နာ်သပှၢ်တၢၢ်လၢ ယဟိဝၤယွၤ ပျၢ်ကွံာ်နတၢ်ကမၣ်

၁-၂. ပမ့ၢ်ပီၢ်ယၢ်လီၤက့ၤသး နီၢ်ကီၢ်ကီၢ်န့ၣ် ယဟိဝၤယွၤ ကမၤဝဲဒ်လဲၣ်. (ကွၢ်စ့ၢ်ကီးတၢ်ဂီၤ.)

စီၤပၤဒၤဝံးမၤဘၣ် တၢ်ကမၣ်ဖးဒိၣ်အဃိ အသးအုးဒိၣ်မး. (စံး ၄၀:၁၂; ၅၁:၃; တၢ်ကတိၤအိးထီၣ်) ဘၣ်ဆၣ် ခီဖျိလၢ အပီၢ်ယၢ်လီၤက့ၤသး နီၢ်ကီၢ်ကီၢ်အဃိ ယဟိဝၤယွၤ ပျၢ်ကွံာ် အတၢ်ကမၣ်. (၂ မူၤ ၁၂:၁၃) စီၤဒၤဝံး သ့ၣ်ညါဘၣ်ဝဲလၢ ယဟိဝၤယွၤ ပျၢ်ကွံာ်အတၢ်ကမၣ်အဃိ အသးခု.—စံး ၃၂:၁.

^၂ ပဝဲစ့ၢ်ကီး ဖဲပသ့ၣ်ညါလၢ ယဟိဝၤယွၤ ပာ်ဖျါထီၣ် တၢ်သးကညီၤ လၢပဖီခိၣ် ဒီးပျၢ်ကွံာ် ပတၢ်ကမၣ်အခါ ပသးခု. တကးဒံးဘၣ် ပမ့ၢ်မၤဘၣ် တၢ်ကမၣ်ဖးဒိၣ် သနာ်က့ ပမ့ၢ်ပီၢ်ယၢ်လီၤက့ၤသး, တဲဖျါထီၣ် ပတၢ်ကမၣ် ဒီးတမၤကဒီးတၢ်ကမၣ် တခါလီၢ်လီၢ်ဘၣ်န့ၣ် ပသ့ၣ်ညါလၢ ယဟိဝၤယွၤ သးအိၣ်ပျၢ်ကွံာ် ပတၢ်ကမၣ်. (ကတိၤ ၂၈:၁၃; မၤတၢ် ၂၆:၂၀; ၁ ယိၤ ၁:၉) ဒီးဖဲယဟိဝၤယွၤ ပျၢ်ကွံာ် ပတၢ်ကမၣ်အခါ အပျၢ်ကွံာ်ဝဲ လၢာ်လၢာ်ဆ့ဆ့ ဒီးအတစံၣ်ညီၣ်ပှၤလၢ တၢ်ကမၣ်လၢ ပမၤတ့ၢ်အဃိဘၣ်.—ဃ့း ၃၃:၁၆.

၃-၄. ဒီပုၢ်ဝဲၢ်မုၣ်တဂၤ ဒိးဘျၢထံဝံၤသနာ်က့ အတူၢ်ဘၣ်ဝဲဒ်လဲၣ် ဒီးလၢတၢ်မၤလိအံၤ ပကတဲသကိး တၢ်ဂ့ၢ်မနုၤလဲၣ်.

^၃ ဘၣ်ဆၣ် တဘျီတခီၣ်န့ၣ် ပကဆိကမိၣ်လၢ ယဟိဝၤယွၤ တပျၢ်ကွံာ် ပတၢ်ကမၣ် နီၢ်ကီၢ်ကီၢ်ဘၣ်. ဆိကမိၣ်ကွၢ် ကၠဲနံၤဖၢၤ အတၢ်လဲၤခီဖျိ. ကၠဲနံၤဖၢၤန့ၣ် အဒိၣ်ထီၣ်ဘၣ်လၢ တၢ်မ့ၢ်တၢ်တီအပူၤ. ဖဲအသးစၢ်အခါန့ၣ် အမၤတၢ်လၢ အတဂ့ၤဘၣ် ဒီးအအိၣ်မူ တၢ်အိၣ်မူခံမၠိ. လၢခံ တဘျုးနံၣ်န့ၣ် အဆီတလဲက့ၤ အတၢ်အိၣ်မူ, အဟ့ၣ်လုၢ်ထီၣ်သးလၢ ယဟိဝၤယွၤအအိၣ် ဒီးဒိးဘျၢထံ. အတဲဝဲ “လၢညါန့ၣ် ယမၤကမၣ်မုၣ်ကမၣ်ခွါ, သူတၢ်မူၤတၢ်ဘှီး, ကဲပှၤလၢအသးဒိၣ် ဒီးလၢယတၢ်အိၣ်မူပူၤန့ၣ် ယဆိကမိၣ်ထဲ ယကဃုစ့လီၤ. လံာ်စီဆှံ ပာ်ဖျါထီၣ်ဝဲလၢ ခီဖျိလၢ ယ့ၣ်ၡူး အတၢ်ပှ့ၤက့ၤအဃိ ယဟိဝၤယွၤပျၢ်ကွံာ် ပတၢ်ကမၣ်န့ၣ် ယသ့ၣ်ညါ. ယပီၢ်ယၢ်လီၤက့ၤသး ဒီးဃ့ပျၢ်တၢ်ကမၣ် လၢယဟိဝၤယွၤအအိၣ် သနာ်က့ ယတနာ်လၢ အပျၢ်ကွံာ် ယတၢ်ကမၣ် နီၢ်ကီၢ်ကီၢ်ဘၣ်.”

^၄ ဘၣ်သ့ၣ်သ့ၣ် နၤစ့ၢ်ကီး နကဆိကမိၣ်လၢ တၢ်ကမၣ်လၢ နမၤတ့ၢ် လၢအပူၤကွံာ်န့ၣ် ယဟိဝၤယွၤ တပျၢ်ကွံာ်ဝဲဒံးဘၣ်. ဘၣ်ဆၣ် ယဟိဝၤယွၤန့ၣ် အအိၣ်ဒီး တၢ်သးကညီၤအါမး. စီၤဒၤဝံးစ့ၢ်ကီး အမၤကမၣ်တၢ် သနာ်က့ အနာ်ဝဲသပှၢ်တၢၢ်လၢ ယဟိဝၤယွၤပျၢ်ကွံာ် အတၢ်ကမၣ်အဃိ အသးခု ဒီးယဟိဝၤယွၤ အဲၣ်ဒိးလၢ ပကသးခုဒ်န့ၣ်စ့ၢ်ကီး. အဃိ လၢတၢ်မၤလိအံၤ ပကတဲသကိး ဘၣ်ဃးဒီး ဘၣ်မနုၤအဃိ ပကဘၣ် နာ်သပှၢ်တၢၢ်လၢ ယဟိဝၤယွၤပျၢ်ကွံာ် ပတၢ်ကမၣ်လဲၣ် ဒီးဒ်သိး ပကနာ်ဒ်န့ၣ်အဂီၢ် တၢ်မနုၤကမၤစၢၤပှၤလဲၣ်.

ဘၣ်မနုၤအဃိ ပကဘၣ်နာ်သပှၢ်တၢၢ်လၢ ယဟိဝၤယွၤပျၢ်ကွံာ် ပတၢ်ကမၣ်လဲၣ်

၅. မုၣ်ကီၤလံၢ် အဲၣ်ဒိးဒုးဆိကမိၣ်ပှၤဒ်လဲၣ်. တဲဖျါထီၣ် တၢ်အဒိ.

^၅ ပမ့ၢ်နာ်သပှၢ်တၢၢ်လၢ ယဟိဝၤယွၤအဲၣ်ပှၤ ဒီးပျၢ်ကွံာ် ပတၢ်ကမၣ်န့ၣ် ပတနာ် မုၣ်ကီၤလံၢ် အတၢ်လံၣ်တၢ်လီဘၣ်. သ့ၣ်နီၣ်ထီၣ်လၢ မုၣ်ကီၤလံၢ် တိာ်ပာ်ဝဲလၢ အကမၤဟးဂီၤ ပတၢ်သးတီဒီး ယဟိဝၤယွၤ ဒီးတအဲၣ်ဒိးလၢ ပကဆဲးဘူၣ်ထီၣ်ဘါထီၣ် ယဟိဝၤယွၤလၢၤဘၣ်. ဒီးဒ်သိး အတၢ်တိာ်ပာ်အံၤ ကလၢပှဲၤထီၣ်အဂီၢ် အဂုာ်ကျဲးစၢး ဒုးဆိကမိၣ်ပှၤလၢ ယဟိဝၤယွၤ တပျၢ်ကွံာ် ပတၢ်ကမၣ်ဘၣ်. ဆိကမိၣ်ထီၣ်က့ၤ ပိာ်ခွါလၢ ဝ့ၢ်ကရံၣ်သူးပူၤ လၢအမၤကမၣ်မုၣ်ကမၣ်ခွါ ဒီးပှၤထုးထီၣ်ကွံာ်အီၤ လၢတၢ်အိၣ်ဖှိၣ်အပူၤန့ၣ် အဂ့ၢ်. (၁ ကရံၣ် ၅:၁, ၅, ၁၃) လၢခံ အပီၢ်ယၢ်လီၤက့ၤသး ဝံၤလံသနာ်က့ မုၣ်ကီၤလံၢ် အဲၣ်ဒိးလၢ တၢ်အိၣ်ဖှိၣ်ဖိ တပျၢ်ကွံာ် အတၢ်ကမၣ်ဘၣ် ဒီးတတူၢ်လိာ်က့ၤအီၤလၢ တၢ်အိၣ်ဖှိၣ်အပူၤဘၣ်. တၢ်အိၣ်ဖှိၣ်ဖိ မ့ၢ်တပျၢ်ကွံာ် အတၢ်ကမၣ်ဘၣ်န့ၣ် ပိာ်ခွါတဂၤအံၤ ကဆိကမိၣ်ဝဲလၢ ယဟိဝၤယွၤ တပျၢ်ကွံာ် အတၢ်ကမၣ်ဘၣ်. အဃိ အကသးအုးဒိၣ်မး တုၤလၢ အတအဲၣ်ဒိး ဘူၣ်ထီၣ်ဘါထီၣ် ယဟိဝၤယွၤလၢၤဘၣ်. ဆၢကတီၢ် ခဲအံၤစ့ၢ်ကီး မုၣ်ကီၤလံၢ် အတၢ်တိာ်ပာ် အိၣ်ဒ်သိးဒီး လၢညါလီၤ. ဒ်သိး ပတဘူၣ်ထီၣ်ဘါထီၣ် ယဟိဝၤယွၤ လၢၤတဂ့ၤအဂီၢ် မုၣ်ကီၤလံၢ် အဲၣ်ဒိးဒုးဆိကမိၣ်ပှၤလၢ ယဟိဝၤယွၤ တပျၢ်ကွံာ် ပတၢ်ကမၣ်ဘၣ်. ဘၣ်ဆၣ် မုၣ်ကီၤလံၢ် “အတၢ်ကူၣ်ထီၣ်ဖးလီၤတဖၣ်န့ၣ် ပသ့ၣ်ညါပာ်စၢၤလံ” အဃိ ပတနာ် အတၢ်လံၣ်တၢ်လီဘၣ်.—၂ ကရံၣ် ၂:၅-၁၁.

၆. ပမ့ၢ်ဆိကမိၣ်လၢ ယဟိဝၤယွၤ တပျၢ်ကွံာ် ပတၢ်ကမၣ် နီၢ်ကီၢ်ကီၢ်ဒံးဘၣ်န့ၣ် ပကဘၣ်မၤဒ်လဲၣ်.

^၆ ပမ့ၢ်နာ်သပှၢ်တၢၢ်လၢ ယဟိဝၤယွၤ ပျၢ်ကွံာ် ပတၢ်ကမၣ်န့ၣ် ပကသးခုထီၣ်က့ၤ. ဖဲပမၤကမၣ်တၢ်အခါ ပသးတမုာ်ဘၣ်. (စံး ၅၁:၁၇) ဒီးပတူၢ်ဘၣ်ဒ်န့ၣ်န့ၣ် အဂ့ၤ. ပတၢ်တူၢ်ဘၣ်အံၤ ကထိၣ်ဟူးထိၣ်ဂဲၤထီၣ်ပှၤလၢ ပကဆီတလဲက့ၤပသး ဒီးမၤက့ၤတၢ်လၢအဘၣ်. (၂ ကရံၣ် ၇:၁၀, ၁၁) ဘၣ်ဆၣ် ပမ့ၢ်ဆဲးဆိကမိၣ်လၢ ယဟိဝၤယွၤ တပျၢ်ကွံာ် ပတၢ်ကမၣ်ဘၣ်န့ၣ် ဘၣ်သ့ၣ်သ့ၣ် ပတအဲၣ်ဒိး ဘူၣ်ထီၣ်ဘါထီၣ်အီၤလၢၤဘၣ်. ပမ့ၢ်နာ်သပှၢ်တၢၢ်လၢ ယဟိဝၤယွၤ ပျၢ်ကွံာ် ပတၢ်ကမၣ်န့ၣ် ပတလိၣ် တူၢ်ဘၣ်လၢ ပတၢ်ကမၣ်အိၣ်လၢၤဘၣ်. ပကဆဲး ဘူၣ်ထီၣ်ဘါထီၣ်အီၤ ဒီးနာ်သပှၢ်တၢၢ်လၢ အဘၣ်သူၣ်ဘၣ်သးပှၤ ဒီးပကသးခုထီၣ်က့ၤ. ယဟိဝၤယွၤ အဲၣ်ဒိးလၢ ပကနာ်န့ၢ်အီၤဒ်န့ၣ်. (ကလီး ၁:၁၀, ၁၁; ၂ တံၤ ၁:၃) ဘၣ်ဆၣ် ယဟိဝၤယွၤ ပျၢ်ကွံာ် ပတၢ်ကမၣ် နီၢ်ကီၢ်ကီၢ်န့ၣ် ပနာ်န့ၢ်အီၤ ကသ့ဒ်လဲၣ်.

ဒ်သိး ပကနာ်သပှၢ်တၢၢ်လၢ ယဟိဝၤယွၤ ပျၢ်ကွံာ်ပတၢ်ကမၣ်အဂီၢ် တၢ်မနုၤကမၤစၢၤပှၤလဲၣ်

၇-၈. ယဟိဝၤယွၤ တဲဖျါထီၣ် အနီၢ်ကစၢ် တၢ်ဂ့ၤတၢ်ဝါ မနုၤလဲၣ် ဒီးပနာ်န့ၢ် တၢ်မနုၤသ့လဲၣ်. (၂ မိၤၡ့ ၃၄:၆, ၇)

^၇ ဆိကမိၣ် ဘၣ်ဃးဒီး ယဟိဝၤယွၤ တဲဖျါထီၣ် အနီၢ်ကစၢ် တၢ်ဂ့ၤတၢ်ဝါအဂ့ၢ်. အဒိ ဖဲယဟိဝၤယွၤ တဲတၢ်ဒီးစီၤမိၤၡ့ လၢကစၢၢ်စံၤနါအခါ အတဲဖျါထီၣ် အနီၢ်ကစၢ် တၢ်ဂ့ၤတၢ်ဝါ မနုၤလဲၣ်.a (ဖး ၂ မိၤၡ့ ၃၄:၆, ၇.) ယဟိဝၤယွၤန့ၣ် အတၢ်ဂ့ၤတၢ်ဝါ အိၣ်ဒီဒူၣ်ညါ ဒီးအတဲဘၣ် စီၤမိၤၡ့လၢ အကဲ “ကစၢ်ယွၤလၢ အသးကညီၤတၢ်, အသးဂ့ၤ.” အဃိ ဖဲပှၤလၢ အဘူၣ်ထီၣ်ဘါထီၣ် ယဟိဝၤယွၤတဂၤ မၤကမၣ်တၢ် ဒီးပီၢ်ယၢ်လီၤက့ၤသးအခါ မ့ၢ်ယဟိဝၤယွၤ တပျၢ်ကွံာ် အတၢ်ကမၣ်ဘၣ်ဧါ. ယဟိဝၤယွၤ မ့ၢ်တပျၢ်ကွံာ် ပှၤလၢအပီၢ်ယၢ်လီၤက့ၤသး အတၢ်ကမၣ်ဘၣ်န့ၣ် အကကဲ ကစၢ်ယွၤလၢ အသးအၢ ဒီးအတၢ်သးကညီၤ တအိၣ်ဘၣ်. ယဟိဝၤယွၤန့ၣ် အတကဲကစၢ်ယွၤ ဒ်န့ၣ်နီတစဲးဘၣ်.

^၈ ယဟိဝၤယွၤန့ၣ် အတလံၣ်တၢ် နီတဘျီဘၣ်. ဒီးဖဲအတဲလၢ အကဲကစၢ်ယွၤလၢ အသးကညီၤတၢ်အခါ ပသ့ၣ်ညါလၢ အတဲတၢ်မ့ၢ်တၢ်တီ. (စံး ၃၁:၅) အဃိ ပနာ်န့ၢ် အတၢ်ကတိၤသ့. ဒီးနမ့ၢ်ဆိကမိၣ်လၢ ယဟိဝၤယွၤ တပျၢ်ကွံာ် နတၢ်ကမၣ် ဒံးဘၣ်န့ၣ် သံကွၢ်လီၤနသးလၢ ‘ယဟိဝၤယွၤ ကဲပှၤလၢ အသးကညီၤတၢ် ဒီးအသးဂ့ၤအဃိ မ့ၢ်ယနာ်လၢ အကပျၢ်ကွံာ် ပှၤလၢအပီၢ်ယၢ်လီၤက့ၤသး အတၢ်ကမၣ် နီၢ်ကီၢ်ဧါ.’ နမ့ၢ်နာ်လၢ အပျၢ်ကွံာ် တၢ်ကမၣ် နီၢ်ကီၢ်န့ၣ် နနာ်သ့ သပှၢ်တၢၢ်လၢ အပျၢ်ကွံာ် နတၢ်ကမၣ်စ့ၢ်ကီး.

၉. ဘၣ်ဃးဒီး ယဟိဝၤယွၤ ပျၢ်ကွံာ် ပတၢ်ကမၣ်န့ၣ် စံးထီၣ်ပတြၢၤ ၃၂:၅ ပာ်ဖျါထီၣ်ဝဲဒ်လဲၣ်.

^၉ ဆိကမိၣ်ထံ ပှၤကွဲးလံာ်စီဆှံဖိ ကွဲးဖျါထီၣ် ဘၣ်ဃးဒီး ယဟိဝၤယွၤ ပျၢ်ကွံာ် ပတၢ်ကမၣ်အဂ့ၢ်. အဒိ ဘၣ်ဃးဒီး ယဟိဝၤယွၤ ပျၢ်ကွံာ် ပတၢ်ကမၣ် အဂ့ၢ်န့ၣ် စီၤဒၤဝံး ကွဲးဖျါထီၣ်ဝဲဒ်လဲၣ်. (ဖး စံးထီၣ်ပတြၢၤ ၃၂:၅.) စီၤဒၤဝံး တဲဝဲလၢ “နပျၢ်ကွံာ် ယတၢ်ကမၣ် ဒီးယတၢ်ဒဲးဘးတဖၣ်.” ဧ့ၤဘြံၤ အတၢ်ကတိၤ “ပျၢ်ကွံာ်” န့ၣ် အဲၣ်ဒိးတဲစ့ၢ်ကီးဝဲ “စိာ်ထီၣ်” မ့တမ့ၢ် “ထုးထီၣ်ကွံာ်.” အဃိ ဖဲယဟိဝၤယွၤ ပျၢ်ကွံာ် စီၤဒၤဝံး အတၢ်ကမၣ်အခါ လီၤဂာ်ဒ်သိးဒီး ယဟိဝၤယွၤ ထုးထီၣ်ကွံာ် တၢ်ဝံဃၢလၢ စီၤဒၤဝံးယိးဝဲ. စီၤဒၤဝံး သ့ၣ်ညါဘၣ်ဝဲလၢ ယဟိဝၤယွၤ ပျၢ်ကွံာ် အတၢ်ကမၣ် လၢာ်လၢာ်ဆ့ဆ့အဃိ အသးခုထီၣ်က့ၤ. (စံး ၃၂:၂-၄) ပမ့ၢ်ပီၢ်ယၢ်လီၤက့ၤသး နီၢ်ကီၢ်ကီၢ်န့ၣ် ပတလိၣ် သးဟးဂီၤလၢၤဘၣ်. ယဟိဝၤယွၤ ထုးထီၣ်ကွံာ် ပတၢ်ဝံဃၢ ခီဖျိအပျၢ်ကွံာ် ပတၢ်ကမၣ် လၢာ်လၢာ်ဆ့ဆ့အဃိ ပသးခုထီၣ်က့ၤ ဒ်သိးဒီး စီၤဒၤဝံးသ့.

၁၀-၁၁. တၢ်ကတိၤ “ပျၢ်ကွံာ်တၢ်ကမၣ်ညီ” န့ၣ် သိၣ်လိပှၤ ယဟိဝၤယွၤ အဂ့ၢ်ဒ်လဲၣ်. (စံးထီၣ်ပတြၢၤ ၈၆:၅)

^၁၀ ဖး စံးထီၣ်ပတြၢၤ ၈၆:၅. စီၤဒၤဝံး တဲဝဲလၢ ယဟိဝၤယွၤန့ၣ် အ “ပျၢ်ကွံာ်တၢ်ကမၣ်ညီ.” တၢ်ကတိၤအံၤ အဲၣ်ဒိးတဲဝဲလၢ ဖဲပမၤကမၣ်တၢ်အခါ ယဟိဝၤယွၤ တသးထီၣ်တၢ် ချ့ချ့ဘၣ်. ဒီးပမ့ၢ်ပီၢ်ယၢ်လီၤက့ၤသးန့ၣ် အသးအိၣ်ပျၢ်ကွံာ် ပတၢ်ကမၣ်ထီဘိ. ဘၣ်မနုၤအဃိ အသးအိၣ် ပျၢ်ကွံာ် တၢ်ကမၣ်လဲၣ်. လံာ်စီဆှံ အဆၢဖိအံၤ ဆဲးတဲဝဲလၢ “နတၢ်အဲၣ်လၢအတီ အိၣ်ဝဲအါမးလၢ ပှၤလၢအကိးထီၣ်နၤတဖၣ် အဖီခိၣ်လီၤ.” တၢ်မၤလိလၢ အပူၤကွံာ်တခါန့ၣ် ပမၤလိဘၣ်လၢ ယဟိဝၤယွၤ အၢၣ်လီၤဝဲလၢ အကပာ်ဖျါထီၣ် တၢ်အဲၣ်လၢအတီ လၢပှၤလၢအအဲၣ်အီၤတဖၣ် အဖီခိၣ် ဒီးအတပာ်တ့ၢ် အဝဲသ့ၣ် နီတဘျီဘၣ်. အဃိ ပှၤလၢအအဲၣ်အီၤတဖၣ် မ့ၢ်မၤဘၣ် တၢ်ကမၣ် ဒီးပီၢ်ယၢ်လီၤက့သးန့ၣ် ယဟိဝၤယွၤ ကဆဲးပာ်ဖျါထီၣ် တၢ်အဲၣ်လၢအတီ ဒီးကပျၢ်ကွံာ် အဝဲသ့ၣ်အတၢ်ကမၣ် လၢာ်လၢာ်ဆ့ဆ့. (ၡါ ၅၅:၇) နမ့ၢ်ဆိကမိၣ်လၢ ယဟိဝၤယွၤ တပျၢ်ကွံာ် နတၢ်ကမၣ် ဒံးဘၣ်န့ၣ် ဆိကမိၣ်ကွၢ် တၢ်ဂ့ၢ်အံၤ. နမ့ၢ်နာ်လၢ ယဟိဝၤယွၤ သးအိၣ်ပျၢ်ကွံာ် ပှၤခဲလၢာ် လၢအပီၢ်ယၢ်လီၤက့ၤသး ဒီးဃ့ပျၢ်အတၢ်ကမၣ် လၢယဟိဝၤယွၤ အအိၣ်န့ၣ် ဖဲနပီၢ်ယၢ်လီၤက့ၤသး ဒီးဃ့ပျၢ်နတၢ်ကမၣ်အခါ နနာ်သ့လၢ ယဟိဝၤယွၤ ကသးအိၣ်ပျၢ်ကွံာ် နတၢ်ကမၣ်စ့ၢ်ကီး.

^၁၁ လံာ်စီဆှံ တဲဘၣ်ပှၤလၢ ပဘၣ်တၢ်တ့လီၤပှၤဒ်လဲၣ် ဒီးပကဲပှၤတလၢတပှဲၤဘၣ်န့ၣ် ယဟိဝၤယွၤ သ့ၣ်ညါဝဲ လီၤတံၢ်လီၤဆဲး. ပသ့ၣ်ညါဘၣ် ဒ်န့ၣ်အဃိ ပသးမုာ်ဒိၣ်မး. (စံး ၁၃၉:၁, ၂) ဒ်သိး ပကနာ် သပှၢ်တၢၢ်လၢ ယဟိဝၤယွၤ ပျၢ်ကွံာ် ပတၢ်ကမၣ်အဂီၢ် ပကဆဲးကွၢ်သကိး ထါစံးထီၣ်ပတြၢၤ အဂၤတယုၢ်လၢ စီၤဒၤဝံးကွဲးဝဲ.

ဘၣ်ဃးဒီးပှၤန့ၣ် ယဟိဝၤယွၤ သ့ၣ်နီၣ်ထီၣ်က့ၤဝဲ မနုၤလဲၣ်

၁၂-၁၃. ဘၣ်ဃးဒီးပှၤန့ၣ် ယဟိဝၤယွၤ သ့ၣ်နီၣ်ထီၣ်က့ၤဝဲ မနုၤလဲၣ် ဒီးယဟိဝၤယွၤ ရ့ဒီးပှၤဒ်လဲၣ်. (စံးထီၣ်ပတြၢၤ ၁၀၃:၁၄)

^၁၂ ဖး စံးထီၣ်ပတြၢၤ ၁၀၃:၁၄. ဘၣ်မနုၤအဃိ ယဟိဝၤယွၤ သးအိၣ်ပျၢ်ကွံာ် ပှၤလၢအပီၢ်ယၢ်လီၤက့ၤသး အတၢ်ကမၣ်လဲၣ်န့ၣ် စီၤဒၤဝံး တဲဖျါထီၣ်ဝဲ တၢ်ဂ့ၢ်တထံၣ်. အတဲဝဲလၢ ယဟိဝၤယွၤ “သ့ၣ်နီၣ်ထီၣ်က့ၤဝဲလၢ ပမ့ၢ်ဟီၣ်ခိၣ်ကမူၣ်.” တၢ်ကတိၤအံၤ အဲၣ်ဒိးတဲဝဲလၢ ပတလၢတပှဲၤဘၣ်န့ၣ် ယဟိဝၤယွၤ သ့ၣ်ညါဝဲဂ့ၤဂ့ၤ. စီၤဒၤဝံး အဲၣ်ဒိးတဲဝဲ မနုၤလဲၣ်န့ၣ် ပကဆဲးကွၢ်အါထီၣ်.

^၁၃ စီၤဒၤဝံး တဲဝဲလၢ “ပဘၣ်တၢ်တ့လီၤပှၤဒ်လဲၣ်န့ၣ် ကစၢ်ယွၤ သ့ၣ်ညါဝဲဂ့ၤဂ့ၤ.” အဒိ စီၤအၤဒၣ်န့ၣ် ယဟိဝၤယွၤ တ့လီၤအီၤလၢ “ဟီၣ်ခိၣ်ကမူၣ်.” အဃိ ယဟိဝၤယွၤ သ့ၣ်ညါဝဲလၢ ပှၤဟီၣ်ခိၣ်ဖိ ကဘၣ်အီၣ်တၢ်, ကဘၣ်မံ ဒီးကဘၣ်ကသါ. ဒီးပှၤလၢပှၤပှဲၤစ့ၢ်ကီး အလိၣ်ဘၣ် တၢ်သ့ၣ်တဖၣ်အံၤ. (၁ မိၤ ၂:၇) ဘၣ်ဆၣ် နီၢ်အံၣ်အု ဒီးစီၤအၤဒၣ် မၤတၢ်ဒဲးဘးဝံၤအလီၢ်ခံ တၢ်ကတိၤ လၢအမ့ၢ် “ပမ့ၢ်ဟီၣ်ခိၣ်ကမူၣ်” န့ၣ် အဲၣ်ဒိးတဲစ့ၢ်ကီးဝဲလၢ ခီဖျိလၢ ပန့ၢ်သါဘၣ် တၢ်ဒဲးဘးအဃိ ပအိၣ်ဒီး တၢ်ဂံၢ်စၢ်ဘါစၢ်. အဃိ ဒ်သိး ပတမၤကမၣ်တၢ် တဂ့ၤအဂီၢ် ပဘၣ်ဂုာ်ကျဲးစၢး တြီဆၢကွံာ်သပှၢ်ပှၢ်. ဘၣ်ဃးဒီး ပတၢ်အိၣ်သးအံၤ ယဟိဝၤယွၤ သ့ၣ်ညါဝဲဂ့ၤဂ့ၤ. ဘၣ်ဆၣ် ဖဲစီၤဒၤဝံး တဲဝဲလၢ ယဟိဝၤယွၤ “သ့ၣ်နီၣ်ထီၣ်က့ၤဝဲ” လၢပမ့ၢ် ဟီၣ်ခိၣ်ကမူၣ်အခါ အအဲၣ်ဒိး တဲစ့ၢ်ကီးဝဲလၢ ယဟိဝၤယွၤ သ့ၣ်ညါဝဲလၢ ပကဲပှၤတၢ်ဒဲးဘးဖိ အဃိ ပကမၤကမၣ်ဘၣ်တၢ်. သနာ်က့ အသးဂ့ၤ လၢပဖီခိၣ်ထီဘိ. ဒီးယဟိဝၤယွၤ သ့ၣ်ညါဝဲလၢ တဘျီတခီၣ်န့ၣ် ပကမၤကမၣ်ဘၣ်တၢ် ဘၣ်ဆၣ် အမ့ၢ်ထံၣ်ဝဲလၢ ပပီၢ်ယၢ်လီၤက့ၤသး နီၢ်ကီၢ်န့ၣ် အသးကညီၤပှၤ ဒီးပျၢ်ကွံာ် ပတၢ်ကမၣ်.—စံး ၇၈:၃၈, ၃၉.

၁၄. (က) ဘၣ်ဃးဒီး ယဟိဝၤယွၤ ပျၢ်ကွံာ် ပတၢ်ကမၣ်န့ၣ် စီၤဒၤဝံးတဲဒံးဝဲ တၢ်ဂ့ၢ်မနုၤလဲၣ်. (စံးထီၣ်ပတြၢၤ ၁၀၃:၁၂) (ခ) ဘၣ်ဃးဒီး ယဟိဝၤယွၤ ပျၢ်ကွံာ် စီၤဒၤဝံး အတၢ်ကမၣ်န့ၣ် ပန့ၢ်ဘၣ် တၢ်မၤလိဒ်လဲၣ်. (ကွၢ်တၢ်လွံၢ်နၢၣ် လၢအမ့ၢ် “ယဟိဝၤယွၤ ပျၢ်ကွံာ် ပတၢ်ကမၣ် ဒီးအသးပ့ၤနီၣ်ကွံာ်ဝဲ.”)

^၁၄ ဘၣ်ဃးဒီး ယဟိဝၤယွၤ ပျၢ်ကွံာ် ပတၢ်ကမၣ်န့ၣ် စံးထီၣ်ပတြၢၤ ၁၀၃ ဒုးသ့ၣ်ညါပှၤ တၢ်ဂ့ၢ်မနုၤဒံးလဲၣ်. (ဖး စံးထီၣ်ပတြၢၤ ၁၀၃:၁၂.) စီၤဒၤဝံး တဲဝဲလၢ ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ လီၤဂာ်ဒ်သိးဒီး အပာ်ယံၤကွံာ် ပတၢ်ကမၣ်ဒီးပှၤ “ဒ်မုၢ်ထီၣ် ယံၤဝဲဒီး မုၢ်နုာ်အသိး.” ပမ့ၢ်ဘၣ်ကွၢ် မုၢ်ထီၣ်န့ၣ် အအိၣ်ယံၤဒီး မုၢ်နုာ်ဖးယံၤညါ ဒီးမုၢ်ဟဲထီၣ် ဒီးမုၢ်လီၤနုာ်န့ၣ် တထံၣ်လိာ်သး နီတဘျီဘၣ်. အဃိ ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ လီၤဂာ်ဒ်သိးဒီး အပာ်ယံၤကွံာ် ပတၢ်ကမၣ်ဒီးပှၤ ဖးယံၤ. ဒီးအတဆိကမိၣ်ထီၣ်က့ၤဝဲ, အတဒုးသ့ၣ်နီၣ်ထီၣ်က့ၤပှၤ ဒီးအတစံၣ်ညီၣ်ပှၤလၢ တၢ်ကမၣ်လၢ ပမၤတ့ၢ်န့ၣ် နီတဘျီလၢၤဘၣ်.—ဃ့း ၁၈:၂၁, ၂၂; မၤတၢ် ၃:၁၉.

၁၅. ပမ့ၢ်ဆိကမိၣ်လၢ ယဟိဝၤယွၤ တပျၢ်ကွံာ် ပတၢ်ကမၣ်ဒံးဘၣ်န့ၣ် ပမၤမနုၤသ့လဲၣ်.

^၁၅ ပမ့ၢ်ဆိကမိၣ်လၢ ယဟိဝၤယွၤ တပျၢ်ကွံာ် ပတၢ်ကမၣ်ဒံးဘၣ်န့ၣ် စီၤဒၤဝံး အတၢ်ကတိၤဖဲ စံးထီၣ်ပတြၢၤ ၁၀၃ ကမၤစၢၤပှၤဒ်လဲၣ်. ပမ့ၢ်တူၢ်ဘၣ်လၢ ပတၢ်ကမၣ်အိၣ်ဒံးန့ၣ် ပသံကွၢ်လီၤပသး ဒ်အံၤသ့. ‘ယဟိဝၤယွၤ သ့ၣ်ညါဝဲလၢ ယကဲပှၤတၢ်ဒဲးဘးဖိန့ၣ် မ့ၢ်ယနီၣ်ဘၣ်ဒံးဧါ. ယဟိဝၤယွၤ ပျၢ်ကွံာ် ယတၢ်ကမၣ် ဒီးတစံၣ်ညီၣ်ယၤလၢ ယတၢ်ကမၣ်အဃိ လၢၤဘၣ်န့ၣ် မ့ၢ်ယနီၣ်ဘၣ်ဒံးဧါ.’ ပတၢ်ကမၣ်လၢ ပမၤတ့ၢ် လၢအပူၤကွံာ်န့ၣ် ယဟိဝၤယွၤ တသ့ၣ်နီၣ်ထီၣ်က့ၤဝဲ လၢၤဘၣ်အဃိ ပတကြၢး ဆိကမိၣ်စ့ၢ်ကီး အဂ့ၢ်လၢၤဘၣ်. (စံး ၁၃၀:၃) ပမ့ၢ်နာ်သပှၢ်တၢၢ်လၢ ယဟိဝၤယွၤ ပျၢ်ကွံာ် ပတၢ်ကမၣ်န့ၣ် ပတလိၣ်တူၢ်ဘၣ်လၢ ပတၢ်ကမၣ်အိၣ်လၢၤဘၣ် ဒီးပကဆဲး ဘူၣ်ထီၣ်ဘါထီၣ် ယဟိဝၤယွၤ လၢတၢ်သးခု.

၁၆. ပမ့ၢ်ဆိကမိၣ်က့ၤထဲ တၢ်ကမၣ်လၢ ပမၤတ့ၢ်အီၤ လၢအပူၤကွံာ်န့ၣ် ဘၣ်မနုၤအဃိ အလီၤဘၣ်ယိၣ်လဲၣ်. တဲဖျါထီၣ် တၢ်အဒိ. (ကွၢ်စ့ၢ်ကီးတၢ်ဂီၤ.)

^၁၆ ဆိကမိၣ်ကွၢ် တၢ်အဒိအံၤ. ဖဲပှၤတဂၤ နီကါအခါ ဒ်သိး အကသ့ၣ်ညါ တၢ်ကကဲထီၣ်သး လၢအလီၢ်ခံအဂီၢ် အကွၢ်ဝဲ မဲာ်ထံကလၤလၢ အထံၣ်စိတၢ်လၢ အလီၢ်ခံသ့. ဘၣ်ဆၣ် အမ့ၢ်ကွၢ်တၢ်လၢ အလီၢ်ခံ ခဲအံၤခဲအံၤန့ၣ် တၢ်ဘၣ်ယိၣ် ကအိၣ်ဝဲ. ဒ်သိး တၢ်လီၤဘၣ်ယိၣ် တအိၣ်တဂ့ၤအဂီၢ် ဖဲအနီကါအခါ အကဘၣ် ဆဲးကွၢ်တၢ်လၢ တၢ်မဲာ်ညါ. ဒ်န့ၣ်အသိး တဘျီတခီၣ် ပမ့ၢ်ဆိကမိၣ်ထီၣ်က့ၤ တၢ်ကမၣ်လၢ ပမၤတ့ၢ် လၢအပူၤကွံာ်န့ၣ် ကမၤစၢၤပှၤဒ်သိး ပတမၤကမၣ်တၢ်လၢၤဘၣ်. ဘၣ်ဆၣ် ပမ့ၢ်ဆိကမိၣ်က့ၤထဲ တၢ်ဂ့ၢ်တဖၣ်န့ၣ် ပတသးခုလၢၤဘၣ် ဒီးဘၣ်သ့ၣ်သ့ၣ် ပတဘၣ်သးဆဲးမၤ ယဟိဝၤယွၤ အတၢ်မၤ လၢအဂ့ၤကတၢၢ်လၢၤဘၣ်. အဃိ မ်ပကသးစၢၢ်ဆၢလၢ ပကမၤ ယဟိဝၤယွၤ အတၢ်မၤ ဒီးဆဲးဆိကမိၣ်ထံ အတၢ်အၢၣ်လီၤ ဘၣ်ဃးဒီး “တၢ်အလီၢ်လံၤတဖၣ်န့ၣ် ပှၤတသ့ၣ်နီၣ်ထီၣ်က့ၤ အီၤလၢၤဘၣ်.”—ၡါ ၆၅:၁၇; ကတိၤ ၄:၂၅.

ဆဲးနာ်သပှၢ်တၢၢ်လၢ ယဟိဝၤယွၤအဲၣ်နၤ ဒီးသးအိၣ်ပျၢ်ကွံာ် နတၢ်ကမၣ်

၁၇. ဘၣ်မနုၤအဃိ ပကဘၣ် နာ်သပှၢ်တၢၢ်လၢ ယဟိဝၤယွၤအဲၣ်ပှၤ ဒီးသးအိၣ်ပျၢ်ကွံာ် ပတၢ်ကမၣ်လဲၣ်.

^၁၇ ပကဘၣ် နာ်သပှၢ်တၢၢ်လၢ ယဟိဝၤယွၤအဲၣ်ပှၤ ဒီးထီဘိန့ၣ် အသးအိၣ်ပျၢ်ကွံာ် ပတၢ်ကမၣ်. (၁ ယိၤ ၃:၁၉) ဘၣ်မနုၤအဃိ ပကဘၣ်နာ်န့ၢ် ယဟိဝၤယွၤလဲၣ်. မုၣ်ကီၤလံၢ် အဲၣ်ဒိး ဒုးဆိကမိၣ်ပှၤလၢ ပကဲပှၤတၢ်ဒဲးဘးဖိအဃိ ယဟိဝၤယွၤ တအဲၣ်ပှၤဘၣ် ဒီးအတပျၢ်ကွံာ် ပတၢ်ကမၣ် နီတဘျီဘၣ်. မုၣ်ကီၤလံၢ် တိာ်ပာ်ဝဲလၢ အကမၤဟးဂီၤ ပတၢ်သးတီဒီး ယဟိဝၤယွၤ ဒီးတအဲၣ်ဒိးလၢ ပကဆဲးဘူၣ်ထီၣ်ဘါထီၣ် ယဟိဝၤယွၤလၢၤဘၣ်. တကးဒံးဘၣ် တၢ်အကတၢၢ် ဘူးထီၣ်ဒိၣ်မး ဒီးမုၣ်ကီၤလံၢ် သ့ၣ်ညါဝဲလၢ အတၢ်ဆၢကတီၢ် အိၣ်တ့ၢ်ထဲ တစဲးဖိအဃိ အကဂုာ်ကျဲးစၢးဝဲ အါန့ၢ်ဒံးအလီၢ်. (လီၣ် ၁၂:၁၂) ဘၣ်ဆၣ် ပကဘၣ် ဂုာ်ကျဲးစၢး တြီဆၢကွံာ်အီၤ ဒီးဆဲးတီဒီး ယဟိဝၤယွၤထီဘိ.

၁၈. ဒ်သိး ပကနာ်သပှၢ်တၢၢ်လၢ ယဟိဝၤယွၤအဲၣ်ပှၤ ဒီးသးအိၣ်ပျၢ်ကွံာ် ပတၢ်ကမၣ်အဂီၢ် ပကဘၣ်မၤဒ်လဲၣ်.

^၁၈ တၢ်မၤလိလၢ အပူၤကွံာ်တခါ ပာ်ဖျါထီၣ်ဝဲ တၢ်ဂ့ၢ်လၢ ကမၤစၢၤပှၤ ဒ်သိး ပကနာ်သပှၢ်တၢၢ်လၢ ယဟိဝၤယွၤအဲၣ်ပှၤ. ဒီးတၢ်မၤလိ တခါအံၤန့ၣ် ပာ်ဖျါထီၣ်ဝဲ တၢ်ဂ့ၢ်လၢ အမၤစၢၤပှၤ ဒ်သိး ပကနာ်သပှၢ်တၢၢ်လၢ ယဟိဝၤယွၤ သးအိၣ်ပျၢ်ကွံာ် ပတၢ်ကမၣ်. အဃိ ပကြၢးပာ်လီၤ တၢ်ဆၢကတီၢ်လၢ ပကဆိကမိၣ်ထံ တၢ်ဂ့ၢ်လၢ လံာ်စီဆှံ တဲဝဲဘၣ်ဃးဒီး ယဟိဝၤယွၤ ပျၢ်ကွံာ် တၢ်ကမၣ်အဂ့ၢ်. ဒီးပကဘၣ် သ့ၣ်နီၣ်ထီၣ်လၢ ပကဲပှၤတၢ်ဒဲးဘးဖိန့ၣ် ယဟိဝၤယွၤ သ့ၣ်ညါဝဲ ဒီးအကပာ်ဖျါထီၣ် တၢ်သးကညီၤ လၢပဖီခိၣ်. ပကြၢးသ့ၣ်နီၣ်ထီၣ်စ့ၢ်ကီးလၢ ဖဲယဟိဝၤယွၤ ပျၢ်ကွံာ် ပတၢ်ကမၣ်အခါ အပျၢ်ကွံာ်ဝဲ လၢာ်လၢာ်ဆ့ဆ့. ပသ့ၣ်ညါဘၣ်လၢ ယဟိဝၤယွၤ ပာ်ဖျါထီၣ်တၢ်သးကညီၤ လၢပဖီခိၣ် ဒီးသးအိၣ်ပျၢ်ကွံာ် ပတၢ်ကမၣ်အဃိ ပသးခုဒိၣ်မး. ဒီးဒ်စီၤဒၤဝံး တဲဝဲအသိး ပကတဲလၢ “ယဟိဝၤယွၤဧၢ ‘နပျၢ်ကွံာ် ယတၢ်ကမၣ် ဒီးယတၢ်ဒဲးဘးတဖၣ်’ အဃိ တၢ်ဘျုးဒိၣ်မး.”—စံး ၃၂:၅.