စံၣ်ညီၣ်ကွီၢ်
၄ ဘၣ်ဆၣ် စီၤအ့ဟူာ် သံဝံၤအလီၢ်ခံ ပှၤအံၣ်စရ့လးဖိ မၤကဒီးဝဲ တၢ်လၢ ယဟိဝၤယွၤ ထံၣ်ဝဲလၢအအၢန့ၣ်လီၤ.+ ၂ အဃိ ယဟိဝၤယွၤ ဟ့ၣ်လီၤကွံာ်* အဝဲသ့ၣ်လၢ ကနၤဧၣ်အစီၤပၤ ယၤဘံၣ် အစုပူၤလီၤ.+ စီၤပၤယၤဘံၣ်န့ၣ် ပၢတၢ်လၢ ဝ့ၢ်ဃါစိၢ်လီၤ. ဒီးအသုးမုၢ် အခိၣ်မ့ၢ်ဝဲ စီၤစံစရၤ လၢအအိၣ်လၢ ဃရိၡ့း*+ အတၢ်လီၢ်န့ၣ်လီၤ. ၃ ဒီးမ့ၢ်လၢ စီၤပၤယၤဘံၣ်န့ၣ် အိၣ်ဒီးလ့ၣ်ကဟၣ်သုး လၢအအိၣ်ဒီးထါဂဲာ် အခိၣ် ၉၀၀+ ဒီးအဝဲ မၤအၢမၤနး ပှၤအံၣ်စရ့လးဖိ နးမးလၢ+ အနံၣ် ၂၀ ညါအဃိ ပှၤအံၣ်စရ့လးဖိ ဃ့တၢ်မၤစၢၤလၢ ယဟိဝၤယွၤ အအိၣ်လီၤ.+
၄ နီၢ်ဒဘိရၤ လၢအမ့ၢ် စီၤလံးပံဒိၤ အမါန့ၣ် မ့ၢ်ဝဲဝံမုၣ် တဂၤလီၤ.+ ဒီးဖဲန့ၣ်အဆၢကတီၢ် နီၢ်ဒဘိရၤ စံၣ်ညီၣ်န့ၢ်တၢ်လၢ ပှၤအံၣ်စရ့လးဖိ အဂီၢ်လီၤ. ၅ ဒီးညီနုၢ်န့ၣ် အဝဲဆ့ၣ်နီၤလၢ သ့ၣ်စူၣ်ပလိၣ်* အခီၣ်ထံး လၢအအိၣ်လၢ ဝ့ၢ်ရၤမါ+ ဒီးဝ့ၢ်ဘ့ၤသ့လး+ အဘၢၣ်စၢၤ လၢအ့ဖရဲၣ် အကစၢၢ်ကလိကျါ ဒီးပှၤအံၣ်စရ့လးဖိ လဲၤထီၣ်လၢအအိၣ် ဒ်သိး တၢ်ကစံၣ်ညီၣ်န့ၢ်တၢ်လၢ အဝဲသ့ၣ် အဂီၢ်လီၤ. ၆ ဒီးအဝဲမၢ ပှၤဟဲကိး စီၤအဘံနိၣ်အဖိခွါ စီၤဘါရး+ လၢအအိၣ်လၢ ဝ့ၢ်က့ဒ့ၣ် လၢကီၢ်နးသၤလံအပူၤ+ ဒီးတဲအီၤလၢ “အံၣ်စရ့လးအကစၢ် ယဟိဝၤယွၤ မၤလိာ်နၤလံ. ‘ကိးန့ၢ် ပှၤပိာ်ခွါလၢ နးသၤလံအဒူၣ် ဒီးစဘူလိၣ်အဒူၣ်အကျါ အဂၤ ၁၀,၀၀၀ ဒီးလဲၤဆီလီၤ သုသးလၢ ကစၢၢ်တၤဘိၢ်အလိၤ တက့ၢ်. ၇ ဒီးယကဒုးဟဲ စီၤပၤယၤဘံၣ် အသုးမုၢ်အခိၣ် စီၤစံစရၤ, အလ့ၣ်ကဟၣ်သုး ဒီးအသုးဖိတဖၣ် လၢနအိၣ် ဖဲထံကျိဖိကံၡိၣ်+ ဒီးယကဟ့ၣ်လီၤကွံာ်အီၤ လၢနစုပူၤလီၤ.’”+
၈ ဒီးစီၤဘါရး တဲဘၣ်နီၢ်ဒဘိရၤလၢ “နမ့ၢ်လဲၤဒီးယၤန့ၣ် ယကလဲၤ. နမ့ၢ် တလဲၤဒီးယၤဘၣ်န့ၣ် ယတလဲၤဘၣ်.” ၉ နီၢ်ဒဘိရၤ တဲအီၤလၢ “ယကလဲၤပိာ်နခံ သပှၢ်တၢၢ်လီၤ. ဘၣ်ဆၣ် ယဟိဝၤယွၤ ကဟ့ၣ်လီၤကွံာ် စီၤစံစရၤလၢ ပှၤပိာ်မုၣ်တဂၤ အစုပူၤအဃိ+ နတၢ်လဲၤ တဘျီအံၤန့ၣ် တကဲထီၣ် တၢ်လၤကပီၤလၢ နဂီၢ်ဘၣ်.” ဒီးနီၢ်ဒဘိရၤ ဂဲၤဆၢထၢၣ် ဒီးလဲၤပိာ် စီၤဘါရးအခံဆူ ဝ့ၢ်က့ဒ့ၣ်လီၤ.+ ၁၀ ဒီးစီၤဘါရး ကိးဖှိၣ်ဝဲ စဘူလိၣ်အဒူၣ် ဒီးနးသၤလံအဒူၣ်+ ဆူဝ့ၢ်က့ဒ့ၣ် ဒီးပှၤပိာ်ခွါ အဂၤ ၁၀,၀၀၀ ပိာ်ထီၣ်အခံလီၤ. ဒီးနီၢ်ဒဘိရၤ လဲၤထီၣ်ဃုာ်ဒီးအီၤ စ့ၢ်ကီးလီၤ.
၁၁ ဒီးမ့မ့ၢ် ပှၤက့ၣ်ဖိ+ စီၤဃ့ဘ့ၢ်န့ၣ် အဝဲသူၣ်အဒဲ ဘူးဒီး သ့ၣ်ထူၣ်ဖးဒိၣ်တထူၣ်လၢ စၤဧနဲၣ်အပူၤ လၢအအိၣ်လၢ ဝ့ၢ်က့ဒ့ၣ်အကပၤလီၤ. အဝဲအိၣ်လီၤဖးဒီး ပှၤက့ၣ်ဖိတဖၣ် လၢအမ့ၢ် စီၤမိၤၡ့အမံၤပှၢ် စီၤဃိဘာ် အစၢၤအသွဲၣ်တဖၣ်လီၤ.+
၁၂ ဒီးပှၤတဲဘၣ် စီၤစံစရၤလၢ စီၤအဘံနိၣ်အဖိခွါ စီၤဘါရးန့ၣ် လဲၤထီၣ်ဝဲလၢ ကစၢၢ်တၤဘိၢ်န့ၣ်လီၤ.+ ၁၃ ဒီးစီၤစံစရၤ အလ့ၣ်ကဟၣ်သုးလၢ အအိၣ်ဒီးထါဂဲာ်န့ၣ် အိၣ်ဝဲ အခိၣ် ၉၀၀ လီၤ. အဃိ တဘျီဃီန့ၣ် အဝဲ ကတဲာ်ကတီၤထီၣ်ဝဲ အလ့ၣ်ကဟၣ်သုးခဲလၢာ် ဒီးကိးဖှိၣ်ဝဲ အသုးဖိလၢ အအိၣ်ဒီးအီၤ ကိးဂၤဒဲး ဒ်သိးကလဲၤပိာ်အခံ စးထီၣ်လၢ ဃရိၡ့း အတၢ်လီၢ် တုၤလၢ ထံကျိဖိကံၡိၣ်လီၤ.+ ၁၄ ဒီးနီၢ်ဒဘိရၤ တဲဘၣ် စီၤဘါရးလၢ “တနံၤအံၤ ယဟိဝၤယွၤ ကဟ့ၣ်လီၤကွံာ် စီၤစံစရၤ လၢနစုပူၤအဃိ လဲၤတၢ်တက့ၢ်. ယဟိဝၤယွၤ ကလဲၤလၢနမဲာ်ညါ တမ့ၢ်ဧီၤ.” ဒီးစီၤဘါရး လဲၤလီၤလၢ ကစၢၢ်တၤဘိၢ်အလိၤ ဒီးပှၤပိာ်ခွါ အဂၤ ၁၀,၀၀၀ လဲၤလီၤပိာ်အခံလီၤ. ၁၅ ဒီးယဟိဝၤယွၤ ဒုးအိၣ်ထီၣ် တၢ်သဘံၣ်သဘုၣ်လၢ+ စီၤစံစရၤ, အလ့ၣ်ကဟၣ်သုး ဒီးအသုးမုၢ်ခဲလၢာ်အကျါ ဒီးမၤဟးဂီၤ အဝဲသ့ၣ်လၢ စီၤဘါရးအနးလီၤ. လၢခံ စီၤစံစရၤ စံၣ်လီၤလၢ အလ့ၣ်ကဟၣ်သုး အလိၤ ဒီးဃ့ၢ်ကွံာ်ဝဲ လၢအခီၣ်လီၤ. ၁၆ စီၤဘါရး လူၤဝဲ သုးမုၢ်ဒီး လ့ၣ်ကဟၣ်သုးတဖၣ် ပၢၢ်တုၤလၢ ဃရိၡ့း အတၢ်လီၢ်န့ၣ်လီၤ. အဃိ စီၤစံစရၤ အသုးမုၢ်ခဲလၢာ် သံကွံာ်ဝဲ လၢနးလီၤ. ဒီးပှၤတပူၤဖျဲး နီတဂၤဘၣ်.+
၁၇ မ့မ့ၢ် စီၤစံစရၤန့ၣ် ဃ့ၢ်ဝဲလၢ ပှၤက့ၣ်ဖိ စီၤဃ့ဘ့ၢ်အမါ+ နီၢ်ယဧ့လးအဒဲ,+ မ့ၢ်လၢ တၢ်ဃူတၢ်ဖိးအိၣ်ဝဲလၢ ဝ့ၢ်ဃါစိၢ်အစီၤပၤ ယၤဘံၣ်+ ဒီးပှၤက့ၣ်ဖိ စီၤဃ့ဘ့ၢ် အဟံၣ်ဖိဃီဖိ အဘၢၣ်စၢၤအဃိလီၤ. ၁၈ ဒီးနီၢ်ယဧ့လး ဟဲထီၣ်သဂၢၢ် စီၤစံစရၤ ဒီးတဲအီၤလၢ “ကစၢ်ဧၢ, ဟဲနုာ်မီၤ. ဟဲနုာ်ဖဲအံၤ ဒီးတဘၣ်ပျံၤတၢ်တဂ့ၤ.” အဃိ စီၤစံစရၤ လဲၤနုာ်ဝဲလၢ နီၢ်ယဧ့လး အဒဲပူၤ ဒီးနီၢ်ယဧ့လး ဒုးလုးထီၣ်အီၤ ယၣ်လီၤ. ၁၉ ဒီးစီၤစံစရၤ တဲနီၢ်ယဧ့လးလၢ “ယဘၣ်သးအီထံညါ. ဝံသးစူၤ, ဟ့ၣ်ဒုးအီယၤ ထံတစဲးမီၤ.” အဃိ နီၢ်ယဧ့လး အိးထီၣ် တၢ်နုၢ်ထံ အထၢၣ်တၢ်ဖံး ဒီးဒုးအီအီၤလီၤ.+ ဝံၤဒီး နီၢ်ယဧ့လး ဒုးလုးထီၣ်ကဒီးအီၤ ယၣ်လီၤ. ၂၀ စီၤစံစရၤ တဲအီၤလၢ “ဆၢထၢၣ်လၢ ဒဲအကျဲစၢၤ ဒီးပှၤတဂၤဂၤ မ့ၢ်ဟဲသံကွၢ်နၤလၢ ‘ပှၤပိာ်ခွါ အိၣ်ဖဲအံၤတဂၤဂၤဧါ’ န့ၣ် တဲအီၤလၢ ‘တအိၣ်ဘၣ်’ တက့ၢ်.”
၂၁ ဘၣ်ဆၣ် စီၤဃ့ဘ့ၢ်အမါ နီၢ်ယဧ့လး ဟံးန့ၢ်ဝဲ နီၣ်ဒိတဘိ ဒီးနီၣ်ပျၤ တဘိလီၤ. ဒီးဖဲ စီၤစံစရၤ လီၤဘှံးလီၤတီၤ ဒီးမံဝဲလီၤကၢ်လီၤကုၤအခါ နီၢ်ယဧ့လး လဲၤလၢအအိၣ် ကစုဒု ဒီးပျၤနုာ် နီၣ်ပျၤတဘိ လၢအနၢ်သက့ၤထံး ဒီးဆဲးပျၤဝဲ တုၤလၢ အနုာ်လီၤလၢ ဟီၣ်ခိၣ်လိၤလီၤ. ဒီးစီၤစံစရၤ သံဝဲလီၤ.+
၂၂ စီၤဘါရး လူၤဃုဝဲ စီၤစံစရၤ ဖဲန့ၣ်လီၤ. ဒီးနီၢ်ယဧ့လး ဟဲထီၣ် သဂၢၢ်ဝဲ စီၤဘါရး ဒီးတဲအီၤလၢ “ဟဲ, ယကဒုးနဲၣ်နၤ ပှၤပိာ်ခွါ လၢနလူၤအီၤတဂၤန့ၣ်.” ဒီးစီၤဘါရး လဲၤနုာ်လီၤပိာ် နီၢ်ယဧ့လးအခံ လၢဒဲပူၤ ဒီးထံၣ်ဘၣ်ဝဲလၢ စီၤစံစရၤ သံလၢမံနီၤ ဒီးနီၣ်ပျၤတဘိ အိၣ်လၢ အနၢ်သက့ၤထံးလီၤ.
၂၃ အဃိ ဖဲနံၤအဝဲန့ၣ် ကစၢ်ယွၤ ဟ့ၣ်ပှၤအံၣ်စရ့လးဖိ တၢ်မၤနၢၤ လၢကနၤဧၣ် အစီၤပၤယၤဘံၣ် အဖီခိၣ်လီၤ.+ ၂၄ ပှၤအံၣ်စရ့လးဖိ အဂံၢ်အဘါ ဆူၣ်ထီၣ် ဆူၣ်န့ၢ်ဒံး ကနၤဧၣ်+ အစီၤပၤယၤဘံၣ် ဒီးလၢခံ အဝဲသ့ၣ် မၤသံကွံာ်ဝဲ ကနၤဧၣ် အစီၤပၤယၤဘံၣ်လီၤ.+