ဘၣ်ဃးဒီး တၢ်ဘံၣ်တၢ်ဘၢ လၢ ပိာ်မုၣ်တဖၣ်အဂီၢ်န့ၣ်—လံာ်စီဆှံ ပာ်ဖျါဝဲဒ်လဲၣ်

“လၢယနီၢ်ဆံးခါန့ၣ် ယကၠီ မၤနၢၤအီၣ်ယၤ, အဝဲမၤဒၢၣ်ယၤ ဒီးတဲဆါယၤ ကိးနံၤဒဲး. ဒီးယဖျီသးဝံၤအလီၢ်ခံ ယမံၤပှၢ်ပိာ်မုၣ် နာ်က့မၤဒၢၣ်ယၤ. ဒီးယမံၤပှၢ်ပိာ်မုၣ် ဒီးယမံၤပှၢ်ပိာ်ခွါန့ၣ် အဝဲသ့ၣ် ရ့ယၤ ဒ်သိးဒီးကုၢ်တဂၤ. ယတူၢ်တပှဲၤလၢၤဘၣ်အဃိ ယဆိကမိၣ်ထီၣ်လၢ ယကမၤသံလီၤသး.”—မၢ်ဒူ,a အ့ဒံယါ.

ဟီၣ်ခိၣ်ဒီဘ့ၣ် တၢ်အိၣ်ဆူၣ်အိၣ်ချ့ ကရၢ တဲဝဲလၢ “ပှၤမၤဆူၣ်မၤစိး ပိာ်မုၣ်တဖၣ်န့ၣ် ပထံၣ်ဘၣ်အီၤလၢ တၢ်လီၢ်ဝးဝးလီၤ.” အဝဲသ့ၣ် တယာ်ဝဲလၢ ပိာ်မုၣ်သၢဂၤအကျါ တဂၤန့ၣ် ကထံၣ်ဘၣ်ဒီး တၢ်မၤဆူၣ်မၤစိး မ့တမ့ၢ် ပှၤမၤတရီတပါအီၤ.

နမ့ၢ်ထံၣ်ဘၣ်ဒီး တၢ်အိၣ်သးဒ်န့ၣ်န့ၣ် နကတူၢ်ဘၣ်လၢ နမ့ၢ်လဲၤလၢ တၢ်လီၢ်တတီၤဂ့ၤ တတီၤဂ့ၤ တၢ်ဘံၣ်တၢ်ဘၢတအိၣ်ဘၣ်. မ့ၢ်လၢ နကဘၣ်ယိၣ်လၢ ပှၤတတဲတၢ်ဒီးနၤဂ့ၤဂ့ၤဘၣ်, ပှၤကမၤဆူၣ်မၤစိးနၤ မ့တမ့ၢ် ပှၤကမၤတရီတပါနၤ. ဒီးခီဖျိလၢ နထံၣ်ဘၣ်လၢ ပှၤတရ့ဒီး ပိာ်မုၣ်တဖၣ်ဂ့ၤဂ့ၤဘၣ်အဃိ နကဆိကမိၣ်ဘၣ်လၢ ပှၤအါတက့ၢ်န့ၣ် ‘တပာ်လုၢ်ပာ်ပှ့ၤ ပိာ်မုၣ်တဖၣ်ဘၣ်.’ ဘၣ်ဆၣ် မ့မ့ၢ် ကစၢ်ယွၤန့ၣ် အပာ်လုၢ်ပာ်ပှ့ၤ ပိာ်မုၣ်တဖၣ်ဧါ.

ယဟိဝၤယွၤ ထံၣ်ပိာ်မုၣ်ဒ်လဲၣ်

လံာ်စီဆှံဆၢ– “ကစၢ်ယွၤတ့လီၤဝဲ ပိာ်ခွါဒီးပိာ်မုၣ်.”—၁ မိၤၡ့ ၁:၂၇.

အခီပညီ– ကစၢ်ယွၤ တ့လီၤဝဲ ပိာ်ခွါ ဒီးပိာ်မုၣ်. ဒီးယဟိဝၤယွၤ ပာ်လုၢ်ပာ်ပှ့ၤအဝဲသ့ၣ် ခံဂၤလၢာ်လီၤ. တကးဒံးဘၣ် ကစၢ်ယွၤ အဲၣ်ဒိးဝဲလၢ ဝၤကဘၣ် ‘အဲၣ် အမါ ဒ်အအဲၣ်လီၤ အနီၢ်ကစၢ် အသးအသိး’ ဒီးအတဘၣ်ဖီၣ်ဃံးအမါဘၣ် ဒီးအတဘၣ်သူ တၢ်ကတိၤဆူၣ်ဆူၣ်ကိၤကိၤ မ့တမ့ၢ် မၤဆါအမါဘၣ်. (အ့းဖ့းစူး ၅:၃၃; ကလီးစဲ ၃:၁၉) အဃိ ပသ့ၣ်ညါဘၣ်လၢ ကစၢ်ယွၤန့ၣ် ပာ်လုၢ်ပာ်ပှ့ၤ ပိာ်မုၣ်တဖၣ်.

“လၢယနီၢ်ဆံးခါန့ၣ် ယဘူးယတံၢ်တဖၣ် မၤတရီတပါယၤ. ဒီးဖဲယအိၣ် ၁၇ နံၣ်အခါ ယတၢ်မၤခိၣ် တဲပျံၤယၤလၢ ယမ့ၢ်တမံဃုာ်ဒီးအီၤဘၣ်န့ၣ် အဝဲကထုးထီၣ်ကွံာ်ယၤ လၢတၢ်မၤ. ဒီးတုၤလၢယနီၢ်ဒိၣ်ထီၣ်ဘျီ ယဝၤ, ယမိယပါ ဒီးပှၤလၢ ယဟံၣ်ခိၣ်ဟံၣ်ဃၢၤတဖၣ် တရ့ယၤဂ့ၤဂ့ၤဘၣ်. ဘၣ်ဆၣ် လၢခံယမၤလိဘၣ် တၢ်ဘၣ်တ့ကစၢ် ယဟိဝၤယွၤအဂ့ၢ်.b ဒီးယသ့ၣ်ညါဘၣ်လၢ ယဟိဝၤယွၤန့ၣ် အပာ်လုၢ်ပာ်ပှ့ၤ ပိာ်မုၣ်တဖၣ်. အဃိ ယနာ်လၢ ယဟိဝၤယွၤ အဲၣ်ယၤ ဒီးပာ်လုၢ်ပာ်ပှ့ၤယၤ.” —မရံယၤ, ကီၢ်အၣ်ကၠ့ၣ်တံနါ.

နသးကမုာ်ထီၣ်က့ၤအဂီၢ် တၢ်မနုၤမၤစၢၤနၤသ့လဲၣ်

လံာ်စီဆှံဆၢ– “တံၤသကိးလၢ အတီဒီးနၤ ဒိၣ်န့ၢ်ဒံး နဒီပုၢ်ဝဲၢ်န့ၣ် အိၣ်ဝဲစ့ၢ်ကီးလီၤ.”—ကတိၤဒိ ၁၈:၂၄.

အခီပညီ– နတံၤသကိးလၢအဂ့ၤန့ၣ် ကမၤစၢၤနၤ. နမ့ၢ်လိၣ်ဘၣ် တၢ်မၤစၢၤန့ၣ် တဲပၠးဘၣ်နတၢ်တူၢ်ဘၣ်လၢ ပှၤလၢနနာ်န့ၢ်အီၤ သ့တဂၤဂၤ.

“လၢညါ ပှၤဖီၣ်ယၤလၢ တၢ်လီၢ်လၢ တကြၢးတဘၣ်ဘၣ်န့ၣ် ယတတဲဘၣ်ပှၤနီတဂၤဘၣ် အိၣ်လၢအနံၣ် ၂၀ ညါ. ဒီးခီဖျိလၢ ယတတဲဘၣ်ပှၤနီတဂၤဘၣ်အဃိ ယတသးခုဘၣ်, ယပျံၤတၢ် ဒီးယသးအုး. ဘၣ်ဆၣ် တုၤလၢယတဲဘၣ်ပှၤတဂၤ တၢ်လၢယလဲၤခီဖျိဘၣ်တဖၣ် ဝံၤဘျီ ယသးမုာ်ထီၣ်ဖးဒိၣ်ညါ.”—အဲလံၣ်, ထၢခံၤ.

လံာ်စီဆှံဆၢ– “ကစၢ်ယွၤ သးအိၣ်သုအဃိ ပာ်ထီၣ် သုတၢ်ဘၣ်ယိၣ်ဘၣ်ဘှီခဲလၢာ်လၢ အအိၣ်တက့ၢ်.”—၁ ပ့းတရူး ၅:၇.

အခီပညီ– ဖဲနဃ့ထုကဖၣ်တၢ်အခါ ယဟိဝၤယွၤ ဒိကနၣ်နၤအနီၢ်ကီၢ်. (စံးထီၣ်ပတြၢၤ ၅၅:၂၂; ၆၅:၂) ဒီးခီဖျိလၢ အသးအိၣ်နၤအဃိ အဝဲကမၤစၢၤနၤဒ်သိး နကတူၢ်ဘၣ်လၢ နမ့ၢ်ပှၤလၢ အလုၢ်ဒိၣ်ပှ့ၤဒိၣ် ဒိၣ်မး.

“ယမၤလိဘၣ် ယဟိဝၤယွၤ အဂ့ၢ်အဃိ ယတၢ်သးဘၣ်ဒိတဖၣ်န့ၣ် ကိညၢ်လီၤဖးဒိၣ်ညါ. ခဲအံၤ ယဃ့ထုကဖၣ် ဒီးယတဲဘၣ် ကစၢ်ယွၤလၢ ယတၢ်တူၢ်ဘၣ် သ့ခဲလၢာ်လံ. ကစၢ်ယွၤန့ၣ် အကဲ ယသကိးလၢ အနၢ်ပၢၢ်ယတၢ်တူၢ်ဘၣ်ဂ့ၤဂ့ၤတဂၤ.”—အါနၤ, ဘလံး.

တၢ်တတီတလိၤလၢ ပိာ်မုၣ်တဖၣ် ထံၣ်ဘၣ်ဝဲန့ၣ် ကစၢ်ယွၤ ကမၤလီၤမၢ်ကွံာ်ဝဲဧါ

လံာ်စီဆှံဆၢ– “ယဟိဝၤယွၤ . . . နကစံၣ်ညီၣ်န့ၢ်တၢ်လၢ ပှၤဖိၣ်ဃဲဖိ ဒီးပှၤလၢအဘၣ် တၢ်မၤသဘှံးအီၤတဖၣ်အဂီၢ် တီတီလိၤလိၤ ဒ်သိး ပှၤဟီၣ်ခိၣ်ဖိလၢ ဟီၣ်ခိၣ်ချၢ သုတမၤပျံၤအဝဲသ့ၣ် လၢၤတဂ့ၤအဂီၢ်လီၤ.”—စံးထီၣ်ပတြၢၤ ၁၀:၁၇, ၁၈.

အခီပညီ– တယံာ်လၢၤဘၣ်န့ၣ် ကစၢ်ယွၤ ကမၤလီၤမၢ်ကွံာ် တၢ်မၤဆူၣ်မၤဆိး ဒီးတၢ်အၢတၢ်သီ ဒီးတၢ်တတီတလိၤကိးမံၤဒဲး လၢပိာ်မုၣ်တဖၣ် ထံၣ်ဘၣ်ဝဲ.

“ယမၤလိဘၣ်လၢ တၢ်တီတလိၤလၢ ပိာ်မုၣ်လၢ အသးပှၢ်မ့ၢ်ဂ့ၤ အသးစၢ်မ့ၢ်ဂ့ၤ ထံၣ်ဘၣ်ဝဲန့ၣ် ယဟိဝၤယွၤ ကမၤကတၢၢ်ကွံာ်ဝဲ. အဃိ ယသးမုာ်ထီၣ် ဒီးတဘၣ်ယိၣ်တၢ် အါအါလၢၤဘၣ်.”—ရီဘၢၤထၤ, မဲးကစံၣ်ကိၣ်.

နမ့ၢ်အဲၣ်ဒိးသ့ၣ်ညါအါထီၣ် ဘၣ်ဃး လံာ်စီဆှံ ဟ့ၣ်ပှၤတၢ်မုၢ်လၢ်ဒ်လဲၣ်, ဘၣ်မနုၤအဃိ ပနာ်န့ၢ်အီၤသ့လဲၣ် ဒီးယဟိဝၤပှၤအုၣ်အသးတဖၣ်န့ၣ် မၤစၢၤပှၤဂၤလၢ လံာ်စီဆှံဒ်လဲၣ်န့ၣ် မၢ ဟဲဟးကဒါလၢနအိၣ်.

ဒီးလိး လံာ်တဘ့ၣ်အံၤ.