နလဲၤခီဖျိ တၢ်ကီတၢ်ခဲလၢ ၂၀၂၄ အပူၤကသ့ဒ်လဲၣ်—ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတဲဝဲဒ်လဲၣ်

ပှၤအါဂၤ ဆိကမိၣ်ဝဲလၢ လၢ ၂၀၂၄ နံၣ်အတီၢ်ပူၤ တၢ်ကီတၢ်ခဲလၢ ကကဲထီၣ်အသးလၢ ဟီၣ်ခိၣ်ဒီဘ့ၣ်န့ၣ် ပှၤမၤဂ့ၤထီၣ်အီၤ တသ့နီတဂၤဘၣ်. ဘၣ်ဆၣ် ပဃုထံၣ်န့ၢ် တၢ်မုၢ်လၢ်လၢ ခါဆူညါအဂီၢ်သ့. ပဃုထံၣ်န့ၢ်အီၤ ကသ့ဖဲလဲၣ်.

လံာ်စီဆှံ ဟ့ၣ်ပှၤတၢ်မုၢ်လၢ်

လံာ်စီဆှံ တဲဝဲလၢ ကစၢ်ယွၤ ကမၤလီၤမၢ်ကွံာ်ဝဲ တၢ်ကီတၢ်ခဲလၢ အမၤဟးဂီၤကွံာ် ပှၤဟီၣ်ခိၣ်ဖိတဖၣ် အတၢ်မုၢ်လၢ်. တယံာ်လၢၤဘၣ်န့ၣ် ကစၢ်ယွၤ “ကထွါကွံာ် အဝဲသ့ၣ် အမဲာ်ထံခဲလၢာ် ဒီးတၢ်သံတအိၣ်လၢၤဘၣ်. ဒီးတၢ်သူၣ်အုးသးအုးမ့ၢ်ဂ့ၤ, တၢ်ဟီၣ်တၢ်ယၢၤမ့ၢ်ဂ့ၤ, တၢ်လၢအဆါမ့ၢ်ဂ့ၤ တအိၣ်လၢၤဘၣ်.”—လီၣ် ၂၁:၄.

• ဒ်သိး နကသ့ၣ်ညါအါထီၣ် လံာ်စီဆှံ အတၢ်အၢၣ်လီၤ ဘၣ်ဃးဒီး ခါဆူညါအဂီၢ် ဖးကွၢ် တၢ်ဂ့ၢ်လၢအမ့ၢ် “တၢ်မုၢ်လၢ်လၢ ကဟဲလၢပှဲၤထီၣ်နီၢ်ကီၢ် လၢခါဆူညါအဂီၢ်.”

လံာ်စီဆှံ မၤစၢၤပှၤလၢ ဆၢကတီၢ်ခဲအံၤသ့

လံာ်စီဆှံ ပာ်ဖျါထီၣ်န့ၢ်ပှၤ တၢ်မုၢ်လၢ်လၢ ခါဆူညါအဂီၢ်. ဒီးတၢ်မုၢ်လၢ်တဖၣ်အံၤ မၤစၢၤပှၤ ဒ်သိး ပတြီဆၢကွံာ် တၢ်တူၢ်ဘၣ်လၢ အတဂ့ၤတဖၣ် ကန့ၢ်အဂီၢ် တကးဒံးဘၣ် ကမၤစၢၤပှၤ ဒ်သိး ပကအိၣ်ဒီး တၢ်ထံၣ်လၢအဂ့ၤဒိၣ်ထီၣ်အဂီၢ်. (ရိမ့ၤ ၁၅:၁၃) ဒီးလံာ်စီဆှံ အတၢ်ဟ့ၣ်ကူၣ်တဖၣ် မၤစၢၤပှၤ ဒ်သိးပလဲၤခီဖျိ တၢ်ကီတၢ်ခဲလၢ ပထံၣ်ဘၣ်အီၤလၢ ဆၢကတီၢ်ခဲအံၤအဂီၢ်သ့ဝဲ. အဒိ အမၤစၢၤပှၤလၢ ပလဲၤခီဖျိ တၢ်ဖှီၣ်တၢ်ယာ်, တၢ်တတီတလိၤ ဒီးတၢ်ဆူးတၢ်ဆါ ကန့ၢ်အဂီၢ်သ့ဝဲ.

• ဃုသ့ၣ်ညါ ဘၣ်ဃးဒီး ပှၤတဂၤ ဒိၣ်ထီၣ်ဘၣ် ဖှီၣ်ဖှီၣ်ယာ်ယာ် သနာ်က့ တၢ်မုၢ်လၢ်လၢ လံာ်စီဆှံပူၤ မၤစၢၤအီၤဒ်သိး အကအိၣ်ဒီး တၢ်သးခု ဒီးတၢ်သးမုာ်ဒ်လဲၣ်. ကွၢ်တၢ်ဂီၤမူ လၢအမ့ၢ် ဝၤန် ဖဲဘလိၤ စံၤမံနိၤ—ယဟိဝၤယွၤ ဟ့ၣ်ယၤတၢ်အိၣ်မူလၢ အပှဲၤဒီးအခီပညီ.

• နမ့ၢ်တူၢ်ဘၣ်လၢ နတၢ်ကမၣ်အိၣ်, သူၣ်အုးသးအုး, သူၣ်ကိၢ်သးဂီၤတၢ် ဒီးပှၤလၢနအဲၣ်ဘၣ်အီၤတဂၤ မ့ၢ်သံသဒၣ်ကွံာ်နၤန့ၣ် ဃုသ့ၣ်ညါ ဘၣ်ဃးဒီး ဒ်သိး နလဲၤခီဖျိ တၢ်တူၢ်ဘၣ်တဖၣ်အံၤ ကန့ၢ်အဂီၢ် လံာ်စီဆှံ မၤစၢၤနၤ ကသ့ဒ်လဲၣ်. ဖးကွၢ်တၢ်ဂ့ၢ် လၢအမ့ၢ် “လၢလံာ်စီဆှံပူၤန့ၣ် တၢ်ကတိၤလၢ အမၤမုာ်ထီၣ်ယသး အိၣ်ဧါ.”

• ဃုသ့ၣ်ညါ ဘၣ်ဃးဒီး ပိာ်မုၣ်လၢ အကဲတ့ၢ်သုးတဂၤ လၢညါအမ့ၢ်ပှၤလၢ “အသူၣ်ခံးသးခံး ဒီးအတၢ်ဒိသူၣ်ဒိသး တအိၣ်ဘၣ်” သနာ်က့ လံာ်စီဆှံ မၤစၢၤအီၤ ဒ်သိး အတၢ်မုၢ်လၢ် ကအိၣ်ထီၣ်အဂီၢ် ဒ်လဲၣ်. ကွၢ်တၢ်ဂီၤမူ လၢအမ့ၢ် ယပာ်တ့ၢ်ကွံာ် ယကျိ.

လၢ ၂၀၂၄ အတီၢ်ပူၤ မၤတၢ်လၢ အကကဲဘျုးလၢ နၤဒီးနဟံၣ်ဖိဃီဖိအဂီၢ်. ဃုသ့ၣ်ညါအါထီၣ် ဘၣ်ဃးဒီး လံာ်စီဆှံမၤစၢၤနၤ သ့အဂ့ၢ်. မၤလိကွၢ် တၢ်မၤလိလံာ်စီဆှံဒီး ပှၤလၢအသိၣ်လိလံာ်စီဆှံ တဂၤဂၤ. နတလိၣ်ဟ့ၣ်စ့လၢ တၢ်မၤလိအံၤအဂီၢ်ဘၣ်. ဃုသ့ၣ်ညါ ဘၣ်ဃးဒီး ကစၢ်ယွၤ ကဟ့ၣ်နၤ “တၢ်မုာ်တၢ်ခုၣ်” လၢဆၢကတီၢ်ခဲအံၤ ဒီးကဟ့ၣ်နၤ “တၢ်မုၢ်လၢ် ဒီးတၢ်အိၣ်မူလၢ အဂ့ၤလၢ ခါဆူညါ” လၢကျဲဒ်လဲၣ်.—ယံးရမံယၤ ၂၉:၁၁.