တၢ်မၤလိ ၃၉
တၢ်သးဝံၣ် ၅၄ “ကျဲအိၣ်လၢအံၤ”
ပှၤလၢအသးအိၣ်မၤလိ ကစၢ်ယွၤအဂ့ၢ်န့ၣ် မၤစၢၤအီၤတဘျီဃီ
“ပှၤသးဘျၢလၢ အဂုာ်ကျဲးစၢး ဒ်သိးကန့ၢ်ဘၣ် တၢ်မူအထူအယိာ်အဂီၢ် ကိးဂၤဒဲးန့ၣ် ကဲထီၣ် ပှၤစူၢ်က့ၤနာ်က့ၤတၢ်လီၤ.”—မၤတၢ် ၁၃:၄၈.
တၢ်ဂ့ၢ်မိၢ်ပှၢ်
ပစးထီၣ်တၢ်မၤလိ လံာ်စီဆှံ ဒီးကွဲမုာ်ပှၤဂၤလၢ ပတၢ်အိၣ်ဖှိၣ်န့ၣ် အရ့ဒိၣ်ဒိၣ်မး.
၁. ဖဲပတဲဘၣ်ပှၤဂၤ လံာ်စီဆှံ တၢ်မ့ၢ်တၢ်တီအခါ ပှၤတနီၤ မၤဝဲဒ်လဲၣ်. (မၤတၢ် ၁၃:၄၇, ၄၈; ၁၆:၁၄, ၁၅)
ဖဲတၢ်မၢဖိအစိၤန့ၣ် ပှၤအါဂၤတူၢ်လိာ်ဝဲ လံာ်စီဆှံ တၢ်မ့ၢ်တၢ်တီလၢ အဝဲသ့ၣ် နၢ်ဟူဘၣ်ဝဲ. (ဖး မၤတၢ် ၁၃:၄၇, ၄၈; ၁၆:၁၄, ၁၅.) ခဲအံၤစ့ၢ်ကီး ဖဲပှၤတနီၤ နၢ်ဟူဘၣ် တၢ်သးခုကစီၣ် အဆိကတၢၢ် တဘျီအခါ အဝဲသ့ၣ်သးခုဒိၣ်မး. ခီၣ်ထံးခါ ပှၤတနီၤလၢ တသးအိၣ် လံာ်စီဆှံ တၢ်မ့ၢ်တၢ်တီဘၣ်န့ၣ် လၢခံအဝဲသ့ၣ် အဲၣ်ဒိးမၤလိ ကစၢ်ယွၤအဂ့ၢ် ဒီးဘူၣ်ထီၣ်ဘါထီၣ်အီၤ. အဃိ ဖဲပထံၣ်ဘၣ် ပှၤလၢအသးအိၣ်မၤလိ လံာ်စီဆှံ ဒီးကစၢ်ယွၤ အဂ့ၢ်အခါ ပကြၢးမၤဒ်လဲၣ်.
၂. ဘၣ်မနုၤအဃိ ပတၢ်စံၣ်တဲၤတဲလီၤတၢ်မၤန့ၣ် လီၤဂာ်ဒ်သိးဒီး ပှၤသူၣ်တၢ်ဖိ အတၢ်မၤလဲၣ်.
၂ ပတၢ်စံၣ်တဲၤတဲလီၤ အတၢ်မၤန့ၣ် လီၤဂာ်ဒ်သိးဒီး ပှၤသူၣ်တၢ်ဖိ အတၢ်မၤ. အဒိ တၤသူတၤသၣ် လၢကရၢၢ်ပူၤ တနီၤန့ၣ် အမံချ့န့ၢ်ဒံး တၤသူတၤသၣ်အဂၤ. အဃိ ပှၤသူၣ်တၢ်ဖိတဂၤ ကဘၣ်ဒဲးဝဲ တဘျီဃီ. ဘၣ်ဆၣ် တၤသူတၤသၣ် အဂၤလၢ အတမံဒံးဘၣ်န့ၣ် အကဘၣ် ဆဲးလူန့ၢ်အထံ ဒီးကွၢ်ကတီၤဝဲဒံး. ဒ်န့ၣ်အသိး ဖဲပထံၣ်ဘၣ် ပှၤလၢအသးအိၣ်မၤလိ လံာ်စီဆှံ ဒီးကစၢ်ယွၤ အဂ့ၢ်အခါ ပကဘၣ် ဂုာ်ကျဲးစၢး မၤစၢၤအီၤဒ်သိး အကကဲထီၣ် ယ့ၣ်ၡူးခရံာ် အပျဲၢ်အဘီၣ် တဘျီဃီ. သနာ်က့ ပှၤလၢတသးအိၣ် လံာ်စီဆှံ တၢ်မ့ၢ်တၢ်တီ ဒံးဘၣ်န့ၣ် ပဆဲးမၤစၢၤအဝဲသ့ၣ် ဒ်သိးအကသ့ၣ်ညါလၢ အမ့ၢ်မၤလိ လံာ်စီဆှံ တၢ်မ့ၢ်တၢ်တီန့ၣ် အဝဲသ့ၣ် ကဒိးန့ၢ်ဘၣ်အဘျုး. (ယိၤ ၄:၃၅, ၃၆) အဃိ တၢ်သ့ပဲာ်ထံနီၤဖးတၢ် ကမၤစၢၤပှၤဒ်သိး ပကသ့ၣ်ညါလၢ ပှၤတဂၤသးအိၣ် လံာ်စီဆှံ တၢ်မ့ၢ်တၢ်တီဧါ တသးအိၣ်ဧါ ဒီးပမ့ၢ်သ့ၣ်ညါန့ၣ် ပမၤစၢၤအီၤကသ့. ဖဲပတဲသကိးတၢ်ဒီး ပှၤလၢအသးအိၣ်မၤလိ ကစၢ်ယွၤအဂ့ၢ် အဆိကတၢၢ် တဘျီအခါ ပမၤစၢၤအဝဲသ့ၣ် ကသ့ဒ်လဲၣ်. ဒီးဒ်သိး အဝဲသ့ၣ် အတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ် ဒီးအကဘူၣ်ထီၣ်ဘါထီၣ် ယဟိဝၤယွၤအဂီၢ် ပမၤစၢၤအဝဲသ့ၣ် ကသ့ဒ်လဲၣ်. ပကတဲသကိး တၢ်ဟ့ၣ်ကူၣ်တနီၤ.
ပှၤလၢအသးအိၣ်မၤလိ လံာ်စီဆှံ တၢ်မ့ၢ်တၢ်တီန့ၣ် ပမၤစၢၤအဝဲသ့ၣ် ကသ့ဒ်လဲၣ်
၃. ဖဲပထံၣ်ဘၣ် ပှၤလၢအသးအိၣ်မၤလိ လံာ်စီဆှံ တၢ်မ့ၢ်တၢ်တီအခါ ပကြၢးမၤ မနုၤလဲၣ်. (၁ ကရံၣ်သူး ၉:၂၆)
၃ ဖဲပထံၣ်ဘၣ် ပှၤလၢအသးအိၣ်မၤလိ လံာ်စီဆှံ တၢ်မ့ၢ်တၢ်တီအခါ ပကဘၣ် မၤစၢၤအဝဲသ့ၣ်လၢ ကမၤလိ ယဟိဝၤယွၤအဂ့ၢ် ဒီးကဲထီၣ်အသကိး တဘျီဃီ. အဃိ ဖဲပတဲသကိးတၢ်ဒီး အဝဲသ့ၣ် အဆိကတၢၢ် တဘျီအခါ ပကြၢးတဲဘၣ်အီၤ ပတၢ်မၤလိ လံာ်စီဆှံ အတၢ်ရဲၣ်တၢ်ကျဲၤ ဒီးကွဲမုာ်အီၤလၢ ကဟဲထီၣ်ပတၢ်အိၣ်ဖှိၣ် တဘျီဃီ.—ဖး ၁ ကရံၣ်သူး ၉:၂၆.
၄. တဲဖျါထီၣ် တၢ်အဒိ ဘၣ်ဃးဒီး ပှၤလၢအသးအိၣ်မၤလိ လံာ်စီဆှံ တၢ်မ့ၢ်တၢ်တီ တဘျီဃီအဂ့ၢ်.
၄ သံကွၢ်အီၤလၢ အအဲၣ်ဒိးမၤလိလံာ်စီဆှံဧါ. ပှၤတနီၤလၢ ပတဲသကိးတၢ်ဒီးအီၤန့ၣ် အဲၣ်ဒိးမၤလိလံာ်စီဆှံ တဘျီဃီ. အဒိ ဘၣ်ဖဲမုၢ်လွံၢ်နံၤ တနံၤန့ၣ် ပိာ်မုၣ်သးစၢ်တဂၤ လၢအအိၣ်လၢ ကီၢ်ခဲနဒၣ်န့ၣ် လဲၤလၢ တၢ်စံၣ်တဲၤတဲလီၤတၢ် အလ့ၣ်ဆီၣ် ဒီးဟံးန့ၢ်ဝဲ လံာ်ဘရိၣ်ခၠၣ် အိၣ်မူလီၤထူလီၤယိာ် ပှဲၤဒီးတၢ်သးခု. ဒီပုၢ်ဝဲၢ်မုၣ်တဂၤ တဲဘၣ်အီၤလၢ လံာ်တဘ့ၣ်အံၤ ပသူစ့ၢ်ကီးလၢ ကမၤလိလံာ်စီဆှံလၢ တလိၣ်ဟ့ၣ်အပှ့ၤဘၣ်. ပိာ်မုၣ်သးစၢ်အံၤ သးအိၣ်ဝဲ ဒီးဟ့ၣ်လီၤ ဒီပုၢ်ဝဲၢ်မုၣ်လၢ အလီတဲစိနီၣ်ဂံၢ်. လၢခံ ဖဲတၢ်တနံၤန့ၣ် ပိာ်မုၣ်သးစၢ်အံၤ ဆှၢမဲးစ့းလၢ ဒီပုၢ်ဝဲၢ်မုၣ်အအိၣ် ဒီးသံကွၢ်အီၤလၢ အဝဲသ့ၣ် ကမၤလိလံာ်စီဆှံ လၢအခါဖဲလဲၣ်. ဖဲဒီပုၢ်ဝဲၢ်မုၣ် တဲအီၤလၢ အကဟဲလၢ နွံကတၢၢ်အခါ ပိာ်မုၣ်သးစၢ်အံၤ တဲအီၤလၢ “ခဲမုၢ်ဆ့ၣ်န့ၣ် ယချုး. နၤမီၤ နဟဲချုးဧါ.” ဖဲမုၢ်ယဲၢ်နံၤန့ၣ် အဝဲသ့ၣ် မၤလိသကိးလံာ်စီဆှံ. ဒီးဖဲနွံကတၢၢ်န့ၣ် ပိာ်မုၣ်သးစၢ်အံၤ လဲၤထီၣ်တၢ်အိၣ်ဖှိၣ် အဆိကတၢၢ်တဘျီ ဒီးအဆဲးလဲၤထီၣ်လဲၤထီ လၢနီၢ်သးတခီချ့မး.
၅. ဒ်သိး ပှၤတနီၤ ကအဲၣ်ဒိးမၤလိ လံာ်စီဆှံအဂီၢ် ပကဘၣ်မၤဒ်လဲၣ်. (ကွၢ်စ့ၢ်ကီးတၢ်ဂီၤ.)
၅ သနာ်က့ ပှၤလၢအနၢ်ဟူ လံာ်စီဆှံ တၢ်မ့ၢ်တၢ်တီန့ၣ် အသးတဆူၣ်လၢ ကအဲၣ်ဒိးမၤလိ လံာ်စီဆှံ တဘျီဃီ ဒ်သိးဒီး ပိာ်မုၣ်သးစၢ် တဂၤန့ၣ်ဘၣ်. ပှၤတနီၤန့ၣ် ကလိၣ်ဘၣ်အါထီၣ် တၢ်ဆၢကတီၢ်. အဆိကတၢၢ်န့ၣ် ဘၣ်သ့ၣ်သ့ၣ် ပကဘၣ်တဲသကိး တၢ်ဂ့ၢ်လၢ အသးအိၣ်ဝဲ. ဒီးပမ့ၢ်ဆဲးအိၣ်ဒီး တၢ်ထံၣ်လၢအဂ့ၤ ဒီးပာ်ဖျါထီၣ် တၢ်သးအိၣ်န့ၣ် လၢခံ အကဘၣ်သး မၤလိလံာ်စီဆှံ. အဃိ ဖဲပသံကွၢ်အီၤလၢ အအဲၣ်ဒိးမၤလိလံာ်စီဆှံအခါ ပကဘၣ်တဲ အဝဲသ့ၣ်ဒ်လဲၣ်. ဒီပုၢ်ဝဲၢ်မုၣ်ခွါတနီၤန့ၣ် အဖၠဲးလၢ ကစးထီၣ် တၢ်မၤလိလံာ်စီဆှံဒီးပှၤဂၤ. အဝဲသ့ၣ် တဲဝဲဒ်လဲၣ်န့ၣ် ပကကွၢ်သကိး.
ဟံၣ်ကစၢ်လၢ အဖျါလၢတၢ်ဂီၤပူၤန့ၣ် ဒ်သိး အကအဲၣ်ဒိး မၤလိလံာ်စီဆှံအဂီၢ် နကတဲအီၤ တၢ်ဂ့ၢ်မနုၤလဲၣ် (ကွၢ်လံာ်အဆၢ ၅)a
၆. ဒ်သိး ပှၤလၢနတဲတၢ်ဒီးအီၤတဂၤ ကအဲၣ်ဒိးတဲတၢ်ဒီးနၤ လၢခံတဘျီအဂီၢ် နတဲအီၤ မနုၤသ့လဲၣ်.
၆ ဒီပုၢ်ဝဲၢ်မုၣ်ခွါလၢ အဖၠဲးလၢ ကစးထီၣ် တၢ်မၤလိ လံာ်စီဆှံဒီးပှၤဂၤန့ၣ် တဲဝဲဒ်အံၤ. လၢတၢ်လီၢ်တနီၤန့ၣ် ဖဲပတဲဘၣ်ပှၤဂၤ တၢ်မၤလိလံာ်စီဆှံ အတၢ်ရဲၣ်တၢ်ကျဲၤအခါ ပမ့ၢ်တသူ တၢ်ကတိၤဒ်သိးဒီး “တၢ်မၤလိ,” “တၢ်မၤလိလံာ်စီဆှံ” မ့တမ့ၢ် “သိၣ်လိနၤ” ဘၣ်န့ၣ်ကဂ့ၤ ဒိၣ်တစဲး. ဒ်သိး ပှၤလၢနတဲတၢ်ဒီးအီၤတဂၤ ကအဲၣ်ဒိးတဲတၢ်ဒီးနၤ လၢခံတဘျီအဂီၢ် ဘၣ်သ့ၣ်သ့ၣ် နတဲဒ်အံၤသ့. “တၢ်သံကွၢ် အရ့ဒိၣ်လၢ ပအဲၣ်ဒိးသ့ၣ်ညါ အတၢ်စံးဆၢန့ၣ် အအိၣ်လၢ လံာ်စီဆှံပူၤခဲလၢာ်.” မ့တမ့ၢ် “လံာ်စီဆှံန့ၣ် အတမ့ၢ်ထဲ တၢ်ဘူၣ်တၢ်ဘါ အလံာ်ဘၣ်. အမၤစၢၤပှၤလၢ ပတၢ်အိၣ်မူ ကိးသနၢၣ်ဒဲး.” ဝံၤဒီး နတဲဒ်အံၤသ့. “လၢစှၤကိာ်မံးနံး အတီၢ်ပူၤန့ၣ် နမၤလိန့ၢ် တၢ်ဂ့ၢ်တနီၤလၢ ကမၤစၢၤနၤလၢ နတၢ်အိၣ်မူပူၤသ့.” ဒီးဖဲနတဲတၢ်ဒီး ပှၤဂၤအခါ တဘၣ်တဲတၢ်ကတိၤ ဒ်သိးဒီး “ပာ်လီၤဃာ် တၢ်ဆၢကတီၢ် လီၤတံၢ်လီၤဆဲး” မ့တမ့ၢ် “မၤလိတၢ် ကိးနွံဒဲး” တဂ့ၤ. နမ့ၢ်တဲဒ်န့ၣ်န့ၣ် အကတူၢ်ဘၣ်လၢ အမူဒါအိၣ်လၢ ကဘၣ်မၤထွဲဒ် အအၢၣ်လီၤပာ်စၢၤဝဲ.
၇. ပှၤတနီၤန့ၣ် အသ့ၣ်ညါထီၣ် လံာ်စီဆှံ တၢ်မ့ၢ်တၢ်တီဖဲလဲၣ်. (၁ ကရံၣ်သူး ၁၄:၂၃-၂၅)
၇ ကွဲမုာ်အီၤလၢ ကဟဲထီၣ်တၢ်အိၣ်ဖှိၣ်. လၢတၢ်မၢဖိပီလူး အစိၤန့ၣ် ဖဲပှၤတနီၤလဲၤထီၣ် ခရံာ်ဖိတၢ်အိၣ်ဖှိၣ်အခါ တၢ်လၢအဝဲသ့ၣ် နၢ်ဟူဘၣ်ဝဲန့ၣ် အသ့ၣ်ညါထီၣ်ဝဲလၢ အကဲလံာ်စီဆှံ တၢ်မ့ၢ်တၢ်တီ. (ဖး ၁ ကရံၣ်သူး ၁၄:၂၃-၂၅.) ခဲအံၤစ့ၢ်ကီး ပှၤတနီၤလၢ အသးအိၣ်တၢ်မ့ၢ်တၢ်တီန့ၣ် ဖဲအဝဲသ့ၣ် လဲၤထီၣ်တၢ်အိၣ်ဖှိၣ်အခါ အဝဲသ့ၣ် လဲၤထီၣ်လဲၤထီ လၢနီၢ်သးတခီချ့မး. အဃိ ပကြၢးကွဲမုာ် ပှၤဂၤလၢ ကဟဲထီၣ်တၢ်အိၣ်ဖှိၣ် လၢအခါဖဲလဲၣ်. လံာ်လၢအမ့ၢ် အိၣ်မူလီၤထူလီၤယိာ် ပှဲၤဒီးတၢ်သးခု, တၢ်မၤလိ ၁၀ န့ၣ် အိၣ်ဒီး တၢ်ကွဲမုာ်လၢ ပှၤကဟဲထီၣ် တၢ်အိၣ်ဖှိၣ်. ဘၣ်ဆၣ် နကကွဲမုာ် ပှၤဂၤအဂီၢ် နတလိၣ်အိၣ်ခိး တုၤလၢ တၢ်မၤလိ ၁၀ ဘၣ်. ဖဲနတဲတၢ်ဒီးအီၤ အဆိကတၢၢ် တဘျီအခါ နကွဲမုာ်အီၤလၢ ကဟဲထီၣ် နွံကတၢၢ် တၢ်အိၣ်ဖှိၣ်သ့. ဘၣ်သ့ၣ်သ့ၣ် နတဲဘၣ်အီၤ တၢ်စံၣ်တဲၤတဲလီၤတၢ်လၢ ကမျၢၢ်အဂီၢ် အခိၣ်တီ မ့တမ့ၢ် တၢ်ဂ့ၢ်တမံၤမံၤလၢ တၢးထီခိးတၢ် တၢ်မၤလိ ဖဲတၢ်တနွံန့ၣ်သ့.
၈. ဖဲပကွဲမုာ် ပှၤလၢအသးအိၣ် တၢ်မ့ၢ်တၢ်တီ လၢကဟဲထီၣ် တၢ်အိၣ်ဖှိၣ်အခါ ပတဲဘၣ်အီၤ တၢ်ဂ့ၢ်မနုၤသ့လဲၣ်. (ယၡါယၤ ၅၄:၁၃)
၈ ဖဲပကွဲမုာ် ပှၤလၢအသးအိၣ် တၢ်မ့ၢ်တၢ်တီ လၢကဟဲထီၣ် တၢ်အိၣ်ဖှိၣ်အခါ ပကဘၣ် တဲပၠးအီၤလၢ ပမၤတၢ်အိၣ်ဖှိၣ် အတၢ်ရဲၣ်တၢ်ကျဲၤန့ၣ် အတဒ်သိးဒီး တၢ်ဘူၣ်တၢ်ဘါ အဂၤဘၣ်. ဖဲပှၤမၤလိလံာ်စီဆှံဖိတဂၤ ထံၣ်ဘၣ်ဝဲပမၤ တၢးထီခိးတၢ် တၢ်မၤလိ အဆိကတၢၢ် တဘျီအခါ အသံကွၢ် ပှၤလၢအမၤလိ လံာ်စီဆှံဒီးအီၤလၢ “ပှၤဖီၣ်မူဒါတဂၤန့ၣ် အသ့ၣ်ညါ ပှၤမံၤကိးဂၤဒဲးလီၤဧါ.” ဒီပုၢ်ဝဲၢ်မုၣ် တဲဘၣ်အီၤလၢ တၢ်အိၣ်ဖှိၣ်န့ၣ် အလီၤဂာ်ဒီး ဟံၣ်ဖိဃီဖိအဃိ ဒ်ပသ့ၣ်ညါ ပဟံၣ်ဖိဃီဖိ အမံၤအသိး ပဂုာ်ကျဲးစၢး တိၢ်နီၣ်ဃာ် ဒီပုၢ်ဝဲၢ်မုၣ်ခွါအမံၤ. ပှၤမၤလိလံာ်စီဆှံဖိ တဂၤန့ၣ် တဲဝဲလၢ လၢအသရိာ်န့ၣ် ပှၤအါတက့ၢ် တသ့ၣ်ညါလိာ်သးမံၤဘၣ်. ဒီးပတဲဘၣ်အီၤ ပတၢ်တိာ်ပာ်လၢ ပလဲၤထီၣ်တၢ်အိၣ်ဖှိၣ် အဂ့ၢ်သ့စ့ၢ်ကီး. (ဖး ယၡါယၤ ၅၄:၁၃.) ပတၢ်တိာ်ပာ်န့ၣ် မ့ၢ်ဒ်သိး ပကဘူၣ်ထီၣ်ဘါထီၣ် ယဟိဝၤယွၤ, မၤလိန့ၢ်တၢ်လၢအအိၣ် ဒီးဟ့ၣ်ဂံၢ်ဟ့ၣ်ဘါလိာ်သး. (ဧ့ၤ ၂:၁၂; ၁၀:၂၄, ၂၅) အဃိ ပတၢ်အိၣ်ဖှိၣ် အတၢ်ရဲၣ်တၢ်ကျဲၤန့ၣ် ကမၤစၢၤပှၤဒ်သိး ပကမၤလိတၢ် ဒီးပတမၤ တၢ်ဘူၣ်တၢ်ဘါ လုၢ်လၢ်နီတမံၤဘၣ်. (၁ ကရံၣ် ၁၄:၄၀) တကးဒံးဘၣ် ပတၢ်အိၣ်ဖှိၣ်လီၢ်န့ၣ် ပတ့အီၤယိယိဖိ ဒီးအကဲဝဲ တၢ်လီၢ်လၢ ပကမၤလိတၢ်အဂီၢ်. ဒီးခီဖျိလၢ ပအိၣ်လၢ တၢ်အိၣ်ဘၢၣ်စၢၤအဃိ ပတတဲထံဂ့ၢ်ကီၢ်ဂ့ၢ်ဘၣ်. ပတတဲအါလိာ်သး ဘၣ်ဃးဒီး ပနီၢ်ကစၢ်တၢ်ထံၣ် မ့တမ့ၢ် တၢ်ဂ့ၢ်အဂၤ တမံၤမံၤဘၣ်. တချုးလၢ ပှၤမၤလိလံာ်စီဆှံဖိ လဲၤထီၣ်တၢ်အိၣ်ဖှိၣ်ဒံးဘၣ်န့ၣ် ဒ်သိး အကသ့ၣ်ညါလၢ ဖဲပထီၣ်တၢ်အိၣ်ဖှိၣ်အခါ ပမၤမနုၤလဲၣ်အဂီၢ် ပဒုးနဲၣ်ဆိအီၤ တၢ်ဂီၤမူ လၢအမ့ၢ် ဖဲဘီမုၢ်ဘျီၣ်ဒိၣ်န့ၣ်ပှၤမၤတၢ်မနုၤလဲၣ် သ့စ့ၢ်ကီး.
၉-၁၀. ဖဲပကွဲမုာ် ပှၤတဂၤလၢ ကဟဲထီၣ်တၢ်အိၣ်ဖှိၣ်အခါ ဒ်သိးအဟဲဝဲ ကဘူၣ်အဂီၢ် ပတဲဘၣ်အီၤ မနုၤသ့လဲၣ်. (ကွၢ်စ့ၢ်ကီးတၢ်ဂီၤ.)
၉ ပှၤတနီၤန့ၣ် ဘၣ်ယိၣ်ဝဲလၢ အမ့ၢ်လဲၤထီၣ် ပတၢ်အိၣ်ဖှိၣ်န့ၣ် အကဘၣ်ကဲထီၣ် ယဟိဝၤပှၤအုၣ်အသး. အဃိ တဲဘၣ်အဝဲသ့ၣ်လၢ ဖဲပှၤတမှံၤ ဟဲထီၣ်ပတၢ်အိၣ်ဖှိၣ်အခါ ပသးခုဒိၣ်မး. ပတမၢဆူၣ်ပှၤဂၤလၢ ကပၣ်ဃုာ်လၢ တၢ်အိၣ်ဖှိၣ် တၢ်ရဲၣ်တၢ်ကျဲၤဘၣ်. ပကွဲမုာ် ဟံၣ်ဖိဃီဖိ ဃုာ်ဒီးဖိသၣ်စ့ၢ်ကီး. လၢပတၢ်အိၣ်ဖှိၣ်န့ၣ် ပှၤတပာ်ဖိသၣ်လၢ တၢ်လီၢ်အဂၤ တတီၤဘၣ်. မိပါဒီးဖိသၣ်တဖၣ် ဆ့ၣ်နီၤမၤလိသကိးတၢ် ဒ်သိးသိး. ပမၤဒ်အံၤအဃိ မိပါတဖၣ် တဘၣ်ယိၣ်တၢ်လၢ အဖိအဂီၢ်ဘၣ် ဒီးအဖိမၤလိဘၣ် တၢ်ဂ့ၢ်မနုၤလဲၣ်န့ၣ် အသ့ၣ်ညါဝဲစ့ၢ်ကီး. (၅ မိၤ ၃၁:၁၂) တဲဘၣ်အီၤလၢ ပတထၢတၢ်မၤဘူၣ်ဘၣ်. ပမၤထွဲ ယ့ၣ်ၡူးအတၢ်မၤလိာ်လၢ “သုန့ၢ်ဘၣ်ကလီတၢ်အဃိ ဟ့ၣ်ကလီတၢ်တက့ၢ်.” (မး ၁၀:၈) ဒီးတဲဘၣ်အီၤလၢ အတလိၣ်ကူကၤ တၢ်လၢအပှ့ၤဒိၣ်ဘၣ်. ကစၢ်ယွၤန့ၣ် အကွၢ်ပှၤသး ဒီးတမ့ၢ်တၢ်အိၣ်ဖျါလၢခိဘၣ်.—၁ မူၤ ၁၆:၇.
၁၀ ပှၤတဂၤ မ့ၢ်ဟဲထီၣ် တၢ်အိၣ်ဖှိၣ်န့ၣ် တူၢ်လိာ်မုာ်အီၤဂ့ၤဂ့ၤ. ဒုးသ့ၣ်ညါအီၤဒီး တၢ်အိၣ်ဖှိၣ်သးပှၢ် ဒီးဒီပုၢ်ဝဲၢ်မုၣ်ခွါတနီၤ. အမ့ၢ်ထံၣ်လၢ ပှၤရ့ဒီးအီၤဂ့ၤဂ့ၤ ဒီးသးအိၣ်အီၤန့ၣ် ဘၣ်သ့ၣ်သ့ၣ် အကအဲၣ်ဒိး ဟဲထီၣ်ကဒီး တၢ်အိၣ်ဖှိၣ်. အလံာ်စီဆှံ မ့ၢ်တအိၣ်ဘၣ်န့ၣ် ပၠးအီၤနလံာ်စီဆှံ ဒီးမၤစၢၤအီၤဒ်သိး အကနၢ်ပၢၢ် တၢ်ဂ့ၢ်လၢ ပှၤစံၣ်တဲၤတဲလီၤဝဲ ဒီးပမၤလိသကိးတၢ် ဒ်လဲၣ်အဂ့ၢ်.
ပှၤတဂၤ မ့ၢ်ဟဲထီၣ်တၢ်အိၣ်ဖှိၣ် တဘျီဃီန့ၣ် အကဒိးန့ၢ်ဘၣ် အဘျုးအါမး (ကွၢ်လံာ်အဆၢ ၉-၁၀)
ဖဲနမၤလိပှၤဂၤ လံာ်စီဆှံအခါ
၁၁. ဖဲပမၤလိပှၤဂၤ လံာ်စီဆှံအခါ ပကဘၣ်နီၣ်ဘၣ် တၢ်ဂ့ၢ်မနုၤလဲၣ်.
၁၁ ဖဲပမၤလိပှၤဂၤ လံာ်စီဆှံအခါ ပကဘၣ်နီၣ်ဘၣ် တၢ်ဂ့ၢ်မနုၤလဲၣ်. သ့ၣ်နီၣ်ထီၣ်လၢ ဟံၣ်ကစၢ်စ့ၢ်ကီး ကဘၣ်မၤတၢ်အဂၤ အိၣ်ဝဲအဃိ ပာ်ကဲအတၢ်ဆၢကတီၢ်. အဒိ လၢနအိၣ်တၢ်လီၢ်န့ၣ် ပှၤမ့ၢ်တပာ်ကဲ တၢ်ဆၢကတီၢ်ဘၣ် သနာ်က့ နမ့ၢ်ပာ်ပနီၣ်ဃာ် တၢ်ဆၢကတီၢ်လၢ ကမၤလိလံာ်စီဆှံအဂီၢ်န့ၣ် လဲၤဘၣ်ဆၢဘၣ်ကတီၢ်. ဒီးဖဲနမၤလိတၢ် အဆိကတၢၢ် တဘျီအခါ တဘၣ်မၤအီၤ ယံာ်ယံာ်တဂ့ၤ. ဒီပုၢ်ဝဲၢ်မုၣ်ခွါတနီၤ တဲဝဲလၢ ဟံၣ်ကစၢ် မ့ၢ်အဲၣ်ဒိး သ့ၣ်ညါအါထီၣ်ဒံးတၢ်ဂ့ၢ် သနာ်က့ ပမ့ၢ်မၤကတၢၢ် တၢ်မၤလိဆိဆိန့ၣ် ကဂ့ၤဒိၣ်တစဲး. ဒီးဖဲပမၤလိတၢ်အခါ ပတဘၣ်တဲတၢ် အါအါဘၣ်. ပကဘၣ်ပျဲ ဟံၣ်ကစၢ် တဲဖျါထီၣ် အတၢ်ထံၣ် ဒီးအတၢ်တူၢ်ဘၣ်.—ကတိၤ ၁၀:၁၉.
၁၂. ဖဲပစးထီၣ်မၤလိ လံာ်စီဆှံဒီး ပှၤဂၤအခါ ပကဘၣ် မၤစၢၤအီၤဒ်လဲၣ်.
၁၂ ဖဲပစးထီၣ်မၤလိ လံာ်စီဆှံဒီး ပှၤဂၤအခါ ပကဘၣ် မၤစၢၤအီၤဒ်သိး အကသ့ၣ်ညါထီၣ် ယဟိဝၤယွၤ ဒီးယ့ၣ်ၡူး. ဒီးမၤစၢၤအီၤလၢ အကမၤဂၢၢ်ကျၢၤထီၣ် အတၢ်အဲၣ်လၢ အဝဲသ့ၣ် အဖီခိၣ်. ပမၤစၢၤအီၤ ဒ်အံၤကသ့အဂီၢ် ပကဘၣ်ဒုးနဲၣ်အီၤ တၢ်လၢလံာ်စီဆှံတဲဝဲ ဒီးတဘၣ်တဲ အဝဲသ့ၣ်လၢ ပနီၢ်ကစၢ် တၢ်ဆိကမိၣ်ဘၣ်. (မၤတၢ် ၁၀:၂၅, ၂၆) တၢ်မၢဖိပီလူးန့ၣ် အပာ်လီၤန့ၢ်ပှၤ တၢ်အဒိလၢ အဂ့ၤဒိၣ်မး. ဖဲအသိၣ်လိပှၤဂၤအခါ အတဲဘၣ်ဃးဒီး ယ့ၣ်ၡူးခရံာ် လၢအမ့ၢ် ပှၤတဂၤလၢ ယဟိဝၤယွၤသူဝဲ ဒ်သိးကမၤစၢၤပှၤလၢ ပကသ့ၣ်ညါထီၣ်အီၤ ဒီးအဲၣ်အီၤ. (၁ ကရံၣ် ၂:၁, ၂) တကးဒံးဘၣ် စီၤပီလူး မၤစၢၤအဝဲသ့ၣ် ဒ်သိး အကမၤအိၣ်ထီၣ် တၢ်ဂ့ၤတၢ်ဝါ ဒ်သိးဒီး တၢ်နာ်, တၢ်ကူၣ်သ့, တၢ်သ့ပဲာ်ထံနီၤဖးတၢ် ဒီးတၢ်ပျံၤယဟိဝၤယွၤ. (စံး ၁၉:၉, ၁၀; ကတိၤ ၃:၁၃-၁၅; ၁ ပ့း ၁:၇) တၢ်ဂ့ၤတၢ်ဝါတဖၣ်အံၤ အလီၤဂာ် ဒ်သိးဒီး ထူ, စ့ ဒီးလၢၢ်လၢ အလုၢ်ဒိၣ်ပှ့ၤဒိၣ်တဖၣ်. (၁ ကရံၣ် ၃:၁၁-၁၅) အဃိ ပကဘၣ်ကွၢ်လိ စီၤပီလူး အဒိအတဲာ် ဒီးမၤစၢၤ ပှၤမၤလိလံာ်စီဆှံဖိဒ်သိး အတၢ်နာ် ကဂၢၢ်ကျၢၤထီၣ် ဒီးအိၣ်ဒီး တၢ်ရ့လိာ်သးဒီး ယဟိဝၤယွၤလၢအဂ့ၤ.—၂ ကရံၣ် ၁:၂၄.
၁၃. ဖဲပမၤစၢၤ ပပှၤမၤလိလံာ်စီဆှံဖိအခါ ပပာ်ဖျါထီၣ် တၢ်ဝံသးစူၤ ဒီးဆိကမိၣ်န့ၢ်တၢ်လၢအဂီၢ် ကသ့ဒ်လဲၣ်. (၂ ကရံၣ်သူး ၁၀:၄, ၅) (ကွၢ်စ့ၢ်ကီးတၢ်ဂီၤ.)
၁၃ ကွၢ်လိယ့ၣ်ၡူး သိၣ်လိတၢ် အကျိၤအကျဲ ဒီးပာ်ဖျါထီၣ် တၢ်ဝံသးစူၤ ဒီးဆိကမိၣ်န့ၢ်တၢ်လၢ ပှၤဂၤအဂီၢ်. တဘၣ်သံကွၢ်တၢ်လၢ ကမၤမဲာ်ဆှး ပှၤမၤလိလံာ်စီဆှံဖိတဂ့ၤ. ဒီးအမ့ၢ်တနၢ်ပၢၢ်ဝဲ တၢ်ဂ့ၢ်ဂ့ၤဂ့ၤဘၣ်န့ၣ် နတလိၣ်ဆဲးတဲဘၣ်. ဆဲးမၤလိ တၢ်ဂ့ၢ်လၢညါ ဒီးတဲသကိးက့ၤ တၢ်ဂ့ၢ်တခါန့ၣ်လၢခံ. တဘၣ်မၢဆူၣ်အီၤလၢ အကတူၢ်လိာ် လံာ်စီဆှံ တၢ်မ့ၢ်တၢ်တီတဂ့ၤ. ဟ့ၣ်အီၤတၢ်ဆၢကတီၢ်လၢ အကဆိကမိၣ်ထံဝဲ ဒီးကမၤဘၣ်ထီၣ်က့ၤ အတၢ်ထံၣ်. (ယိၤ ၁၆:၁၂; ကလီး ၂:၆, ၇) တၢ်သိၣ်လိကမၣ်တဖၣ်န့ၣ် လံာ်စီဆှံ ထိၣ်သတြီၤဝဲ ဒ်သိးဒီး တၢးထီလၢအကျၢၤတဖၣ် လၢပဘၣ်မၤလီၤပှီၢ်ကွံာ်အီၤ. (ဖး ၂ ကရံၣ်သူး ၁၀:၄, ၅.) ဒီးတၢ်လၢ ပှၤမၤလိလံာ်စီဆှံဖိတဂၤ နာ်တ့ၢ်ဝဲဖးယံာ်န့ၣ် အဆီတလဲဝဲ တဘျီဃီတန့ၢ်ဘၣ်. အဃိ ပကဘၣ် မၤစၢၤအီၤလၢ အကတ့ထီၣ် တၢးထီလၢအကျၢၤ လၢအသီတဖျၢၣ် လၢအဲၣ်ဒိးတဲဝဲ ပမၤစၢၤအီၤဒ်သိး အကနာ်န့ၢ် ယဟိဝၤယွၤ. (စံး ၉၁:၉) ပမ့ၢ်မၤစၢၤအီၤ ဒ်န့ၣ်န့ၣ် ကညီလၢ အကပာ်တ့ၢ်ကွံာ် အတၢ်စူၢ်တၢ်နာ် လၢအကမၣ်တဖၣ်.
ဒ်သိး ပှၤမၤလိလံာ်စီဆှံဖိ ဆိကမိၣ်ထံ တၢ်ဂ့ၢ်လၢ အမၤလိဝဲ ဒီးဆီတလဲ အတၢ်ထံၣ် ကန့ၢ်အဂီၢ် ဟ့ၣ်အီၤတၢ်ဆၢကတီၢ် (ကွၢ်လံာ်အဆၢ ၁၃)
မၤစၢၤပှၤအသီလၢ အဟဲထီၣ်တၢ်အိၣ်ဖှိၣ်
၁၄. ပှၤအသီလၢ အဟဲထီၣ် ပတၢ်အိၣ်ဖှိၣ်န့ၣ် ပကြၢးရ့ဒီး အဝဲသ့ၣ်ဒ်လဲၣ်.
၁၄ ယဟိဝၤယွၤ တအဲၣ်ဒိးလၢ ပကကွၢ်ဒိၣ်ဆံးအါစှၤတၢ်ဘၣ်. ပှၤတဂၤ အကလုာ်ဒူၣ်, အဒိၣ်ထီၣ်တၢ်လီၢ် ဒီးအစ့အိၣ်အါမ့ၢ်ဂ့ၤ တအိၣ်ဘၣ်မ့ၢ်ဂ့ၤ ယဟိဝၤယွၤ အဲၣ်ဒိးလၢ ပကရ့ အဝဲသ့ၣ်ဂ့ၤဂ့ၤ. (ယၤ ၂:၁-၄, ၉) အဃိ ပှၤအသီလၢ အဟဲထီၣ် ပတၢ်အိၣ်ဖှိၣ်န့ၣ် ပပာ်ဖျါထီၣ် တၢ်အဲၣ်လၢ အဝဲသ့ၣ်အဖီခိၣ် ကသ့ဒ်လဲၣ်.
၁၅-၁၆. ဖဲပှၤအသီ ဟဲထီၣ်ပတၢ်အိၣ်ဖှိၣ်အခါ ပတူၢ်လိာ်မုာ် အဝဲသ့ၣ်ဂ့ၤဂ့ၤ ကသ့ဒ်လဲၣ်.
၁၅ ပှၤတနီၤန့ၣ် အအဲၣ်ဒိးသ့ၣ်ညါလၢ ပမၤတၢ်အိၣ်ဖှိၣ် ဒ်လဲၣ်အဃိ အဝဲသ့ၣ်ဟဲထီၣ် ပတၢ်အိၣ်ဖှိၣ်. မ့တမ့ၢ်ဘၣ်န့ၣ် ပှၤအဂၤလၢ တၢ်လီၢ်အဂၤတတီၤ ဟ့ၣ်ဂံၢ်ဟ့ၣ်ဘါအီၤလၢ ကလဲၤထီၣ်ပတၢ်အိၣ်ဖှိၣ်. အဃိ ဖဲနထံၣ် အဟဲထီၣ် ပတၢ်အိၣ်ဖှိၣ်အခါ တူၢ်လိာ်မုာ်အီၤဂ့ၤဂ့ၤ. လဲၤတဲတၢ်ဒီးအီၤ ဒီးတဘၣ်မၤတုၤလၢ အအိၣ်တဘၣ်ဘၣ် န့ၣ်တဂ့ၤ. ကိးဆ့ၣ်နီၤအီၤလၢ နကပၤ ဒီးပၠးအီၤနလံာ်စီဆှံ ဒီးတၢ်ဂ့ၢ်လၢ ပကမၤလိအဂီၢ် မ့တမ့ၢ် ဟ့ၣ်အီၤလံာ်စီဆှံ ဒီးလံာ်လၢတၢ်မၤလိအဂီၢ်. ဒီးမၤစၢၤအီၤ ဒ်သိး အတဘၣ်ယိၣ်တၢ် အါတလၢတဂ့ၤ. အဒိ ပိာ်ခွါတဂၤလၢ အလဲၤထီၣ် ပတၢ်အိၣ်ဖှိၣ်န့ၣ် အတဲဘၣ် ဒီပုၢ်ဝဲၢ်ခွါလၢ အတူၢ်လိာ်မုာ်အီၤ တဂၤလၢ အဟဲကၤဆ့ကၤ ယိယိဖိအဃိ အဘၣ်ယိၣ်တၢ်. ဒ်သိး အတဘၣ်ယိၣ်တၢ် တဂ့ၤအဂီၢ် ဒီပုၢ်ဝဲၢ်ခွါန့ၣ် တဲဘၣ်အီၤလၢ ယဟိဝၤပှၤအုၣ်အသးန့ၣ် အကဲပှၤမုၢ်ဆ့ၣ်မုၢ်ဂီၤဖိ ဒ်သိးပှၤဂၤလီၤ. လၢခံပိာ်ခွါတဂၤန့ၣ် ဒိးဘျၢထံ ဒီးတၢ်လၢဒီပုၢ်ဝဲၢ်ခွါ တဲအီၤ ဒီးဒီပုၢ်ဝဲၢ် ပာ်ဖျါထီၣ် တၢ်သးအိၣ်န့ၣ် အတသးပ့ၤနီၣ်ဝဲ နီတဘျီဘၣ်. ပပာ်ဖျါထီၣ် တၢ်သးအိၣ်လၢ ပှၤအသီလၢ အဟဲထီၣ်တၢ်အိၣ်ဖှိၣ် ဘၣ်ဆၣ် ပကဘၣ်ပလီၢ်သး ဒီးတဘၣ်သံကွၢ် အနီၢ်ကစၢ် တၢ်ဂ့ၢ်တၢ်ကျိၤ မ့တမ့ၢ် သံကွၢ်တၢ်လၢ ကမၤမဲာ်ဆှးအီၤဘၣ်.—၁ ပ့း ၄:၁၅.
၁၆ ဒ်သိး ပှၤအသီလၢ အဟဲထီၣ်တၢ်အိၣ်ဖှိၣ်န့ၣ် တဘၣ်ယိၣ်တၢ် တဂ့ၤအဂီၢ် ပမၤစၢၤအီၤလၢ ကျဲအဂၤသ့ဒံး. အဒိ ဖဲပတဲသကိးတၢ်, ဟ့ၣ်ထီၣ်တၢ်စံးဆၢ မ့တမ့ၢ် ပမၤမူဒါလၢ တၢ်အိၣ်ဖှိၣ်အခါ ပကဘၣ်ပလီၢ်သးလၢ တၢ်ဂ့ၢ်လၢပတဲ ဘၣ်ဃးဒီး ပှၤလၢအတကဲ ယဟိဝၤပှၤအုၣ်အသးဘၣ်. ဒီးဒ်သိး ပတၢ်ကတိၤ တမၤဘၣ်ဒိအသး ဒီးအကအဲၣ်ဒိး ဟဲထီၣ်ကဒီး တၢ်အိၣ်ဖှိၣ်အဂီၢ် ပကဘၣ် ပလီၢ်သးဘၣ်ဃးဒီး တၢ်လၢပတဲ. (တံ ၂:၈; ၃:၂) အဒိ ပှၤလၢအတၢ်စူၢ်တၢ်နာ် တဒ်သိးဒီးပှၤဘၣ်န့ၣ် ပတဘၣ် တဲအၢတဲသီ အတၢ်စူၢ်တၢ်နာ် အဂ့ၢ်ဘၣ်. (၂ ကရံၣ် ၆:၃) ဘၣ်ဃးဒီး တၢ်ဂ့ၢ်အံၤ ဒီပုၢ်ဝဲၢ်ခွါလၢ အဟ့ၣ်တၢ်စံၣ်တဲၤတဲလီၤတၢ်န့ၣ် ကဘၣ်ပလီၢ်သး အါတစဲး. ဒီးအကဘၣ် နီၣ်ဘၣ်လၢ ပှၤအသီ ဟဲထီၣ်ပတၢ်အိၣ်ဖှိၣ် စ့ၢ်ကီးအဃိ ဖဲအဝဲသ့ၣ် ၡဲပၠးတၢ်ဂ့ၢ်အခါ အကြၢးသူ တၢ်ကတိၤ ဒီးတဲတၢ်ဂ့ၢ်လၢ ပှၤနၢ်ပၢၢ်ဝဲညီ.
၁၇. ဖဲနထံၣ်လိာ်သးဒီး ပှၤလၢအသးအိၣ်မၤလိ ကစၢ်ယွၤအဂ့ၢ်အခါ နပာ်လီၤသးလၢ နကမၤမနုၤလဲၣ်.
၁၇ မုၢ်နံၤမုၢ်သီ လဲၤပူၤကွံာ်ဝဲချ့မး ဒီးပတၢ်စံၣ်တဲၤတဲလီၤ တၢ်မၤန့ၣ် အရ့ဒိၣ်ထီၣ်ဒိၣ်မး. အဃိ ပကဘၣ်ဆဲးဃု “ပှၤသးဘျၢလၢ အဂုာ်ကျဲးစၢး ဒ်သိးကန့ၢ်ဘၣ် တၢ်မူအထူအယိာ်.” (မၤတၢ် ၁၃:၄၈) ဒီးဖဲပထံၣ်လိာ်သးဒီး ပှၤလၢအသးအိၣ်မၤလိ ကစၢ်ယွၤအဂ့ၢ်အခါ ပကြၢးတဲဘၣ်အီၤ ပတၢ်မၤလိလံာ်စီဆှံ အတၢ်ရဲၣ်တၢ်ကျဲၤ မ့တမ့ၢ် ကွဲမုာ်အီၤလၢ အကဟဲထီၣ် ပတၢ်အိၣ်ဖှိၣ်. ပမ့ၢ်မၤဒ်န့ၣ်န့ၣ် ပကမၤစၢၤ အဝဲသ့ၣ်လၢ ကခါထီၣ် အခီၣ်ခါလၢ “ကျဲလၢ အအံၣ်” လၢက “ဆှၢပှၤလၢတၢ်မူ.”—မး ၇:၁၄.
တၢ်သးဝံၣ် ၆၄ ကူးဘုလၢ တၢ်သးခုအပူၤ
a တၢ်ဂီၤ အခီပညီ– ဒီပုၢ်ဝဲၢ်ခွါခံဂၤ တဲသကိးတၢ်ဒီး ပှၤလၢအကဲတ့ၢ်သုးလၢ အအိၣ်ဘှံးလၢ အဟံၣ်မဲာ်ညါ. ဒီပုၢ်ဝဲၢ်မုၣ်ခံဂၤ တဲသကိးတၢ်ဒီး မိလၢအတၢ်မၤအါတဂၤ.