နာ်သပှၢ်တၢၢ်လၢ ယဟိဝၤယွၤအဲၣ်နၤ

၁. ဘၣ်မနုၤအဃိ နဟ့ၣ်လုၢ်ထီၣ်နသးလၢ ယဟိဝၤယွၤ အအိၣ်လဲၣ်. (ကွၢ်စ့ၢ်ကီးတၢ်ဂီၤ.)

နဟ့ၣ်လုၢ်ထီၣ်သးလၢ ယဟိဝၤယွၤအအိၣ်န့ၣ် နနီၣ်ဘၣ်ဒံးဧါ. နသ့ၣ်ညါထီၣ် ယဟိဝၤယွၤ ဒီးနအဲၣ်အီၤအဃိ နဆၢတဲာ်လီၤနသးဒ်န့ၣ်. နအၢၣ်လီၤလၢ နကပာ်ဆိအီၤ လၢနီၣ်ဂံၢ်တၢ လၢနတၢ်အိၣ်မူပူၤ ဒီးနကဆဲးအဲၣ်အီၤ လၢနသးဒီဖျၢၣ်, နတၢ်အိၣ်မူ ကိးသနၢၣ်ဒဲး, နတၢ်ကူၣ်တၢ်ဆး ဒီးနဂံၢ်နဘါခဲလၢာ်. (မၢ် ၁၂:၃၀) စးထီၣ်ဖဲန့ၣ် နအဲၣ်အီၤ ဒိၣ်ထီၣ်မးဒိၣ်ထီၣ်. အဃိ ပှၤတဂၤဂၤ မ့ၢ်သံကွၢ်နၤလၢ “နအဲၣ်ယဟိဝၤယွၤ နီၢ်ကီၢ်ဧါ” န့ၣ် နကစံးဆၢက့ၤဒ်လဲၣ်. နကစံးဆၢက့ၤ တဘျီဃီလၢ “ယအဲၣ်အီၤ ဒိၣ်ကတၢၢ်လီၤ.”

၂-၃. ယဟိဝၤယွၤ အဲၣ်ဒိးလၢ ပကနာ်မနုၤလဲၣ် ဒီးလၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်. (ယံးရမံယၤ ၃၁:၃)

^၂ ဘၣ်ဆၣ် ပှၤမ့ၢ်သံကွၢ်နၤလၢ “ယဟိဝၤယွၤ အဲၣ်နၤ နီၢ်ကီၢ်ဧါ” န့ၣ် နကစံးဆၢက့ၤ ဒ်လဲၣ်. ဘၣ်သ့ၣ်သ့ၣ် နကဆိကမိၣ်လၢ နတကြၢးဒီး ယဟိဝၤယွၤ အတၢ်အဲၣ်ဘၣ်အဃိ နတစံးဆၢက့ၤ တဘျီဃီဘၣ်. အဒိ ဖဲဒီပုၢ်ဝဲၢ်မုၣ်တဂၤ နီၢ်ဆံးခါန့ၣ် အတဒိးန့ၢ်ဘၣ် တၢ်အဲၣ်ဘၣ်. အတဲဝဲလၢ “ယအဲၣ်ယဟိဝၤယွၤ လၢယသးဒီဖျၢၣ် ဘၣ်ဆၣ် အါဘျီန့ၣ် ယဆိကမိၣ်လၢ မ့ၢ်ယဟိဝၤယွၤ အဲၣ်ယၤနီၢ်ကီၢ်ဧါ.” ယဟိဝၤယွၤ အဲၣ်နၤနီၢ်ကီၢ်ဧါန့ၣ် နသ့ၣ်ညါ ဒ်လဲၣ်.

^၃ ယဟိဝၤယွၤ အဲၣ်ဒိးလၢ နကနာ်သပှၢ်တၢၢ်လၢ အအဲၣ်နၤ. (ဖး ယံးရမံယၤ ၃၁:၃.) ယဟိဝၤယွၤ အဲၣ်ဒိးလၢ နကသ့ၣ်ညါထီၣ်အဂ့ၢ် ဒီးကဲထီၣ် အသကိးနီၢ်ကီၢ်. အဃိ ဖဲနဟ့ၣ်လုၢ်ထီၣ်သး လၢအအိၣ် ဒီးဒိးဘျၢထံအခါ အဟ့ၣ်နၤ တၢ်ဟ့ၣ်လုၢ်ဒိၣ်ပှ့ၤဒိၣ်တခါ လၢအမ့ၢ် တၢ်အဲၣ်လၢအတီ. တၢ်အဲၣ်တကလုာ်အံၤ အဲၣ်ဒိးတဲဝဲ ယဟိဝၤယွၤ အဲၣ်နၤလၢအသးဒီဖျၢၣ် ဒီးအတပာ်တ့ၢ်နၤ နီတဘျီဘၣ်. ခီဖျိလၢ ယဟိဝၤယွၤ အတၢ်အဲၣ်လၢအတီအဃိ အခ့အပှၤလၢ အတီဒီးအီၤန့ၣ် အထံၣ်အဝဲသ့ၣ်ဒ် “ပှၤလုၢ်ဒိၣ်ပှ့ၤဒိၣ်” ဒီးအထံၣ်နၤ ဒ်န့ၣ်စ့ၢ်ကီး. (မၤ ၃:၁၇) အဒိ တၢ်မၢဖိပီလူးန့ၣ် အနာ်ဝဲလၢ ယဟိဝၤယွၤ အဲၣ်အီၤနီၢ်ကီၢ်အဃိ အကွဲးဝဲလၢ “ယနာ် သပှၢ်တၢၢ်လၢ တၢ်သံမ့ၢ်ဂ့ၤ, တၢ်မူမ့ၢ်ဂ့ၤ, မူခိၣ်ကလူးတဖၣ်မ့ၢ်ဂ့ၤ, ပဒိၣ်တဖၣ်မ့ၢ်ဂ့ၤ, တၢ်လၢ အအိၣ်ခဲအံၤတဖၣ်မ့ၢ်ဂ့ၤ, တၢ်လၢ အကဟဲခါဆူညါတဖၣ်မ့ၢ်ဂ့ၤ, တၢ်စိတၢ်ကမီၤတဖၣ်မ့ၢ်ဂ့ၤ, တၢ်လၢထးခီမ့ၢ်ဂ့ၤ, တၢ်လၢလာ်ခီမ့ၢ်ဂ့ၤ, တၢ်လၢ အဘၣ်တၢ်တ့လီၤအီၤ တမံၤဂ့ၤတမံၤဂ့ၤ မၤလီၤဖးပှၤဒီး ကစၢ်ယွၤအတၢ်အဲၣ် . . . တသ့နီတမံၤဘၣ်.” (ရိ ၈:၃၈, ၃၉) ယဟိဝၤယွၤ အဲၣ်ဒိးလၢ နကတူၢ်ဘၣ်လၢ အအဲၣ်နၤ ဒ်န့ၣ်စ့ၢ်ကီး. အဃိ လၢတၢ်မၤလိအံၤ ပကတဲသကိး ဘၣ်ဃးဒီး ဘၣ်မနုၤအဃိ အရ့ဒိၣ်လၢ ပကနာ်သပှၢ်တၢၢ်လၢ ယဟိဝၤယွၤ အဲၣ်ပှၤလဲၣ် ဒီးပမၤဂၢၢ်ကျၢၤထီၣ် ပတၢ်နာ်အံၤ ကသ့ဒ်လဲၣ်.

ဘၣ်မနုၤအဃိ ပကဘၣ် နာ်သပှၢ်တၢၢ်လၢ ယဟိဝၤယွၤ အဲၣ်ပှၤလဲၣ်

၄. မုၣ်ကီၤလံၢ် အဲၣ်ဒိးလၢ ပကနာ် တၢ်လံၣ်တၢ်လီ မနုၤလဲၣ် ဒီးပမၤနၢၤကွံာ်အီၤ ကသ့ဒ်လဲၣ်.

^၄ ပမ့ၢ်နာ်သပှၢ်တၢၢ်လၢ ယဟိဝၤယွၤ အဲၣ်ပှၤန့ၣ် ပကမၤနၢၤကွံာ် မုၣ်ကီၤလံၢ်အ “တၢ်ကူၣ်ထီၣ်ဖးလီၤတဖၣ်.” (အ့း ၆:၁၁) မုၣ်ကီၤလံၢ် တိာ်ပာ်ဝဲလၢ အကမၤဟးဂီၤ ပတၢ်သးတီဒီး ယဟိဝၤယွၤ ဒီးအတအဲၣ်ဒိးလၢ ပကဆဲးဘူၣ်ထီၣ်ဘါထီၣ် ယဟိဝၤယွၤလၢၤဘၣ်. ဒ်သိး အတၢ်တိာ်ပာ်အံၤ ကလၢပှဲၤထီၣ်အဂီၢ် အဂုာ်ကျဲးစၢး ကူၣ်ထီၣ်ကျဲ အကလုာ်ကလုာ်. အတၢ်ကူၣ် အကျါတခါန့ၣ် မ့ၢ်ဝဲ အဒုးဆိကမိၣ်ပှၤလၢ ယဟိဝၤယွၤ တအဲၣ်ပှၤဘၣ်. ဘၣ်ဆၣ် တၢ်လၢအဒုးဆိကမိၣ်ပှၤန့ၣ် အကဲတၢ်လံၣ်တၢ်လီ. အဒိ မုၣ်ကီၤလံၢ်န့ၣ် လံာ်စီဆှံ ထိၣ်သတြီၤအီၤ ဒ်သိးဒီး ခ့ယုၢ်တဒု. (၁ ပ့း ၅:၈, ၉) တၢ်လၢခ့ယုၢ်န့ၣ် အမၤနၢၤအီၣ် ဆၣ်ဖိကီၢ်ဖိလၢအဂံၢ်စၢ် လၢအဒီသဒၢလီၤသး တသ့ဘၣ်. ဒ်န့ၣ်အသိး ဖဲပသးဂံၢ်ဘါလီၤစၢ်, ပလီၤဘှံး မ့တမ့ၢ် ပသးအုး ခီဖျိလၢ တၢ်ကဲထီၣ်သးဒီးပှၤ လၢအပူၤကွံာ်, ပတၢ်ကီတၢ်ခဲလၢ ပထံၣ်ဘၣ်ခဲအံၤ မ့တမ့ၢ် ဖဲပဘၣ်ယိၣ်တၢ် လၢခါဆူညါအဂီၢ်အခါ မုၣ်ကီၢ်လံၢ် အဲၣ်ဒိးမၤနၢၤပှၤ. (ကတိၤ ၂၄:၁၀) အအဲၣ်ဒိးမၤလီၤစၢ် ပဂံၢ်ပဘါ တုၤလၢ ပကဟ့ၣ်အၡူ ဒီးတဘူၣ်ထီၣ်ဘါထီၣ် ယဟိဝၤယွၤလၢၤဘၣ်. ဘၣ်ဆၣ် ပမ့ၢ်နာ်သပှၢ်တၢၢ်လၢ ယဟိဝၤယွၤ အဲၣ်ပှၤန့ၣ် ပ “ထီဒါမုၣ်ကီၤလံၢ်” ကန့ၢ် ဒီးပကမၤနၢၤကွံာ် အတၢ်ကူၣ်ထီၣ်ဖးလီၤ.—ယၤ ၄:၇.

၅. ဘၣ်မနုၤအဃိ အရ့ဒိၣ်လၢ ပကနာ်သပှၢ်တၢၢ်လၢ ယဟိဝၤယွၤ အဲၣ်ပှၤ ဒီးပာ်လုၢ်ပာ်ပှ့ၤပှၤလဲၣ်.

^၅ ပမ့ၢ်နာ် သပှၢ်တၢၢ်လၢ ယဟိဝၤယွၤ အဲၣ်ပှၤန့ၣ် ပတၢ်ရ့လိာ်သးဒီးအီၤ ကဂၢၢ်ကျၢၤဒိၣ်ထီၣ်. ဘၣ်မနုၤအဃိ ပတဲဒ်န့ၣ်လဲၣ်. ယဟိဝၤယွၤ တ့လီၤပှၤဃုာ်ဒီး တၢ်လိၣ်ဘၣ်လၢ ပကပာ်ဖျါထီၣ်တၢ်အဲၣ် ဒီးပကတူၢ်ဘၣ်လၢ ပှၤဂၤအဲၣ်ပှၤ. ပှၤဂၤမ့ၢ်အဲၣ်ပှၤန့ၣ် ပအဲၣ်အဝဲသ့ၣ်စ့ၢ်ကီး. အဃိ ပမ့ၢ်တူၢ်ဘၣ်လၢ ယဟိဝၤယွၤအဲၣ်ပှၤ ဒီးပာ်လုၢ်ပာ်ပှ့ၤပှၤန့ၣ် ပကအဲၣ်အီၤဒိၣ်ထီၣ်. (၁ ယိၤ ၄:၁၉) ဒီးပအဲၣ်အီၤ မ့ၢ်ဒိၣ်ထီၣ်န့ၣ် အအဲၣ်ပှၤ ကဒိၣ်ထီၣ်စ့ၢ်ကီး. တကးဒံးဘၣ် လံာ်စီဆှံ တဲဘၣ်ပှၤ ပျီပျီလၢ “သုးဘူးသုသးဆူ ကစၢ်ယွၤအအိၣ်တက့ၢ်. ဒီးအဝဲကသုးဘူးအသး ဆူသုအိၣ်လီၤ.” (ယၤ ၄:၈) ဘၣ်ဆၣ် ဒ်သိး ပကနာ် သပှၢ်တၢၢ်လၢ ယဟိဝၤယွၤ အဲၣ်ပှၤအဂီၢ် ပကဘၣ်မၤဒ်လဲၣ်.

ဒ်သိး ပကနာ်သပှၢ်တၢၢ်လၢ ယဟိဝၤယွၤအဲၣ်ပှၤအဂီၢ် တၢ်မနုၤ ကမၤစၢၤပှၤလဲၣ်

၆. နမ့ၢ်တနာ်လၢ ယဟိဝၤယွၤအဲၣ်နၤ နီၢ်ကီၢ်ဘၣ်န့ၣ် နကဘၣ်မၤဒ်လဲၣ်.

^၆ ဆဲးဃ့ထုကဖၣ် ဒီးဃ့ယဟိဝၤယွၤလၢ ကမၤစၢၤနၤဒ်သိး နကနၢ်ပၢၢ်ထီၣ်လၢ ဘၣ်မနုၤအဃိ အအဲၣ်နၤလဲၣ်. (လူၤ ၁၈:၁; ရိ ၁၂:၁၂) ဒ်သိး နကထံၣ်လီၤနသး ဒ်ယဟိဝၤယွၤ ထံၣ်နၤအသိးအဂီၢ် ဃ့ထုကဖၣ်လၢ ယဟိဝၤယွၤအအိၣ် ကိးနံၤဒဲး ဒီးမ့ၢ်လိၣ်န့ၣ် ဃ့အီၤခဲအံၤခဲအံၤ. တဘျီတခီၣ်န့ၣ် နတထံၣ်ဂ့ၤလီၤ နသးဘၣ်အဃိ နတနာ်လၢ ယဟိဝၤယွၤအဲၣ်နၤ နီၢ်ကီၢ်ဘၣ်. ဘၣ်ဆၣ် သ့ၣ်နီၣ်ထီၣ်လၢ ယဟိဝၤယွၤန့ၣ် အဒိၣ်န့ၢ်ဒံးနသး. (၁ ယိၤ ၃:၁၉, ၂၀) အသ့ၣ်ညါနၤ ဂ့ၤဒိၣ်န့ၢ်ဒံး နသ့ၣ်ညါလီၤနသး ဒီးနတၢ်ဂ့ၤတၢ်ဝါ အိၣ်ဒ်လဲၣ်န့ၣ် အသ့ၣ်ညါဝဲဂ့ၤဂ့ၤ. (၁ မူၤ ၁၆:၇; ၂ ကွဲး ၆:၃၀) အဃိ “တဲဖျါထီၣ်” နတၢ်တူၢ်ဘၣ် ဒီးဃ့အီၤလၢ အကမၤစၢၤနၤဒ်သိး နကနာ်လၢ အအဲၣ်နၤ. (စံး ၆၂:၈) ဒီးနဃ့ထုကဖၣ် ဝံၤအလီၢ်ခံ ဂုာ်ကျဲးစၢးမၤထွဲ တၢ်ဟ့ၣ်ကူၣ်တဖၣ်အံၤ.

၇-၈. ဒ်သိး ပကနာ်သပှၢ်တၢၢ်လၢ ယဟိဝၤယွၤ အဲၣ်ပှၤနီၢ်ကီၢ်အဂီၢ် ထါစံးထီၣ်ပတြၢၤ မၤစၢၤပှၤဒ်လဲၣ်.

^၇ နာ်န့ၢ်ယဟိဝၤယွၤ အတၢ်ကတိၤ. ယဟိဝၤယွၤထိးဘၣ် ပှၤကွဲးလံာ်စီဆှံဖိ အသးလၢအဝဲသ့ၣ် ကကွဲးလီၤဝဲ ယဟိဝၤယွၤအဂ့ၢ်. အဃိ တၢ်ဂ့ၢ်လၢ အဝဲသ့ၣ်ကွဲးဝဲန့ၣ် အကဲတၢ်မ့ၢ်တၢ်တီ. လၢလံာ်စံးထီၣ်ပတြၢၤန့ၣ် စီၤဒၤဝံးကွဲးဝဲ ဘၣ်ဃးဒီး ယဟိဝၤယွၤ အတၢ်အဲၣ် ဒီးတၢ်ကဟုကယာ်အဂ့ၢ်. အတဲဝဲလၢ “ယဟိဝၤယွၤ အိၣ်ဘူးဒီး ပှၤလၢအသးသ့ၣ်ဖး ဒီးအဝဲမၤပူၤဖျဲးပှၤလၢ အသးဂံၢ်ဘါလီၤစၢ်.” (စံး ၃၄:၁၈, တၢ်ဂ့ၢ်အဘျဲၣ်) ဖဲနသးအုးအခါ နကတူၢ်ဘၣ်လၢ နအိၣ်ထဲတဂၤ. ဘၣ်ဆၣ် ဖဲနတူၢ်ဘၣ် ဒ်န့ၣ်အခါ ယဟိဝၤယွၤ သ့ၣ်ညါဝဲလၢ နလိၣ်ဘၣ် အတၢ်မၤစၢၤ အါမးအဃိ အအၢၣ်လီၤဝဲလၢ အကအိၣ်လၢနကပၤ. လၢထါစံးထီၣ်ပတြၢၤ အဂၤတယုၢ်န့ၣ် စီၤဒၤဝံး ကွဲးဝဲလၢ “ပာ်ဖှိၣ်ဃာ် ယမဲာ်ထံမဲာ်နိလၢ နထၢၣ်တၢ်ဖံး အပူၤတက့ၢ်.” (စံး ၅၆:၈) ဖဲနသးအုး ဒီးနတူၢ်ဘၣ်တၢ် နးမးအခါ ယဟိဝၤယွၤ သ့ၣ်ညါဝဲ. အသးအိၣ်နၤ ဒိၣ်မး ဒီးနထံၣ်ဘၣ် တၢ်ကီတၢ်ခဲန့ၣ် အသးတမုာ် နီတစဲးဘၣ်. အဒိ ပှၤလဲၤတၢ်ဖိတဂၤ လၢအလဲၤတၢ်လၢ မဲးမုၢ်ပျီန့ၣ် အပာ်လုၢ်ပာ်ပှ့ၤဝဲ ထံလၢအလီၤစီၤလၢ ထၢၣ်တၢ်ဖံး ကိးတိၣ်ဒဲး. ဒ်န့ၣ်အသိး ဖဲနသးအုး ဒီးတူၢ်ဘၣ်တၢ် နးမးအခါ နမဲာ်ထံလီၤ ပှဲၤဘျီလဲၣ်န့ၣ် အသ့ၣ်ညါဝဲ ဒီးအပာ်လုၢ်ပာ်ပှ့ၤ နမဲာ်ထံ ကိးတိၣ်ဒဲး. စံးထီၣ်ပတြၢၤ ၁၃၉:၃ တဲဝဲလၢ “[ယဟိဝၤယွၤ] သ့ၣ်ညါ တၢ်လၢယမၤခဲလၢာ်လီၤ.” ယဟိဝၤယွၤ ထံၣ်ဝဲ တၢ်လၢနမၤ ခဲလၢာ် ဘၣ်ဆၣ် အကွၢ်ဝဲအါလၢ တၢ်အဂ့ၤ လၢနမၤတဖၣ်. (ဧ့ၤ ၆:၁၀) ဘၣ်မနုၤအဃိလဲၣ်. နဂုာ်ကျဲးစၢးမၤ တၢ်ဘၣ်အသးန့ၣ် အပာ်လုၢ်ပာ်ပှ့ၤဝဲဒိၣ်မး.a

^၈ ယဟိဝၤယွၤ သူဝဲလံာ်စီဆှံအဆၢ လၢအမၤမုာ်ထီၣ်ပသး ဒ်သိး အကဒုးသ့ၣ်ညါပှၤလၢ အအဲၣ်ပှၤ ဒီးအသးအိၣ်ပှၤဒိၣ်မး. ဘၣ်ဆၣ် ဒ်ပသ့ၣ်ညါဘၣ်အသိး မုၣ်ကီၤလံၢ်န့ၣ် အအဲၣ်ဒိး ဒုးဆိကမိၣ်ပှၤလၢ ယဟိဝၤယွၤ တအဲၣ်ပှၤဘၣ်. အဃိ နမ့ၢ်ဆိကမိၣ်ဘၣ် တဘျီဘျီလၢ ယဟိဝၤယွၤ တအဲၣ်နၤဘၣ်န့ၣ် သံကွၢ်လီၤနသးလၢ ‘ယကနာ် “တၢ်လံၣ်တၢ်လီအပၢ်” ဧါ မ့တမ့ၢ် ယကနာ် “တၢ်မ့ၢ်တၢ်တီကစၢ်” ဧါ.’—ယိၤ ၈:၄၄; စံး ၃၁:၅.

၉. ပှၤလၢအအဲၣ် ယဟိဝၤယွၤန့ၣ် ယဟိဝၤယွၤ အၢၣ်လီၤအဝဲသ့ၣ် မနုၤလဲၣ်. (၂ မိၤၡ့ ၂၀:၅, ၆)

^၉ ဆိကမိၣ်ထံ ယဟိဝၤယွၤ အတၢ်အဲၣ်လၢ ပှၤလၢအအဲၣ်အီၤတဖၣ် အဖီခိၣ်. ပကကွၢ်သကိး တၢ်ဂ့ၢ်လၢ ယဟိဝၤယွၤ တဲဘၣ်စီၤမိၤၡ့ ဒီးပှၤအံၣ်စရ့လးဖိတဖၣ်. (ဖး ၂ မိၤၡ့ ၂၀:၅, ၆.) ယဟိဝၤယွၤ အၢၣ်လီၤဝဲလၢ အကဆဲးပာ်ဖျါထီၣ် တၢ်အဲၣ်လၢအတီ လၢပှၤလၢအအဲၣ်အီၤတဖၣ် အဖီခိၣ်. ယဟိဝၤယွၤန့ၣ် အသးတီအဃိ ပနာ်သ့သပှၢ်တၢၢ်လၢ အကအဲၣ်ဝဲ ပှၤလၢအအဲၣ်အီၤ. (ဃ့ ၁:၅) အဃိ နမ့ၢ်ဆိကမိၣ်လၢ ယဟိဝၤယွၤ တအဲၣ်နၤဘၣ်န့ၣ် သံကွၢ်လီၤနသးလၢ ‘ယအဲၣ်ယဟိဝၤယွၤဧါ.’ ဝံၤဒီး ဆိကမိၣ်ထံ တၢ်ဂ့ၢ်အံၤ. နမ့ၢ်အဲၣ် ယဟိဝၤယွၤ ဒီးဂုာ်ကျဲးစၢးမၤ တၢ်ဘၣ်အသးန့ၣ် နနာ်သ့သပှၢ်တၢၢ်လၢ အအဲၣ်နၤဒိၣ်မး. (ဒၤ ၉:၄; ၁ ကရံၣ် ၈:၃) ဒီးနမ့ၢ်သ့ၣ်ညါလီၤနသးလၢ နအဲၣ်အီၤန့ၣ် နနာ်သ့သပှၢ်တၢၢ်လၢ အအဲၣ်နၤစ့ၢ်ကီး. ခီဖျိလၢ အတၢ်အဲၣ်လၢအတီအဃိ အတပာ်တ့ၢ်နၤ နီတဘျီဘၣ်.

၁၀-၁၁. ယဟိဝၤယွၤ အဲၣ်ဒိးလၢ နကထံၣ် တၢ်ပှ့ၤက့ၤဒ်လဲၣ်. (ကလၤတံ ၂:၂၀)

^၁၀ ဆိကမိၣ်ထံ တၢ်ပှ့ၤက့ၤအဂ့ၢ်. တၢ်ဟ့ၣ်အဂ့ၤကတၢၢ်လၢ ယဟိဝၤယွၤ ဟ့ၣ်ပှၤဟီၣ်ခိၣ်ဖိန့ၣ် မ့ၢ်ဝဲ အဆှၢလီၤအဖိခွါလၢ ကတူၢ်သံအသးလၢ ပှၤဟီၣ်ခိၣ်ဖိအဂီၢ်. (ယိၤ ၃:၁၆) ဘၣ်ဆၣ် ယဟိဝၤယွၤ ဆှၢလီၤအဖိခွါလၢ ကတူၢ်သံသး လၢနဂီၢ်စ့ၢ်ကီး. ဆိကမိၣ်ကွၢ် တၢ်မၢဖိပီလူး အတၢ်လဲၤခီဖျိ. သ့ၣ်နီၣ်ထီၣ်လၢ တချုးလၢ စီၤပီလူး ကဲထီၣ်ခရံာ်ဖိ ဒံးဘၣ်န့ၣ် အမၤဘၣ် တၢ်ကမၣ်ဖးဒိၣ် ဒီးအဘၣ် ဂုာ်ကျဲးစၢး တြီဆၢကွံာ် အတၢ်ဂံၢ်စၢ်ဘါစၢ်စ့ၢ်ကီး. (ရိ ၇:၂၄, ၂၅; ၁ တံၤ ၁:၁၂-၁၄) သနာ်က့ တၢ်ဟ့ၣ်လၢအမ့ၢ် တၢ်ပှ့ၤက့ၤန့ၣ် အထံၣ်ဝဲဒ် တၢ်ဟ့ၣ်လၢ ယဟိဝၤယွၤ ဟ့ၣ်အီၤ. (ဖး ကလၤတံ ၂:၂၀.) သ့ၣ်နီၣ်ထီၣ်လၢ ယဟိဝၤယွၤ မၢစီၤပီလူး ကွဲးလီၤဝဲ တၢ်ကတိၤတဖၣ်အံၤ လၢလံာ်စီဆှံပူၤ. အဃိ ယဟိဝၤယွၤ အဲၣ်ဒိးလၢ ပကန့ၢ်ဘၣ် တၢ်မၤလိလၢ တၢ်ဂ့ၢ်လၢ စီၤပီလူးကွဲးဝဲ. (ရိ ၁၅:၄) ယဟိဝၤယွၤ အဲၣ်ဒိးလၢ နကနာ်လၢ ယ့ၣ်ၡူး အတၢ်ပှ့ၤက့ၤန့ၣ် အကဲဝဲ တၢ်ဟ့ၣ်လၢ အဟ့ၣ်နၤ. နမ့ၢ်ထံၣ် တၢ်ပှ့ၤက့ၤ ဒ်တၢ်ဟ့ၣ်လၢ ယဟိဝၤယွၤ ဟ့ၣ်နၤန့ၣ် ကမၤစၢၤနၤဒ်သိး နကနာ်သပှၢ်တၢၢ်လၢ ယဟိဝၤယွၤ အဲၣ်နၤဒိၣ်မး.

^၁၁ ယဟိဝၤယွၤ ဆှၢလီၤအဖိခွါလၢ ကတူၢ်သံသး လၢပဂီၢ်အဃိ ပစံးဘျုးအီၤဒိၣ်မး. ဒီးတၢ်ဂ့ၢ် အဂၤတမံၤလၢ ယ့ၣ်ၡူး ဟဲလီၤလၢဟီၣ်ခိၣ်န့ၣ် မ့ၢ်ဝဲဒ်သိး အကတဲဘၣ်ပှၤဂၤ တၢ်မ့ၢ်တၢ်တီ ဘၣ်ဃးဒီး ကစၢ်ယွၤအဂ့ၢ်. (ယိၤ ၁၈:၃၇) တကးဒံးဘၣ် ယ့ၣ်ၡူး သိၣ်လိပှၤ တၢ်မ့ၢ်တၢ်တီ ဘၣ်ဃးဒီး ယဟိဝၤယွၤ အတၢ်အဲၣ်လၢ အဖိအလံၤတဖၣ် အဖီခိၣ်စ့ၢ်ကီး.

ယ့ၣ်ၡူးမၤစၢၤပှၤဒ်သိး ပကနာ်သပှၢ်တၢၢ်လၢ ယဟိဝၤယွၤအဲၣ်ပှၤ

၁၂. တၢ်ဂ့ၢ်လၢ ယ့ၣ်ၡူးတဲဝဲ ဘၣ်ဃးဒီး ယဟိဝၤယွၤန့ၣ် ဘၣ်မနုၤအဃိ ပနာ်န့ၢ်အီၤသ့လဲၣ်.

^၁၂ ဖဲယ့ၣ်ၡူး အိၣ်လၢဟီၣ်ခိၣ်ချၢအခါ အသးအိၣ်တဲဘၣ်ပှၤဂၤ ယဟိဝၤယွၤအဂ့ၢ်. (လူၤ ၁၀:၂၂) ဒီးတၢ်ဂ့ၢ်လၢ ယ့ၣ်ၡူးတဲဝဲ ဘၣ်ဃးဒီး ယဟိဝၤယွၤန့ၣ် ပနာ်န့ၢ်အီၤသ့. ဘၣ်မနုၤအဃိလဲၣ်. တချုး ယ့ၣ်ၡူးဟဲလီၤလၢ ဟီၣ်ခိၣ်ချၢ ဒံးဘၣ်န့ၣ် အအိၣ်တပူၤဃီဒီး အပါလၢမူခိၣ် လၢအနံၣ်ဖးယံာ်ညါ. (ကလီး ၁:၁၅) ယ့ၣ်ၡူးသ့ၣ်ညါဝဲလၢ အပါအဲၣ်အီၤဒိၣ်မး. တကးဒံးဘၣ် ယဟိဝၤယွၤ ပာ်ဖျါထီၣ်တၢ်အဲၣ်လၢ မူခိၣ်ကလူး လၢအသးတီ ဒီးအဖိမုၣ်ဖိခွါ လၢအသးတီ လၢအအိၣ်လၢဟီၣ်ခိၣ် ဒ်လဲၣ်န့ၣ် ယ့ၣ်ၡူးထံၣ်ဘၣ်ဝဲစ့ၢ်ကီး. အဃိ ဒ်သိးပှၤအဂၤ ကနာ်ဝဲ သပှၢ်တၢၢ်လၢ ယဟိဝၤယွၤအဲၣ် အဝဲသ့ၣ်အဂီၢ် ယ့ၣ်ၡူးမၤစၢၤ အဝဲသ့ၣ်ဒ်လဲၣ်.

၁၃. ဘၣ်ဃးဒီး ယဟိဝၤယွၤန့ၣ် ယ့ၣ်ၡူး အဲၣ်ဒိးဒုးသ့ၣ်ညါပှၤ မနုၤလဲၣ်.

^၁၃ ယဟိဝၤယွၤ အဲၣ်ပှၤထဲလဲၣ်န့ၣ် ယ့ၣ်ၡူးအဲၣ်ဒိးလၢ ပကသ့ၣ်ညါစ့ၢ်ကီး. လၢလံာ်တၢ်သးခုကစီၣ် အပူၤန့ၣ် ယ့ၣ်ၡူးကိးဝဲ ယဟိဝၤယွၤလၢ “ပၢ်” အဘျီ ၁၆၀ ဘျဲၣ်ညါ. ဒီးဖဲအတဲတၢ်ဒီး အပျဲၢ်အဘီၣ်တဖၣ်အခါ အသူဝဲ တၢ်ကတိၤ ဒ်သိးဒီး “သုပၢ်” မ့တမ့ၢ် “သုပၢ် အိၣ်လၢမူခိၣ်.” (မး ၅:၁၆; ၆:၂၆) တချုးလၢ ယ့ၣ်ၡူး ဟဲလီၤလၢ ဟီၣ်ခိၣ်ချၢဒံးဘၣ်န့ၣ် ယဟိဝၤယွၤ အခ့အပှၤလၢ အသးတီတဖၣ် ကိးယဟိဝၤယွၤလၢ ‘သ့တၢ်လၢာ်ကစၢ်,’ ‘ပှၤလၢ အထီကတၢၢ်,’ ‘တၢ်ဘၣ်တ့ကစၢ်’ ဒီးမံၤလၤသၣ်ကပီၤ လၢအဂၤတဖၣ်. မ့မ့ၢ်ယ့ၣ်ၡူးန့ၣ် ညီနုၢ်အကိးယဟိဝၤယွၤလၢ ပ ‘ပၢ်.’ တၢ်ကတိၤအံၤ ပာ်ဖျါထီၣ်ဝဲလၢ ဒ်ပါဒီးဖိ သးအိၣ်လိာ်သးအသိး ယဟိဝၤယွၤ အဲၣ်ဒိးလၢအခ့အပှၤ ကထံၣ်အီၤဒ် ပါလၢအပှဲၤဒီးတၢ်အဲၣ်. အဃိ ယ့ၣ်ၡူး အဲၣ်ဒိးဒုးသ့ၣ်ညါပှၤလၢ ယဟိဝၤယွၤအဲၣ်ပှၤ ဒ်သိးဒီး ပါအဂ့ၤတဂၤလၢ အအဲၣ်အဖိ ဒီးပာ်လုၢ်ပာ်ပှ့ၤအီၤ. ပကကွၢ်သကိး တၢ်အဒိခံခါလၢ ယ့ၣ်ၡူးကိးဝဲ ယဟိဝၤယွၤလၢ “ပၢ်.”

၁၄. ပပၢ်ယဟိဝၤယွၤ ပာ်လုၢ်ပာ်ပှ့ၤ ပဝဲတဂၤဘၣ်တဂၤဒိၣ်မးန့ၣ် ယ့ၣ်ၡူး ပာ်ဖျါထီၣ်ဝဲဒ်လဲၣ်. (မးသဲ ၁၀:၂၉-၃၁) (ကွၢ်စ့ၢ်ကီးတၢ်ဂီၤ.)

^၁၄ ပကကွၢ်သကိး တၢ်အဒိ အဆိကတၢၢ်တခါဖဲ မးသဲ ၁၀:၂၉-၃၁. (ဖး.) ထိၣ်ဖှံးဖိန့ၣ် အကဲဝဲ ထိၣ်ဆံးဆံးဖိတကလုာ် ဒီးအဝဲသ့ၣ် အဲၣ်ယဟိဝၤယွၤ ဒီးဘူၣ်ထီၣ်ဘါထီၣ်အီၤ တသ့ဘၣ်. ဘၣ်ဆၣ် ထိၣ်ဖှံးဖိ တဘ့ၣ်ဒၣ်လဲာ် မ့ၢ်လီၤတဲာ်လၢ ဟီၣ်ခိၣ်လိၤန့ၣ် ပပၢ်ယဟိဝၤယွၤ သ့ၣ်ညါဝဲအဃိ ပထံၣ်ဘၣ်လၢ အပာ်လုၢ်ပာ်ပှ့ၤ အဝဲသ့ၣ်. ယဟိဝၤယွၤ မ့ၢ်ပာ်လုၢ်ပာ်ပှ့ၤ ထိၣ်ဆံးဆံးဖိတဖၣ်အံၤ ဒိၣ်မးန့ၣ် ပနာ်သ့ သပှၢ်တၢၢ်လၢ ယဟိဝၤယွၤ ပာ်လုၢ်ပာ်ပှ့ၤ ဒီးသးအိၣ် ပဝဲတဂၤဘၣ်တဂၤလၢ အအဲၣ်အီၤ ဒီးဘူၣ်ထီၣ်ဘါထီၣ်အီၤ ဒိၣ်န့ၢ်ဒံး ထိၣ်တဖၣ်အံၤ စၢၢ်တလၢၢ်. တကးဒံးဘၣ် ယ့ၣ်ၡူးတဲဝဲလၢ ပခိၣ်ဆူၣ် အိၣ်ပှဲၤဘိလဲၣ်န့ၣ် ပပၢ်ယဟိဝၤယွၤ ဂံၢ်ဝဲခဲလၢာ်. ခီဖျိလၢ ယဟိဝၤယွၤ သ့ၣ်ညါပဂ့ၢ် လီၤတံၢ်လီၤဆဲးအဃိ ပနာ်သ့သပှၢ်တၢၢ်လၢ အသးအိၣ်ပှၤဒိၣ်မး. အဃိ ယ့ၣ်ၡူးအဲၣ်ဒိးလၢ ပကနာ်သပှၢ်တၢၢ်လၢ ပပၢ်ယဟိဝၤယွၤ ပာ်လုၢ်ပာ်ပှ့ၤ ပဝဲတဂၤဘၣ်တဂၤဒိၣ်မး.

၁၅. ယ့ၣ်ၡူး အတၢ်ကတိၤဖဲ ယိၤဟၣ် ၆:၄၄ န့ၣ် ဒုးသ့ၣ်ညါပှၤ ပပၢ်အိၣ်လၢမူခိၣ် အဂ့ၢ်ဒ်လဲၣ်.

^၁၅ ပကကွၢ်သကိး တၢ်အဒိခံခါတခါ လၢအဘၣ်ဃးဒီး ယ့ၣ်ၡူးသူဝဲ တၢ်ကတိၤ လၢအမ့ၢ် “ပၢ်.” (ယိၤဟၣ် ၆:၄၄.) ဆိကမိၣ်ကွၢ် ပပၢ်အိၣ်လၢမူခိၣ်န့ၣ် အမူၤဃီၤနၤ ဒ်သိးနကသ့ၣ်ညါထီၣ် တၢ်မ့ၢ်တၢ်တီ ဒီးနကအဲၣ်အီၤ. ဒီးခီဖျိလၢ အထံၣ်ဝဲ နတၢ်ဂ့ၤတၢ်ဝါအဃိ အမူၤဃီၤနၤ လၢအအိၣ်. (မၤတၢ် ၁၃:၄၈) တၢ်ကတိၤလၢ ယ့ၣ်ၡူးတဲဝဲဖဲ ယိၤဟၣ် ၆:၄၄ န့ၣ် ဘၣ်သ့ၣ်သ့ၣ် အအဲၣ်ဒိးတဲ ဖျါထီၣ်က့ၤ ယဟိဝၤယွၤ အတၢ်ကတိၤ လၢပဖးဘၣ်ဖဲ ယံးရမံယၤ ၃၁:၃. ဖဲန့ၣ်ယဟိဝၤယွၤ တဲဘၣ် အပှၤဂီၢ်မုၢ်လၢ “ယမူၤဃီၤနၤ လၢယအိၣ်လၢ တၢ်အဲၣ်လၢအတီလီၤ. [မ့ၢ်စ့ၢ်ကီး ယဆဲးပာ်ဖျါထီၣ် တၢ်အဲၣ်လၢအတီလၢ နဖီခိၣ်].” (ယံး ၃၁:၃; တၢ်ဂ့ၢ်အဘျဲၣ်; ထိၣ်သတြီၤဒီး ဟိၤၡ့ ၁၁:၄.) တၢ်ကတိၤအံၤ အဲၣ်ဒိးတဲဝဲ အခီပညီဒ်လဲၣ်. ပတၢ်ဂ့ၤတၢ်ဝါလၢ ပတထံၣ်အီၤဘၣ်တဖၣ်န့ၣ် ပပၢ်လၢမူခိၣ် လၢအအိၣ်ဒီးတၢ်အဲၣ်န့ၣ် အထံၣ်ဝဲ.

၁၆. (က) ယ့ၣ်ၡူး အဲၣ်ဒိးသိၣ်လိပှၤ မနုၤလဲၣ် ဒီးဘၣ်မနုၤအဃိ ပကြၢးနာ်အီၤလဲၣ်. (ခ) ဒ်သိး နကနာ်လၢ ယဟိဝၤယွၤ ကဲဝဲပၢ်လၢ အဂ့ၤကတၢၢ်တဂၤအဂီၢ် တၢ်မနုၤ ကမၤစၢၤနၤလဲၣ်. (ကွၢ်တၢ်လွံၢ်နၢၣ် လၢအမ့ၢ် “ပၢ်လၢအဂ့ၤကတၢၢ်တဂၤ.”)

^၁၆ ယ့ၣ်ၡူး သိၣ်လိပှၤလၢ ယဟိဝၤယွၤန့ၣ် အတကဲထဲအပၢ်ဘၣ်, အကဲစ့ၢ်ကီးပပၢ်. ဒီးယ့ၣ်ၡူး အဲၣ်ဒိးလၢ ပကနာ်သပှၢ်တၢၢ်လၢ ယဟိဝၤယွၤအဲၣ်ပှၤ ဒီးသးအိၣ်ပှၤဒိၣ်မး. တကးဒံးဘၣ် ယ့ၣ်ၡူးန့ၣ် အတဲတၢ်မ့ၢ်တၢ်တီထီဘိ ဒီးအသ့ၣ်ညါ အပၢ်အဂ့ၢ် အဂ့ၤကတၢၢ်အဃိ နမ့ၢ်ဆိကမိၣ်လၢ ယဟိဝၤယွၤ တအဲၣ်နၤဘၣ်န့ၣ် သ့ၣ်နီၣ်ထီၣ်က့ၤ တၢ်ဂ့ၢ်လၢယ့ၣ်ၡူး တဲဝဲဒီးနာ်န့ၢ်အီၤ.—၁ ပ့း ၂:၂၂.

ဆဲးနာ်သပှၢ်တၢၢ်လၢ ယဟိဝၤယွၤအဲၣ်နၤ

၁၇. ဘၣ်မနုၤအဃိ ပကဘၣ် ဆဲးနာ်သပှၢ်တၢၢ်လၢ ယဟိဝၤယွၤအဲၣ်ပှၤလဲၣ်.

^၁၇ ပကဘၣ် ဆဲးနာ်သပှၢ်တၢၢ်လၢ ယဟိဝၤယွၤအဲၣ်ပှၤ. ဒ်ပမၤလိဘၣ်အသိး ပဒုၣ်ပဒါ မုၣ်ကီၤလံၢ်န့ၣ် အကူၣ်ထီၣ်တၢ်လၢ ကမၤပတုာ်ပှၤ ဒ်သိး ပတဘူၣ်ထီၣ်ဘါထီၣ် ယဟိဝၤယွၤ လၢၤတဂ့ၤ. ဒီးဒ်သိး အကမၤလီၤစၢ် ပသးအဂီၢ် အဂုာ်ကျဲးစၢး ဒုးဆိကမိၣ်ပှၤလၢ ယဟိဝၤယွၤ တအဲၣ်ပှၤဘၣ်. ဘၣ်ဆၣ် ပတဘၣ်နာ် မုၣ်ကီၤလံၢ် အတၢ်လံၣ်တၢ်လီဘၣ်.—ဘး ၂၇:၅.

၁၈. ဒ်သိး နကနာ်သပှၢ်တၢၢ်လၢ ယဟိဝၤယွၤအဲၣ်နၤအဂီၢ် နကဘၣ်မၤဒ်လဲၣ်.

^၁၈ ဒ်သိး နကနာ်သပှၢ်တၢၢ်လၢ ယဟိဝၤယွၤအဲၣ်နၤအဂီၢ် ဃ့ထုကဖၣ် လၢအအိၣ်ဒီး ဃ့အီၤလၢ အကမၤစၢၤနၤဒ်သိး နကထံၣ်လီၤ နနီၢ်ကစၢ် တၢ်ဂ့ၤတၢ်ဝါ ဒ်အထံၣ်နၤအသိး. ဆိကမိၣ်ထံ ဘၣ်ဃးဒီး ပှၤကွဲးလံာ်စီဆှံဖိတဖၣ် ကွဲးဖျါထီၣ်ဝဲ ယဟိဝၤယွၤ အတၢ်အဲၣ် တၢ်ကဟုကယာ်အဂ့ၢ်. ဒီးသ့ၣ်နီၣ်ထီၣ်လၢ ယဟိဝၤယွၤန့ၣ် အအဲၣ်ဝဲ ပှၤလၢအအဲၣ်အီၤ ထီဘိ. တကးဒံးဘၣ် တၢ်ပှ့ၤက့ၤန့ၣ် အကဲဝဲ တၢ်ဟ့ၣ်လၢ ယဟိဝၤယွၤ ဟ့ၣ်နၤန့ၣ် တဘၣ်သးပ့ၤနီၣ် နီတဘျီတဂ့ၤ. ဒီးဒ်ယ့ၣ်ၡူး တဲဝဲအသိး နာ်သပှၢ်တၢၢ်လၢ ယဟိဝၤယွၤန့ၣ် အကဲဝဲနပၢ် အိၣ်လၢမူခိၣ်. လၢခံ ပှၤတဂၤဂၤ မ့ၢ်သံကွၢ်နၤလၢ “ယဟိဝၤယွၤ အဲၣ်နၤ နီၢ်ကီၢ်ဧါ” န့ၣ် နကစံးဆၢက့ၤအီၤ တဘျီဃီလၢ “အအဲၣ်ယၤနီၢ်ကီၢ်. ဒီးယအဲၣ်အီၤန့ၣ် ယဂုာ်ကျဲးစၢး ပာ်ဖျါထီၣ် ကိးနံၤဒဲး.”