တၢ်ဟ့ၣ်ဂံၢ်ဟ့ၣ်ဘါလၢ ပိာ်မုၣ်လၢ ပှၤတရ့အီၤဂ့ၤဂ့ၤဘၣ် အဂီၢ်

တၢ်ကွဲးဖုၣ်လၢ jw.org ဝဲးပဆဲးအပူၤ လၢအခိၣ်တီမ့ၢ် “ဘၣ်ဃးဒီး တၢ်ဘံၣ်တၢ်ဘၢလၢ ပိာ်မုၣ်တဖၣ်အဂီၢ်န့ၣ် လံာ်စီဆှံ ပာ်ဖျါဝဲဒ်လဲၣ်” န့ၣ် ပှၤစးထီၣ် ကွဲးဝဲဒ်န့ၣ်. ဒီးလၢတၢ်ဂ့ၢ် အကတၢၢ်န့ၣ် အိၣ်ဒီး လ့း (link) လၢပှၤကဒီလိး ဒီးထုးထီၣ်လံာ်က့အံၤအဂီၢ်. ဒီပုၢ်ဝဲၢ်မုၣ် စတ့စံၤ လၢအအိၣ်လၢ ကီၢ်အမဲရကၤန့ၣ် တဲဝဲလၢ “ယစဲကျံးထုးထီၣ် လံာ်က့တဖၣ် ဝံၤဒီး ယၤဒီးဒီပုၢ်ဝဲၢ်မုၣ်တဂၤ လဲၤနီၤလီၤလၢ ပှၤကွၢ်ထွဲ ဒီးဒီသဒၢပိာ်မုၣ် အတၢ်လီၢ် ဖဲပတၢ်အိၣ်ဖှိၣ် အဟီၣ်ကဝီၤ.”

ပှၤမၤတၢ်ဖိ ဖဲန့ၣ်တဂၤ သံကွၢ်ပှၤလၢ မ့ၢ်ပဟ့ၣ်အါထီၣ်အဝဲသ့ၣ် လံာ်က့လၢကဟ့ၣ်ဝဲ ပိာ်မုၣ်လၢ အဟဲအိၣ်ဖဲတၢ်လီၢ်အံၤ ကသ့ဧါ. အဃိ ပဟဲက့ၤစိာ်န့ၢ် အဝဲသ့ၣ် လံာ်က့အဘ့ၣ် ၄၀ ဃုာ်ဒီး jw.org ခးက့ အဘ့ၣ် ၃၀. လၢခံ ပှၤကွၢ်ထွဲတၢ်မူဒါခိၣ်တဂၤ အဲၣ်ဒိးလၢ ယဟိဝၤပှၤအုၣ်အသး ကဒုးနဲၣ်ဝဲ ပိာ်မုၣ်လၢ အအိၣ်ဖဲန့ၣ်တဖၣ်လၢ ကဘၣ်မၤလိ လံာ်စီဆှံဒ်လဲၣ်.

ဒီပုၢ်ဝဲၢ်မုၣ် စတ့စံၤ ဒီးဒီပုၢ်ဝဲၢ်မုၣ် အဂၤခံဂၤ လဲၤလၢ ပှၤကွၢ်ထွဲ ဒီးဒီသဒၢပိာ်မုၣ် အတၢ်လီၢ် အဂၤတဖျၢၣ် ဒီးပှၤဖဲန့ၣ်တဖၣ် ဟံးန့ၢ်ဝဲ လံာ်က့အံၤယဲၢ်ဘ့ၣ် ဒီးဃ့အါထီၣ်ဝဲဒံး. ပှၤမၤတၢ်ဖိ ဖဲန့ၣ်တဂၤ တဲဝဲလၢ “ပလိၣ်ဘၣ် လံာ်က့ဒ်အံၤလီၤ. တၢ်ဂ့ၢ်အံၤ ကကဲဘျုးလၢ ပိာ်မုၣ်တဖၣ်အံၤအဂီၢ် ဖးဒိၣ်ညါ.” လၢခံ ဒီပုၢ်ဝဲၢ်မုၣ်တဖၣ် က့ၤအိၣ်သကိး ပိာ်မုၣ်လၢ အဟဲအိၣ်ဖဲန့ၣ် ဒီးပိာ်မုၣ်စှၤကိာ်ဂၤ ပာ်ဖှိၣ်ထီၣ်သးဒ်သိး ကထံၣ်ဘၣ်ဝဲလၢ တၢ်မၤလိလံာ်စီဆှံန့ၣ် ပှၤမၤဝဲဒ်လဲၣ်အဂ့ၢ်. ဒီးဖဲန့ၣ် ပိာ်မုၣ်ခံဂၤ တဲဝဲလၢ လၢခံတနွံန့ၣ် အဝဲသ့ၣ် အဲၣ်ဒိးလဲၤထီၣ်ဝဲ နွံကတၢၢ်တၢ်အိၣ်ဖှိၣ်.

ဒီပုၢ်ဝဲၢ်မုၣ် စတ့စံၤ တဲဝဲလၢ “ဖဲပှၤအါဂၤ ဖးဘၣ်ဝဲ တၢ်ဂ့ၢ်တၢ်ကျိၤအံၤအခါ ပထံၣ်ဘၣ်လၢ အဝဲသ့ၣ် သးခုဒိၣ်မးအဃိ ပကမၢကမၣ်ညါ. ပိာ်မုၣ်လၢ အထံၣ်ဘၣ် တၢ်တတီတလိၤ တဖၣ်အံၤ ပဒုးသ့ၣ်ညါဘၣ် အဝဲသ့ၣ်လၢ ဘီမုၢ်တၢ်သးခုကစီၣ်အဃိ ပသးခုဒိၣ်မး. အဝဲသ့ၣ် သးအိၣ်တူၢ်လိာ်ပှၤ ဒီးဟံးန့ၢ်ဝဲ လံာ်က့အဃိ ပသးမုာ်ဒိၣ်မး. ဒီးဖဲပဂုာ်ကျဲးစၢးမၤစၢၤ ပိာ်မုၣ်တဖၣ်အံၤအခါ ယဟိဝၤယွၤ ကဆိၣ်ဂ့ၤ ပတၢ်ထဲးဂံၢ်ထဲးဘါ ဒ်လဲၣ်န့ၣ် ပအဲၣ်ဒိး သ့ၣ်ညါသပှၢ်တၢၢ်.”