ပသူတၢ်မၤဘူၣ်တဖၣ်ဒ်လဲၣ်
တၢ်ဒၢဖိလၢ မၤစၢၤပှၤလၢ ပတၢ်နာ်ကဒိၣ်ထီၣ်အဂီၢ်
လါစဲးပတ့ဘၢၣ် ၁, ၂၀၂၀
ယဟိဝၤပှၤအုၣ်အသးတဖၣ် ဒိးန့ၢ်ဘၣ်ဝဲ လံာ်လဲၢ် ဒီးတၢ်ဂီၤမူလၢ အဒိးသန့ၤထီၣ်အသးလၢ လံာ်စီဆှံတဖၣ် လၢစဲးဖီကဟၣ် တၢ်ပီးတၢ်လီတဖၣ်အပူၤ ညီညီလီၤ. ဘၣ်ဆၣ် လၢတၢ်လီၢ်အါတက့ၢ်န့ၣ် ဒီပုၢ်ဝဲၢ်မုၣ်ခွါတဖၣ် ပှ့ၤဝဲအ့ထၢၣ်နဲးတန့ၢ်ဘၣ်. တၢ်လီၢ်တနီၤန့ၣ် မ့ၣ်အူလီၤပံာ်ခဲအံၤခဲအံၤ, အ့ထၢၣ်နဲးကဘှဲ ဒီးတနီၤန့ၣ် အ့ထၢၣ်နဲးတန့ၢ်နီတစဲးဘၣ်.
ဘၣ်ဆၣ် အ့ထၢၣ်နဲး မ့ၢ်တအိၣ်သနာ်က့ ဒီပုၢ်ဝဲၢ်မုၣ်ခွါအါတက့ၢ် ဒီလိးဝဲ လံာ်လဲၢ်တဖၣ်န့ၢ်လံ. အဝဲသ့ၣ်မၤန့ၢ်ဘၣ်ဝဲဒ်လဲၣ်.
တၢ်အိၣ်ဖှိၣ်လၢ အ့ထၢၣ်နဲး တအိၣ်တဖၣ်န့ၣ် ဘၣ်တၢ်ဆှၢလီၤန့ၢ်အဝဲသ့ၣ် တၢ်ဒၢဖိ (JW Box) တဖျၢၣ်လီၤ. လၢတၢ်ဒၢဖိအံၤအပူၤန့ၣ် အိၣ်ဒီး အ့ထၢၣ်နဲး အတၢ်ပီးတၢ်လီဖိ တခါလၢ ပဘၣ်ပှ့ၤလၢခီပနံၣ်အအိၣ် ဒီးစီၣ်ဝဲလၢ ဘ့ၤသ့လး ခီၣ်ဖၠူထၢၣ်ဝဲၤကျိၤ တ့ထီၣ်ဝဲတခါလၢ ပၣ်ဃုာ်ဒီး ဒီးလံာ်လဲၢ် ဒီးတၢ်ဂီၤမူလၢ အိၣ်လၢ jw.org အပူၤလီၤ. တၢ်ဒၢဖိအံၤ လီၤလဲဝဲ ၇၅ ဒီလၣ်ဃၣ်ဃၣ်လီၤ.
လၢဘီမုၢ်ဘျီၣ်ဒိၣ်န့ၣ် ဒီပုၢ်ဝဲၢ်မုၣ်ခွါတဖၣ် ဘျးစဲဝဲ အဝဲသ့ၣ်အလီတဲစိ ဒီးတၢ်ဒၢဖိအံၤ ဒီးဒီလိးဝဲ လံာ်လဲၢ် ဒီးတၢ်ဂီၤမူတဖၣ်လီၤ. လီတဲစိအလီၢ်လံၤမ့ၢ်ဂ့ၤ အပှ့ၤဘၣ်မ့ၢ်ဂ့ၤ ဘျးစဲဝဲန့ၢ်လီၤ. လၢတၢ်အိၣ်ဖှိၣ်အပူၤ အ့ထၢၣ်နဲးမ့ၢ်တန့ၢ်ဘၣ်န့ၣ် အဝဲသ့ၣ် ကဒိးန့ၢ်ဘၣ်ဝဲ လံာ်လဲၢ်အသီတဖၣ်ဒ်လဲၣ်. ဝဲၤတြၢ်ဆှၢန့ၢ်အဝဲသ့ၣ် USB တခါလၢအပှ့ၤအိၣ် ၄ ဒီလၣ် ခဲအံၤခဲအံၤလီၤ. တၢ်ဂ့ၢ်အသီလၢ ဘၣ်တၢ်ဖၢနုာ်အီၤလၢ USB အပူၤန့ၣ် ဘၣ်တၢ်ထီထီၣ်အီၤလၢ တၢ်ဒၢဖိအံၤအပူၤလီၤ.
တၢ်ဒၢဖိအံၤ မၤစၢၤဝဲ ဒီပုၢ်ဝဲၢ်တဖၣ်ဒ်လဲၣ်. ဒီပုၢ်ဝဲၢ်ခွါ နၤသၣ် အဲၣ်ဒရူ လၢအမ့ၢ်ပၢ်တဂၤ ဒီးအိၣ်လၢ ဒံၣ်မိၣ်ခြဲးထ့း ရံၤဖၢဘျံး ခိကိၣ်န့ၣ် တဲဝဲလၢ “တၢ်ဂီၤမူဒ်သိးဒီး ‘O Jehovah, . . . I Trust in You’ ဒီး ‘သ့ၣ်နီၣ်ထီၣ်က့ၤ စီၤလိာ်အမါ’ န့ၣ် ယဒီလိးအီၤဖးလံာ်လံ. ဘၣ်ဆၣ် ဒီလိးအီၤတန့ၢ်နီတဘျီဘၣ်. အဃိယသးဟးဂီၤဒိၣ်မး. အခဲအံၤ ယဒီလိးတၢ်ဂီၤမူတဖၣ်န့ၢ်လံအဃိ ယသိၣ်လိယဖိတဖၣ် သ့ဂ့ၤဂ့ၤလံ.”
လၢကီၢ်နဲးကၠံရံယါန့ၣ် ဒီပုၢ်ဝဲၢ်ခွါတဂၤလၢ ဘၣ်မၤစၢၤဝဲ ပှၤကထီထီၣ် တၢ်ဒၢဖိလၢတၢ်အိၣ်ဖှိၣ်တဖၣ်န့ၣ် တဲဝဲလၢ “ဒီပုၢ်ဝဲၢ်တဖၣ် တူၢ်ဘၣ်ဝဲလၢ တၢ်ဒၢဖိအံၤမ့ၢ်တၢ်ဟ့ၣ်လၢ အဟဲလၢယဟိဝၤယွၤအအိၣ်လီၤ. အဝဲသ့ၣ် ဒီလိးဝဲ လံာ်လဲၢ် ဒီးတၢ်ဂီၤမူတဖၣ်န့ၢ်ဝဲ ညီညီဖိအဃိ အဝဲသ့ၣ်အသးခုဒိၣ်မး.”
ပဆှၢလီၤတၢ်ဒၢဖိ အဖျၢၣ် ၁,၇၀၀ လၢ ဒီပုၢ်ဝဲၢ်လၢအအိၣ်လၢ ကီၢ်အၤဖြံၤကၤ, ကလံၤထံး အမဲရကၤ ဒီး လၢကီးတဖၣ်လၢအိၣ်လၢ ပစံးဖံးပီၣ်လဲၣ်မိၢ်ပှၢ်အပူၤလီၤ. ဒီးအဝဲသ့ၣ် ရဲၣ်ကျဲၤဝဲလၢ ကဆှၢဝဲဆူ တၢ်အိၣ်ဖှိၣ်အါမးလီၤ. တၢ်လၢာ်ဘူၣ်လၢာ်စ့ၤ လၢဘၣ်ဃးဒီး တၢ်ရဲၣ်တၢ်ကျဲၤအံၤအဂီၢ်န့ၣ် ပဒိးန့ၢ်ဘၣ်အီၤဖဲလဲၣ်. အါတက့ၢ်န့ၣ် ပဒိးန့ၢ်ဘၣ်အီၤလၢ တၢ်မၤဘူၣ်လၢ ပှၤဟ့ၣ်လီၤအီၤလၢ donate.jw.org အပူၤ လၢဟီၣ်ခိၣ်ဒီဘ့ၣ်တၢ်မၤအဂီၢ်န့ၣ်လီၤ. တၢ်ဘျုးဒိၣ်မးလၢ သုဟ့ၣ်တၢ်လၢ တၢ်သူၣ်အိၣ်သးအိၣ်အဃိလီၤ.