ကွၢ်လိ ယဟိဝၤယွၤ အတၢ်ဆီၣ်လီၤသး

၁. ယဟိဝၤယွၤ အိၣ်ဒီးတၢ်ဆီၣ်လီၤသးန့ၣ် ဘၣ်မနုၤအဃိ အလီၤကမၢကမၣ် ဒိၣ်မးလဲၣ်.

ဆၢကတီၢ်ခဲအံၤ ပှၤလၢအအိၣ်ဒီး တၢ်န့ၢ်စိန့ၢ်ကမီၤန့ၣ် နဆိကမိၣ် အဝဲသ့ၣ်အိၣ်ဒီး တၢ်ဆီၣ်လီၤသးဧါ. ဘၣ်သ့ၣ်သ့ၣ် အဝဲသ့ၣ် တအိၣ်ဒီး တၢ်ဆီၣ်လီၤသးဘၣ်. မ့မ့ၢ် ယဟိဝၤယွၤန့ၣ် အကဲသ့တၢ်လၢာ်ကစၢ် သနာ်က့ အအိၣ်ဒီး တၢ်ဆီၣ်လီၤသး. (စံး ၁၁၃:၅-၈) ယဟိဝၤယွၤန့ၣ် အတပာ်ထီၣ်ထီသး နီတဘျီဘၣ်. ဒီးပှၤလၢအဆီၣ်လီၤသး ဒ်သိးဒီးအီၤန့ၣ် တအိၣ်နီတဂၤဘၣ်. အဃိ လၢတၢ်မၤလိအံၤ ပကတဲသကိး ယဟိဝၤယွၤ အတၢ်ဂ့ၤတၢ်ဝါလွံၢ်ခါ ဒီးဘၣ်ထွဲဒီး အတၢ်ဆီၣ်လီၤသးဒ်လဲၣ်. ပကထံၣ်ဘၣ်စ့ၢ်ကီးလၢ ယ့ၣ်ၡူးကွၢ်လိအပါ အတၢ်ဆီၣ်လီၤသးဒ်လဲၣ်. ပမ့ၢ်မၤလိ တၢ်ဂ့ၢ်တဖၣ်အံၤန့ၣ် ပတၢ်ရ့လိာ်သးဒီး ယဟိဝၤယွၤ ကဂ့ၤဒိၣ်ထီၣ် ဒီးပကအဲၣ်ဒိး ပာ်ဖျါအါထီၣ် တၢ်ဆီၣ်လီၤသး.

ယဟိဝၤယွၤ အဲၣ်ဒိးလၢ ပကသုးဘူးသး လၢအအိၣ် ဒီးတဲတၢ်ဒီးအီၤပျီပျီ

၂. စံးထီၣ်ပတြၢၤ ၆၂:၈ ဒုးသ့ၣ်ညါပှၤ ယဟိဝၤယွၤ အဂ့ၢ်ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၂ ပှၤလၢ အပာ်ထီၣ်ထီသးန့ၣ် ညီနုၢ်ပရ့အီၤ ဒီးတဲတၢ်ဒီးအီၤ တဘူၣ်ဘၣ်. အဝဲသ့ၣ် ဆိကမိၣ်လီၤသးလၢ အဂ့ၤဒိၣ်န့ၢ်ပှၤဂၤ ဒီးတရ့ပှၤဂၤ ဂ့ၤဂ့ၤဘၣ်အဃိ ပှၤတအဲၣ်ဒိး ရ့အီၤဘၣ်. မ့မ့ၢ် ယဟိဝၤယွၤန့ၣ် အလီၤဆီဒီး အဝဲသ့ၣ်ဒိၣ်မး. အအဲၣ်ဒိးလၢ ပကသုးဘူးသးလၢအအိၣ် ဒီးတဲဘၣ်အီၤ ပတၢ်ဆိကမိၣ် ဒီးတၢ်တူၢ်ဘၣ်ခဲလၢာ်. (ဖး စံးထီၣ်ပတြၢၤ ၆၂:၈.) အဒိ ပါတဂၤလၢ အအဲၣ်အဖိန့ၣ် ဖဲအဖိတဲဖျါထီၣ် အတၢ်တူၢ်ဘၣ်အခါ အဒိကနၣ်န့ၢ်ဝဲဂ့ၤဂ့ၤ. ဒ်န့ၣ်အသိး ယဟိဝၤယွၤ လၢအကဲပပါန့ၣ် အအဲၣ်ဒိးလၢ ပကတဲဘၣ်အီၤ ပတၢ်တူၢ်ဘၣ် ဒီးအကဒိကနၣ်န့ၢ်ပှၤ. တကးဒံးဘၣ် ဘၣ်ဃးဒီး အဒိကနၣ် တၢ်ထုကဖၣ်အဂ့ၢ်န့ၣ် အမၢပှၤကွဲးလီၤဝဲလၢ လံာ်စီဆှံပူၤအဃိ ပသ့ၣ်ညါဘၣ်လၢ အအဲၣ်ဒိးလၢ ပသုးဘူးသးလၢအအိၣ် ဒီးတဲတၢ်ဒီးအီၤပျီပျီ. (ၡူ ၁၀:၁၂-၁၄; ၁ မူၤ ၁:၁၀-၁၈) ဘၣ်ဆၣ် ခီဖျိလၢ ပမၤဘၣ်တၢ်ကမၣ်အဃိ တဘျီတခီၣ်န့ၣ် ပကတူၢ်ဘၣ်လၢ ပတကြၢးဃ့ထုကဖၣ်လၢ ယဟိဝၤယွၤ အအိၣ်ဘၣ်.

၃. ဘၣ်မနုၤအဃိ ယဟိဝၤယွၤ အဲၣ်ဒိးလၢ ပကဆဲးဃ့ထုကဖၣ် လၢအအိၣ်လဲၣ်.

^၃ ပမ့ၢ်တူၢ်ဘၣ်လၢ ယဟိဝၤယွၤ တအဲၣ်ပှၤဘၣ် သနာ်က့ အအဲၣ်ဒိးလၢ ပကဆဲးဃ့ထုကဖၣ် လၢအအိၣ်ဒံး. ဘၣ်မနုၤအဃိ ပတဲဒ်န့ၣ်လဲၣ်. ဆိကမိၣ်ကွၢ် ယ့ၣ်ၡူး အတၢ်ကတိၤဒိ ဘၣ်ဃးဒီး ဖိခွါလၢအဟးဖျိးအဂ့ၢ်. ဖိခွါအံၤ အမၤကမၣ်တၢ်အါမး ဒီးတူၢ်ဘၣ်ဝဲလၢ အပါတအဲၣ်ဒိး တူၢ်လိာ်က့ၤအီၤလၢ အဟံၣ်ဖိဃီဖိ အကျါဘၣ်. ဘၣ်ဆၣ် ဖဲအဟဲက့ၤလၢဟံၣ်အခါ အပါမၤဝဲဒ်လဲၣ်. ယ့ၣ်ၡူး တဲဝဲလၢ ဖဲအပါထံၣ်စိအီၤ တဘျီဃီန့ၣ် အပါ “လဲၤဃ့ၢ်လၢအအိၣ်, ဖိးဟုအီၤ ဒီးနၢမူအီၤ ကဖီလီဖိ.” (လူၤ ၁၅:၁၇-၂၀) ယဟိဝၤယွၤန့ၣ် အလီၤဂာ် ဒ်သိးဒီး ပါတဂၤန့ၣ်. ဖဲပမၤကမၣ်တၢ် မ့တမ့ၢ် သူၣ်ကိၢ်သးဂီၤတၢ်အခါ ပမ့ၢ်ဃ့ထုကဖၣ်လၢ အအိၣ်န့ၣ် အကပာ်ဖျါထီၣ် တၢ်ဆီၣ်လီၤသး ဒီးဒိကနၣ်န့ၢ်ပှၤ တဘျီဃီ. (သး ၃:၁၉, ၂၀) ဒီးခီဖျိလၢ ယဟိဝၤယွၤ အတၢ်အဲၣ် ဒီးတၢ်သးကညီၤအဃိ အပာ်ဖျါထီၣ် တၢ်ဒိသူၣ်ဒိသး, လီၤဂာ်ဒ်သိးဒီး အဟဲဃ့ၢ်လၢပအိၣ် ဒ်သိးကမၤမုာ်ထီၣ်က့ၤပသး. (ၡါ ၅၇:၁၅) ဆၢကတီၢ်ခဲအံၤ ယဟိဝၤယွၤ ‘ဟဲဃ့ၢ်လၢပအိၣ်’ ခီဖျိ အသူဝဲ တၢ်အိၣ်ဖှိၣ်သးပှၢ်, ပဟံၣ်ဖိဃီဖိ ဒီးဒီပုၢ်ဝဲၢ်မုၣ်ခွါတဖၣ် ဒ်သိးကမၤမုာ်ထီၣ်က့ၤပသး. (ယၤ ၅:၁၄, ၁၅) ယဟိဝၤယွၤ အဲၣ်ဒိးလၢ ပကဆဲးအိၣ်ဘူးဒီးအီၤ ထီဘိအဃိ အမၤစၢၤပှၤ လၢကျဲဒ်အံၤ.

၄. ဘၣ်မနုၤအဃိ ပှၤရ့ဒီးယ့ၣ်ၡူးဘူၣ်လဲၣ်.

^၄ ယ့ၣ်ၡူး ကွၢ်လိအပါ. ယ့ၣ်ၡူး ဆီၣ်လီၤအသး ဒ်သိးဒီးအပါ. အဃိ ဖဲအအိၣ်လၢ ဟီၣ်ခိၣ်ချၢအခါ ပှၤရ့အီၤညီ ဒီးလဲၤလၢအအိၣ်ဘူၣ်. အဒိ အပျဲၢ်အဘီၣ် မ့ၢ်အဲၣ်ဒိး သ့ၣ်ညါတၢ်ဂ့ၢ် တမံၤမံၤန့ၣ် အဝဲသ့ၣ် သံကွၢ်အီၤဘူၣ်. (မၢ် ၄:၁၀, ၁၁) ဒီးဖဲယ့ၣ်ၡူး သံကွၢ်အဝဲသ့ၣ် တၢ်ဂ့ၢ်တမံၤမံၤအခါ အဝဲသ့ၣ် တဲဖျါထီၣ် အတၢ်ထံၣ်ပျီပျီ. (မး ၁၆:၁၃-၁၆) တကးဒံးဘၣ် ဖဲအပျဲၢ်အဘီၣ် မၤဘၣ်တၢ်ကမၣ် တမံၤမံၤအခါ အဝဲသ့ၣ် သ့ၣ်ညါလၢ ယ့ၣ်ၡူးန့ၣ် အသးဂ့ၤ, အအိၣ်ဒီး တၢ်သးကညီၤ ဒီးတၢ်ဝံသးစူၤအဃိ အဝဲသ့ၣ် တဘၣ်ယိၣ်လၢ ယ့ၣ်ၡူး ကသးထီၣ်အီၤဘၣ်. (မး ၁၇:၂၄-၂၇) ခီဖျိလၢ ယ့ၣ်ၡူးကွၢ်လိ ယဟိဝၤယွၤ လီၤတံၢ်လီၤဆဲးအဃိ အပျဲၢ်အဘီၣ်တဖၣ် သ့ၣ်ညါအါထီၣ် ယဟိဝၤယွၤအဂ့ၢ်. (ယိၤ ၁၄:၉) ဒီးအဝဲသ့ၣ် သ့ၣ်ညါထီၣ်ဝဲလၢ ယဟိဝၤယွၤန့ၣ် အအိၣ်ဒီး တၢ်ဆီၣ်လီၤသး ဒီးအဲၣ်ဒိးလၢ ပှၤကသုးဘူးသးလၢအအိၣ်. အဃိ ယဟိဝၤယွၤန့ၣ် အတဒ်သိးဒီး တၢ်ဘူၣ်တၢ်ဘါခိၣ်နၢ် လၢအပာ်ထီၣ်ထီသး နီတစဲးဘၣ်.

၅. ဒ်သိး ပှၤဟဲရ့ပှၤ ဒီးတဲတၢ်ဒီးပှၤကဘူၣ်အဂီၢ် တၢ်ဆီၣ်လီၤသး မၤစၢၤပှၤသ့ဒ်လဲၣ်.

^၅ ပကွၢ်လိ ယဟိဝၤယွၤ သ့ဒ်လဲၣ်. ပမ့ၢ်မၤအါထီၣ် တၢ်ဆီၣ်လီၤသးန့ၣ် ပှၤဟဲရ့ပှၤ ဒီးတဲတၢ်ဒီးပှၤကဘူၣ်. ပမ့ၢ်တအိၣ်ဒီး တၢ်ဆီၣ်လီၤသးဘၣ်န့ၣ် ပကသးက့ၣ်ပှၤဂၤ, ပကဆိကမိၣ်လၢ ပဂ့ၤန့ၢ်ဒံးပှၤဂၤ ဒီးဖဲပှၤမၤဘၣ်ဒိ ပသးအခါ ပတပျၢ်ပှၤဂၤ အတၢ်ကမၣ်ဘၣ်. ပမ့ၢ်အိၣ်ဒီး တၢ်ပာ်သး ဒ်အံၤန့ၣ် ပှၤတအဲၣ်ဒိးရ့ပှၤဘၣ်. ဘၣ်ဆၣ် ပမ့ၢ်ဆီၣ်လီၤသးန့ၣ် ပကရ့ပှၤဂၤဂ့ၤဂ့ၤ, ကဝံသးစူၤပှၤဂၤ ဒီးသးအိၣ်ပျၢ်ပှၢ်ဂၤ အတၢ်ကမၣ်အဃိ ပှၤကအဲၣ်ဒိးရ့ဒီးပှၤ. (ကလီး ၃:၁၂-၁၄) လီၤဆီဒၣ်တၢ် တၢ်အိၣ်ဖှိၣ်သးပှၢ်တဖၣ်န့ၣ် ကဘၣ်ကဲပှၤလၢ ပှၤရ့အီၤညီ ဒီးတဲတၢ်ဒီးအီၤဘူၣ်. အဃိ အဝဲသ့ၣ် ကဘၣ်မၤဝဲဒ်လဲၣ်. မ့ၢ်သ့န့ၣ် တၢ်အိၣ်ဖှိၣ်သးပှၢ် ကြၢးဂုာ်ကျဲးစၢး လဲၤထီၣ်တၢ်အိၣ်ဖှိၣ်လၢ တၢ်အိၣ်ဖှိၣ်လီၢ် ဒီးတဘၣ်မ့ၢ်ထဲလၢ အထီၣ်ဝဲလၢ စူ (zoom) ပူၤဘၣ်. ဒီးတသ့ဖဲအသ့ အဝဲသ့ၣ် ကြၢးဂုာ်ကျဲးစၢး လဲၤစံၣ်တဲၤတဲလီၤတၢ်ဒီး ဒီပုၢ်ဝဲၢ်မုၣ်ခွါလၢ တဟံၣ်ဘၣ်တဟံၣ်. ဒီပုၢ်ဝဲၢ်မုၣ်ခွါတဖၣ် မ့ၢ်သ့ၣ်ညါအါထီၣ် တၢ်အိၣ်ဖှိၣ်သးပှၢ်အဂ့ၢ်န့ၣ် ဖဲအဝဲသ့ၣ်လိၣ်ဘၣ် တၢ်မၤစၢၤ တဘျီဂ့ၤ တဘျီဂ့ၤအခါ အဝဲသ့ၣ် ဃ့တၢ်မၤစၢၤကဘူၣ်.

ယဟိဝၤယွၤန့ၣ် အတကဲပှၤလၢ အခိၣ်ကိၤဘၣ်

၆-၇. ယဟိဝၤယွၤ တကဲပှၤလၢ အခိၣ်ကိၤဘၣ် ဒီးသးအိၣ် ဆီတလဲ အတၢ်ထံၣ်န့ၣ် ပသ့ၣ်ညါဘၣ်ဒ်လဲၣ်. တဲဖျါထီၣ် တၢ်အဒိ.

^၆ ပှၤလၢအပာ်ထီၣ်ထီသးန့ၣ် ညီနုၢ် အဆိကမိၣ်လီၤသးလၢ အသ့ၣ်ညါတၢ်ခဲလၢာ် ဒီးတအဲၣ်ဒိး ဆီတလဲ အတၢ်ထံၣ်ဘၣ်. မ့မ့ၢ် ယဟိဝၤယွၤန့ၣ် အကဲပှၤလၢ အသ့ၣ်ညါတၢ်ခဲလၢာ် သနာ်က့ အအိၣ်ဒီး တၢ်ဆီၣ်လီၤသး. အဃိ အသးအိၣ် ဒိကနၣ်န့ၢ်ပှၤဂၤ ဒီးသးအိၣ်ဆီတလဲ အတၢ်ထံၣ် ဒ်အခ့အပှၤ ဃ့အီၤအသိး. အဒိ ဆိကမိၣ်ကွၢ် ဘၣ်ဃးဒီး စီၤမိၤၡ့အနီ နီၢ်မံးရယၣ် အတၢ်လဲၤခီဖျိ. နီၢ်မံးရယၣ် ဒီးစီၤအၤဟရိၣ်န့ၣ် အဝဲသ့ၣ် ကဒူးကဒ့ၣ်ဝဲ စီၤမိၤၡ့ လၢအကဲ ယဟိဝၤယွၤ အပှၤခၢၣ်စး. အဃိ လီၤဂာ်ဒ်သိး နီၢ်မံးရယၣ် တပာ်ကဲ ယဟိဝၤယွၤဘၣ်. ယဟိဝၤယွၤ သးပှံၢ်ထီၣ် နီၢ်မံးရယၣ် ဒီးဒုးလီၤဘၣ်အီၤလၢ တၢ်ဆါအၢ. ဘၣ်ဆၣ် ဖဲစီၤအၤဟရိၣ် ဒီးစီၤမိၤၡ့ ဃ့ကညးန့ၢ်တၢ်လၢ အဒီပုၢ်ဝဲၢ်မုၣ် အဂီၢ်အခါ ယဟိဝၤယွၤ မၤဝဲဒ်လဲၣ်. ယဟိဝၤယွၤန့ၣ် အတကဲပှၤလၢ အခိၣ်ကိၤဘၣ်အဃိ အဆီတလဲ အတၢ်ထံၣ်. ဒီးခီဖျိလၢ အအိၣ်ဒီး တၢ်ဆီၣ်လီၤသးအဃိ အဒိကနၣ်န့ၢ် စီၤမိၤၡ့ အတၢ်ဃ့ကညး ဒီးမၤဘျါက့ၤ နီၢ်မံးရယၣ်.—၄ မိၤ ၁၂:၁-၁၅.

^၇ ဖဲပဆိကမိၣ် ဘၣ်ဃးဒီး ယဟိဝၤယွၤဒိကနၣ် စီၤပၤဃံးစကံယၤ အတၢ်ထုကဖၣ် အဂ့ၢ်အခါ ပသ့ၣ်ညါဘၣ်လၢ ယဟိဝၤယွၤန့ၣ် အိၣ်ဒီး တၢ်ဆီၣ်လီၤသး. ယဟိဝၤယွၤ မၢဝံယၡါယၤ တဲဘၣ် စီၤပၤလၢ နကသံလီၤ. စီၤဃံးစကံယၤ ဟီၣ်ဝဲနးမး ဒီးဃ့ကညး ယဟိဝၤယွၤလၢ ကမၤဘျါက့ၤအီၤ. ယဟိဝၤယွၤ ဒိကနၣ် စီၤဃံးစကံယၤ အတၢ်ထုကဖၣ် ဒီးတဲဘၣ်အီၤလၢ အကအိၣ်မူဘၣ်ဒံး ၁၅ နံၣ်ညါ. (၂ စီၤပၤ ၂၀:၁, ၅, ၆) ခီဖျိလၢ ယဟိဝၤယွၤ အိၣ်ဒီးတၢ်ဆီၣ်လီၤသးအဃိ အပာ်ဖျါထီၣ် တၢ်ဒိသူၣ်ဒိသး ဒီးသးအိၣ်ဆီတလဲ အတၢ်ထံၣ် ဒ်အခ့အပှၤ ဃ့အီၤအသိး.

၈. ယ့ၣ်ၡူး တကဲပှၤလၢ အခိၣ်ကိၤဘၣ်န့ၣ် ပသ့ၣ်ညါဘၣ်ဒ်လဲၣ်. (မၢ်ကူး ၃:၁-၆)

^၈ ယ့ၣ်ၡူး ကွၢ်လိအပါ. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အဂုာ်ကျဲးစၢး မၤတၢ်ဂ့ၤ ဒီးမၤစၢၤပှၤအါဂၤ. အဒိ ဖဲမုၢ်အိၣ်ဘှံးနံၤန့ၣ် တၢ်ဘူၣ်တၢ်ဘါ ခိၣ်နၢ်တဖၣ် ထံၣ်ဝဲလၢ ပှၤတကြၢးမၤ တၢ်နီတမံၤဘၣ် သနာ်က့ ယ့ၣ်ၡူး မၤဘျါက့ၤပှၤဆါ. ယ့ၣ်ၡူးန့ၣ် အသးဂ့ၤ, အသးကညီၤပှၤဂၤ ဒီးအတကဲပှၤလၢ အခိၣ်ကိၤဘၣ်. (ဖး မၢ်ကူး ၃:၁-၆.) ဆၢကတီၢ်ခဲအံၤ ဖဲယ့ၣ်ၡူး ဟံးစုနဲၣ်ကျဲ တၢ်အိၣ်ဖှိၣ်အခါ အအိၣ်ဒီး တၢ်သးကညီၤ ဒီးအတကဲပှၤလၢ အခိၣ်ကိၤဘၣ်. အဒိ လၢတၢ်အိၣ်ဖှိၣ်အပူၤ ဖဲပှၤတဂၤဂၤမၤဘၣ် တၢ်ကမၣ်ဖးဒိၣ်အခါ ယ့ၣ်ၡူး ဝံသးစူၤအီၤ ဒီးဟ့ၣ်အီၤ တၢ်ခွဲးတၢ်ယာ်လၢ ကဆီတလဲအသး.—လီၣ် ၂:၂-၅.

၉. ပတကဲပှၤလၢ အခိၣ်ကိၤဘၣ်န့ၣ် ပပာ်ဖျါထီၣ် ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၉ ပကွၢ်လိ ယဟိဝၤယွၤ သ့ဒ်လဲၣ်. တၢ်လၢယဟိဝၤယွၤ ဆိကမိၣ်ဝဲ ဒီးမၤဝဲန့ၣ် ပာ်ဖျါထီၣ်လၢ အတကဲပှၤလၢ အခိၣ်ကိၤဘၣ်. အဃိ ပဝဲစ့ၢ်ကီး ပကြၢးဂုာ်ကျဲးစၢး ကွၢ်လိအီၤ. (ယၤ ၃:၁၇) အဒိ မိပါလၢ အကွၢ်လိ ယဟိဝၤယွၤ ဒီးအအိၣ်ဒီး တၢ်ဆီၣ်လီၤသးန့ၣ် အတထိၣ်သတြီၤအဖိ တဂၤဒီးတဂၤဘၣ်. အသ့ၣ်ညါဝဲ တၢ်လၢအဖိမၤဝဲန့ၢ် ဒီးတၢ်လၢအဖိ မၤဝဲတန့ၢ်ဘၣ်န့ၣ် အတမၢအဖိမၤဝဲဘၣ်. ဖဲ ၁ မိၤၡ့ ၃၃:၁၂-၁၄ န့ၣ် ပထံၣ်ဘၣ် စီၤယၤကိာ် အဒိအတဲာ် ဘၣ်ဃးဒီး အပာ်ဖျါထီၣ်လၢ အဆိကမိၣ်န့ၢ်တၢ်လၢ အဖိတဖၣ်အဂီၢ်. တၢ်အိၣ်ဖှိၣ်သးပှၢ်စ့ၢ်ကီး ကဘၣ်ပာ်ဖျါထီၣ်လၢ အတကဲပှၤလၢ အခိၣ်ကိၤဘၣ်. အဒိ အတမၢဆူၣ် တၢ်အိၣ်ဖှိၣ်သးပှၢ် အဂၤတဖၣ်လၢ ကမၤထွဲဒ် အတၢ်ထံၣ်အသိးဘၣ်. ဒီးတၢ်အိၣ်ဖှိၣ်သးပှၢ် အဂၤတဖၣ် အတၢ်ဆၢတဲာ် မ့ၢ်တထီဒါဒီး လံာ်စီဆှံဘၣ်န့ၣ် အကဆီၣ်ထွဲဝဲ. (၁ တံၤ ၃:၂, ၃) တကးဒံးဘၣ် ပဝဲကိးဂၤဒဲးန့ၣ် ပတၢ်ထံၣ် ကလီၤဆီလိာ်သး ဘၣ်ဆၣ် ပကြၢးဂုာ်ကျဲးစၢး နၢ်ပၢၢ်စၢၤလိာ်သး. (ရိ ၁၄:၁) အဃိ ပ “တမ့ၢ် ပှၤလၢအခိၣ်ကိၤဘၣ်န့ၣ် မ်အအိၣ်ဖျါထီၣ်လၢ ပှၤခဲလၢာ် အမဲာ်ညါတက့ၢ်.”—ဖံလံး ၄:၅.

ယဟိဝၤယွၤန့ၣ် အအိၣ်ဒီး တၢ်ဝံသးစူၤ

၁၀. ယဟိဝၤယွၤ ပာ်ဖျါထီၣ် တၢ်ဝံသးစူၤဒ်လဲၣ်.

^၁၀ ဘၣ်သ့ၣ်သ့ၣ် နကထံၣ်ဘၣ်လၢ ပှၤလၢ အပာ်ထီၣ်ထီသးန့ၣ် အတၢ်ဝံသးစူၤ တအိၣ်နီတစဲးဘၣ် ဒီးအတအဲၣ်ဒိး အိၣ်ခိးတၢ်ဘၣ်. မ့မ့ၢ် ယဟိဝၤယွၤန့ၣ် အအိၣ်ဒီး တၢ်ဝံသးစူၤ ဒီးပှၤလၢ အဝံသးစူၤတၢ် ဒ်သိးဒီးအီၤန့ၣ် တအိၣ်နီတဂၤဘၣ်. အဒိ ဖဲစီၤနိအၤအစိၤန့ၣ် ယဟိဝၤယွၤ တဲဝဲလၢ တချုးလၢ အမၤဟးဂီၤ ပှၤအၢပှၤသီဒံးဘၣ်န့ၣ် အကအိၣ်ခိးဝဲ အနံၣ် ၁၂၀. (၁ မိၤ ၆:၃) အဃိ စီၤနိအၤ အိၣ်ဒီးတၢ်ဆၢကတီၢ်လၢ ကကွၢ်လုၢ်ဒိၣ်ထီၣ်အဖိ, ကတ့ထီၣ်ကဘီ ဒီးကမၤစၢၤ အဟံၣ်ဖိဃီဖိ. လၢခံ ဖဲစီၤအၤဘြၤဟၣ် သံကွၢ်ယဟိဝၤယွၤ ဘၣ်ဃးဒီး အကမၤဟးဂီၤ ဝ့ၢ်စဒိၣ် ဒီးဂမိရၤအခါ ယဟိဝၤယွၤ ပာ်ဖျါထီၣ် တၢ်ဝံသးစူၤ ဒီးဒိကနၣ်န့ၢ်အီၤ. ယဟိဝၤယွၤ မ့ၢ်ကဲပှၤလၢ အပာ်ထီၣ်ထီသးန့ၣ် ဘၣ်သ့ၣ်သ့ၣ် အကတဲက့ၤ စီၤအၤဘြၤဟၣ်လၢ ‘ယကဘၣ်မၤဒ်လဲၣ်န့ၣ် နဆိကမိၣ် ယတသ့ၣ်ညါဘၣ်ဧါ.’ ဘၣ်ဆၣ် ယဟိဝၤယွၤန့ၣ် အအိၣ်ဒီး တၢ်ဆီၣ်လီၤသးအဃိ အပာ်ဖျါထီၣ် တၢ်ဝံသးစူၤလၢ စီၤအၤဘြၤဟၣ် အဖီခိၣ်.—၁ မိၤ ၁၈:၂၀-၃၃.

၁၁. ဒ် ၂ ပ့းတရူး ၃:၉ ပာ်ဖျါဝဲအသိး ဆၢကတီၢ်ခဲအံၤ ဘၣ်မနုၤအဃိ ယဟိဝၤယွၤ ပာ်ဖျါထီၣ် တၢ်ဝံသးစူၤလဲၣ်.

^၁၁ ဆၢကတီၢ်ခဲအံၤ ခီဖျိလၢ ယဟိဝၤယွၤ အိၣ်ဒီး တၢ်ဆီၣ်လီၤသးအဃိ အဆဲးပာ်ဖျါထီၣ် တၢ်ဝံသးစူၤဒံး. အပာ်ပနီၣ် တၢ်ဆၢကတီၢ်လၢ တၢ်အကတၢၢ်အဂီၢ်လံ. ဘၣ်ဆၣ် ဘၣ်မနုၤအဃိ အအိၣ်ခိးဝဲဒံးလဲၣ်. လံာ်စီဆှံ တဲဝဲလၢ “အဝံသးစူၤသု မ့ၢ်လၢ အတအဲၣ်ဒိးလၢ ပှၤကတုၤလၢတၢ်ဟးဂီၤ နီတဂၤဘၣ်. ဒီးအအဲၣ်ဒိးဝဲလၢ ပှၤခဲလၢာ် ကပီၢ်ယၢ်လီၤက့ၤအသးလီၤ.” (ဖး ၂ ပ့းတရူး ၃:၉.) ယဟိဝၤယွၤ အတၢ်ဝံသးစူၤန့ၣ် တကဲထီၣ် တၢ်ကလီကလီဘၣ်. ပှၤသးဘျၢလၢ အကကွဲၢ်တဖၣ် ကဲထီၣ်အသကိး ဒီးပမုၢ်လၢ်လၢ ပှၤအကကွဲၢ်တဖၣ် ကကဲထီၣ်ဘၣ် အသကိးဒံး. ဘၣ်ဆၣ် ယဟိဝၤယွၤ တဝံသးစူၤတၢ် လီၤထူလီၤယိာ်ဘၣ်. ယဟိဝၤယွၤန့ၣ် အအဲၣ်ပှၤဟီၣ်ခိၣ်ဖိ ဘၣ်ဆၣ် အတပျဲလၢ ပှၤဟီၣ်ခိၣ်ဖိ ကဆဲးမၤဖဲအသး ထီဘိဘၣ်. ဒီးအကမၤဟးဂီၤကွံာ် ပှၤအၢပှၤသီခဲလၢာ်.—ဃဘး ၂:၃.

၁၂. ယ့ၣ်ၡူး ကွၢ်လိ ယဟိဝၤယွၤ အတၢ်ဝံသးစူၤဒ်လဲၣ်.

^၁၂ ယ့ၣ်ၡူး ကွၢ်လိအပါ. ယ့ၣ်ၡူး ကွၢ်လိ ယဟိဝၤယွၤ အတၢ်ဝံသးစူၤန့ၣ် အိၣ်ဝဲအနံၣ်လၢ အကထိတဖၣ်လံ. အဒိ ယ့ၣ်ၡူး ထံၣ်ဘၣ် မုၣ်ကီၢ်လံၢ် တဲလံၣ်တဲလီတၢ် ဘၣ်ဃးဒီး ယဟိဝၤယွၤ ဒီးပှၤဟီၣ်ခိၣ်ဖိ လၢအသးတီတဖၣ်အဂ့ၢ်. (၁ မိၤ ၃:၄, ၅; ဘး ၁:၁၁; လီၣ် ၁၂:၁၀) ယ့ၣ်ၡူး ထံၣ်ဘၣ်စ့ၢ်ကီးလၢ ပှၤအါဂၤ ဘၣ်တူၢ်တၢ်နးမး. အဃိ ယ့ၣ်ၡူးအဲၣ်ဒိး “မၤဟးဂီၤကွံာ်ဝဲ မုၣ်ကီၤလံၢ် အတၢ်မၤတဖၣ်” ထဲလဲၣ်န့ၣ် ပထံၣ်တမှံကွၢ်သ့. (၁ ယိၤ ၃:၈) ဘၣ်ဆၣ် ယ့ၣ်ၡူး အိၣ်ခိးဝဲလၢ တၢ်ဝံသးစူၤတုၤလၢ ယဟိဝၤယွၤ တဲအီၤတၢ်ဆၢကတီၢ်လၢ အကမၤဟးဂီၤကွံာ် မုၣ်ကီၤလံၢ် အတၢ်မၤတဖၣ်. ဘၣ်မနုၤအဃိ ယ့ၣ်ၡူး အိၣ်ခိးဝဲလဲၣ်. တၢ်ဂ့ၢ်တမံၤန့ၣ် မ့ၢ်ဝဲခီဖျိလၢ ယ့ၣ်ၡူးအိၣ်ဒီး တၢ်ဆီၣ်လီၤသးအဃိ. ဒီးအသ့ၣ်ညါဝဲလၢ ပှၤလၢ အအိၣ်ဒီး တၢ်ခွဲးတၢ်ယာ်လၢ ကဆၢတဲာ်ဝဲလၢ တၢ်အကတၢၢ် ကတုၤလၢ အခါဖဲလဲၣ်န့ၣ် မ့ၢ်ဝဲထဲ ယဟိဝၤယွၤ တဂၤလီၤ.—မၤတၢ် ၁:၇.

၁၃. ယ့ၣ်ၡူး ပာ်ဖျါထီၣ် တၢ်ဝံသးစူၤလၢ အတၢ်မၢဖိတဖၣ် အဖီခိၣ်ဒ်လဲၣ် ဒီးဘၣ်မနုၤအဃိလဲၣ်.

^၁၃ ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အပာ်ဖျါထီၣ် တၢ်ဝံသးစူၤလၢ အတၢ်မၢဖိတဖၣ် အဖီခိၣ်စ့ၢ်ကီး. အဒိ ဖဲအဝဲသ့ၣ် တဲအါလိာ်သး ခဲအံၤခဲအံၤ ဘၣ်ဃးဒီး မတဂၤ ကဲပှၤအဒိၣ်ကတၢၢ်လဲၣ်အခါ ယ့ၣ်ၡူးသးတလၢာ် အဝဲသ့ၣ်ဘၣ်. ယ့ၣ်ၡူး ဆဲးပာ်ဖျါထီၣ် တၢ်ဝံသးစူၤ လၢအဝဲသ့ၣ်အဖီခိၣ်. (လူၤ ၉:၄၆; ၂၂:၂၄-၂၇) ဒီးအနာ်ဝဲလၢ အတၢ်မၢဖိတဖၣ် ကဆီတလဲအသး ဒီးမၤအါထီၣ် တၢ်ဆီၣ်လီၤသး. နၤမီၤ မ့ၢ်နမၤဘၣ် တၢ်ကမၣ် တခါလီၢ်လီၢ် ခဲအံၤခဲအံၤဧါ. နမ့ၢ်မၤဘၣ်န့ၣ် နသ့ၣ်ညါလၢ နအိၣ်ဒီး စီၤပၤလၢ အဆီၣ်လီၤသး ဒီးဝံသးစူၤတၢ်အဃိ နကသးခုဒိၣ်မး.

၁၄. ဒ်သိး ပတၢ်ဝံသးစူၤ ကအါထီၣ်အဂီၢ် ပကဘၣ်မၤ မနုၤလဲၣ်.

^၁၄ ပကွၢ်လိ ယဟိဝၤယွၤ သ့ဒ်လဲၣ်. ဒ်သိး ပတၢ်ဆိကမိၣ် ဒီးပတၢ်မၤ ကလီၤဂာ်ဒီး ယဟိဝၤယွၤအဂီၢ် ပကဘၣ် မၤလိထီၣ်ပသးလၢ ပကဆိကမိၣ်တၢ် ဒ်သိးဒီးယ့ၣ်ၡူး. (၁ ကရံၣ် ၂:၁၆) အဃိ ဒ်သိး ပကဆိကမိၣ်တၢ် ဒ်သိးဒီး ယ့ၣ်ၡူးအဂီၢ် ပကဘၣ်မၤဒ်လဲၣ်. ပကဘၣ် ဂုာ်ကျဲးစၢးဖး လံာ်တၢ်သးခုကစီၣ် လၢအဘၣ်ဃးဒီး ယ့ၣ်ၡူးအဂ့ၢ် ထီဘိ. ဒီးဖဲပဖးအခါ ပကဘၣ် ဟံးန့ၢ်တၢ်ဆၢကတီၢ်လၢ ပကဆိကမိၣ်ထံ တၢ်လၢယ့ၣ်ၡူးမၤဝဲ ဒီးဘၣ်မနုၤအဃိ အမၤဝဲလဲၣ်. တကးဒံးဘၣ် ပကဘၣ် ဃ့ယဟိဝၤယွၤလၢ ကမၤစၢၤပှၤဒ်သိး ပကပာ်ဖျါထီၣ် တၢ်ဆီၣ်လီၤသး ဒီးတၢ်ဝံသးစူၤ ဒ်ယ့ၣ်ၡူးအသိး. ပမ့ၢ်ဂုာ်ကျဲးစၢး ဆိကမိၣ်တၢ် ဒ်သိးဒီး ယ့ၣ်ၡူးန့ၣ် ပကွၢ်လိယဟိဝၤယွၤ ကသ့ဒိၣ်ထီၣ် ဒီးပပာ်ဖျါထီၣ် တၢ်ဝံသးစူၤ လၢပှၤဂၤ ဒီးပနီၢ်ကစၢ်အဖီခိၣ် ကသ့အါထီၣ်.—မး ၁၈:၂၆-၃၀, ၃၅.

ယဟိဝၤယွၤ ပာ်လုၢ်ပာ်ပှ့ၤ ပှၤလၢအဆီၣ်လီၤသး

၁၅. ယဟိဝၤယွၤ ပာ်လုၢ်ပာ်ပှ့ၤ ပှၤလၢအဆီၣ်လီၤသးန့ၣ် ပသ့ၣ်ညါဘၣ်ဒ်လဲၣ်. တဲဖျါထီၣ် တၢ်အဒိ. (စံးထီၣ်ပတြၢၤ ၁၃၈:၆)

^၁၅ ဖး စံးထီၣ်ပတြၢၤ ၁၃၈:၆. ဆိကမိၣ်ကွၢ် တၢ်ဂ့ၢ်အံၤ. ယဟိဝၤယွၤန့ၣ် အကဲပှၤလၢ အထီကတၢၢ် လၢမူခိၣ်ဟီၣ်ခိၣ် သနာ်က့ အပာ်လုၢ်ပာ်ပှ့ၤ ပှၤလၢအဆီၣ်လီၤသး ဒိၣ်မး. လၢလံာ်စီဆှံပူၤန့ၣ် ပဖးဘၣ် ဘၣ်ဃးဒီး ပှၤလၢပှၤထံၣ်ဆံးအီၤအဂ့ၢ် တဘျုးဂၤညါ. ပှၤတဖၣ်အံၤ ဘၣ်သ့ၣ်သ့ၣ် ပတသ့ၣ်ညါအဂ့ၢ် အါအါဘၣ်. ဘၣ်ဆၣ် ယဟိဝၤယွၤ ပာ်လုၢ်ပာ်ပှ့ၤ အဝဲသ့ၣ်ဒိၣ်မး. အဒိ နီၢ်ဒဘိရၤန့ၣ် အကဲဝဲကုၢ်မုၣ် လၢအသးတီ ဒီးအမၤစၢၤဘၣ်ဝဲ စီၤအံၤစဲး ဒီးစီၤယၤကိာ် အဟံၣ်ဖိဃီဖိ ယံာ်ဝဲ ၁၂၅ နံၣ်ဃၣ်ဃၣ်ညါ. ပိာ်မုၣ်လၢ အသးတီတဂၤအံၤ ပတသ့ၣ်ညါအဂ့ၢ် အါအါဘၣ် သနာ်က့ ယဟိဝၤယွၤမၢ စီၤမိၤၡ့ ကွဲးလီၤအဂ့ၢ် ဒ်သိးကပာ်ဖျါထီၣ်လၢ ယဟိဝၤယွၤ ပာ်လုၢ်ပာ်ပှ့ၤအီၤဒိၣ်မး. (၁ မိၤ ၂၄:၅၉; ၃၅:၈) လၢခံတဘျုးနံၣ်န့ၣ် ယဟိဝၤယွၤ ဃုထၢထီၣ် ပှၤကွၢ်သိဖိ လၢအမ့ၢ် စီၤဒၤဝံး ဒ်သိးကကဲထီၣ် အံၣ်စရ့လးအစီၤပၤ. (၂ မူၤ ၂၂:၁, ၃၆) ဒီးဖဲယ့ၣ်ၡူး အိၣ်ဖျဲၣ်ထီၣ်သီသီ ဝံၤအလီၢ်ခံ ယဟိဝၤယွၤ အမူခိၣ်ကလူး တဲဘၣ် ပှၤကွၢ်သိတဖၣ်လၢ မ့းၡံအၤ အိၣ်ဖျဲၣ်ထီၣ်လၢ ဝ့ၢ်ဘ့ၤသလ့ဃ့ၣ် အပူၤလံ. ပှၤကွၢ်သိတဖၣ်အံၤ အသ့ၣ်ညါဘၣ် တၢ်ကစီၣ် အဆိကတၢၢ်အဃိ ပထံၣ်ဘၣ်လၢ ယဟိဝၤယွၤ ပာ်လုၢ်ပာ်ပှ့ၤ အဝဲသ့ၣ်ဒိၣ်မး. (လူၤ ၂:၈-၁၁) တကးဒံးဘၣ် ဖဲစီၤယိၤသး ဒီးနီၢ်မၤရံ လဲၤစိာ်ယ့ၣ်ၡူး လၢတၢ်လုၢ်ဟံၣ်အခါ ယဟိဝၤယွၤ ဒုးထံၣ်ဝဲ စီၤစူၤမ့းအိၣ် ဒီးနီၢ်အၣ်နၤ လၢအဖိခွါယ့ၣ်ၡူး. (လူၤ ၂:၂၅-၃၀, ၃၆-၃၈) ပသ့ၣ်ညါဘၣ်လၢ “ယဟိဝၤယွၤ အိၣ်လၢ တၢ်လီၢ်ထီၣ်ထီသနာ်က့ အသးအိၣ် ပှၤလၢအဆီၣ်လီၤအသး” ဒိၣ်မး.

၁၆. ဖဲယ့ၣ်ၡူးရ့ဒီးပှၤဂၤအခါ အကွၢ်လိအပါဒ်လဲၣ်.

^၁၆ ယ့ၣ်ၡူး ကွၢ်လိအပါ. ဒ်ယဟိဝၤယွၤအသိး ယ့ၣ်ၡူးစ့ၢ်ကီး အပာ်လုၢ်ပာ်ပှ့ၤ ပှၤလၢ ပှၤထံၣ်ဆံးအီၤတဖၣ် ဒိၣ်မး. ပှၤလၢတမ့ၢ် ပှၤကူၣ်ဘၣ်ကူၣ်သ့ဘၣ် ဒီးပှၤမုၢ်ဆ့ၣ်မုၢ်ဂီၤဖိန့ၣ် ယ့ၣ်ၡူးသိၣ်လိ အဝဲသ့ၣ်လၢ ကစၢ်ယွၤဘီမုၢ်အဂ့ၢ်. (မၤတၢ် ၄:၁၃; မး ၁၁:၂၅) ဒီးဖဲအမၤဘျါက့ၤ ပှၤဆါအခါ အပာ်ဖျါထီၣ် တၢ်အဲၣ်ဒီးတၢ်ပာ်ကဲ လၢအဝဲသ့ၣ်အဖီခိၣ်. (လူၤ ၅:၁၃) တချုးဖဲ အကသံအနၤန့ၣ် အသ့န့ၢ် အတၢ်မၢဖိတဖၣ်အခီၣ် ဒီးတၢ်မၤအံၤန့ၣ် ညီနုၢ် အကဲဝဲကုၢ် အတၢ်မၤ. (ယိၤ ၁၃:၅) တကးဒံးဘၣ် တချုးအက့ၤထီၣ်လၢ မူခိၣ်ဒံးဘၣ်န့ၣ် အဟ့ၣ်ဝဲ အပျဲၢ်အဘီၣ် ဃုာ်ဒီးပဝဲခဲလၢာ် မူဒါအရ့ဒိၣ် ကတၢၢ်တခါ လၢပကမၤစၢၤပှၤဂၤ ဒ်သိးအဝဲသ့ၣ် ကဒိးန့ၢ်ဘၣ် တၢ်မူထူယိာ်.—မး ၂၈:၁၉, ၂၀.

၁၇. ပပာ်ဖျါထီၣ် တၢ်အဲၣ်ဒီးပာ်ကဲပှၤဂၤ ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)

^၁၇ ပကွၢ်လိ ယဟိဝၤယွၤ သ့ဒ်လဲၣ်. ဖဲပလဲၤ စံၣ်တဲၤတဲလီၤတၢ်အခါ ပကထံၣ်ဘၣ်ပှၤလၢ အတၢ်အိၣ်သး, အကလုာ်ဒူၣ် ဒီးအတၢ်ကူၣ်ဘၣ်ကူၣ်သ့ အပတီၢ်လီၤဆီဒီးပှၤ. ဘၣ်ဆၣ် ပကွၢ်လိ ယဟိဝၤယွၤ ဒီးပာ်ဖျါထီၣ် တၢ်အဲၣ်ဒီးတၢ်ပာ်ကဲ သ့ခီဖျိ ပတဲဘၣ်အဝဲသ့ၣ်လၢ တၢ်သးခုကစီၣ်. တကးဒံးဘၣ် ပတၢ်သ့တၢ်ဘၣ် ဒီးပမူဒါ မ့ၢ်အိၣ်ဒ်လဲၣ် သနာ်က့ ပပာ်ဖျါထီၣ် တၢ်အဲၣ်ဒီးတၢ်ပာ်ကဲ လၢပဒီပုၢ်ဝဲၢ်မုၣ်ခွါ အဖီခိၣ် သ့ခီဖျိ ပထံၣ်လၢ အဝဲသ့ၣ် ဂ့ၤဒိၣ်န့ၢ်ဒံးပှၤ. (ဖံလံး ၂:၃) ပမ့ၢ်အိၣ်ဒီး တၢ်ဆီၣ်လီၤသး ဒီး “ပာ်ဖျါထီၣ်ဆိ” တၢ်ပာ်ကဲ လၢပှၤဂၤအဖီခိၣ် လၢကျဲဒ်အံၤ ဒီးလၢကျဲအဂၤန့ၣ် ယဟိဝၤယွၤ ဘၣ်သူၣ်ဘၣ်သးဝဲ ဒိၣ်မး.—ရိ ၁၂:၁၀; ဖါ ၃:၁၂.

၁၈. ဘၣ်မနုၤအဃိ နအဲၣ်ဒိးကွၢ်လိ ယဟိဝၤယွၤ အတၢ်ဆီၣ်လီၤသးလဲၣ်.

^၁၈ ပမ့ၢ်ဂုာ်ကျဲးစၢး ကွၢ်လိယဟိဝၤယွၤ အတၢ်ဆီၣ်လီၤသးန့ၣ် ပှၤဟဲရ့ပှၤ ဒီးတဲတၢ်ဒီးပှၤကဘူၣ်, ပတကဲ ပှၤလၢအခိၣ်ကိၤဘၣ် ဒီးပတၢ်ဝံသးစူၤ ကအါထီၣ်. တကးဒံးဘၣ် ပကပာ်ဖျါထီၣ် တၢ်အဲၣ်ဒီးတၢ်ပာ်ကဲ လၢပှၤဂၤအဖီခိၣ် ဒ်ယဟိဝၤယွၤအသိး. ပမ့ၢ်ဂုာ်ကျဲးစၢး ကွၢ်လိယဟိဝၤယွၤ ဒီးမၤအါထီၣ် တၢ်ဆီၣ်လီၤသးန့ၣ် ပကကဲထီၣ် ပှၤလုၢ်ဒိၣ်ပှ့ၤဒိၣ် လၢယဟိဝၤယွၤအဂီၢ်.—ၡါ ၄၃:၄.