ပှၤသးစၢ်တဖၣ်အတၢ်သံကွၢ်
ဘၣ်မနုၤအဃိ ယကြၢးဃ့ထုကဖၣ်လဲၣ်.
ပှၤဃုသ့ၣ်ညါတၢ်တဖၣ် ပာ်ဖျါထီၣ်လၢ ပှၤအမဲရကၤဖိလၢ အလိၣ်ဘိထီၣ် အမျးကယၤ ၈၀ န့ၣ် ဃ့ထုကဖၣ်တၢ်. ဘၣ်ဆၣ် လၢအဝဲသ့ၣ်အကျါ ထဲဒၣ်တဝာ်ဃၣ်ဃၣ်န့ၣ် ဃ့ဘါထုကဖၣ်တၢ်ကိးနံၤဒဲး. အဃိ ပှၤတနီၤနီၤ ဆိကမိၣ်ဝဲလၢ တၢ်ဃ့ဘါထုကဖၣ်န့ၣ် မ့ၢ်ဒၣ်တၢ်လၢအမၤမုာ်ပသး မ့တမ့ၢ် ကဲဘျုးလၢ ကျဲအဂၤအိၣ်ဒံးဧါန့ၣ် အဝဲသ့ၣ် အဲၣ်ဒိးသ့ၣ်ညါအါထီၣ်ဝဲ.
တၢ်ဃ့ထုကဖၣ်န့ၣ် မ့ၢ်တၢ်မနုၤလဲၣ်
ပဃ့ထုကဖၣ်တၢ်န့ၣ် မ့ၢ်ကျဲတဘိလၢ ပတဲတၢ်ဒီး တၢ်ဘၣ်တ့ကစၢ်. အမ့ၢ်စ့ၢ်ကီးတၢ်ခွဲးတၢ်ယာ် လီၤဆီတခါဒ်လဲၣ်န့ၣ် ဆိကမိၣ်ကွၢ်မီၤ. ယဟိဝၤယွၤန့ၣ် အမ့ၢ်ယွၤတဂၤလၢ အဒိၣ်ကတၢၢ် ဒီးအထီကတၢၢ်ဘၣ်ဆၣ် “ကစၢ်ယွၤ အိၣ်တယံၤဒီး ပဝဲနီတဂၤဘၣ်.” (မၤတၢ် ၁၇:၂၇ ) ထဲန့ၣ်တကးဒံးဘၣ် လံာ်စီဆှံ ပာ်ဖျါထီၣ်န့ၢ်ပှၤလၢ ပဝဲခဲလၢာ် ပဘၣ်တၢ်ကွဲမုာ်ပှၤလၢ “သုးဘူးသုသးဆူ ကစၢ်ယွၤအအိၣ်တက့ၢ်. ဒီးအဝဲကသုးဘူးအသး ဆူသုအိၣ်လီၤ.”—ယၤကိာ် ၄:၈.
ပသုးဘူးပသးဆူ ကစၢ်ယွၤအအိၣ် ကသ့ဒ်လဲၣ်
ကျဲတဘိန့ၣ်မ့ၢ်ဝဲ ပဃ့ထုကဖၣ်တၢ်ဆူ ကစၢ်ယွၤအအိၣ်—အဝဲအံၤ မ့ၢ်ကျဲတဘိလၢ ပတဲတၢ်ဒီးကစၢ်ယွၤ.
ကျဲလၢအဂၤတဘိန့ၣ်မ့ၢ်ဝဲ ပဖးဒီးမၤလိလံာ်စီဆှံ—အဝဲန့ၣ် မ့ၢ်ကျဲတဘိလၢ ကစၢ်ယွၤ တဲတၢ်ဒီးပှၤ.
ပမ့ၢ်ဆဲးကျိးဒီးကစၢ်ယွၤ လၢကျဲဒ်အံၤခီဖျိ ပဃ့ထုကဖၣ်တၢ်ဒီး ဖးလံာ်စီဆှံန့ၣ် ပတၢ်ရ့လိာ်သးဒီး ကစၢ်ယွၤကဂၢၢ်ကျၢၤဒိၣ်ထီၣ်.
ကၠဲရဲမံၤ လၢအသးအိၣ် ၁၇ နံၣ်တဂၤန့ၣ် တဲဝဲလၢ “ပတဲသကိးဘၣ်တၢ်ဒီး ကစၢ်ယွၤလၢ အဒိၣ်ကတၢၢ်ထီကတၢၢ်တဂၤအဃိ အဝဲအံၤမ့ၢ် တၢ်ခွဲးတၢ်ယာ် အဒိၣ်ကတၢၢ်လၢ ပှၤဟီၣ်ခိၣ်ဖိတဖၣ်အဂီၢ်.
မရဲဒၤ လၢအအိၣ် ၂၄ နံၣ်တဂၤန့ၣ် တဲဝဲလၢ “ဖဲယတဲဖျါထီၣ် ယတၢ်တူၢ်ဘၣ်လၢ ယဟိဝၤယွၤအအိၣ်ခီဖျိ တၢ်ထုကဖၣ်အခါ ယတူၢ်ဘၣ်လၢ ယဘူးဒိၣ်ထီၣ်ဒီးကစၢ်ယွၤ.”
မ့ၢ်ကစၢ်ယွၤဒိကနၣ် ပတၢ်ထုကဖၣ်စ့ၢ်ကီးဧါ
ပှၤတနီၤနီၤန့ၣ် နာ်ကစၢ်ယွၤ ဒီးဃ့ထုကဖၣ်လၢ ကစၢ်ယွၤအအိၣ်. ဘၣ်ဆၣ် မ့ၢ်ကစၢ်ယွၤ ဒိကနၣ် အတၢ်ထုကဖၣ်ဧါ တဒိကနၣ်ဘၣ်ဧါန့ၣ် အတသ့ၣ်ညါဘၣ်. ပမ့ၢ်ကွၢ်န့ၣ် လံာ်စီဆှံ ပာ်ဖျါထီၣ်န့ၢ်ပှၤလၢ ယဟိဝၤယွၤန့ၣ် “ဒိကနၣ် တၢ်ထုကဖၣ်” (စံးထီၣ်ပတြၢၤ ၆၅:၂) တကးဒံးဘၣ် လံာ်စီဆှံ ဟ့ၣ်သဆၣ်ထီၣ်ပှၤလၢ ‘ပာ်ထီၣ် ပတၢ်ဘၣ်ယိၣ်ဘၣ်ဘှီခဲလၢာ်လၢ အအိၣ်’. ဘၣ်မနုၤအဃိ ပကဘၣ်မၤဒ်န့ၣ်လဲၣ်. “မ့ၢ်လၢ ကစၢ်ယွၤ သးအိၣ်သုအဃိ”—၁ ပ့းတရူး ၅:၇.
ဆိကမိၣ်ကွၢ်- မ့ၢ်နပာ်လီၤတၢ်ဆၢကတီၢ်လၢ နကတဲသကိးတၢ် ဒီးနသကိးလၢ နရ့အီၤဘူးဘူးတံၢ်တံၢ်တဖၣ် စ့ၢ်ကီးဧါ. နၤစ့ၢ်ကီး နပာ်လီၤတၢ်ဆၢကတီၢ်လၢ နကတဲသကိးတၢ်ဒီး ကစၢ်ယွၤသ့. တဲသကိးတၢ်ဒီး ကစၢ်ယွၤလၢ တၢ်ထုကဖၣ်ထီဘိဒီးသူ ယဟိဝၤယွၤအမံၤတက့ၢ်. (စံးထီၣ်ပတြၢၤ ၈၆:၅-၇; ၈၈:၉) တကးဒံးဘၣ် လံာ်စီဆှံ ဟ့ၣ်သဆၣ်ထီၣ်ပှၤလၢ “ဃ့ထုကဖၣ်တၢ် ထီဘိတက့ၢ်.”—၁ သ့းစၤလနံ ၅:၁၇.
မိၤစဲးလၢအအိၣ် ၂၁ နံၣ်တဂၤန့ၣ် တဲဝဲလၢ “တၢ်ထုကဖၣ်န့ၣ် မ့ၢ်ဝဲကျဲတဘိလၢ ယတဲသကိးတၢ်ဒီး ယပၢ်လၢမူခိၣ် ဒီးယတဲဘၣ်အီၤတၢ်အိၣ်လၢ ယသးကံၢ်ပူၤခဲလၢာ်.”
ခဲရဲၤလၢအအိၣ် ၂၃ နံၣ်တဂၤ တဲဝဲလၢ “ယတဲဘၣ် ယဟိဝၤယွၤ တၢ်ဂ့ၢ်လၢ အရ့ဒိၣ်တဖၣ် ဒ်ယတဲတၢ်ဒီးယမိ မ့တမ့ၢ် ယတံၤသကိးလၢ ယမုာ်ဒိၣ်ကတၢၢ်တဂၤအသိး.”
ယဃ့တၢ်မနုၤသ့လဲၣ်
လံာ်စီဆှံတဲဝဲလၢ “လၢတၢ်ခဲလၢာ်အပူၤန့ၣ် တဲဖျါထီၣ် သုတၢ်ဃ့တဖၣ်လၢ ကစၢ်ယွၤအအိၣ် ခီဖျိလၢ တၢ်ဃ့ထုကဖၣ် ဒီးတၢ်ဃ့ကညးတၢ် ဃုာ်ဒီး တၢ်စံးဘျုးစံးဖှိၣ်က့ၤတၢ်တက့ၢ်.”—ဖံလံးပံၤ ၄:၆.
ပဃ့ထုကဖၣ်ဒ်သိး ပတၢ်ကီတၢ်ခဲ ကလီၤမၢ်အဂီၢ်သ့ဧါ. သ့ဝဲ. လံာ်စီဆှံ ဟ့ၣ်သဆၣ်ထီၣ်ပှၤဒ်သိး ပက ‘ပာ်ထီၣ် ပတၢ်ဝံဃၢလၢ ယဟိဝၤယွၤအအိၣ်’ ဒီးပမ့ၢ်မၤဒ်န့ၣ်န့ၣ် ‘အဝဲကမၤဂၢၢ်မၤကျၢၤပှၤ.’—စံးထီၣ်ပတြၢၤ ၅၅:၂၂.
ဖဲပဃ့ထုကဖၣ်တၢ်လၢ ကစၢ်ယွၤအအိၣ်အခါ တမ့ၢ်ထဲလၢ ပကဘၣ်တဲဘၣ် ယဟိဝၤယွၤလၢ ပတၢ်ကီတၢ်ခဲတဖၣ်ဘၣ်. ခၠဲထၢၤ လၢအအိၣ် ၂၃ နံၣ်တဂၤန့ၣ် တဲဝဲလၢ “ယမ့ၢ်ဃ့ယဟိဝၤယွၤ ထဲအကမၤစၢၤနၤတခါလီၤဒု ယတမ့ၢ်တံၤသကိးလၢအဂ့ၤဘၣ်. ယဆိမိၣ်ဒု ယမ့ၢ်စံးဘျုးစံးဖှိၣ်ဆိအီၤဒု ကဂ့ၤဒိၣ်တစဲး. ဒီးတၢ်လၢယကစံးဘျုးစံးဖှိၣ် ကစၢ်ယွၤန့ၣ် အိၣ်ဝဲအါမး.
ဆိကမိၣ်ကွၢ်— တၢ်ဂ့ၢ်လၢ နကြၢးစံးဘျုးစံးဖှိၣ် ကစၢ်ယွၤလၢ နတၢ်အိၣ်မူအပူၤန့ၣ်အိၣ်ဧါ. ကိးနံၤဒဲးန့ၣ် ဆိကမိၣ်ထီၣ်တၢ်ဂ့ၢ် ၃ ခါလၢ နကစံးဘျုးစံးဖှိၣ် ယဟိဝၤယွၤ.
အဲၤနံထၤ လၢအအိၣ် ၁၈ နံၣ်တဂၤ တဲဝဲလၢ “တၢ်ဂ့ၢ်ဆံးဆံးဖိ ဒ်သိးဒီး ဖဲပထံၣ်ဖီဖိလၢ အဃံအလၤဖိတဖီးဒၣ်လဲာ် ထိၣ်ဟူးထိၣ်ဂဲၤထီၣ်ပှၤလၢ ပကစံးဘျုးကစၢ်ယွၤ ခီဖျိတၢ်ထုကဖၣ်.”
ဘြါယၢၤ လၢအအိၣ်အနံၣ် ၂၀ တဂၤန့ၣ် တဲဝဲလၢ “ဆိကမိၣ်ထံ တၢ်ဘၣ်တ့တခါခါ မ့တမ့ၢ် လံာ်စီဆှံအဆၢ တဆၢဆၢလၢ အထုးန့ၢ်နသးဝံၤဒီး စံးဘျုးစံးဖှိၣ်က့ၤ ယဟိဝၤယွၤ.”