တၢ်မၤလိ ၄၇
တၢ်သးဝံၣ် ၃၈ ကစၢ်ကမၤဆူၣ်ထီၣ် နဂံၢ်ဘါ
“နမ့ၢ်ပှၤလၢ အလုၢ်ဒိၣ်ပှ့ၤဒိၣ်ဒိၣ်မးတဂၤ”
“နမ့ၢ်ပှၤလၢ အလုၢ်ဒိၣ်ပှ့ၤဒိၣ်ဒိၣ်မးတဂၤ.”—ဒၤ ၉:၂၃.
တၢ်ဂ့ၢ်မိၢ်ပှၢ်
တၢ်မၤလိအံၤ ကမၤစၢၤဝဲ ဒီပုၢ်ဝဲၢ်မုၣ်ခွါလၢ အဆိကမိၣ်လီၤအသးလၢ အဘျုးတအိၣ်ဘၣ် ဒ်သိးကသ့ၣ်ညါဝဲလၢ ယဟိဝၤယွၤ ပာ်လုၢ်ပာ်ပှ့ၤ အဝဲသ့ၣ်ဒိၣ်မး.
၁-၂. ဒ်သိးပကနာ် သပှၢ်တၢၢ်လၢ ယဟိဝၤယွၤ ပာ်လုၢ်ပာ်ပှ့ၤပှၤအဂီၢ် တၢ်မနုၤ ကမၤစၢၤပှၤလဲၣ်.
ယဟိဝၤယွၤ ပာ်လုၢ်ပာ်ပှ့ၤ အခ့အပှၤတဖၣ်ဒိၣ်မး. သနာ်က့ အခ့အပှၤတနီၤန့ၣ် တူၢ်ဘၣ်ဝဲလၢ ယဟိဝၤယွၤ တပာ်လုၢ်ပာ်ပှ့ၤအဝဲသ့ၣ် နီၢ်ကီၢ်ဘၣ်. ဘၣ်သ့ၣ်သ့ၣ် ကမ့ၢ်ခီဖျိလၢ ပှၤရ့အဝဲသ့ၣ် တဂ့ၤဘၣ်အဃိ အဝဲသ့ၣ် ကတူၢ်ဘၣ်ဝဲလၢ အလုၢ်အပှ့ၤ တအိၣ်ဘၣ်. နၤမီၤ, နတူၢ်ဘၣ်ဒ်န့ၣ် စ့ၢ်ကီးဧါ. နမ့ၢ်တူၢ်ဘၣ် ဒ်န့ၣ်န့ၣ် ဒ်သိးနကနာ် သပှၢ်တၢၢ်လၢ ယဟိဝၤယွၤ ပာ်လုၢ်ပာ်ပှ့ၤနၤအဂီၢ် တၢ်မနုၤ ကမၤစၢၤနၤလဲၣ်.
၂ နမ့ၢ်ဖးဒီးဆိကမိၣ်ထံ တၢ်ဂ့ၢ်လၢ လံာ်စီဆှံ ပာ်ဖျါထီၣ်ဝဲ ဘၣ်ဃးဒီး ယဟိဝၤယွၤ အဲၣ်ဒိးလၢ ပကရ့ဒီးပှၤဂၤဒ်လဲၣ် ဒီးပာ်လုၢ်ပာ်ပှ့ၤပှၤဂၤ အဂ့ၢ်န့ၣ် ကကဲထီၣ် တၢ်မၤစၢၤ လၢနဂီၢ်. ယ့ၣ်ၡူးန့ၣ် အရ့ဒီးပှၤဂၤဂ့ၤဂ့ၤ ဒီးအပာ်ကဲပှၤဂၤ. ယ့ၣ်ၡူးရ့ဒီးပှၤဂၤ ဒ်န့ၣ်အဃိ အပာ်ဖျါထီၣ်လၢ အီၤဒီးအပါန့ၣ် အပာ်လုၢ်ပာ်ပှ့ၤ ပှၤလၢ အတူၢ်ဘၣ်လၢ အလုၢ်အပှ့ၤ တအိၣ်ဘၣ်တဖၣ်ဒိၣ်မး. (ယိၤ ၅:၁၉; ဧ့ၤ ၁:၃) လၢတၢ်မၤလိအံၤ ပကတဲသကိး တၢ်ဂ့ၢ်ခံထံၣ်. (၁) ဒ်သိးပှၤဂၤ ကသ့ၣ်ညါလၢ ယဟိဝၤယွၤ ပာ်လုၢ်ပာ်ပှ့ၤ အဝဲသ့ၣ်အဂီၢ် ယ့ၣ်ၡူးမၤစၢၤ အဝဲသ့ၣ်ဒ်လဲၣ်. (၂) ဘၣ်မနုၤအဃိ ပနာ်သ့သပှၢ်တၢၢ် လၢယဟိဝၤယွၤ ပာ်လုၢ်ပာ်ပှ့ၤပှၤ ဒိၣ်မးလဲၣ်.—ဃး ၂:၇.
ဒ်သိးပှၤတဂၤ ကသ့ၣ်ညါလီၤ အလုၢ်အပှ့ၤအဂီၢ် ယ့ၣ်ၡူးမၤစၢၤအီၤ
၃. ပှၤကၤလံၤလါဖိလၢ အလိၣ်ဘၣ် တၢ်မၤစၢၤန့ၣ် ယ့ၣ်ၡူးရ့ အဝဲသ့ၣ်ဒ်လဲၣ်.
၃ ဖဲယ့ၣ်ၡူး လဲၤစံၣ်တဲၤတဲလီၤတၢ်လၢ ကၤလံၤလါ သၢဘျီတဘျီအခါ ပှၤအါဂၤ ဟဲလၢအအိၣ် ဒ်သိးကဒိကနၣ်အီၤ ဒီးအမၤဘျါက့ၤ ပှၤလၢအဆိးက့တဖၣ်. ယ့ၣ်ၡူး ထံၣ်ဘၣ်ဝဲလၢ “ပှၤဂီၢ်မုၢ်တဖၣ်န့ၣ် ဘၣ်ဒိဘၣ်ထံး ဒီးပှၤတကနၣ်ဃုာ် အဝဲသ့ၣ်ဘၣ်အဃိ အဝဲသ့ၣ်လီၤဂာ်ဒ်သိလၢ ပှၤကွၢ်ထွဲအီၤတအိၣ်ဘၣ် အသိး.” (မး ၉:၃၆) တၢ်ဘူၣ်တၢ်ဘါ ခိၣ်နၢ်တဖၣ် ထံၣ်ဆံးပှၤဂီၢ်မုၢ်တဖၣ်အံၤ ဒီးကိးအဝဲသ့ၣ်လၢ “ပှၤလၢ အဘၣ်တၢ်ဆိၣ်အၢ.” (ယိၤ ၇:၄၇-၄၉) ဘၣ်ဆၣ် ယ့ၣ်ၡူးရ့ဒီး ပှၤဂီၢ်မုၢ်တဖၣ်အံၤဂ့ၤဂ့ၤ, သိၣ်လိအဝဲသ့ၣ် ဒီးမၤဘျါက့ၤ အတၢ်ဆူးတၢ်ဆါတဖၣ်. (မး ၉:၃၅) တကးဒံးဘၣ် ဒ်သိး ယ့ၣ်ၡူး ကမၤစၢၤဘၣ် ပှၤအါဂၤအဂီၢ် အသိၣ်လိ အပျဲၢ်အဘီၣ်လၢ တၢ်စံၣ်တဲၤတဲလီၤတၢ်မၤ ဒီးဟ့ၣ်အဝဲသ့ၣ် တၢ်စိတၢ်ကမီၤလၢ ကမၤဘျါက့ၤ ပှၤဆူးပှၤဆါ ဒီးပှၤလၢ အနီၢ်ခိဂံၢ်စၢ်တဖၣ်.—မး ၁၀:၅-၈.
၄. ယ့ၣ်ၡူးရ့ဒီး ပှၤဂၤလၢ တၢ်ပာ်ကဲအဃိ ပသ့ၣ်ညါထီၣ်ဘၣ် တၢ်ဂ့ၢ်မနုၤလဲၣ်.
၄ ယ့ၣ်ၡူးရ့ဒီး ပှၤလၢအဟဲလၢအအိၣ်တဖၣ် ဂ့ၤဂ့ၤ ဒီးပာ်ကဲ အဝဲသ့ၣ်အဃိ အပာ်ဖျါထီၣ်လၢ ပှၤလၢ ပှၤဂၤထံၣ်ဆံးအီၤန့ၣ် အီၤဒီးအပါ ပာ်လုၢ်ပာ်ပှ့ၤ အဝဲသ့ၣ်ဒိၣ်မး. နမ့ၢ်ကဲပှၤလၢ အဘူၣ်ထီၣ်ဘါထီၣ် ယဟိဝၤယွၤ ဘၣ်ဆၣ် နမ့ၢ်တူၢ်ဘၣ်လၢ နလုၢ်နပှ့ၤ တအိၣ်ဘၣ်န့ၣ် ဆိကမိၣ်ထံ ဘၣ်ဃးဒီး ယ့ၣ်ၡူးရ့ဒီး ပှၤလၢအဟဲလၢအအိၣ် ဒ်လဲၣ်အဂ့ၢ်. နမ့ၢ်မၤဒ်န့ၣ်န့ၣ် နကသ့ၣ်ညါထီၣ်လၢ ယဟိဝၤယွၤ ပာ်လုၢ်ပာ်ပှ့ၤနၤဒိၣ်မး.
၅. ပိာ်မုၣ်တဂၤလၢ ယ့ၣ်ၡူးထံၣ်အီၤ ဖဲကၤလံၤလါန့ၣ် အတၢ်အိၣ်သး အိၣ်ဒ်လဲၣ်.
၅ ယ့ၣ်ၡူးသိၣ်လိ ပှၤဂီၢ်မုၢ်ဒီတဖု တကးဒံးဘၣ် အသးအိၣ် သိၣ်လိ ဒီးမၤစၤ ပှၤတဂၤစုာ်စုာ်စ့ၢ်ကီး. အဒိ ဖဲအလဲၤစံၣ်တဲၤတဲလီၤတၢ်လၢ ကၤလံၤလါအခါ အထံၣ်ဝဲ ပိာ်မုၣ်တဂၤလၢ အအိၣ်ဒီး သွံၣ်လီၤတၢ်ဆါ လၢအယံာ်ဝဲ ၁၂ နံၣ်လံ. (မၢ် ၅:၂၅) ပမ့ၢ်ကွၢ်လၢ စီၤမိၤၡ့ အတၢ်သိၣ်တၢ်သီန့ၣ် ပိာ်မုၣ်တဂၤအံၤ အကဲပှၤလၢ အတကဆှီဘၣ်အဃိ ပှၤတဂၤဂၤလၢ အထိးဘၣ်အီၤန့ၣ် ကကဲထီၣ် ပှၤလၢအတကဆှီဘၣ်. ဒီးပိာ်မုၣ်အံၤ အအိၣ်တပူၤဃီ ဒီးရ့ဒီးပှၤဂၤ တန့ၢ်ဘၣ်. တကးဒံးဘၣ် ဖဲပှၤမၤဘူၣ်ပွဲ ဒီးလဲၤဘူၣ်ထီၣ်ဘါထီၣ် ယဟိဝၤယွၤလၢ ဘူၣ်ဘျီၣ်ပူၤအခါ အတလဲၤဘၣ်ဝဲ စ့ၢ်ကီးဘၣ်. (၃ မိၤ ၁၅:၁၉, ၂၅) ပိာ်မုၣ်အံၤ အဆိးက့နးမး ဒီးအကတူၢ်ဘၣ်လၢ ပှၤတအဲၣ်အီၤ နီတဂၤဘၣ်.—မၢ် ၅:၂၆.
၆. ပိာ်မုၣ်လၢ အတူၢ်ဘၣ် တၢ်ဆါနးမးတဂၤန့ၣ် ဒ်သိးအကဘျါက့ၤအဂီၢ် အမၤဝဲဒ်လဲၣ်.
၆ ပိာ်မုၣ်လၢ အဆိးက့နးမးအံၤ အဲၣ်ဒိးလၢ ယ့ၣ်ၡူး ကမၤဘျါက့ၤအီၤ. ဘၣ်ဆၣ် အတလဲၤလၢ ယ့ၣ်ၡူးအအိၣ် ဒီးမၢအမၤဘျါက့ၤအီၤဘၣ်. ဘၣ်မနုၤအဃိလဲၣ်. ဘၣ်သ့ၣ်သ့ၣ် အမဲာ်ဆှး ခီဖျိလၢ အတၢ်ဆါအဃိ. မ့တမ့ၢ် အသ့ၣ်ညါလၢ အတကြၢးလဲၤလၢ ပှၤကျါဘၣ် ဘၣ်ဆၣ် အလဲၤဝဲအဃိ အဘၣ်ယိၣ်ဝဲလၢ ယ့ၣ်ၡူး ကနီဟးထီၣ်အီၤ. သနာ်က့ အနာ်ဝဲ သပှၢ်တၢၢ်လၢ အမ့ၢ်ထိးဘၣ် ယ့ၣ်ၡူးအဆ့ကၤ ထဲတစဲးဖိန့ၣ် အတၢ်ဆါ ကဘျါက့ၤဝဲ. (မၢ် ၅:၂၇, ၂၈) အတၢ်နာ် ဂၢၢ်ကျၢၤဒိၣ်မးအဃိ အတၢ်ဆါ ဘျါက့ၤဝဲ. ဝံၤဒီး ဖဲယ့ၣ်ၡူး သံကွၢ်ဝဲလၢ မတဂၤထိးဘၣ်အီၤလဲၣ်အခါ ပိာ်မုၣ်တဂၤန့ၣ် ဟဲတဲဖျါထီၣ် တၢ်လၢအမၤဝဲ. ဖဲန့ၣ်အခါ ယ့ၣ်ၡူးရ့ဒီးအီၤဒ်လဲၣ်.
၇. ပိာ်မုၣ်လၢ အတူၢ်ဘၣ်တၢ် နးမးတဂၤအံၤ ယ့ၣ်ၡူး ရ့ဒီးအီၤဒ်လဲၣ်. (မၢ်ကူး ၅:၃၄)
၇ ယ့ၣ်ၡူး ထံၣ်ဝဲလၢ ပိာ်မုၣ်အံၤ “အပျံၤတၢ် ဒီးကနိးကစုာ်ဝဲ” အဃိ ယ့ၣ်ၡူး သးကညီၤအီၤ ဒီးရ့အီၤဂ့ၤဂ့ၤ. (မၢ် ၅:၃၃) ယ့ၣ်ၡူး နၢ်ပၢၢ်စၢၤ အတၢ်တူၢ်ဘၣ် ဒီးတဲတၢ်ဒီးအီၤမုာ်မုာ်. တကးဒံးဘၣ် ယ့ၣ်ၡူး ကိးစ့ၢ်ကီးအီၤလၢ “ဖိမုၣ်ဧၢ.” ယ့ၣ်ၡူးကိးအီၤ ဒ်အံၤန့ၣ် ပာ်ဖျါထီၣ်လၢ ယ့ၣ်ၡူး ပာ်ကဲအီၤ, အပာ်ဖျါထီၣ် တၢ်သးကညီၤ ဒီးတၢ်အဲၣ်လၢ ပိာ်မုၣ်အံၤ အဖီခိၣ်. (ဖး မၢ်ကူး ၅:၃၄.) ယ့ၣ်ၡူး ထံၣ်ဝဲလၢ ပိာ်မုၣ်အံၤ ပျံၤတၢ်ဒိၣ်မးအဃိ ဘၣ်သ့ၣ်သ့ၣ် အကိးအီၤလၢဖိမုၣ်. ဒီးလံာ်စီဆှံ ပာ်ဖျါထီၣ်လၢ ယ့ၣ်ၡူးကိးဝဲ ပိာ်မုၣ်လၢ “ဖိမုၣ်” န့ၣ်အိၣ်ဒၣ်ထဲ တၢ်အိၣ်သး တဘျီအံၤလီၤ. ယ့ၣ်ၡူး ရ့ဒီးပိာ်မုၣ်အံၤ ဂ့ၤဂ့ၤ ဒီးပာ်ဖျါထီၣ် တၢ်အဲၣ်အဃိ ဆိကမိၣ်ကွၢ် ပိာ်မုၣ်အံၤ ကသးခုထဲလဲၣ်. တကးဒံးဘၣ် ခီဖျိလၢ အလဲၤလၢ ပှၤဂီၢ်မုၢ်အကျါ ဒီးအဖီၣ် ယ့ၣ်ၡူး ဆ့ကၤအဃိ ဒ်သိးအတတူၢ်ဘၣ်လၢ အတၢ်ကမၣ်အိၣ် တဂ့ၤအဂီၢ် ယ့ၣ်ၡူး တဲမုာ်ထီၣ်က့ၤအသး. အဃိ ပထံၣ်ဘၣ်လၢ ယ့ၣ်ၡူး အဲၣ်ဒိးမၤဘျါက့ၤ အတၢ်ဆါ တကးဒံးဘၣ် အဲၣ်ဒိးဒုးသ့ၣ်ညါအီၤလၢ အပၢ်ယဟိဝၤယွၤ ထံၣ်အီၤ ဒ်သိးဒီးဖိမုၣ်လၢ အလုၢ်ဒိၣ်ပှ့ၤဒိၣ်တဂၤ.
၈. ဒီပုၢ်ဝဲၢ်မုၣ်တဂၤလၢ အအိၣ်လၢ ကီၢ်ဘြၣ်စ့န့ၣ် ထံၣ်ဘၣ် တၢ်အိၣ်သးကီခဲ မနုၤလဲၣ်.
၈ ဆၢကတီၢ်ခဲအံၤစ့ၢ်ကီး ကစၢ်ယွၤ အခ့အပှၤတနီၤန့ၣ် အိၣ်ဒီး တၢ်ဆူးတၢ်ဆါနးမး အဃိ အဝဲသ့ၣ်သးဆံး ဒီးတူၢ်ဘၣ်လၢ အလုၢ်အပှ့ၤ တအိၣ်ဘၣ်. အဒိ ဒီပုၢ်ဝဲၢ်မုၣ် မရံယၤa လၢအကဲပှၤလဲၤလၢညါန့ၣ် အအိၣ်လၢကီၢ်ဘြၣ်စ့. ဖဲအအိၣ်ဖျဲၣ်အခါ အခီၣ်တအိၣ်ဘၣ် ဒီးအစုစ့ၣ်တခီစ့ၢ်ကီး တအိၣ်ဘၣ်. အတဲဝဲလၢ “ခီဖျိလၢ ယအိၣ်ဖျဲၣ်ထီၣ်ဒီး နီၢ်ခိတၢ်ဂံၢ်စၢ်အဃိ ယသကိးတဖၣ် တဲဆါယၤ ဒီးကိးယၤအမၠိမၠိ. တဘျီတခီၣ် ယဟံၣ်ဖိဃီဖိတနီၤ တရ့ယၤဂ့ၤဂ့ၤဘၣ် ဒီးဒုးတူၢ်ဘၣ်ယၤလၢ ယလုၢ်ယပှ့ၤ တအိၣ်ဘၣ်.”
၉. ဒီပုၢ်ဝဲၢ်မုၣ် မရံယၤ သ့ၣ်ညါထီၣ်လၢ ယဟိဝၤယွၤ ပာ်လုၢ်ပာ်ပှ့ၤအီၤဒ်လဲၣ်.
၉ ဒီပုၢ်ဝဲၢ်မုၣ် မရံယၤ ဒိးန့ၢ်ဘၣ် တၢ်မၤစၢၤဒ်လဲၣ်. ဖဲအကဲထီၣ် ယဟိဝၤပှၤအုၣ်အသးအခါ ဒီပုၢ်ဝဲၢ်မုၣ်ခွါတဖၣ် မၤမုာ်ထီၣ်အသး ဒီးမၤစၢၤအီၤဒ်သိး အကထံၣ်လီၤအသး ဒ်ယဟိဝၤယွၤ ထံၣ်အီၤအသိး. အတဲဝဲလၢ “ဒီပုၢ်ဝဲၢ်မုၣ်ခွါ မၤစၢၤယၤ တဘျုးဂၤညါ. ယဟိဝၤယွၤဟ့ၣ်ယၤ နီၢ်သးဟံၣ်ဖိဃီဖိ လၢအအဲၣ်ယၤ ဒိၣ်မးအဃိ ယစံးဘျုးအီၤ ဒိၣ်မး.” ဒီပုၢ်ဝဲၢ်မုၣ်ခွါတဖၣ် မၤစၢၤမရံယၤ ဒ်သိးအကသ့ၣ်ညါလၢ ယဟိဝၤယွၤ ပာ်လုၢ်ပာ်ပှ့ၤအီၤဒိၣ်မး.
၁၀. နီၢ်မၤရံမၤကဒၤလ့ၣ် ထံၣ်ဘၣ် တၢ်ကီတၢ်ခဲ မနုၤလဲၣ် ဒီးအတူၢ်ဘၣ်ဝဲဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၀ ပကကွၢ်သကိး ပိာ်မုၣ်အဂၤတဂၤလၢ ယ့ၣ်ၡူး မၤဘျါက့ၤအီၤအဂ့ၢ်. ပိာ်မုၣ်အံၤ အကဲဝဲ နီၢ်မၤရံမၤကဒၤလ့ၣ် လၢတၢ်ဝံတၢ်နါနွံဒု အိၣ်လၢအလိၤ. (လူၤ ၈:၂) ဘၣ်သ့ၣ်သ့ၣ် တၢ်ဝံတၢ်နါ မၢအမၤတၢ်လၢ အတမၤညီနုၢ်ဝဲဘၣ် အဃိ ပှၤတအဲၣ်ဒိး မၤဘူးအီၤဘၣ်. ပိာ်မုၣ်အံၤ အတူၢ်ဘၣ်တၢ်နးမး. ဘၣ်သ့ၣ်သ့ၣ် အပျံၤတၢ်ဒိၣ်မး ဒီးအဆိကမိၣ်လၢ ပှၤတအဲၣ်အီၤဘၣ် ဒီးပှၤမၤစၢၤအီၤ တသ့နီတဂၤဘၣ်. အဃိ ဒ်သိးနီၢ်မၤရံမၤကဒၤလ့ၣ် ကသ့ၣ်ညါထီၣ်လၢ ယဟိဝၤယွၤ ပာ်လုၢ်ပာ်ပှ့ၤအီၤအဂီၢ် ယ့ၣ်ၡူး မၤစၢၤအီၤဒ်လဲၣ်. ဖျါလၢ ယ့ၣ်ၡူး နီဟးထီၣ်ကွံာ် တၢ်ဝံတၢ်နါ လၢအလိၤ ဒီးအကဲထီၣ် ယ့ၣ်ၡူး အပျဲၢ်အဘီၣ်.
ဒ်သိး နီၢ်မၤရံမၤကဒၤလ့ၣ် ကသ့ၣ်ညါထီၣ်လၢ ယဟိဝၤယွၤ ပာ်လုၢ်ပာ်ပှ့ၤအီၤအဂီၢ် ယ့ၣ်ၡူး မၤစၢၤအီၤဒ်လဲၣ် (ကွၢ်လံာ်အဆၢ ၁၀-၁၁)
၁၁. ဒ်သိး နီၢ်မၤရံမၤကဒၤလ့ၣ် ကသ့ၣ်ညါထီၣ်လၢ ယဟိဝၤယွၤ ပာ်လုၢ်ပာ်ပှ့ၤအီၤအဂီၢ် ယ့ၣ်ၡူး မၤစၢၤအီၤဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၁ ဖဲယ့ၣ်ၡူး လဲၤစံၣ်တဲၤတဲလီၤတၢ်လၢ သဝီတဖျၢၣ်ဘၣ် တဖျၢၣ်အခါ အကွဲဃုာ်ဒီး နီၢ်မၤရံမၤကဒၤလ့ၣ်.b အဃိ တၢ်လၢယ့ၣ်ၡူး သိၣ်လိပှၤဂၤန့ၣ် အနၢ်ဟူဘၣ် အါထီၣ်ဝဲစ့ၢ်ကီး. တကးဒံးဘၣ် ဖဲယ့ၣ်ၡူး ဂဲၤဆၢထၢၣ် သမူထီၣ်က့ၤ တနံၤဃီဃီန့ၣ် ယ့ၣ်ၡူး လီၣ်ဖျါထီၣ်သး လၢအမဲာ်ညါ. ဒီးဖဲတၢ်တနံၤန့ၣ် အပၣ်ဃုာ်လၢ ပှၤအဆိကတၢၢ်တဂၤလၢ ယ့ၣ်ၡူး တဲတၢ်ဒီးအီၤအကျါ. ယ့ၣ်ၡူး မၢအတဲဘၣ်စ့ၢ်ကီး တၢ်မၢဖိတဖၣ်လၢ အဂဲၤဆၢထၢၣ် သမူထီၣ်က့ၤလံ. တၢ်ခွဲးတၢ်ယာ်လၢ အန့ၢ်ဘၣ်ဝဲအံၤ ပာ်ဖျါထီၣ်လၢ ယဟိဝၤယွၤ ပာ်လုၢ်ပာ်ပှ့ၤအီၤဒိၣ်မး.—ယိၤ ၂၀:၁၁-၁၈.
၁၂. ဘၣ်မနုၤအဃိ ဒီပုၢ်ဝဲၢ်မုၣ် လ့ဒံၤယၤ တူၢ်ဘၣ်ဝဲလၢ အလုၢ်အပှ့ၤ တအိၣ်ဘၣ်လဲၣ်.
၁၂ ဒ်နီၢ်မၤရံမၤကဒၤလ့ၣ် တူၢ်ဘၣ်ဝဲအသိး ဆၢကတီၢ်ခဲအံၤ ပှၤအါဂၤ တူၢ်ဘၣ်ဝဲလၢ ပှၤတအဲၣ် အဝဲသ့ၣ် ဒီးပာ်လုၢ်ပာ်ပှ့ၤ အဝဲသ့ၣ်ဘၣ်. ဒီပုၢ်ဝဲၢ်မုၣ် လ့ဒံၤယၤ လၢအအိၣ်လၢ ကီၢ်စပ့ၣ်န့ၣ် တဲဝဲလၢ တချုးလၢ အအိၣ်ဖျဲၣ်ထီၣ်ဒံးဘၣ်န့ၣ် အမိဆိကမိၣ်ဝဲလၢ အကမၤလီၤတဲာ်အီၤ. ဒီးအနီၣ်ဘၣ် စ့ၢ်ကီးလၢ ဖဲအနီၢ်ဆံးဒံးအခါန့ၣ် အမိ တကနၣ်ဃုာ်အီၤဘၣ် ဒီးတဲဆါအီၤနးမး. အတဲဝဲလၢ “ယမိတအဲၣ်ယၤ နီၢ်ကီၢ်ကီၢ်ဘၣ်အဃိ ထီဘိန့ၣ် ယမုၢ်လၢ်လၢ ပှၤဂၤကအဲၣ်ယၤ ဒီးအဲၣ်ဒိးကဲ ယသကိး. ယမိတဲဝဲလၢ ယကဲပှၤလၢ အတဂ့ၤဘၣ်အဃိ ယဘၣ်ယိၣ်လၢ ပှၤတအဲၣ်ယၤလၢၤဘၣ်.”
၁၃. ဒ်သိး ဒီပုၢ်ဝဲၢ်မုၣ် လ့ဒံၤယၤ ကသ့ၣ်ညါဝဲလၢ ယဟိဝၤယွၤ ပာ်လုၢ်ပာ်ပှ့ၤအီၤအဂီၢ် အဒိးန့ၢ်ဘၣ် တၢ်မၤစၢၤဒ်လဲၣ်.
၁၃ ဖဲဒီပုၢ်ဝဲၢ်မုၣ် လ့ဒံၤယၤ မၤလိဘၣ် တၢ်မ့ၢ်တၢ်တီအခါ အတၢ်အိၣ်သး ဆီတလဲထီၣ်က့ၤ. တၢ်ဃ့ထုကဖၣ်, တၢ်ဖးလံာ်စီဆှံ ဒီးဒီပုၢ်ဝဲၢ်မုၣ်ခွါ အတၢ်ကတိၤ လၢအမုာ် ဒီးအတၢ်မၤဂ့ၤန့ၣ် မၤစၢၤအီၤဒ်သိး အကသ့ၣ်ညါလၢ ယဟိဝၤယွၤ ပာ်လုၢ်ပာ်ပှ့ၤအီၤ ဒိၣ်မး. အတဲဝဲလၢ “ယဝၤတဲယၤလၢ အအဲၣ်ယၤထီဘိ ဒီးအပတြၢၤယၤ ခဲအံၤခဲအံၤ. ဒီပုၢ်ဝဲၢ်မုၣ်ခွါ အဂၤတဖၣ် ပာ်ဖျါထီၣ်လၢ အအဲၣ်ယၤ ဒ်န့ၣ်စ့ၢ်ကီး.” ဒ်ဒီပုၢ်ဝဲၢ်မုၣ် လ့ဒံၤယၤအသိး လၢနတၢ်အိၣ်ဖှိၣ်ပူၤန့ၣ် ဒီပုၢ်ဝဲၢ်မုၣ်ခွါတနီၤ ကလိၣ်ဘၣ် တၢ်မၤစၢၤဒ်သိး အကသ့ၣ်ညါလၢ ယဟိဝၤယွၤ ပာ်လုၢ်ပာ်ပှ့ၤအီၤ. နမ့ၢ်သ့ၣ်ညါဘၣ် ဒီပုၢ်ဝဲၢ်မုၣ်ခွါ ဒ်န့ၣ်တဂၤဂၤန့ၣ် နမၤစၢၤအီၤ ကသ့ဧါ.
ထံၣ်လီၤနသး ဒ်ယဟိဝၤယွၤထံၣ်နၤ
၁၄. ဒ်သိး ပကထံၣ်လီၤပသး ဒ်ယဟိဝၤယွၤ ထံၣ်ပှၤအဂီၢ် ၁ ၡမူၤအ့လး ၁၆:၇ မၤစၢၤပှၤဒ်လဲၣ်. (ကွၢ်စ့ၢ်ကီး တၢ်လွံၢ်နၢၣ် လၢအမ့ၢ် “ဘၣ်မနုၤအဃိ ယဟိဝၤယွၤ ပာ်လုၢ်ပာ်ပှ့ၤ အပှၤဂီၢ်မုၢ်လဲၣ်.”)
၁၄ သ့ၣ်နီၣ်ထီၣ်လၢ ယဟိဝၤယွၤ တထံၣ်နၤ ဒ်ပှၤဟီၣ်ခိၣ်ဖိ ထံၣ်နၤဘၣ်. (ဖး ၁ ၡမူၤအ့လး ၁၆:၇.) ပှၤအါဂၤ ဆိကမိၣ်ဝဲလၢ ပှၤတဂၤ အဒိၣ်တၢ်မ့ၢ်ဂ့ၤ, အစ့အိၣ်မ့ၢ်အါ ဒီးအတၢ်ကူၣ်ဘၣ်ကူၣ်သ့ အပတီၢ်မ့ၢ်ထီန့ၣ် ပှၤပာ်ဒိၣ်အဝဲသ့ၣ်. မ့မ့ၢ် ယဟိဝၤယွၤန့ၣ် အတၢ်ထံၣ် ဒီးတၢ်ဆိကမိၣ် တအိၣ်ဒ်န့ၣ်ဘၣ်. (ၡါ ၅၅:၈, ၉) အဃိ ဂုာ်ကျဲးစၢး ထံၣ်လီၤနသး ဒ်ယဟိဝၤယွၤထံၣ်နၤ ဒီးတဘၣ် ထံၣ်လီၤနသးဒ် ပှၤဟီၣ်ခိၣ်ဖိ ထံၣ်နၤအသိးတဂ့ၤ. လၢလံာ်စီဆှံအပူၤန့ၣ် နဖးကွၢ်ဘၣ်ဃးဒီး ဝံအ့ၤလံယၤ, နီၢ်နၤဧမံ ဒီးနီၢ်ဃးနၤ အဂ့ၢ်သ့စ့ၢ်ကီး. ဖဲနဖးအဝဲသ့ၣ် အဂ့ၢ်အခါ ဆိကမိၣ်ထံ ဘၣ်ဃးဒီး ယဟိဝၤယွၤ အဲၣ်အဝဲသ့ၣ် ဒီးပာ်လုၢ်ပာ်ပှ့ၤ အဝဲသ့ၣ်ထဲလဲၣ်. ဒီးတၢ်ကဲထီၣ်သး လၢနတၢ်အိၣ်မူပူၤ လၢအပာ်ဖျါထီၣ်လၢ ယဟိဝၤယွၤ အဲၣ်နၤ ဒီးပာ်လုၢ်ပာ်ပှ့ၤနၤန့ၣ် နကွဲးနီၣ်ပာ် သ့စ့ၢ်ကီး. တကးဒံးဘၣ် တၢ်ပာ်လုၢ်ပာ်ပှ့ၤလီၤ နီၢ်ကစၢ်သးအဂ့ၢ်န့ၣ် နဃုဖးကွၢ်လၢ ပတၢ်ကရၢကရိ လံာ်လဲၢ်အပူၤ သ့စ့ၢ်ကီး.c
၁၅. ဘၣ်မနုၤအဃိ ယဟိဝၤယွၤထံၣ် စီၤဒၤနံးယ့လး ဒ် “ပှၤလၢ အလုၢ်ဒိၣ်ပှ့ၤဒိၣ်ဒိၣ်မးတဂၤ” လဲၣ်. (ဒၤနံးယ့လး ၉:၂၃)
၁၅ သ့ၣ်နီၣ်ထီၣ်လၢ ယဟိဝၤယွၤ ပာ်လုၢ်ပာ်ပှ့ၤ နတၢ်သးတီ. ဖဲစီၤဒၤနံးယ့လး အသးအိၣ် ၉၀ ဘျဲၣ်အခါ ဘၣ်တဘျီန့ၣ် အ “လီၤဘှံးလီၤတီၤဒိၣ်မး” ဒီးအသးလီၤစၢ်ဒိၣ်မး. (ဒၤ ၉:၂၀, ၂၁) ယဟိဝၤယွၤ မၤဆူၣ်ထီၣ် အဂံၢ်အဘါဒ်လဲၣ်. ယဟိဝၤယွၤဆှၢလီၤ မူခိၣ်ကလူး ကၤဘြံၤအ့လးလၢ စီၤဒၤနံးယ့လးအအိၣ် ဒီးဒုးသ့ၣ်နီၣ်ထီၣ်အီၤလၢ အကဲ “ပှၤလၢ အလုၢ်ဒိၣ်ပှ့ၤဒိၣ်ဒိၣ်မးတဂၤ” ဒီးယဟိဝၤယွၤ နၢ်ဟူ အတၢ်ထုကဖၣ်. (ဖး ဒၤနံးယ့လး ၉:၂၃.) ဘၣ်မနုၤအဃိ ယဟိဝၤယွၤထံၣ် စီၤဒၤနံးယ့လး ဒ်န့ၣ်လဲၣ်. စီၤဒၤနံးယ့လးန့ၣ် အကဲပှၤလၢ အမၤတၢ်တီတီလိၤလိၤ ဒီးအအိၣ်ဒီး တၢ်သးတီ. (ဃ့း ၁၄:၁၄) ပထံၣ်ဘၣ်လၢ ဒ်သိး ယဟိဝၤယွၤ ကမၤမုာ်ထီၣ်ပသးအဂီၢ် အကွဲးလီၤဝဲ စီၤဒၤနံးယ့လးအဂ့ၢ် လၢလံာ်စီဆှံပူၤ. (ရိ ၁၅:၄) တကးဒံးဘၣ် ခီဖျိလၢ ပဂုာ်ကျဲးစၢး မၤတၢ် တီတီလိၤလိၤ ဒီးတီဒီး ယဟိဝၤယွၤအဃိ အပာ်လုၢ်ပာ်ပှ့ၤပှၤဒိၣ်မး. ဒီးဒ်ယဟိဝၤယွၤ ဒိကနၣ် စီၤဒၤနံးယ့လး အတၢ်ထုကဖၣ်အသိး အဒိကနၣ် ပတၢ်ထုကဖၣ်စ့ၢ်ကီး.—မံ ၆:၈, တၢ်ဂ့ၢ်အဘျဲၣ်; ဧ့ၤ ၆:၁၀.
၁၆. ဒ်သိး နကထံၣ်ယဟိဝၤယွၤ ဒ်ပါလၢ အအဲၣ်နၤဒိၣ်မးအဂီၢ် နမၤမနုၤသ့လဲၣ်.
၁၆ ထံၣ်ယဟိဝၤယွၤ ဒ်ပါလၢ အအဲၣ်နၤဒိၣ်မး. ယဟိဝၤယွၤန့ၣ် အတဃု နတၢ်ကမၣ်ဘၣ် ဒီးအအဲၣ်ဒိး မၤစၢၤနၤ. (စံး ၁၃၀:၃; မး ၇:၁၁; လူၤ ၁၂:၆, ၇) ပှၤအါဂၤလၢ အတူၢ်ဘၣ်လၢ အလုၢ်အပှ့ၤတအိၣ်ဘၣ်န့ၣ် အဝဲသ့ၣ် ဆိကမိၣ်ထံ တၢ်ဂ့ၢ်အံၤအဃိ ကဲဘျုးလၢ အဂီၢ်ဒိၣ်မး. အဒိ ဒီပုၢ်ဝဲၢ်မုၣ် မံးၡဲ လၢအအိၣ်လၢ ကီၢ်စပ့ၣ်န့ၣ် အဝၤတဲဆါအီၤ ထီဘိအဃိ အတူၢ်ဘၣ်လၢ ပှၤတအဲၣ်အီၤဘၣ် ဒီးအလုၢ်အပှ့ၤတအိၣ်ဘၣ်. အတဲဝဲလၢ “ဖဲယတူၢ်ဘၣ်လၢ ယလုၢ်ယပှ့ၤတအိၣ်ဘၣ်အခါ ယဂုာ်ကျဲးစၢး ထံၣ်တမှံလီၤယသးလၢ ယဟိဝၤယွၤ စိာ်ယၤလၢ အစုတီၤလိၤ, အအဲၣ်ယၤ ဒီးဒီသဒၢယၤ.” (စံး ၂၈:၉) ဒီပုၢ်ဝဲၢ်မုၣ် လီရဲ လၢအအိၣ်လၢ ကလံၤထံး အၤဖြံၤကၤန့ၣ် အဒုးသ့ၣ်နီၣ်လီၤက့ၤ အသး ဒီးတဲဝဲလၢ “ယဟိဝၤယွၤ မူၤဃီၤယၤလၢ တၢ်အဲၣ်အပျံၤ ဒီးအမၤစၢၤယၤဒ်သိး ယကဆဲးအိၣ်ဒီး တၢ်ရ့လိာ်သးဒီးအီၤ. တကးဒံးဘၣ် အသူယၤလၢ ယကမၤစၢၤပှၤဂၤ အဃိ ယနာ်သပှၢ်တၢၢ်လၢ အပာ်လုၢ်ပာ်ပှ့ၤယၤ နီၢ်ကီၢ်.”—ဟိၤ ၁၁:၄.
၁၇. ဒ်သိး နကနာ် သပှၢ်တၢၢ်လၢ ယဟိဝၤယွၤ ဘၣ်သူၣ်ဘၣ်သးနၤအဂီၢ် နမၤမနုၤသ့လဲၣ်. (စံးထီၣ်ပတြၢၤ ၅:၁၂) (ကွၢ်စ့ၢ်ကီးတၢ်ဂီၤ.)
၁၇ နာ်သပှၢ်တၢၢ်လၢ ယဟိဝၤယွၤ ဘၣ်သူၣ်ဘၣ်သးနၤ. (ဖး စံးထီၣ်ပတြၢၤ ၅:၁၂.) စီၤဒၤဝံး ထိၣ်သတြီၤဝဲ ယဟိဝၤယွၤ အတၢ်ဘၣ်သူၣ်ဘၣ်သး ဒ်သိးဒီး “ကတီၤဖးဒိၣ်တဘ့ၣ်” လၢအဒီသဒၢ ပှၤတီပှၤလိၤ. နမ့ၢ်ဆိကမိၣ်လီၤသးလၢ နလုၢ်နပှ့ၤ တအိၣ်ဘၣ်န့ၣ် သ့ၣ်နီၣ်ထီၣ်လၢ ယဟိဝၤယွၤ ဘၣ်သူၣ်ဘၣ်သးနၤ ဒီးအဲၣ်ဒိးမၤစၢၤနၤ. နမ့ၢ်သ့ၣ်နီၣ်ထီၣ် တၢ်ဂ့ၢ်အံၤန့ၣ် အကဒီသဒၢနၤဒ် ကတီၤဖးဒိၣ်တဘ့ၣ်. ဘၣ်ဆၣ် ယဟိဝၤယွၤ ဘၣ်သူၣ်ဘၣ်သးနၤန့ၣ် နသ့ၣ်ညါသ့ဒ်လဲၣ်. ယဟိဝၤယွၤ အတၢ်တူၢ်ဘၣ် အိၣ်လၢပဖီခိၣ် ဒ်လဲၣ်န့ၣ် အပာ်ဖျါန့ၢ်ပှၤလၢ လံာ်စီဆှံအပူၤ. တကးဒံးဘၣ် အသူစ့ၢ်ကီး တၢ်အိၣ်ဖှိၣ်သးပှၢ်, ပသကိးလၢ ပမုာ်ဒီးအီၤ ဒီးပှၤအဂၤ ဒ်သိး ကဒုးသ့ၣ်နီၣ်ထီၣ်ပှၤလၢ ယဟိဝၤယွၤ ပာ်လုၢ်ပာ်ပှ့ၤပှၤ ဒိၣ်မး. အဃိ ဖဲပဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါအခါ ပကြၢးမၤဒ်လဲၣ်.
ပမ့ၢ်သ့ၣ်ညါလၢ ယဟိဝၤယွၤ ဘၣ်သူၣ်ဘၣ်သးပှၤန့ၣ် ကမၤစၢၤပှၤဒ်သိး ပကပာ်လုၢ်ပာ်ပှ့ၤလီၤပသး အါထီၣ် (ကွၢ်လံာ်အဆၢ ၁၇)
၁၈. ဘၣ်မနုၤအဃိ ပကဘၣ်တူၢ်လိာ် ပှၤဂၤအတၢ်စံးပတြၢၤလဲၣ်.
၁၈ ဖဲပှၤလၢအသ့ၣ်ညါနၤ ဒီးအဲၣ်နၤတဖၣ် ပတြၢၤနၤအခါ တဘၣ်ဆိကမိၣ်လၢ အဝဲသ့ၣ်တဲကြီတၢ်တဂ့ၤ. သ့ၣ်နီၣ်ထီၣ်လၢ ဘၣ်သ့ၣ်သ့ၣ် ယဟိဝၤယွၤ သူအဝဲသ့ၣ်ဒ်သိး အကဒုးသ့ၣ်ညါနၤလၢ အဘၣ်သူၣ်ဘၣ်သးနၤ. ဒီပုၢ်ဝဲၢ်မုၣ် မံးၡဲ လၢပတဲသကိးအဂ့ၢ်န့ၣ် အတဲဝဲလၢ “ဖဲပှၤဂၤ ပတြၢၤယၤ ဒီးတဲဖျါထီၣ် ယတၢ်ဂ့ၤတၢ်ဝါအခါ ယကနာ် အဝဲသ့ၣ်အဂီၢ် အတညီဘၣ်ယၤဘၣ်. ဘၣ်ဆၣ် ကယီကယီန့ၣ် ယဂုာ်ကျဲးစၢး တူၢ်လိာ် ပှၤဂၤအတၢ်စံးပတြၢၤ. ဒီးယသ့ၣ်ညါလၢ ယဟိဝၤယွၤ အဲၣ်ဒိးလၢ ယကနာ်လၢ အဘၣ်သူၣ်ဘၣ်သးယၤ.” တၢ်အိၣ်ဖှိၣ်သးပှၢ်စ့ၢ်ကီး မၤစၢၤဒီပုၢ်ဝဲၢ်မုၣ် မံးၡဲ ဒ်သိးအကနာ်ဝဲ သပှၢ်တၢၢ်လၢ ယဟိဝၤယွၤ အဲၣ်အီၤ ဒီးဘၣ်သူၣ်ဘၣ်သးအီၤ. ခဲအံၤန့ၣ် အကဲဝဲ ပှၤလဲၤလၢညါ ဒီးအမၤစၢၤ ဘ့ၤသ့လးအတၢ်မၤ ဒ်ပှၤမၤစၢၤစိတၢ်တဂၤ.
၁၉. ဘၣ်မနုၤအဃိ ပနာ်သ့သပှၢ်တၢၢ်လၢ ယဟိဝၤယွၤထံၣ်ပှၤ ဒ်ပှၤလၢ အလုၢ်အပှ့ၤဒိၣ်ဒိၣ်မးလဲၣ်.
၁၉ ယ့ၣ်ၡူး ဒုးသ့ၣ်နီၣ်ထီၣ်ပှၤလၢ ယဟိဝၤယွၤ အဲၣ်ပှၤဒိၣ်မး ဒီးအထံၣ်ပှၤဒ် ပှၤလၢအလုၢ်အပှ့ၤဒိၣ်ဒိၣ်မး. (လူၤ ၁၂:၂၄) အဃိ ပတဘၣ်သးပ့ၤနီၣ် တၢ်ဂ့ၢ်အံၤ နီတဘျီဘၣ်. ဒီးဒ်သိးပှၤဂၤစ့ၢ်ကီး ကသ့ၣ်ညါလၢ ယဟိဝၤယွၤ ပာ်လုၢ်ပာ်ပှ့ၤ အဝဲသ့ၣ်အဂီၢ် မ်ပဂုာ်ကျဲးစၢး မၤစၢၤပှၤဂၤထီဘိ.
တၢ်သးဝံၣ် ၁၃၉ ထံၣ်တမှံကွၢ် ဖဲတၢ်ခဲလၢာ်မ့ၢ်တၢ်အသီ
a ပှၤမံၤတနီၤန့ၣ် ပှၤဆီတလဲဝဲ.
b ဖဲယ့ၣ်ၡူး လဲၤစံၣ်တဲၤတဲလီၤတၢ်အခါ ပိာ်မုၣ်အါဂၤ လဲၤဒီးအီၤ. လၢပိာ်မုၣ်တဖၣ် အကျါန့ၣ် ဖျါလၢအပၣ်ဃုာ်ဒီး နီၢ်မၤရံမၤကဒၤလ့ၣ်. ဒီးဒ်သိး ပိာ်မုၣ်တဖၣ်အံၤ ကမၤစၢၤ ဒီးမၤလၢပှဲၤန့ၢ်ဝဲ ယ့ၣ်ၡူးဒီးတၢ်မၢဖိတဖၣ် အတၢ်လိၣ်ဘၣ်အဂီၢ် အဝဲသ့ၣ်သူဝဲ အနီၢ်ကစၢ်ကျိၣ်စ့ ဒီးတၢ်လၢအအိၣ်ဒီးအီၤ.—မး ၂၇:၅၅, ၅၆; လူၤ ၈:၁-၃.
c အဒိ ဖးကွၢ် တၢ်ဂ့ၢ်လၢ အခိၣ်တီမ့ၢ် “ယဟိဝၤယွၤ ပာ်လုၢ်ပာ်ပှ့ၤနၤ” လၢအအိၣ်လၢ တၢးထီခိးတၢ်, လါအ့ဖြ့ၣ် ၂၀၂၁ ဒီးဖးကွၢ် တၢ်ဂ့ၢ်ခိၣ်တီ လၢအမ့ၢ် “တၢ်သးဒ့ဒီ” လၢအအိၣ်လၢ လံာ်လၢအမ့ၢ် လံာ်စီဆှံအဆၢတဖၣ်လၢ ခရံာ်ဖိအတၢ်အိၣ်မူအဂီၢ်.