ် ခီဖျိ အပာ်ဆိ ယဟိဝၤယွၤလၢ နီၣ်ဂံၢ်တၢ လၢအတၢ်အိၣ်မူပူၤ. ဒီးဖဲအထံၣ်ဘၣ် တၢ်ထီဒုၣ်ထီဒါအခါ ပမၤစၢၤအီၤဒ်သိး အကသန့ၤသးလၢ ယဟိဝၤယွၤသ့. တကးဒံးဘၣ် ပမ့ၢ်ပာ်ဖျါထီၣ်လၢ ပနာ်န့ၢ်အီၤ ဒီးနာ်လၢ အအဲၣ်ဒိးမၤ တၢ်ဘၣ် ယဟိဝၤယွၤအသးန့ၣ် ကမၤစၢၤအီၤဒ်သိး အကဆၢတဲာ်လီၤသးလၢ ကဘူၣ်ထီၣ်ဘါထီၣ် ယဟိဝၤယွၤ.