တၢ်မၤလိ ၄၃
တၢ်သးဝံၣ် ၄၁ ဒိကနၣ်ယတၢ်ထုကဖၣ်
ဃ့ထုကဖၣ်န့ၢ်တၢ်လၢ ပှၤဂၤအဂီၢ်
“ဃ့ထုကဖၣ်န့ၢ်တၢ်လၢ တဂၤဒီးတဂၤအဂီၢ် . . . ပှၤတီပှၤလိၤတဂၤ အတၢ်ဃ့ကညးန့ၣ် အိၣ်ဒီးအစိအကမီၤလၢ အကမၤစၢၤတၢ်အဂီၢ်.”—ယၤ ၅:၁၆.
တၢ်ဂ့ၢ်မိၢ်ပှၢ်
ပကသ့ၣ်ညါဘၣ်လၢ ဘၣ်မနုၤအဃိ အရ့ဒိၣ်လၢ ပကဘၣ် ဃ့ထုကဖၣ်န့ၢ်တၢ်လၢ ပှၤဂၤအဂီၢ်လဲၣ် ဒီးပကတဲသကိး တၢ်ဟ့ၣ်ကူၣ်တနီၤလၢ ကမၤစၢၤပှၤ.
၁. ပတၢ်ထုကဖၣ် မ့ၢ်တၢ်လၢ အရ့ဒိၣ်လၢ ယဟိဝၤယွၤအဂီၢ်န့ၣ် ပသ့ၣ်ညါဒ်လဲၣ်.
တၢ်ထုကဖၣ်န့ၣ် အကဲဝဲ တၢ်ဟ့ၣ်လၢ အလုၢ်ဒိၣ်ပှ့ၤဒိၣ်ဒိၣ်မး. ဆိကမိၣ်ကွၢ် တၢ်ဂ့ၢ်အံၤ. မူခိၣ်ကလူးတဖၣ်န့ၣ် ယဟိဝၤယွၤ ဟ့ၣ်အဝဲသ့ၣ် မူဒါတနီၤ. (စံး ၉၁:၁၁) ယ့ၣ်ၡူးစ့ၢ်ကီး ယဟိဝၤယွၤ ဟ့ၣ်အီၤ မူဒါလၢ အရ့ဒိၣ်တဖၣ်. (မး ၂၈:၁၈) မ့မ့ၢ်ဘၣ်ဃးဒီး ပှၤလၢကဒိကနၣ် ပတၢ်ထုကဖၣ်န့ၣ် အဟ့ၣ်ဝဲ မူဒါလၢ မတဂၤလဲၣ်. အတဟ့ၣ်ဝဲ ပှၤနီတဂၤဘၣ်. ယဟိဝၤယွၤန့ၣ် အကဲ “ပှၤလၢအနၢ်ဟူ တၢ်ဘါထုကဖၣ်” အဃိ အနီၢ်ကစၢ်ဒၣ်ဝဲ ဒိကနၣ် ပတၢ်ထုကဖၣ်.—စံး ၆၅:၂.
၂. ဘၣ်ဃးဒီး ပဃ့ထုကဖၣ်န့ၢ်တၢ်လၢ ပှၤဂၤအဂီၢ်န့ၣ် စီၤပီလူး ပာ်လီၤ တၢ်ဒိတၢ်တဲာ် လၢအဂ့ၤဒ်လဲၣ်.
၂ ဖဲပဃ့ထုကဖၣ်အခါ ပဃ့လၢ ပနီၢ်ကစၢ်အဂီၢ် တကးဒံးဘၣ် ပကြၢးဃ့စ့ၢ်ကီးလၢ ပှၤဂၤအဂီၢ်. တၢ်မၢဖိပီလူးစ့ၢ်ကီး အမၤဝဲဒ်န့ၣ်. အဒိ အကွဲးလံာ်လၢ တၢ်အိၣ်ဖှိၣ်လၢ ဝ့ၢ်အ့းဖ့းစူး ဒီးတဲဝဲလၢ “ယဆဲးဃ့ထုကဖၣ်န့ၢ်တၢ်လၢ သုဂီၢ်ထီဘိ.” (အ့း ၁:၁၆) တကးဒံးဘၣ် အဃ့ထုကဖၣ်န့ၢ်တၢ်လၢ ပှၤတဂၤဘၣ်တဂၤအဂီၢ်. အဒိ အတဲဘၣ် စီၤတံၤမသ့းလၢ “ယမၤကစၢ်ယွၤ အတၢ်မၤစီဆှံ . . . ဒီးဖဲယဃ့ကညးအီၤလၢ မုၢ်ဆါဒီး လၢမုၢ်နၤအခါ ယသ့ၣ်နီၣ်ထီၣ်နၤ ထီဘိလီၤ.” (၂ တံၤ ၁:၃) စီၤပီလူး ကဘၣ်ဃ့တၢ်လၢ အတၢ်ကိၢ်တၢ်ဂီၤ အဂီၢ်န့ၣ် အိၣ်ဝဲအါမး. (၂ ကရံၣ် ၁၁:၂၃; ၁၂:၇, ၈) ဘၣ်ဆၣ် အဟံးန့ၢ်တၢ်ဆၢကတီၢ်လၢ ကဃ့ထုကဖၣ်န့ၢ်တၢ်လၢ ပှၤဂၤအဂီၢ်ဒံး.
၃. ဘၣ်မနုၤအဃိ ပသးပ့ၤနီၣ် ဃ့ထုကဖၣ်န့ၢ်တၢ်လၢ ပှၤဂၤအဂီၢ်လဲၣ်.
၃ တဘျီတခီၣ်န့ၣ် ပသးပ့ၤနီၣ် ဃ့ထုကဖၣ်န့ၢ်တၢ်လၢ ပှၤဂၤအဂီၢ်. ဘၣ်မနုၤအဃိလဲၣ်. ဒီပုၢ်ဝဲၢ်မုၣ် စဘြံနၤa တဲဖျါထီၣ်ဝဲ တၢ်ဂ့ၢ်တခါ. အတဲဝဲလၢ “ဆၢကတီၢ် ခဲအံၤန့ၣ် ပတၢ်ဖံးတၢ်မၤ အိၣ်အါမး. ပကဆိကမိၣ် ဘၣ်ဃးဒီး ပနီၢ်ကစၢ် တၢ်ကီတၢ်ခဲ အါတလၢအဃိ ပဃ့ထုကဖၣ် ထဲလၢပနီၢ်ကစၢ်အဂီၢ်လီၤ.” တၢ်ကဲထီၣ်သးဒီးနၤ ဒ်အံၤစ့ၢ်ကီးဧါ. အမ့ၢ်ကဲထီၣ်သးဒီးနၤန့ၣ် တၢ်မၤလိအံၤ မၤစၢၤနၤသ့. တၢ်မၤလိအံၤ ကပာ်ဖျါထီၣ်ဝဲ တၢ်ဂ့ၢ်ခံထံၣ်. (၁) ဘၣ်မနုၤအဃိ အရ့ဒိၣ်လၢ ပကဃ့ထုကဖၣ်န့ၢ်တၢ်လၢ ပှၤဂၤအဂီၢ်လဲၣ်. (၂) ပဃ့ထုကဖၣ်န့ၢ်တၢ်လၢ ပှၤဂၤအဂီၢ် ကသ့ဒ်လဲၣ်.
ဘၣ်မနုၤအဃိ ပဘၣ်ဃ့န့ၢ်တၢ်လၢ ပှၤဂၤအဂီၢ်လဲၣ်
၄-၅. တၢ်ဃ့ထုကဖၣ်န့ၢ်တၢ်လၢ ပှၤဂၤအဂီၢ်န့ၣ် “အိၣ်ဒီး အစိအကမီၤလၢ အကမၤစၢၤတၢ်” ဒ်လဲၣ်. (ယၤကိာ် ၅:၁၆)
၄ တၢ်ဃ့ထုကဖၣ်န့ၢ်တၢ်လၢ ပှၤဂၤအဂီၢ်န့ၣ် “အိၣ်ဒီး အစိအကမီၤလၢ အကမၤစၢၤတၢ်.” (ဖး ယၤကိာ် ၅:၁၆.) အဃိ ပမ့ၢ်ဃ့န့ၢ်တၢ်လၢ ပှၤဂၤအဂီၢ်န့ၣ် အကကဲထီၣ် တၢ်မၤစၢၤ နီၢ်ကီၢ်ဧါ. ကကဲထီၣ်နီၢ်ကီၢ်. အဒိ ယ့ၣ်ၡူး သ့ၣ်ညါဝဲလၢ တၢ်မၢဖိပ့းတရူး ကသမၢအီၤအဃိ အတဲစီၤပ့းတရူးလၢ “ဒ်သိးနတၢ်နာ် သုတလီၤစၢ်တဂ့ၤအဂီၢ် ယဃ့ကညးယွၤလၢ နဂီၢ်ဝံၤလံ.” (လူၤ ၂၂:၃၂) စီၤပီလူး သ့ၣ်ညါစ့ၢ်ကီးလၢ ပမ့ၢ်ဃ့န့ၢ်တၢ်လၢ ပှၤဂၤအဂီၢ်န့ၣ် ပှၤဂၤတၢ်အိၣ်သး ဆီတလဲသးသ့. အဒိ စီၤပီလူးန့ၣ် အတၢ်ကမၣ် တအိၣ်ဘၣ် သနာ်က့ ပှၤပၢနုာ်အီၤလၢဃိာ်ပူၤ လၢဝ့ၢ်ရိမ့ၤ. ဖဲန့ၣ်အခါ အကွဲးလံာ်လၢ စီၤဖံၤလ့မိၣ်အအိၣ် ဒီးတဲဝဲလၢ “ယမုၢ်လၢ်လၢ ခီဖျိလၢ သုတၢ်ဃ့ထုကဖၣ်အဃိ ယကဟဲက့ၤဘၣ်ကဒါက့ၤလၢ သုအိၣ်.” (ဖံၤ ၂၂) လၢခံ တယံာ်ဘၣ်ဒီး စီၤပီလူး ဟးထီၣ်လၢဃိာ်ပူၤ ဒီးအစးထီၣ်ကဒါက့ၤ အတၢ်စံၣ်တဲၤတဲလီၤတၢ်မၤ.
၅ ယဟိဝၤယွၤန့ၣ် အဒိကနၣ် အခ့အပှၤတဖၣ် အတၢ်ထုကဖၣ် လီၤတံၢ်လီၤဆဲး ဒီးတဘျီတခီၣ်န့ၣ် အမၤလၢပှဲၤဝဲဒ် အခ့အပှၤဃ့အီၤအသိး. ပသ့ၣ်ညါဘၣ် ဒ်အံၤအဃိ မၤစၢၤပှၤလၢ ပကဃ့ထုကဖၣ်လၢ ယဟိဝၤယွၤအအိၣ် လၢပသးဒီဖျၢၣ် ဘၣ်ဃးဒီး တၢ်ဂ့ၢ်တမံၤမံၤ ဒီးနာ်သပှၢ်တၢၢ်လၢ အကမၤစၢၤပှၤ. (စံး ၃၇:၅; ၂ ကရံၣ် ၁:၁၁) သနာ်က့ ပသ့ၣ်ညါစ့ၢ်ကီးလၢ ယဟိဝၤယွၤ တမၤဝဲဒ် ပဃ့အီၤအသိး ခဲလၢာ်ဘၣ်.
၆. တၢ်ဃ့ထုကဖၣ်န့ၢ်တၢ်လၢ ပှၤဂၤအဂီၢ်န့ၣ် ကမၤစၢၤပှၤဒ်သိး ပကပာ်ဖျါထီၣ် တၢ်တူၢ်ဘၣ် မနုၤလဲၣ်. (၁ ပ့းတရူး ၃:၈)
၆ ပမ့ၢ်ဃ့န့ၢ်တၢ်လၢ ပှၤဂၤအဂီၢ်န့ၣ် ကမၤစၢၤပှၤဒ်သိး ပကပာ်ဖျါထီၣ် “တၢ်သးကညီၤ.” (ဖး ၁ ပ့းတရူး ၃:၈.) ပှၤလၢအအိၣ်ဒီး တၢ်သးကညီၤန့ၣ် အထံၣ်ဝဲ ပှၤအဂၤတဂၤ အတၢ်ကီတၢ်ခဲ ဒီးအသးအိၣ် မၤစၢၤအီၤ. (မၢ် ၁:၄၀, ၄၁) တၢ်အိၣ်ဖှိၣ်သးပှၢ်တဂၤ လၢအမံၤမ့ၢ် မၤကၢၤန့ၣ် တဲဝဲလၢ “ဖဲယဃ့န့ၢ်တၢ်လၢ ပှၤဂၤအဂီၢ်အခါ ယနၢ်ပၢၢ်အါထီၣ် တၢ်ကီတၢ်ခဲလၢ အဝဲသ့ၣ်ထံၣ်ဘၣ်ဝဲ အဃိ ယအဲၣ်အဝဲသ့ၣ် ဒိၣ်ထီၣ်. ဘၣ်သ့ၣ်သ့ၣ် အဝဲသ့ၣ် တသ့ၣ်ညါဝဲဘၣ်. သနာ်က့ ယတူၢ်ဘၣ်လၢ ယတၢ်ရ့လိာ်သးဒီးအဝဲသ့ၣ် ဂ့ၤဒိၣ်ထီၣ်.” တၢ်အိၣ်ဖှိၣ်သးပှၢ် အဂၤတဂၤ လၢအမံၤမ့ၢ် ရံခၠၢၤန့ၣ် တဲဝဲလၢ “ပမ့ၢ်ဃ့န့ၢ်တၢ်လၢ ပှၤတဂၤဂၤ အဂီၢ်န့ၣ် ပအဲၣ်ဒိး မၤန့ၢ်တၢ်လၢ အဂီၢ်တမံၤမံၤ.” အဆဲးတဲဝဲလၢ “ပမ့ၢ်မၤတၢ် တမံၤမံၤလၢ အကဲဘျုး လၢအဂီၢ်န့ၣ် လီၤဂာ်ဒ်သိးဒီး ပမၤလၢပှဲၤ ပတၢ်ထုကဖၣ်လၢ ပဃ့န့ၢ်လၢအဂီၢ်.”
၇. တၢ်ဃ့ထုကဖၣ်န့ၢ်တၢ်လၢ ပှၤဂၤအဂီၢ်န့ၣ် ကမၤစၢၤပှၤဒ်သိး ပကအိၣ်ဒီး တၢ်ထံၣ်အကြၢးအဘၣ်လၢ ပနီၢ်ကစၢ် တၢ်ကီတၢ်ခဲ အဖီခိၣ်ဒ်လဲၣ်. (ဖံလံးပံၤ ၂:၃, ၄) (ကွၢ်စ့ၢ်ကီးတၢ်ဂီၤ.)
၇ ပမ့ၢ်ဃ့န့ၢ်တၢ်လၢ ပှၤဂၤအဂီၢ်န့ၣ် ကမၤစၢၤပှၤဒ်သိး ပကအိၣ်ဒီး တၢ်ထံၣ်အကြၢးအဘၣ်လၢ ပနီၢ်ကစၢ် တၢ်ကီတၢ်ခဲ အဖီခိၣ်. (ဖး ဖံလံးပံၤ ၂:၃, ၄.) ဆၢကတီၢ်ခဲအံၤ ပအိၣ်မူဘၣ်လၢ ဟီၣ်ခိၣ်လၢ မုၣ်ကီၤလံၢ်ပၢဝဲအဃိ ပဝဲကိးဂၤဒဲးန့ၣ် ပထံၣ်ဘၣ် တၢ်ကီတၢ်ခဲ. (၁ ယိၤ ၅:၁၉; လီၣ် ၁၂:၁၂) အဃိ ပမ့ၢ်ဃ့န့ၢ်တၢ်လၢ ပှၤဂၤအဂီၢ်ထီဘိန့ၣ် ပကသ့ၣ်နီၣ်ထီၣ်လၢ “[ပ] ဒီပုၢ်ဝဲၢ်ခဲလၢာ်လၢ ဟီၣ်ခိၣ်ဒီဘ့ၣ်န့ၣ် တူၢ်ဘၣ်စ့ၢ်ကီးတၢ်နးတၢ်ဖှီၣ်.” (၁ ပ့း ၅:၉) ဒီပုၢ်ဝဲၢ်မုၣ် ခဲၤသရ့ လၢအမၤပှၤလဲၤလၢညါန့ၣ် အတဲဝဲလၢ “ယဃ့န့ၢ်တၢ်လၢ ပှၤဂၤအဂီၢ်အဃိ ယသ့ၣ်ညါဘၣ်လၢ ပှၤဂၤစ့ၢ်ကီး အိၣ်ဒီးတၢ်ကီတၢ်ခဲ. ဖဲယသ့ၣ်နီၣ်ထီၣ် တၢ်ဂ့ၢ်အံၤအခါ ယတဆိကမိၣ်ထဲလၢ ယနီၢ်ကစၢ် တၢ်ကီတၢ်ခဲဘၣ်.”
ပမ့ၢ်ဃ့န့ၢ်တၢ်လၢ ပှၤဂၤအဂီၢ်န့ၣ် ကမၤစၢၤပှၤဒ်သိး ပကအိၣ်ဒီး တၢ်ထံၣ်အကြၢးအဘၣ်လၢ ပနီၢ်ကစၢ် တၢ်ကီတၢ်ခဲ အဖီခိၣ် (ကွၢ်လံာ်အဆၢ ၇)d
အဝဲသ့ၣ်လိၣ်ဘၣ် ပတၢ်ထုကဖၣ်
၈. ပဃ့ထုကဖၣ်လၢ မတဂၤအဂီၢ်သ့လဲၣ်. တဲဖျါထီၣ် တၢ်အဒိ.
၈ ပဃ့န့ၢ်တၢ်လၢ မတဂၤအဂီၢ်သ့လဲၣ်. ပဃ့န့ၢ်တၢ်လၢ ပဒီပုၢ်ဝဲၢ်မုၣ်ခွါ ခဲလၢာ်အဂီၢ်သ့. အဒိ ပဃ့န့ၢ်တၢ်လၢ ဒီပုၢ်ဝဲၢ်မုၣ်ခွါလၢ အအိၣ်တဆူၣ်ဘၣ်, သးစၢ်လၢ အထံၣ်ဘၣ် တံၤသကိး တၢ်ဆီၣ်သနံးလၢကၠိ မ့တမ့ၢ် ဒီပုၢ်ဝဲၢ်လၢ အသးပှၢ်ထီၣ် ဒီးထံၣ်ဘၣ် တၢ်ကီတၢ်ခဲအဂီၢ်သ့. တကးဒံးဘၣ် ပဒီပုၢ်ဝဲၢ်မုၣ်ခွါ အါဂၤန့ၣ် အဟံၣ်ဖိဃီဖိ မ့တမ့ၢ် ပဒိၣ်ပပှၢ် တြီမၤတံာ်တာ်အီၤ. (မး ၁၀:၁၈, ၃၆; မၤတၢ် ၁၂:၅) ဒီးခီဖျိလၢ တၢ်ဒုးကဲထီၣ်လၢ ထံလီၢ်ကီၢ်ပူၤအဃိ ပဒီပုၢ်ဝဲၢ်မုၣ်ခွါတနီၤန့ၣ် အဝဲသ့ၣ် ဘၣ်ဃ့ၢ်ဟးထီၣ်ကွံာ် လၢအဟံၣ်. မ့မ့ၢ်အဂၤတနီၤန့ၣ် ထံၣ်ဘၣ် တၢ်ကီတၢ်ခဲလၢ န့ဆၢၣ်တၢ်ဘၣ်ဒိဘၣ်ထံး. ဒီပုၢ်ဝဲၢ်မုၣ်ခွါတဖၣ်အံၤ ဘၣ်သ့ၣ်သ့ၣ် ပတသ့ၣ်ညါ အဝဲသ့ၣ်ဘၣ်. ဘၣ်ဆၣ် ဖဲပဃ့န့ၢ်တၢ်လၢ အဝဲသ့ၣ်အဂီၢ်အခါ ပမၤထွဲ ယ့ၣ်ၡူး အတၢ်မၤလိာ်လၢ အတဲပှၤလၢ “အဲၣ်လိာ်သုသး တဂၤဒီးတဂၤ.”—ယိၤ ၁၃:၃၄.
၉. ဘၣ်မနုၤအဃိ ပကြၢးဃ့န့ၢ်တၢ်လၢ ပှၤလၢအတီခိၣ်ရိၤမဲတၢ် ဒီးဃ့စ့ၢ်ကီးလၢ အမါအဂီၢ်လဲၣ်.
၉ ပှၤလၢအတီခိၣ်ရိၤမဲတၢ်လၢ ယဟိဝၤယွၤ အတၢ်ကရၢကရိအပူၤန့ၣ် ပဃ့န့ၢ်တၢ်လၢ အဂီၢ်သ့စ့ၢ်ကီး. ပှၤတဖၣ်အံၤ အပၣ်ဃုာ်ဒီး ပှၤပၢဆှၢတၢ်ကမံးတံာ် ဒီးအပှၤမၤစၢၤတၢ်, ဝဲၤတြၢ်ကမံးတံာ်, ပှၤကွၢ်ထွဲတၢ်လၢ ဝဲၤတြၢ်အရူ, ကဝီၤအပှၤကွၢ်တၢ်, တၢ်အိၣ်ဖှိၣ်သးပှၢ် ဒီးတၢ်အိၣ်ဖှိၣ်အပှၤမၤစၢၤတၢ်. ဒီပုၢ်ဝဲၢ်ခွါတဖၣ်အံၤ အိၣ်စ့ၢ်ကီးဒီး အနီၢ်ကစၢ် တၢ်ကီတၢ်ခဲ ဘၣ်ဆၣ် အဝဲသ့ၣ် သးအိၣ်မၤစၢၤပှၤဒံး. (၂ ကရံၣ် ၁၂:၁၅) အဒိ ဒီပုၢ်ဝဲၢ်ခွါ မး လၢအကဲ ကဝီၤအပှၤကွၢ်တၢ်န့ၣ် အတဲဝဲလၢ “ယမိယပါန့ၣ် အသးပှၢ်ဒိၣ်မး ဒီးယဘၣ်အိၣ်ယံၤဒီး အဝဲသ့ၣ်အဃိ ယဘၣ်ယိၣ်တၢ်လၢ အဝဲသ့ၣ်အဂီၢ်. အဝဲသ့ၣ် ခံဂၤလၢာ်န့ၣ် အတၢ်အိၣ်ဆူၣ်အိၣ်ချ့ တဂ့ၤဘၣ်. ယနီဒီးအဝၤ ကွၢ်ထွဲ အဝဲသ့ၣ်ဂ့ၤဂ့ၤ သနာ်က့ ယတမၤစၢၤဘၣ် အဝဲသ့ၣ်လၢ ယနီၢ်ကစၢ်ဘၣ်အဃိ ယသးဘၣ်ဒိညါ.” ပဒီပုၢ်ဝဲၢ်ခွါတဖၣ်အံၤ အဝဲသ့ၣ် မၤတၢ်ဆူၣ်ဒိၣ်မး ဒီးအဝဲသ့ၣ် အတၢ်ကိၢ်တၢ်ဂီၤန့ၣ် ပမ့ၢ်တသ့ၣ်ညါ ခဲလၢာ်ဘၣ် သနာ်က့ ပကြၢးဃ့န့ၢ်တၢ်လၢ အဝဲသ့ၣ်အဂီၢ်. (၁ သ့း ၅:၁၂, ၁၃) တကးဒံးဘၣ် ဒ်သိး ဒီပုၢ်ဝဲၢ်ခွါတဖၣ်အံၤ ဆဲးမၤအမူဒါ ကန့ၢ်အဂီၢ် အမါစ့ၢ်ကီး ဆီၣ်ထွဲမၤစၢၤအီၤ အါမးအဃိ ပဃ့န့ၢ်တၢ်လၢ အမါအဂီၢ်သ့.
၁၀-၁၁. ပမ့ၢ်ဃ့န့ၢ်တၢ်လၢ ဒီပုၢ်ဝဲၢ်မုၣ်ခွါ ခဲလၢာ်အဂီၢ်န့ၣ် ဘၣ်မနုၤအဃိ ယဟိဝၤယွၤ ဘၣ်သးဝဲလဲၣ်.
၁၀ ဒ်ပတဲသကိးအသိး ညီနုၢ်န့ၣ် ပဃ့န့ၢ်တၢ်လၢ ဒီပုၢ်ဝဲၢ်မုၣ်ခွါ ခဲလၢာ်အဂီၢ်. အဒိ ဖဲပဃ့ထုကဖၣ်အခါ ဘၣ်သ့ၣ်သ့ၣ် ပတဆိကမိၣ်လၢ ပကဃ့န့ၢ်တၢ်လၢ ပှၤတဂၤ လီၤလီၤဆီဆီ အဂီၢ်ဘၣ်. ဘၣ်ဆၣ် ပဃ့လၢ ယဟိဝၤယွၤ ကမၤစၢၤ ဒီပုၢ်ဝဲၢ်မုၣ်ခွါ လၢအအိၣ်လၢဃိာ်ပူၤ အဂီၢ်သ့. မ့တမ့ၢ် ပှၤလၢအသးအုး ခီဖျိလၢ ပှၤလၢအအဲၣ်ဝဲတဂၤဂၤ သံသဒၣ်အီၤန့ၣ် ပဃ့လၢ ယဟိဝၤယွၤ ကမၤမုာ်ထီၣ်အသးသ့. ဒီပုၢ်ဝဲၢ်ခွါ ဒီနီၤ လၢအကဲ တၢ်အိၣ်ဖှိၣ်သးပှၢ်န့ၣ် အတဲဝဲလၢ “ဒီပုၢ်ဝဲၢ်မုၣ်ခွါလၢ အထံၣ်ဘၣ် တၢ်ကီတၢ်ခဲန့ၣ် အိၣ်ဝဲအါမးအဃိ ဖဲပဃ့ထုကဖၣ်အခါ ပဃ့န့ၢ်တၢ်လၢ ဒီပုၢ်ဝဲၢ်မုၣ်ခွါလၢ အတူၢ်ဘၣ်တၢ် ခဲလၢာ်အဂီၢ်.”
၁၁ ပဃ့ထုကဖၣ်ဒ်အံၤန့ၣ် ယဟိဝၤယွၤ ဘၣ်သးဝဲဧါ. အဘၣ်သးဝဲ သပှၢ်တၢၢ်. ပမ့ၢ်ကွၢ် ပဒီပုၢ်ဝဲၢ်မုၣ်ခွါ အတၢ်လိၣ်ဘၣ်တဖၣ်န့ၣ် ပတသ့ၣ်ညါ လီၤတံၢ်လီၤဆဲးဘၣ်. အဃိ ပဃ့န့ၢ်တၢ်လၢ ပဒီပုၢ်ဝဲၢ်မုၣ်ခွါ ခဲလၢာ်အဂီၢ်သ့. (ယိၤ ၁၇:၂၀; အ့း ၆:၁၈) ပမ့ၢ်ဃ့ထုကဖၣ် ဒ်န့ၣ်န့ၣ် ပပာ်ဖျါထီၣ်လၢ ပ “အဲၣ်ဒီပုၢ်ဝဲၢ် ခဲလၢာ်.”—၁ ပ့း ၂:၁၇.
ဖဲပဃ့န့ၢ်တၢ်လၢ ပှၤတဂၤဂၤအဂီၢ်အခါ
၁၂. ပမ့ၢ်ကွၢ်ဆိကမိၣ်ထံ ပှၤဂၤအတၢ်အိၣ်သးန့ၣ် အမၤစၢၤပှၤဒ်သိး ပဃ့န့ၢ်တၢ်လၢ ပှၤဂၤအဂီၢ် လီၤတံၢ်လီၤဆဲး ကသ့ဒ်လဲၣ်.
၁၂ ကွၢ်ဆိကမိၣ်ထံ အတၢ်အိၣ်သး. ပဃ့န့ၢ်တၢ်လၢ ဒီပုၢ်ဝဲၢ်မုၣ်ခွါ ခဲလၢာ်အဂီၢ် တကးဒံးဘၣ် ပဃ့န့ၢ်တၢ်လၢ ပှၤတဂၤဂၤအဂီၢ် ဒီးကိးထီၣ်အမံၤသ့. အဒိ လၢနတၢ်အိၣ်ဖှိၣ်ပူၤန့ၣ် ဒီပုၢ်ဝဲၢ်လၢ အအိၣ်ဒီး တၢ်ဆါယံာ်ယံာ်ထၢထၢ အိၣ်တဂၤဂၤဧါ. ပှၤသးစၢ်လၢ အသးလီၤစၢ် ခီဖျိလၢ အထံၣ်ဘၣ် တၢ်ဆီၣ်သနံးလၢကၠိအဃိန့ၣ် အိၣ်တဂၤဂၤဧါ. မိပါလၢ အဘၣ်ကွၢ်လုၢ်ဒိၣ်ထီၣ်အဖိ ထဲတဂၤ ဒ် “ယဟိဝၤယွၤ အတၢ်သိၣ်လိနဲၣ်လိ ဒီးအတၢ်ဟံးစုနဲၣ်ကျဲ” အသိးန့ၣ် အိၣ်တဂၤဂၤဧါ. (အ့း ၆:၄) ပမ့ၢ်ကွၢ်ဆိကမိၣ်ထံ ပှၤဂၤအတၢ်အိၣ်သးန့ၣ် ပတၢ်အဲၣ်လၢ ပှၤဂၤအဂီၢ် ကအါထီၣ်, ပကပာ်ဖျါထီၣ် တၢ်ဒိသူၣ်ဒိသး ဒီးပကအဲၣ်ဒိး ဃ့န့ၢ်တၢ်လၢ ပှၤဂၤအဂီၢ်.b—ရိ ၁၂:၁၅.
၁၃. ပဒီပုၢ်ဝဲၢ်မုၣ်ခွါလၢ ပတသ့ၣ်ညါအီၤဘၣ်န့ၣ် ပဃ့န့ၢ်တၢ်လၢ အဂီၢ်ကသ့ဒ်လဲၣ်.
၁၃ ဃ့န့ၢ်တၢ်လၢ ပှၤဂၤအဂီၢ် ဒီးကိးထီၣ်အမံၤ. ပဒီပုၢ်ဝဲၢ်မုၣ်ခွါလၢ ပတသ့ၣ်ညါအီၤဘၣ်န့ၣ် ပဃ့န့ၢ်တၢ်လၢ အဂီၢ်သ့. အဒိ ဆိကမိၣ်ကွၢ် ပဒီပုၢ်ဝဲၢ်မုၣ်ခွါလၢ အဘၣ်အိၣ်လၢဃိာ်ပူၤ လၢကီၢ်ခြၢၤမံ, ကီၢ်အဲရံထြံယၤ, ကီၢ်ရၢၡါ ဒီးကီၢ်စ့ၤကဖူၤ. ပဒီပုၢ်ဝဲၢ်မုၣ်ခွါ တဖၣ်အံၤ အမံၤန့ၣ် ပဃုကွၢ်လၢ jw.org ဝဲးပဆဲး အပူၤသ့.c ဒီပုၢ်ဝဲၢ်ခွါ ဘြါယၢၤ လၢအကဲ ကဝီၤအပှၤကွၢ်တၢ်န့ၣ် အတဲဝဲလၢ “ယမ့ၢ်ကွဲးလီၤ ဒီပုၢ်ဝဲၢ်မုၣ်ခွါတဖၣ်လၢ အဘၣ်အိၣ်လၢဃိာ်ပူၤအမံၤ ဒီးကိးသီၣ်ထီၣ်အီၤန့ၣ် ညီလၢ ယကနီၣ်ဘၣ်အမံၤ ဒီးဃ့န့ၢ်တၢ်လၢအဂီၢ်.”
၁၄-၁၅. ပဃ့န့ၢ်တၢ်လၢ ပှၤဂၤအဂီၢ် လီၤတံၢ်လီၤဆဲး ကသ့ဒ်လဲၣ်.
၁၄ ဃ့န့ၢ်တၢ်လၢ ပှၤဂၤအဂီၢ် လီၤတံၢ်လီၤဆဲး. ဒီပုၢ်ဝဲၢ်ခွါ မၤကၢၤ လၢပတဲသကိးအဂ့ၢ် လၢအခီၣ်ထံးန့ၣ် အတဲဝဲလၢ “ဖဲယဖး ဒီပုၢ်ဝဲၢ်မုၣ်ခွါလၢ အဘၣ်အိၣ် လၢဃိာ်ပူၤအဂ့ၢ် လၢ jw.org ဝဲးပဆဲး အပူၤအခါ ယဆိကမိၣ်ထံ အဝဲသ့ၣ် တၢ်အိၣ်သး ဒီးအိၣ်ကွၢ်လၢအလီၢ်. မ့မ့ၢ်ယၤန့ၣ် ယကဘၣ်ယိၣ်န့ၢ်တၢ်လၢ ယမါအဂီၢ် ဒီးယဘၣ်သးလၢ အကအိၣ်ဘၣ် ဂ့ၤဂ့ၤဘၣ်ဘၣ် ဒီးကန့ၢ်ဘၣ်တၢ်လၢ အလိၣ်ဘၣ်ဝဲ. ယဆိကမိၣ်ထံ ဒ်န့ၣ်အဃိ မၤစၢၤယၤဒ်သိး ယကဃ့န့ၢ်တၢ် လီၤတံၢ်လီၤဆဲးလၢ ဒီပုၢ်ဝဲၢ်ခွါလၢ အဘၣ်အိၣ်လၢဃိာ်ပူၤ လၢအဆီဟံၣ်ဆီဃီတဖၣ်အဂီၢ်.”—ဧ့ၤ ၁၃:၃.
၁၅ ပမ့ၢ်ဆိကမိၣ်ထံကွၢ် ပဒီပုၢ်ဝဲၢ်မုၣ်ခွါ လၢအအိၣ်လၢ ဃိာ်ပူၤတဖၣ် အတၢ်အိၣ်သး တနံၤဘၣ်တနံၤန့ၣ် ကမၤစၢၤပှၤဒ်သိး ပကဃ့န့ၢ်တၢ်လၢ အဝဲသ့ၣ်အဂီၢ် လီၤတံၢ်လီၤဆဲး. အဒိ ပဃ့လၢ ပှၤခိးဃိာ်ဖိ ကရ့ပဒီပုၢ်ဝဲၢ်မုၣ်ခွါ ဂ့ၤဂ့ၤသ့. ဒီးပဃ့လၢ ပှၤလၢအအိၣ်ဒီး တၢ်န့ၢ်စိန့ၢ်ကမီၤတဖၣ် ကဟ့ၣ်အဝဲသ့ၣ် အခွဲးလၢ ကဘူၣ်ထီၣ်ဘါထီၣ်ဘၣ် ယဟိဝၤယွၤ. (၁ တံၤ ၂:၁, ၂) တကးဒံးဘၣ် ပဃ့စ့ၢ်ကီးလၢ တၢ်အိၣ်ဖှိၣ်ဖိ လၢအအိၣ်လၢ လီၢ်ကဝီၤပူၤန့ၣ် ကန့ၢ်ဂံၢ်န့ၢ်ဘါလၢ ဒီပုၢ်ဝဲၢ်မုၣ်ခွါလၢ အဘၣ်အိၣ်လၢ ဃိာ်ပူၤတဖၣ်အံၤ အဒိအတဲာ်သ့. မ့တမ့ၢ် ပဃ့လၢ ပှၤတၢ်ချၢ ကထံၣ်ဘၣ်ဝဲ ပဒီပုၢ်ဝဲၢ်မုၣ်ခွါ လၢအအိၣ်လၢ ဃိာ်ပူၤတဖၣ် အလုၢ်လၢ်သကဲာ်ပဝး လၢအဂ့ၤ ဒီးကအဲၣ်ဒိး ဒိကနၣ် တၢ်သးခုကစီၣ်သ့. (၁ ပ့း ၂:၁၂) ဒီးဖဲပဃ့န့ၢ်တၢ်လၢ ပဒီပုၢ်ဝဲၢ်မုၣ်ခွါလၢ အထံၣ်ဘၣ်တၢ်မၤကွၢ် အဂၤတဖၣ် အဂီၢ်အခါ ပဆိကမိၣ်ထံကွၢ် အတၢ်အိၣ်သးဒ်အံၤ သ့စ့ၢ်ကီး. အဃိ ပမ့ၢ်ကွၢ်ဆိကမိၣ်ထံ ပှၤဂၤအတၢ်အိၣ်သး, ဃ့န့ၢ်တၢ်လၢ ပှၤဂၤအဂီၢ် ဒီးကိးထီၣ်အမံၤ ဒီးဃ့န့ၢ်တၢ်လၢ ပှၤဂၤအဂီၢ် လီၤတံၢ်လီၤဆဲးန့ၣ် ပပာ်ဖျါထီၣ်လၢ ပအဲၣ်လိာ်ပသး ဒီးပတၢ်အဲၣ် “အိၣ်ဝဲ အါအါဂီၢ်ဂီၢ်.”—၁ သ့း ၃:၁၂.
ဖဲပဃ့ထုကဖၣ်အခါ ပဘၣ်ပာ်ဖျါထီၣ် တၢ်ဆီၣ်လီၤသး
၁၆. ဖဲပဃ့ထုကဖၣ်အခါ ပပာ်ဖျါထီၣ် တၢ်ဆီၣ်လီၤသး ကသ့ဒ်လဲၣ်. (မးသဲ ၆:၈)
၁၆ ဒ်ပမၤလိဘၣ်အသိး ပမ့ၢ်ဃ့န့ၢ်တၢ်လၢ ပှၤဂၤအဂီၢ်န့ၣ် ပှၤဂၤတၢ်အိၣ်သး ဆီတလဲသ့. ဘၣ်ဆၣ် ဖဲပဃ့ထုကဖၣ်အခါ ပကဘၣ်ပာ်ဖျါထီၣ် တၢ်ဆီၣ်လီၤသး. ဒီးပကဘၣ် သ့ၣ်နီၣ်ထီၣ်လၢ တၢ်ဂ့ၢ်လၢ ပတဲဘၣ် ယဟိဝၤယွၤန့ၣ် အသ့ၣ်ညါပာ်စၢၤဝဲ ခဲလၢာ်လံ. ဒ်သိး အကမၤဘၣ်ဂီၢ်က့ၤ တၢ်အိၣ်သး တမံၤမံၤအဂီၢ် အတလိၣ် ပတၢ်ဟ့ၣ်ကူၣ်ဘၣ်. ယဟိဝၤယွၤန့ၣ် အသ့ၣ်ညါဝဲ အခ့အပှၤတဖၣ် အတၢ်လိၣ်ဘၣ်. အဃိ တချုးလၢ ပသ့ၣ်ညါ ပဒီပုၢ်ဝဲၢ်လၢ ပဃ့န့ၢ်တၢ်လၢအဂီၢ် အတၢ်လိၣ်ဘၣ် ဒံးဘၣ်န့ၣ် ယဟိဝၤယွၤ သ့ၣ်ညါပာ်စၢၤဝဲလံ. (ဖး မးသဲ ၆:၈.) မ့မ့ၢ်ဒ်န့ၣ် ဘၣ်မနုၤအဃိ ပဘၣ်ဃ့န့ၢ်တၢ်လၢ ပှၤဂၤအဂီၢ်ဒံးလဲၣ်. တၢ်မၤလိတခါအံၤ ပာ်ဖျါထီၣ်န့ၢ်ပှၤ တၢ်ဂ့ၢ်တနီၤလံ. ဒီးပမ့ၢ်ဃ့န့ၢ်တၢ်လၢ ပှၤဂၤအဂီၢ်န့ၣ် ပပာ်ဖျါထီၣ်လၢ ပသးအိၣ်ပှၤဂၤဒိၣ်မး. တကးဒံးဘၣ် ပအဲၣ်ပှၤဂၤအဃိ ပဃ့န့ၢ်တၢ်လၢ ပှၤဂၤအဂီၢ်. ဖဲယဟိဝၤယွၤ ထံၣ်ဝဲလၢ ပကွၢ်လိအီၤ ဒီးပာ်ဖျါထီၣ် တၢ်အဲၣ်အခါ အသးခုဒိၣ်မး.
၁၇-၁၈. ဘၣ်မနုၤအဃိ ပကြၢးဃ့န့ၢ်တၢ်လၢ ပဒီပုၢ်ဝဲၢ်မုၣ်ခွါ အဂီၢ်လဲၣ်. တဲဖျါထီၣ် တၢ်အဒိ.
၁၇ ဖဲပဃ့ထုကဖၣ်အခါ တဘျီတခီၣ် ဖျါလၢပတၢ်ထုကဖၣ် တဆီတလဲ တၢ်အိၣ်သး နီတမံၤဘၣ်. သနာ်က့ ပဃ့ထုကဖၣ်အဃိ ပပာ်ဖျါထီၣ်လၢ ပအဲၣ်ပဒီပုၢ်ဝဲၢ်မုၣ်ခွါ ဒီးယဟိဝၤယွၤ ပာ်သူၣ်ပာ်သးဝဲ. အဒိ လၢဟံၣ်ဖိဃီဖိ တဒူၣ်အပူၤန့ၣ် ပါတဂၤအိၣ်ဒီး အဖိမုၣ်တဂၤ ဒီးအဖိခွါတဂၤ. အဖိခွါန့ၣ် အအိၣ်တဆူၣ်ဘၣ် အဃိ အဖိမုၣ်ဃ့ကညးအပါ ဒီးတဲဝဲလၢ “ယကၠီဆိးက့နးမး. ဒ်သိး အကဘျါက့ၤအဂီၢ် ဝံသးစူၤ မၤစၢၤအီၤမီၤ.” နီၢ်ကီၢ်န့ၣ် အပါသ့ၣ်ညါ တၢ်အိၣ်သး ဒီးအအဲၣ် အဖိခွါအဃိ အဂုာ်ကျဲးစၢး မၤစၢၤအီၤလံ. အဃိ ဖဲအထံၣ်ဘၣ်လၢ အဖိမုၣ်သးအိၣ် အကၠီဒိၣ်မး ဒီးဃ့ကညးဝဲလၢ အပါကမၤ တၢ်တမံၤမံၤအခါ အပါကသးခုဒိၣ်မး.
၁၈ ဒ်န့ၣ်အသိး ယဟိဝၤယွၤ အဲၣ်ဒိးလၢ ပကပာ်ဖျါထီၣ် တၢ်သးအိၣ် ဒီးဃ့န့ၢ်တၢ်လၢ တဂၤဒီးတဂၤအဂီၢ်. ပမ့ၢ်မၤဒ်န့ၣ်န့ၣ် ပပာ်ဖျါထီၣ်လၢ ပတကွၢ်တၢ်ထဲ ပနီၢ်ကစၢ်အဂီၢ်ဘၣ်, ပအဲၣ် ပဒီပုၢ်ဝဲၢ်မုၣ်ခွါ နီၢ်ကီၢ် ဒီးယဟိဝၤယွၤ ပာ်သူၣ်ပာ်သးဝဲ. (၂ သ့း ၁:၃; ဧ့ၤ ၆:၁၀) တကးဒံးဘၣ် ဒ်ပမၤလိဘၣ်အသိး ပမ့ၢ်ဃ့န့ၢ်တၢ်လၢ ပှၤဂၤအဂီၢ်န့ၣ် တဘျီတခီၣ် ပှၤဂၤတၢ်အိၣ်သး ဆီတလဲသးသ့. အဃိ မ်ပဂုာ်ကျဲးစၢး ဃ့န့ၢ်တၢ်လၢ တဂၤဒီးတဂၤ အဂီၢ်ထီဘိ.
တၢ်သးဝံၣ် ၁၀၁ မၤသကိးတၢ်လၢ တၢ်ဃူတၢ်ဖိး
a ပှၤမံၤတနီၤန့ၣ် ပှၤဆီတလဲဝဲ.
b လၢ jw.org ဝဲးပဆဲး အပူၤန့ၣ် ကွၢ်တၢ်ဂီၤမူ လၢအမ့ၢ် ထါခံၡံၤ ၡံၤမံစူ—ယဟိဝၤယွၤမ့ၢ် “ပှၤလၢအနၢ်ဟူတၢ်ဘါထုကဖၣ်.”
c ဒ်သိး နကဃုကွၢ် ဒီပုၢ်ဝဲၢ်မုၣ်ခွါလၢ အဘၣ်အိၣ်လၢ ဃိာ်ပူၤတဖၣ် အမံၤအဂီၢ် လၢ jw.org ဝဲးပဆဲး အပူၤန့ၣ် ဃုကွၢ် တၢ်ဂ့ၢ်ခိၣ်တီ လၢအမ့ၢ် “Jehovah’s Witnesses Imprisoned for Their Faith—By Location.”
d တၢ်ဂီၤ အခီပညီ– ဒီပုၢ်ဝဲၢ်မုၣ်ခွါတဖၣ် အိၣ်ဒီးအနီၢ်ကစၢ် တၢ်ကီတၢ်ခဲဘၣ်ဆၣ် အဝဲသ့ၣ် ဃ့ထုကဖၣ်န့ၢ်တၢ်လၢ ပှၤဂၤအဂီၢ်.