ဘၣ်ဃးဒီးတၢ်ဟ့ၣ်ကၣ်က့ၤတၢ်န့ၣ် လံာ်စီဆှံတဲဝဲဒ်လဲၣ်.
လံာ်စီဆှံတဲဝဲဒ်အံၤ
ပမ့ၢ်ဆိမိၣ်လၢ ပဟ့ၣ်ကၣ်က့ၤတၢ်န့ၣ် ကြၢးဝဲဘၣ်ဝဲသနာ်က့ ပမ့ၢ်ဟ့ၣ်ကၣ်က့ၤတၢ်န့ၣ် အကထီဒါလိာ်သးဒီး လံာ်စီဆှံလီၤ. လံာ်စီဆှံတဲဝဲလၢ “တဘၣ်တဲလၢ ‘ယကမၤအီၤဒ် အမၤယၤအသိး, ယကမၤကၣ်က့ၤအီၤ ဒ်အမၤယၤ အသိး’ န့ၣ်တဂ့ၤ.” (ကတိၤဒိ ၂၄:၂၉) လံာ်စီဆှံန့ၣ် အိၣ်ဒီးတၢ်ဟ့ၣ်ကူၣ်အါမးလၢ ကမၤစၢၤပှၤ ဒ်သိးပတဟ့ၣ်ကၣ်က့ၤတၢ်တဂ့ၤအဂီၢ်လီၤ.
ပကတဲသကိး
ပမ့ၢ်ပဟ့ၣ်ကၣ်က့ၤတၢ်န့ၣ် ဘၣ်မနုၤအဃိ မ့ၢ်တၢ်လၢအကမၣ်လဲၣ်.
ပှၤတဂၤဂၤမ့ၢ်မၤဆါ မ့တမ့ၢ် တဲဆါဘၣ်ပှၤန့ၣ် ညီနုၢ်ပကသးထီၣ်တၢ် ဒီးပအဲၣ်ဒိးမၤဆၢက့ၤအီၤလီၤ. ဘၣ်ဆၣ်လံာ်စီဆှံ တဆီၣ်ထွဲပှၤလၢ ပကဟ့ၣ်ကၣ်က့ၤတၢ်ဘၣ်. ဘၣ်မနုၤအဃိလဲၣ်.
ကစၢ်ယွၤသးဟ့ပှၤလၢ အဟ့ၣ်ကၣ်က့ၤတၢ်တဖၣ်. လၢလံာ်စီဆှံပူၤန့ၣ် ယဟိဝၤယွၤa တဲဝဲလၢ “တၢ်ဟ့ၣ်ကၣ်န့ၣ် မ့ၢ်ယတၢ်လီၤ. ယကဟ့ၣ်ကၣ်တၢ်လီၤ.” (ရိမ့ၤ ၁၂:၁၉) ပှၤလၢအတူၢ်ဘၣ် တၢ်တတီတလိၤန့ၣ် လံာ်စီဆှံဟ့ၣ်ကူၣ် အဝဲသ့ၣ်လၢ တဘၣ်ဟ့ၣ်ကၣ်က့ၤတၢ်လၢ အနီၢ်ကစၢ်ဘၣ်. အကဘၣ်ဂုာ်ကျဲးစၢး မၤဃူမၤဖိးက့ၤတၢ်လၢ တၢ်အဲၣ်တၢ်ကွံအပူၤ. (ရိမ့ၤ ၁၂:၁၈) နကမၤဘၣ်ထီၣ်က့ၤတၢ်အိၣ်သးအဂီၢ် နဃုကျဲမ့ၢ်တဘၣ်ဘၣ်ခီမီၤ. မ့တမ့ၢ် နဂုာ်ကျဲးစၢးမၤဃူမၤဖိးတၢ်လံ သနာ်က့ တၢ်ဃူတၢ်ဖိး မ့ၢ်တအိၣ်ဒံးဘၣ်ခီမီၤ. နကမၤဒ်လဲၣ်. လံာ်စီဆှံ ဟ့ၣ်ကူၣ်ပှၤလၢ ပကအိၣ်ခိး ယဟိဝၤယွၤလၢ တၢ်ဝံသးစူၤအပူၤ လၢအကစံၣ်ညီၣ် န့ၢ်ပှၤတၢ်တီတီလိၤလိၤအဂီၢ်.—စံးထီၣ်ပတြၢၤ ၄၂:၁၀, ၁၁.
မ့ၢ်ကစၢ်ယွၤ စံၣ်ညီၣ်ပှၤဟီၣ်ခိၣ်ဖိဧါ.
ခဲအံၤန့ၣ် ပှၤဟီၣ်ခိၣ်ဖိလၢ အမၤကမၣ်တၢ်သ့ၣ်တဖၣ် ကစၢ်ယွၤပျဲဝဲလၢ ပဒိၣ်ပပှၢ်သ့ၣ်တဖၣ် ကစံၣ်ညီၣ်အဝဲသ့ၣ်. (ရိမ့ၤ ၁၃:၁-၄) တယံာ်လၢၤဘၣ်န့ၣ် ကစၢ်ယွၤကစံၣ်ညီၣ်ဝဲ ပှၤအၢပှၤသီသ့ၣ်တဖၣ် ဒီးအကမၤလီၤမၢ်ကွံာ်ဝဲ တၢ်နးတၢ်ဖှီၣ်သ့ၣ်တဖၣ် လီၤထူလီၤယိာ်လီၤ.—ယၡါယၤ ၁၁:၄.
ပမၤလီၤမၢ်ကွံာ် ပသးလၢအဲၣ်ဒိးဟ့ၣ်ကၣ်က့ၤတၢ် ကသ့ဒ်လဲၣ်.
တဘၣ်မၤကြီတၢ် ဖဲနသးဒိၣ်ထီၣ်တၢ်အခါတဂ့ၤ. (ကတိၤဒိ ၁၇:၂၇) ပှၤလၢအမၤတၢ်လၢ တၢ်သူၣ်ဒိၣ်သးဖျိးအပူၤန့ၣ် လၢခံအဝဲသ့ၣ် ထံၣ်ဘၣ်က့ၤဒီး တၢ်ကီတၢ်ခဲအါမး. ဘၣ်ဆၣ်ပှၤလၢ အဆိကမိၣ်ထံတၢ် တချုးလၢအဆၢတဲာ်တၢ်ဒံးအခါန့ၣ် မ့ၢ်ပှၤလၢအိၣ်ဒီးတၢ်ကူၣ်သ့.—ကတိၤဒိ ၂၉:၁၁.
ဃုသ့ၣ်ညါတၢ်ဂ့ၢ်လီၤတံၢ်လီၤဆဲး. (ကတိၤဒိ ၁၈:၁၃) ပှၤမ့ၢ်မၤကမၣ်ဘၣ်နၤန့ၣ် သံကွၢ်လီၤနသးလၢ ‘ဘၣ်မနုၤအဃိ အမၤဝဲဒၣ်ဒ်အံၤလဲၣ်န့ၣ် မ့ၢ်ယသ့ၣ်ညါ တၢ်ဂ့ၢ်ခဲလၢာ်ဧါ. အမၤဝဲဒ်အံၤန့ၣ် မ့ၢ်လၢအတူၢ်ဘၣ် တၢ်တမံၤမံၤအဃိဧါ. ဒီးမ့ၢ်လၢအတသ့ၣ်ညါဘၣ်အဃိ အမၤဘၣ်ဝဲဒ်န့ၣ်ဧါ.’ တဘျီတခီၣ်ဖျါလၢ ပှၤတဂၤန့ၣ် အဲၣ်ဒိးမၤဆါပှၤ ဘၣ်ဆၣ် မ့ၢ်အဝဲသ့ၣ်အဲၣ်ဒိးမၤဝဲ ဒ်န့ၣ်သပှၢ်ကတၢၢ်ဧါ.
ဘၣ်ဃးဒီးတၢ်ဟ့ၣ်ကၣ်က့ၤတၢ်န့ၣ် ပှၤအါဂၤနၢ်ပၢၢ်ကမၣ်ဝဲဒ်လဲၣ်.
တၢ်နၢ်ပၢၢ်ကမၣ်- လံာ်စီဆှံတဲဝဲလၢ “မဲာ်ချံလၢ မဲာ်ချံအဂီၢ်” အဃိ ပှၤအါဂၤနၢ်ပၢၢ်ဝဲလၢ ပှၤဟ့ၣ်ကၣ်က့ၤတၢ်သ့ဝဲလီၤ.—၃ မိၤၡ့ ၂၄:၂၀.
တၢ်မ့ၢ်တၢ်တီ- လၢပျၢၤန့ၣ် ပှၤအံၣ်စရ့လးဖိသ့ၣ်တဖၣ် အိၣ်ဒီးတၢ်သိၣ်တၢ်သီလၢ အမ့ၢ် “မဲာ်ချံလၢ မဲာ်ချံအဂီၢ်” န့ၣ် တအဲၣ်ဒိးဝဲလၢ အဝဲသ့ၣ်ကဘၣ်ဟ့ၣ်ကၣ်က့ၤတၢ်လၢ အနီၢ်ကစၢ်ဘၣ်. တၢ်သိၣ်တၢ်သီအံၤန့ၣ် မ့ၢ်ဒ်သိးကမၤစၢၤဝဲဒၣ် စံၣ်ညီၣ်ကွီၢ်တဖၣ်လၢ ကစံၣ်ညီၣ်ဝဲ ပှၤမၤကမၣ်တၢ်တဂၤန့ၣ် တီတီလိၤလိၤအဂီၢ်.b—၅ မိၤၡ့ ၁၉:၁၅-၂၁.
တၢ်နၢ်ပၢၢ်ကမၣ်- လံာ်စီဆှံတဲဝဲလၢ ပတဘၣ်ဟ့ၣ်ကၣ်က့ၤတၢ်ဘၣ် အဃိ ပှၤမ့ၢ်မၤဆါပှၤန့ၣ် ပဒီသဒၢလီၤက့ၤ ပသးတန့ၢ်ဘၣ်.
တၢ်မ့ၢ်တၢ်တီ- ပှၤမ့ၢ်မၤဆါဘၣ်နၤန့ၣ် နဒီသဒၢလီၤနနီၢ်ကစၢ်သးသ့ မ့တမ့ၢ် နဃ့တၢ်မၤစၢၤလၢ ပှၤဘၣ်မူဘၣ်ဒါတဖၣ် အအိၣ်သ့ဝဲလီၤ. ဘၣ်ဆၣ် လံာ်စီဆှံတဲဝဲလၢ ပတဘၣ်မၤဆၢက့ၤတၢ်လၢ အပၣ်ဃုာ်ဒီး တၢ်မၤဆူၣ်မၤစိးသ့ၣ်တဖၣ်ဘၣ်.—ကတိၤဒိ ၁၇:၁၄.
a လံာ်စီဆှံပာ်ဖျါထီၣ်ဝဲလၢ ယဟိဝၤန့ၣ် မ့ၢ်ဝဲ ကစၢ်ယွၤအမံၤ.
b နမ့ၢ်အဲၣ်ဒိးသ့ၣ်ညါအါထီၣ် ဘၣ်ဃးဒီး တၢ်ဂ့ၢ်တခါအံၤန့ၣ် ကွၢ်တၢ်ဂ့ၢ်လၢအမ့ၢ် “မျက်စိအတွက် မျက်စိ” ဆိုတာ ဘာအဓိပ္ပာယ်လဲ“