“ဆဲးအိၣ်ဒီး တၢ်သးတဖျၢၣ်ဃီ လၢသးစီဆှံ ဒုးအိၣ်ထီၣ်ဝဲ”

“တၢ်သးတဖျၢၣ်ဃီ” မ့တမ့ၢ် တၢ်ဃူတၢ်ဖိးလၢ အအိၣ်ဒီးပှၤန့ၣ် “သးစီဆှံ ဒုးအိၣ်ထီၣ်ဝဲ.” ဘၣ်ဆၣ် စီၤပီလူး တဲဝဲလၢ ပကဘၣ် ဂုာ်ကျဲးစၢးဒ်သိး ပကဆဲးအိၣ်ဒီး တၢ်သးတဖျၢၣ်ဃီ. အဃိ ဒ်သိး ပကဆဲးအိၣ်ဒီး “တၢ်သးတဖျၢၣ်ဃီ လၢသးစီဆှံ ဒုးအိၣ်ထီၣ်ဝဲ” အဂီၢ် ပဝဲခရံာ်ဖိ တဂၤဘၣ်တဂၤ ကဘၣ်ဂုာ်ကျဲးစၢး လၢပသနၢၣ်ဒၣ်ဝဲ.

အဒိ ပှၤတဂၤဟ့ၣ်နၤ ကါအသီတခိၣ်. ဘၣ်ဆၣ် ခီဖျိလၢ နတကွၢ်ထွဲကါ ဂ့ၤဂ့ၤဘၣ်အဃိ ဖဲအဟးဂီၤအခါ နမ့ၢ်ပာ်တၢ်ကမၣ်လၢ ပှၤဟ့ၣ်နၤကါ တဂၤန့ၣ် မ့ၢ်အကဘၣ်စ့ၢ်ကီးဧါ. အတဘၣ်ဘၣ်.

ဒ်န့ၣ်အသိး တၢ်သးတဖျၢၣ်ဃီ မ့တမ့ၢ် တၢ်ဃူတၢ်ဖိးလၢ ဒီပုၢ်ဝဲၢ်မုၣ်ခွါ အကျါန့ၣ် အကဲဝဲ ကစၢ်ယွၤ အတၢ်ဟ့ၣ်တခါ. ဘၣ်ဆၣ် ပဝဲတဂၤဘၣ်တဂၤ အိၣ်ဒီးမူဒါလၢ ပကဆဲးပၢၤဃာ်အီၤ. အဒိ တၢ်ဂ့ၢ်ကီ မ့ၢ်အိၣ်ထီၣ်လၢ ပဝဲဒီးဒီပုၢ်ဝဲၢ် တဂၤဂၤ အဘၢၣ်စၢၤန့ၣ် ပကမၤဒ်လဲၣ်. ပကဘၣ် သံကွၢ်လီၤပသးလၢ ‘ဒ်သိး ပကအိၣ်ဒီး တၢ်သးတဖျၢၣ်ဃီ ဒီးတၢ်ဃူတၢ်ဖိး ကအိၣ်ထီၣ်က့ၤအဂီၢ် မ့ၢ်ယဂုာ်ကျဲးစၢး မၤဘၣ်ဂီၢ်ထီၣ်က့ၤ တၢ်ဂ့ၢ်ကီအံၤဧါ.’

“ဂုာ်ကျဲးစၢးလၢ အဂ့ၤကတၢၢ်” ဒ်သိးသုကဆဲးအိၣ်ဒီး တၢ်သးတဖျၢၣ်ဃီ

စီၤပီလူး ပာ်ဖျါထီၣ်ဝဲလၢ ဒီပုၢ်ဝဲၢ်မုၣ်ခွါ တဂၤဂၤ မ့ၢ်မၤဘၣ်ဒိပသးန့ၣ် ဒ်သိး ပကအိၣ်ဒီး တၢ်သးတဖျၢၣ်ဃီ ဒီးတၢ်ဃူတၢ်ဖိးအဂီၢ် ပကဘၣ် ဂုာ်ကျဲးစၢးဆူၣ်ဆူၣ်. တၢ်မ့ၢ်ကဲထီၣ်သး ဒ်အံၤန့ၣ် မ့ၢ်ပကဘၣ်လဲၤလၢ ဒီပုၢ်ဝဲၢ်လၢ အမၤဘၣ်ဒိပသး အအိၣ် ဒီးတဲအီၤလၢ အမၤဘၣ်ဒိပှၤ ဒိၣ်မးန့ၣ်ဧါ. ပတလိၣ်မၤဒ်န့ၣ် ထီဘိဘၣ်. ဘၣ်ဆၣ် ပသံကွၢ်လီၤ ပသးဒ်အံၤသ့. “ယမ့ၢ်လဲၤ တဲတၢ်ဒီးအီၤန့ၣ် မ့ၢ်တၢ်အိၣ်သး ကဂ့ၤထီၣ်ဧါ မ့တမ့ၢ် အကနးထီၣ်ဧါ.” ဒ်သိး တၢ်အိၣ်သး တနးထီၣ်တဂ့ၤအဂီၢ် ပမ့ၢ်ကွၢ်ကပာ်ကွံာ် အဝဲသ့ၣ် တၢ်လီၤတူာ်လီၤကာ် မ့တမ့ၢ် ပျၢ်ကွံာ် အတၢ်ကမၣ်န့ၣ် ကဂ့ၤဒိၣ်တစဲး.—ကတိၤ ၁၉:၁၁; မၢ် ၁၁:၂၅.

တၢ်မၢဖိပီလူး တဲဝဲလၢ “ဝံသးစူၤလိာ်သး တဂၤဒီးတဂၤလၢ တၢ်အဲၣ်တၢ်ကွံ အပူၤတက့ၢ်.” (အ့း ၄:၂) စီၤပီလူး အဲၣ်ဒိးတဲဝဲလၢ ခီဖျိလၢ ပဒီပုၢ်ဝဲၢ်မုၣ်ခွါတဖၣ်န့ၣ် ကဲဝဲပှၤတၢ်ဒဲးဘးဖိ ဒ်သိးဒီးပှၤအဃိ ပကဘၣ် နၢ်ပၢၢ်စၢၤလိာ်သး. ပဝဲခဲလၢာ်န့ၣ် ပဂုာ်ကျဲးစၢးဒုးအိၣ်ထီၣ် “လုၢ်လၢ်သကဲာ်ပဝးအသီ.” (အ့း ၄:၂၃, ၂၄) ဘၣ်ဆၣ် ပမၤတန့ၢ် လၢလၢပှဲၤပှဲၤ နီတဂၤဒံးဘၣ်. (ရိ ၃:၂၃) အဃိ ပမ့ၢ်တူၢ်လိာ်လၢ ပဒီပုၢ်ဝဲၢ်မုၣ်ခွါတဖၣ် ကဲဝဲပှၤတၢ်ဒဲးဘးဖိ ဒ်သိးဒီးပှၤန့ၣ် ကမၤစၢၤပှၤဒ်သိး ပကဆဲးဝံသးစူၤလိာ်သး ဒီးပျၢ်လိာ်သး တၢ်ကမၣ်. ပမ့ၢ်မၤဒ်န့ၣ်န့ၣ် ပ “ကဆဲးအိၣ်ဒီးတၢ်သးတဖျၢၣ်ဃီ.”

ပမ့ၢ်ကွၢ်ကပာ် ဒီးပျၢ်ကွံာ် ဒီပုၢ်ဝဲၢ်မုၣ်ခွါ အတၢ်ကမၣ်န့ၣ် ပကဆဲးအိၣ်ဒီး “တၢ်ဃူတၢ်ဖိး.” ဖဲ အ့းဖ့းစူး ၄:၃ အပူၤ ကြံးအတၢ်ကတိၤလၢ ပှၤကွဲးကျိာ်ထံက့ၤလၢ “တၢ်ဃူတၢ်ဖိးလၢ အစၢဃာ်သုန့ၣ်” အခီပညီ ဒ်သိးလိာ်သးဒီး “တၢ်အဆၢ ဒီးတၢ်အထူၣ်အပျၢ်” လၢ ကလီးစဲ ၂:၁၉ ပာ်ဖျါထီၣ်ဝဲ. တၢ်အဆၢ ဒီးတၢ်အထူၣ်အပျၢ်န့ၣ် မ့ၢ်ဝဲတၢ်လၢ အဒုးဘုးတာ်ဝဲ ပဃံပကွဲတဖၣ် ကျၢၤကျၢၤ. ဒ်န့ၣ်အသိး ပဒီပုၢ်ဝဲၢ်မုၣ်ခွါတဖၣ် မ့ၢ်အိၣ်ဒီး တၢ်လီၤတူာ်လီၤကာ် သနာ်က့ တၢ်ဃူတၢ်ဖိး ဒီးတၢ်အဲၣ်န့ၣ် ကမၤစၢၤပှၤဒ်သိး ပကဆဲးအိၣ်ဒီး တၢ်ရ့လိာ်သးလၢအဂ့ၤ.

ဖဲဒီပုၢ်ဝဲၢ်မုၣ်ခွါတဖၣ် မၤကမၣ်ပှၤ, မၤသးအုး ဒီးမၤအ့န့ပသးအခါ လၢပကပာ်ဒ့ၣ်ပာ်ကမၣ် အဝဲသ့ၣ်အလီၢ် ပကပာ်ဖျါထီၣ် တၢ်အဲၣ် ဒီးတၢ်ကဟုကယာ်လၢ အဝဲသ့ၣ်အဖီခိၣ်. (ကလီး ၃:၁၂) ပတလၢတပှဲၤဘၣ်အဃိ လၢပတၢ်အိၣ်မူအပူၤန့ၣ် ပကမၤကမၣ်ဘၣ် ပဒီပုၢ်ဝဲၢ်မုၣ်ခွါ. ပမ့ၢ်သ့ၣ်နီၣ်ထီၣ် တၢ်ဂ့ၢ်အံၤန့ၣ် ကမၤစၢၤပှၤ ဒ်သိး ပကဆဲးအိၣ်ဒီး “တၢ်သးတဖျၢၣ်ဃီ လၢသးစီဆှံဒုးအိၣ်ထီၣ်ဝဲ.”